ADVERTISEMENT

ADVERTISEMENT

കർഷകർ യഥാർഥ രാഷ്ട്രസേവകർ: മന്ത്രി കെ. കൃഷ്ണൻകുട്ടി

അങ്കമാലി: കാർഷിക മേഖലയുടെ വളർച്ച രാജ്യപുരോഗതി ഉറപ്പ് വരുത്തുമെന്നും യഥാർഥ രാഷ്ട്രസേവകർ കർഷകരാണെന്നും മന്ത്രി കെ.കൃഷ്ണൻകുട്ടി. സംസ്ഥാന കൃഷി വകുപ്പും അങ്കമാലി സിഎസ്എയും എ.പി.കുര്യൻ സ്മാരക ലൈബ്രറി കർഷക വേദിയും സംയുക്തമായി സിഎസ്എ ഹാളിൽ നടത്തിയ കാർഷികോത്സവം - വിത്തും കൈക്കോട്ടും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

സിഎസ്എ പ്രസിഡന്‍റ് ഡോ. സി.കെ. ഈപ്പൻ അധ്യക്ഷനായി. മുൻ മന്ത്രി അഡ്വ. ജോസ് തെറ്റയിൽ, പാറക്കടവ് ഗ്രാമപഞ്ചായത്ത് പ്രസിഡന്‍റ് എസ്. ജയദേവൻ, മഞ്ഞപ്ര പഞ്ചായത്ത് പ്രസിഡന്‍റ് വത്സലകുമാരി വേണു, കറുകുറ്റി ഗ്രാമപഞ്ചായത്ത് പ്രസിഡന്‍റ് ലതിക ശശികുമാർ, സ്വാഗത സംഘം ചെയർമാൻ അഡ്വ. കെ.കെ. ഷിബു,കെടിഡിസി ഡയറക്ടർ ബെന്നി മൂഞ്ഞേലി, നഗരസഭ പ്രതിപക്ഷ നേതാവ് ടി.വൈ.ഏല്യാസ്, നഗരസഭ വികസന സ്റ്റാൻഡിംഗ് കമ്മിറ്റി ചെയർമാൻ പോൾ ജോവർ തുടങ്ങിയവർ സംസാരിച്ചു.

ADVERTISEMENT

കാറിടിച്ചു പരിക്കേറ്റ റിട്ട. ഇഎസ്ഐ ജീവനക്കാരി മരിച്ചു

വൈപ്പിൻ: കാറിടിച്ചു പരിക്കേറ്റ് ചികിത്സയിലായിരുന്ന റിട്ടയേർഡ് ഇഎസ്ഐ ജീവനക്കാരി മരിച്ചു. നായരന്പലം പുത്തലത്ത് പരേതനായ രാമൻപിള്ളയുടെ മകൾ ഝാൻസി (64) ആണ് മരിച്ചത്. 23ന് നായരന്പലം കുടുങ്ങാശേരി ബസ് സ്റ്റോപ്പിൽ നിൽക്കവെ നിയന്ത്രണംവിട്ട കാർ ഝാൻസിയെ ഇടിക്കുകയായിരുന്നു. എറണാകുളത്തെ സ്വകാര്യ ആശുപത്രിയിൽ ചികിത്സയിലിരിക്കയാണ് മരിച്ചത്. സംസ്കാരം നടത്തി. അമ്മ: പരേതയായ രുഗ്മിണി. സഹോദരങ്ങൾ: ഗീത, ബാലാനന്ദൻ പിള്ള, രാധാകൃഷ്ണ പിള്ള, സൈന.

"വേടൻ' വലയിൽ; കഞ്ചാവുമായി "റാപ്പർ വേടനും’ സംഘവും അറസ്റ്റിൽ

തൃപ്പൂണിത്തുറ: കഞ്ചാവുമായി "റാപ്പർ വേടൻ’എന്നറിയപ്പെടുന്ന ഹിരൺ ദാസ് മുരളിയുൾപ്പെടെ ഒന്പതുപേരെ പോലീസ് അറസ്റ്റ് ചെയ്തു. രഹസ്യവിവരത്തെത്തുടർന്ന് ഇന്നലെ രാവിലെ പത്തോടെ എരൂർ കണിയാമ്പുഴയിലുള്ള സ്വാസ് പാർപ്പിടസമുച്ചയത്തിലെ ഫ്ലാറ്റിൽ നടത്തിയ പരിശോധനയിലാണ് കഞ്ചാവ് കണ്ടെടുത്തത്. വേടൻ എന്നറിയപ്പെടുന്ന, തൃശൂർ മുളങ്കുന്നത്തുകാവ് വടക്കേപുരയിൽ വീട്ടിൽ വി.എം. ഹിരൺദാസ് (30), സംഘാംഗങ്ങളായ പത്തനംതിട്ട ആറന്മുള ചെമ്പകമംഗലത്ത് വില്ല വിനായക് മോഹൻ (30), തിരുവനന്തപുരം പാപ്പനംകോട് കൈമനം അമൃതനഗർ ശ്രീകൈലാസത്തിൽ വൈഷ്ണവ് ജി. പിള്ള (24), മലപ്പുറം പെരിന്തൽമണ്ണ കുന്നപ്പള്ളി കര ന്തോടി വീട്ടിൽ കെ. ജാഫർ(29), പാപ്പനംകോട് കൈമനം അമൃതനഗർ ശ്രീകൈലാസത്തിൽ വിഘ്നേഷ് ജി. പിള്ള (27), തൃശൂർ പറളിക്കാട് ഇല്ലിക്കോട്ടിൽ വീട്ടിൽ കശ്യപ് ഭാസ്കർ (26), വടക്കൻ പറവൂർ മന്നം കയ്യാലപ്പറമ്പിൽ വീട്ടിൽ കെ.ഡബ്ല്യു. വിഷ്ണു (26), കോട്ടയം മീനടം വട്ടുകുന്ന് വെങ്ങാശേരിൽ വീട്ടിൽ വിമൽ സി. ജോയി (23), തൃശൂർ മാള മണിയങ്കാവ് സൗത്ത് പുത്തൻചിറ വട്ടപ്പറമ്പിൽ വീട്ടിൽ വി.എസ്. ഹേമന്ത് (22) എന്നിവരെയാണു ഹിൽപാലസ് പോലീസ് അറസ്റ്റ് ചെയ്തത്. പിന്നീട് സ്റ്റേഷൻ ജാമ്യത്തിൽ വിട്ടയച്ചു. ഫ്ലാറ്റിൽനിന്ന് ആറ് ഗ്രാം കഞ്ചാവും 9.5 ലക്ഷം രൂപയും മൊബൈൽ ഫോണുകളും പിടിച്ചെടുത്തിട്ടുണ്ട്. പരിപാടി ബുക്ക് ചെയ്തതിനു ലഭിച്ച തുകയാണു പണമെന്നാണ് വേടൻ അറിയിച്ചത്. ഞായറാഴ്ച രാത്രിയാണ് വേടനുൾപ്പെടെയുള്ള സംഘം പരിപാടി കഴിഞ്ഞ് ഫ്ലാറ്റിലെത്തിയതെന്നു പറയുന്നു. പോലീസ് പരിശോധനയ്ക്കെത്തുമ്പോൾ എല്ലാവരും വിശ്രമത്തിലായിരുന്നു. കഴിഞ്ഞ ദിവസം ഇവിടെ ബാച്ചിലർ പാർട്ടി നടന്നതായി പറയുന്നു. ഈ വിവരം ലഭിച്ചതിനെത്തുടർന്ന് ഇവിടം പോലീസ് നിരീക്ഷണത്തിലായിരുന്നു. പുലിപ്പല്ല്: വേടനെതിരേ കേസെടുക്കും തൃപ്പൂണിത്തുറ: കഞ്ചാവുകേസിൽ പിടിയിലായ റാപ്പർ വേടനെതിരേ പുലിപ്പല്ലുള്ള മാലയുടെ പേരിൽ വനംവകുപ്പ് ജാമ്യമില്ലാ കുറ്റം ചുമത്തി കേസെടുത്തേക്കും. വേടനെ ഇന്നു കോടനാട്ടെ വനം വകുപ്പ് ഓഫീസിലേക്ക് കൊണ്ടുപോകും. തായ്‌ലൻഡിൽനിന്നു കൊണ്ടുവന്ന പുലിപ്പല്ലാണിതെന്നാണ് വേടൻ പറഞ്ഞത്. ഒരു പരിപാടി നടത്തിയതിനു സമ്മാനമായി ലഭിച്ചതാണെന്നാണു വെളിപ്പെടുത്തിയത്. വേടന്‍റെ മുറിയിൽനിന്ന് കത്തിയും മഴുപോലെയുള്ള ആയുധവും കണ്ടെടുത്തിരുന്നു. പരിപാടിയുടെ ഭാഗമായി അവതരിപ്പിക്കാനുള്ളതാണ് മഴു എന്നാ ണു പറയുന്നത്.

ഹൈബ്രിഡ് കഞ്ചാവുമായി സംവിധായകർ പിടിയിലായ സംഭവം :അന്വേഷണത്തിന് ഏഴംഗസംഘം

കൊച്ചി: ഹൈബ്രിഡ് കഞ്ചാവുമായി സിനിമാസംവിധായകരടക്കം മൂന്നുപേര്‍ പിടിയിലായ കേസില്‍ പ്രത്യേക അന്വേഷണ സംഘം രൂപീകരിച്ചു. എക്‌സൈസ് എന്‍ഫോഴ്‌സ്‌മെന്‍റ് അസിസ്റ്റന്‍റ് കമ്മീഷണര്‍ എം.എസ്. സുരേഷിന്‍റെ നേതൃത്വത്തിലാണ് ഏഴംഗ അന്വേഷണ സംഘം രൂപീകരിച്ചത്. കേസില്‍ അറസ്റ്റിലായ സംവിധായകരായ ഖാലിദ് റഹ്മാന്‍, അഷ്‌റഫ് ഹംസ, ഇവരുടെ സുഹൃത്ത് ഷാലിഫ് മുഹമ്മദ് എന്നിവരെ അന്വേഷണസംഘം വീണ്ടും ചോദ്യം ചെയ്യും. ഇതിനായി ഇവര്‍ക്ക് എക്‌സൈസ് സംഘം ഉടന്‍ നോട്ടീസ് നല്‍കും. ചോദ്യംചെയ്യലിന് ഹാജരാകാന്‍ സമീറിനും ഉടനെ നോട്ടീസ് അയയ്ക്കും. ഛായാഗ്രാഹകന്‍ സമീര്‍ താഹിറിന്‍റ് ഫ്ളാറ്റിൽ ഷാലിഫ് മുഹമ്മദാണ് കഞ്ചാവ് എത്തിച്ചത്. ഇയാള്‍ക്ക് കഞ്ചാവ് നല്‍കിയ കൊച്ചി സ്വദേശിക്കായി അന്വേഷണം ഊര്‍ജിതമാക്കി. ആലപ്പുഴയിലെ ഹൈബ്രിഡ് കഞ്ചാവുകേസുമായി ഇവര്‍ക്ക് ബന്ധമുണ്ടോയെന്നും അന്വേഷിക്കുന്നുണ്ട്. അതേസമയം, അറസ്റ്റിലായവരില്‍ നിന്ന് എക്‌സൈസ് പിടിച്ചെടുത്ത 1.63 ഗ്രാം ഹൈബ്രിഡ് കഞ്ചാവ് തിങ്കളാഴ്ച എറണാകുളം ചീഫ് ജുഡീഷല്‍ മജിസ്‌ട്രേറ്റ് കോടതിയില്‍ ഹാജരാക്കി. കഞ്ചാവ് പിടികൂടിയതിന്റെ റിപ്പോര്‍ട്ടും എക്‌സൈസ് കോടതിയില്‍ സമര്‍പ്പിച്ചു. ഞായറാഴ്ച പുലര്‍ച്ചെ രഹസ്യ വിവരത്തെ തുടര്‍ന്ന് ഗോശ്രീ പാലത്തിനുസമീപത്തെ ഫ്‌ളാറ്റില്‍ നടത്തിയ പരിശോധനയിലാണ് സംവിധായകരും സുഹൃത്തും പിടിയിലായത്. എക്‌സൈസ് സംഘം എത്തുമ്പോള്‍ ഇവര്‍ ലഹരി ഉപയോഗിക്കാനുള്ള തയാറെടുപ്പിലായിരുന്നു.

കൊച്ചി നഗരത്തില്‍ മൂന്നര മാസത്തിനിടെ പിടിച്ചെടുത്തത് 871 ഗ്രാം എംഡിഎംഎ

കൊച്ചി: കഴിഞ്ഞ മൂന്നര മാസത്തിനിടെ കൊച്ചി നഗരത്തിലും പരിസര പ്രദേശങ്ങളിലുമായി കൊച്ചി സിറ്റി ഡാന്‍സാഫ് സംഘം പിടിച്ചെടുത്ത് 871.24 ഗ്രാം എംഡിഎംഎ. 2025 ജനുവരി ഒന്നു മുതല്‍ 2025 ഏപ്രില്‍ 15 വരെ 98 ലഹരിക്കേസുകളാണ് ഡാന്‍സാഫ് സംഘം രജിസ്റ്റര്‍ ചെയ്തത്. ഇതില്‍ 122 പേരാണ് അറസ്റ്റിലായത്. വാണിജ്യാടിസ്ഥാനത്തില്‍ ലഹരി വില്പനയുമായി ബന്ധപ്പെട്ട് 14 കേസുകള്‍ റിപ്പോര്‍ട്ട് ചെയ്തു. മീഡിയം അളവില്‍ ലഹരി കൈവശം വച്ചതിന് 23 കേസുകളും ചെറിയ അളവിലുള്ള 61 ലഹരിക്കേസുകളും രജിസ്റ്റര്‍ ചെയ്യുകയുണ്ടായി. പിടിച്ചെടുക്കപ്പെട്ട കഞ്ചാവ് 137.42 കിലോഗ്രാമാണ്. 15.26 ഗ്രാം ഹാഷിഷ് ഓയില്‍, 18.5 ഗ്രാം എല്‍എസ്ഡി ഷുഗര്‍ ക്യൂബ്, 121.91 ഗ്രാം മെത്താഫിറ്റമിന്‍, 11.86 ഗ്രാം ബ്രൗണ്‍ ഷുഗര്‍ എന്നിവയും ഡാന്‍സാഫ് സംഘം പിടികൂടുകയുണ്ടായി. നര്‍ക്കോട്ടിക് സെല്‍ എസി കെ.എ. അബ്ദുള്‍ സലാമിന്‍റെ നേതൃത്വത്തില്‍ നഗരത്തില്‍ നടത്തിയ ലഹരി വേട്ടയാണ് നടന്‍ ഷൈന്‍ ടോം ചാക്കോ, റാപ്പര്‍ വേടന്‍ എന്നിവരുടെ അറസ്റ്റിലേക്ക് നയിച്ചതും. കേസുകളുടെ എണ്ണം കുറഞ്ഞു: നര്‍ക്കോട്ടിക് സെല്‍ എസി നഗരത്തിലും പരിസര പ്രദേശങ്ങളിലും ലഹരി പരിശോധന ശക്തമായതോടെ ലഹരിക്കേസുകളുടെ എണ്ണം കുറഞ്ഞതായി നര്‍ക്കോട്ടിക് സെല്‍ അസിസ്റ്റന്‍റ് കമ്മീഷണര്‍ കെ.എ. അബ്ദുല്‍ സലാം പറഞ്ഞു. ലഹരിയുമായി പിടിയിലാകുന്നവരില്‍ ഏറെയും ജില്ലയ്ക്ക് പുറത്തു നിന്നുള്ളവരാണ്. ഇതില്‍ സ്ത്രീകളും ഉള്‍പ്പെടുമെന്ന് അദ്ദേഹം പറഞ്ഞു.

എംഡിഎംഎയുമായി യുവാവ് പിടിയിൽ

പറവൂർ : എംഡിഎംഎയുമായി യുവാവ് പിടിയിൽ. ചേന്ദമംഗലം കിഴക്കൻ തുരുത്ത് ബാലരാമപുരം ആലുവിള സൗമ്യഭവനിൽ ആദർശ് (ജിത്തു 28 ) നെയാണ് റൂറൽ ജില്ലാ ഡാൻസാഫ് ടീമും വടക്കേക്കര പോലീസും ചേർന്ന് പിടികൂടിയത്. വീട്ടിലെ അലമാരയിൽ സൂക്ഷിച്ച നിലയിലാണ് രാസലഹരി കണ്ടെത്തിയത്. യുവാക്കൾക്കും വിദ്യാർഥികൾക്കുമായിരുന്നു വിൽപ്പന. ഇയാളിൽ നിന്ന് മയക്കുമരുന്ന് വാങ്ങിയവരെക്കുറിച്ചും പോലീസ് അന്വേഷിക്കുന്നുണ്ട്. നർക്കോട്ടിക്ക് സെൽ ഡിവൈഎസ്പി ജെ. ഉമേഷ് കുമാർ, മുനമ്പം ഡിവൈഎസ്പി എസ്.ജയകൃഷ്ണൻ വടക്കേക്കര എസ്എച്ച്‌ഒ കെ.ആർ. ബിജു, എസ്ഐമാരായ എം. ഷെറി, സി.എസ്. ഗിരീഷ്, എഎസ്ഐമാരായ വി.ഡി. റീന, എം.ഒ. ഡിക്സൻ, സിപിഒമാരായ ശീതൾ, ശ്രീരാഗ് തുടങ്ങിയവരാണ് അന്വേഷണ സംഘത്തിലുണ്ടായിരുന്നത്.

നെടുന്പാശേരിയിൽ ഏഴു മാസത്തിനിടെ പിടികൂടിയത് 45 കോടിയുടെ ഹൈബ്രിഡ് കഞ്ചാവ്

നെടുമ്പാശേരി : കഴിഞ്ഞ ഏഴു മാസത്തിനിടെ നെടുമ്പാശേരി രാജ്യാന്തര വിമാനത്താവളത്തിൽ വിവിധ കസ്റ്റംസ് വിഭാഗങ്ങൾ പിടികൂടിയത് 90 കിലോഗ്രാം ഹൈബ്രിഡ് കഞ്ചാവ്. ഇതിന് 45 കോടിയോളം രൂപ വിലവരും. ഇതിൽ 39.5 കോടി രൂപയുടെ ഹൈബ്രിഡ് കഞ്ചാവ് വിദേശത്തുനിന്ന് കൊണ്ടുവന്നപ്പോഴും 5.5 കോടി രൂപയുടെ കഞ്ചാവ് ഇവിടെ നിന്ന് വിദേശത്തേക്ക് കടത്താൻ ശ്രമിക്കുമ്പോഴുമാണ് പിടിയിലായത്. കഴിഞ്ഞ സെപ്റ്റംബർ 30 ന് 2.12 കോടി രൂപ വിലവരുന്ന 4.239 കിലോഗ്രാം ഹൈബ്രിഡ് കഞ്ചാവാണ് പിടിച്ചെടുത്തത്. നവംബർ 15 ന് 15 കിലോ, നവംബർ 30 ന് എട്ട് കിലോ, ഡിസംബർ ഒന്പതിന് 12 കിലോ, ഡിസംബർ 16 ന് 14.500 കിലോ, ഈ വർഷം ഫെബ്രുവരി 13 ന് 15 കിലോ, മാർച്ച് 19 ന് 15 കിലോ, ഏപ്രിൽ 15 ന് 1.200 കിലോ, ഏപ്രിൽ 25 ന് 5.5 കിലോ എന്നിങ്ങനെയായിരുന്നു നെടുമ്പാശേരിയിലെ ഹൈബ്രിഡ് കഞ്ചാവ് വേട്ട. 11 കേസുകളാണ് ഈ കാലയളവിൽ ഇതുമായി ബന്ധപ്പെട്ട് രജിസ്റ്റർ ചെയ്തിരിക്കുന്നത്. കേരളത്തിലേക്ക് വൻ തോതിൽ ഹൈബ്രിഡ് കഞ്ചാവ് എത്തിക്കുന്നത് ബാങ്കോക്കിൽ നിന്നാണ്. സംസ്ഥാനത്തെ വിമാനത്താവളങ്ങൾ വഴി സുരക്ഷിതമായി എത്തിക്കുന്ന ഹൈബ്രിഡ് കഞ്ചാവ് ഇവിടെ നിന്നും ഗൾഫ് രാജ്യങ്ങൾ ഉൾപ്പെടെ മറ്റു സ്ഥലങ്ങളിലേക്ക് കൊണ്ടുപോവുകയാണ്. ഇത്തരത്തിൽ വിപണനം നടത്തുമ്പോൾ അന്താരാഷ്ട്ര മാർക്കറ്റിൽ അഞ്ചിരട്ടിയിലേറെ ലാഭമാണ് ലഭ്യമാകുന്നത്. ഉന്നത ബന്ധങ്ങളുള്ള വൻ മാഫിയയാണ് മയക്കുമരുന്ന് വിപണനത്തിന് പിന്നിൽ പ്രവർത്തിക്കുന്നത്. അതുകൊണ്ടുതന്നെ പിടിയിലാകുന്ന കരിയർമാരിൽ അന്വേഷണം അവസാനിക്കുകയാണ് പതിവ്.

ആലുവ മാർക്കറ്റ് കെട്ടിട സമുച്ചയ നിർമാണം; വ്യാപാരികളെ ഒഴിപ്പിക്കാനുള്ള ശ്രമം പരാജയപ്പെട്ടു

ആലുവ: 50 കോടി രൂപ മുടക്കി മാർക്കറ്റ് സമുച്ചയം നിർമിക്കുന്നതിന് മുന്നോടിയായി പദ്ധതി പ്രദേശത്തിന് സമീപത്ത് താത്കാലിക ഷെഡിൽ പ്രവർത്തിക്കുന്ന 51 പച്ചക്കറി വ്യാപാരികളെ ഒഴിപ്പിക്കാനുള്ള ആലുവ നഗരസഭയുടെ ശ്രമം പരാജയപ്പെട്ടു. സംഘർഷ സാധ്യത കണക്കിലെടുത്ത് ജില്ലാ കളക്ടറുടെ നിർദ്ദേശപ്രകാരമാണ് വ്യാപാരികളെ ഒഴിപ്പിക്കുന്നത് നിർത്തിവച്ചത്. വ്യാപാരികൾ നൽകിയ ഹർജി ഹൈക്കോടതിയിൽ ഇന്ന് വീണ്ടും പരിഗണിക്കുകയാണെന്നും അതിനു ശേഷം ഉചിതമായി തീരുമാനമെടുക്കുമെന്ന് വ്യാപാരികൾ അറിയിച്ചു. ഒഴിപ്പിക്കാൻ എത്തിയ ആലുവ നഗരസഭാ സെക്രട്ടറി പി.ജെ. ജെസീന്ത, റവന്യൂ ഉദ്യോഗസ്ഥ കെ. രമണി എന്നിവർക്ക് ഇക്കാ ര്യങ്ങൾ എഴുതി നൽകിയതായും വ്യാപാരികൾ പറഞ്ഞു. പുതിയ മാർക്കറ്റ് കെട്ടിട നിർമാണ പ്രവർത്തനങ്ങളുടെ ഉദ്ഘാടനം മെയ് 27ന് മുഖ്യമന്ത്രി പിണറായി വിജയൻ നിർവഹിക്കുമെന്നും ഇതിന് മുന്നോടിയായാണ് യാർഡിൽ നിന്ന് കച്ചവടക്കാരെ ഒഴിപ്പിക്കുന്നതെന്ന് നഗരസഭ ചെയർമാൻ എം.ഒ. ജോൺ അറിയിച്ചു. താൽക്കാലിക സ്റ്റാളുകൾ പൊളിച്ചു നീക്കുന്നതിന് ജെസിബി, കട്ടിംഗ് മെഷീനുകൾ, വാഹനങ്ങൾ എന്നിവ സഹിതം സെക്രട്ടറി അടക്കമുള്ള ഉദ്യോഗസ്ഥരും തൊഴിലാളികളും യാർഡിലേക്ക് പ്രവേശിച്ചപ്പോൾ കച്ചവടക്കാർ ചില രാഷ്ട്രീയ നേതാക്കളുടെയും മറ്റും നേതൃത്വത്തിൽ തടഞ്ഞതെന്ന് നഗരസഭ ആരോപിച്ചു. നൂറു കണക്കിന് പോലീസ് സേനാംഗങ്ങൾ എത്തിയെങ്കിലും മതിയായ പോലീസ് സംരക്ഷണം ലഭിച്ചില്ലെന്ന് നഗരസഭ ചെയർമാൻ കുറ്റപ്പെടുത്തി. സംഘർഷ സമയത്ത് കൊന്നുകളയുമെന്ന് ചിലർ ഭീഷണിപ്പെടുത്തിയെന്ന് ആരോഗ്യ സ്ഥിരം സമിതിയധ്യക്ഷൻ എം.പി. സൈമൺ"ദീപിക' യോട് പറഞ്ഞു. വികസന പദ്ധതിയ്ക്ക് വ്യാപാരികൾ തടസം നിൽക്കരുതെന്ന് അൻവർ സാദത്ത് എംഎൽഎ ആവശ്യപ്പെട്ടു. അതേ സമയം മൂന്നര ഏക്കർ സ്ഥലത്ത് 90 സെന്‍റിലാണ് പുതിയ കെട്ടിടം നിർമിക്കുന്നതെന്നും നിലവിൽ ഷെഡ് നിർമിച്ച് വ്യാപാരം നടത്തുന്ന കച്ചവടക്കാർ പദ്ധതി പ്രദേശത്ത് നിന്ന് അകലയാണെന്നും അതിനാൽ കച്ചവടം തുടരാൻ അനുവദിക്കണമെന്ന് ആലുവ മാർക്കറ്റ് സൗഹൃദ കൂട്ടായ്മ പ്രസിഡന്‍റ് ജോഷി ജോൺ, ജോയിന്‍റ് സെക്രട്ടറി മനീഷ് മാത്യു, ട്രഷറർ ടി.എ. നവാസ് എന്നിവർ വാർത്താ സമ്മേളനത്തിൽ ആവശ്യപ്പെട്ടു. 77 വ്യാപാരികളിൽ നിന്ന് ഒന്നു മുതൽ മൂന്നു ലക്ഷം രൂപ വരെ മുൻകൂർ തുക വാങ്ങിയിട്ടുണ്ടെന്ന് ആലുവ നഗരസഭ അറിയിച്ചു. ഇവർക്ക് പുതിയ കെട്ടിടത്തിൽ ലേലം ഇല്ലാതെ മുറികൾ നൽകുമെന്നും ബാക്കി 11 മുറികളിൽ ലേലം ഉണ്ടാകുമെന്നും ആലുവ നഗരസഭ ആരോഗ്യസ്ഥിരം സമിതിയധ്യക്ഷൻ എം.പി. സൈമൺ ' ദീപിക' യോട് പറഞ്ഞു.

ലഹരി ഉപയോഗിച്ചാലേ സിനിമാ സെറ്റില്‍ പ്രവർത്തിക്കാനാകൂ എന്ന വാദം വിചിത്രം: സിബി മലയില്‍

കൊച്ചി: ലഹരി ഉപയോഗിച്ചാല്‍ മാത്രമേ സിനിമാ സെറ്റില്‍ ഊർജത്തോടെ പ്രവർത്തിക്കാന്‍ കഴിയൂ എന്ന വാദം വിചിത്രമെന്ന് സംവിധായകനും ഫെഫ്ക പ്രസിഡന്‍റുമായ സിബി മലയില്‍. ഒരു ലഹരിയും ഇല്ലാതെ 25 ദിവസത്തില്‍ കിരീടം പോലൊരു സിനിമ ചിത്രീകരിച്ച ആളാണ് താനെന്നും അദ്ദേഹം പറഞ്ഞു. കൊച്ചിയിലെ ഫ്‌ളാറ്റില്‍ നിന്നും ഹൈബ്രിഡ് കഞ്ചാവുമായി സംവിധായകരായ ഖാലിദ് റഹ്മാനെയും അഷറഫ് ഹംസയെയും പിടികൂടിയത് നടുക്കമുണ്ടാക്കി. ക്രിയാത്മക ജോലികള്‍ക്ക് തടസമാകുമെന്ന് കരുതിയാണ് സെറ്റുകളിലെ ലഹരി പരിശോധനയെ നേരത്തെ എതിര്‍ത്തത്. എങ്കിലും നിയമാനുസൃതമായ നടപടികളില്‍ ഒരു എതിര്‍പ്പും ഇല്ലെന്ന് സിബി മലയില്‍ പറഞ്ഞു. അറസ്റ്റിലായ ഖാലിദ് റഹ്മാനേയും അഷ്‌റഫ് ഹംസയെയും ഫെഫ്ക കഴിഞ്ഞ ദിവസം സസ്‌പെന്‍ഡ് ചെയ്തിരുന്നു. കേസ് അന്വേഷണ പുരോഗതി അറിഞ്ഞശേഷം തുടര്‍നടപടി സ്വീകരിക്കും. ലഹരിയില്‍ വലിപ്പ, ചെറുപ്പമില്ലാതെ നടപടി സ്വീകരിക്കുമെന്ന് സിബി മലയില്‍ നേരത്തെ അറിയിച്ചിരുന്നു.

മലയാറ്റൂർ പുതുഞായർ തിരുനാൾ സമാപിച്ചു ; എട്ടാമിടം മേയ് രണ്ടു മുതൽ നാലു വരെ

കാലടി: മഴയെ അവഗണിച്ചും അന്താരാഷ്ട്ര തീർഥാടന കേന്ദ്രമായ മലയാറ്റൂർ പുതുഞായർ തിരുനാളിൽ പങ്കെടുത്ത് ആയിരങ്ങൾ. മാർപാപ്പയുടെ വിയോഗത്തെ തുടർന്ന്, തിരുനാളിനോനുബന്ധിച്ചുള്ള പ്രദക്ഷിണവും മറ്റ് ആഘോഷങ്ങളും ഒഴിവാക്കിയിരുന്നെങ്കിലും തീർഥാടകരുടെ വലിയ തിരക്കാണ് ശനി, ഞായർ ദിവസങ്ങളിൽ അനുഭവപ്പെട്ടത്. കുരിശുമുടിയിൽ നിന്ന് താഴത്തെ പള്ളിയിലേക്കുള്ള ആഘോഷമായ പൊൻപണമിറക്കൽ എട്ടാമിടം തിരുനാളിലേക്ക് മാറ്റിവച്ചു. മേയ് രണ്ടുമുതൽ നാലു വരെയാണ് എട്ടാമിടം തിരുനാൾ.

മുനമ്പത്ത് കാട്ടുപന്നിയിറങ്ങി

ചെറായി: പള്ളിപ്പുറം മുനമ്പം മേഖലയിൽ നാട്ടുകാർക്കു ഭീഷണിയായി കാട്ടുപന്നി വിലസുന്നു. കഴിഞ്ഞ ദിവസങ്ങളിൽരാത്രി പോത്തൻ വളവിലും മുനമ്പം പോലീസ് സ്റ്റേഷൻ വളപ്പിലുമാണ് കാട്ടുപന്നിയെ കണ്ടെത്തിയത്. രാത്രിയിൽ സ്റ്റേഷൻ വളപ്പിൽ ശബ്ദം കേട്ടതിനെ തുടർന്ന് പോലീസുകാർ സിസിടിവി കാമറ പരിശോധിച്ചപ്പോഴാണ് കാട്ടുപന്നിയാണെന്ന് വ്യക്തമായത്. സ്റ്റേഷൻ പരിസരം മൊത്തം കാടുകയറിക്കിടക്കുന്നതിനാൽ പകൽ സമയത്ത് ഈ കാടിനകത്ത് കഴിച്ചുകൂട്ടി രാത്രി ഇര തേടി നടക്കുകയാണെന്നാണ് നിഗമനം. കാട്ടിൽ നിന്ന് പെരിയാറിന്‍റെ കൈവഴിയിലൂടെ നീന്തി എത്തിയതായിരിക്കുമെന്നാണ് കരുതുന്നത്. രാത്രിയിൽ ഇരുചക്ര വാഹന യാത്രികരും കാൽ നടക്കാരും ശ്രദ്ധിക്കണമെന്ന് പോലീസ് മുന്നറിയിപ്പ് നൽകിയിട്ടുണ്ട്. കൂടാതെ വിവരം വനം വകുപ്പിനെയും അറിയിച്ചിട്ടുണ്ട്.

കാറിലും ലോറിയിലും ഇടിച്ച ഓട്ടോറിക്ഷ തകര്‍ന്നു

കോതമംഗലം: ദേശീയ പാതയില്‍ നെല്ലിമറ്റം മില്ലുംപടിയില്‍ കാറും ലോറിയുമായി കൂട്ടിയിടിച്ച ഓട്ടോറിക്ഷ തകര്‍ന്നു. ഓട്ടോ ഡ്രൈവര്‍ക്കും യാത്രക്കാരായ രണ്ട് കുട്ടികള്‍ക്കും പരിക്കേറ്റു. ഓട്ടോയില്‍ കുടുങ്ങിയ ഡ്രൈവറെ അഗ്നിരക്ഷാസേന എത്തിയാണ് രക്ഷപ്പെടുത്തിയത്. ഓട്ടോഡ്രൈവര്‍ ഷിഹാബുദീന്‍, കൂറ്റംവേലി സ്വദേശികളായ മുനാജ് (12), മുഹസിന്‍ (17) എന്നിവര്‍ക്കാണ് പരിക്കേറ്റത്. ഇന്നലെ (തിങ്കളാഴ്ച) വൈകിട്ട് അഞ്ചിനാണ് അപകടം. യാത്രക്കാരുമായി പോകുകയായിരുന്ന ഓട്ടോറിക്ഷ കാറിന് പിന്നില്‍ ഇടിച്ച് വട്ടംകറങ്ങി നിയന്ത്രണംവിട്ട് എതിരെ വന്ന ലോറിയിലേക്ക് ഇടിച്ചുകയറി. ഇടിയുടെ ആഘാതത്തില്‍ ഓട്ടോയുടെ മുന്‍വശം തകര്‍ന്നു. ഓടിക്കൂടിയ നാട്ടുകാര്‍ കുട്ടികളെ പുറത്തെടുത്തെടുത്തു. മുന്‍വശം തകര്‍ന്ന ഓട്ടോയുടെ ഉള്ളില്‍ കുടുങ്ങിയ ഷിഹാബുദീനെ പുറത്തെടുക്കാനായില്ല. വാഹനത്തിന്‍റെ മുന്‍ഭാഗം അകത്തേക്ക് തള്ളിയതിനിടയില്‍ കാലുകള്‍ കുടുങ്ങിയിരിക്കുകയായിരുന്നു ഷിഹാബുദീന്‍. നേര്യമംഗലത്ത് പോയി മടങ്ങിവരുകയായിരുന്ന അഗ്നിരക്ഷാസേന അംഗങ്ങള്‍ റോഡിലെ ആള്‍കൂട്ടം കണ്ട് വാഹനം നിര്‍ത്തി അന്വേഷിച്ചപ്പോഴാണ് അപകടം അറിഞ്ഞത്. ഉടന്‍ ഹൈഡ്രോളിക്ക് റെസ്‌ക്യൂ ടൂള്‍ ഉപയോഗിച്ച് ഓട്ടോയുടെ മുന്‍ഭാഗം അകത്തിമാറ്റി, കമ്പികള്‍ മുറിച്ച് നീക്കിയാണ് ഡ്രൈവറെ പുറത്തെടുത്തത്. പരിക്കേറ്റ മൂവരേയും അഗ്നി രക്ഷാസേന വാഹനത്തിലാണ് കോതമംഗലം എംബിഎംഎം ആശുപത്രിയില്‍ എത്തിച്ചത്.

ചെന്പ് കന്പിയും കേബിളുകളും മോഷ്ടിച്ച അഞ്ച് ഇതര സംസ്ഥാനക്കാർ പിടിയിൽ

മൂവാറ്റുപുഴ: കെഎസ്ഇബി സബ് സ്റ്റേഷനിലെ ചെന്പ് കന്പി ഉൾപ്പെടുന്ന കേബിളുകൾ മോഷ്ടിച്ച കേസിൽ അഞ്ച് ഇതര സംസ്ഥാന തൊഴിലാളികൾ പിടിയിൽ. ആസാം സ്വദേശികളായ സമിദുൽ ഹഖ് (31), ഇസ്മായിൽ അലി (40), അബ്ദുൾ കാസിം (45), ഇക്രമുൽ ഹഖ് (26), ഇമാൻ അലി (30) എന്നിവരെയാണ് മൂവാറ്റുപുഴ പോലീസ് പിടികൂടിയത്. മോഷ്ടിച്ച കേബിളുകളുടെ പ്ലാസ്റ്റിക് ഇൻസുലേഷൻ കത്തിച്ച് ഉരുക്കി മാറ്റി ചെറിയ തൂക്കങ്ങളാക്കി പലപ്പോഴായി വിൽപ്പന നടത്തിവരികയായിരുന്നു. പേഴയ്ക്കാപ്പിള്ളി സബ് സ്റ്റേഷനിലെ സോളാർ പാനലിൽനിന്നും മറ്റുമായി പത്ത് ലക്ഷത്തോളം രൂപ വിലവരുന്ന ചെന്പ് കന്പി ഉൾപ്പെടുന്ന കേബിളുകളാണ് മോഷ്ടിച്ചത്. എറണാകുളം റൂറൽ ജില്ലാ പോലീസ് മേധാവി എം. ഹേമലതയുടെ നിർദേശാനുസരണം ജില്ലയിലെ മോഷണ കേസുകളുടെ അന്വേഷണം ത്വരിതപ്പെടുത്തിയിരുന്നു. ശാസ്ത്രീയ അന്വേഷണത്തിലാണ് പ്രതികൾ പിടിയിലാകുന്നത്. മോഷണ മുതൽ വിവിധ ആക്രി കടകളിൽനിന്ന് കണ്ടെടുത്തു. ഇവർ മറ്റ് മോഷണങ്ങൾ നടത്തിയിട്ടുണ്ടോയെന്ന് അന്വേഷിച്ചുവരുന്നു. ഇൻസ്പെക്ടർ ബേസിൽ തോമസിന്‍റെ നേതൃത്വത്തിലുള്ള പ്രത്യേക സംഘമാണ് അന്വേഷണം നടത്തിയത്.

കഞ്ചാവുമായി പിടിയിലായ ബംഗാൾ സ്വദേശികൾ റിമാൻഡിൽ

മൂവാറ്റുപുഴ: കഴിഞ്ഞ ദിവസം 30 കിലോയോളം കഞ്ചാവുമായി പിടിയിലായ യുവതി ഉൾപ്പെടെയുള്ള ഇതര സംസ്ഥാനക്കാർ റിമാൻഡിൽ. പശ്ചിമ ബംഗാൾ മൂർഷിദാബാദ് സ്വദേശി സുഹേൽ റാണ മണ്ഡൽ (40), അലൻ ഗിൽ ഷെയ്ക്ക് (33), ഹസീന ഖാട്ടൂണ്‍ (33) എന്നിവരെയാണ് മൂവാറ്റുപുഴ കോടതി റിമാൻഡ് ചെയ്തത്. റൂറൽ ജില്ലാ ഡാൻസാഫ് ടീമും മൂവാറ്റുപുഴ പോലീസും ചേർന്നാണ് ഞായറാഴ്ച പ്രതികളെ മൂവാറ്റുപുഴ സംഗമം ജംഗ്ഷനിലെ ബസ് കാത്തിരിപ്പ് കേന്ദ്രത്തിൽനിന്നും പിടികൂടിയത്. ബംഗാളിൽനിന്ന് 2000 രൂപയ്ക്ക് വാങ്ങിയ കഞ്ചാവ് മൂവാറ്റുപുഴയിൽ 20000 രൂപക്ക് വിൽപ്പന നടത്തി തിരിച്ചു പോകാനായിരുന്നു പ്രതികളുടെ പദ്ധതി. ഇതിനിടയിലാണ് പ്രതികൾ പോലീസ് പിടിയിലായത്. 27 പ്രത്യേക പായ്ക്കറ്റുകളിലാക്കിയാണ് കഞ്ചാവ് കൊണ്ടുവന്നത്.

ഒന്നര മാസമായി വില്ലേജ് ഓഫീസർ ഇല്ല; കാക്കനാട് അപേക്ഷകൾ കെട്ടിക്കിടക്കുന്നു

കാക്കനാട്: കളക്ടറേറ്റ് മന്ദിരത്തിന് ഒരു വിളിപ്പാടകലെയുള്ള കാക്കനാട് വില്ലേജ് ഓഫീസിൽ ഓഫീസർ ചുമതല വഹിക്കാൻ ഒന്നര മാസമായി ഉദ്യോഗസ്ഥനില്ല. കളക്ടറേറ്റ് ഭരണ വിഭാഗത്തിൽ നിന്നുള്ള വനിതാ ഉദ്യോഗസ്ഥയ്ക്ക് പദവി നൽകിയെങ്കിലും അവർ ലീവ് എടുത്ത് ചുമതല വിട്ടതോടെ നൂറ് കണക്കിന് ഓൺലൈൻ ഓഫ് ലൈൻ അപേക്ഷകളാണ് തീർപ്പാക്കാൻ കഴിയാതെ കെട്ടിക്കിടക്കുന്നത്. അപേക്ഷകർ പരാതിയുമായെത്തിയതോടെ വാഴക്കാല വില്ലേജ് ഓഫീസർക്കു ഇവിടെ അധിക ചുമതല നൽകിയെങ്കിലും ഫയൽ നീക്കം മന്ദഗതിയിൽ തന്നെ തുടരുകയാണ്. ഒരു മണിക്കൂർനേരമാണ് വാഴക്കാല വില്ലേജ് ഓഫീസറുടെ സേവനം കാക്കനാട് വില്ലേജ് ഓഫീസിൽ ലഭിക്കുന്നത്. തൃക്കാക്കര നഗരസഭയിലെ 43 ഡിവിഷനുകളിൽ നല്ലൊരു ശതമാനം ഡിവിഷനുകാർ ആശ്രയിക്കുന്നതും കാക്കനാട് വില്ലേജ് ഓഫീസിനെയാണ്. വില്ലേജ് ഓഫീസർ തസ്തിക നികത്താതായതോടെ നഗരസഭയിൽനിന്നും മറ്റു സർക്കാർ സർവീസുകളിൽ നിന്നും ജനത്തിനു കിട്ടേണ്ട സേവനങ്ങൾ കിട്ടുന്നില്ലെന്നാണ് ആക്ഷേപം. പത്താം ക്ലാസും, പ്ലസ്ടൂവും കഴിഞ്ഞവർക്ക് തുടർ വിദ്യാഭ്യാസത്തിനും, പ്രഫഷണൽ കോഴ്സുകൾ പൂർത്തീകരിച്ചവർക്ക് വിദേശ ജോലി സംബന്ധമായും ഒട്ടേറെ സാക്ഷ്യപത്രങ്ങൾ വില്ലേജ് ഓഫീസുകൾ വഴിയാണ് നൽകുന്നത്. കെട്ടിക്കിടക്കുന്ന ഓൺലൈൻ അപേക്ഷകളിൽ ഉടനടി തീർപ്പുണ്ടാക്കാൻ ജില്ലാ കളക്ടർ ഇടപെടണമെന്നും കാക്കനാട് വില്ലേജിൽ ഓഫീസറെ നിയമിച്ചുത്തരവാകണമെന്നും ആവശ്യപ്പെട്ട് സിപിഐ തൃക്കാക്കര മണ്ഡലം കമ്മിറ്റി കളക്ടർ എൻ. എസ്.കെ. ഉമേഷിന് ഇന്നലെ നിവേദനം നൽകി.

ആധാർ സേവനങ്ങൾക്കായി ത്രിദിന ക്യാന്പ് തുടങ്ങി

അങ്കമാലി: ഒപ്പമുണ്ട് എംപി എന്ന പദ്ധതിയുടെ ഭാഗമായി ആധാര്‍കാര്‍ഡിന്‍റെ വിവിധ സേവനങ്ങള്‍ക്കായി ത്രിദിന മെഗാ ക്യാമ്പിന് തുടക്കമായി. എയർപോർട്ട് റോഡിലുള്ള എംപി ഓഫീസിനു സമീപമുള്ള എബിഎൽ പ്ലാസയിലെ ഓഡിറ്റോറിയത്തിലാണ് ക്യാന്പ് നടക്കുന്നത്. പോസ്റ്റല്‍ ഡിപ്പാര്‍ട്ട്മെന്‍റിന്‍റെ സഹകരണത്തോടെ നടത്തുന്ന ക്യാമ്പ് ബെന്നി ബഹനാന്‍ എംപി ഉദ്ഘാടനം ചെയ്തു. രഞ്ജിത്ത് അശോക്‌ (ഡെവലപ്പ്‌മെന്‍റ് ഓഫീസര്‍), ജിതിന്‍ ജോഷി(സിസ്റ്റം അഡ്മിനിസ്ട്രേറ്റര്‍), കെ. ജിജി പോള്‍ (പോസ്റ്റല്‍ അസിസ്റ്റന്‍ഡ്), ഷേര്‍ളി വിജു (പിഎൽഐ ഡയറക്ട് ഏജന്‍റ്) എന്നിവരുടെ നേതൃത്വത്തിലാണ് ക്യാമ്പ് നടക്കുന്നത്. നിലവില്‍ ആധാർ കാര്‍ഡുള്ള അഞ്ചു വയസു കഴിഞ്ഞ കുട്ടികള്‍ക്കും 15 വയസ് കഴിഞ്ഞ കുട്ടികള്‍ക്കും ആധാര്‍ പുതുക്കുന്നത്തിനുള്ള സൗകര്യം ഈ ക്യാമ്പിൽ ഉണ്ട്. പുതിയ കാർഡ്, കാർഡ് പുതുക്കൽ, തെറ്റ് തിരുത്തൽ,പുതിയ വിവരങ്ങൾ ഉൾപ്പെടുത്തൽ, ആധാർ - മൊബൈൽ ബന്ധിപ്പിക്കൽ എന്നീ സേവനങ്ങളും ക്യാന്പിൽ ലഭ്യമാകും. കൂടുതല്‍ വിവരങ്ങള്‍ക്ക്:- 0484-2452700, 9013997193. ക്യാമ്പ് 30ന് സമാപിക്കും.

തിരുവാങ്കുളം ഭവന്‍സ് മുന്‍ഷി വിദ്യാശ്രമം ടീം ഒന്നാമത്

കൊച്ചി: ടൈ കേരള ടൈ യംഗ് ഓൺട്രപ്രണേഴ്സ് ഫൈനല്‍ മത്സരത്തില്‍ തിരുവാങ്കുളം ഭവന്‍സ് മുന്‍ഷി വിദ്യാശ്രമത്തിന്‍റെ ടീം സ്മാര്‍ട്ട് ഒന്നാം സ്ഥാനം നേടി. കാക്കനാട് ഭവന്‍സ് ആദര്‍ശ വിദ്യാലയയുടെ ടീം ഐ സേഫ് ആൻഡ് സുരക്ഷ രണ്ടാം സ്ഥാനവും തിരുവനന്തപുരം സെന്‍റ് തോമസ് പബ്ലിക് സ്‌കൂളിന്‍റെ ടീം ഗെന്‍സിനോവ മൂന്നാം സ്ഥാനവും നേടി. കളമശേരി സ്റ്റാര്‍ട്ടപ് മിഷനില്‍ നടന്ന ഫൈനല്‍ മത്സരത്തില്‍ 12 ടീമുകളാണ് പങ്കെടുത്തത്. ഡല്‍ഹിയില്‍ നടക്കുന്ന ഗ്ലോബല്‍ മത്സരത്തില്‍ ടൈ കേരളയെ പ്രതിനിധീകരിച്ച് തിരുവാങ്കുളം ഭവന്‍സ് മുന്‍ഷി വിദ്യാശ്രമത്തിന്‍റെ ടീം സ്മാര്‍ട്ട് പങ്കെടുക്കും. സിദ്ധാര്‍ഥ് എസ്. നായര്‍, നിരഞ്ജന മനയില്‍, വിഷ്ണുദത്തന്‍, ഗംഗേഷ് വി. മേനോന്‍, ദ്യുതി അജേഷ് എന്നിവരാണ് ടീം സ്മാര്‍ട്ടിലെ അംഗങ്ങള്‍. ടൈ കേരള പ്രസിഡന്‍റ് ജേക്കബ് ജോയ് അധ്യക്ഷത വഹിച്ചു.

ലഹരി മരുന്ന് വില്പന: കാക്കനാട് രണ്ടുപേർ പിടിയിൽ

തൃക്കാക്കര: വിൽപ്പനയ്ക്കെത്തിച്ച ലഹരി മരുന്നുമായി കാക്കനാട് ചിറ്റേത്തുകരയിൽ രണ്ട് ഇതരസംസ്ഥാന തൊഴിലാളികൾ പിടിയിൽ. ആസാം സ്വദേശി മിൻഹാജ് അലി (23), ഉത്തർപ്രദേശ് സ്വദേശി മുഹമ്മദ്‌ കൈഫ്‌ (21) എന്നിവരെയാണ് ഇൻഫോപാർക്ക് എസ്ഐ എം.ടി. വിനോദിന്‍റെ നേതൃത്വത്തിൽ പിടികൂടിയത്. മിൻഹാജ് അലിയുടെ സ്കൂട്ടറിന്‍റെ മുൻഭാഗത്തെ പ്ലാറ്റ്ഫോമിൽ രഹസ്യ അറ ഉണ്ടാക്കി ആറ് ചെറിയ പ്ലാസ്റ്റിക് ഡപ്പികളിൽ സൂക്ഷിച്ചിരുന്ന 0.48 ഗ്രാം ബ്രൗൺ ഷുഗർ, 08.68 ഗ്രാം കഞ്ചാവ് എന്നിവ കണ്ടെത്തി. വാഹനത്തിൽ ഒപ്പമുണ്ടായിരുന്ന മുഹമ്മദ് കൈഫിൽ നിന്നും 09.66 ഗ്രാം കഞ്ചാവും പിടികൂടി. രഹസ്യ വിവരത്തിനന്‍റെ അടിസ്ഥാനത്തിൽ ചിറ്റേത്തുകര പീപ്പിൾസ് വെൽഫെയർ അസോസിയേഷൻ ക്ലബിന് സമീപത്തുനിന്നുമാണ് പ്രതികളെ പിടി കൂടിയത്.

ലൂര്‍ദ് ആശുപത്രിയില്‍ ശില്പശാല

കൊച്ചി: എറണാകുളം ലൂര്‍ദ് ആശുപത്രിയുടെയും ലൂര്‍ദ് കോളജ് ഓഫ് നഴ്‌സിംഗിന്‍റെയും സംയുക്താഭിമുഖ്യത്തില്‍ ഗവേഷണ അന്വേഷണം: രീതിശാസ്ത്രപരമായ മികവ് വര്‍ധിപ്പിക്കല്‍' എന്ന വിഷയത്തില്‍ ശില്പശാല സംഘടിപ്പിച്ചു. ലൂര്‍ദ് ആശുപത്രിയില്‍ നടന്ന പരിപാടി ലൂര്‍ദ് ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ഡയറക്ടര്‍ ഫാ. ജോര്‍ജ് സെക്വീര ഉദ്ഘാടനം ചെയ്തു. കണ്ണൂര്‍ ഗവണ്മെന്‍റ് മെഡിക്കല്‍ കോളജിലെ അസോസിയേറ്റ് പ്രഫസര്‍ ഡോ. ബിജു ജോര്‍ജ്, ഗവേഷണ ജേര്‍ണല്‍ എല്‍സിവിയര്‍ ഹെല്‍ത്തിലെ കസ്റ്റമര്‍ സക്‌സസ് ടീം മാനേജര്‍ നടാഷ ഗുലാത്തി എന്നിവര്‍ ശില്പശാല നയിച്ചു. ലൂര്‍ദ് ആശുപത്രി അസോസിയേറ്റ് ഡയറക്ടര്‍ ഫാ. വിമല്‍ ഫ്രാന്‍സിസ്, ലൂര്‍ദ് കോളജ് ഓഫ് നഴ്‌സിംഗ് പ്രിന്‍സിപ്പല്‍ സിസ്റ്റര്‍ റൂഫീന, ലൂര്‍ദ് നെഫ്രോളജി വിഭാഗം മേധാവി ഡോ. ബിനു ഉപേന്ദ്രന്‍, ലൂര്‍ദ് ബിഹേവിയറല്‍ സയന്‍സ് വിഭാഗം മേധാവി ഡോ. റിങ്കു തെരേസ എന്നിവര്‍ പ്രസംഗിച്ചു.

അയ്യപ്പൻ കോവിലിൽ ഭാഗവത സപ്‌താഹയജ്‌ഞത്തിന് തുടക്കമായി

കൊച്ചി: ശ്രീനാരായണ ധർമ്മസമാജം എറണാകുളം അയ്യപ്പൻ കോവിലിൽ ഭാഗവത സപ്‌താഹയജ്‌ഞത്തിന് തുടക്കമായി. മേയ് നാലു വരെ നടക്കുന്ന സപ്താഹ യജ്ഞ ശാലയിൽ പ്രതിഷ്ഠിക്കാനുള്ള വിഗ്രഹം ചിറ്റൂർ ശ്രീകൃഷ്ണസ്വാമി ക്ഷേത്രത്തിൽ നിന്ന് രഥയാത്രയായി പുറപ്പെട്ട് ഇരട്ടക്കുളങ്ങര ക്ഷേത്രത്തിൽ നിന്നും താലപ്പൊലിയോടെ എത്തിച്ചേർന്നു. സപ്താഹ യജ്ഞത്തിന്‍റെ ഉദ്ഘാടനം ഗാനരചയിതാവ് ആർ കെ ദാമോദരൻ നിർവഹിച്ചു. ഇന്നു വൈകിട്ട് ആറരയ്ക്ക് ഭദ്രകാളിപ്രാദുർഭാവം, നാളെ വൈകിട്ട് ആറരയ്ക്ക് നരസിംഹാവതാരം ദർശനം, വ്യാഴാഴ്ച്ച ഉച്ചയ്ക്ക് 12 നു വിദ്യാഗോപാലമന്ത്രാർച്ചന തുടർന്ന് ശ്രീരാമവതാരം, വൈകിട്ട് ആറരയ്ക്ക് ശ്രീകൃഷ്ണാവതാരം, വെള്ളിയാഴ്ച ഉച്ചയ്ക്ക് 12 ന് ഉണ്ണിയൂട്ട്, വൈകിട്ട് ആറിന് രുക്മിണീ സ്വയംവരം, ശനിയാഴ്ച ഉച്ചയ്ക്ക് 12 ന് കുചേലവൃത്തം എന്നിവയാണ് പരിപാടികൾ.

ലക്കി സ്റ്റാർ ഫുട്ബോൾ ട്രോഫി മദീന എഫ്സിയ്ക്ക്

ആലുവ: ആലുവ മർച്ചന്‍റ്സ് അസോസിയേഷന്‍റെ ആഭിമുഖ്യത്തിൽ ലക്കി സ്റ്റാർ ട്രോഫിയ്ക്കു വേണ്ടി നടന്ന അഖിലേന്ത്യാ സെവെൻസ് ഫുട്ബോൾ ടൂർണമെന്‍റ് ഫൈനൽ മത്സരത്തിൽ മദീന എഫ്സി െർപ്പുളശേരി ചാമ്പ്യനായി. അൽഷാബ് ഇന്ത്യൻ തൃശൂരിനെതിരെ എതിരില്ലാത്ത ഒരു ഗോളിനാണ് മദീന എഫ്സി വിജയിച്ചത്.അൻവർ സാദത്ത് എംഎൽഎ വിജയികൾക്കുള്ള ട്രോഫികൾ വിതരണം ചെയ്തു. മുനിസിപ്പൽ ഫ്ലെഡ്‌ലിറ്റ് സ്റ്റേഡിയത്തിൽ നടന്ന ചടങ്ങിൽ വ്യാപാരി വ്യവസായി ഏകോപന സമിതി ജില്ലാ ജനറൽ സെക്രട്ടറി അഡ്വ. എ.ജെ.റിയാസ്, ജില്ലാ ട്രഷറർ അജ്മൽ ചക്കുങ്കൽ, ഭാരവാഹികളായ ടോമി വർഗീസ്, അജ്മൽ കാമ്പായി, ജോണി മൂത്തേടൻ എന്നിവർ സംസാരിച്ചു.

വിരോണി മുത്തശിയുടെ 105-ാം ജന്മദിനം ആഘോഷിച്ചു

മരട്: മരടിന്‍റെ മുത്തശിയായ നഗരസഭ 14-ാം ഡിവിഷനിൽ നിരവത്ത് റോഡിൽ പഴമഠത്തിൽ വിരോണി വക്കച്ചന്‍റെ 105-ാം ജന്മദിനം വിവിധ പരിപാടികളോടെ ആഘോഷിച്ചു. ഞായറാഴ്ച രാവിലെ മൂത്തേടം പള്ളിയിൽ നടന്ന കുർബാനയിൽ പങ്കെടുത്ത വിരോണി മുത്തശിയെ ഉച്ചയ്ക്ക് 12ന് ഭവനത്തിൽ നടന്ന ആഘോഷ പരിപാടികളിൽ കെ. ബാബു എംഎൽഎ പൊന്നാടയണിയിച്ചു. മൂത്തേടം പള്ളി വികാരി ഫാ. ഷൈജു തോപ്പിൽ അധ്യക്ഷത വഹിച്ചു. കോൺഗ്രസ് മരട് മണ്ഡലം പ്രസിഡന്‍റ് ജിൻസൺ പീറ്റർ, മരട് നഗരസഭ കൗൺസിലർമാരായ സുരേഷ്, സിബി മാസ്റ്റർ, ബേബി പോൾ, മരട് സോഷ്യൽ സർവീസ് സെന്‍റർ പ്രസിഡന്‍റ് എ.എം. മുഹമ്മദ്, സേവ്യർ പഴമഠത്തിൽ തുടങ്ങിയവർ ആശംസകൾ നേർന്നു. സ്നേഹവിരുന്നും കലാപരിപാടികളും സംഘടിപ്പിച്ചിരുന്നു.

ജല അഥോറിറ്റി ഓഫീസിലെ ജീവനക്കാർക്ക് മർദനമേറ്റതായി പരാതി

പറവൂർ: കുടിവെള്ളം കിട്ടാത്തതിനെ തുടർന്ന് പറവൂർ ജല അഥോറിറ്റി ഓഫീസിൽ സമരത്തിനെത്തിയവർ ജീവനക്കാരെ മർദിച്ചതായി പരാതി. വൈപ്പിനിലെ എടവനക്കാട് മേഖലയിൽ ശുദ്ധജലം കിട്ടാത്തതിനെത്തുടർന്നാണ് ഇന്നലെ രാവിലെ 10.30ന് ജനപ്രതിനിധികളും നാട്ടുകാരും പറവൂർ ജല അഥോറിറ്റി ഓഫീസിൽ പ്രതിഷേധത്തിനെത്തിയത്. സമരത്തിന്‍റെ വിഡിയോ ജീവനക്കാരൻ മൊബൈൽ ഫോണിൽ പകർത്തിയെന്നാരോപിച്ചാണ് സമരക്കാരിൽ ചിലർ ചേർന്ന് രണ്ട് ജീവനക്കാരെ മർദിച്ചതായി പരാതി ഉയർന്നിട്ടുള്ളത്. സമരക്കാരുമായി ചർച്ച നടത്താതെ അസിസ്‌റ്റന്‍റ് എക്സിക്യൂട്ടീവ് എൻജിനീയർ ഇവിടെ നിന്നു പോയതിൽ പ്രതിഷേധിച്ച് ജല അഥോറിറ്റി ഓഫീസിന്‍റെയും പമ്പ് ഹൗസിന്‍റെയും വാതിലുകളും പ്രധാന ഗേറ്റും പ്രതിഷേധക്കാർ അടച്ചു. എന്നാൽ, അത്യാവശ്യമുണ്ടായതിനാൽ പുറത്തു പോയതാണെന്നാണ് അസിസ്‌റ്റന്‍റ് എക്‌സിക്യൂട്ടീവ് എൻജിനീയറുടെ വിശദീകരണം. മൊബൈൽ ഫോണിൽ വിഡിയോ ചിത്രീകരിച്ചെന്ന് ആരോപിച്ചു മീറ്റർ റീഡർ ജി. ബാബുവിനെ മർദിച്ചെന്നും മർദനം തടയാൻ ചെന്ന ഹെഡ് ക്ലാർക്ക് കെ. രാജേഷിന് മർദനമേറ്റതായും ജീവനക്കാർ പറഞ്ഞു. ജീവനക്കാരുടെ പരാതി പോലീസിനു കൈമാറിയിട്ടുണ്ടെന്ന് അസിസ്റ്റന്‍റ് എക്‌സിക്യൂട്ടീവ് എൻജിനീയർ പറഞ്ഞു. ജീവനക്കാരെ മർദിച്ചതിൽ പ്രതിഷേധിച്ചു വാട്ടർ അഥോറിറ്റി എംപ്ലോയീസ് യൂണിയൻ (സിഐടിയു) പ്രതിഷേധിച്ചു.

ഓട്ടോ ഡ്രൈവറെ ആക്രമിച്ച മൂന്നംഗ സംഘത്തിനെതിരേ കേസ്

ചെറായി: ഓട്ടോറിക്ഷയുടെ താക്കോൽ തട്ടിയെടുത്തത് ചോദ്യം ചെയ്ത ഡ്രൈവറെയും സുഹൃത്തുക്കളേയും ആക്രമിച്ചുവെന്ന പരാതിയിൽ മൂന്നംഗ സംഘത്തിനെതിരെ മുനമ്പം പോലീസ് കേസ് എടുത്തു. ഓട്ടോ ഡ്രൈവർ ചെറായി കണ്ടത്തി പറമ്പിൽ അനിൽ രാജ് നൽകിയ പരാതിയിലാണ് കേസ്. ചെറായി പള്ളിപ്പുറം സ്വദേശികളായ മനു കെ. സത്യൻ, വിനു കെ . സത്യൻ കണ്ടാലറിയാവുന്ന മറ്റൊരാൾ ഉൾപ്പെടെ മൂന്ന് പേർക്കെതിരെ യാണ് കേസ്. കഴിഞ്ഞ ദിവസം ചെറായി ദേവസം അമ്പലത്തിനു പടിഞ്ഞാറുവച്ചായിരുന്നു സംഭവം. അനിൽ രാജിനൊപ്പമുണ്ടായിരുന്ന ഷൈബു (50), കലേഷ് (45) എന്നിവരേയും പ്രതികൾ ആക്രമിച്ചത്രേ. സംഭവത്തിനിടെ ഷൈബുവിന്‍റെ രണ്ടു പവനോളം വരുന്ന സ്വർണ മാലയും നഷ്ടപ്പെട്ടതായി പരാതിയിൽ പറയുന്നു.

കനാലിൽ വീണ യുവാവിനെ അഗ്നിരക്ഷാസേന രക്ഷിച്ചു

മുളന്തുരുത്തി: ബൈക്കിൽ നിന്നും കനാലിൽ വീണ യുവാവിനെ അഗ്നിരക്ഷാസംഘം രക്ഷപ്പെടുത്തി. തുപ്പംപടി കാപ്പിൽ വീട്ടിൽ വിജീഷ് (38) നെയാണ് രക്ഷപ്പെടുത്തിയത്. തുപ്പംപടി ഷാപ്പിനു മുൻവശമുള്ള 35 അടിയോളം ആഴമുള്ള കനാലിൽ യുവാവ് വീണുകിടക്കുകയായിരുന്നു. അപകടം കണ്ട് താഴേയ്ക്കിറങ്ങിയ നാട്ടുകാരായ രണ്ടു പേർ യുവാവിനെ താങ്ങി നിർത്തി. വിവരമറിഞ്ഞ് സ്ഥലത്തെത്തിയ മുളന്തുരുത്തി അഗ്നിരക്ഷാസേന ഉദ്യോഗസ്ഥർ റോപ്പും നെറ്റും ലാഡറുമുപയോഗിച്ച് യുവാവിനെ മുകളിലെത്തിക്കുകയായിരുന്നു. പിന്നീട് ആംബുലൻസ് വരുത്തി യുവാവിനെ മുളന്തുരുത്തി സർക്കാരാശുപത്രിയിൽ എത്തിച്ചു. ഇന്നലെ വൈകിട്ട് നാലോടെയായിരുന്നു അപകടം. മുളന്തുരുത്തി ഫയർ ആൻഡ് റസ്ക്യൂ അസി. സ്റ്റേഷൻ ഓഫീസർ യു. ഇസ്മായിൽ ഖാന്‍റെ നേതൃത്വത്തിൽ സീനിയർ ഓഫീസർ രാജേഷ്, ഓഫീസർമാരായ സുനിൽകുമാർ, അനൂപ് കൃഷ്ണൻ, ജിജോ മിഥുൻ, പ്രജീഷ് സാബു, ജേക്കബ് എന്നിവരാണ് രക്ഷാപ്രവർത്തനത്തിൽ പങ്കെടുത്തത്.

ചമ്പന്നൂര്‍ സെന്‍റ് റീത്താസ് പള്ളിയില്‍ തിരുനാൾ

അങ്കമാലി: ചമ്പന്നൂര്‍ സെന്‍റ് റീത്താസ് പള്ളിയില്‍ വിശുദ്ധ റീത്താ‌യുടെയും വിശുദ്ധ സെബസ്ത്യാനോസിന്‍റെയും തിരുനാൾ മെയ് 9, 10, 11 തീയതികളിലായി ആഘോഷിക്കും. തിരുനാളിനൊരുക്കമായുള്ള നൊവേന വ്യാഴാഴ്ച ആരംഭിക്കും. നൊവേന എല്ലാദിവസവും രാവിലെ 6.30നും വൈകിട്ട് 5.45നും ആരംഭിക്കുന്നു. വ്യാഴാഴ്ച രാത്രി ഏഴിന് കൗശിക് മ്യൂസിക്കല്‍ മെഗാ ലൈവ് ഷോ, വെള്ളിയാഴ്ച വൈകീട്ട് 5.45-ന് തിരുനാള്‍ കൊടികയറ്റം, രൂപം വെഞ്ചിരിപ്പ്, ശനി രാവിലെ 6.30-ന് വിശുദ്ധ സെബസ്ത്യാനോസിന്‍റെ നൊവേന, ലദീഞ്ഞ്. തുടര്‍ന്ന് വീടുകളിലേക്ക് അമ്പെഴുന്നെള്ളിക്കല്‍. വൈകിട്ട് ആറിന് ആഘോഷമായ പാട്ടുകുര്‍ബാന. പ്രദക്ഷിണം, ആകാശവര്‍ണവിസ്മയം, ശിങ്കാരിമേളം (ധ്രൂവം കലാസമിതി) തിരുനാൾ ദിനമായ ഞായറാഴ്ച രാവിലെ 8.30 ന് കുര്‍ബാന, വിശുദ്ധ അന്നയോടുള്ള നൊവേന, വൈകിട്ട് അഞ്ചിന്ആഘോഷമായ തിരുനാള്‍ പാട്ടുകുര്‍ബാന. പ്രസംഗം, പ്രദക്ഷിണം, ലൈറ്റ് ആൻഡ് മ്യൂസിക്കല്‍ ഷോ, ബാന്‍റ് മേളം (രാഗദീപം മുണ്ടത്തിക്കോട്), തിരുസ്വരൂപം എടുത്തുവയ്ക്കല്‍. തിങ്കള്‍ വൈകിട്ട് 5.45 ന് പരേതര്‍ക്കായി കുര്‍ബാന, സിമിത്തേരി സന്ദര്‍ശനം, ഒപ്പീസ്.

വയോജനകമ്മീഷന്‍ രൂപീകരണം; കാലതാമസം ഒഴിവാക്കണം

അങ്കമാലി : സീനിയര്‍ സിറ്റിസണ്‍ ഫോറം അങ്കമാലി വയോജന സമ്മേളനവും സെമിനാറും ഫോറം പ്രസിഡന്‍റ് പി.എ. തോമസ് ഉദ്ഘാടനം ചെയ്തു. ഉദ്ഘാടന സമ്മേളനത്തില്‍ വയോജനകമ്മീഷന്‍ രൂപീകരിക്കുന്നതിനുള്ള കാലതാമസം ഒഴിവാക്കണമമെന്നും സീനിയര്‍ സിറ്റിസണ്‍ ഫോറങ്ങള്‍ക്ക് കമ്മീഷനില്‍ പ്രാതിനിധ്യം നല്‍കണമെന്നും വയോജനങ്ങളുടെ സംരക്ഷണം കമ്മീഷന്‍ ഉറപ്പുവരുത്തണമെന്നും സമ്മേളനം സര്‍ക്കാരിനോട് ആവശ്യപ്പെട്ടു. ഉദ്ഘാടന സമ്മേളനത്തില്‍ ജനറല്‍ സെക്രട്ടറി ബാബു മഞ്ഞളി, ടി.പി. ജോര്‍ജ്, ബേബി പാനികുളം, വര്‍ഗീസ് കൊളരിക്കല്‍, വനിതാഫോറം പ്രസിഡന്‍റ് കൊച്ചു ത്രേസ്യാ ആന്‍ണി, മേഴ്‌സി പൗലോസ്, സെലീന ജോസഫ്, മേരി ഡേവീസ്, ജോര്‍ജ് കോട്ടയ്ക്കല്‍, പോള്‍ കല്ലറക്കല്‍, ഫിലോമിന സേവ്യര്‍ തുടങ്ങിയവര്‍ പ്രസംഗിച്ചു.

പ്രകൃതി പരിചയവാരം സമാപിച്ചു

മൂവാറ്റുപുഴ: ആയുർവേദ മെഡിക്കൽ അസോസിയേഷൻ ഓഫ് ഇന്ത്യ (എഎംഎഐ) മൂവാറ്റുപുഴ ഏരിയയുടെ നേതൃത്വത്തിൽ സംഘടിപ്പിച്ച ‘കാട് സീസണ്‍ വണ്‍’ എന്ന പ്രകൃതി പരിചയവാരം സമാപിച്ചു. സമൂഹത്തിലെ വിവിധ മേഖലയിലെ അഞ്ച് മുതൽ 65 വയസുവരെയുള്ള 83 ഓളം പേർ കാട് സീസണ്‍ വണ്‍ നേച്ചർ ക്യാന്പിൽ പങ്കെടുത്തു. പ്രകൃതിയോടും ജൈവ വൈവിധ്യത്തോടും മനുഷ്യനുള്ള ബന്ധത്തെ ബോധ്യപ്പെടുത്തുകയായിരുന്നു ക്യാന്പിന്‍റെ ഉദ്ദേശ്യം. ഓണ്‍ലൈൻ ക്ലാസുകളിൽ പക്ഷികൾ, പൂന്പാറ്റകൾ, തുന്പികൾ, ഉഭയജീവികൾ, പാന്പുകൾ, ശുദ്ധജല മത്സ്യങ്ങൾ, ഉറുന്പുകൾ, ഔഷധസസ്യങ്ങൾ എന്നിവയെക്കുറിച്ച് കലേഷ് സദാശിവൻ, ഡേവിഡ് രാജു, സി.പി. ഷാജി, ഗീത അയ്യർ, ലക്ഷ്മി അശോക് കുമാർ എന്നിവർ ക്ലാസുകൾ നയിച്ചു. പരിപാടിയുടെ ഉദ്ഘാടനവും തൊമ്മൻ കുത്ത് ട്രെക്കിംഗിന്‍റെ ഫ്ളാഗ് ഓഫും മാത്യു കുഴൽനാടൻ എംഎൽഎ നിർവഹിച്ചു. ക്യാന്പിന് ആയുർവേദ മെഡിക്കൽ അസോസിയേഷൻ ഓഫ് ഇന്ത്യ മൂവാറ്റുപുഴ ഏരിയ പ്രസിഡന്‍റ് റോബിൻ കെ. ജോസഫ്, സെക്രട്ടറി അമിത ആന്‍റണി, ട്രഷറർ ജോസഫ് തോമസ്, ബയോ ക്യാന്പ് കോ-ഓർഡിനേറ്റർ സി. രവീന്ദ്രനാഥ കമ്മത്ത്, വനിതാ കമ്മിറ്റി വൈസ് ചെയർപേഴ്സണ്‍ ജി. ശ്രീപാർവതി, ജോർളിൻ ജോസ്, മാഹിൻഷാ പരീത്, കെ.ഇ. സൂസൻ, ശ്രീരാജ് കെ. ദാമോദർ എന്നിവർ നേതൃത്വം നല്കി.

ലഹരിക്കെതിരെ ഫുട്ബോൾ കളിച്ച് കോളങ്ങായി പള്ളിയിലെ യുവജനങ്ങൾ

പിറവം: ലഹരിക്കെതിരെയുള്ള ബോധവത്ക്കരണ പരിപാടിയുടെ ഭാഗമായി ഫുട്ബോൾ മത്സരത്തെ ലഹരിയാക്കി കളമ്പൂർ കോളങ്ങായി സെന്‍റ് മൈക്കിൾസ് പള്ളി. ദേവാലയത്തിലെ കുടുംബ കൂട്ടായ്മകളുടെ നേതൃത്വത്തിലാണ് ലഹരിക്കെതിര ഫുട്മ്പോൾ മത്സരം നടത്തിയത്. ദേശീയ മത്സരങ്ങളിലെ റഫറിയായ എ.വി. ബൈജുവാണ് നിയന്ത്രിച്ചത്. പിറവം പോലീസ് സ്റ്റേഷൻ ഇൻസ്പെക്ടർ കെ.എസ്. ജയൻ ഫുട്ബോൾ ടൂർണ്ണമെന്‍റ് ഉദ്ഘാടനം ചെയ്തു. ഇടവക വികാരി ഫാ. ജോസഫ് കൊടിയൻ അധ്യക്ഷത വഹിച്ചു. പുരുഷന്മാരുടെ മത്സരത്തിൽ സെന്‍റ് സെബാസ്റ്റ്യൻസ് യൂണിറ്റ് ഒന്നാം സ്ഥാനവും സെന്‍റ് ജോസഫ്സ് രണ്ടാം സ്ഥാനവും കരസ്ഥമാക്കി. വനിതകളുടെ പെനാൽറ്റി ഷൂട്ടൗട്ടിൽ സെന്‍റ് പോൾസ് യൂണിറ്റ് ഒന്നാം സ്ഥാനവും സെന്‍റ് ജോസഫ്സ് രണ്ടാം സ്ഥാനവും നേടി.

തണ്ണിമത്തൻ വിളവെടുപ്പ്

പാന്പാക്കുട: കുടുംബശ്രീ ജില്ലാ മിഷന്‍റെ സഹകരണത്തോടെ പാന്പാക്കുട സിഡിഎസ് നടപ്പാക്കിയ വേനൽമധുരം - 2025 തണ്ണിമത്തൻ കൃഷിയുടെ വിളവെടുപ്പ് നടത്തി. രണ്ടാം വാർഡിൽ പ്രവർത്തിക്കുന്ന ശ്രേയസ് കുടുംബശ്രീയുടെ നേതൃത്വത്തിലുള്ള വാണി സംഘകൃഷി ഗ്രൂപ്പാണ് തണ്ണി മത്തൻ കൃഷി നടത്തിയത്. പ്രസിഡന്‍റ് ശ്രീകാന്ദ് നന്ദനൻ വിളവെടുപ്പ് ഉദ്ഘാടനം ചെയ്തു. പഞ്ചായത്തംഗം ഫിലിപ്പ് ഇരട്ടയാനിക്കൽ അധ്യക്ഷത വഹിച്ചു. കുടുംബശ്രീ ജില്ല മിഷൻ കോ-ഓർഡിനേറ്റർ ടി.എം. റജീന മുഖ്യ പ്രഭാഷണം നടത്തി.

അക്ഷയ ലോട്ടറി നറുക്കെടുപ്പ് : ഒന്നാം സമ്മാനം ആസാം സ്വദേശിക്ക്

മൂവാറ്റുപുഴ: കേരള സംസ്ഥാന ഭാഗ്യക്കുറിയുടെ അക്ഷയ ലോട്ടറി നറുക്കെടുപ്പിൽ ഒന്നാം സമ്മാനം ഇതര സംസ്ഥാന തൊഴിലാളിക്ക്. ഞായറാഴ്ച നറുക്കെടെുത്ത അക്ഷയ ലോട്ടറിയുടെ ഒന്നാം സമ്മാനമായ 70 ലക്ഷം രൂപയാണ് ആസാം സ്വദേശിയായ മാർഗം അലിക്ക് ലഭിച്ചത്. പെരുവംമൂഴിയിൽനിന്ന് എടുത്ത എഎം 602570 എന്ന നന്പറിലുള്ള ടിക്കറ്റിനാണ് ഒന്നാം സമ്മാനം ലഭിച്ചത്. 15 വർഷമായി മൂവാറ്റുപുഴയിൽ ജോലി ചെയ്തുവരുകയാണ് മാർഗം അലി. ഈസ്റ്റ് മാറാടി വല്ലിക്കപുത്തൻപുരയിൽ ജോയിയുടെ കൂടെ തടിപണി ചെയ്തുവരുന്ന മാർഗം പെരുവംമൂഴിയിലാണ് താമസിക്കുന്നത്. സമ്മാനം അടിച്ച ലോട്ടറി ടിക്കറ്റ് മൂവാറ്റുപുഴയിലെ സ്വകാര്യ ബാങ്കിന് കൈമാറി.

സിപിഐ ആവോലി ലോക്കൽ സമ്മേളനം

മൂവാറ്റുപുഴ: സിപിഐ 25-ാമത് പാർട്ടി കോണ്‍ഗ്രസിന് മുന്നോടിയായുള്ള ആവോലി ലോക്കൽ സമ്മേളനത്തിന് സമാപനമായി. സമ്മേളനത്തിന്‍റെ ഭാഗമായി മാവിൻചുവടിൽ നിന്നാരംഭിച്ച പ്രകടനം ആനിക്കാട് സമാപിച്ചു. തുടർന്ന് നടന്ന പൊതുസമ്മേളനം നിയമസഭ ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. പാർട്ടിയുടെ മുതിർന്ന നേതാക്കളെ ചടങ്ങിൽ ആദരിച്ചു. സംഘാടക സമിതി ചെയർമാൻ കെ.ബി. നിസാർ അധ്യക്ഷത വഹിച്ചു.

ജില്ലാ ട്രൈബൽ ഫെസ്റ്റ് ‘ഊരാട്ടം’ രണ്ട് മുതൽ കുട്ടന്പുഴയിൽ

കോതമംഗലം: എറണാകുളം ജില്ലാ പഞ്ചായത്തിന്‍റെയും കുട്ടന്പുഴ പഞ്ചായത്തിന്‍റെയും നേതൃത്വത്തിൽ ജില്ലാ പട്ടികവർഗ വികസന വകുപ്പിന്‍റെ സഹകരണത്തോടെ സംഘടിപ്പിക്കുന്ന ജില്ലാ ട്രൈബൽ ഫെസ്റ്റ് ഊരാട്ടം രണ്ട് മുതൽ നാലുവരെ കുട്ടന്പുഴ ടൗണ്‍ ഹാളിൽ നടക്കുമെന്ന് ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, കുട്ടന്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ എന്നിവർ പത്രസമ്മേളനത്തിൽ അറിയിച്ചു. ജില്ലയിലെ ഗോത്രവർഗ സമൂഹത്തിന്‍റെ ഉന്നമനത്തിനും ക്ഷേമത്തിനുമായി ജില്ലാ പഞ്ചായത്തും കുട്ടന്പുഴ പഞ്ചായത്തും നടപ്പാക്കിക്കൊണ്ടിരിക്കുന്ന വിവിധങ്ങളായ പദ്ധതികളുടെ ഭാഗമായിട്ടാണ് ജില്ലാ ട്രൈബൽ ഫെസ്റ്റ് സംഘടിപ്പിച്ചിരിക്കുന്നത്. ഗോത്രവർഗ സമൂഹത്തിന്‍റെ പരന്പരാഗതമായ തനതു കലാരൂപങ്ങൾക്ക് പ്രചാരം നൽകുന്നതിനും ഗോത്രവർഗ കലകളെ പുതു തലമുറയ്ക്ക് പകർന്നു കൊടുക്കുന്നതിനും വിവിധ ഗോത്രവർഗ ഉന്നതികളിൽ നിന്നുള്ളവർ തമ്മിലുള്ള സൗഹൃദവും ബന്ധങ്ങളും ശക്തമാക്കുന്നതിനും വേണ്ടി സംഘടിപ്പിച്ചിട്ടുള്ള ജില്ലാ ട്രൈബൽ ഫെസ്റ്റിന്‍റെ ഭാഗമായി വിളംബര റാലി, 20ൽപ്പരം സ്ഥാപനങ്ങളുടെ പ്രദർശന മേളകൾ, വിവിധ കലാപരിപാടികൾ തുടങ്ങിയവ സംഘടിപ്പിച്ചിട്ടുണ്ട്. ഒന്നിന് വൈകുന്നേരം നാലിന് പ്രദർശന സ്റ്റാൾ ഉദ്ഘടനം. രണ്ടിന് ഉച്ചകഴിഞ്ഞ് 2.30ന് വിളംബര റാലി, തുടർന്ന് വൈകുന്നേരം നാലിന് ഉദ്ഘാടന സമ്മേളനം, നാടൻ പാട്ടരങ്ങ്. മൂന്നിന് രാവിലെ 9.30ന് ടൂറിസം സെമിനാർ, 11ന് വ്യവസായ സംരഭക സെമിനാർ, 12ന് വനിതാ സംരഭക സെമിനാർ, ഉച്ചകഴിഞ്ഞ് മുതൽ വിവിധ ഗോത്ര ഉന്നതികളിൽ നിന്നുള്ളവരുടെ കലാ പ്രകടനങ്ങൾ, അഞ്ചിന് കരോക്കെ ഗാനമേള, ആറിന് കൈക്കൊട്ടിക്കളി. നാലിന് രാവിലെ 9.30 മുതൽ വിവിധ ഗോത്രവർഗ ഉന്നതികളിൽ നിന്നുള്ളവരുടെ കലാ പ്രകടനങ്ങൾ, വൈകുന്നേരം നാലിന് സമാപന സമ്മേളനം, അഞ്ചിന് മല പുലയാട്ടം, ആറിന് കൈക്കൊട്ടിക്കളി എന്നിവ നടക്കും. ഉദ്ഘാടന - സമാപന സമ്മേളനങ്ങളിൽ മന്ത്രിമാർ, എംപിമാർ, എംഎൽഎമാർ, ജില്ലാ കളക്ടർ, മറ്റ് ത്രിതല പഞ്ചായത്ത് ജനപ്രതിനിധികൾ, വകുപ്പ് ഉദ്യോഗസ്ഥർ തുടങ്ങിയവർ പങ്കെടുക്കും. പത്ര സമ്മേളനത്തിൽ ജില്ലാ പഞ്ചായത്തംഗം കെ.കെ ദാനി, പഞ്ചായത്ത് സ്ഥിരം സമിതി അധ്യക്ഷൻ കെ.എ സിബി, ബിനീഷ് നാരായണൻ, ജോഷി പൊട്ടക്കൽ, ജില്ലാ പട്ടിക വർഗ വികസന ഓഫീസർ അനിൽ ഭാസ്ക്കർ, എൻ. രാജീവ്, കെ.കെ അനീഷ് കുമാർ എന്നിവർ പങ്കെടുത്തു.

വിശ്വകർമ മൂവാറ്റുപുഴ പ്രീമിയർ ലീഗ്

മൂവാറ്റുപുഴ: രാസലഹരിയിൽനിന്ന് പുതുതലമുറയെ രക്ഷിക്കുവാനായി ലഹരി മാഫിയക്കെതിരെയുള്ള കാന്പയിന്‍റെ ഭാഗമായി വിശ്വകർമ സർവീസ് സൊസൈറ്റി മൂവാറ്റുപുഴ താലൂക്ക് യൂണിയൻ യുവജന ഫെഡറേഷന്‍റെ ആഭിമുഖ്യത്തിൽ വിശ്വകർമ മൂവാറ്റുപുഴ പ്രീമിയർ ലീഗ് സംഘടിപ്പിച്ചു. ട്രാഫിക് എസ്ഐ സിദ്ധീഖ് കല്ലറക്കൽ ലഹരി വിരുദ്ധ സന്ദേശം നൽകി. മേക്കടന്പ് ശാഖ വിശ്വകർമ മൂവാറ്റുപുഴ പ്രീമിയർ ലീഗ് ചാന്പ്യൻമാരായി. മേമടങ്ങ് ശാഖ രണ്ടാം സ്ഥാനവും ആവോലി അന്പലംപടി ശാഖ മൂന്നാം സ്ഥാനവും കരസ്ഥമാക്കി.

പൊയ്ക ഗവ. ഹൈസ്കൂൾ സുവർണ ജൂബിലി സമാപനം

കോതമംഗലം: ഒരു വർഷം നീണ്ടുനിന്ന വടാട്ടുപാറ പൊയ്ക ഗവ. ഹൈസ്കൂൾ സുവർണ ജൂബിലി സമാപന സമ്മേളനം സ്കൂൾ ഗ്രൗണ്ടിൽ ഡീൻ കുര്യാക്കോസ് എംപി ഉദ്ഘാടനം നിർവഹിച്ചു. ആന്‍റണി ജോണ്‍ എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ മുഖ്യപ്രഭാഷണം നടത്തി. പഞ്ചായത്ത് പ്രസിഡന്‍റ് കാന്തി വെള്ളകയ്യൻ ആമുഖപ്രസംഗം നടത്തി. മത്സര വിജയികൾക്കുള്ള സമ്മാനദാനം ബ്ലോക്ക് പഞ്ചായത്ത് സ്ഥിരം സമിതി അധ്യക്ഷൻ ജെയിംസ് കോറന്പേൽ നിർവഹിച്ചു.

ഏകദിന പരിശീലനം നാളെ

മൂവാറ്റുപുഴ: ബാലവേദി അംഗങ്ങളുടെ ഏകദിന പരിശീലനം നാളെ രാവിലെ 10 മുതൽ ഉപ്പുകണ്ടം പബ്ലിക് ലൈബ്രറി ഹാളിൽ നടക്കും. ഒരു ലൈബ്രറിയിൽനിന്നും ഒരു മെന്‍റർ വീതമാണ് പങ്കെടുക്കേണ്ടത്. ലൈബ്രറി ജില്ലാ സെക്രട്ടറി എം.ആർ. സുരേന്ദ്രൻ പരിശീലനം ഉദ്ഘാടനം ചെയ്യും. സിന്ധു ഉല്ലാസ്, എൻ.യു. ഉലഹന്നാൻ, പി.കെ. വിജയൻ എന്നിവർ പരിശീലനം നൽകും. എല്ലാ ഗ്രന്ഥശാലകളിലും ബാലവേദികൾ രൂപീകരിച്ച് തുടർ പ്രവർത്തനം സജീവമാക്കുന്ന പരിശീലനമാണ് നൽകുന്നത്. സംസ്ഥാന ലൈബ്രറി കൗണ്‍സിൽ നിർദേശത്തെ തുടർന്നാണ് പരിശീലനം സംഘടിപ്പിക്കുന്നത്.

ആയുർവേദ സബ് സെന്‍റർ ആരംഭിച്ചു

പോത്താനിക്കാട്: പറമ്പഞ്ചേരി ആയുർവേദ സബ് സെന്‍റർ മാത്യു കുഴൽനാടൻ എംഎൽഎ ഉദ്ഘാടനം ചെയ്തു. എംഎൽഎയുടെ പ്രാദേശിക വികസന ഫണ്ടിൽനിന്നു ലഭിച്ച 21 ലക്ഷം രൂപ ഉപയോഗിച്ച് നിർമിച്ച ജനകീയ ആരോഗ്യ കേന്ദ്രത്തിന്‍റെ മുകളിലെ നിലയിലാണ് ആയുർവേദ സബ് സെന്‍റർ പ്രവർത്തനം ആരംഭിച്ചത്. പോത്താനിക്കാട് പഞ്ചായത്ത് പ്രസിഡന്‍റ് സജി കെ. വർഗീസ് അധ്യക്ഷത വഹിച്ചു. കോതമംഗലം ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ മുഖ്യപ്രഭാഷണം നടത്തി.

കുഴഞ്ഞുവീണു മരിച്ചു

മരട്: എടത്തല പഞ്ചായത്ത് ഗ്രൗണ്ടിനു സമീപം വലിയപറന്പിൽ തേവന്‍റെ മകൻ ബാബു (56) കുഴഞ്ഞുവീണു മരിച്ചു. നെട്ടൂർ രാജ്യാന്തര മാർക്കറ്റിൽ പച്ചക്കറി എടുക്കാനായെത്തിയതായിരുന്നു. ഇന്നലെ രാവിലെ ആറിനായിരുന്നു സംഭവം. മാർക്കറ്റിനകത്ത് പാർക്ക് ചെയ്ത വാഹനത്തിൽ കയറാൻ ശ്രമിക്കുന്നതിനിടെ കുഴഞ്ഞ് വീഴുകയായിരുന്നു. പനങ്ങാട് പോലീസെത്തി മരടിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തൃപ്പൂണിത്തുറയിൽ കട ഉടമയാണ്. സംസ്കാരം ഇന്ന് 11ന് കീഴ്മാട് ശ്മശാനത്തിൽ. മാതാവ്: തങ്കമ്മ. ഭാര്യ: അജിത. മക്കൾ: ആതിര, അമൽ.

സഹ.സംഘം സെക്രട്ടറി മരിച്ച നിലയിൽ

എരമല്ലൂർ: എഴുപുന്ന പഞ്ചായത്ത് പട്ടികജാതി സഹകരണ സംഘം സെക്രട്ടറിയെ സംഘം കെട്ടിടത്തിന്‍റെ കോന്പൗണ്ടിലുള്ള മറ്റൊരു കെട്ടിടത്തിൽ തൂങ്ങിമരിച്ച നിലയിൽ കണ്ടെത്തി. എഴുപുന്ന പഞ്ചായത്ത് പുതുവൽ നികത്തിൽ കെ.എം. കുഞ്ഞുമോൻ (52) ആണ് തൂങ്ങിമരിച്ച നിലയിൽ കാണപ്പെട്ടത്. ഇന്നലെ രാവിലെ ശുചീകരണ തൊഴിലാളിയായ സ്ത്രീ എത്തിയപ്പോഴാണ് കെട്ടിടത്തിന്‍റെ ഷട്ടർ പകുതി ഉയർത്തിയ നിലയിൽ കണ്ടത്. അരൂർ പോലീസ് തുടർനടപടികൾ സ്വീകരിച്ചു. ഭാര്യ: ശ്രീജ. മക്കൾ: അഭിരാമി, അഭിജിത്ത്.

വിലക്കേർപ്പെടുത്തിയിട്ടില്ലെന്ന് പി.കെ. ശ്രീമതി

കണ്ണൂർ: സിപിഎം സംസ്ഥാന സെക്രട്ടേറിയറ്റ് യോഗത്തിൽ തനിക്ക് വിലക്കേർപ്പെടുത്തിയിട്ടില്ലെന്ന് കേന്ദ്ര കമ്മിറ്റി അംഗം പി.കെ.ശ്രീമതി കണ്ണൂരിൽ മാധ്യമങ്ങളോട് പറഞ്ഞു. പിണറായിയെപ്പോലൊരു നേതാവിന്‍റെ വിലക്ക് തനിക്കുണ്ടെന്ന് വരുത്തിത്തീർക്കാനുള്ള ശ്രമം നടക്കുന്നുണ്ടെന്നും പി.കെ. ശ്രീമതി പറഞ്ഞു. കേരളത്തിൽ ഉണ്ടെങ്കിൽ ഇനിയും സെക്രട്ടേറിയേറ്റ് യോഗത്തിൽ പങ്കെടുക്കുമെന്നും അവർ കൂട്ടിച്ചേർത്തു. വിലക്കേർപ്പെടുത്തിയെന്ന വാർത്തകൾ അടിസ്ഥാനരഹിതമാണ്. ദേശീയതലത്തിൽ ശ്രദ്ധ കേന്ദ്രീകരിച്ച് പ്രവർത്തിക്കാനാണ് പാർട്ടി തനിക്ക് നല്കിയിരിക്കുന്ന നിർദേശം. അതേസമയം, സെക്രട്ടേറിയറ്റ് യോഗത്തിൽ പങ്കെടുക്കുന്നതിൽ തനിക്ക് വിലക്കില്ലെന്നും പി.കെ. ശ്രീമതി പറഞ്ഞു.

സെക്രട്ടേറിയറ്റ് യോഗത്തില്‍നിന്ന് പി.കെ. ശ്രീമതിയെ ഒഴിവാക്കിയത് പാര്‍ട്ടി തീരുമാനം: എം.വി. ഗോവിന്ദന്‍

കൊച്ചി: പി.കെ. ശ്രീമതിയെ സിപിഎം സംസ്ഥാന സെക്രട്ടേറിയറ്റ് യോഗത്തില്‍നിന്ന് ഒഴിവാക്കിയത് പാര്‍ട്ടിയുടെ സംഘടനാപരമായ തീരുമാനമാണെന്ന് സംസ്ഥാന സെക്രട്ടറി എം.വി. ഗോവിന്ദന്‍. ദേശീയതലത്തില്‍ പ്രവര്‍ത്തിക്കാനാണു കേന്ദ്ര കമ്മിറ്റിയില്‍ ഉള്‍പ്പെടുത്തിയത്. കേന്ദ്ര കമ്മിറ്റിയില്‍ എടുക്കുന്നത് കേരളത്തില്‍ പ്രവര്‍ത്തിക്കാനല്ല. ശ്രീമതി സംസ്ഥാന കമ്മിറ്റിയിലും സെക്രട്ടേറിയറ്റിലും അംഗമായിരുന്നു. 75 വയസ് പൂര്‍ത്തിയായതിനാല്‍ സംസ്ഥാന കമ്മിറ്റിയില്‍നിന്നും സെക്രട്ടേറിയറ്റില്‍നിന്നും ഒഴിവായി. ഇതില്‍ മുഖ്യമന്ത്രിയുടെ പ്രത്യേക താത്പര്യമില്ല. എ.കെ. ബാലന്‍ പ്രത്യേക ക്ഷണിതാവായാണു സംസ്ഥാന കമ്മിറ്റിയില്‍ ഉള്‍പ്പെട്ടിട്ടുള്ളത്. കെ.എം. ഏബ്രഹാമിനെതിരായ കേസിനെക്കുറിച്ചുള്ള ചോദ്യത്തിന്, ഒരുപാട് പേര്‍ക്കെതിരേ സിബിഐയും ഇഡിയും കേസെടുക്കുന്നുണ്ടെന്നായിരുന്നു എം.വി. ഗോവിന്ദന്‍റെ മറുപടി. ഇക്കാര്യത്തില്‍ ഭരണവര്‍ഗ കടന്നാക്രമണമാണ് നടക്കുന്നത്. സിബിഐ അന്വേഷിക്കട്ടെ. യുഡിഎഫ് പറയുന്നത് പക്ഷപാതപരമായ രാഷ്‌ട്രീയമാണ്. അവര്‍ക്കെതിരേ വരുമ്പോള്‍ രാഷ്‌ട്രീയവും മറ്റുള്ളവര്‍ക്കെതിരേ വരുമ്പോള്‍ നല്ല അന്വേഷണവും എന്നതാണു യുഡിഎഫ് നിലപാട്. വീണയുടെ മൊഴിയുമായി ബന്ധപ്പെട്ട് ശുദ്ധകളവാണ് എസ്എഫ്‌ഐഒ പറയുന്നത്. ഈ കളവ് മാധ്യമങ്ങളും ആവര്‍ത്തിക്കുകയാണ്. രാമചന്ദ്രന്‍റെ വീട് സന്ദര്‍ശിക്കാന്‍ മുഖ്യമന്ത്രി വന്നതിനെ വിമര്‍ശിക്കേണ്ടതില്ല. ഔദ്യോഗികമായി തിരക്കുള്ളയാളാണ് മുഖ്യമന്ത്രി. ആ തിരക്ക് ഒഴിഞ്ഞ ആദ്യഘട്ടത്തില്‍ത്തന്നെ അദ്ദേഹം അവിടെയെത്തിയെന്നും ഗോവിന്ദന്‍ പറഞ്ഞു.

കഞ്ചാവു ചെടി വളർത്തിയ ഇതര സംസ്ഥാനക്കാരനെ എക്സൈസ് സംഘം പിടികൂടി

പെരുമ്പാവൂർ: കഞ്ചാവു ചെടി വളർത്തിയ ഇതര സംസ്ഥാനക്കാരൻ പിടിയിൽ. പശ്ചിമ ബംഗാൾ മുർഷിദാബാദ് സ്വദേശി നന്തു മൊണ്ടാൽ(30)നെയാണ് പെരുമ്പാവൂർ എക്‌സൈസ് റേഞ്ച് സംഘം പിടികൂടിയത്. ആലുവ - പെരുമ്പാവൂർ കെഎസ്ആർടിസി റോഡിൽ മാറമ്പിള്ളിയിലുള്ള ഇയാളുടെ താസമസ്ഥലത്താണ് പ്ലാസ്റ്റിക്കിന്‍റെ കാൻ മുറിച്ച് ഇതിനുള്ളിൽ പ്രതി കഞ്ചാവ് ചെടി വളർത്തിയിരുന്നത്. 31 സെന്‍റി മീറ്റർ ഉയരമുണ്ടായിരുന്ന ചെടി സ്വന്തം ആവശ്യത്തിന് ഉപയോഗിക്കുന്നതിനാണ് ഇയാൾ പരിപാലിച്ചതെന്ന് എക്‌സൈസ് പറഞ്ഞു. ഇയാൾ സ്ഥിരമായി കഞ്ചാവ് ഉപയോഗിക്കുന്ന വ്യക്തിയാണെന്നും ഇതിനു മുമ്പും ഇത്തരത്തിൽ കഞ്ചാവ് വളർത്തി സുഹൃത്തുക്കൾക്ക് വില്പന നടത്തിയിട്ടുള്ളതായും ഉദ്യോഗസ്ഥർ വ്യക്തമാക്കി. മറ്റ് ചെടികൾക്കിടയിൽ പെട്ടെന്ന് കണ്ടെത്താനാകാത്ത വിധം രഹസ്യമായി കഞ്ചാവ് ചെടി വളർത്തിയിരുന്ന ഇയാൾ ആദ്യമായാണ് പിടിക്കപ്പെടുന്നത്. എക്‌സൈസ് ഇൻസ്‌പെക്ടർ കെ. വിനോദിന്‍റെ നേതൃത്വത്തിൽ അസി. എക്‌സൈസ് ഇൻസ്‌പെക്ടർ സാബു വർഗീസ്, പ്രിവന്‍റീവ് ഓഫീസർ ജസ്റ്റിൻ ചർച്ചിൽ, സിവിൽ എക്‌സൈസ് ഓഫീസർമാരായ പി.പി. ഷിവിൻ, എബിൻ പൗലോസ്, കെ.ആർ. മുരളീകൃഷ്ണ എന്നിവരടങ്ങുന്ന സംഘമാണ് പ്രതിയെ പിടികൂടിയത്.

മാര്‍ച്ചിലും സിനിമയ്ക്ക് നഷ്ടക്കണക്ക്; നേട്ടം ‘എമ്പുരാന് ’മാത്രം

കൊച്ചി: മാര്‍ച്ചില്‍ റിലീസ് ചെയ്ത മലയാള സിനിമകളുടെ നഷ്ടക്കണക്കുകള്‍ കേരള ഫിലിം പ്രൊഡ്യുസേഴ്‌സ് അസോസിയേഷന്‍ പുറത്തുവിട്ടു. റിലീസ് ചെയ്ത 15 സിനിമകളില്‍ 14ഉം നഷ്ടമെന്നാണ് അസോസിയേഷന്‍റെ കണക്കുകളില്‍ വ്യക്തമാക്കുന്നത്. പൃഥ്വിരാജ്-മോഹന്‍ലാല്‍ ചിത്രം എമ്പുരാന്‍ മാത്രമാണ് ലാഭം നേടിയത്. 15 ചിത്രങ്ങളില്‍ ആറ് ചിത്രങ്ങളുടെ കളക്ഷന്‍ ഒരു ലക്ഷം രൂപയില്‍ താഴെ മാത്രമാണ്. 15 ചിത്രങ്ങളുടെയും ആകെ നിര്‍മാണ തുക 194,42,06,985 രൂപയാണ്. ഇതുവരെ ഈ ചിത്രങ്ങള്‍ക്ക് തീയറ്റലില്‍ നിന്ന് ലഭിച്ചതാകട്ടെ 25,88,31,000 രൂപ മാത്രം. മറുവശം, ഔസേപ്പിന്‍റെ ഒസ്യത്ത്, പരിവാര്‍, പ്രളയശേഷം ഒരു ജലകന്യക, വടക്കന്‍ എന്നിങ്ങനെ അഞ്ച് സിനിമകളാണ് മാര്‍ച്ച് ഏഴിന് പുറത്തിറങ്ങിയത്. ഈ അഞ്ച് സിനിമകള്‍ക്കും തിയറ്റര്‍ വിഹിതംവഴി മുടക്കുമുതല്‍ തിരിച്ചുപിടിക്കാനായില്ലെന്ന് കണക്കുകള്‍ പറയുന്നു. 4.04 കോടിയില്‍ ചിത്രീകരിച്ച ഔസേപ്പിന്‍റെ ഒസ്യത്ത് ഇതുവരെ നേടിയത് 45 ലക്ഷം രൂപയാണ്. 2.60 കോടി മുതല്‍മുടക്കില്‍ ചിത്രീകരിച്ച പരിവാര്‍ 26 ലക്ഷം രൂപയും, 3.65 കോടി യില്‍ ചിത്രീകരിച്ച വടക്കന്‍ എന്ന ചിത്രം 20 ലക്ഷം രൂപയുമാണ് തിയറ്ററില്‍ നിന്ന് ഇതുവരെ നേടിയത്. മൂന്ന് ചിത്രങ്ങളും പ്രദര്‍ശനം തുടരുകയാണ്. മറ്റ് മൂന്ന് ചിത്രങ്ങളും നിലവില്‍ പ്രദര്‍ശനം ഇല്ല. ഇവ നേടിയതാകട്ടെ ഒരു ലക്ഷം രൂപയില്‍ താഴെ മാത്രം കളക്ഷന്‍. 14ന് തിയറ്ററിലെത്തിയ ആരണ്യം, ദാസേട്ടന്‍റെ സൈക്കിള്‍, കാടകം, ലീച്ച്, രാക്ഷസി; ദ ലേഡി കില്ലര്‍, ഉറ്റവര്‍, വെയിറ്റിംഗ് ലിസ്റ്റ് എന്നീ സിനിമകളില്‍ അഞ്ച് സിനിമകള്‍ക്കും ലഭിച്ച തിയറ്റര്‍ കളക്ഷനും ബജറ്റിനും വളരെ താഴെയാണ്. ഇതില്‍ ഉറ്റവര്‍, വെയിറ്റിംഗ് ലിസ്റ്റ് എന്നീ ചിത്രങ്ങളുടെ ബജറ്റ് സംബന്ധിച്ച കണക്കുകള്‍ പുറത്തുവിട്ടിട്ടില്ല. 85 ലക്ഷം മുടക്കുമുതല്‍ ചെലവിട്ട ആരണ്യം ചിത്രം 22,000 രൂപ മാത്രമാണ് തിയറ്ററില്‍ നിന്നു നേടിയത്. 30 ലക്ഷം രൂപ ചെലവിട്ട കാടകം 80,000 രൂപയും ഒരു കോടി ചെലവിട്ട ലീച്ച് 45,000 രൂപയുമാണ് നേടിയത്. 14ന് റിലീസ് ചെയ്ത ഒരു ചിത്രവും നിലവില്‍ പ്രദര്‍ശനം നടത്തുന്നില്ല. മാര്‍ച്ച് അവസാന വാരമാണ് പൃഥ്വിരാജ്-മോഹന്‍ലാല്‍ കൂട്ടുകെട്ടിലെ എമ്പുരാനും, സൈജു കുറുപ്പ്, അര്‍ജുന്‍ അശോകന്‍ എന്നിവര്‍ പ്രധാന കഥാപാത്രങ്ങളായെത്തുന്ന അഭിലാഷവും തിയറ്ററിലെത്തുന്നത്. 175 കോടി ബജറ്റില്‍ പൂര്‍ത്തിയാക്കിയ എമ്പുരാന്‍ അഞ്ച് ദിവസംകൊണ്ട് 24 കോടി രൂപ കേരളലെ തിയറ്ററുകളില്‍ നിന്ന് കളക്ഷന്‍ നേടിയതായി കണക്കില്‍ പറയുന്നു. ചിത്രം ഒടിടിയില്‍ റിലീസ് ചെയ്തിട്ടും തിയറ്റര്‍ പ്രദര്‍ശനം തുടരുന്നതായാണ് അസോസിയേഷന്‍ പറയുന്നത്. നാല് കോടിയില്‍ ചിത്രീകരിച്ച അഭിലാഷം മൂന്ന് ദിവസം കൊണ്ട് 15 ലക്ഷം രൂപ നേടി. ഈ ചിത്രവും തിയറ്റര്‍ പ്രദര്‍ശനം തുടരുകയാണ്. ഇതു മൂന്നാം തവണയാണ് സിനിമയുടെ ബജറ്റും തിയറ്റര്‍ വിഹിതവും നിര്‍മാതാക്കളുടെ സംഘടന പുറത്തുവിടുന്നത്.

പെരുന്പാവൂരിൽ രാസലഹരിയുമായി നാലു യുവാക്കൾ പിടിയിൽ

പെരുമ്പാവൂർ: പെരുന്പാവൂരിൽ രാസലഹരിയുമായി നാലു യുവാക്കൾ പിടിയിൽ. വെങ്ങോല തണ്ടേക്കാട് പുത്തൻപുരയ്ക്കൽ ഷിഹാബ് (34), കിഴക്കൻ നിഷാദ് (39), കൂവപ്പടി ഓണംപിള്ളി മുണ്ടേത്ത് ശിഹാബ് (42), വാഴക്കുളം ചെമ്പറക്കി പറക്കാടൻ അനസ്(39)എന്നിവരെയാണ് പെരുമ്പാവൂർ എഎസ്പിയുടെ പ്രത്യേക അന്വേഷണസംഘം പിടികൂടിയത്. വെങ്ങോല ഭാഗത്തുനിന്നാണ് ഇവരെ കസ്റ്റഡിയിലെടുത്തത്. ഇവരുടെ പക്കൽനിന്നും 0.7 ഗ്രാം എംഡിഎംഎയും, മയക്കുമരുന്നു വില്പനയിലൂടെ നേടിയ 13,800 രൂപയും കണ്ടെടുത്തു. ഇവർ സഞ്ചരിച്ചിരുന്ന ഓട്ടോയും പിടികൂടിയിട്ടുണ്ട്. സംഘത്തിലെ നിഷാദ് പെരുമ്പാവൂർ പോലീസ് സ്റ്റേഷനിലെ റൗഡി ലിസ്റ്റിൽ ഉൾപ്പെട്ടയാളും നിരവധി മയക്കുമരുന്ന് കേസുകളിലെ പ്രതിയുമാണ്. കഴിഞ്ഞ ദിവസം 5 ഗ്രാം എംഡിഎംഎയുമായി യുവതി ഉൾപ്പടെ രണ്ടു പേരെ പെരുമ്പാവൂരിൽനിന്നു പിടികൂടിയിരുന്നു. പെരുമ്പാവൂർ എഎസ്പി ശക്തി സിംഗ് ആര്യ, സിഐ ടി.എം. സൂഫി, എസ്ഐമാരായ റിൻസ് എം. തോമസ്, എൻ.പി. ശശി, സുഭാഷ് തങ്കപ്പൻ, എഎസ്ഐ പി.എ. അബ്ദുൽ മനാഫ്, സീനിയർ സിപിഒ മാരായ ടി.എ. അഫ്സൽ, വർഗീസ് വേണാട്ട്, ബെന്നി ഐസക്, അജിത്ത് മോഹൻ, എ.ടി. ജിൻസ് എന്നിവരാണ് അന്വേഷണസംഘത്തിൽ ഉണ്ടായിരുന്നത്.

മൂവാറ്റുപുഴയിൽ 30 കിലോ കഞ്ചാവുമായി മൂന്നുപേർ അറസ്റ്റിൽ

മൂവാറ്റുപുഴ: 30 കിലോയോളം കഞ്ചാവുമായി യുവതി ഉൾപ്പെടെ മൂന്ന് ഇതര സംസ്ഥാനത്തൊഴിലാളികൾ പിടിയിൽ. പശ്ചിമ ബംഗാൾ മൂർഷിദാബാദ് ഗോഷ്പാറ സ്വദേശി സുഹേൽ റാണ മണ്ഡൽ(40), ജാലംഗി സ്വദേശികളായ അലൻ ഗിൽ ഷെയ്ക്ക് (33), ഹസീന ഖാട്ടൂൺ(33) എന്നിവരെയാണ് റൂറൽ ജില്ലാ ഡാൻസാഫ് ടീമും മൂവാറ്റുപുഴ പോലീസും ചേർന്ന് പിടികൂടിയത്. സമീപകാലത്ത് റൂറൽ ജില്ലയിൽ നടത്തിയ വലിയ മയക്കുമരുന്നു വേട്ടയാണിത്. ജില്ലാ പോലീസ് മേധാവി എം. ഹേമലതയുടെ നേതൃത്വത്തിൽ നടത്തിയ പരിശോധനയിൽ മൂവാറ്റുപുഴ സംഗമം ജംഗ്‌ഷനിലെ ബസ്‌സ്റ്റോപ്പിൽ നിന്നാണ് ഇവരെ കസ്റ്റഡിയിലെടുത്തത്. ഒഡീഷയിൽ നിന്ന് തീവണ്ടി മാർഗം തൃശൂരെത്തിയ ഇവർ അവിടെ നിന്നും ഓട്ടോയിലാണ് ഇവിടെ വന്നിറങ്ങിയത്. പോലീസ് പിടിക്കാതിരിക്കാനുള്ള തന്ത്രമായിരുന്നു ഇത്. 2,000 രൂപയ്ക്ക് അവിടെ നിന്ന് വാങ്ങി 20,000 രൂപയ്ക്ക് ഇവിടെ കൈമാറി ഉടൻ തിരിച്ചു പോകാനായിരുന്നു പദ്ധതി. 27 പ്രത്യേക പായ്ക്കറ്റുകളിലാക്കിയാണ് ഇവർ കഞ്ചാവ് കൊണ്ടുവന്നത്. ഇവരിൽ നിന്ന് കഞ്ചാവ് വാങ്ങുന്നവരെക്കുറിച്ചും പോലീസ് അന്വേഷിക്കുന്നുണ്ട്. ജില്ലാ പോലീസ് മേധാവി എം. ഹേമലതയുടെ നേതൃത്വത്തിൽ നർക്കോട്ടിക്ക് സെൽ ഡിവൈഎസ്പി ജെ. ഉമേഷ് കുമാർ, മൂവാറ്റുപുഴ ഡിവൈഎസ്പി പി.എം. ബൈജു, ഇൻസ്പെക്ടർ ബേസിൽ തോമസ്, ഡാൻസാഫ് ടീം എന്നിവരാണ് അന്വേഷണ സംഘത്തിലുണ്ടായിരുന്നത്.

ജോലി തട്ടിപ്പ്; യുവാവിനെതിരേ കേസ്

വൈപ്പിൻ: ഓസ്ട്രേലിയയിൽ ജോലി തരപ്പെടുത്താമെന്ന് പറഞ്ഞ് 4.25 ലക്ഷം തട്ടിയെടുത്ത യുവാവിനെതിരെ ഞാറക്കൽ പോലീസ് കേസെടുത്തു. ആലപ്പുഴ ചെട്ടിക്കുളങ്ങര ജാമീഷ് ഭവനിൽ ജാമീഷ്- 37 നെതിരെയാണ് കേസ്. പണം നഷ്ടപ്പെട്ട നായരമ്പലം സ്വദേശി ഞാറക്കൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ സ്വകാര്യ അന്യായം നൽകിയിരുന്നു. ഇതിന്‍റെ അടിസ്ഥാനത്തിൽ കോടതി നിർദേശത്തെ തുടർന്നാണ് പോലീസ് കേസെടുത്തിട്ടുള്ളത്. ഓസ്ട്രേലിയയിൽ വെയർഹൗസിൽ ജോലി തരപ്പെടുത്താമെന്നായിരുന്നു വാഗ്ദാനം. ഇതുപ്രകാരം 2024 ജനുവരിയിലും മാർച്ചിലുമായി ബാങ്ക് ട്രാൻസ്ഫർ മുഖേനയാണ് പണം നൽകിയിട്ടുള്ളത്. ഇതിനു ശേഷം ജോലി ലഭിക്കാതെ വന്നപ്പോൾ പണം തിരികെ ആവശ്യപ്പെട്ടെങ്കിലും നൽകിയില്ല. തുടർന്നാണ് രേഖകളുമായി കോടതിയെ സമീപിച്ചത്.

മയക്കുമരുന്നിന്‍റെ ശൃംഖല പൊട്ടിക്കണം: വി.ഡി. സതീശന്‍

കൊച്ചി: സംസ്ഥാനത്ത് വ്യാപകമാകുന്ന മയക്കുമരുന്നിന്‍റെ വിതരണ ശൃംഖല പൊട്ടിക്കണമെന്ന് പ്രതിപക്ഷനേതാവ് വി.ഡി. സതീശന്‍. എല്ലാ മേഖലകളിലും ലഹരി വ്യാപനമുണ്ട്. സിനിമരംഗത്തെക്കുറിച്ച് നേരത്തെ തന്നെ ആരോപണമുണ്ട്. ലഹരിമരുന്ന് ഉപയോഗിക്കുകയും വിതരണം ചെയ്യുകയും ചെയ്യുന്നവരെ സിനിമയുമായി സഹകരിപ്പിക്കില്ലെന്ന് ഫെഫ്ക്കയും അമ്മയും ഉള്‍പ്പെടെയുള്ള സംഘടനകള്‍ തീരുമാനിക്കണം. ചെറുപ്പക്കാരെ സ്വാധീനിക്കുന്ന റോള്‍ മോഡലുകളായ താരങ്ങള്‍ ലഹരിമരുന്ന് ഉപയോഗിക്കുന്നവരാകരുത്. എവിടെ ലഹരി ഉപയോഗിച്ചാലും അവിടെയൊക്കെ പരിശോധന നടത്തണം. എന്‍ഫോഴ്‌സ്‌മെന്‍റില്‍ സര്‍ക്കാര്‍ ശ്രദ്ധിക്കുന്നില്ലെന്നതാണ് പ്രശ്‌നം. വലിക്കുന്നവരെ പിടിച്ച് ജാമ്യത്തില്‍ വിട്ടിട്ട് കാര്യമില്ല. ലഹരി എത്തിക്കുന്നവരെ കണ്ടെത്തുകയാണ് വേണ്ടത്.

പഹല്‍ഗാം ഭീകരാക്രമണം : മുഖ്യമന്ത്രി രാമചന്ദ്രന്‍റെ വീട് സന്ദര്‍ശിച്ചു

കൊച്ചി: കാഷ്മീരിലെ പഹല്‍ഗാമില്‍ നടന്ന ഭീകരാക്രമണത്തില്‍ കൊല്ലപ്പെട്ട ഇടപ്പള്ളി സ്വദേശി എന്‍. രാമചന്ദ്രന്‍റെ വീട് മുഖ്യമന്ത്രി പിണറായി വിജയന്‍ സന്ദര്‍ശിച്ചു. ഇന്നലെ രാവിലെ 11.30 ഓടെ ഇടപ്പള്ളി മോഡേണ്‍ ബ്രഡിന് സമീപം മങ്ങാട്ട് റോഡിലെ വീട്ടിലെത്തിയ മുഖ്യമന്ത്രി രാമചന്ദ്രന്‍റെ ഭാര്യ ഷീല, മക്കളായ ആരതി, അരവിന്ദ്, പേരക്കുട്ടികളായ ദ്രുപദ്, കേദാര്‍, മരുമക്കള്‍ ശരത്, വിനീത എന്നിവരോടൊപ്പം അരമണിക്കൂറോളം ചിലവഴിച്ചു. മുന്നോട്ടുള്ള യാത്രയില്‍ കേരളം കൂടെയുണ്ട്. ഭീകരുടെ ആക്രമണത്തില്‍ അച്ഛന്‍റെ ജീവന്‍ നഷ്ടമായപ്പോഴും പകച്ചുനില്‍ക്കാതെ മുന്നോട്ടുപോയ മകള്‍ ആരതിക്ക് ദുഃഖകാലം മറികടക്കാന്‍ ഈ ധൈര്യം തുടര്‍ന്നും പ്രേരണയാകട്ടെയെന്നും കുടുംബത്തെ ആശ്വസിപ്പിച്ചു മുഖ്യമന്ത്രി പറഞ്ഞു. മന്ത്രി കെ.എന്‍. ബാലഗോപാല്‍, സിപിഎം സംസ്ഥാന സെക്രട്ടറി എം.വി. ഗോവിന്ദന്‍, ജില്ലാ സെക്രട്ടറി എസ്. സതിഷ്, സംസ്ഥാന സെക്രട്ടറിയേറ്റ് അംഗം സി.എന്‍. മോഹനന്‍, ജില്ലാ കളക്ടര്‍ എന്‍.എസ്.കെ. ഉമേഷ്, കൊച്ചി സിറ്റി പോലീസ് കമ്മീഷണര്‍ പുട്ട വിമലാദിത്യ, ഡിസിപി അശ്വതി ജിജി തുടങ്ങിയവരും ഒപ്പം ഉണ്ടായിരുന്നു.

ഹൈബ്രിഡ് കഞ്ചാവുമായി സംവിധായകരായ ഖാലിദ് റഹ്‌മാനും അഷ്‌റഫ് ഹംസയും പിടിയില്‍

അറസ്റ്റിലായത് ഛായാഗ്രാഹകൻ സമീര്‍ താഹിറിന്‍റെ ഫ്ലാറ്റില്‍നിന്ന് കൊച്ചി: ഹൈബ്രിഡ് കഞ്ചാവുമായി ഹിറ്റ് സിനിമകളുടെ സംവിധായകരും സുഹൃത്തും പിടിയിലായി. എറണാകുളം തോപ്പുംപടി സ്വദേശി ഖാലിദ് റഹ്‌മാന്‍ (35), തൃശൂര്‍ പൊന്നാനി സ്വദേശി അഷ്‌റഫ് ഹംസ (46), കൊച്ചിയില്‍ താമസിക്കുന്ന ഷാലി മുഹമ്മദ് (35) എന്നിവരെയാണ് എക്‌സൈസ് അറസ്റ്റ് ചെയ്തത്. പ്രമുഖ ഛായാഗ്രാഹകനായ സമീര്‍ താഹിറിന്‍റെ എറണാകുളം ഗോശ്രീ പാലത്തിനു സമീപത്തുള്ള പൂര്‍വ ഗ്രാന്‍ഡ് ബെയിലെ ഫ്ലാറ്റില്‍നിന്ന് ഇന്നലെ പുലര്‍ച്ചെ രണ്ടോടെയാണ് മൂവരെയും പിടികൂടിയത്. പ്രതികളില്‍നിന്ന് 1.6 ഗ്രാം ഹൈബ്രിഡ് കഞ്ചാവും ഇതുപയോഗിക്കാനുള്ള വസ്തുക്കളും കണ്ടെടുത്തു. കുറഞ്ഞ അളവായതിനാല്‍ മൂവരെയും ആശുപത്രിയിലെത്തിച്ചു വൈദ്യപരിശോധനയ്ക്കു വിധേയമാക്കിയശേഷം സ്റ്റേഷന്‍ ജാമ്യത്തില്‍ വിട്ടയച്ചു. സംഭവത്തില്‍ എന്‍ഡിപിഎസ് വകുപ്പ് പ്രകാരം സമീര്‍ താഹിറിനെയും പ്രതിചേര്‍ത്തേക്കും. ഇന്ന് കോടതിയില്‍ അറസ്റ്റ് വിവരങ്ങളുടെ രേഖകള്‍ സമര്‍പ്പിച്ചശേഷം പ്രതികള്‍ക്ക് ചോദ്യം ചെയ്യലിനു ഹാജരാകാന്‍ നോട്ടീസ് നല്‍കും. ഫ്ലാറ്റിലെ ഒരു ജീവനക്കാരനെക്കൊണ്ടാണ് എക്‌സൈസ് സംഘം പ്രതികള്‍ താമസിച്ച 506-ാം നമ്പര്‍ ഫ്ലാറ്റില്‍ തട്ടിവിളിച്ച് വാതില്‍ തുറപ്പിച്ചത്. ഷാലി മുഹമ്മദ് വാതില്‍ തുറന്നതോടെ, രഹസ്യവിവരത്തെത്തുടര്‍ന്ന് സ്ഥലത്തെത്തിയ എക്‌സൈസ് ഉദ്യോഗസ്ഥര്‍ ഫ്ലാറ്റിനുള്ളിൽ പ്രവേശിക്കുകയായിരുന്നു. തിയറ്ററില്‍ പ്രദര്‍ശനം തുടരുന്ന "ആലപ്പുഴ ജിംഖാന’എന്ന സിനിമയുടെ സംവിധായകനാണ് ഖാലിദ് റഹ്‌മാന്‍. ഇതിനുപുറമെ തല്ലുമാല, അനുരാഗ കരിക്കിന്‍ വെള്ളം, ഉണ്ട തുടങ്ങിയ സിനിമകളും സംവിധാനം ചെയ്തിട്ടുണ്ട്. തമാശ, ഭീമന്‍റെ വഴി, സുലേഖ മന്‍സില്‍ എന്നീ സിനിമകളുടെ സംവിധായകനാണ് അഷ്‌റഫ് ഹംസ. കൊച്ചി സ്വദേശിയാണ് ഇവര്‍ക്കു ഹൈബ്രിഡ് കഞ്ചാവ് എത്തിച്ചു നല്‍കിയതെന്നാണ് വിവരം. ഷാലി മുഹമ്മദ് വഴിയായിരുന്നു ഇടപാട്. മൂവരെയും അറസ്റ്റ് ചെയ്തതോടെ ഇടനിലക്കാരന്‍ ഒളിവില്‍പ്പോയതായാണ് എക്‌സൈസിന്‍റെ കണ്ടെത്തല്‍. വൈകാതെ ഇയാളെ പിടികൂടുമെന്ന് ഉദ്യോഗസ്ഥര്‍ പറഞ്ഞു. മൂന്നു മാസം മുമ്പ് ഇതേ ഫ്ലാറ്റില്‍ എക്‌സൈസ് പരിശോധന നടത്തിയതായാണു വിവരം. ഫെഫ്ക പുറത്താക്കി കൊച്ചി: ഹൈബ്രിഡ് കഞ്ചാവുമായി പിടിയിലായ സംവിധായകര്‍ ഖാലിദ് റഹ്‌മാനെയും അഷ്‌റഫ് ഹംസയെയും ഫെഫ്ക ഡയറക്‌ടറേറ്റ് യൂണിയനില്‍നിന്ന് സസ്‌പെന്‍ഡ് ചെയ്തു. കേസന്വേഷണത്തിന്‍റെ പുരോഗതി വിലയിരുത്തി തുടര്‍നടപടികള്‍ സ്വീകരിക്കുമെന്ന് ഡയറക്ടറേറ്റ് യൂണിയന്‍ പ്രസിഡന്‍റ് രൺജി പണിക്കര്‍, ജനറല്‍ സെക്രട്ടറി ജി.എസ്. വിജയന്‍ എന്നിവര്‍ വ്യക്തമാക്കി. ഇരുവർക്കുമെതിരേ നടപടിയെടുക്കാന്‍ ഫെഫ്ക നേതൃത്വം ഡയറക്‌ടേഴ്സ് യൂണിയന് നിര്‍ദേശം നല്‍കിയിരുന്നു. പേര് പറയാന്‍ മടി; ഗൂഗിൾ ലെൻസിൽ കുടുങ്ങി എക്‌സൈസ് സംഘം ഫ്ലാറ്റിനുള്ളിലേക്ക് കടക്കുമ്പോള്‍ കഞ്ചാവ് ഉപയോഗിക്കാനുള്ള തയാറെടുപ്പിലായിരുന്നു ഖാലിദ് റഹ്‌മാനും അഷ്‌റഫ് ഹംസയും. എക്‌സൈസാണെന്ന് അറിയിച്ചതോടെ ഇവര്‍ പേരു പറയാന്‍ മടിച്ചു. സിനിമയില്‍ ചെറിയ വേഷം ചെയ്യുന്നവരാണെന്നും "മഞ്ഞുമ്മല്‍ ബോയ്‌സി’ല്‍ അഭിനയിച്ചിട്ടുണ്ടെന്നും ഖാലിദ് റഹ്‌മാന്‍ പറഞ്ഞു. സംശയം തോന്നിയ ഉദ്യോഗസ്ഥര്‍ ഇവരുടെ ചിത്രങ്ങളെടുത്ത് ഗൂഗിൾ ലെൻസില്‍ പരിശോധിച്ചപ്പോഴാണു ഹിറ്റ് ചിത്രങ്ങളുടെ സംവിധായകരാണെന്നു വ്യക്തമായത്.

വാഹനാപകടത്തിൽ യുവാവിനു പരിക്ക്

വൈപ്പിൻ: സ്വകാര്യ ബസ് മോട്ടോർ ബൈക്കിലിടിച്ച് ഉണ്ടായ അപകടത്തിൽ ബൈക്ക് യാത്രികനായ യുവാവിന്‍റെ കാൽ ഒടിഞ്ഞു. പള്ളിപ്പുറം പ്ലാക്കൽ ഗംഗാധരന്‍റെ മകൻ അഭിറാ(24)മിന്‍റെ കാലാണ് ഒടിഞ്ഞത്. ഇയാൾ എറണാകുളത്തെ സ്വകാര്യ ആശുപത്രിയിൽ ചികിത്സയിലാണ്. കഴിഞ്ഞ ദിവസം സംസ്ഥാന പാതയിൽ എളങ്കുന്നപ്പുഴ പെട്രോൾ പമ്പിനു മുന്നിലായിരുന്നു അപകടം. വൈപ്പിൻ റൂട്ടിൽ ഓടുന്ന സാധിക എന്ന സ്വകാര്യ ബസാണ് അപകടമുണ്ടാക്കിയത്. ഡ്രൈവർക്കെതിരെ ഞാറക്കൽ പോലീസ് കേസ് എടുത്തിട്ടുണ്ട്.

ഹജ്ജ് ക്യാന്പ്: സംഘാടകസമിതി രൂപീകരിച്ചു

നെടുമ്പാശേരി: സംസ്ഥാന ഹജ്ജ് കമ്മിറ്റിയുടെ നേതൃത്വത്തിൽ 2025 ൽ നെടുമ്പാശേരിയിൽ നിന്നും ഹജ്ജിന് പോകുന്ന ഹാജിമാർക്കായുള്ള കൊച്ചിൻ എംബാർക്കേഷൻ ക്യാമ്പ് സ്വാഗത സംഘം രൂപീകരിച്ചു. സിയാൽ അക്കാദമി ഹാളിൽ ചേർന്ന രൂപീകരണയോഗം ഹജ്ജ് കമ്മിറ്റി ചെയർമാൻ ഡോ. ഹുസൈൻ സഖാഫി ചുള്ളിക്കോട് ഉദ്ഘാടനം ചെയ്തു.അൻവർ സാദത്ത് എംഎൽഎ അധ്യക്ഷനായി. കൊച്ചി ഹജ്ജ് ക്യാമ്പിന്‍റെ സംഘാടകസമിതിയുടെ ചെയർമാനായി പട്ടാമ്പി എംഎൽഎയും ഹജ്ജ് കമ്മിറ്റി അംഗവുമായ മുഹമ്മദ് മുഹ്സിനും, വൈസ് ചെയർമാൻ മാരായി നൂർ മുഹമ്മദ് നൂർഷ ,മുഹമ്മദ് സക്കീർ, അനസ് ഹാജി എന്നിവരെയും, ജനറൽ കൺവീനറായി അഡ്വ: മൊയ്തീൻ കുട്ടിയേയും ക്യാമ്പ് അസി: കോ കോഡിനേറ്ററായി ടി കെ സലിം, പി എം സഹീർ എന്നിവരെയും തെരഞ്ഞടുത്തു. കൊച്ചിയിൽ നിന്നു സൗദി എയർലൈൻസാണ് സർവീസ് നടത്തുന്നത്. മേയ് 16 മുതൽ 30 വരെ തീയതികളിലായി 21 സർവീസുകളാണുള്ളത്. കൊച്ചിയിൽ നിന്നുള്ള ആദ്യ വിമാനം മെയ് 16ന് വൈകിട്ട് 5. 55 നാണ് പുറപ്പെടുന്നത്. കൊച്ചിയിൽ നിന്നും 5.680 പേർ നിലവിൽ തെരഞ്ഞെടുക്കപ്പെട്ടത്. കൂടാതെ മറ്റു സംസ്ഥാനങ്ങളിൽ നിന്നുള്ള ഹാജിമാരിൽ തമിഴ്നാട്ടിൽ നിന്നുള്ള 199 പേരും ലക്ഷദ്വീപിൽ നിന്നുള്ള 111 പേരും കൊച്ചിയിൽ നിന്നുമാണ് യാത്രതിരിക്കുന്നത്. കോഴിക്കോട് നിന്നും 5,386 പേരും കണ്ണൂരിൽ നിന്ന് 4,780 പേരുമാണ് ഹജ്ജിനു പോകുന്നത്.

നിർദിഷ്ട എടയാറ്റുചാൽ ലിഫ്റ്റ് ഇറിഗേഷൻ പദ്ധതി : കോൺഗ്രസ് സമരത്തിനിടെ സംഘർഷം

ആലുവ: എടയാറ്റ് ചാൽ ലിഫ്റ്റ് ഇറിഗേഷൻ പദ്ധതി ഉപേക്ഷിക്കണമെന്നാവശ്യപ്പെട്ട് കടുങ്ങല്ലൂർ പഞ്ചായത്ത് കോൺഗ്രസ് കമ്മിറ്റിയുടെ നേതൃത്വത്തിൽ നടത്തിയ പ്രതിഷേധ സമരം സംഘർഷത്തിൽ കലാശിച്ചു. ഒഴിവ് ദിനം നോക്കി പദ്ധതി പ്രവർത്തനം ആരംഭിച്ചെന്നറിഞ്ഞ് കോൺഗ്രസ് ഇന്നലെ നടത്തിയ മാർച്ച് പോലീസ് തടഞ്ഞതോടെയാണ് ഉന്തും തള്ളുമായത്. പ്രവർത്തകരെ ബിനാനി പുരം പോലീസ് അറസ്റ്റ് ചെയ്ത് പോലീസ് വാനിൽ പോലീസ് സ്റ്റേഷനിൽ എത്തിച്ച ശേഷം ജാമ്യത്തിൽ വിട്ടു. 2.85 കോടി ചെലവ് പ്രതീക്ഷിക്കുന്ന പദ്ധതി അഴിമതിയും ധൂർത്തുമാണെന്നാണ് കോൺഗ്രസ് ആരോപണം. ഓഞ്ഞിത്തോടിലെ കൈയേറ്റങ്ങൾ ഒഴിവാക്കി കലിഞ്ഞത്തിൽ, തത്തയിൽ, തേരേപറമ്പ് ഇറിഗേഷൻ പദ്ധതികൾ വഴി വെള്ളം ലഭ്യമാക്കണമെന്നാണ് കോൺഗ്രസ് പാർട്ടി ആവശ്യപ്പെടുന്നത്. കടുങ്ങല്ലൂർ ഗ്രാമപഞ്ചായത്തിലെ 17, 18, 19, 20 വാർഡുകളിലായി 400 ഏക്കറിൽ വ്യാപിച്ചു കിടക്കുന്ന എടയാറ്റുചാൽ പാടശേഖരത്ത് മഴയെ ആശ്രയിക്കാതെ നെൽകൃഷി നടത്തണമെങ്കിൽ പെരിയാറിൽ നിന്ന് വെള്ളം എത്തിക്കണമെന്നാണ് പദ്ധതിയെ അനുകൂലിക്കുന്നവരുടെ വാദം. നിർദ്ദിഷ്ട എടയാറ്റുചാൽ ലിഫ്റ്റ് ഇറിഗേഷൻ പ്രൊജക്ടിന്‍റെ പമ്പിംഗ് സ്റ്റേഷൻ മുപ്പത്തടത്ത് പാതാളം പാലത്തോടു ചേർന്നുള്ള സ്ഥലത്താണ് നിർമിക്കുക. 40 കുതിരശക്തിയുള്ള മോട്ടോർ ഉപയോഗിച്ച് പമ്പ് ചെയ്യുന്ന വെള്ളം തൊള്ളായിരം മീറ്റർ ദൂരെയുള്ള എടയാറ്റുചാലിൽ എത്തിക്കുന്നത് ഭൂമിക്കടിയിലൂടെ വലിയ കുഴലുകൾ സ്ഥാപിച്ചാണ്. വെള്ളം എടയാറ്റുചാലിന്‍റെ തണ്ടിരിക്കൽ ഭാഗത്തായിരിക്കും എത്തുക. അവിടെനിന്നു തോടുകൾ നിർമിച്ച് പാടശേഖരത്തിലെ വിവിധ ഭാഗങ്ങളിലേക്ക് വെള്ളം ഒഴുക്കും.

വാഹന യാത്രികർക്ക് അപകട ഭീഷണി ഉയര്‍ത്തി ഈറ്റക്കൂട്ടം

കോതമംഗലം: നേര്യമംഗലം-ഇടുക്കി റോഡില്‍ വാഹന യാത്രക്കാര്‍ക്ക് അപകട ഭീഷണി ഉയര്‍ത്തി ഈറ്റക്കൂട്ടം. റോഡിന്‍റെ വശങ്ങളിലായി നില്‍ക്കുന്ന ഈറ്റക്കാടുകളും മരച്ചില്ലകളും റോഡിന്‍റെ പകുതിയോളം വളര്‍ന്നിറങ്ങിയതാണ് വാഹന യാത്രക്കാര്‍ക്ക് അപകട ഭീഷണി ഉയര്‍ത്തുന്നത്. ഇതുമൂലം അകലെനിന്നുവരുന്ന വാഹനങ്ങളും വളവും ഡ്രൈവര്‍മാരുടെ ദൂരക്കാഴ്ച മറയ്ക്കുന്നതില്‍ റോഡില്‍ വന്‍ അപകടമാണ് പതിയിരിക്കുന്നത്. വേഗതയില്‍ വരുന്ന വാഹനങ്ങള്‍ റോഡിലേക്ക് പടര്‍ന്നുനില്‍ക്കുന്ന ഇറ്റക്കാടുകള്‍കണ്ട് പെട്ടെന്ന് ബ്രേക്ക് പിടിക്കുന്നതും വാഹനങ്ങള്‍ ഇവയില്‍ തട്ടാതെ വെട്ടിച്ചുമാറ്റാന്‍ ശ്രമിക്കുന്നതും അപകടസാധ്യത വര്‍ധിപ്പിക്കുന്നു. ഇരുചക്ര വാഹന യാത്രക്കാര്‍ക്കാണ് കൂടുതല്‍ അപകട സാധ്യത. ഈറ്റകള്‍ വാഹനങ്ങളില്‍ തട്ടി പോറലേല്‍ക്കുന്നതായും യാത്രക്കാര്‍ക്ക് പരാതിയുണ്ട്. ഗതാഗതത്തിന് തടസമാകുന്ന കാട് വെട്ടിമാറ്റാന്‍ വനപാലകര്‍ തയാറാകുന്നില്ലെന്നാണ് പരാതി. നാട്ടുകാര്‍ ഇവ വെട്ടിനീക്കാന്‍ തയാറായാല്‍ വനവിഭവങ്ങള്‍ നശിപ്പിച്ചെന്ന കാരണം ചൂണ്ടിക്കാട്ടി ഇവര്‍ക്കെതിരേ വനംവകുപ്പ് കേസെടുക്കാനുള്ള സാധ്യതയുള്ളതിനാല്‍ ആരും ഇതിനു മുതിരാത്ത സാഹചര്യമാണ് നിലവില്‍. മഴക്കാലം ആരംഭിക്കുന്നതോടെ ഇതുവഴിയുള്ള യാത്ര കൂടുതല്‍ ദുരിതപൂര്‍ണമാകുമെന്നും അപകടം വര്‍ധിക്കാന്‍ ഇടയാക്കുമെന്നും നാട്ടുകാര്‍ പറഞ്ഞു.

തിരുനാൾ

ചാത്തമറ്റം സെന്‍റ് ജോർജ് പള്ളിയിൽ തിരുനാൾ വാഴക്കുളം: ചാത്തമറ്റം സെന്‍റ് ജോർജ് മലങ്കര സുറിയാനി കത്തോലിക്കാ പള്ളിയിൽ വിശുദ്ധ ഗീവർഗീസ് സഹദായുടെയും വിശുദ്ധ സെബസ്ത്യാനോസിന്‍റെയും സംയുക്ത തിരുനാൾ മൂന്നിന് നടത്തും. വൈകുന്നേരം നാലിന് ജപമാല, 4.30ന് സീറോ മലബാർ ക്രമത്തിൽ കുർബാന, ആറിന് പ്രാർഥന, 6.30ന് പ്രദക്ഷിണം, എട്ടിന് പ്രസംഗം. നാലിന് രാവിലെ 8.30 ന് കുരിശടി കൂദാശയും തുടർന്ന് തിരുനാൾ കുർബാനയും - യൂഹാനോൻ മാർ തെയഡോഷ്യസ് മെത്രാപ്പോലീത്ത. 11.30 ന് പ്രദക്ഷിണം. 12ന് ആദരിക്കൽ, സമാപനാശീർവാദം, നേർച്ച സദ്യ, കോഴി ലേലം എന്നിവയാണ് തിരുനാൾ പരിപാടികളെന്ന് വികാരി ഫാ. ജേക്കബ് കീയ്യാലിൽ അറിയിച്ചു. വാഴക്കുളം സെന്‍റ് ജോർജ് ഫൊറോന പള്ളിയിൽ തിരുനാൾ വാഴക്കുളം: സെന്‍റ് ജോർജ് ഫൊറോന പള്ളിയിൽ വിശുദ്ധ ഗീവർഗീസ് സഹദായുടെ ദർശന തിരുനാൾ മൂന്നിനും നാലിനും നടത്തും. തിരുനാളിനൊരുക്ക മായുള്ള നൊവേന ടൗൺ കപ്പേളയിൽ ആരംഭിച്ചു. രണ്ടുവരെ വൈകുന്നേരം അഞ്ചിന് നൊവേനയും നേർച്ച വെഞ്ചിരിപ്പ് വിതരണവും. ഒന്നിന് രാവിലെ ആറിന് കുർബാന, ത്രിദിനാപേക്ഷ. 6.45ന് കുർബാന തൊഴിലാളികൾക്ക് വേണ്ടി പ്രാർഥന. ഒൻപതിന് കുട്ടികളുടെ ആഘോഷമായ ആദ്യ കുർബാന സ്വീകരണം. രണ്ടിന് രാവിലെ ആറിന് കുർബാന, ത്രിദിനാപേക്ഷ. 6.45ന് കുർബാന. മൂന്നിന് രാവിലെ ആറിന് കുർബാന, ത്രിദിനാപേക്ഷ, കൊടിയേറ്റ്, തിരുസ്വരൂപ പ്രതിഷ്ഠ, ദീപം തെളിക്കൽ, 7.30ന് കുർബാന, വൈകുന്നേരം 4.30ന് തിരുനാൾ കുർബാന, പ്രസംഗം, 6.15ന് ടൗൺ പ്രദക്ഷിണം, 7.30ന് സമാപനാശീർവാദം. നാലിന് രാവിലെ ആറിനും എട്ടിനും പത്തിനും കുർബാന, വൈകുന്നേരം 4.30ന് തിരുനാൾ കുർബാന, പ്രസംഗം - മോൺ. പയസ് മലേക്കണ്ടത്തിൽ, 6.15ന് കുരിശു ചുറ്റി പ്രദക്ഷിണം, ഏഴിന് സമാപനാശീർവാദം, നേർച്ച വസ്തുക്കളുടെ ലേലം. അഞ്ചിന് രാവിലെ ആറിനും 6.45നും കുർബാന, മരിച്ചവരുടെ ഓർമ്മ ആചരണത്തോടെ സെമിത്തേരി സന്ദർശനം എന്നിവയാണ് തിരുനാൾ പരിപാടികളെന്ന് വികാരി ഫാ. ഫ്രാൻസിസ് ആലപ്പാട്ട്, റസിഡന്‍റ് പ്രീസ്റ്റ് ഫാ. ജോസ് മോനിപ്പിള്ളിൽ, സഹവികാരിമാരായ ഫാ.ജോൺസൺ വാമറ്റത്തിൽ, ഫാ.ജോസഫ് കൊച്ചുപുത്തൻപുരയിൽ എന്നിവർ അറിയിച്ചു.

ഗുണഭോക്താക്കൾക്ക് അനുമതിപത്രം നൽകി

കോതമംഗലം: ബ്ലോക്ക് പഞ്ചായത്ത് പിഎംഎവൈജി ഭവന പദ്ധതിയിലെ ഗുണഭോക്താക്കൾക്ക് അനുമതിപത്രം വിതരണം ചെയ്തു. ബ്ലോക്ക്‌ പ്രസിഡന്‍റ് പി.എ.എം. ബഷീർ ഉദ്ഘാടനം നിർവഹിച്ചു. ബ്ലോക്ക് പരിധിയിലെ 10 പഞ്ചായത്തുകളിൽ 1211 കുടുംബങ്ങൾക്കാണ് വീട് നിർമാണത്തിന് തുക അനുവദിചിരിക്കുന്നത്. ഇതിൽ രജിസ്റ്റർ ചെയ്ത 256 കുടുംബങ്ങൾക്കാണ് അനുമതിപത്രം നൽകിയത്. ഇതിനോടകം 197 വീടുകൾക്ക് ആദ്യഗഡു വിതരണം ചെയ്തു. രജിസ്റ്റർ ചെയ്യുന്നതനുസരിച്ചു ബാക്കിയുള്ളവർക്കും അനുമതിപത്രം നൽകും. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി അധ്യക്ഷത വഹിച്ചു.

ഒന്നാം കാതോലിക്ക ബാവയുടെ ഓർമപ്പെരുന്നാളിന് കൊടിയേറി

പിറവം: മലങ്കര ഓർത്തഡോക്സ് സുറിയാനി സഭയുടെ പ്രഥമ കാതോലിക്ക പരിശുദ്ധ ബസേലിയോസ് പൗലോസ് പ്രഥമൻ (മുറിമറ്റത്തിൽ) ബാവയുടെ 112-ാമത് ഓർമപ്പെരുന്നാളിന്, ബാവ കബറടങ്ങിയിരിക്കുന്ന പാമ്പാക്കുട സെന്‍റ് തോമസ് ഓർത്തഡോക്സ് ചെറിയ പള്ളിയിൽ കൊടിയേറി. കുർബാനയ്‌ക്കും കബറിങ്കലെ ധൂപപ്രാർഥനയ്‌ക്കും ശേഷം വികാരി ഫാ. ഏബ്രഹാം പാലപ്പിള്ളിൽ കൊടിയേറ്റി. പരിശുദ്ധ ബസേലിയോസ് മാർത്തോമ്മ മാത്യൂസ് തൃതീയൻ കാതോലിക്ക ബാവയുടെ മുഖ്യകാർമികത്വത്തിലും മെത്രാപ്പോലീത്താമാരായ സഖറിയാസ് മാർ സേവേറിയോസ്, ഗീവർഗീസ് മാർ ബർണബാസ് എന്നിവരുടെ സഹകാർമികത്വത്തിലുമാണ് ചടങ്ങുകൾ നടക്കുന്നത്. വ്യാഴാഴ്ച രാവിലെ ഏഴിന് കുർബാന. വെള്ളിയാഴ്ച രാവിലെ 7.30 ന് കുർബാന, വൈകിട്ട് 5.30 മുതൽ തീർഥാടകർക്ക് സ്വീകരണം. പിറവം, മുളക്കുളം, ഓണക്കൂർ മേഖലയിൽ നിന്നുള്ള തീർഥാടകർക്ക് കാക്കൂർ സെന്‍റ് തോമസ് കുരിശിങ്കലും കോലഞ്ചേരി, കടമറ്റം, പുത്തൻകുരിശ്, നീറാംമുഗൾ, കണ്യാട്ടുനിരപ്പ് മേഖലകളിൽ നിന്നുള്ള തീർഥാടകർക്ക് പരുമല മാർ ഗ്രിഗോറിയോസ് ചാപ്പലിലും സ്വീകരണം നൽകും. കബറിങ്കൽ ധൂപപ്രാർഥന, ശ്ലൈഹിക വാഴ്‌വ്, നേർച്ച സദ്യ എന്നിവയുണ്ടാകും. ശനിയാഴ്ച രാവിലെ 8.30ന് മൂന്നിന്മേൽ കുർബാന, തുടർന്ന് വിദ്യാഭ്യാസ അവാർഡ് ദാനം, പ്രസംഗം, ധൂപപ്രാർഥന, പ്രദക്ഷിണം, ആശിർവാദം, നേർച്ചസദ്യ എന്നിവ നടക്കും.

തിരുമാറാടി, കാക്കൂർ പ്രദേശങ്ങളിൽ തെരുവുനായ ആക്രമണം വർധിക്കുന്നു

തിരുമാറാടി: തിരുമാറാടി, കാക്കൂർ പ്രദേശങ്ങളിൽ തെരുവുനായ്ക്കളുടെ ആക്രമണം വർധിച്ചുവരുന്നു. കാക്കൂർ കൈതാടിമുകളേൽ ജോർജിന്‍റെ വീട്ടിലെ ആട്ടിൻ കൂട്ടിൽ നായ്ക്കൾ കൂട്ടത്തോടെയെത്തി രണ്ട് ആടുകളെ കടിച്ചുകൊന്നു. കരച്ചിൽ കേട്ട് വീട്ടുകാർ എത്തിയതിനാൽ മറ്റ് ആടുകളെ കടിച്ചു പരിക്കേൽപ്പിച്ചിരുന്ന നായ്ക്കൾ ഓടിപ്പോയി. കഴിഞ്ഞ ദിവസങ്ങളിലും തെരുവുനായ്ക്കൾ വളർത്തുമൃഗങ്ങളെ ആക്രമിച്ച സംഭവങ്ങളുണ്ടായി. തിരുമാറാടി ക്ഷേത്രത്തിലേക്കെത്തുന്ന ഭക്തജനങ്ങളെയും തെരുവുനായ്ക്കൾ ആക്രമിക്കാനെത്തി. ക്ഷേത്രത്തിന് സമീപമുള്ള റോഡുകളിലും തെരുവുനായ്ക്കൾ കൂട്ടത്തോടെയെത്തുന്നുണ്ടെന്നാണ് നാട്ടുകാരുടെ പരാതി.

വേനൽമഴയും കാറ്റും : പൈങ്ങോട്ടൂരിൽ കൃഷി നാശം

പോത്താനിക്കാട്: വേനൽമഴയോടൊപ്പമുണ്ടായ കാറ്റ് പൈങ്ങോട്ടൂരിൽ നാശം വിതച്ചു. ഒന്നാം വാർഡിൽ കിഴക്കേ ഭാഗത്ത് ലാലു ജോർജിന്‍റെ പുരയിടത്തിലാണ് ഇന്നലെ വൈകുന്നേരം നാലുമണിയോടെയുണ്ടായ കാറ്റിൽ നാശം സംഭവിച്ചത്. 50 വർഷം മുതൽ 120 വർഷം വരെ പഴക്കമുള്ള 12 ജാതിമരങ്ങളും 40 വാഴ, നാലു മഹാഗണി, രണ്ടു പ്ലാവ് എന്നിവയുമാണ് നിലം പൊത്തിയത്. വീടിന്‍റെ മേൽക്കൂരയും ഭാഗികമായി തകർന്നു. ഉദ്ദേശം മൂന്നു ലക്ഷത്തിന്‍റെ നഷ്ടം കണക്കാക്കുന്നതായി ഉടമ ലാലു ജോർജ് പറഞ്ഞു.

നിർത്തിയിട്ടിരുന്ന ലോറിയിൽ സ്വകാര്യ ബസ് ഇടിച്ചു

കോതമംഗലം: കൊച്ചി-ധനുഷ്കോടി ദേശീയപാതയിൽ കുത്തുകുഴിയിൽ സ്വകാര്യ ബസ് റോഡരികിൽ നിർത്തിയിട്ടിരുന്ന ലോറിയിൽ ഇടിച്ചശേഷം വൈദ്യുത പോസ്റ്റിൽ ഇടിച്ചു. 12 യാത്രക്കാർക്കു പരിക്കേറ്റു. അടിമാലി 14-ാം മൈൽ കക്കാട്ടുകുടി കെ.കെ. മനു (33) കോതമംഗലം മാർ ബസേലിയോസ് ആശുപത്രിയിൽ ചികിത്സയിലുണ്ട്. ബാക്കി 11 പേരെ പ്രഥമ ശുശ്രൂഷ നൽകി വിട്ടയച്ചു. ഇന്നലെ ഉച്ചയ്ക്കു ദേവികുളത്തുനിന്ന് ആലുവയ്ക്ക പോയ ബസാണ് അപകടത്തിൽപെട്ടത്. ബസിന്‍റെ മുൻഭാഗത്തിനും കേടുപാടുണ്ട്.

ചക്കുങ്കല്‌ റസിഡന്‍റ്സ് അസോ. ലഹരിവിരുദ്ധ ബോധവത്കരണവും പ്രതിജ്ഞയും

കൊച്ചി: പാലാരിവട്ടം ചക്കുങ്കല്‍ റസിഡന്‍റ്സ് അസോസിയേഷന്‍റെ നേതൃത്വത്തില്‍ ലഹരി വിരുദ്ധ ബോധവത്കരണ സെമിനാറും പ്രതിജ്ഞയും നടത്തി. അസോസിയേഷന്‍ പ്രസിഡന്‍റ് കെ.പി. ഹാഷിം ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. സെക്രട്ടറി സി.എ. പ്രേമലത, വൈസ് പ്രസിഡന്‍റ് ചന്ദ്രഭാനു, ട്രഷറര്‍ ജോസ് തോമസ്, ജോയിന്‍റ് സെക്രട്ടറി അനുപമ വേണുഗോപാല്‍, മദ്യവിരുധ ഏകോപന സമിതി സംസ്ഥാന ജനറല്‍ സെക്രട്ടറി അഡ്വ. ചാര്‍ളി പോള്‍, എസ്ഐ ബാബു പി. ജോണ്‍, ഡോ. ഡിന്നി മാത്യു തുടങ്ങിയവർ പ്രസംഗിച്ചു.

"ജീവിതം തന്നെ ലഹരി' : ലഹരിക്കെതിരെ കൊച്ചി റണ്‍ സംഘടിപ്പിച്ചു

കൊച്ചി: വര്‍ധിച്ചുവരുന്ന ലഹരി ഉപയോഗത്തിനെതിരെ 'ജീവിതം തന്നെ ലഹരി' എന്ന മുദ്രാവാക്യം ഉയര്‍ത്തി സെന്‍ട്രല്‍ ഗവണ്‍മെന്‍റ് ഓഫീസേഴ്‌സ് അസോസിയേഷന്‍ പനമ്പിള്ളി നഗറില്‍ കൊച്ചി റണ്‍ സംഘടിപ്പിച്ചു. 10 കിലോമീറ്റർ, അഞ്ച് കിലോമീറ്റർ എന്നീ രണ്ട് വിഭാഗങ്ങളിലാണ് ഓട്ടം സംഘടിപ്പിച്ചത്. 10 കിലോമീറ്റര്‍ ഓട്ടം സിറ്റി പോലീസ് കമ്മീഷണര്‍ പുട്ട വിമലാദിത്യയും അഞ്ച് കിലോമീറ്റര്‍ ഓട്ടം കൊച്ചി കസ്റ്റംസ് കമ്മീഷണര്‍ ഗുര്‍കരണ്‍ സിംഗ് ബെയ്ന്‍സും ഫ്ലാഗ് ഓഫ് ചെയ്തു. സിജിഒഎ പ്രസിഡന്‍റ് എസ്. അനന്തനാരായണന്‍ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.10 കിലോമീറ്റർ ഓപ്പണ്‍ കാറ്റഗറിയില്‍ ആണ്‍ വിഭാഗത്തില്‍ റിജിന്‍ ബാബുവും പെണ്‍ വിഭാഗത്തില്‍ ഷിനിയും ജേതാക്കളായി. കൊച്ചിന്‍ ഷിപ്‌യാര്‍ഡ് മാനേജിംഗ് ഡയറക്ടര്‍ മധു നായര്‍, കോസ്റ്റ് ഗാര്‍ഡ് ഡിഐജി എന്‍. രവി എന്നിവര്‍ സമ്മാനദാനം നിര്‍വഹിച്ചു.

പാറക്കടവിൽ ജോബ് സ്റ്റേഷൻ പ്രവർത്തനം തുടങ്ങി

നെടുമ്പാശേരി: പാറക്കടവ് ബ്ലോക്ക് പഞ്ചായത്തിന്‍റെ നേതൃത്വത്തിൽ ജോബ് സ്റ്റേഷൻ പ്രവർത്തനം ആരംഭിച്ചു. കേരള നോളഡ്ജ് ഇക്കോണമി മിഷന്‍റെ ഭാഗമായി സംഘടിപ്പിക്കുന്ന വിജ്ഞാനകേരളം ജനകീയ കാമ്പയിന്‍റെ ഭാഗമായാണ് ജോബ്സ്റ്റേഷൻ ആരംഭിച്ചത്. ജോബ് സ്റ്റേഷന്‍റെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് നിർവഹിച്ചു. വൈസ് പ്രസിഡന്‍റ് താരാ സജീവ് അധ്യക്ഷയായിരുന്നു. കുന്നുകര പഞ്ചായത്ത് പ്രസിഡന്‍റ് സൈന ബാബു, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷരായ സി.എം. വർഗീസ്, ആനി കുഞ്ഞുമോൻ, അഡ്വ. ഷബീർ അലി, ബ്ലോക്ക് പഞ്ചായത്തംഗം ദിലീപ് കപ്രശേരി, ബ്ലോക്ക് പഞ്ചായത്ത് സെക്രട്ടറി എം.എസ്. ശ്രീരാഗ്, കില ബ്ലോക്ക് കോ ഓർഡിനേറ്റർ കെ.കെ. വിജയപ്രകാശ് എന്നിവർ സംസാരിച്ചു. ജോബ്സ്റ്റേഷന്‍റെ നേതൃത്വത്തിൽ ബ്ലോക്ക് പഞ്ചായത്ത് മുൻകൈയെടുത്ത് തൊഴിൽമേളകൾ സംഘടിപ്പിക്കുമെന്ന് ബ്ലോക്ക് പഞ്ചായത്ത് പ്രസിഡന്‍റ് അറിയിച്ചു.

ഐമുറി സ്കൂളിൽ ഓഡിറ്റോറിയം നവീകരണം ആരംഭിച്ചു

പെരുമ്പാവൂർ: എറണാകുളം ജില്ലാ പഞ്ചായത്ത് 30 ലക്ഷം രൂപ ചെലവഴിച്ച് ഐമുറി കുന്നുമ്മേൽ സ്ക്കൂളിലെ ഓഡിറ്റോറിയത്തിന്‍റെ നവീകരണ പ്രവർത്തനങ്ങൾ ആരംഭിച്ചു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ നിർമാണ ഉദ്ഘാടനം നിർവഹിച്ചു. പഞ്ചായത്ത് വൈസ് പ്രസിഡന്‍റ് എം.ഒ. ജോസ് അധ്യക്ഷത വഹിച്ചു സ്കൂൾ പിടിഎ പ്രസിഡന്‍റ് കെ.ഒ. ഫ്രാൻസിസ് , പ്രധാന അധ്യാപിക സി.എം. സിജി, വർഗീസ് തോപ്പിലാൻ എന്നിവർ പ്രസംഗിച്ചു.

പൊക്കാളി കൃഷി സംരക്ഷിക്കാൻ നിരീക്ഷണ സമിതികളായി: എംഎൽഎ

വൈപ്പിന്‍: മണ്ഡലത്തിലെ പൊക്കാളി കൃഷി സംരക്ഷിക്കുന്നതിനായി നിരീക്ഷണ സമിതികള്‍ രൂപീകരിച്ചതായി കെ.എന്‍. ഉണ്ണിക്കൃഷ്ണന്‍ എംഎല്‍എ അറിയിച്ചു. പൊക്കാളി കൃഷി മേഖലയിലും ജനവാസ കേന്ദ്രങ്ങളിലും ഒരുവെള്ളം കയറുന്നതിനാൽ ഇതു മൂലമുണ്ടാകുന്ന ബുദ്ധിമുട്ടുകള്‍ക്ക് പരിഹാരം കാണാൻ കളക്ട്രേറ്റില്‍ വിളിച്ചുചേര്‍ത്ത പഞ്ചായത്ത് പ്രസിഡന്‍റുമാരുടേയും ഉദ്യോഗസ്ഥരുടേയും യോഗത്തിലെ തീരുമാന പ്രകാരമാണ് നിരീക്ഷണ സമിതികള്‍ രൂപീകരിച്ചത്. പൊക്കാളി പാടശേഖരങ്ങളിൽ നെൽക്കൃഷി, മത്സ്യക്കൃഷി ചെയ്യുന്നതും ഒരു ജലം ക്രമപ്രകാരം നിലനിർത്തുന്നതും സമിതിയുടെ ചുമതലയായിരിക്കും. ഈ വിഷയങ്ങൾ നിരീക്ഷിക്കുന്നതിനും നടപ്പിൽ വരുത്തുന്നതിനും നിരീക്ഷണ സമിതിക്കു ഉത്തരവാദിത്തമുണ്ടായിരിക്കും. പൊക്കാളി മേഖലയിൽ നിശ്ചിത സീസണുകളിൽ നെൽക്കൃഷിയും മത്സ്യക്കൃഷിയും നടത്തുന്നതിന് നിരീക്ഷണ സമിതി ഇടപെടൽ നടത്തണം.കൃഷി ആരംഭിക്കുന്നതിനു തൊട്ടുമുമ്പ് യോഗം ചേർന്ന് ആവശ്യമായ മാർഗനിയന്ത്രണങ്ങൾ വരുത്തണം. കൃഷി കൃത്യ സമയത്തു തന്നെ ആരംഭിക്കുന്നുവെന്നും നിലങ്ങൾ തരിശിടുന്നില്ലെന്നും ഉറപ്പാക്കണം. എല്ലാത്തിന്‍റെയും റിപ്പോർട്ടുകൾ യഥാസമയം കളക്ടർക്കു കൈമാറണമെന്നും സമിതിയോട് ആവശ്യപ്പെട്ടിട്ടുണ്ട്. തഹസിൽദാർമാരായിരിക്കും നിരീക്ഷണ സമിതികളുടെ ചെയർമാൻ.

ഹജ്ജ് ക്യാന്പ്: സംഘാടകസമിതി രൂപീകരിച്ചു

നെടുമ്പാശേരി: സംസ്ഥാന ഹജ്ജ് കമ്മിറ്റിയുടെ നേതൃത്വത്തിൽ 2025 ൽ നെടുമ്പാശേരിയിൽ നിന്നും ഹജ്ജിന് പോകുന്ന ഹാജിമാർക്കായുള്ള കൊച്ചിൻ എംബാർക്കേഷൻ ക്യാമ്പ് സ്വാഗത സംഘം രൂപീകരിച്ചു. സിയാൽ അക്കാദമി ഹാളിൽ ചേർന്ന രൂപീകരണയോഗം ഹജ്ജ് കമ്മിറ്റി ചെയർമാൻ ഡോ. ഹുസൈൻ സഖാഫി ചുള്ളിക്കോട് ഉദ്ഘാടനം ചെയ്തു.അൻവർ സാദത്ത് എംഎൽഎ അധ്യക്ഷനായി. പ്രാർഥനയ്ക്ക് മുൻ ഹജ്ജ് കമ്മിറ്റി ചെയർമാൻ തൊടിയൂർ മുഹമ്മദ് കുഞ്ഞ് മൗലവി നേതൃത്വം നൽകി. ചടങ്ങിൽ സംസ്ഥാന ഹജ്ജ് കമ്മിറ്റി അംഗങ്ങൾ വിവിധ രാഷ്ട്രീയ പാർട്ടി നേതാക്കൾ, മറ്റു സംഘടനാ നേതാക്കൾ തുടങ്ങിയവർ പങ്കെടുത്തു. കൊച്ചി ഹജ്ജ് ക്യാമ്പിന്‍റെ സംഘാടകസമിതിയുടെ ചെയർമാനായി പട്ടാമ്പി എംഎൽഎയും ഹജ്ജ് കമ്മിറ്റി അംഗവുമായ മുഹമ്മദ് മുഹ്സിനും, വൈസ് ചെയർമാൻ മാരായി നൂർ മുഹമ്മദ് നൂർഷ ,മുഹമ്മദ് സക്കീർ, അനസ് ഹാജി എന്നിവരെയും, ജനറൽ കൺവീനറായി അഡ്വ: മൊയ്തീൻ കുട്ടിയേയും ക്യാമ്പ് അസി: കോ കോഡിനേറ്ററായി ടി കെ സലിം, പി എം സഹീർ എന്നിവരെയും തെരഞ്ഞടുത്തു. കൊച്ചിയിൽ നിന്നും സൗദി എയർലൈൻസാണ് സർവീസ് നടത്തുന്നത്. മെയ് 16 മുതൽ 30 വരെ തീയതികളിലായി 21 സർവീസുകളാണുള്ളത്. കൊച്ചിയിൽ നിന്നുള്ള ആദ്യ വിമാനം മെയ് 16ന് വൈകിട്ട് 5. 55 നാണ് പുറപ്പെടുന്നത്. കൊച്ചിയിൽ നിന്നും 5.680 പേർ നിലവിൽ തെരഞ്ഞെടുക്കപ്പെട്ടത്. കൂടാതെ മറ്റു സംസ്ഥാനങ്ങളിൽ നിന്നുള്ള ഹാജിമാരിൽ തമിഴ്നാട്ടിൽ നിന്നുള്ള 199 പേരും ലക്ഷദ്വീപിൽ നിന്നുള്ള 111 പേരും കൊച്ചിയിൽ നിന്നുമാണ് യാത്രതിരിക്കുന്നത്. കോഴിക്കോട് നിന്നും 5,386 പേരും കണ്ണൂരിൽ നിന്ന് 4,780 പേരുമാണ് ഹജ്ജിനു പോകുന്നത്.

ചാവറയിൽ നൃത്ത-സംഗീത ഫെസ്റ്റിവല്‍

കൊച്ചി: ചാവറ കള്‍ച്ചറല്‍ സെന്‍ററും ഡല്‍ഹിയിലെ സ്വരാഞ്ജലിയും സംയുക്തമായി ചാവറ കള്‍ച്ചറല്‍ സെന്‍ററില്‍ കളേഴ്‌സ് ഓഫ് ഇന്ത്യ ദേശീയ നൃത്ത-സംഗീത ഫെസ്റ്റിവല്‍ സംഘടിപ്പിച്ചു. സിത്താറിസ്റ്റ് സുബ്രത ഡേ ഉദ്ഘാടനം ചെയ്തു. സുബ്രത ഡേയും രത്‌നശ്രീ അയ്യരും (തബല) ചേര്‍ന്നുള്ള സംഗീത കച്ചേരിയോടെ തുടങ്ങിയ ഫെസ്റ്റിവലില്‍ ഒഡിസി നര്‍ത്തകി ഷോമൃത മണ്ഡല്‍, കഥക് നര്‍ത്തകി സുജയ ഘോഷ്, ബര്‍നാലി സര്‍ക്കാര്‍ (അഭിനയം) എന്നിവരുടെ നൃത്താവതരണവും ഉണ്ടായിരുന്നു.

എടത്വ പള്ളി തിരുനാളിന് കൊടിയേറി

എടത്വ: എടത്വ സെന്‍റ് ജോര്‍ജ് ഫൊറോനാ പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് കൊടിയേറി. ഇന്നലെ രാവിലെ 5.45നുള്ള മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന എന്നിവയ്ക്ക് ശേഷം പതിനായിരങ്ങളെ സാക്ഷി നിര്‍ത്തി ഫൊറോന പള്ളി വികാരി ഫാ. ഫിലിപ്പ് വൈക്കത്തുക്കാരന്‍ കൊടിയേറ്റി. മേയ് ഏഴ് വരെ എല്ലാ ദിവസവും 4.30ന് തമിഴ് കുര്‍ബാന, 5.45ന്, 7.45ന്, 10ന്, വൈകുന്നേരം നാലിന്, ആറിന് മധ്യസ്ഥ പ്രാര്‍ഥന, ലദീഞ്ഞ്, കുര്‍ബാന, രാത്രി ഏഴിന് കുരിശടിയില്‍ മധ്യസ്ഥ പ്രാര്‍ഥന എന്നിവ നടക്കും. മേയ് മൂന്നിന് വിശുദ്ധന്‍റെ തിരുസ്വരൂപം പരസ്യവണക്കത്തിനായി ദേവാലയ കവാടത്തില്‍ പ്രതിഷ്ഠിക്കുന്നതോടെ തിരുനാളിന് തിരക്കേറും. പ്രധാന തിരുനാള്‍ മേയ് ഏഴിനാണ്. അന്ന് വൈകുന്നേരം നാലിന് വിശുദ്ധന്‍റെ തിരുസ്വരൂപവും വഹിച്ചുകൊണ്ടുള്ള ചരിത്ര പ്രസിദ്ധമായ പ്രദക്ഷിണം പള്ളിക്കുചുറ്റും നടക്കും. മേയ് 14ന് എട്ടാമിടം. അന്ന് ചെറിയ രൂപവും എഴുന്നള്ളിച്ചുകൊണ്ടുള്ള പ്രദക്ഷിണം കുരിശടി ചുറ്റി പള്ളിയില്‍ മടങ്ങിയെത്തുന്നതോടെ കൊടിയിറക്കും.

ട്വന്‍റി 20 പ്രവർത്തക കൺവൻഷൻ

ആലുവ: ട്വന്‍റി 20 പാർട്ടി ആലുവ നിയോജക മണ്ഡലം കമ്മിറ്റി ഓഫീസ് ഉദ്ഘാടനവും പ്രവർത്തക കൺവൻഷനും സംസ്ഥാന വൈസ് പ്രസിഡന്‍റ് വി. ഗോപകുമാർ നിർവഹിച്ചു.ചടങ്ങിൽ ആലുവ നിയോജക മണ്ഡലം പ്രസിഡന്‍റ് കെ.ആർ. രജി പ്രകാശ് അധ്യക്ഷത വഹിച്ചു. സംസ്ഥാന എക്സിക്യുട്ടീവ് ബോർഡ് അംഗങ്ങളായ അഡ്വ. ചാർളി പോൾ, ബെന്നി ജോസഫ്, ജില്ലാ കോ- ഓർഡിനേറ്റർ അസ് ലഫ് പാറേക്കാടൻ, എം. വി. വിജയകുമാർ, എം.എ. റെയ്ജു , ഷിബു സെബാസ്റ്റ്യൻ എന്നിവർ പ്രസംഗിച്ചു.

നിർദിഷ്ട എടയാറ്റുചാൽ ലിഫ്റ്റ് ഇറിഗേഷൻ പദ്ധതി : കോൺഗ്രസ് സമരത്തിനിടെ സംഘർഷം

ആലുവ: എടയാറ്റ് ചാൽ ലിഫ്റ്റ് ഇറിഗേഷൻ പദ്ധതി ഉപേക്ഷിക്കണമെന്നാവശ്യപ്പെട്ട് കടുങ്ങല്ലൂർ പഞ്ചായത്ത് കോൺഗ്രസ് കമ്മിറ്റിയുടെ നേതൃത്വത്തിൽ നടത്തിയ പ്രതിഷേധ സമരം സംഘർഷത്തിൽ കലാശിച്ചു. ഒഴിവ് ദിനം നോക്കി പദ്ധതി പ്രവർത്തനം ആരംഭിച്ചെന്നറിഞ്ഞ് കോൺഗ്രസ് ഇന്നലെ നടത്തിയ മാർച്ച് പോലീസ് തടഞ്ഞതോടെയാണ് ഉന്തും തള്ളുമായത്. പ്രവർത്തകരെ ബിനാനി പുരം പോലീസ് അറസ്റ്റ് ചെയ്ത് പോലീസ് വാനിൽ പോലീസ് സ്റ്റേഷനിൽ എത്തിച്ച ശേഷം ജാമ്യത്തിൽ വിട്ടു. 2.85 കോടി ചെലവ് പ്രതീക്ഷിക്കുന്ന പദ്ധതി അഴിമതിയും ധൂർത്തുമാണെന്നാണ് കോൺഗ്രസ് ആരോപണം. ഓഞ്ഞിത്തോടിലെ കൈയേറ്റങ്ങൾ ഒഴിവാക്കി കലിഞ്ഞത്തിൽ, തത്തയിൽ, തേരേപറമ്പ് ഇറിഗേഷൻ പദ്ധതികൾ വഴി വെള്ളം ലഭ്യമാക്കണമെന്നാണ് കോൺഗ്രസ് പാർട്ടി ആവശ്യപ്പെടുന്നത്. കഴിഞ്ഞ മാർച്ചിൽ സർവകക്ഷി യോഗം വിളിച്ചെങ്കിലും വിജയിച്ചില്ല. കടുങ്ങല്ലൂർ ഗ്രാമപഞ്ചായത്തിലെ 17, 18, 19, 20 വാർഡുകളിലായി 400 ഏക്കറിൽ വ്യാപിച്ചു കിടക്കുന്ന എടയാറ്റുചാൽ പാടശേഖരത്ത് മഴയെ ആശ്രയിക്കാതെ നെൽകൃഷി നടത്തണമെങ്കിൽ പെരിയാറിൽ നിന്ന് വെള്ളം എത്തിക്കണമെന്നാണ് പദ്ധതിയെ അനുകൂലിക്കുന്നവരുടെ വാദം. നിർദ്ദിഷ്ട എടയാറ്റുചാൽ ലിഫ്റ്റ് ഇറിഗേഷൻ പ്രൊജക്ടിന്‍റെ പമ്പിംഗ് സ്റ്റേഷൻ മുപ്പത്തടത്ത് പാതാളം പാലത്തോടു ചേർന്നുള്ള സ്ഥലത്താണ് നിർമ്മിക്കുക. 40 കുതിരശക്തിയുള്ള മോട്ടോർ ഉപയോഗിച്ച് പമ്പ് ചെയ്യുന്ന വെള്ളം തൊള്ളായിരം മീറ്റർ ദൂരെയുള്ള എടയാറ്റുചാലിൽ എത്തിക്കുന്നത് ദൂമിക്കടിയിലൂടെ വലിയ കുഴലുകൾ സ്ഥാപിച്ചാണ്. വെള്ളം എടയാറ്റുചാലിന്‍റെ തണ്ടിരിക്കൽ ഭാഗത്തായിരിക്കും എത്തുക. അവിടെ നിന്നും തോടുകൾ നിർമിച്ച് പാടശേഖരത്തിലെ വിവിധ ഭാഗങ്ങളിലേക്ക് വെള്ളം ഒഴുക്കും.

ആലുവ റെയിൽവേ മേൽപ്പാലം അടച്ചിട്ട് ആറ് മാസം; അറ്റകുറ്റപ്പണി ഇന്നാരംഭിക്കും

ആലുവ: അപകടാവസ്ഥയിലായതിനെ തുടർന്ന് അടച്ചിട്ട ആലുവ റെയിൽവേ മേൽ നടപ്പാലത്തിന്‍റെ അറ്റകുറ്റപ്പണി ഇന്നാരംഭിക്കും. കഴിഞ്ഞ വർഷം നവംബറിൽ നടപ്പാലം അടച്ചത് മൂലം വിദ്യാർഥികളടക്കമുള്ള കാൽനടയാത്രക്കാർ ഏറെ ദുരിതത്തിലായിരുന്നു. തൃശൂർ ആസ്ഥാനമായുള്ള റെയിൽവേ പൊതുമരാമത്ത് വിഭാഗം ടെൻഡർ വിളിക്കാൻ വൈകിയതാണ് അറ്റകുറ്റപ്പണി നീളാൻ കാരണമായത്. അടിയന്തിരമായി ചെയ്യണമെങ്കിൽ ചെലവ് വഹിക്കണമെന്ന നിർദേശം റെയിൽവേ വച്ചതോടെ ആലുവ നഗരസഭയും പിൻവാങ്ങി. ആലുവ, ചാലക്കുടി, തൃശൂർ സ്റ്റേഷനുകളിലെ മേൽപ്പാലങ്ങളുടെ അറ്റകുറ്റപ്പണികൾക്കായി പൊതുവായാണ് ടെൻഡർ വിളിച്ചിരിക്കുന്നത്. ആലുവയിൽ ഇന്ന് പണി തുടങ്ങുമെന്നാണ് ഇപ്പോൾ അറിയിച്ചിരിക്കുന്നത്. വൈകുന്നതിനെതിരെ പരാതി നൽകിയ പൊതുപ്രവർത്തകനായ ആർ. പത്മകുമാറിനെയാണ് അറ്റകുറ്റപ്പണി ഇന്നാരംഭിക്കുമെന്നറിയിച്ചിരിക്കുന്നത്. നടപ്പാലം അപകടാവസ്ഥയിലാണെന്ന് 'ദീപിക' യാണ് ആദ്യം റിപ്പോർട്ട് ചെയ്തത്. ഇതിന്‍റെ അടിസ്ഥാനത്തിൽ റെയിൽവേ എൻജിനീയറിംഗ് വിഭാഗം പരിശോധന നടത്തിയാണ് അറ്റകുറ്റപ്പണി നടത്താൻ തീരുമാനിച്ചത്. നിലവിൽ റെയിൽവേ സ്‌റ്റേഷന്‍റെ മറുവശത്തുള്ള സർക്കാർ ഹയർ സെക്കൻഡറി സ്കൂൾ, മിനി സിവിൽ സ്റ്റേഷൻ, മുനിസിപ്പൽ ലൈബ്രറി എന്നിവിടങ്ങളിലേക്ക് പോകാൻ മൂന്ന് കിലോമീറ്ററോളം ചുറ്റി വേണം എത്താൻ. റെയിൽവേ ട്രാക്കുകൾ മറികടന്ന് വിദ്യാർഥികൾ വന്നു പോകുന്നത് അപകട സാധ്യത ഉണ്ടാക്കുന്നതായി അധ്യാപകർ മുന്നറിയിപ്പ് നൽകിയിട്ടുണ്ട്. സ്കൂൾ തുറക്കുന്നതിന് മുമ്പ് അറ്റകുറ്റപ്പണി തീർക്കണമെന്നാവശ്യവും ഉയർന്നിട്ടുണ്ട്.

വാഹനാപകടത്തിൽ യുവാവിനു പരിക്ക്

വൈപ്പിൻ: സ്വകാര്യ ബസ് മോട്ടോർ ബൈക്കിലിടിച്ച് ഉണ്ടായ അപകടത്തിൽ ബൈക്ക് യാത്രികനായ യുവാവിന്‍റെ കാൽ ഒടിഞ്ഞു. പള്ളിപ്പുറം പ്ലാക്കൽ ഗംഗാധരന്‍റെ മകൻ അഭിറാ(24)മിന്‍റെ കാലാണ് ഒടിഞ്ഞത്. ഇയാൾ എറണാകുളത്തെ സ്വകാര്യ ആശുപത്രിയിൽ ചികിത്സയിലാണ്. കഴിഞ്ഞ ദിവസം സംസ്ഥാന പാതയിൽ എളങ്കുന്നപ്പുഴ പെട്രോൾ പമ്പിനു മുന്നിലായിരുന്നു അപകടം. വൈപ്പിൻ റൂട്ടിൽ ഓടുന്ന സാധിക എന്ന സ്വകാര്യ ബസാണ് അപകടമുണ്ടാക്കിയത്. ഡ്രൈവർക്കെതിരെ ഞാറക്കൽ പോലീസ് കേസ് എടുത്തിട്ടുണ്ട്.

ജോസ് മാവേലിക്ക് സ്വർണം

ആലുവ: നാഷണൽ ഓപ്പൺ മാസ്റ്റേഴ്സ് അത് ലറ്റിക്ചാമ്പ്യൻഷിപ്പിൽ ജോസ് മാവേലിക്ക് സ്വർണം. എറണാകുളം മഹാരാജാസ് ഗ്രൗണ്ടിൽ നടന്ന ചാമ്പ്യൻഷിപ്പിൽ 400 മീറ്ററിൽ ആണ് സ്വർണ മെഡൽ ലഭിച്ചത്. 74 കാരനായ ജോസ് മാവേലി 70 പ്ലസ് കാറ്റഗറിയിലാണ് ചാമ്പ്യൻഷിപ്പിൽ മത്സരിച്ചത്. ജനസേവ ശിശുഭവന്‍റെ സ്ഥാപകനും ചെയർമാനും ആണ് ജോസ് മാവേലി.

ലയണ്‍സ് ഡിസ്ട്രിക്ട് 318 സി കണ്‍വന്‍ഷന്‍

കൊച്ചി: ലയണ്‍സ് ഇന്‍റര്‍നാഷണല്‍ ഡിസ്ട്രിക്ട് 318 സിയുടെ 21-ാമത് കണ്‍വന്‍ഷന്‍ കൊച്ചി ഗോകുലം കണ്‍വന്‍ഷന്‍ സെന്‍ററില്‍ മുന്‍ മള്‍ട്ടിപ്പിള്‍ കൗണ്‍സില്‍ ചെയര്‍മാന്‍ റിയാസ് അഹമ്മദ് ഉദ്ഘാടനം ചെയ്തു. ലയണ്‍സ് ഗവര്‍ണര്‍ രാജന്‍ എന്‍. നമ്പൂതിരി അധ്യക്ഷത വഹിച്ചു. ഇന്‍റര്‍നാഷണല്‍ ഏരിയാ ലീഡര്‍ വി. അമര്‍നാഥ്, മുന്‍ ഗവര്‍ണര്‍ ആര്‍.ജി. ബാലസുബ്രഹ്മണ്യന്‍, വൈസ് ഗവര്‍ണര്‍മാരായ കെ.ബി. ഷൈന്‍ കുമാര്‍, വി.എസ്. ജയേഷ്, കാബിനറ്റ് സെക്രട്ടറി ജോര്‍ജ് സാജു, ട്രഷറര്‍ സിബി ഫ്രാന്‍സിസ്, ഏരിയാ ലീഡര്‍ സിജി ശ്രീകുമാര്‍, ജനറല്‍ കണ്‍വീനര്‍ പ്രഫസര്‍ സാംസന്‍ തോമസ്, പോഗ്രാം സെക്രട്ടറി ശ്രീജിത്ത് ഉണ്ണിത്താന്‍, കോര്‍ കമ്മിറ്റി അംഗങ്ങളായ സജിത്ത് കുമാര്‍, മനോജ് അംബുജാക്ഷന്‍, മീഡിയ സെക്രട്ടറി കുമ്പളം രവി, ലിയോ ക്ലബ് പ്രസിഡന്‍റ് ഗാഥ ശ്രീജിത്ത്, വനിതാ ഫോറം പ്രസിഡന്‍റ് റെന്‍സി സജി എന്നിവര്‍ പ്രസംഗിച്ചു.

കരിയാട്-മറ്റൂർ റോഡിൽ കാൽനടക്കാർക്കു ദുരിതം

നെടുമ്പാശേരി: കൊച്ചിൻ ഇന്‍റർനാഷണൽ എയർപോർട്ടിന്‍റെ കവാടത്തിൽ കൂടി കടന്നു പോകുന്ന കരിയാട്-മറ്റൂർ റോഡ് റീ ടാറിംഗ് നടത്തിയപ്പോൾ നടപ്പാത ഇല്ലാതായി. വാഹനങ്ങൾ വരുമ്പോൾ കാൽനടയാത്രക്കാർ അടുത്തുള്ള പറമ്പിലേക്കോ മതിലിന് മുകളിലേക്കോ കയറി നിൽക്കേണ്ട സ്ഥിതിയാണ്. വശങ്ങളിലുള്ള പുൽപ്പടപ്പിലേക്ക് വരെ കയറ്റിയാണ് റോഡ് ടാറിംഗ് ചെയ്തിട്ടുള്ളത്. സമീപ കാലയളവിലാണ് ഇതിന്‍റെ പണി നടത്തിയത്. ഇത് സംബന്ധിച്ച് നിരവധി പരാതികൾ പിഡബ്ല്യുഡി അധികൃതർക്ക് നൽകിയെങ്കിലും അവർ കണ്ടമട്ടില്ല. കൊച്ചി വിമാനത്താവളത്തിൽ നിന്നും എംസി റോഡിലേക്കും ദേശീയ പാലയിലേക്കും നിരവധി വാഹനങ്ങൾ വന്നു പോകുന്നത് ഇതിൽക്കൂടിയാണ്. പ്രത്യേകിച്ച് ഇടുക്കി, കോട്ടയം ജില്ലകളിൽ നിന്നും എറണാകുളം ജില്ലയുടെ കിഴക്കൻ മേഖലയിൽ നിന്നും ഈ റോഡിൽ കൂടിയാണ് വിമാനത്താവളത്തിലേക്കുള്ള വാഹനങ്ങൾ വരുന്നത്. വടക്കൻ ജില്ലകളിൽ നിന്ന് വരുന്ന വാഹനങ്ങൾ ദേശീയപാതയിൽ കരിയാട് കവലയിൽ വച്ച് തിരിഞ്ഞാണ് എയർപോർട്ടിലേക്ക് വരുന്നത്. എയർപോർട്ടിലേക്കുള്ള വണ്ടികൾ ഭൂരിഭാഗവും സമയനിഷ്ഠ പാലിക്കാൻ അതിവേഗതയിലാണ് ഓടിക്കുന്നത്. പ്രത്യേകിച്ച് ടാക്സി വണ്ടികൾ ദേശീയപാതയിൽ കൂടി ഓടുന്ന അതേ വേഗതയിലാണ് ഈ റോഡിൽ കൂടിയും പോകുന്നത്. വാഹനങ്ങൾ വരുമ്പോൾ കാൽനട യാത്രക്കാർ ജീവൻ രക്ഷിക്കാൻ വേണ്ടി അതിവേഗത്തിൽ ഓടി മാറേണ്ട സ്ഥിതിയാണുള്ളത്. ബന്ധപ്പെട്ട അധികൃതർ അപകടങ്ങൾ ഒഴിവാക്കാൻ എത്രയും വേഗം ഈ റോഡിന്‍റെ ഇരുവശവും നടപ്പാത ഉണ്ടാക്കാൻ അടിയന്തര നടപടി സ്വീകരിക്കണം.

ചെക്ക് ഡാമിൽ കാണാതായ വിദ്യാർഥിയുടെ മൃതദേഹം കണ്ടെത്തി

പോത്താനിക്കാട്: പറന്പഞ്ചേരി ചെക്ക് ഡാമിൽ കൂട്ടുകാർക്കൊപ്പം കുളിക്കുന്നതിനിടെ ഒഴുക്കിൽപ്പെട്ട് കാണാതായ പത്താം ക്ലാസ് വിദ്യാർഥിയുടെ മൃതദേഹം കണ്ടെത്തി. കാലാന്പൂർ കൊയ്ക്കാട്ട് എൽദോസിന്‍റെ മകൻ സാം കെ. എൽദോ (16) ആണ് മരിച്ചത്. ഇന്നലെ രാവിലെ നേവിയുടെ മുങ്ങൽ വിദഗ്ധർ നടത്തിയ തെരച്ചിലിലാണ് ചെക്ക് ഡാമിന് താഴെയുള്ള കയത്തിൽ മൃതദേഹം കണ്ടെത്തിയത്. ശനിയാഴ്ച വൈകിട്ട് പുഴയിൽ കുളിക്കാനിറങ്ങിയപ്പോൾ പെട്ടെന്ന് നിലതെറ്റി സാം ഒഴുക്കിൽപ്പെടുകയായിരുന്നു. അഗ്നിരക്ഷാ സേനയും നാട്ടുകാരും ചേർന്ന് രാത്രി വൈകിയും തെരച്ചിൽ നടത്തിയെങ്കിലും കനത്ത മഴയും പുഴയിലെ കലക്കലും മൂലം ഫലം കണ്ടില്ല. തുടർന്ന് ഇന്നലെ നേവി സംഘം എത്തി തെരച്ചിൽ നടത്തുകയായിരുന്നു. സംസ്കാരം ഇന്ന് 11ന് കാലാന്പൂർ സെന്‍റ് മേരീസ് പള്ളിയിൽ. പുളിന്താനം സെന്‍റ് ജോണ്‍സ് ഹയർ സെക്കൻഡറി സ്കൂളിലെ വിദ്യാർഥിയായിരുന്നു സാം. മാതാവ്: ഷീജ. സഹോദരങ്ങൾ: മീനു, മേഘ (ഇരുവരും ഓസ്ട്രേലിയ), മരിയ.

എംഎൽഎയുടെ വ്യാജ പ്രചാരണങ്ങൾക്കെതിരെ റാലിയും പൊതുസമ്മേളനവും ഇന്ന്

മൂവാറ്റുപുഴ: പുതുപ്പാടി-ഇരുമലപ്പടി റോഡ് നിർമാണവുമായി ബന്ധപ്പെട്ട് മാത്യു കുഴൽനാടൻ എംഎൽഎയുടെ വ്യാജ പ്രചാരണങ്ങൾക്കെതിരെ ഇന്ന് മുളവൂരിൽ എൽഡിഎഫ് റാലിയും പൊതുസമ്മേളനവും നടക്കും. വൈകുന്നേരം അഞ്ചിന് മുളവൂർ പിഒ ജംഗ്ഷനിൽനിന്ന് ആരംഭിക്കുന്ന റാലി മുളവൂർ പൊന്നിരിക്കപറമ്പിൽ സമാപിക്കും. തുടർന്ന് പൊതുസമ്മേളനം സിപിഎം ജില്ലാ സെക്രട്ടറിയേറ്റ് അംഗം കെ.എസ്. അരുൺ കുമാർ ഉദ്ഘാടനം ചെയ്യും. മുൻ എംഎൽഎ ബാബുപോൾ, സിപിഎം ഏരിയ സെക്രട്ടറി അനീഷ് എം. മാത്യു എന്നിവർ പ്രസംഗിക്കും.

സംസ്ഥാന വിത്തുത്പാദന കേന്ദ്രത്തിൽ ബോട്ട് ജെട്ടി ഉദ്ഘാടനം നാളെ

ആലുവ: തുരുത്ത് സംസ്ഥാന വിത്തുത്പാദന കേന്ദ്രത്തിൽ നിർമിച്ച ബോട്ട് ജെട്ടിയുടെ ഉദ്ഘാടനം നാളെ ബെന്നി ബഹനാൻ എംപി നിർവ്വഹിക്കും. ജില്ലാ പഞ്ചായത്ത് വികസനഫണ്ടായ 30 ലക്ഷം രൂപ ചെലവഴിച്ചാണ് ബോട്ട് ജെട്ടി നിർമിച്ചത്. കൊച്ചി കപ്പൽശാലയുടെ ഫണ്ടിൽ നിന്ന് ലഭിച്ച 50 ലക്ഷം രൂപ ഉപയോഗിച്ച് നിർമിച്ച സോളാർ ബോട്ടും ഇവിടെ പ്രവർത്തനക്ഷമമാക്കിയിട്ടുണ്ട്.

മാടവന ഭഗവതി ക്ഷേത്രത്തിൽ പ്രതിഷ്ഠാ ദിന മഹോത്സവം

മൂവാറ്റുപുഴ: മാടവന ഭഗവതി ക്ഷേത്രത്തിലെ പ്രതിഷ്ഠാ ദിന മഹോത്സവം നാളെ മുതൽ 30 വരെ നടക്കും. നാളെ രാവിലെ 5.15ന് അഭിഷേകം, ഗണപതി ഹോമം, 7.40ന് കേളികൊട്ട്, എട്ടിന് മഹാമൃത്യുഞ്ജയ ഹോമം, 8.30ന് വലിയ കാണിക്ക, വൈകുന്നേരം ആറിന് വലിയ വിളക്ക്, 6.30ന് സോപാന സംഗീതം, എട്ടിന് പ്രസാദ ഊട്ട്. 29ന് രാവിലെ 8.30ന് സർപ്പത്തിനും രക്ഷസിനും ഘണ്ഠകർണ്ണനും വിശേഷാൽ പൂജ, 9.30ന് കലംകരിക്കൽ, വൈകുന്നേരം 6.45നു ദീപാരാധന, ശേഷം കളമെഴുത്ത്പാട്ട്, 7.20ന് നൃത്തം, എട്ടിന് പ്രസാദഊട്ട്, 8.10ന് അവാർഡ് ദാനവും ആദരിക്കലും. 30ന് രാവിലെ 8.30ന് തന്ത്രി മനയത്താറ്റ് ആര്യൻ നമ്പൂതിരിപ്പാടിന്‍റെ കാർമികത്വത്തിൽ കലശപൂജ, 10.30ന് കലശാഭിഷേകം, വൈകിട്ട് അഞ്ചിന് താലപ്പൊലി രഥ ഘോഷയാത്ര, എട്ടിന് വിശേഷാൽ ദീപാരാധന, 8.15ന് കളമെഴുത്ത്പാട്ട്, 9.30ന് മഹാപ്രസാദ ഊട്ട്, 12ന് തൂക്കം വഴിപാട് എന്നിവയുണ്ടാകും. ക്ഷേത്ര കാര്യദർശി സുദർശൻ ശാന്തി, മേൽശാന്തി സുനിൽ ശാന്തി എന്നിവർ മുഖ്യകാർമികത്വം വഹിക്കും.

മൂവാറ്റുപുഴ നഗര റോഡ് വികസനം : റോഡരികിൽ കേബിള്‍ക്കൂന; പരാതിയുമായി കൗൺസിലർ

മൂവാറ്റുപുഴ: നഗര റോഡ് വികസനത്തിന്‍റെ ഭാഗമായി നീക്കം ചെയ്ത കേബിളുകള്‍ റോഡരികുകളില്‍ കൂട്ടിയിട്ടിരിക്കുന്നതിനെതിരെ പരാതിയുമായി നഗരസഭാ കൗണ്‍സിലര്‍ ജിനു ആന്‍റണി. പിഒ ജംഗ്ഷന്‍ മുതല്‍ കച്ചേരിത്താഴം വരെയുള്ള ഭാഗത്തെ വൈദ്യുത പോസ്റ്റുകള്‍ നീക്കം ചെയ്ത് വരികയാണെങ്കിലും പോസ്റ്റുകളില്‍നിന്ന് നീക്കം ചെയ്ത ഇന്‍റര്‍നെറ്റ് കേബിളുകളടക്കമുള്ളവ റോഡിലും നടപ്പാതകളിലുമായി കൂട്ടിയിട്ടിരിക്കുന്നതിനെതിരെ മൂവാറ്റുപുഴ സ്റ്റേഷന്‍ ഹൗസ് ഓഫീസര്‍ക്കും തഹസീല്‍ദാര്‍ക്കുമാണ് പരാതി നല്‍കിയിരിക്കുന്നത്. വാഹന യാത്രക്കാര്‍ക്കും കാല്‍നട യാത്രക്കാര്‍ക്കും അപകട ഭീഷണി ഉയര്‍ത്തുന്ന കേബിളുകള്‍ നീക്കം ചെയ്യണമെന്ന് കെഎസ്ഇബി ഉദ്യോഗസ്ഥര്‍ നിരവധി തവണ കരാറുകാരോട് ആവശ്യപ്പെട്ടെങ്കിലും നടപടി സ്വീകരിക്കാത്തതിനെ തുടര്‍ന്നാണ് പരാതിയുമായി രംഗത്തെത്തിയതെന്ന് ജിനു ആന്‍റണി പറഞ്ഞു. കേബിളുകള്‍ ഉടന്‍ നീക്കം ചെയ്തില്ലെങ്കില്‍ നിയമപരമായ നടപടി സ്വീകരിക്കണമെന്നും കൗണ്‍സിലര്‍ കൂട്ടിച്ചേർത്തു.

സിപിഐ ആവോലി ലോക്കല്‍ സമ്മേളനം

മൂവാറ്റുപുഴ: സിപിഐ 25-ാമത് പാര്‍ട്ടി കോണ്‍ഗ്രസിന് മുന്നോടിയായുള്ള ആവോലി ലോക്കല്‍ സമ്മേളനത്തിന് തുടക്കമായി. മൂന്ന് ദിവസങ്ങളിലായി നടക്കുന്ന ലോക്കല്‍ സമ്മേളനത്തിന്‍റെ ഭാഗമായി പതാകദിനം, പതാക പ്രചാരണ ജാഥ എന്നിവ നടത്തി. ആഘോഷങ്ങളുടെ ഭാഗമായി ആനിക്കാട് ചിറയില്‍ വാട്ടര്‍ ട്യൂബ് റൈസിംഗും ഒരുക്കിയിരുന്നു. പതാക ദിനത്തിന്‍റെ ഭഗമായി വിവിധ യൂണിറ്റുകളുടെ നേതൃത്വത്തില്‍ പതാകദിനം ആചരിച്ചു. ലോക്കല്‍ സമ്മേളനത്തിന്‍റെ ഭാഗമായി എം.ടി. കുട്ടപ്പന്‍ സ്മൃതി മണ്ഡപത്തില്‍നിന്ന് ആരംഭിച്ച പ്രചാരണ ജാഥ കമ്പനിപ്പടി, ഹോസ്റ്റല്‍ ജംഗ്ഷൻ, രണ്ടാര്‍കര എന്നിവിടങ്ങളില്‍ പര്യടനം നടത്തി ആനിക്കാട് കാനം രാജേന്ദ്രന്‍ നഗറില്‍ സമാപിച്ചു. ശനിയാഴ്ച ആനിക്കാട് സര്‍വീസ് സഹകരണ ബാങ്ക് ഓഡിറ്റോറിയത്തില്‍ നടന്ന പ്രതിനിധി സമ്മേളനം എഐവൈഎഫ് സംസ്ഥാന പ്രസിഡന്‍റ് എന്‍. അരുണ്‍ ഉദ്ഘാടനം ചെയ്തു. ഞായറാഴ്ച നടക്കുന്ന പൊതുസമ്മേളനം നിയമസഭ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ ഉദ്ഘാടനം ചെയ്യും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]