ADVERTISEMENT

ADVERTISEMENT

ഫാ. പ്ലാസിഡ് ജെ. പൊടിപാറയുടെ നാല്പതാം ചരമവാര്‍ഷിക അനുസ്മരണം നടത്തി

ചങ്ങനാശേരി: ആധുനിക സീറോ മലബാര്‍ സഭയുടെ ശില്പി റവ. ഡോ. പ്ലാസിഡ് ജെ. പൊടിപാറയുടെ നാല്‍പ്പതാം ചരമ വാര്‍ഷികാചരണം ചെത്തിപ്പുഴ തിരുഹൃദയ പള്ളിയില്‍ നടത്തി.

ആഘോഷമായ വിശുദ്ധ കുര്‍ബാന, കബറിടത്തില്‍ പ്രാര്‍ഥനാ ശുശ്രൂഷ, സ്‌നേഹവിരുന്ന് എന്നിവ ഉണ്ടായിരിന്നു. സിഎംഐ തിരുവനന്തപുരം പ്രൊവിന്‍ഷൽ ഫാ. ആന്‍റണി ഇളംതോട്ടം മുഖ്യ കാര്‍മികത്വം വഹിച്ചു.

ഫാ. സെബാസ്റ്റ്യന്‍ അട്ടിച്ചിറ സിഎംഐ, ഫാ. ജോസ് വരിക്കപ്പള്ളില്‍, ഫാ. സെബാസ്റ്റ്യന്‍ മാമ്പ്ര, ഫാ. തോമസ് കല്ലുകളം, ഫാ. ലൂക്കാ ചാവറ എന്നിവര്‍ സഹകാര്‍മികരായിരുന്നു. തുടര്‍ന്ന് മതാധ്യാപകര്‍ക്കും കുട്ടികള്‍ക്കുമുള്ള ക്വിസ് മത്സരവും നടത്തി.

ADVERTISEMENT

എന്‍റെ കേരളം പ്രദര്‍ശന, വിപണനമേള: കാണാനേറെ

കോട്ടയം: സംസ്ഥാന സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് കോട്ടയം നാഗമ്പടം മൈതാനിയില്‍ നടക്കുന്ന എന്‍റെ കേരളം പ്രദര്‍ശന വിപണനമേളയിലെ വനം-വന്യജീവി വകുപ്പിന്‍റെ സ്റ്റാളില്‍ വന്നാല്‍ തലയെടുപ്പോടെ നില്‍ക്കുന്ന പനച്ചിക്കാട് കൊച്ചയ്യപ്പന്‍ എന്ന കൊമ്പനെ കാണാം. ഈ ഇലക്‌ട്രിക് ആന ഏവരുടെയും ശ്രദ്ധയാകര്‍ഷിക്കും. നാട്ടാനകള്‍ നേരിടുന്ന ക്രൂരതകള്‍ തുറന്നു കാട്ടുകയാണ് ഈ സ്റ്റാളില്‍. തൊട്ടപ്പുറത്ത് സാംസ്‌കാരിക വകുപ്പിന്‍റെ കീഴിലുള്ള സ്റ്റാള്‍ കാണാം. ഇവിടെ ആറന്‍മുള വാസ്തുവിദ്യാ ഗുരുകുലത്തിന്‍റെ കീഴിലുള്ള മാണിക്യമംഗലം സംഘത്തിന്‍റെ നെറ്റിപ്പട്ട ശേഖരമാണ് കാണാന്‍ കഴിയുന്നത്. വാസ്തുവിദ്യാ ഗുരുകുലത്തിന്‍റെ കീഴില്‍ പരിശീലനം നേടിയ 12 സ്ത്രീകളുടെ കരവിരുതാണ് ഇവ. ഒന്നരയടി ഉയരമുള്ള നെറ്റിപ്പട്ടത്തിന് 1200 മുതല്‍ 1300 രൂപ വരെയും ഉയരം കുറവുള്ളവയ്ക്ക് 500 രൂപ മുതലുമാണ് വില. പൂരങ്ങളിലെ പ്രധാനിയായ ആലവട്ടത്തിനും ആവശ്യക്കാര്‍ ഏറെയാണ്. ഗൃഹപ്രവേശനം തൊട്ട് വിവാഹവാര്‍ഷികം വരെയുള്ള മുഹൂര്‍ത്തങ്ങളില്‍ സമ്മാനമായി തിളങ്ങുന്ന ഇവയെ മാണിക്യമംഗലത്തെ സ്ത്രീകള്‍ ആവശ്യത്തിനനുസരിച്ച് നിര്‍മിച്ചുനല്‍കും.

ബിഎസ്എന്‍എല്‍ ‘പരിധിക്കു പുറത്ത്'; ഉപഭോക്താക്കള്‍ വലയുന്നു

ചങ്ങനാശേരി: ബിഎസ്എന്‍എല്‍ ചങ്ങനാശേരി താലൂക്കില്‍ പരിധിക്കു പുറത്ത്. ഉപഭോക്താക്കള്‍ വലയുന്നു‍. ലാൻഡ് ഫോണുകളിലും മൊബൈല്‍ ഫോണുകളിലും കോളുകള്‍ വിളിക്കുമ്പോള്‍ ക്ലാരിറ്റി കുറയുക, മുറിഞ്ഞുപോകുക, കോളുകള്‍ നിന്നുപോകുക തുടങ്ങിയ തടസങ്ങളാണ് നേരിടുന്നത്. ഇന്‍റര്‍നെറ്റ് കണക്‌ഷനുകള്‍ക്കും തടസവും വേഗതക്കുറവും അനുഭവപ്പെടുന്നുണ്ട്. വ്യക്തികള്‍ക്കും സ്ഥാപനങ്ങള്‍ക്കും ഒരു പോലെ കണക്‌ഷന്‍ തകരാറുകള്‍ നേരിടുകയാണ്. പ്രതിസന്ധികള്‍ രൂക്ഷമായതോടെ ഉപഭോക്താക്കള്‍ ബിഎസ്എന്‍എല്‍ കണക്‌ഷനുകള്‍ ഉപേക്ഷിച്ച് വന്‍തോതില്‍ സ്വകാര്യ കണക്‌ഷനുകളെ ആശ്രയിച്ചു തുടങ്ങിയിട്ടുണ്ട്. ഇതോടെ സ്വകാര്യ കണക്‌ഷനുകളുടെ എണ്ണം വര്‍ധിക്കുന്നതായാണ് കണക്കുകള്‍ സൂചിപ്പിക്കുന്നത്. സംസ്ഥാനത്തുടനീളം ബിഎസ്എന്‍എല്‍ കണക്‌ഷനുകള്‍ക്ക് പ്രതിസന്ധി നേരിടുന്നതായി പരക്കെ ആക്ഷേപമുണ്ട്. എന്നാല്‍, 4ജി സ്റ്റെബിലൈസേഷനുമായി ബന്ധപ്പെട്ട് ഇന്ത്യയില്‍ വികസിപ്പിച്ചെടുത്ത സാങ്കേതികവിദ്യയുടെ അപ്ഗ്രേഡേഷൻ നടക്കുന്നതിനാലാണ് കണക്‌ഷനില്‍ തടസങ്ങള്‍ നേരിടുന്നതെന്നും മുഴുവന്‍ ടവറുകളിലും മൂന്നുമാസത്തിനകം പ്രതിസന്ധികള്‍ പരിഹിക്കപ്പെടുമെന്നാണ് കരുതുന്നതെന്നും ബിഎസ്എന്‍എൽ അധികൃതര്‍ പറഞ്ഞു. അപഗ്രേഡേഷന്‍ പൂര്‍ത്തിയാകുമ്പോള്‍ ഉപഭോക്താക്കൾക്ക് ഗുണമേന്മയുള്ള സേവനങ്ങള്‍ നല്‍കാനാകുമെന്നും അധികൃതര്‍ കൂട്ടിച്ചേര്‍ത്തു.

പുതുപ്പള്ളി പള്ളി പെരുന്നാളിന് കൊടിയേറി

കോട്ടയം: ജോര്‍ജിയന്‍ തീര്‍ഥാടന കേന്ദ്രമായ പുതുപ്പള്ളി സെന്‍റ് ജോര്‍ജ് ഓര്‍ത്തഡോക്‌സ് പള്ളിയില്‍ വിശുദ്ധ ഗീവര്‍ഗീസ് സഹദായുടെ പെരുന്നാളിനു കൊടിയേറി. പുതുപ്പള്ളി, എറികാട് കരങ്ങളില്‍ നിന്നെത്തിച്ച കൊടിമരങ്ങള്‍ പള്ളിയുടെ പടിഞ്ഞാറുവശത്ത് ഉയര്‍ത്തി. തുടർന്ന് വികാരി റവ.ഡോ. വര്‍ഗീസ് വര്‍ഗീസ് കൊടിയേറ്റി. മേയ് അഞ്ചുമുതല്‍ ഏഴുവരെയാണു പ്രധാന പെരുന്നാള്‍. കണ്‍വന്‍ഷന്‍ മേയ് ഒന്നു മുതല്‍ മൂന്നു വരെ നടക്കും. ദിവസവും വൈകുന്നേരം സന്ധ്യനമസ്‌കാരത്തിനുശേഷം കണ്‍വന്‍ഷന്‍ ആരംഭിക്കും. അഞ്ചിന് തീര്‍ഥാടന സംഗമം. വൈകുന്നേരം കൊച്ചാലുംമൂട് ഓര്‍ത്തഡോക്സ് സെന്‍റര്‍, കൈമറ്റം ചാപ്പല്‍, പാറക്കല്‍ കടവ്, കാഞ്ഞിരത്തിന്‍മൂട്, വെട്ടത്തുകവല, കൊച്ചക്കാല കുരിശുപള്ളികളില്‍നിന്ന് പള്ളിയിലേക്ക് പ്രദക്ഷിണം.രാത്രി ഏഴിനു വിശുദ്ധ ഗീവര്‍ഗീസ് സഹദാ അനുസ്മരണപ്രഭാഷണം വൈദിക ട്രസ്റ്റി ഫാ. തോമസ് വര്‍ഗീസ് അമയില്‍ നിര്‍വഹിക്കും. ആറിന് ഡോ. ഏബ്രഹാം മാര്‍ സ്‌തേഫാനോസ് മെത്രാപ്പോലീത്തായുടെ മുഖ്യകാര്‍മികത്വത്തിലുള്ള വിശുദ്ധ അഞ്ചിന്മേല്‍ കുര്‍ബാനയ്ക്കുശേഷം 11ന് പൊന്നിന്‍കുരിശ് വിശുദ്ധ മദ്ബഹായില്‍ സ്ഥാപിക്കും. ഉച്ചകഴിഞ്ഞു രണ്ടിനു വിറകിടീല്‍ ഘോഷയാത്ര. 4.30നു പന്തിരുനാഴി പുറത്തെടുക്കുൽ. 5.30നു ബസേലിയോസ് മാര്‍ത്തോമ്മ മാത്യൂസ് തൃതിയന്‍ കാതാലിക്കാ ബാവായുടെ പ്രധാന കാര്‍മികത്വത്തിലും യൂഹാനോന്‍ മാര്‍ ദീയസ്‌കോറോസ് മെത്രാപ്പോലീത്തായുടെ സഹകാര്‍മികത്വത്തിലും സന്ധ്യനമസ്‌കാരം. തുടര്‍ന്ന് നിലയ്ക്കല്‍ പള്ളി, പുതുപ്പള്ളി കവല ചുറ്റിയുള്ള പ്രദക്ഷിണം. വലിയ പെരുന്നാള്‍ ദിനമായ മേയ് 7നു പുലര്‍ച്ചെ ഒന്നിനു വെച്ചൂട്ട് നേര്‍ച്ചയ്ക്കുള്ള അരിയിടല്‍, രാവിലെ 5നും 8.30നുള്ള രണ്ടാമത്തെ വിശുദ്ധ ഒമ്പതിന്മേല്‍ കുര്‍ബാനയ്ക്കു ബസേലിയോസ് മാര്‍ത്തോമ്മാ മാത്യൂസ് തൃതിയന്‍ കാതോലിക്കാബാവാ മുഖ്യകാര്‍മികത്വം വഹിക്കും. തുടർന്നു വെച്ചൂട്ടു നേര്‍ച്ചസദ്യയും കുട്ടികള്‍ക്കുള്ള ആദ്യ ചോറൂട്ടും. ഉച്ചകഴിഞ്ഞു രണ്ടിന് ഇരവിനല്ലൂര്‍ കവല ചുറ്റിയുള്ള പ്രദക്ഷിണം. നാലിനു അപ്പവും പാകപ്പെടുത്തിയ കോഴിയിറച്ചിയും നേര്‍ച്ച വിതരണം.

അതിരമ്പുഴയിൽ രണ്ടു ബസുകളും കാറും കൂട്ടിയിടിച്ച് അപകടം

അതിരമ്പുഴ: അമിത വേഗത്തിൽ എത്തി നിയന്ത്രണം വിട്ട സ്വകാര്യ ലിമിറ്റഡ് സ്റ്റോപ് ബസിലേക്ക് കാർ ഇടിച്ചു കയറി. കാറിനു പിന്നിൽ മറ്റൊരു സ്വകാര്യ ബസും ഇടിച്ചു. തകർന്ന കാറിലെ യാത്രക്കാർ കാര്യമായ പരിക്കില്ലാതെ രക്ഷപ്പെട്ടു. അതിരമ്പുഴ - ഏറ്റുമാനൂർ റോഡിൽ ഉപ്പുപുരയ്ക്കൽ ജംഗ്ഷനു സമീപം ഇന്നലെ വൈകുന്നേരം 5.30നാണ് അപകടം ഉണ്ടായത്. എറണാകുളത്തുനിന്നും കോട്ടയത്തേക്ക് പോയ ലിമിറ്റഡ് സ്റ്റോപ്പ് ബസ് ആവേ മരിയ ഉപ്പുപുരയ്ക്കൽ ജംഗ്ഷനു സമീപമുള്ള വളവിൽ മറ്റൊരു വാഹനത്തെ മറികടക്കുമ്പോഴാണ് അപകടം സംഭവിച്ചത്. എതിർദിശയിൽനിന്നു കാർ വരുന്നതു കണ്ട് ബ്രേക്ക് ചവിട്ടിയെങ്കിലും മഴ പെയ്തതു കൊണ്ട് നിയന്ത്രണം നഷ്ടപ്പെട്ട ബസ് വെട്ടിത്തിരിയുകയും കാർ ബസിന്‍റെ പിൻഭാഗത്തേക്ക് ഇടിച്ചു കയറുകയുമായിരുന്നു. കാറിന്‍റെ പിന്നാലെ വന്ന മറ്റൊരു സ്വകാര്യ ബസ് കാറിന് പിന്നിലും ഇടിച്ചു. കാറിന്‍റെ എയർ ബാഗ് പ്രവർത്തിച്ചതിനാൽ കാർ യാത്രക്കാർക്കു കാര്യമായ പരിക്കേറ്റില്ല. കാർ യാത്രക്കാരെ നാട്ടുകാർ ആശുപത്രിയിൽ എത്തിച്ചു. അപകടത്തെത്തുടർന്ന് ഏറ്റുമാനൂർ - അതിരമ്പുഴ റോഡിൽ കുറെ സമയം ഗതാഗത തടസമുണ്ടായി. ഏറ്റുമാനൂർ പോലീസ് സ്ഥലത്തെത്തി അപകടത്തിൽപ്പെട്ട വാഹനങ്ങൾ നീക്കിയ ശേഷമാണ് ഗതാഗതം സുഗമമായത്.

അനുസ്മരണവും പുഷ്പാർച്ചനയും നടത്തി

കടുവാക്കുളം: കത്തോലിക്കാ കോൺഗ്രസ് കടുവാക്കുളം യൂണിറ്റിന്‍റെ നേതൃത്വത്തിൽ ഫ്രാൻസിസ് മാർപാപ്പയുടെ ദേഹവിയോഗത്തിൽ പുഷ്പാർച്ചനയും അനുസ്മരണവും നടത്തി. എംസിബിഎസ് എമ്മാവൂസ് പ്രൊവിൻഷ്യൽ റവ.ഡോ. ഷാജി കൊച്ചുപുരയിൽ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ചെറിയാൻ പാലത്തിങ്കൽ അധ്യക്ഷത വഹിച്ചു. ഫാ. ചാക്കോച്ചൻ വടക്കേതലയ്ക്കൽ, ഫാ. സെബാസ്റ്റ്യൻ ഈട്ടോലിൽ, ഫാ. ആന്‍റണി കളപ്പുര, പനച്ചിക്കാട് പഞ്ചായത്ത് പ്രസിഡന്‍റ് ആനി മാമ്മൻ, ബ്ലോക്ക് പഞ്ചായത്ത് മെംബർ സിബി ജോൺ കൈതയിൽ, സിപിഎം ഏരിയ കമ്മിറ്റിയംഗം പി.സി. ബെഞ്ചമിൻ, കത്തോലിക്ക കോൺഗ്രസ് ഗ്ലോബൽ വൈസ് പ്രസിഡന്‍റ് രാജേഷ് ജോൺ നന്തികാട്ട്, മനു ജെ. വരാപള്ളി, ജയൻ ബി. മഠം, ജൂഫിൻ മാത്യു എന്നിവർ പ്രസംഗിച്ചു.

മണര്‍കാട് കാര്‍ണിവല്‍ ഇന്നുമുതല്‍

മണര്‍കാട്: ദേശത്തെ ആഘോഷത്തേരിലേറ്റാന്‍ മണര്‍കാട് കാര്‍ണിവല്‍ ഇന്നുമുതല്‍ അഞ്ചുവരെ മണര്‍കാട് കത്തീഡ്രല്‍ മൈതാനത്ത് നടക്കും. അവധിക്കാലത്ത് കുട്ടികളോടൊപ്പം മാതാപിതാക്കള്‍ക്കും കുടുംബമായി ഉല്ലസിക്കാനും സായംസന്ധ്യയില്‍ സമയം ചെലവഴിക്കാനുമുള്ള അവസരമാണ് മണര്‍കാട് കാര്‍ണിവല്‍. ഏഴുനാള്‍ നീളുന്ന ആഘോഷത്തിന്‍റെ കാര്‍ണിവലിലേക്ക് നാട് കാത്തിരിക്കുകയാണ്. പ്രവേശനം സൗജന്യമാണ്. ഇന്നു വൈകുന്നേരം 6.30ന് തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം നിര്‍വഹിക്കും. കലാപരിപാടികളുടെ ഉദ്ഘാടനം ചലച്ചിത്രതാരം ഭാമ നിര്‍വഹിക്കും. പ്രോഗ്രാം ജോയിന്‍റ് കണ്‍വീനര്‍ ഫാ. ലിറ്റു ജേക്കബ് തണ്ടാശേരിയില്‍ അധ്യക്ഷത വഹിക്കും. മണര്‍കാട് പഞ്ചായത്ത് പ്രസിഡന്‍റ് കെ.സി. ബിജു, ഭദ്രാസന സെക്രട്ടറി ഫാ. ഷൈജു ജോസ്, കത്തീഡ്രല്‍ ട്രസ്റ്റി ജോര്‍ജ് സഖറിയ, കത്തീഡ്രല്‍ സെക്രട്ടറി പി.എ. ചെറിയാന്‍ എന്നിവര്‍ പ്രസംഗിക്കും. കടല്‍കടന്നുവന്ന രുചികളും തനിനാടന്‍ വിഭവങ്ങളുമായി ഒരുങ്ങുന്ന ഭക്ഷ്യമേളയ്ക്കായി 16 ഫുഡ് സ്റ്റാളുകളാണ് ഒരുക്കിയിരിക്കുന്നത്. അമേരിക്കന്‍, അറബിക്, തായ്, ഇറേനിയന്‍ തുടങ്ങിയ വിദേശരുചികളും കുട്ടനാടന്‍, കുമരകം വിഭവങ്ങളും വിളമ്പുന്ന സ്റ്റാളുകള്‍ ഭക്ഷ്യമേളയില്‍ പ്രവര്‍ത്തിക്കും. ജ്യൂസ്, കേക്ക് തുടങ്ങിയവയ്ക്കും പ്രത്യേക സ്റ്റാളുകളുണ്ട്. വിവിധതരം വിനോദങ്ങള്‍ അമ്യൂസ്‌മെന്‍റ് പാര്‍ക്കിലുണ്ട്. വിവിധതരം റൈഡുകള്‍, തൊട്ടിലാട്ടം തുടങ്ങിയവയുമുണ്ട്. ഷോപ്പിംഗ് ആഗ്രഹിക്കുന്നവര്‍ക്കായി 40 എക്‌സിബിഷന്‍ സ്റ്റാളുകളാണ് ക്രമീകരിച്ചിരിക്കുന്നു. വാഹനപ്രേമികള്‍ക്കായി വാഹനപ്രദര്‍ശന സ്റ്റാളുകളുമുണ്ട്. ഫ്‌ളവര്‍ ഷോ, ചെടികളുടെ നഴ്‌സറി തുടങ്ങിയവയാണു മറ്റൊരാകര്‍ഷണം. വൈകുന്നേരങ്ങളില്‍ കാര്‍ണിവല്‍ മൈതാനത്ത് കലാപരിപാടികളും അരങ്ങേറും. കാര്‍ണിവലിനോടനുബന്ധിച്ച് സോഷ്യല്‍ മീഡിയയില്‍ മികച്ച രീതിയില്‍ റീല്‍സ് ചെയ്യുന്നവര്‍ക്ക് കാഷ് പ്രൈസ് നല്‍കുമെന്നും ഭാരവാഹികള്‍ അറിയിച്ചു. സോഷ്യല്‍ മീഡിയ റീല്‍സില്‍ വിഷയാധിഷ്ഠിതവും സര്‍ഗാത്മകവുമായ മൗലിക സൃഷ്ടികളാണു മത്സരത്തിനു പരിഗണിക്കുക. മൊബൈല്‍ ഫോണ്‍, കാമറ, ഡ്രോണ്‍ തുടങ്ങിയവ ഉപയോഗിച്ച് റീല്‍സ് ചിത്രീകരിക്കാം. ഏറ്റവും കൂടുതല്‍ ലൈക്ക്, വീഡിയോയുടെ വ്യത്യസ്തത, ആകര്‍ഷണീയത തുടങ്ങിയവ പരിഗണിച്ചായിരിക്കം വിജയികളെ തെരഞ്ഞെടുക്കുക. റീല്‍സ് മത്സരത്തില്‍ പങ്കെടുക്കാന്‍ താത്പര്യമുള്ള വീഡിയോകള്‍ പോസ്റ്റ് ചെയ്യുമ്പോള്‍ #manarcadcarnival, #manarcadpally എന്നീ ഹാഷ് ടാഗുകള്‍ ഉപയോഗിച്ചിരിക്കണം. അവാര്‍ഡിന് പരിഗണിക്കേണ്ട റീല്‍സുകളുടെ ലിങ്ക് manarcadcarnival<\@>gmail.com എന്ന ഇ-മെയിലിലേക്ക് മേയ് മൂന്നിന് രാത്രി എട്ടിനുള്ളില്‍ അയയ്ക്കണം. ഒരാള്‍ക്ക് പരമാവധി മൂന്ന് റീല്‍സുകള്‍ അയയ്ക്കാം.

ബൈക്ക് മോഷ്ടിച്ച രണ്ടുപേരെ പോലീസ് പിടികൂടി

കോട്ടയം: നഗരത്തിൽനിന്നു ബൈക്ക് മോഷ്‌ടിച്ച രണ്ടുപേരെ കോട്ടയം വെസ്റ്റ് പോലീസ് കമ്പത്തുനിന്നു പിടികൂടി. കമ്പം സ്വദേശികളായ ഇന്ദിരാ കോളനിയില്‍ അശോക് (18), ശുക്രന്‍ (20) എന്നിവരാണ് അറസ്റ്റിലായത്. ഇവര്‍ കഴിഞ്ഞ ജനുവരി 14നാണു കോട്ടയം ഐഡ ജംഗ്ഷനു സമീപത്തെ പാര്‍ക്കിംഗ് ഗ്രൗണ്ടില്‍നിന്നു കാവാലം സ്വദേശി വിഷ്ണുവിന്‍റെ പള്‍സര്‍ ബൈക്ക് മോഷ്‌ടിച്ചത്. സിസിടിവി ദൃശ്യങ്ങള്‍ പരിശോധിച്ചു നടത്തിയ അന്വേഷണങ്ങള്‍ക്കൊടുവിലാണ് പ്രതികളെ പിടികൂടിയത്. എസ്‌ഐ അംഗദന്‍, ഗ്രേഡ് എസ്‌ഐ അനീഷ് വിജയന്‍, എഎസ്‌ഐ രാജേഷ്, എസ്‌സിപിഒ രഞ്ജിത്ത് എന്നിവര്‍ ചേര്‍ന്നാണ് പ്രതികളെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ്‌ ചെയ്തു.

ലഹരിക്കെതിരേ പൗരപ്രതിരോധവും ഭവനസന്ദര്‍ശനവും

കുമാരനല്ലൂര്‍: ലഹരിവ്യാപനത്തിനെതിരേ കോട്ടയത്ത് നാളെ നടത്തുന്ന പൗര പ്രതിരോധത്തിന്‍റെ ഭാഗമായി കുമാരനല്ലൂരില്‍ ഭവനസന്ദര്‍ശനവും ഒപ്പുശേഖരണവും തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. നഗരസഭാംഗം സാബു മാത്യുവിന്‍റെ അധ്യക്ഷതയില്‍ ഡോ.പി.ആര്‍. സോന, ശോഭന പ്രസന്നന്‍, ഷൈലജ ബാബു, ടി.സി. റോയി, തങ്കച്ചന്‍ ചെട്ടിയാത്ത്, ജിനേഷ് നാഗമ്പടം, ഷോബി ലൂക്കോസ്, പി.എസ്. ആഷിക്, കെ. ബി. രാജന്‍, അരവിന്ദാക്ഷന്‍ നായര്‍ എന്നിവര്‍ പ്രസംഗിച്ചു.

തെരഞ്ഞെടുത്തു

ചങ്ങനാശേരി: അഖില കേരള ചേരമര്‍ ഹിന്ദു മഹാസഭ സംസ്ഥാന കമ്മിറ്റിയുടെ തെരഞ്ഞെടുപ്പില്‍ സംസ്ഥാന പ്രസിഡന്‍റായി എം.കെ. അപ്പുക്കുട്ടന്‍, ജനറല്‍ സെക്രട്ടറിയായി ഡോ. കല്ലറ പ്രശാന്ത്, ട്രഷറര്‍ കെ. കുട്ടപ്പന്‍ എന്നിവരെ തെരഞ്ഞെടുത്തു. വൈസ് പ്രസിഡന്‍റുമാരായി മധു നീണ്ടൂര്‍, തങ്കച്ചന്‍ മ്യാലില്‍, സെക്രട്ടറിമാരായി പി.ജി. അശോക്‌കുമാര്‍, കെ.സി. മനോജ്, രാജേഷ് മുടിമല, കമ്മിറ്റി അംഗങ്ങളായി ഒ.കെ. സാബു, ഗോപി മഞ്ചാടിക്കര, സാബു പതിക്കല്‍, രാജന്‍ നാല്പാത്തിമല, ബിബിന്‍ രാജാക്കാട്, വി.എസ്. കുട്ടപ്പന്‍, മണി പൂത്തോട്ട, കെ.കെ. വിജയന്‍, സനില്‍കുമാര്‍ വെളിയനാട്, സുനില്‍കുമാര്‍ എന്നിവരെ തെരഞ്ഞെടുത്തു. 17 അംഗ ഡയറക്ടര്‍ ബോര്‍ഡിനെയും തെരഞ്ഞെടുത്തു.

സ്‌കൂള്‍ ഓഫ് ലെറ്റേഴ്‌സില്‍ ഇംഗ്ലീഷ് പരിശീലനം

കോട്ടയം: എട്ടാം ക്ലാസ് മുതല്‍ പ്ലസ്ടു വരെയുള്ള വിദ്യാര്‍ഥികളുടെ ഇംഗ്ലീഷ് ഭാഷാ മികവ് വര്‍ധിപ്പിക്കാന്‍ എംജി സര്‍വകലാശാലയിലെ സ്‌കൂള്‍ ഓഫ് ലെറ്റേഴ്‌സ് പ്രത്യേക പരിശീലന പരിപാടി സംഘടിപ്പിക്കും. മേയ് 13 മുതല്‍ 30 വരെയുള്ള ദിവസങ്ങളില്‍ രാവിലെ 10 മുതല്‍ ഉച്ചയ്ക്ക് ഒന്നുവരെയാണ് ക്ലാസ്. ആദ്യം രജിസ്റ്റര്‍ ചെയ്യുന്ന 25 പേര്‍ക്കാണ് അവസരം. ഫീസ് 1500 രൂപ. മേയ് ഏഴുവരെ രജിസ്റ്റര്‍ ചെയ്യാം. പരിശീലനം പൂര്‍ത്തിയാക്കുന്നവര്‍ക്ക് പാര്‍ട്ടിസിപ്പേഷന്‍ സര്‍ട്ടിഫിക്കറ്റ് നല്‍കും. https://tinyurl.com/27tc3bme എന്ന ലിങ്കില്‍ ഓണ്‍ലൈന്‍ രജിസ്‌ട്രേഷന്‍ നടത്താം. മെയില്‍: [email protected].

മാന്നാനം ആശ്രമ ദേവാലയത്തിൽ തിരുനാളും നാല്പതുമണി ആരാധനയും

മാന്നാനം: തീർഥാടന കേന്ദ്രമായ മാന്നാനം ആശ്രമ ദേവാലയത്തിൽ വിശുദ്ധ യൗസേപ്പിതാവിന്‍റെ തിരുനാളും നാല്പതുമണി ആരാധനയും മേയ് രണ്ടു മുതൽ 11 വരെ നടത്തും. എട്ട്, ഒമ്പത്, 10 തീയതികളിലാണ് നാല്പതുമണി ആരാധന. മേയ് രണ്ടിനു രാവിലെ ആറിന് വിശുദ്ധ കുർബാന, മധ്യസ്ഥ പ്രാർഥന: ഫാ. അരുൺ പോരൂക്കര സിഎംഐ. 11ന് കൊടിയേറ്റ്, വിശുദ്ധ കുർബാന, പ്രസംഗം, മധ്യസ്ഥ പ്രാർഥന: ഫാ. കുര്യൻ ചാലങ്ങാടി സിഎംഐ (ആശ്രമം പ്രിയോർ). 12.15ന് വചനപ്രഘോഷണവും ആരാധനയും: ബ്രദർ മാർട്ടിൻ പെരുമാലിൽ. വൈകുന്നേരം അഞ്ചിന് വിശുദ്ധ കുർബാന, മധ്യസ്ഥ പ്രാർഥന: ഫാ. ആന്‍റു കൈപ്രമ്പാടൻ സിഎംഐ. മൂന്ന്, അഞ്ച്, ആറ്, ഏഴ് ദിവസങ്ങളിൽ രാവിലെ ആറിനും 7.30നും 11നും വൈകുന്നേരം അഞ്ചിനും വിശുദ്ധ കുർബാന, മധ്യസ്ഥ പ്രാർഥന. നാലിന് രാവിലെ 5.15നും 6.15നും വിശുദ്ധ കുർബാന, മധ്യസ്ഥ പ്രാർഥന. എട്ടിന് വിശുദ്ധ കുർബാന, മധ്യസ്ഥ പ്രാർഥന, ആദ്യകുർബാന സ്വീകരണം. 11നും വൈകുന്നേരം അഞ്ചിനും വിശുദ്ധകുർബാന, മധ്യസ്ഥ പ്രാർഥന. ആറിന് വചനപ്രഘോഷണവും ദിവ്യകാരുണ്യ ആരാധനയും. എട്ടിന് രാവിലെ ആറിനു വിശുദ്ധ കുർബാന, പ്രസംഗം, മധ്യസ്ഥ പ്രാർഥന ചങ്ങനാശേരി അതിരൂപത വികാരി ജനറാൾ മോൺ. സ്കറിയ കന്യാകോണിൽ. തുടർന്ന് ദിവ്യകാരുണ്യ പ്രദക്ഷിണം, നാല്പതുമണി ആരാധന ആരംഭം. ഒമ്പതിന് രാവിലെ ആറിന് വിശുദ്ധ കുർബാന, പ്രസംഗം, മധ്യസ്ഥ പ്രാർഥന, ആരാധന. 10ന് രാവിലെ 5.30 മുതൽ 6.30 വരെ ആരാധന. 6.30ന് വിശുദ്ധ കുർബാന, പ്രസംഗം, മധ്യസ്ഥ പ്രാർഥന: സിഎംഐ തിരുവനന്തപുരം പ്രൊവിൻസ് പ്രൊവിൻഷ്യൽ ഫാ. ആന്‍റണി ഇളംതോട്ടം സിഎംഐ മുഖ്യകാർമികത്വം വഹിക്കും. വിശുദ്ധ കുർബാനയെത്തുടർന്ന് ദിവ്യകാരുണ്യ പ്രദക്ഷിണം, ആരാധന സമാപനം. ഒമ്പതിന് തിരുസ്വരൂപ പ്രതിഷ്ഠ. വിശുദ്ധ കുർബാന, മധ്യസ്ഥ പ്രാർഥന. 11ന് വിശുദ്ധ കുർബാന, മധ്യസ്ഥപ്രാർഥന. തുടർന്ന് വൈദിക വിദ്യാർഥികളുടെ മാതാപിതാക്കളുടെ സംഗമം. ഉച്ചകഴിഞ്ഞ് 3.30ന് പ്രസുദേന്തി കൂട്ടായ്മ. 4.30ന് തിരുനാൾ കുർബാന, മധ്യസ്ഥ പ്രാർഥന: ചങ്ങനാശേരി അതിരൂപത വികാരി ജനറാൾ മോൺ. ആന്‍റണി എത്തയ്ക്കാട്ട്. തുടർന്ന് തിരുനാൾ പ്രദക്ഷിണം. ഫാ. ആന്‍റു കൈപ്രമ്പാടൻ സിഎംഐ, ഫാ. സോബിൻ കിഴക്കയിൽ സിഎംഐ എന്നിവർ കാർമികത്വം വഹിക്കും. തിരുനാൾ സന്ദേശം (ഫാത്തിമമാതാ കപ്പേളയിൽ): ഫാ. മാത്യു ചന്ദ്രൻകുന്നേൽ. തിരുനാൾ ദിനമായ 11ന് രാവിലെ 5.15നും 6.15നും എട്ടിനും വിശുദ്ധ കുർബാന, മധ്യസ്ഥ പ്രാർഥന. 10ന് വിശുദ്ധ കുർബാന, പ്രസംഗം, മധ്യസ്ഥ പ്രാർഥന: മാർ ജോർജ് മഠത്തിക്കണ്ടത്തിൽ മുഖ്യകാർമികത്വം വഹിക്കും. ഫാ. ജോസി താമരശേരി സിഎംഐ , ഫാ. മാർട്ടിൻ മള്ളാത്ത് സിഎംഐ എന്നിവർ സഹകാർമികരാകും. തുടർന്ന് ജോസഫ് നാമധാരികളുടെ സംഗമം, പ്രദക്ഷിണം. ഊട്ടുനേർച്ച. ഉച്ചകഴിഞ്ഞ് രണ്ടിന് സിഎംഐ വിദ്യാഭ്യാസവത്സര പ്രഖ്യാപന സമ്മേളനം. ചങ്ങനാശേരി ആർച്ച്ബിഷപ് മാർ തോമസ് തറയിൽ മുഖ്യാതിഥിയാകും. വൈകുന്നേരം 4.30ന് വിശുദ്ധ കുർബാന, മധ്യസ്ഥ പ്രാർഥന. ആറിന് വചനപ്രഘോഷണവും ആരാധനയും ബ്രദർ മാർട്ടിൽ പെരുമാലിൽ നയിക്കും. 12ന് മരണമടഞ്ഞവരുടെ ഓർമദിനം. രാവിലെ ആറിനും ഏഴിനും11നും വിശുദ്ധ കുർബാന ഉണ്ടായിരിക്കുമെന്ന് പ്രിയോർ ഫാ. കുര്യൻ ചാലങ്ങാടി സിഎംഐ, തീർഥാടന കേന്ദ്രം അസി. ഡയറക്ടർ ഫാ. റെന്നി കളത്തിൽ സിഎംഐ എന്നിവർ അറിയിച്ചു.

ഒപി ടിക്കറ്റ് കൗണ്ടർ ഭാഗത്ത് കുടിവെള്ള സംവിധാനമില്ല

ഗാന്ധിനഗർ: മെഡിക്കൽ കോളജ് ആശുപത്രി ഒപി ടിക്കറ്റ് കൗണ്ടറും ഓർത്തോ, സർജറി ഒപി, ഗാസ്ട്രോ എന്‍ററോളജി തുടങ്ങി വിവിധ ഒപി വിഭാഗങ്ങളും പ്രവർത്തിക്കുന്നി‌ടത്ത് കുടിവെള്ള സംവിധാനമില്ലാത്തത് രോഗികൾക്കു ദുരിതം വിതയ്ക്കുന്നു. ഒപി ടിക്കറ്റ് കൗണ്ടർ മുതൽ ഫാർമസിക്കപ്പുറത്തേക്കും ഒപി ടിക്കറ്റെടുക്കാൻ നിൽക്കുന്നവരുടെ ക്യൂ നീളാറുണ്ട്. മണിക്കൂറുകൾ ക്യൂവിൽ നിന്നാണ് രോഗികളും കൂടെ വരുന്നവരും ടിക്കറ്റ് എടുക്കുന്നത്. ടിക്കറ്റ് കിട്ടിക്കഴിഞ്ഞാൽ ഡോക്‌ടറെ കാണുന്നതിനും മണിക്കൂറുകൾ കാത്തിരിക്കണം. രോഗികളും ബന്ധുക്കളും ഉൾപ്പെടെ ആയിരക്കണക്കിനാളുകളാണ് ആറും ഏഴും മണിക്കൂർ എല്ലാ ദിവസവും ഇവിടെ തങ്ങുന്നത്. എന്നാൽ, ഇരുന്നും നിന്നും മടക്കുമ്പോൾ രോഗികൾക്കും ബന്ധുക്കൾക്കും ഇത്തിരി വെള്ളം കുടിക്കാൻ ഇവിടെ സംവിധാനമില്ല. ഇതേത്തുടർന്ന് 20 രൂപ മുടക്കി കുപ്പി വെള്ളം വാങ്ങി കുടിക്കേണ്ട സ്ഥിതിയാണ്. മുമ്പ് ഒപി ടിക്കറ്റ് കൗണ്ടറിനു സമീപം കുടിവെള്ളത്തിന് സംവിധാനമുണ്ടായിരുന്നു. എന്നാൽ, ഈ കുടിവെള്ള സംവിധാനം തകരാറിലായിട്ട് ഒരു വർഷം പിന്നിട്ടു. ഇതോടെ രോഗികൾ വലിയ ബുദ്ധിമുട്ടാണ് നേരിടുന്നത്. നിർധനരായ പലർക്കും കുടിവെള്ളത്തിനു മുടക്കാൻ 20 രൂപ പോലും കൈയ്യിൽ കാണില്ലെന്ന യാഥാർഥ്യവുമുണ്ട്.

അധ്യാപകർ മിഷനറിമാരായിരിക്കണം: മാർ തോമസ് തറയിൽ

അതിരമ്പുഴ: അധ്യാപകർ മിഷനറിമാരായിരിക്കണമെന്ന് ആർച്ച്ബിഷപ് മാർ തോമസ് തറയിൽ. ചങ്ങനാശേരി അതിരൂപത കോർപറേറ്റ് മാനേജ്മെന്‍റ് സംഘടിപ്പിച്ച സോണൽ അധ്യാപക കൺവൻഷനിൽ സമാപനസന്ദേശം നൽകുകയായിരുന്നു അദ്ദേഹം. അതിരമ്പുഴ സെന്‍റ് അലോഷ്യസ് ഹയർ സെക്കൻഡറി സ്കൂളിൽ നടത്തിയ കൺവൻഷൻ അതിരമ്പുഴ ഫൊറോനാ വികാരി റവ.ഡോ. ജോസഫ് മുണ്ടകത്തിൽ ഉദ്ഘാടനം ചെയ്തു. അതിരൂപത വികാരി ജനറാൾ മോൺ. സ്കറിയ കന്യാകോണിൽ അധ്യാപകർക്ക് ലഹരിവിരുദ്ധ പ്രതിജ്ഞ ചൊല്ലിക്കൊടുത്ത് ലഹരിക്കെതിരേ അമൃതം പദ്ധതി ഉദ്ഘാടനം ചെയ്തു. അതിരൂപത കോർപറേറ്റ് മാനേജർ ഫാ. ജോബി മൂലയിൽ, പ്രഫ. ഡെയ്സൺ പാണങ്ങാടൻ, ഫാ. ജെനി ഇരുപതിൽ എന്നിവർ ക്ലാസുകൾ നയിച്ചു. സെന്‍റ് അലോഷ്യസ് ഹയർ സെക്കൻഡറി സ്കൂൾ പ്രിൻസിപ്പൽ ബിനു ജോൺ, സോണൽ പ്രസിഡന്‍റ് ഷൈനി കുര്യാക്കോസ് എന്നിവർ പ്രസംഗിച്ചു. ഡോ. ജിഷമോൾ അലക്സ്, ഷാജി സി. മാണി, ചെറിയാൻ ജോബ്, ജെർലിൻ ജോസഫ്, അൽഫോൻസാ മാത്യു, സിനി ജോസഫ്, ബീന ജോസഫ്, ഡോ. ബിജി കെ. സെബാസ്റ്റ്യൻ, ജിൻസി സേവ്യർ, ജിജി എം.എം, ബോണി ലിയോ, രേണു ജോസഫ്, ഡയസ് തോമസ് എന്നിവർ നേതൃത്വം നൽകി.

ഫിയാത്ത് കോണ്‍ഫറന്‍സില്‍ പ്രോലൈഫ് കണ്‍വന്‍ഷന്‍ ഇന്ന്

ചങ്ങനാശേരി: ചെത്തിപ്പുഴയില്‍ നടക്കുന്ന ഫിയാത്ത് മിഷന്‍ ഗ്രാന്‍ഡ് കോണ്‍ഫറന്‍സില്‍ ഇന്ന് ജീവന്‍റെ മൂല്യം വ്യക്തമാക്കുന്ന പ്രോലൈഫ് കണ്‍വന്‍ഷന്‍ നടക്കും. രാവിലെ ഒമ്പതിന് വിശുദ്ധകുര്‍ബാന. തുടര്‍ന്ന് ഉച്ചയ്ക്ക് 1.30വരെ ജീവന്‍റെ ശുശ്രൂഷകര്‍ക്കായി കണ്‍വന്‍ഷന്‍. സീന വര്‍ഗീസ്, സിസ്റ്റര്‍ ചെറുപുഷ്പം എന്നിവര്‍ നയിക്കുന്ന ആരാധനയെത്തുടര്‍ന്ന് ഡോ. ഫെലിക്‌സ് ജയിംസ് പാലാ, യുഗേഷ് പുളിക്കന്‍ കുറവിലങ്ങാട് എന്നിവര്‍ പ്രോലൈഫ് പ്രഭാഷണങ്ങള്‍ നടത്തും. ഉച്ചയ്ക്ക് ഒന്നിന് സിബിച്ചന്‍ ഉപ്പുകുന്നേല്‍, ജോണ്‍ മാര്‍ട്ടിന്‍ എന്നിവര്‍ ജീവന്‍ അഭിഷേക പ്രാര്‍ഥന നയിക്കും. ജീവന്‍റെ ശുശ്രൂഷയില്‍ തത്പരരായ എല്ലാവര്‍ക്കും ഇതില്‍ സംബന്ധിക്കാവുന്നതാണ്. ഫിയാത്ത് കോണ്‍ഫറന്‍സില്‍ മേയ് നാലുവരെ പ്രോലൈഫ് എക്‌സിബിഷനും ഉണ്ടായിരിക്കും.

കറുകച്ചാൽ ബസ്‌ സ്റ്റാൻഡിലെ ശൗചാലയത്തിന്‍റെ പ്രവർത്തനം നിലച്ചു; ജനങ്ങൾ ദുരിതത്തിൽ

കറുകച്ചാൽ: കറുകച്ചാൽ പ്രൈവറ്റ് ബസ് സ്റ്റാൻഡിലെ കംഫർട്ട് സ്റ്റേഷന്‍റെ പ്രവർത്തനം നിലച്ചു. യാത്രക്കാരും, വിവിധ സ്ഥാപനങ്ങളിലെ ജീവനക്കാരും ദുരിതത്തിലായി. സെപ്റ്റിക് ടാങ്ക് നിറഞ്ഞു കവിഞ്ഞതിനെത്തുടർന്നാണ് കറുകച്ചാൽ പഞ്ചായത്ത് പ്രൈവറ്റ് ബസ് സ്റ്റാൻഡിലെ കംഫർട്ട് സ്റ്റേഷന്‍റെ പ്രവർത്തനം നാലുദിവസം മുമ്പ് സ്തംഭിച്ചത്. മലിനജലം പുറത്തേക്ക് ഒഴുകിയതിനെത്തുടർന്നാണ് കംഫർട്ട് സ്റ്റേഷൻ അടച്ചത്. ദിവസങ്ങൾ കഴിഞ്ഞെങ്കിലും ടാങ്ക് വൃത്തിയാക്കാനോ, കംഫർട്ട് സ്റ്റേഷൻ തുറക്കാനോ പഞ്ചായത്ത് നടപടി സ്വീകരിച്ചിട്ടില്ല. മഴ പെയ്യുമ്പോൾ ടാങ്ക് നിറഞ്ഞു മലിനജലം ദുർഗന്ധത്തോടെ ബസ്‌സ്റ്റാൻഡിനുള്ളിലേക്ക് ഒലിച്ചിറങ്ങുന്നതായി സമീപത്തെ വ്യാപാരികൾ പറയുന്നു. കംഫർട്ട് സ്റ്റേഷൻ പൂട്ടിയതോടെ യാത്രക്കാരും, ബസ് ജീവനക്കാരും, വ്യാപാരികളും പ്രാഥമിക കാര്യങ്ങൾ നിർവഹിക്കാൻ ബുദ്ധിമുട്ടുകയാണ്. ടൗണിൽ മറ്റു പൊതുശൗചാലയങ്ങളില്ലാത്തത് പൊതുജനങ്ങളെ ഏറെ വലയ്ക്കുന്നു. സെപ്റ്റിക് ടാങ്ക് വൃത്തിയാക്കാൻ ആളെ കിട്ടിയില്ലെന്നും എത്രയും വേഗം ടാങ്ക് വൃത്തിയാക്കി ശൗചാലയം തുറക്കാൻ നടപടി സ്വീകരിക്കുമെന്നും പഞ്ചായത്ത് അധികൃതർ പറയുന്നു.

ജല്‍ ജീവന്‍: റോഡുകള്‍ ഗതാഗതയോഗ്യമാക്കണം

ചങ്ങനാശേരി: ജല്‍ ജീവന്‍ പൈപ്പു സ്ഥാപിക്കാന്‍ കുഴിയെടുത്തിട്ട് നന്നാക്കാതെ കിടക്കുന്ന റോഡുകള്‍ മഴക്കാലത്തിനു മുന്പ് അടിയന്തരമായി ഗതാഗതയോഗ്യ മാക്കണമെന്ന് കേരള കോണ്‍ഗ്രസ് (ജേക്കബ്)ചങ്ങനാശേരി നിയോജകമണ്ഡലം നേതൃയോഗം അധികൃതരോട് ആവശ്യപ്പെട്ടു. പാര്‍ട്ടി സംസ്ഥാന സമ്മേളനത്തോടനുബന്ധിച്ച് മേയ് 10ന് കോട്ടയത്തു നടക്കുന്ന പ്രകടനത്തില്‍ ചങ്ങനാശേരി നിയോജകമണ്ഡലത്തില്‍നിന്നും 500 പ്രവര്‍ത്തകരെ പങ്കെടുപ്പിക്കാന്‍ യോഗം തീരുമാനിച്ചു. യോഗത്തില്‍ നിയോജകമണ്ഡലം പ്രസിഡന്‍റ് ജയിംസ് കലാവടക്കന്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി അഡ്വ.പി.എസ്. ജയിംസ് യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് ടോമി വേദഗിരി, അനു തോമസ്, ജോണ്‍ ആന്‍റണി, പ്രിജോ പതാരംചിറ, ബെന്നി വട്ടക്കാടന്‍, തോമസ് തേമ്പാറ, ബെന്നി പൊക്കത്തില്‍, ചാക്കോ കാഞ്ഞിരക്കാട്ട് എന്നിവര്‍ പ്രസംഗിച്ചു.

വാര്‍ഷികയോഗം നടത്തി

ചങ്ങനാശേരി: വിവേകാനന്ദ റെസിഡന്‍റ്സ് വെല്‍ഫെയര്‍ അസോസിയേഷന്‍റെ 12-ാമത് വാര്‍ഷികയോഗം നടത്തി. ചങ്ങനാശേരി ഡിവൈഎസ്പി എ.കെ. വിശ്വനാഥന്‍ ഉദ്ഘാടനം ചെയ്തു. അസോസിയേഷന്‍ പ്രസിഡന്‍റ് പി.ആര്‍. ഗോപാലകൃഷ്ണപിള്ള അധ്യക്ഷത വഹിച്ചു. അഡ്വ. ജോണ്‍ സി. ആന്‍റണി മുഖ്യപ്രഭാഷണം നടത്തി. പുതിയ ഭാരവാഹികളായി പി.ആര്‍. ഗോപാലകൃഷ്ണപിള്ള (പ്രസിഡന്‍റ്), കെ.സി. ജഗദ്രഥന്‍ (സെക്രട്ടറി), ജോസ് കെ. സെബാസ്റ്റ്യന്‍ (ട്രഷറര്‍), ലത ജി. നായര്‍ (വൈസ് പ്രസിഡന്‍റ്), പ്രീത് പി. ജോസ് (ജോയിന്‍റ് സെക്രട്ടറി) എന്നിവരെ തെരഞ്ഞെടുത്തു.

"മുഖ്യമന്ത്രി'യെ തൂക്കിലേറ്റി പ്രതിഷേധിക്കാനുള്ള ശ്രമം തടഞ്ഞു; കടുത്തുരുത്തിയില്‍ സംഘര്‍ഷം

കടുത്തുരുത്തി: പ്രതിഷേധത്തിന്‍റെ ഭാഗമായി മുഖ്യമന്ത്രിയുടെ കോലം തൂക്കിലേറ്റാന്‍ കോണ്‍ഗ്രസ് പ്രവര്‍ത്തകര്‍ നടത്തിയ ശ്രമത്തെ സിപിഎം പ്രവര്‍ത്തകരെത്തി തടഞ്ഞതോടെ കടുത്തുരുത്തിയില്‍ സംഘര്‍ഷം. ഡിവൈഎസ്പിയുടെ നേതൃത്വത്തില്‍ വന്‍ പോലീസ് സംഘമെത്തിയാണ് മണിക്കൂറുകള്‍ നീണ്ട സംഘര്‍ഷത്തിന് അറുതി വരുത്തിയത്. ഇന്നലെ വൈകൂന്നേരം ആറോടെ കടുത്തുരുത്തി സെന്‍ട്രല്‍ ജംഗ്ഷനിലാണ് സംഭവം. കോണ്‍ഗ്രസ് കടുത്തുരുത്തി ബ്ലോക്ക് കമ്മിറ്റിയുടെ നേതൃത്വത്തിലാണ് പ്രതിഷേധ പരിപാടികള്‍ സംഘടിപ്പിച്ചത്. ഒമ്പത് വര്‍ഷത്തെ പിണറായി വിജയന്‍റെ നേതൃത്വത്തിലുള്ള ഭരണത്തില്‍ കേരളം നശിച്ച ഒമ്പത് വര്‍ഷങ്ങള്‍ എന്ന പേരില്‍ മുഖ്യമന്ത്രിയുടെ കോലമുണ്ടാക്കി തൂക്കിലേറ്റാനായിരുന്നു കോണ്‍ഗ്രസ് പ്രവര്‍ത്തകരുടെ ശ്രമം. ഇതറിഞ്ഞെത്തിയ സിപിഎം പ്രവര്‍ത്തകര്‍ മുഖ്യമന്ത്രിയെ തൂക്കിലേറ്റാന്‍ അനുവദിക്കില്ലെന്ന് വ്യക്തമാക്കി. ഇതോടെ ഇരുകൂട്ടരും തര്‍ക്കത്തിലാവുകയും ഇതിനിടെ മുഖ്യമന്ത്രിയുടെ കോലം കോണ്‍ഗ്രസ് പ്രവര്‍ത്തകര്‍ കത്തിക്കുകയും ചെയ്തു.സിപിഎം പ്രവര്‍ത്തകര്‍ കോലം തട്ടിപ്പറിച്ചെടുത്തു നശിപ്പിച്ചു. ഇതോടെ ഇരുകൂട്ടരം തമ്മില്‍ തര്‍ക്കവും വാക്കേറ്റവും കയ്യാങ്കളിയും അരങ്ങേറി. പ്രശ്‌നം പരിഹരിക്കുന്നതിന് സ്ഥലത്തെത്തിയ വൈക്കം ഡിവൈഎസ്പിയുടെ നേതൃത്വത്തില്‍ ഇരുകൂട്ടരുടെയും നേതാക്കളുമായി സംസാരിച്ചാണ് പ്രശ്നം പരിഹരിച്ചത്.സംഭവവുമായി ബന്ധപ്പെട്ട് ആര്‍ക്കെതിരെയും കേസെടുത്തിട്ടില്ലെന്ന് വൈക്കം ഡിവൈഎസ്പി പി.പി. സിബിച്ചന്‍ പറഞ്ഞു.

തിരുനാളിന് കൊടിയേറി

ഇടയാഴം: ഇടയാഴം സെന്‍റ് ജോസഫ് പള്ളിയിൽ വിശുദ്ധ യൗസേപ്പിതാവിന്‍റെ തിരുനാളിന് കൊടിയേറി. ഇന്നലെ വൈകുന്നേരം ആറിന് ഭക്തിനിർഭരമായ അന്തരീക്ഷത്തിൽ വികാരി ഫാ. ഏലിയാസ് ചക്യത്തിന്‍റെ കാർമികത്വത്തിലാണ് കൊടിയേറ്റിയത്. തുടർന്ന് ഫാ. ടോണി കോട്ടയ്ക്കലിന്‍റെ കാർമികത്വത്തിൽ റാസ കുർബാന നടന്നു. ഫാ. സെബാസ്റ്റ്യൻ നാഴിയംപാറ, ഫാ. വിൻസന്‍റ് പറമ്പിത്തറ, ഫാ. ജയ്സൺ കൊളുത്തുവള്ളിൽ എന്നിവർ സഹകാർമികത്വം വഹിച്ചു. ഇന്നു രാവിലെ 6.30ന് വിശുദ്ധ കുർബാന ഫാ. ഏലിയാസ് ചക്യത്ത്. വൈകുന്നേരം 5.30ന് പൊതുആരാധന - ഫാ. നിബിൻ കുരിശിങ്കൽ, തുടർന്ന് ദിവ്യകാരുണ്യ പ്രദക്ഷിണം - ഫാ. പോൾ ആത്തപ്പള്ളി. നാളെ ഉച്ചകഴിഞ്ഞ് 3.45ന് രൂപം വെഞ്ചരിപ്പ്, തുടർന്ന് വിശുദ്ധ കുർബാന - ഫാ. സിന്‍റോ ചീരകത്തിൽ. തുടർന്ന് വേസ്പര -ഫാ. ബിനു മങ്ങാട്ട്, തുടർന്ന് പ്രസംഗം - ഫാ. റോബിൻ ചിറ്റുപറമ്പിൽ. തുടർന്ന് പ്രദക്ഷിണം. തിരുനാൾ ദിനമായ മേയ് ഒന്നിന് രാവിലെ 6.30ന് വിശുദ്ധ കുർബാന -വികാരി ഫാ. ഏലിയാസ് ചക്യത്ത്. വൈകുന്നേരം നാലിന് തിരുനാൾ കുർബാന - ഫാ. എബിൻ ചിറയ്ക്കൽ, പ്രസംഗം -ഫാ. ബാബു വരിക്കമാക്കയിൽ. തുടർന്ന് തിരുനാൾ പ്രദക്ഷിണം. തിരുനാൾ പരിപാടികൾക്ക് വികാരി ഫാ. ഏലിയാസ് ചക്യത്ത്, കൈക്കാരന്മാരായ ജോസ് കുറിച്ചികുന്നേൽ, തോംസൺ മേമ്പടിക്കാട്ട് തുടങ്ങിയവർ നേതൃത്വം നൽകും.

ഗാന്ധിജിയുടെ പ്രസക്തി അനുദിനം വർധിച്ചുവരുന്നു: മന്ത്രി കടന്നപ്പള്ളി

വൈക്കം: വൈക്കം സത്യഗ്രഹ സ്മാരക ഗാന്ധി മ്യൂസിയത്തിൽ വൈക്കം മ്യൂസിയത്തെക്കുറിച്ചുള്ള ഡോക്യുമെന്‍ററി പ്രകാശനവും സെമിനാറും നടത്തി. നഗരസഭാ വൈസ് ചെയർമാൻ പി.ടി. സുഭാഷിന്‍റെ അധ്യക്ഷതയിൽ നടന്ന സമ്മേളനത്തിൽ ഡോക്യുമെന്‍ററി പ്രകാശനവും സെമിനാറും മന്ത്രി രാമചന്ദ്രൻ കടന്നപ്പള്ളി നിർവഹിച്ചു. ലോകം ഗാന്ധിയിലേക്ക് തിരിച്ചുവരികയും ഗാന്ധിയെ സ്നേഹിക്കുകയും ചെയ്യുമ്പോൾ ഘാതകനെ ചരിത്രപുരുഷനായി ഉയർത്താനുള്ള ശ്രമങ്ങളാണ് രാജ്യത്ത് നടന്നു വരുന്നതെന്ന് മന്ത്രി അഭിപ്രായപ്പെട്ടു. നഗരസഭാ കൗൺസിലർമാരായ എസ്. ഹരിദാസൻ നായർ, എൻ. അയ്യപ്പൻ, ബിന്ദു ഷാജി, ലേഖശ്രീകുമാർ, ഡോക്യുമെന്‍ററി സംവിധായകൻ നൂറനാട് രാമചന്ദ്രൻ നായർ, കെ.ബി. ജയശങ്കർ, പുരാരേഖ വകുപ്പ് ഡയറക്ടർ ഇൻ-ചാർജ് എസ്. പാർവതി, വൈക്കം സത്യഗ്രഹ സ്മാരക ഗാന്ധി മ്യൂസിയം സൂപ്രണ്ട് എ. മഞ്ജു തുടങ്ങിയവർ പ്രസംഗിച്ചു.തുടർന്നു നടന്ന സെമിനാറിൽ "ശതാബ്ദി പിന്നിടുന്ന വൈക്കം' എന്ന വിഷയത്തെ ആസ്പദമാക്കി പ്രബന്ധം അവതരിപ്പിച്ചു.

അഞ്ചുമന പാലത്തിലെ സമീപ റോഡ് ഇടിഞ്ഞുതാണത് അപകടക്കെണിയായി

വെച്ചൂർ: വൈക്കം-വെച്ചൂർ റോഡിലെ അഞ്ചുമന പാലത്തിന്‍റെ ഔട്ട് പോസ്റ്റ് ഭാഗത്തെ സമീപ റോഡ് ഇടിഞ്ഞുതാണു. വാഹനം കടന്നുപോകുമ്പോൾ സമീപ റോഡിലെ കുഴിഞ്ഞ ഭാഗത്ത് അകപ്പെട്ട് നിയന്ത്രണം വിടുന്നത് പതിവാണ്. ഇവിടെ ഇരുചക്ര വാഹനങ്ങൾ തലനാരിഴയ്ക്കാണ് പലപ്പോഴും അപകടത്തിൽനിന്നു രക്ഷപ്പെടുന്നത്. മൂന്നരക്കോടിയോളം രൂപ വിനിയോഗിച്ച് നിർമിച്ച പാലം ഏതാനും മാസങ്ങൾക്ക് മുമ്പാണ് ഗതാഗതത്തിന് തുറന്നുകൊടുത്തത്. അതിവേഗം എത്തുന്ന വാഹനങ്ങൾ കുഴിയിൽ പതിച്ച് നിയന്ത്രണം നഷ്ടമായി മറ്റു വാഹനങ്ങളുമായി കൂട്ടിയിടിച്ച് വലിയ അപകടമുണ്ടാകുന്നതിന് കാത്തിരിക്കാതെ അധികൃതർ ഗതാഗതം സുരക്ഷിതമാക്കാൻ നടപടി സ്വകരിക്കണമെന്നു നാട്ടുകാർ ആവശ്യപ്പെട്ടു.

കേബിളുകൾക്കു ഗുണനിലവാരമില്ലെന്ന്; പാലാ ഡിവിഷന്‍ വൈദ്യുതിമുടക്കം തുടർക്കഥ

പാലാ: കെഎസ്ഇബി പാലാ ഡിവിഷന്‍ പരിധിയിലെ പാലാ, ഭരണങ്ങാനം, പൈക, പൂഞ്ഞാര്‍ സെക്ഷനുകളില്‍ വൈദ്യുതി മുടക്കം തുടര്‍ക്കഥയാകുന്നു.പാലാ സെക്ഷന്‍ പരിധിയില്‍ മെച്ചപ്പെട്ട സേവനം നല്‍കുന്നതിനായി സ്ഥാപിച്ച ഏരിയല്‍ ബഞ്ചഡ് കേബിള്‍ ഗുണനിലവാരം കുറഞ്ഞതാണെന്നും ഇതുമൂലം മഴവെള്ളം കേബിളിനുള്ളില്‍ പ്രവേശിച്ചാണ് വൈദ്യുതി മുടങ്ങുന്നതെന്നും പറയുന്നു. ഭരണങ്ങാനം, പൈക സെക്ഷനുകളില്‍ പൈക 33 കെവി സബ്സ്റ്റേഷന്‍ തകരാറുകള്‍ മൂലവും 33 കെവി, 11 കെവി ഫീഡറുകളുടെ തകരാര്‍ മൂലവുമാണ് മിക്കപ്പോഴും വൈദ്യുതി മുടങ്ങുന്നത്. ഇവിടെ വോള്‍ട്ടേജ് ഏറ്റക്കുറച്ചിലുകളും നിത്യ സംഭവമാണ്. ഉപഭോക്താക്കള്‍ക്കു മെച്ചപ്പെട്ട സേവനം നല്‍കുന്നതിനു വേണ്ടി എന്ന അവകാശവാദവുമായി പൈക, ഭരണങ്ങാനം സെക്ഷനുകളുടെ അതിര്‍ത്തികള്‍ പുനര്‍നിര്‍ണയം നടത്തിയതു മുതല്‍ ഇരു സെക്ഷന്‍ പരിധികളിലും വൈദ്യുതി മുടക്കം വര്‍ധിച്ചതായി ഉപഭോക്താക്കള്‍ ആരോപിക്കുന്നു. വൈദ്യുതി മുടങ്ങിയാല്‍ പുനഃസ്ഥാപിക്കുന്നതിനു കാലതാമസം നേരിടുന്നതും പതിവാണ് . ഇരു സെക്ഷനുകള്‍ തമ്മിലുള്ള ഏകോപനമില്ലായ്മയും കാരണമാകുന്നുണ്ട്. മലയോര മേഖലയായ പൂഞ്ഞാര്‍ സെക്ഷന്‍ പരിധിയില്‍ വേണ്ടത്ര 11 കെവി ഫീഡറുകള്‍ ഇല്ലാത്തതിനാല്‍ വൈദ്യുതി മുടക്കം തുടര്‍ക്കഥയാണ്. പരാതി ഉന്നയിക്കുന്നവര്‍ സ്ഥിരം ശല്ല്യക്കാരാണെന്ന് വരുത്തിത്തീര്‍ക്കാനുള്ള ശ്രമവും ഉദ്യോഗസ്ഥരുടെ ഭാഗത്തുനിന്ന് ഉണ്ടാകുന്നുണ്ടെന്നും പരാതി ഉയര്‍ന്നിട്ടുണ്ട്. ജീപ്പുമില്ല; ജീവനക്കാരുമില്ല ഭരണങ്ങാനം സെക്ഷനില്‍ ജീവനക്കാരുടെ കുറവും വലിയ ഏരിയായും പ്രശ്‌നങ്ങള്‍ സൃഷ്ടിക്കുന്നു. ഓഫീസിന് അനുവദിച്ചിട്ടുള്ള ജീപ്പും ഇപ്പോഴില്ല. ഇതുമൂലം വൈദ്യുതി പുനഃസ്ഥാപിക്കാന്‍ താമസം നേരിടുന്നു. ഒരു മാസം 1500 കിലോമീറ്റര്‍ ഓടാനുള്ള പണമേ ജീപ്പിന് അനുവദിക്കുകയുള്ളൂവെന്നു ജീവനക്കാര്‍ പറയുന്നു. അത് ചിലപ്പോള്‍ 15, 20 ദിവസമാകുമ്പോള്‍ കഴിയും. പിന്നീട് ജീവനക്കാര്‍ സ്വന്തം ബൈക്കിലും മറ്റുമാണ് തകരാര്‍ പരിഹരിക്കാന്‍ കറങ്ങി നടക്കുന്നത്. മണിക്കൂറുകള്‍ക്കു ശേഷമാണ് വൈദ്യുതി പുനഃസ്ഥാപിക്കാനാകുന്നത്. ഞായറാഴ്ച വൈകുന്നേരം നാലരയോടെ മുടങ്ങിയ വൈദ്യുതി രാത്രി പത്തിനാണ് പുനഃസ്ഥാപിച്ചത്. അല്‍ഫോന്‍സാ തീര്‍ഥാടന കേന്ദ്രം, വ്യാപാര സ്ഥാപനങ്ങള്‍, വിവിധ സര്‍ക്കാര്‍ ഓഫീസുകള്‍, സ്‌കൂളുകള്‍, കോളജ് എന്നിവയെ വൈദ്യുതി മുടക്കം പ്രതികൂലമായി ബാധിക്കുന്നു. ഭരണങ്ങാനം,തലപ്പുലം, തിടനാട് , മീനച്ചില്‍ പഞ്ചായത്തുകളില്‍പ്പെട്ട അളനാട്, ഇടപ്പാടി, ഭരണങ്ങാനം, അയ്യമ്പാറ, ചൂണ്ടച്ചേരി, ഉള്ളനാട്, പ്ലാശനാല്‍,പനയ്ക്കപ്പാലം, അമ്പാറനിരപ്പ്, പൂവത്തോട്, ഇടമറ്റം, പാറപ്പള്ളി, കിഴപറയാര്‍ തുടങ്ങിയ പ്രദേശങ്ങള്‍ ഉള്‍പ്പെടുന്നതാണ് സെക്ഷന്‍.

പാലാ നഗരസഭാ ഭരണം പരാജയമെന്ന് പ്രതിപക്ഷം

പാലാ: പാലാ നഗരസഭ ഭരണം സമസ്ത മേഖലകളിലും പരാജയമാണെന്നും കെടുകാര്യസ്ഥതയുടെ പര്യായമായി മാറിയെന്നും പ്രതിപക്ഷം. പത്ര സമ്മേളനത്തിലാണ് നഗരസഭ പ്രതിപക്ഷ കൗണ്‍സിലര്‍മാര്‍ ഭരണ കക്ഷിക്കെതിരേ രംഗത്തെത്തിയത്. നഗരസഭയില്‍ ഭരണ സ്തംഭനവും വികസന മുരടിപ്പുമാണ് കഴിഞ്ഞ നാലുവര്‍ഷംകൊണ്ട് സംഭവിച്ചത്. സംസ്ഥാനഭരണവും മന്ത്രിയും കൈപ്പിടിയില്‍ ഉണ്ടായിട്ടും ചൂണ്ടിക്കാണിക്കാന്‍ പറ്റുന്ന അഭിമാനകരമായ ഒരു പദ്ധതി പോലും ഈ നാല് വര്‍ഷക്കാലയളവിനുള്ളില്‍ നഗരത്തില്‍ നടപ്പിലാക്കാന്‍ സാധിച്ചിട്ടില്ല. മാറിമാറി വന്ന നാലു ചെയര്‍മാന്‍മാര്‍ ഒരുപാട് പ്രഖ്യാപനങ്ങള്‍ നടത്തിയെങ്കിലും ഒന്നുപോലും പ്രാവര്‍ത്തികമാക്കാനും യാഥാര്‍ത്ഥ്യമാക്കുവാനും സാധിച്ചിട്ടില്ല. നഗരസഭാ പരിധിയിലെ പബ്ലിക് ടോയ്‌ലറ്റുകളുടെ ശോചനീയാവസ്ഥ പാലായ്ക്ക് വലിയ അപമാനമാണ്. ശുചിമുറി മാലിന്യങ്ങള്‍ ശാസ്ത്രീയമായി സംസ്‌കരിക്കുന്നത് സംബന്ധിച്ച പ്രതിപക്ഷത്തിന്‍റെ പ്രമേയം തികഞ്ഞ ലാഘവത്തോടെയാണ് ഭരണാധികാരികള്‍ കൈകാര്യം ചെയ്തത്. മാലിന്യ സംസ്‌കരണം പാലാ നഗരസഭയില്‍ കുത്തഴിഞ്ഞു കിടക്കാന്‍ തുടങ്ങിയിട്ട് വര്‍ഷങ്ങളായി. സിന്തറ്റിക് ട്രാക്ക് പുനരുദ്ധാരണ പദ്ധതികളൊന്നും ഫലപ്രാപ്തിയില്‍ എത്തിയിട്ടില്ല. ശക്തമായ ഒരു മഴ പെയ്താല്‍ തന്നെ പാലാ നഗരത്തില്‍ ഉടനീളം വലിയ വെള്ളക്കെട്ടുകള്‍ രൂപപ്പെടുന്നു. ലണ്ടന്‍ ബ്രിഡ്ജും ഓപ്പണ്‍ ഓഡിറ്റോറിയവും സാമൂഹ്യവിരുദ്ധരുടെയും ലഹരി മാഫിയ സംഘങ്ങളുടെയും ഇടത്താവളങ്ങളാണ്. നിരവധി വ്യാപാര സ്ഥാപനങ്ങളില്‍ നിന്ന് മീനച്ചിലാറ്റിലേക്ക് മാലിന്യം ഒഴുക്കുന്നത് തടയാന്‍ ഭരണസമിതിക്ക് സാധിച്ചിട്ടില്ല. നഗരസഭാ പരിധിക്കുള്ളില്‍ നടക്കുന്ന അനധികൃത നിര്‍മാണങ്ങള്‍ക്കും കൈയേറ്റങ്ങള്‍ക്കും നേരേ കണ്ണടയ്ക്കുന്ന സമീപനമാണ് ഭരണസമിതി കാലങ്ങളായി കൈക്കൊണ്ടുപോരുന്നത്. നിയമാനുസൃതം കച്ചവടം നടത്തുന്ന വ്യാപാര സമൂഹത്തിന് വഴിയോരക്കച്ചവടം വലിയ വെല്ലുവിളി ഉയര്‍ത്തുന്നു. കാര്യക്ഷമമായ ഇടപെടലുകള്‍ നടത്താതെ ഭരണസമിതി ഇത് അഴിമതിക്കുള്ള ഉപാധിയായിട്ടാണ് കാണുന്നതെന്നും പ്രതിപക്ഷ കൗണ്‍സിലര്‍മാര്‍ ആരോപിച്ചു. നഗരസഭ പ്രതിപക്ഷ നേതാവ് പ്രഫ. സതീശ് ചൊള്ളാനി, കൗണ്‍സിലര്‍മാരായ ജോസ് എടേട്ട്, വി.സി. പ്രിന്‍സ്, ജിമ്മി ജോസഫ്, ലിസിക്കുട്ടി മാത്യു, ആനി ബിജോയി, മായ രാഹുല്‍, സിജി ടോണി, ലിജി ബിജു തുടങ്ങിയവര്‍ പങ്കെടുത്തു.

സ്വരുമ ജീവധാര പദ്ധതിക്ക് നാളെ തുടക്കം

കുറവിലങ്ങാട്: സ്വരുമ പാലിയേറ്റീവ് കെയറിന്‍റെ നേതൃത്വത്തിൽ നിർധനരായ ഡയാലിസിസ് രോഗികൾക്ക് ആശ്വാസം സമ്മാനിച്ച് ജീവധാര പദ്ധതിക്ക് തുടക്കമിടുന്നു. നിർധന ഡയാലിസിസ് രോഗികൾക്ക് ഡയാലിസിസ് കിറ്റും മരുന്നും സൗജന്യമായി സമ്മാനിക്കുന്ന പദ്ധതി ജനകീയ പങ്കാളിത്തത്തോടെയാണ് നടപ്പിലാക്കുന്നത്. ആദ്യഘട്ടത്തിൽ കുറവിലങ്ങാട് സഹകരണബാങ്ക്, വ്യാപാരി വ്യവസായി ഏകോപന സമിതി യൂണിറ്റ്, എക്‌സിക്യൂട്ടീവ് ക്ലബ് എന്നിവയുടെ സഹകരണത്തോടെയാണ് നടപ്പിലാക്കുന്നത്. പദ്ധതിയുടെ ഉദ്ഘാടനം നാളെ മാർ ജേക്കബ് മുരിക്കൻ ഉദ്ഘാടനം ചെയ്യും. പള്ളിക്കവലയിലെ മുത്തിയമ്മ കോംപ്ലക്‌സിലുള്ള സ്വരുമ ഹാളിലാണ് ഉദ്ഘാടനസമ്മേളനം. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രം ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അനുഗ്രഹപ്രഭാഷണം നടത്തും. പ്രസിഡന്‍റ് ഷിബി വെള്ളായിപറമ്പിൽ അധ്യക്ഷത വഹിക്കും. സഹകരണബാങ്ക് പ്രസിഡന്‍റ് പ്രഫ. പി.ജെ സിറിയക് പൈനാപ്പിള്ളിൽ, വ്യാപാരി വ്യവസായി ഏകോപന സമിതി പ്രസിഡന്‍റ് ഷാജി ചിറ്റക്കാട്ട്, സെക്രട്ടറി ബാബു ആര്യപ്പള്ളിൽ, എക്‌സിക്യൂട്ടീവ് ക്ലബ് പ്രസിഡന്‍റ് റോയി കുഴുപ്പിൽ, സെക്രട്ടറി റോളി മുട്ടപ്പിള്ളിൽ, സ്വരുമ സെക്രട്ടറി കെ.വി. തോമസ് കട്ടക്കൽ എന്നിവർ പ്രസംഗിക്കും. പദ്ധതിയുമായി ബന്ധപ്പെട്ട വിവരങ്ങൾക്ക് ഫോൺ: 830 100 8361.

തീക്കോയി ഗവ. ആശുപത്രിക്കു മുന്പിൽ പ്രതിഷേധ ധർണ നടത്തി

തീക്കോയി: തീക്കോയി ഗവൺമെന്‍റ് പ്രാഥമികാരോഗ്യ കേന്ദ്രത്തിൽ അവശ്യമരുന്നുകൾ പോലും ലഭ്യമാക്കാതെ ആശുപത്രിയോട് സംസ്ഥാന സർക്കാരും പഞ്ചായത്ത് ഭരണസമിതിയും കാണിക്കുന്ന അവഗണനയ്ക്കെതിരേ ബിജെപി തീക്കോയി പഞ്ചായത്തു കമ്മിറ്റിയുടെ നേതൃത്വത്തിൽ പ്രതിഷേധപ്രകടനവും തുടർന്ന് ജനകീയ ധർണയും നടത്തി. പഞ്ചായത്തു കമ്മിറ്റി പ്രസിഡന്‍റ് പി.വി. ലാലിയുടെ അധ്യക്ഷതയിൽ ദേശീയ നിർവാഹക സമിതി അംഗം പി.സി.ജോർജ് ഉദ്ഘാടനം ചെയ്തു. ഇ.ഡി. രമണൻ ഇട്ടിപറമ്പിൽ, മിനർവ മോഹനൻ, ജോജിയോ ജോസഫ്, ചെയിസ് തോമസ്, ആനിയമ്മ സണ്ണി, പി.വി. വർഗീസ്, സജീവ് മാപ്രയിൽ, ടി. ഡി. മോഹനൻ, ജോസ് തുടങ്ങിയവർ പ്രസംഗിച്ചു

കലുങ്ക് നിര്‍മാണം ആരംഭിച്ചു

മുത്തോലി: പഞ്ചായത്ത് നെയ്യൂര്‍ വാര്‍ഡിലെ തുരുത്തിക്കുഴി വള്ളികാട്ടുകുഴി ജംഗ്ഷനില്‍ കലുങ്ക് നിര്‍മാണം ആരംഭിച്ചു. വര്‍ഷകാലത്തും വേനല്‍മഴക്കാലത്തും ഈ റോഡിലൂടെ യാത്ര ചെയ്യുക വളരെ ദുഷ്‌കരമായിരുന്നു. കലുങ്ക് ഇല്ലാത്തതിനാല്‍ വലിയ വെള്ളക്കുഴിയായിരുന്നു ഈ ഭാഗത്തുണ്ടായിരുന്നത്. ഇരുചക്രവാഹനക്കാരും ഓട്ടോറിക്ഷയും മറ്റു ചെറു വാഹനങ്ങളും ഈ റോഡിലൂടെ യാത്ര അസാധ്യമായതിനാല്‍ മറ്റ് വിവിധ റോഡിലൂടെ യാത്ര ചെയ്യേണ്ട അവസ്ഥയായിരുന്നു ഉണ്ടായിരുന്നത്. നെയ്യൂര്‍ തുരുത്തിക്കുഴി ഭാഗത്തുനിന്നു മുത്തോലി പള്ളിഭാഗം, കൊഴുവനാല്‍, കെഴുവംകുളം ഭാഗത്തേക്കുള്ള ഏറ്റവും എളുപ്പമാര്‍ഗമാണിത്. ഈ റോഡില്‍ കലുങ്ക് നിര്‍മാണത്തിനും അനുബന്ധ ഭാഗം റോഡ് നിര്‍മാണത്തിനുമായി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി അനുവദിച്ച ഏഴ് ലക്ഷം രൂപ ഉപയോഗിച്ചാണ് നിര്‍മാണം. നിർമാണ ഉദ്ഘാടനം ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നിര്‍വഹിച്ചു. മെംബര്‍ ഫിലോമിന ഫിലിപ്പ് അധ്യക്ഷത വഹിച്ചു.

കവല കടക്കാൻ തുഴയണം; ഒറ്റമഴയിൽ പള്ളിക്കവല വെള്ളക്കവല

കുറവിലങ്ങാട്: പള്ളിക്കവല കടക്കാൻ തുഴയണം. യാത്ര കാൽനടയാണെങ്കിലും വാഹനത്തിലാണെങ്കിലും ദുർഗതിതന്നെ. കനത്ത ഒരു മഴ പെയ്താൽ പള്ളിക്കവല വെള്ളക്കെട്ടായി മാറും. ഇരുചക്രവാഹനങ്ങളടക്കം വെള്ളക്കെട്ടിൽ നിന്നുപോകുന്ന സ്ഥിതിയാണ്. പള്ളിക്കവലയിൽ നിന്ന് വെള്ളമൊഴുകി വലിയതോട്ടിലെത്താനുള്ള വഴികളടഞ്ഞതോടെയാണ് പള്ളിക്കവലയുടെ സ്ഥിതി ദുരിതത്തിലായത്. വെള്ളമൊഴുകിയെത്തുന്ന ഓടകൾ പലതും കോൺക്രീറ്റ് ചെയ്ത് അടച്ച സ്ഥിതിയിലാണെങ്കിലും പരിഹാരം കണ്ടെത്താൻ നടപടികളില്ല. പള്ളിത്താഴെ റോഡിലേക്ക് ഓടയിൽ നിന്ന് വെള്ളം തിരിച്ച് കയറുന്ന സ്ഥിതിയാണുള്ളത്. ബൈപാസ് റോഡ് എത്തിയതോടെ വലിതോടിന് സമീപമുള്ള പാടങ്ങളെല്ലാം കൂട്ടത്തോടെ നികത്തിയതാണ് പ്രശ്‌നങ്ങൾക്ക് ഇടയാക്കുന്നത്. പാടം നികത്തി കെട്ടിട നിർമാണമടക്കം ഇവിടെ ആരംഭിച്ചിട്ടുണ്ട്. ബൈപ്പാസിന് കിഴക്ക് ഭാഗത്തുനിന്ന് വെള്ളം വലിയതോട്ടിലെത്താൻ മതിയായ രീതിയിൽ കലുങ്കുപോലുമില്ല. പാടം നികന്നതോടെ ചിലയിടങ്ങളിൽ ഓടയിലൂടെയെത്തുന്ന വെള്ളം താഴ്ന്നു തോട്ടിലെത്താനും വഴികളില്ല. മുണ്ടൻവരമ്പ്, ഇലയ്ക്കാട് റോഡുകളിൽ നിന്ന് വെള്ളം പാറ്റാനി ഭാഗത്തെത്തിയിരുന്ന ഓട അടച്ചതിനാൽ ഈ വെള്ളവും ഒഴുകി പള്ളിക്കവലയിലെത്തുന്ന സ്ഥിതി പ്രശ്‌നം രൂക്ഷമാക്കുന്നുണ്ട്. ആയിരക്കണക്കിന് വാഹനങ്ങളെത്തുന്ന പള്ളിക്കവലയിലെ വെള്ളക്കെട്ട് ദുരന്തനിവാരണപദ്ധതിയിലടക്കം നടപടികളുണ്ടാകുമെന്ന പ്രഖ്യാപനങ്ങളുണ്ടായെങ്കിലും നടപടികളുണ്ടായിട്ടില്ല. കനത്തമഴ പെയ്താൽ വ്യാപാരസ്ഥാപനങ്ങളും ടൗണിലെ ഓട്ടോറിക്ഷകളടക്കമുള്ള വാഹനങ്ങളും ഏറെ ബുദ്ധിമുട്ടിലാണ്.

എന്‍റെ കേരളത്തിൽ പുതുമയാർന്ന പ്രദർശനവുമായി ഗിഫ്റ്റഡ് ചിൽഡ്രൻ

പൊൻകുന്നം: സംസ്ഥാനസർക്കാരിന്‍റെ നാലാം വാർഷികത്തിന്‍റെ ഭാഗമായി കോട്ടയത്ത് നടത്തുന്ന എന്‍റെ കേരളം പ്രദർശനത്തിൽ പുതുമയാർന്ന ഇനങ്ങളുമായി ഗിഫ്റ്റഡ് ചിൽഡ്രൻ. കാഞ്ഞിരപ്പള്ളി വിദ്യാഭ്യാസജില്ലയിലെ ഗിഫ്റ്റഡ് ചിൽഡ്രൻ സംഘമാണ് പ്രദർശനം ഒരുക്കിയത്. ഭിന്നശേഷി കുട്ടികൾക്ക് ആസിഡ് ബേസ് തിരിച്ചറിയുന്നതിനുള്ള പ്രകൃതി സൗഹാർദ സൂചകങ്ങളാണ് അഭിരൂപ, അഭിത്, ദിയ എന്നിവർ അവതരിപ്പിച്ചത്. കൈതകൃഷിക്കുശേഷം ഉപേക്ഷിക്കുന്ന കൈത ഇലകൾ ഉപയോഗിച്ച് നിർമിച്ച ഗ്രോബാഗുകൾ തുടങ്ങിയ ഉത്പന്നങ്ങളുമായാണ് യദുകൃഷ്ണയും റൂക്കിയയും എത്തിയത്. കൗമാരപെൺകുട്ടികൾ നേരിടുന്ന ശാരീരിക മാനസിക പ്രശ്‌നങ്ങൾ ദേവിക, പവിത്ര എന്നീ വിദ്യാർഥിനികൾ അവതരിപ്പിച്ചു. ഡിഇഒ റോഷ്‌ന അലിക്കുഞ്ഞ് നേതൃത്വം നൽകി.

വാര്‍ഷിക പൊതുയോഗം

കാഞ്ഞിരപ്പള്ളി: ശ്രീദേവി വിലാസം വെള്ളാള സമാജം 71ാമത് വാര്‍ഷിക പൊതുയോഗം കേരള വെള്ളാള മഹാസഭ സംസ്ഥാന സെക്രട്ടറി ഇ.പി. ജ്യോതി ഇടക്കര ഉദ്ഘാടനം ചെയ്തു. ഉപസഭ പ്രസിഡന്‍റ് എം.ടി. സജീവ് മുണ്ടക്കൽ അധ്യക്ഷത വഹിച്ചു. വനിത സമാജം ജില്ലാ പ്രസിഡന്‍റ് ലത ആര്‍. പ്രസാദ് കളരിക്കല്‍, ഉപസഭ ഭാരവാഹികളായ സി.ആര്‍. സജി ചൂണ്ടശേരിയില്‍, ഇ.എന്‍. ഗോപിനാഥപിള്ള ഇലപ്പനാല്‍, ടി.എസ്. പരമേശ്വരന്‍പിള്ള തെക്കുംപുറത്ത്, എം.ആര്‍. സജി മുണ്ടയ്ക്കല്‍, കെ.സി. മോഹനദാസന്‍പിള്ള കണ്ടത്തില്‍, ഇ.എസ്. ഹാരീസ് ഇടക്കര, വി.എസ്. ജയകുമാര്‍ വടക്കേനാത്ത്, ജയ ചന്ദ്രന്‍ കൈനാട്ടുകുന്നല്‍, ഷീലാകുമാരി പരമേശ്വരന്‍പിള്ള തെക്കുംപുറത്ത് തുടങ്ങിയവര്‍ പ്രസംഗിച്ചു. വിദ്യാഭ്യാസ മേഖലകളില്‍ ഉന്നതവിജയം കരസ്ഥമാക്കിയ അരവിന്ദ് വിജയ് വെച്ചുകുന്നേല്‍, അഖില്‍ അജികുമാര്‍ മുണ്ടയ്ക്കല്‍, അനിത്യ പ്രകാശ് പുതുപ്പറമ്പില്‍ തുടങ്ങിയവരെ ഉപസഭ രക്ഷാധികാരി വി.കെ. രാജപ്പന്‍പിള്ള വെച്ചുക്കുന്നേല്‍ അനുമോദിച്ചു. പുതിയ ഭരണസമിതിയെയും തെരെഞ്ഞടുത്തു.

വാനപ്രസ്ഥകേന്ദ്രത്തിന്‍റെ പുതിയ മന്ദിരം ഉദ്ഘാടനം ചെയ്തു

വാഴൂർ: വാഴൂർ തീർഥപാദപുരം കേന്ദ്രമാക്കി പ്രവർത്തിക്കുന്ന പുണ്യംട്രസ്റ്റിന്‍റെ കീഴിലുള്ള വാനപ്രസ്ഥകേന്ദ്രത്തിന്‍റെ പുതിയ മന്ദിരത്തിന്‍റെ ഉദ്ഘാടനം കേരള ഗവർണർ രാജേന്ദ്ര വിശ്വനാഥ് അർലേക്കർ നിർവഹിച്ചു. മാതൃസമിതിയുടെ യോഗ കൗൺസിലിംഗ് കേന്ദ്രം എസ്എൻ ട്രസ്റ്റ് എക്‌സിക്യൂട്ടീവ് അംഗം പ്രീതി നടേശനും പുണ്യം ഭവനദാന പദ്ധതി ആദ്യവീടിനുള്ള ഭൂദാനം രാഷ്ട്രീയ സ്വയം സേവക സംഘം ദക്ഷിണ കേരളം പ്രാന്ത സംഘചാലക് പ്രഫ.എം.എസ്. രമേശൻ നിർവഹിച്ചു. സ്വാഗത സംഘം ചെയർമാൻ ജി. രാമൻ നായർ അധ്യക്ഷത വഹിച്ചു. ഗരുഡധ്വജാനന തീർഥപാദസ്വാമികൾ അനുഗ്രഹപ്രഭാഷണം നടത്തി. ചീഫ് വിപ്പ് ഡോ.എൻ. ജയരാജ്, പുണ്യം ട്രസ്റ്റ്‌ സെക്രട്ടറി ബി. രാജീവ്‌, രാഷ്ട്രീയ സ്വയംസേവക സംഘം വിഭാഗ് സംഘചാലക് പി.പി. ഗോപി, വാഴൂര്‍ പഞ്ചായത്ത് പ്രസിഡന്‍റ് തോമസ് വെട്ടുവേലില്‍, എസ്എന്‍ഡിപി യോഗം ചങ്ങനാശേരി യൂണയന്‍ പ്രസിഡന്‍റ് ഗിരീഷ് കോനാട്ട്, കേരള വിശ്വകര്‍മസഭ സംസ്ഥാന വര്‍ക്കിംഗ് പ്രസിഡന്‍റ് കെ.കെ. ഹരി, കൊച്ചിന്‍ എക്‌സ്‌പോര്‍ട്‌സ് പ്രൈവറ്റ് ലിമിറ്റഡ് ചെയര്‍മാന്‍ ജി. ചന്ദ്രശേഖരപിള്ള, വാഴൂര്‍ പഞ്ചായത്തംഗം പ്രഫ. പുഷ്‌കലാദേവി, റബര്‍ബോര്‍ഡ് എക്സിക്യൂട്ടീവ് മെംബര്‍ എന്‍.ഹരി തുടങ്ങിയവർ പ്രസംഗിച്ചു. ഗവർണർക്കുള്ള പുണ്യം ട്രസ്റ്റിന്‍റെ ഉപഹാരം ആർ. അനിൽകുമാർ സമർപ്പിച്ചു.

14 സ്നേഹവീടുകളുടെ താക്കോൽദാനം നടത്തി

കാഞ്ഞിരപ്പള്ളി: സെന്‍റ് ഡൊമിനിക്സ് കോളജിന്‍റെ വജ്ര ജൂബിലി വർഷത്തിൽ കോളജ് എൻഎസ്എസ് യൂണിറ്റ് കെ. ചിറ്റിലപ്പള്ളി ഫൗണ്ടേഷന്‍റെയും എംജി യൂണിവേഴ്സിറ്റി എൻഎസ്എസ് സെല്ലിന്‍റെയും സഹകരണത്തോടെ ഭവന രഹിതർക്കായി നിർമിച്ച 14 വീടുകളുടെ താക്കോൽദാനം സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. കോളജ് മാനേജർ റവ.ഡോ. കുര്യൻ താമരശേരി അധ്യക്ഷത വഹിച്ചു. സ്റ്റേറ്റ് എൻഎസ്എസ് ഓഫീസർ ഡോ.ആർ.എൻ. ആൻസൽ മുഖ്യപ്രഭാഷണം നടത്തി. എംജി യൂണിവേഴ്സിറ്റി എൻഎസ്എസ് പ്രോഗ്രാം കോഓർഡിനേറ്റർ ഡോ.ഇ.എൻ. ശിവദാസൻ മുഖ്യാതിഥിയായിരുന്നു. കെ. ചിറ്റിലപ്പിള്ളി ഫൗണ്ടേഷൻ പ്രോജക്ട് കോ ഓർഡിനേറ്റർ ഡോ. സൂസമ്മ, പ്രിൻസിപ്പൽ ഡോ. സീമോൻ തോമസ്, കോളജ് ബസാർ റവ.ഡോ. മനോജ് പാലക്കുടി, എൻഎസ്എസ് പ്രോഗ്രാം ഓഫീസർമാരായ ഡോ. ജോജി തോമസ്, ഡോ. ജിനു എലിസബത്ത് സെബാസ്റ്റ്യൻ, കെ. ചിറ്റിലപ്പിള്ളി ഫൗണ്ടേഷൻ സീനിയർ ഫിനാൻസ് ഓഫീസർ സി.ജെ. മനോജ് , വോളണ്ടിയർമാരായ അതുൽ കൃഷ്ണൻ, ഭാഗ്യലക്ഷ്മി രാജ്, ആൽബിൻ തോമസ്, ദിയ തെരേസ് ജോഷി എന്നിവർ പ്രസംഗിച്ചു.

പോലീസ് ഉദ്യോഗസ്ഥനെ കൊലപ്പെടുത്തിയ കേസിൽ കുറ്റപത്രം സമർപ്പിച്ചു

ഏറ്റുമാനൂർ: തെള്ളകത്ത് പെട്ടിക്കടയിൽ പോലീസ് ഉദ്യോഗസ്ഥനെ ചവിട്ടിക്കൊന്ന കേസിൽ ഏറ്റുമാനൂർ പോലീസ് പ്രതിക്കെതിരേ കുറ്റപത്രം കോടതിയിൽ സമർപ്പിച്ചു. എംസി റോഡിൽ തെള്ളകത്ത് ബാർ ഹോട്ടലിനു മുന്നിലെ തട്ടുകടയിൽ വച്ച് കഴിഞ്ഞ ഫെബ്രുവരി രണ്ടിന് കോട്ടയം വെസ്റ്റ് പോലീസ് സ്റ്റേഷനിലെ ഡ്രൈവർമാഞ്ഞൂർ തട്ടാംപറമ്പിൽ ശ്യാം പ്രസാദിനെ മർദിച്ചു കൊന്ന കേസിൽ പെരുമ്പായിക്കാട് ആനക്കൽ ജിബിൻ ജോർജി(28)നെതിരേയാണ് ഏറ്റുമാനൂർ കോടതിയിൽ 90 ദിവസത്തിനുള്ളിൽ കുറ്റപത്രം സമർപ്പിച്ചത്. 64 സാക്ഷി മൊഴികളും നിരവധി ശാസ്ത്രീയ തെളിവുകളും അടക്കമാണ് കുറ്റപത്രം സമർപ്പിച്ചിരിക്കുന്നത്. കോട്ടയം ജില്ലാ പോലീസ് മേധാവി ഷാഹുൽ ഹമീദ്, കോട്ടയം ഡിവൈഎസ്പി കെ.ജി. അനീഷ് എന്നിവരുടെ നിരീക്ഷണത്തിൽ അന്വേഷണ ഉദ്യോഗസ്ഥനായ ഏറ്റുമാനൂർ പോലീസ് സ്റ്റേഷൻ ഇൻസ്പെക്ടർ എ.എസ്. അൻസൽ ആണ് പ്രതിക്കെതിരേ കുറ്റപത്രം സമർപ്പിച്ചത്. ഏറ്റുമാനൂർ പോലീസ് സ്റ്റേഷൻ സബ് ഇൻസ്പെക്ടർ കെ.കെ. മനോജ്, എസ്‌സിപിഒമാരായ ജ്യോതികൃഷ്ണൻ, കെ.യു. വിനേഷ് എന്നിവർ കേസന്വേഷണത്തിൽ സഹായികളായിരുന്നു.

ലഹരിക്കെതിരേ തിരുവഞ്ചൂര്‍ രാധാകൃഷ്ണന്‍ എംഎല്‍യുടെ ഉപവാസസമരം നാളെ

കോട്ടയം: പൊതുസമൂഹത്തിന് ശാപമായി മാറിയ ലഹരിക്കെതിരേ ജനകീയ പ്രതിരോധം തീര്‍ക്കാന്‍ തിരുവഞ്ചൂര്‍ രാധാകൃഷ്ണന്‍ എംഎല്‍എയുടെ നേതൃത്വത്തില്‍ നാളെ കോട്ടയത്ത് ഉപവാസസമരം നടത്തും. രാസലഹരി അടക്കമുള്ള ലഹരി വ്യാപനത്തിനെതിരേ സര്‍ക്കാര്‍ അടിയന്തരമായി കര്‍ശന നടപടികള്‍ എടുത്തില്ലെങ്കില്‍ ലഹരിയില്‍ മുങ്ങിത്താഴുന്നവരായി തലമുറകള്‍ മാറുമെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ ചൂണ്ടിക്കാട്ടി. നാളെ രാവിലെ ഒമ്പതിനു പ്രതിപക്ഷനേതാവ് വി.ഡി. സതീശന്‍ ഉപവാസസമരം ഉദ്ഘാടനം ചെയ്യും. വൈകുന്നേരം ആറിന് കെപിസിസി പ്രസിഡന്‍റ് കെ. സുധാകരന്‍ എംപി സമാപനസമ്മേളനം ഉദ്ഘാടനം ചെയ്യും. ലഹരിമുക്ത നാടായി കേരളത്തെ മാറ്റാനുള്ള ജനകീയ പ്രതിരോധത്തിനാണ് കോട്ടയത്ത് തുടക്കം കുറിക്കുന്നതെന്ന് തിരുവഞ്ചൂര്‍ പറഞ്ഞു. രാഷ്‌ട്രീയ പാര്‍ട്ടിയുടെ പ്രവര്‍ത്തനം മാത്രമായി കാണാതെ ജനങ്ങളെ എല്ലാവരെയും ബാധിക്കുന്ന വിഷയത്തിലുള്ള ജനകീയമുന്നേറ്റമാണ് ലക്ഷ്യമിടുന്നത്. കോട്ടയത്ത് അടക്കം അടിക്കടിയുണ്ടാകുന്ന കൊലപാതകങ്ങളിലെല്ലാം ലഹരിയാണ് അടിസ്ഥാനകാരണമാകുന്നത്. ലഹരി ഉപയോഗിക്കുന്നവരെയും വിറ്റഴിക്കുന്നവരെയും പിടികൂടിയാല്‍ കുറഞ്ഞ അളവിന്‍റെ പേരില്‍ ജാമ്യത്തില്‍ വിട്ടയക്കുന്ന നിയമങ്ങളൊക്കെയും മാറ്റേണ്ടിയിരിക്കുന്നു. ഇത്തരക്കാര്‍ക്കെതിരേ കര്‍ശനനടപടികളാണ് ലഹരി ഉപയോഗം തടയാന്‍ വേണ്ടത്. പണസമ്പാദനത്തിനുള്ള കുറുക്കുവഴിയായി ലഹരി വില്‍പ്പന മാറിയിരിക്കുന്നത് സമൂഹത്തിന് ആപത്താണ്. യൂണിവേഴ്സിറ്റി കോളജില്‍ നിന്നടക്കം കഞ്ചാവും ലഹരി വസ്തുക്കളും പടികൂടിയതടക്കം വേദനിപ്പിക്കുന്ന വാര്‍ത്തകളാണ് പുറത്തുവരുന്നത്. ലഹരി വ്യാപനം നേരിടാന്‍ അപാകതകള്‍ പരിഹരിച്ച് ആവശ്യമായ രീതിയില്‍ നിയമങ്ങള്‍ കാലോചിതമായി പരിഷ്‌ക്കരിക്കണമെന്ന് തിരുവഞ്ചൂര്‍ ആവശ്യപ്പെട്ടു. ലഹരിക്കെതിരായ പോരാട്ടത്തിന് ഊര്‍ജം പകരാന്‍ ചിറ്റൂര്‍ ഗോപി രചിച്ച് സാജന്‍ കോട്ടയം ഈണം പകര്‍ന്ന് മധു ബാലകൃഷ്ണന്‍ ആലപിച്ച ഗാനം ചലച്ചിത്ര നിര്‍മാതാവും നടനുമായ പ്രേംപ്രകാശ് നാടിന് സമര്‍പ്പിച്ചു. പത്രസമ്മേളനത്തില്‍ ഡിസിസി പ്രസിഡന്‍റ് നാട്ടകം സുരേഷ്, യുഡിഎഫ് കണ്‍വീനര്‍ ഫില്‍സണ്‍ മാത്യൂസ്, മോഹന്‍ കെ. നായര്‍ തുടങ്ങിയവരും പങ്കെടുത്തു. ഉപവാസസമരത്തില്‍ പങ്കെടുക്കുന്ന പ്രമുഖര്‍ ആര്‍ച്ച്ബിഷപ് മാര്‍ മാത്യു മൂലക്കാട്ട്, ബിഷപ് ഡോ. സെബാസ്റ്റ്യന്‍ തെക്കത്തെച്ചേരില്‍, ബിഷപ് റവ. മലയില്‍ സാബു കോശി ചെറിയാന്‍, ഡോ. ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്ത, യാക്കോബായ സുറിയാനി സഭ എപ്പിസ്‌കോപ്പല്‍ സുന്നഹദോസ് സെക്രട്ടറി ഡോ. തോമസ് മാര്‍ തീമോത്തിയോസ് മെത്രാപ്പോലീത്ത, കുര്യാക്കോസ് മാര്‍ സേവേറിയോസ് വലിയ മെത്രാപ്പോലീത്ത, ജോസഫ് മാര്‍ ദിവന്ന്യാസിയോസ് മെത്രാപ്പോലീത്ത, സ്വാമി ഗുരുരത്‌നം ജ്ഞാനതപസി, സ്വാമി ശ്രീനാരായണ പ്രസാദ്, ഗരുഡധ്വജാനന്ദ സ്വാമികള്‍ പരമാനന്ദ തീര്‍ഥ സ്വാമികള്‍, സൂര്യന്‍ ജയസൂര്യന്‍ ഭട്ടതിരിപ്പാട്, താഹാ മൗലവി, മുഹമ്മദ് ഷെഫീക്ക് മൗലവി, നിഷാദ് മൗലവി, സാദിക്ക് മൗലവി, ഹരികുമാര്‍ കോയിക്കല്‍, നാരായണവര്‍മ തമ്പുരാന്‍, ബിജു ഉമ്മന്‍, സിസ്റ്റര്‍ ജോവാന്‍ ചുങ്കപ്പുര തുടങ്ങിയര്‍ വിവിധസമയങ്ങളില്‍ പ്രസംഗിക്കും.

ദീപിക ബാലസഖ്യം ജീവിതദർശന-നേതൃത്വ പരിശീലന ക്യാന്പിനു തുടക്കമായി

കാഞ്ഞിരപ്പള്ളി: ദീപിക ബാലസഖ്യം (ഡിസിഎൽ) കോട്ടയം പ്രവിശ്യ സംഘടിപ്പിക്കുന്ന പെറ്റ്സ് - 2025 ദ്വിദിന ജീവിതദർശന - നേതൃത്വ പരിശീലന ക്യാന്പിന് പൊടിമറ്റം നിർമല റിന്യൂവൽ സെന്‍ററിൽ തുടക്കമായി. കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ ഉദ്ഘാടനം ചെയ്തു. രാഷ്‌ട്രദീപിക ലിമിറ്റഡ് ഡയറക്ടർ ഷെവ.അഡ്വ. വി.സി. സെബാസ്റ്റ്യൻ അധ്യക്ഷത വഹിച്ചു. രാഷ്‌ട്രദീപിക ലിമിറ്റഡ് മാനേജിംഗ് ഡയറക്ടർ ഫാ. മൈക്കിൾ വെട്ടിക്കാട്ട് മുഖ്യപ്രഭാഷണവും ഡിസിഎൽ കൊച്ചേട്ടൻ ഫാ. റോയി കണ്ണൻചിറ സിഎംഐ ആമുഖസന്ദേശവും നൽകി. കോട്ടയം നർക്കോട്ടിക് സെൽ ഡിവൈഎസ്പി ടി.ജെ. തോമസ്, ഡിസിഎൽ നാഷണൽ കോ ഓർഡിനേറ്റർ വർഗീസ് കൊച്ചുകുന്നേൽ എന്നിവർ പ്രസംഗിച്ചു. സിവിൽ സർവീസ് പരീക്ഷയിൽ 54ാം റാങ്ക് നേടിയ സോനറ്റ് ജോസ് കുട്ടികളുമായി സംവദിച്ചു. ഇന്നു നടക്കുന്ന സമാപന സമ്മേളനം കാഞ്ഞിരപ്പള്ളി രൂപത വികാരി ജനറാളും രാഷ്‌ട്രദീപിക ലിമിറ്റഡ് ഡയറക്ടറുമായ ഫാ. ബോബി അലക്സ് മണ്ണംപ്ലാക്കൽ ഉദ്ഘാടനം ചെയ്യും.

മുഖ്യമന്ത്രി ഇന്ന് കോട്ടയത്ത്

കോട്ടയം: എല്‍ഡിഎഫ് സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ചു മുഖ്യമന്ത്രി പിണറായി വിജയന്‍ ഇന്ന് ജില്ലയിലെത്തും. ജില്ലയിലെ പൗരപ്രമുഖരുമായുള്ള മുഖാമുഖവും എല്‍ഡിഎഫ് സംഘടിപ്പിക്കുന്ന മഹായോഗവും മുഖ്യമന്ത്രി ഉദ്ഘാടനം ചെയ്യും. രാവിലെ 10.30ന് കോടിമത ആന്‍സ് കണ്‍വന്‍ഷന്‍ സെന്‍ററില്‍ നാനാതുറകളില്‍പ്പെട്ടവരുമായി മുഖ്യമന്ത്രിയുടെ മുഖാമുഖം പരിപാടി നടക്കും. സര്‍ക്കാര്‍ സേവനങ്ങളുടെ ഗുണഭോക്താക്കളുടെ പ്രതിനിധികള്‍, ട്രേഡ് യൂണിയന്‍-തൊഴിലാളി പ്രതിനിധികള്‍, യുവജനങ്ങള്‍, വിദ്യാര്‍ഥികള്‍, സാംസ്‌കാരിക-കായിക രംഗത്തെ പ്രതിഭകള്‍, പ്രഫഷണലുകള്‍, ഡോക്ടര്‍മാര്‍, എന്‍ജിനിയര്‍മാര്‍, അഭിഭാഷകര്‍, അധ്യാപകര്‍, വ്യവസായികള്‍, പ്രവാസികള്‍, പ്രശസ്ത വ്യക്തികള്‍, പൗരപ്രമുഖര്‍, സാമുദായിക നേതാക്കള്‍, കര്‍ഷകത്തൊഴിലാളികള്‍, കര്‍ഷകര്‍ തുടങ്ങി വിവിധ മേഖലയില്‍നിന്നുള്ള അഞ്ഞൂറിലധികം പേര്‍ മുഖാമുഖത്തില്‍ പങ്കെടുക്കും. വൈകുന്നേരം നാലിനാണ് എല്‍ഡിഎഫിന്‍റെ നേതൃത്വത്തില്‍ മഹായോഗം. കോട്ടയം നെഹ്‌റു സ്റ്റേഡിയത്തില്‍ പ്രത്യേകം തയാറാക്കിയ വേദിയില്‍ എല്‍ഡിഎഫ് മഹായോഗം നടക്കും. മുഖ്യമന്ത്രി പിണറായി വിജയന്‍ യോഗം ഉദ്ഘാടനം ചെയ്യും. മന്ത്രി വി.എന്‍. വാസവന്‍, ജോസ് കെ. മാണി എംപി, മന്ത്രിമാരായ റോഷി അഗസ്റ്റിന്‍, ജി.ആര്‍. അനില്‍, എ.കെ. ശശീന്ദ്രന്‍, എല്‍എഡിഎഫ് നേതാക്കളായ ജേക്കബ് ഉമ്മന്‍, ടി.വി. വര്‍ഗീസ്, സണ്ണി തോമസ്, പ്രശാന്ത് നന്ദകുമാര്‍, പി.സി. ജോസഫ്, കാസിം ഇരിക്കൂര്‍, ബിനോയ് ജോസഫ്, ജില്ലയിലെ എല്‍ഡിഎഫ് എംഎല്‍എമാര്‍ എന്നിവര്‍ പങ്കെടുക്കും. സമ്മേളനത്തോടനുബന്ധിച്ചുള്ള പൊതുപ്രകടനം ഒഴിവാക്കി. ജില്ലയിലെ വിവിധ ഏരിയാകളില്‍നിന്ന് അരലക്ഷം പ്രവര്‍ത്തകര്‍ എല്‍ഡിഎഫ് മഹാസംഹമത്തില്‍ പങ്കെടുക്കും. സമ്മേളനത്തിനു മുന്നോടിയായി മൂന്നിനു പ്രസീത ചാലക്കുടിയുടെ നാടന്‍പാട്ട് നടക്കും. പ്രളയക്കെടുതി അനുഭവിച്ച കൂട്ടിക്കലിലടക്കം അവരെ പുനരധിവസിപ്പിക്കുന്നതിനും സര്‍ക്കാര്‍ മികവാര്‍ന്ന പ്രവര്‍ത്തനങ്ങള്‍ നടത്തി. കേന്ദ്ര ഗവ. വില്‍ക്കാന്‍ ശ്രമിച്ച എച്ച്എന്‍എല്‍ ഏറ്റെടുത്ത് കെപിപിഎല്‍ എന്ന പേരില്‍ പൊതുമേഖലയില്‍ ഒരു സ്ഥാപനംകൂടി ജില്ലയില്‍ പ്രവര്‍ത്തനം ആരംഭിക്കുവാൻ കഴിഞ്ഞു. എല്ലാ നിയോജക മണ്ഡലങ്ങളിലും മികച്ച വികസന പ്രവര്‍ത്തനങ്ങള്‍ നടത്താനായ അഭിമാനകരമായ കാലയളവിലാണ് സര്‍ക്കാരിന്‍റെ നാലാം വാര്‍ഷികം വിപുലമായി സംഘടിപ്പിക്കുന്നതെന്ന് എല്‍ഡിഎഫ് നേതാക്കള്‍ പത്രസമ്മേളനത്തില്‍ പറഞ്ഞു. എല്‍ഡിഎഫ് നേതാക്കളായ ജില്ലാ കണ്‍വീനര്‍ ലോപ്പസ് മാത്യു, സിപിഎം ജില്ലാ സെക്രട്ടറി ടി.ആര്‍. രഘുനാഥന്‍, സിപിഐ ജില്ലാസെക്രട്ടറി വി.ബി. ബിനു, നേതാക്കളായ രാജീവ് നെല്ലിക്കുന്നേല്‍, ബെന്നി മൈലാടൂര്‍, ജിയാഷ് കരീം എന്നിവര്‍ പങ്കെടുത്തു. എന്‍റെ കേരളം പ്രദര്‍ശനവിപണന മേള നാളെ സമാപിക്കും കോട്ടയം: നാഗമ്പടത്ത് നടക്കുന്ന എന്‍റെ കേരളം പ്രദര്‍ശന വിപണനമേള നാളെ സമാപിക്കും. നിരവധി വിപണന സ്റ്റാളുകള്‍, ഭക്ഷ്യമേള, എല്ലാ വിഭാഗം ആളുകളെയും ആകര്‍ഷിച്ച കലാപരിപാടികള്‍, സമകാലിക വിഷയങ്ങള്‍ ചര്‍ച്ചയ്ക്കെടുത്ത സംഗമങ്ങള്‍ എന്നിവ അണിനിരത്തിയ മേള ജനപങ്കാളിത്തത്താല്‍ ശ്രദ്ധേയമാണ്. രാവിലെ 9.30 മുതല്‍ രാത്രി 9.30 വരെയാണ് മേള. പ്രവേശനം സൗജന്യമാണ്. 69,000 ചതുരശ്ര അടിയില്‍ വിപുലമായ പന്തലാണ് ഒരുക്കിയിരിക്കുന്നത്. ഇന്നു രാത്രി 6.30ന് വൈക്കം മാളവിക അവതരിപ്പിക്കുന്ന നാടകവും നാളെ വൈകുന്നേരം അഞ്ചിനു നാടന്‍പാട്ടും ദൃശ്യാവിഷ്‌കാരവും നടക്കും. 7.30ന് ലൈവ് മ്യൂസിക് ഷോയോടെ മേളയ്ക്കു കൊടിയിറങ്ങും. കുട്ടിപ്പട്ടാളത്തിന്‍റെ മനം കവര്‍ന്ന് ചോക്ലേറ്റ് കോട്ടയം: ചോക്ലേറ്റ് ഉണ്ടാക്കുന്നത് കാണാനും വാങ്ങാനും എന്‍റെ കേരളം പ്രദര്‍ശന വിപണനമേളയില്‍ അവസരം. കാര്‍ഷിക വികസന കര്‍ഷകക്ഷേമ വകുപ്പിനു കീഴില്‍ മണിമല ആസ്ഥാനമായി പ്രവര്‍ത്തിക്കുന്ന ബ്രൗണ്‍ ഗോള്‍ഡ് കൊക്കോ പ്രൊഡ്യൂസര്‍ കമ്പനിയുടെ ബെല്‍ മൗണ്ട് ചോക്ലേറ്റാണ് ഇവിടുത്തെ താരം. മേളയില്‍ എത്തുന്ന കുട്ടികളുടെ ഇഷ്ടവിഭവമായി മാറിയിരിക്കുകയാണ് കൊക്കോ ചോക്ലേറ്റും ഐസ്‌ക്രീമും. കൊക്കോയില്‍നിന്ന് ചോക്ലേറ്റ് ഉത്പാദിപ്പിക്കുന്നത് എങ്ങനെയെന്ന് ഇവിടെനിന്ന് മനസിലാക്കാം. അതോടൊപ്പം വിവിധ രുചിഭേദങ്ങളിലുള്ള ഐസ്‌ക്രീമുകളും കൊക്കോ പാനീയവും കോക്കോ ബട്ടറും ലഭ്യമാണ്. പ്രകൃതിദത്തവിഭവങ്ങളായ കോക്കോയുടെ തോട്, ചിരട്ട, പൈനാപ്പിള്‍ എന്നിവയിലാണ് ഐസ്‌ക്രീമുകള്‍ നിറച്ചിരിക്കുന്നത്. വാഴൂര്‍ ബ്ലോക്കിനു കീഴില്‍ പ്രവര്‍ത്തിക്കുന്ന ഈ സ്ഥാപനം കര്‍ഷകര്‍ക്ക് കൊക്കോ തൈകള്‍ വിതരണം ചെയ്യുകയും അവരില്‍നിന്ന് കൊക്കോ വാങ്ങുകയും ചെയ്യും.

കല്ലറ സെന്‍റ് തോമസ് ക്നാനായ പള്ളിയുടെ 125-ാം വാർഷികാഘോഷങ്ങൾക്ക് സമാപനം

കല്ലറ: സെന്‍റ് തോമസ് ക്നാനായ പള്ളിയുടെ 125-ാം വാർഷികാഘോഷങ്ങളുടെ സമാപന സമ്മേളനം നടത്തി. ഇന്നലെ വൈകുന്നേരം 4.45ന് നടന്ന ജൂബിലി സമാപന പൊന്തിഫിക്കൽ വിശുദ്ധ കുർബാനയ്ക്ക് കോട്ടയം ആർച്ച്ബിഷപ് മാർ മാത്യു മൂലക്കാട്ട് മുഖ്യകാർമികത്വം വഹിച്ചു. ഇടവകയിലെയും ഫൊറോനയിലെയും വൈദികരും മുൻ വൈദികരും സഹകാർമികരായി. വൈകുന്നേരം 6.30ന് നടന്ന ജൂബിലി സമാപന സമ്മേളനം മന്ത്രി പി. പ്രസാദ് ഉദ്ഘാടനം ചെയ്തു. ആർച്ച്ബിഷപ് മാർ മാത്യു മൂലക്കാട്ട് അധ്യക്ഷത വഹിച്ചു. വികാരി ഫാ. സ്റ്റീഫൻ കണ്ടാരപ്പള്ളി, മോൻസ് ജോസഫ് എംഎൽഎ, കല്ലറ പഞ്ചായത്ത് പ്രസിഡന്‍റ് ജോണി തോട്ടുങ്കൽ, ജൂബിലി കൺവീനർ സജി കളരിക്കൽ എന്നിവർ പ്രസംഗിച്ചു. തുടർന്ന് സ്നേഹവിരുന്നും നടത്തപ്പെട്ടു.

ശബരി എയര്‍പോര്‍ട്ട്: സ്ഥലം അളന്നുതിരിക്കല്‍ ആറു മാസത്തിനുള്ളില്‍

കോട്ടയം: എരുമേലി ശബരി ഗ്രീന്‍ഫീല്‍ഡ് വിമാനത്താവളം നിര്‍മാണത്തിന് ഭൂമി ഏറ്റെടുക്കുന്നതിനുള്ള വിജ്ഞാപനം വന്നതിനു പിന്നാലെ സര്‍ക്കാര്‍ ഗസറ്റ് പ്രകാരമുള്ള ഔദ്യോഗിക വിവരങ്ങള്‍ അറിയിക്കാന്‍ പത്രങ്ങളില്‍ പരസ്യം നല്‍കും. സ്ഥലം ഏറ്റെടുക്കേണ്ടിവരുന്ന വ്യക്തികള്‍, ട്രസ്റ്റ്, സ്ഥലവിസ്തൃതി, അതിര് തുടങ്ങി എല്ലാ വിവരങ്ങളും പ്രസിദ്ധീകരിക്കും. കാഞ്ഞിരപ്പള്ളി താലൂക്കിലെ എരുമേലി സൗത്ത്, മണിമല വില്ലേജുകളിലായി 2,569 ഏക്കര്‍ (1039.876 ഹെക്ടര്‍) ഭൂമിയാണ് ഏറ്റെടുക്കപ്പെടുന്നത്. പത്രപരസ്യം നല്‍കുന്നതിനു പിന്നാലെ ബന്ധപ്പെട്ട എല്ലാ വ്യക്തികള്‍ക്കും 2013-ലെ ഭൂമി ഏറ്റെടുക്കല്‍ നിയമപ്രകാരം രേഖാമൂലം റവന്യു അധികൃതര്‍ നേരിട്ട് അറിയിപ്പ് നല്‍കും. പരസ്യത്തീയതി മുതല്‍ 15 ദിവസത്തിനുള്ളില്‍ ആക്ഷേപമുള്ളവര്‍ക്ക് വിവരം അറിയിക്കാം. ഏറ്റെടുക്കുന്ന ഭൂമിയുടെ പൊതു ആവശ്യത്തില്‍ പറഞ്ഞിട്ടുള്ള ന്യായീകരണത്തെയും സാമൂഹ്യ പ്രത്യാഘാത റിപ്പോര്‍ട്ടിലെ കണ്ടെത്തലുകളെയും സംബന്ധിച്ച ആക്ഷേപം ഉണ്ടെങ്കില്‍ 60 ദിവസത്തിനുള്ളില്‍ രേഖാമൂലം കോട്ടയം മിനി സിവില്‍ സ്റ്റേഷനിലെ സ്‌പെഷല്‍ തഹസില്‍ദാരെ (എല്‍എ-ജനറല്‍) അറിയിക്കാം. എരുമേലി തെക്ക് വില്ലേജിലെ സര്‍വേ 282ലെ 811 ഹെക്ടറും സര്‍വേ 281ലെ 42.58 ഹെക്ടറും മണിമല വില്ലേജിലെ 60.43 ഹെക്ടറും ബിലീവേഴ്‌സ് ചര്‍ച്ചിനു കീഴിലുള്ള ഗോസ്പല്‍ ഫോര്‍ ഏഷ്യയുടെ കൈവശമുള്ള ഭൂമിയാണ്. എരുമേലി സൗത്ത് വില്ലേജിലെ 1.83 ഹെക്ടര്‍ ഭൂമി മലയാളം പ്ലാന്‍റേഷന്‍റെ കൈവശമുള്ളതാണ്. ഇതു സംബന്ധിച്ച നിയമവ്യവഹാരം പാലാ സബ് കോടതിയില്‍ നടന്നുവരികയാണ്. ഇതു കൂടാതെ സ്ഥലം ഏറ്റെടുക്കേണ്ടത് എരുമേലി, മണിമല പഞ്ചായത്ത് പരിധിയിലെ 352 കുടുംബങ്ങളുടെതാണ്. ഇതില്‍ ചെറുവള്ളി എസ്റ്റേറ്റിലെ ലയങ്ങളില്‍ താമസിക്കുന്നവരുമുണ്ട്. സ്ഥലം ഏറ്റെടുക്കുന്നവരുടെ ആധാരവും കരമടച്ച രസീതും അടിസ്ഥാനമാക്കി റീ സര്‍വേ നടത്തി ആറു മാസത്തിനുള്ളില്‍ അളന്നുതിരിക്കും. തുടര്‍ന്നു കെട്ടിടം, ഭൂമി, മറ്റ് വസ്തുക്കള്‍ എന്നിവയുടെ വില നിശ്ചയിച്ച് നഷ്ടപരിഹാരം ശിപാര്‍ശ ചെയ്യും. 2013 ഭൂമി ഏറ്റെടുക്കല്‍ നിയമവും 2015ലെ ചട്ടവും അനുസരിച്ചുള്ള നഷ്ടപരിഹാരം ഉടമകള്‍ക്ക് നല്‍കും. ഉടമസ്ഥതാവകാശം സംബന്ധിച്ച് കേസ് നിലവിലുള്ളതിനാല്‍ ബിലീവേഴ്‌സ് ചര്‍ച്ചിനു കീഴിലുള്ള ചെറുവള്ളി എസ്റ്റേറ്റിന് അര്‍ഹമായ നഷ്ടപരിഹാരം കോടതിയിൽ‍ കെട്ടിവയ്ക്കും. ആഭ്യന്തരം, റവന്യു, വനം, ധനകാര്യം, സാമൂഹികക്ഷേമം തുടങ്ങിയ വകുപ്പുകളുടെ കൂട്ടായ ആലോചകള്‍ക്കുശേഷമാണ് സ്ഥലം ഏറ്റെടുക്കല്‍ വിജ്ഞാപനം വന്നിരിക്കുന്നത്. പുനലൂര്‍-മൂവാറ്റുപുഴ ഹൈവേയോടു ചേര്‍ന്നാണ് ശബരി എയര്‍പോര്‍ട്ട് നിര്‍മിക്കുന്നത്. എരുമേലി ടൗണില്‍നിന്ന് മൂന്നു കിലോമീറ്ററും പമ്പയില്‍നിന്ന് 50 കിലോമീറ്ററും കോട്ടയത്തുനിന്ന് 42 കിലോമീറ്ററുമാണ് എയര്‍പോര്‍ട്ടിലേക്കുള്ള ദൂരം.

സെന്‍റ് ആന്‍റണീസിൽ നാഷണൽ സൈബർ ഫോറൻസിക് ആൻഡ് സൈബര്‍ സെക്യൂരിറ്റി ഗവേഷണ കേന്ദ്രം

പെരുവന്താനം: സെന്‍റ ആന്‍റണീസ് കോളജില്‍ നാഷണൽ സൈബർ സെക്യൂരിറ്റി സ്റ്റാന്‍ഡേര്‍ഡ്സിന്‍റെ കീഴില്‍ ഗവേഷണ കേന്ദ്രം അനുവദിച്ചു. രാജ്യത്താകമാനം സൈബർ സാമ്പത്തിക തട്ടിപ്പുകൾ വ്യാപകമാകുന്ന സാഹചര്യത്തില്‍ വിദഗ്ധരുടെ മേല്‍നോട്ടത്തിൽ ഗവേഷണങ്ങൾ നടത്തുന്നതിനാണ് ഗവേഷണ കേന്ദ്രം അനുവദിച്ചത്. കാർഷിക പിന്നോക്ക ജില്ലയായ ഇടുക്കിയിൽ ഇത്തരത്തിൽ ഒരു ഗവേഷണ കേന്ദ്രം ആരംഭിക്കുന്ന ആദ്യ കോളജാണ് പെരുവന്താനം സെന്‍റ് ആന്‍റണീസ്. നിലവിൽ സൈബര്‍ ഫോറന്‍സിക്കിന് മികച്ച പ്ലേസ്മെന്‍റോടു കൂടിയ ബിരുദ പ്രോഗ്രാമുകൾ ഉണ്ടായിരിക്കെ പുതിയ ഗവേഷണ കേന്ദ്രം വഴി ആഗോള തലത്തിലുള്ള ജോലി സാധ്യതകൾ ഉപയോഗപ്പെടുത്തുവാൻ സാധിക്കുമെന്ന് ഗവേഷണ കേന്ദ്രം ഡയറക്ടർ പി.കെ. സുഭാഷ് ബാബു, കോളജ് ചെയർമാൻ ബെന്നി തോമസ്‌, പ്രിന്‍സിപ്പല്‍ ഡോ. ആന്‍റണി ജോസഫ് കല്ലമ്പള്ളി, സെന്‍റര്‍ കോഓർഡിനേറ്റർ സുപർണ രാജു എന്നിവര്‍ അറിയിച്ചു. അടുത്തമാസം ഗവേഷണകേന്ദ്രം ഔപചാരികമായി ഉദ്ഘാടനം ചെയ്ത് പ്രവർത്തനം ആരംഭിക്കുമെന്ന് കോളജ് അധികാരികൾ അറിയിച്ചു.

എരുമേലി സബ് രജിസ്ട്രാർ ഓഫീസിലെ ദുരവസ്ഥ ഇനിയും തുടരും

എരുമേലി: സംസ്ഥാനത്തെ ഒട്ടുമിക്ക സർക്കാർ ഓഫീസുകളും ഭിന്നശേഷി സൗഹൃദമാക്കി ക്രമീകരിച്ചിട്ടും എരുമേലി സബ് രജിസ്ട്രാർ ഓഫീസിൽ ഇതിനു സാധിച്ചിട്ടില്ല. ഓഫീസ് ഇവിടെ പ്രവർത്തനം ആരംഭിച്ചത് തന്നെ രണ്ടാം നിലയിലാണ്. പ്രായമായവരെയും ഭിന്നശേഷിക്കാരെയും പരിഗണിക്കാതെയാണ് ഓഫീസ് പ്രവർത്തനം തുടങ്ങിയത്. ഇതിനു പരിഹാരമായി സബ് രജിസ്ട്രാറിനുമാത്രം താഴെ ഒരു മുറി നൽകുമെന്നു പഞ്ചായത്ത്‌ അധികൃതർ അറിയിച്ചിരുന്നു. എന്നാൽ ഒരു നടപടിയുമുണ്ടായില്ല. ആധാരം രജിസ്റ്റര്‍ ചെയ്യുന്നതടക്കം വിവിധ സർട്ടിഫിക്കറ്റുകൾക്കും മറ്റ് ആവശ്യങ്ങള്‍ക്കുമായി നിരവധി പേരാണ് ദിവസവും ഓഫീസിൽ എത്തുന്നത്. ഇവരിൽ ഏറെ പേരും പ്രായം ചെന്നവരാണ്. ഒട്ടേറെ ശാരീരിക വിഷമതകളും രോഗങ്ങളും ഉള്ള പ്രായമായവർക്കു പടിക്കെട്ടുകൾ കയറാൻ പ്രയാസമാണ്. രക്തസമ്മർദം, പ്രമേഹം ഉൾപ്പെടെ രോഗങ്ങൾ ഉള്ളവർ മുകളിലേക്കുള്ള പടിക്കെട്ടുകൾ ഏറെ ആയാസത്തോടെയാണ് കയറുക. ഒപ്പം തിരികെ പടിക്കെട്ടുകൾ ഇറങ്ങുമ്പോഴും ക്ലേശവും തളർച്ചയും ക്ഷീണവും നേരിടുന്നു. ഇത് പലപ്പോഴും ശാരീരിക അവസ്ഥയെ അപകടകരമാക്കുന്ന സ്ഥിതിയിലേക്ക് എത്താറുണ്ട്. ഭിന്നശേഷിക്കാർക്കു രണ്ടാം നിലയിലേക്കുള്ള പടിക്കെട്ടുകൾ കയറാനും ഇറങ്ങാനും ആരെങ്കിലും സഹായിച്ചാലാണ് സാധ്യമാവുക. പലപ്പോഴും സബ് രജിസ്ട്രാർ താഴേക്ക് ഇറങ്ങി വന്ന് ഫയൽ നൽകി പ്രായമായവരുടെയും ഭിന്നശേഷിക്കാരുടെയും അരികിൽ എത്തി ഒപ്പ് വാങ്ങേണ്ട സ്ഥിതിയാണ്. ഇതിനായി ഏറെ സമയം കാത്തുനിൽക്കേണ്ടി വരാറുമുണ്ട്. സബ് രജിസ്ട്രാര്‍ ഓഫീസ് ഭിന്നശേഷി സൗഹൃദമാക്കാന്‍ അടിയന്തര നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെടുന്നു.

സിപിഐ മാടപ്പള്ളി ലോക്കല്‍ സമ്മേളനം

മാടപ്പള്ളി: സിപിഐ ലോക്കല്‍ സമ്മേളനം ആരംഭിച്ചു. പെരുമ്പനച്ചിയില്‍നിന്നു തെങ്ങണയിലേക്ക് നടന്ന പ്രകടനത്തിന് മണ്ഡലം കമ്മിറ്റി അംഗങ്ങളായ രാജു പൂമറ്റം, ശാന്തമ്മ ഷാജി, റെജി ജോസഫ്, പി.ആര്‍. സുനില്‍, പി.എ. ബാബു, തങ്കമ്മ ശശിധര മേനോന്‍, സുജാത സാബു എന്നിവര്‍ നേതൃത്വം നല്‍കി. പ്രകടനത്തിന് ശേഷം തെങ്ങണയില്‍ നടന്ന പൊതുസമ്മേളനം സിപിഐ സംസ്ഥാന എക്‌സിക്യൂട്ടീവ് അംഗം സി.കെ. ശശിധരന്‍ ഉദ്ഘാടനം ചെയ്തു. സംഘാടകസമിതി ചെയര്‍മാന്‍ ആര്‍. സലിംകുമാര്‍ അധ്യക്ഷത വഹിച്ചു. സമ്മേളനത്തില്‍ പരീക്ഷകളില്‍ ഉന്നത വിജയം കരസ്ഥമാക്കിയ ഡോക്ടര്‍ അക്ഷയ് രഘുദാസ്, നീതുമോള്‍ ജോസഫ് എന്നിവരെ അനുമോദിച്ചു. ജില്ലാ എക്‌സിക്യൂട്ടീവ്അംഗം കെ. മാധവന്‍ പിള്ള, മണ്ഡലം സെക്രട്ടറി എം.ആര്‍. രഘുദാസ്, ജി. രാധാകൃഷ്ണന്‍, പി.എസ്. രാജേഷ് എന്നിവര്‍ പ്രസംഗിച്ചു.

ഇത്തിത്താനം ആയുഷ്യ റൂബി ജൂബിലി ആഘോഷം നാളെ

ചങ്ങനാശേരി: മെഡിക്കല്‍ മിഷന്‍ സിസ്‌റ്റേഴ്‌സിന്‍റെ നേതൃത്വത്തില്‍ 1985ല്‍ സ്ഥാപിതമായ ഇത്തിത്താനം ആയുഷ്യ ഹീലിംഗ് ആൻഡ് ഇന്‍റഗ്രേഷന്‍ സെന്‍ററിന്‍റെ റൂബി ജൂബിലി ആഘോഷം നാളെ ഉച്ചകഴിഞ്ഞ് മൂന്നിനു നടക്കും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. കൊടിക്കുന്നില്‍ സുരേഷ് എംപി ഉദ്ഘാടനം ചെയ്യും. ജോബ് മൈക്കിള്‍ എംഎല്‍എ, ഡോ. സി. തോമസ് ഏബ്രഹാം എന്നിവര്‍ മുഖ്യപ്രഭാഷണങ്ങള്‍ നടത്തും. ഇത്തിത്താനം പള്ളി വികാരി ഫാ. ഫ്രാന്‍സിസ് പുല്ലുകാട്ട്, വാഴപ്പള്ളി പഞ്ചായത്ത് പ്രസിഡന്‍റ് മിനി വിജയകുമാര്‍, ബ്ലോക്ക് പഞ്ചായത്തംഗം വര്‍ഗീസ് ആന്‍റണി, ചങ്ങനാശേരി അര്‍ബന്‍ബാങ്ക് പ്രസിഡന്‍റ് അഡ്വ. ജോസഫ് ഫിലിപ്പ്, ഡോ.പി.സി. അനിയന്‍കുഞ്ഞ്, ഡോ. എലൈസ കുപ്പോഴക്കല്‍, സിസ്റ്റര്‍ സെലിന്‍ പറമുണ്ടയില്‍, ഡോ. സിസ്റ്റര്‍ ജോവാന്‍ ചുങ്കപ്പുര, സിസ്റ്റര്‍ മോളി വടക്കന്‍, ബീന ബിജു, സിസ്റ്റര്‍ ത്രേസ്യ പൗലോസ്, സിസ്റ്റര്‍ മേരിക്കുട്ടി കിണറ്റുകര എന്നിവര്‍ പ്രസംഗിക്കും.

പാറപ്പാടം ക്ഷേത്രത്തില്‍ മോഷണം: 26 തൂക്കുവിളക്കുകൾ കവർന്നു

കോട്ടയം: പാറപ്പാടം ദേവീക്ഷേത്രത്തില്‍ മോഷണം. ക്ഷേത്രത്തിന്‍റെ ചുറ്റുമതിലിനുള്ളില്‍ സൂക്ഷിച്ചിരുന്ന തൂക്കുവിളക്കുകള്‍ മോഷണം പോയി. 47 വിളക്കുകളിൽ 26 എണ്ണമാണ് കവർന്നത്. ശേഷിച്ച 21 വി‍ളക്കുകൾ അഴിച്ചുവച്ചെങ്കിലും മോഷ്ടാവിന് കൊണ്ടുപോകാൻ കഴിഞ്ഞില്ല. ഇന്നലെ പുലര്‍ച്ചെ രണ്ടോടെയാണു മോഷണം നടന്നത്. അര്‍ധരാത്രിയില്‍ ക്ഷേത്രത്തിനുള്ളില്‍ അസ്വാഭാവികമായ ശബ്ദം കേട്ട് ഉണര്‍ന്ന അയല്‍വാസിയാണ് മോഷണം നടക്കുന്നത് കണ്ടത്. തുടര്‍ന്ന് ഇയാള്‍ വിവരം പോലീസില്‍ അറിയിച്ചു. കണ്‍ട്രോള്‍ റൂം പോലീസ് സംഘം സ്ഥലത്ത് എത്തിയപ്പോഴേക്കും മോഷ്ടാവ് രക്ഷപ്പെട്ടു.

കുറുമ്പനാടം ഫൊറോന പള്ളിയില്‍ തിരുനാള്‍

കുറുമ്പനാടം: കുറുമ്പനാടം സെന്‍റ് ആന്‍റണീസ് ഫൊറോന പള്ളിയില്‍ വിശുദ്ധ അന്തോനീസിന്‍റെ തിരുനാള്‍ ആഘോഷങ്ങള്‍ക്കു തുടക്കമായി. മൂന്നുവരെ തീയതികളില്‍ രാവിലെ ആറിനും വൈകുന്നേരം അഞ്ചിനും വിശുദ്ധകുര്‍ബാന, മധ്യസ്ഥപ്രാര്‍ഥന. മേയ് ഒന്നിന് രാവിലെ ആറിന് വികാരി റവ.ഡോ. ചെറിയാന്‍ കറുകപ്പറമ്പില്‍ കൊടിയേറ്റ് കര്‍മം നിര്‍വഹിക്കും. വിവിധ ദിവസങ്ങളില്‍ ഫാ. ആന്‍റണി ആനക്കല്ലുങ്കല്‍, ഫാ. ജയിംസ് അത്തിക്കളം, ഫാ. മാത്യു വടക്കേറ്റത്ത്, ഫാ. ജോസഫ് പാറത്താനം എന്നിവര്‍ വിശുദ്ധ കുര്‍ബാന അര്‍പ്പിക്കും. ചെത്തിപ്പുഴയില്‍ നടക്കുന്ന ഫിയാത്തുമിഷന്‍ സംഗമത്തിനെത്തുന്ന മിഷനറി മെത്രാന്മാര്‍ക്ക് മേയ് രണ്ടിന് വൈകുന്നേരം അഞ്ചിന് സ്വീകരണം. ബിഷപ് റവ. ഡോ. ചാക്കോ തോട്ടുമാരിക്കല്‍ വിശുദ്ധകുര്‍ബാന അര്‍പ്പിക്കും. പ്രധാനതിരുനാള്‍ദിനമായ നാലിന് രാവിലെ 5.30നും 7.30നും വിശുദ്ധ കുര്‍ബാന. രാവിലെ 9.30ന് ഫാ. തോമസ് പാറത്താനവും വൈകുന്നേരം 4.30ന് ഫാ. ഫിലിപ്പോസ് കേഴപ്ലാക്കലും വിശുദ്ധകുര്‍ബാന അര്‍പ്പിക്കും. ഫാ.സെബാസ്റ്റ്യന്‍ ചാമക്കാല സന്ദേശം നല്‍കും. ആറിന് പ്രദക്ഷിണം, കൊടിയിറക്ക്.

അധികൃതർ മുന്നറിയിപ്പു നൽകും, ചിലർ അംഗീകരിക്കില്ല; റോഡ് നവീകരണം മന്ദഗതിയിൽ

നെടുംകുന്നം: റോഡ് നവീകരണത്തോടനുബന്ധിച്ച് അധികൃതർ നൽകുന്ന മുന്നറിയിപ്പുകൾ വാഹന യാത്രികർ സ്വീകരിക്കാത്തതിനാൽ പുനർ നിർമാണം അവതാളത്തിലാകുന്നതായി അധികൃതർ. കറുകച്ചാൽ-മണിമല റോഡ് രണ്ടാംഘട്ട ടാറിംഗ് (ബിസി) നടക്കുമ്പോൾ വാഹനങ്ങൾ റോഡിലൂടെ കയറിയിറങ്ങുന്നത് നിർമാണ ജോലികളെ ബാധിക്കുന്നതായി പറയുന്നു. പിഡബ്ല്യുഡി ഗതാഗത നിയന്ത്രണം ഏർപ്പെടുത്തിയെങ്കിലും പ്രധാന റോഡായതിനാൽ പലരും പാലിക്കുന്നില്ലെന്ന് അധികൃതർ പറയുന്നു. പല കാരണങ്ങൾ പറഞ്ഞ് വാഹനങ്ങൾ തുടർച്ചയായി കടന്നുപോകുന്നത് നിർമാണ ജോലികളെ ബാധിക്കുന്നതായി ചീഫ് വിപ്പ് ഡോ. എൻ. ജയരാജും പറഞ്ഞു. ടാറിംഗ് നടക്കുമ്പോൾ വാഹനങ്ങൾ കയറിയിറങ്ങി ടാർ ചെയ്ത ഭാഗം വ്യാപകമായി കുഴിഞ്ഞു തകരുന്നത് സാധാരണയായി. ടാർ ചെയ്ത് നാല് മണിക്കൂറെങ്കിലും കഴിഞ്ഞാലേ വാഹനങ്ങൾ ഈ ഭാഗങ്ങളിൽ കയറാൻ പാടുള്ളൂ. കഴിഞ്ഞ ദിവസം നെടുംകുന്നത് ടാർ ചെയ്യുന്നതിനിടയിൽ വാഹനങ്ങൾ കയറി ടാറിംഗിന് കേടുപാടുകൾ സംഭവിച്ചു. ചിലയിടങ്ങൾ ഇളകി തകർന്നു. ഗതാഗതം തടസപ്പെടുത്തി എന്നാരോപിച്ച് ചില യാത്രക്കാർ പ്രശ്നങ്ങൾ സൃഷ്ടിക്കുന്നതും പതിവാണ്. ടാർ ഇളകി മാറിയ ഭാഗത്ത് വീണ്ടും ടാർ ചെയ്യുന്നത് സമയ നഷ്ടവും സാമ്പത്തിക നഷ്ടവും ഉണ്ടാക്കുന്നതായി പിഡബ്ല്യുഡി അധികൃതർ പറയുന്നു. വിവിധ റോഡുകളിലൂടെ ഗതാഗതം വഴിതിരിച്ചു വിട്ടെങ്കിലും പലരും ഇത് പാലിക്കാത്തതും പ്രശ്നങ്ങൾ ഉടലെടുക്കാൻ കാരണമാകുന്നു. ഒന്നര വർഷത്തോളമായി തകർന്നുകിടന്ന റോഡാണ് ഇപ്പോൾ ബഹുജന പരാതികളെത്തുടർന്ന് ഉന്നത നിലവാരത്തിൽ പുനർനിർമിക്കുന്നത്. നിർമാണം നടക്കുന്ന സ്ഥലത്ത് സ്ഥാപിച്ച ബോർഡുകളും റിബണുകളും അഴിച്ചുമാറ്റി ചിലർ വാഹനങ്ങളോടിക്കുന്നതും പതിവാണ്. കഴിഞ്ഞ മാസം ആദ്യഘട്ട ടാറിംഗ് ആരംഭിച്ചപ്പോൾ ഗതാഗത നിയന്ത്രണം ഏർപ്പെടുത്തിയിരുന്നു. അന്നും ചില പ്രശ്‌നങ്ങൾ ഉണ്ടായി. ടാറിംഗ് പൂർത്തിയാക്കും വരെ യാത്രക്കാർ സഹകരിക്കണമെന്ന് പിഡബ്ല്യുഡി അധികൃതർ അറിയിച്ചു.

നെല്ലുസംഭരണം വൈകുന്നു : കൃഷിമന്ത്രിയുടെ ഓഫീസില്‍ നെല്‍കര്‍ഷകരുടെ പ്രതിഷേധം

ചങ്ങനാശേരി: ആഴ്ചകളായിട്ടും സംഭരിക്കാതെ കെട്ടിക്കിടക്കുന്ന നെല്ല് അടിയന്തരമായി സംഭരിക്കുക, ഉപ്പുവെള്ളം, ഉഷ്ണ തരംഗം, വേനല്‍മഴ എന്നിവ മൂലമുള്ള വിളനാശത്തിന് നഷ്ടപരിഹാരം നല്‍കുക, സംഭരിച്ച നെല്ലിന്‍റെ വില ഉടന്‍ നല്കുക തുടങ്ങിയ ആവശ്യങ്ങളുന്നയിച്ച് സംയുക്ത പാടശേഖര സമിതി ഭാരവാഹികളും നെല്‍കര്‍ഷക സംരക്ഷണസമിതി സംസ്ഥാന നേതാക്കളും കൃഷിമന്ത്രി പി. പ്രസാദിന്‍റെ ചേര്‍ത്തലയിലെ ഒാഫീസില്‍ നിവേദനവുമായെത്തി പ്രതിഷേധിച്ചു. മന്ത്രി ഫോണില്‍ നേതാക്കളുമായി ബന്ധപ്പെട്ട് ഇന്ന് ഉച്ചകഴിഞ്ഞ് രണ്ടിന് ആലപ്പുഴ സിപിഐ ഓഫീസില്‍ ചര്‍ച്ച നടത്തി പ്രശ്‌നം പരിഹരിക്കാമെന്ന് ഉറപ്പുനല്‍കി. ഇതിനുശേഷമാണ് പ്രതിഷേധം അവസാനിച്ചത്. വിവിധ പാടശേഖര ഭാരവാഹികളായ വി.എസ്. ഹരിലാല്‍, തങ്കച്ചന്‍, ആര്‍. അനില്‍, രമണന്‍ കരുവേലിപ്പാടം, സുനില്‍കുമാര്‍ പി. കന്നിട്ടപാടം, പി.ആര്‍. അനില്‍കുമാര്‍, നെല്‍ക്കര്‍ഷകസമിതി സംസ്ഥാന പ്രസിഡന്‍റ് റജീന അഷറഫ്, ജനറല്‍ സെക്രട്ടറി സോണിച്ചന്‍ പുളിങ്കുന്ന്, വര്‍ക്കിംഗ് പ്രസിഡന്‍റ് പി.ആര്‍. സതീശന്‍, ലാലിച്ചന്‍ പള്ളി വാതുക്കല്‍, വേലായുധന്‍ നായര്‍, മാത്യൂ തോമസ്, അജയന്‍, മോഹനന്‍, അനീഷ് തകഴി, സുനു പി. ജോര്‍ജ്, ഗണേഷ് ബാബു, അഷറഫ് തുടങ്ങിയവര്‍ നേതൃത്വം നല്കി.

കെഎസ്ആര്‍ടിസി ജംഗ്ഷൻ-ജനറല്‍ ആശുപത്രി റോഡ് നിര്‍മാണം ദ്രുതഗതിയിൽ; അഞ്ചിന് ടാറിംഗ്

ചങ്ങനാശേരി: കെഎസ്ആര്‍ടിസി ജംഗ്ഷനില്‍നിന്നു ജനറല്‍ ആശുപത്രിയിലേക്കുള്ള റോഡിന്‍റെ ടാറിംഗ് ജോലികള്‍ വേഗതയിലേക്ക്. കലാവസ്ഥ അനുകൂലമായാല്‍ മേയ് അഞ്ചിന് ടാറിംഗ് പൂര്‍ത്തിയാക്കി പിറ്റേന്ന് തുറന്നുകൊടുക്കാനാണ് അധികൃതരുടെ ആലോചന. അഞ്ച് മീറ്റര്‍ വീതിയില്‍ ബിഎംബിസി നിലവാരത്തിലാണ് ടാറിംഗ് നടത്തുന്നത്. റോഡിന്‍റെ വശങ്ങളില്‍ ദിശാബോര്‍ഡുകളും വെള്ളവരകളും വശങ്ങളില്‍ മഞ്ഞ, ചുമപ്പ് നിറങ്ങളിലുള്ള സ്റ്റഡുകളും സ്ഥാപിക്കും. റോഡിന്‍റെ ഒരുവശത്ത് അരഅടി ഉയരത്തില്‍ 1.8 മീറ്റര്‍ വീതിയില്‍ ഫുട്പാത്ത് നിര്‍മാണം പൂര്‍ത്തിയിയിട്ടുണ്ട്. ഈ ഫുട്പാത്തിനുമുകളില്‍ ഓട്ടോറിക്ഷകള്‍ക്ക് പാര്‍ക്കിംഗിനുള്ള ക്രമീകരണങ്ങളുണ്ടാകും. ജോബ് മൈക്കിള്‍ എംഎല്‍എയുടെ ഇടപെടലില്‍ സംസ്ഥാന ബജറ്റില്‍ വകയിരുത്തിയ 55ലക്ഷം രൂപ വിനിയോഗിച്ചാണ് ആധുനിക നിലവാരത്തില്‍ റോഡ് നിര്‍മാണം. മലിനജലം ഒഴുകി പോകത്തക്കവിധം റോഡിന്‍റെ തുടക്കംമുതല്‍ അവസാനംവരെ ട്രെയിനേജ് സംവിധാനങ്ങളും കോഫിഹൗസ് ഭാഗത്ത് കലുങ്കും സജ്ജമാക്കിയിട്ടുണ്ട്. കെഎസ്ആര്‍ടിസി ജംഗ്ഷനിലുള്ള റോഡിലെ കമാനത്തിന്‍റെ കാലുകള്‍ തുരുമ്പടിച്ചു ജീര്‍ണിച്ച നിലയിലാണ്. റോഡ് നിര്‍മാണം പൂര്‍ത്തിയാകുമ്പോഴേക്കും ഈ കമാനം പൊളിച്ചുമാറ്റിയാല്‍ അപകടങ്ങള്‍ ഒഴിവാക്കാനാകുമെന്ന അഭിപ്രായമുയര്‍ന്നിട്ടുണ്ട്.

ആർപ്പൂക്കരയിൽ വീടിന് തീപിടിച്ചു

ഗാന്ധിനഗർ: വീടിന് തീപിടിച്ചു. ആർപ്പൂക്കര ചാത്തുണ്ണിപാറയിൽ ഡോ. അബിന്‍റെ വീടിനാണ് തീപിടിച്ചത്. ഇദ്ദേഹം വാടകയ്ക്ക് താമസിക്കുന്ന വീടാണിത്. ഇന്നലെ വൈകുന്നേരമാണ് സംഭവം. ഈ സമയം വീടിനുള്ളിൽ ഉറങ്ങുകയായിരുന്ന ഇയാൾ വീടിന്‍റെ പിന്നിലെ വാതിലിലൂടെ പുറത്തിറങ്ങി രക്ഷപ്പെട്ടതിനാൽ ദുരന്തം ഒഴിവായി. വീടിനുള്ളിലെ പ്രിന്‍ററിലുണ്ടായ ഷോർട്ട് സർക്യൂട്ടാണ് തീപിടിത്തത്തിന് ഇടയാക്കിയതെന്നാണ് പ്രാഥമിക നിഗമനം. കോട്ടയം അഗ്നിശമനസേനാംഗങ്ങളെത്തി തീ അണച്ചു.

കാർ തലകീഴായി മറിഞ്ഞു

വൈക്കം: നിയന്ത്രണം വിട്ട കാർ റോഡരികിലെ വൈദ്യുതി പോസ്റ്റിലിടിച്ച് തലകീഴായി മറിഞ്ഞു. അപകടത്തിൽ യാത്രക്കാർ തലനാരിഴയ്ക്ക് പരിക്കേൽക്കാതെ രക്ഷപ്പെട്ടു. ഇന്നലെ ഉച്ചകഴിഞ്ഞ് 3.30ഓടെ വൈക്കം ഗവൺമെന്‍റ് ഗേൾസ് സ്കൂളിന് മുൻവശത്തായിരുന്നു അപകടം. എറണാകുളത്തു പോയി തിരികെ മടങ്ങുകയായിരുന്ന ചെമ്മനത്തുകര സ്വദേശികൾ സഞ്ചരിച്ച കാറാണ് അപകടത്തിൽപ്പെട്ടത്. വൈദ്യുതി പോസ്റ്റ് ഇടിച്ചു തകർത്ത ശേഷം കാർ റോഡിനു കുറുകെ തലകീഴായി മറിയുകയായിരുന്നു. കാർ പൂർണമായി തകർന്നെങ്കിലും കാറിലുണ്ടായിരുന്ന അഞ്ചു യാത്രക്കാരും ഡ്രൈവറും പരിക്കേൽക്കാതെ അത്ഭുതകരമായി രക്ഷപ്പെട്ടു. ഡ്രൈവർ ഉറങ്ങിപ്പോയതാണ് അപകടത്തിന് കാരണമായത്. വൈദ്യുതി പോസ്റ്റ് ഒടിഞ്ഞതിനെ തുടർന്ന് ടൗണിലെ വൈദ്യുതി ബന്ധം നിലച്ചു.

ഫുട്ബോൾ താരം വിനീത് സഞ്ചരിച്ച വാഹനം അപകടത്തിൽപ്പെട്ടു

വൈക്കം: ഫുട്ബോൾ താരം സി. കെ. വിനീതും സുഹൃത്തും സഞ്ചരിച്ചിരുന്ന വാഹനം ഉദയനാപുരം നാനാടത്ത് അപകടത്തിൽപ്പെട്ടു. ശനിയാഴ്ച പുലർച്ചെ ഒന്നോടെയായിരുന്നു സംഭവം. തിരുവനന്തപുരത്തു നിന്നും കൊച്ചിയിലേക്ക് വരുന്ന വഴിയാണ് അപകടം ഉണ്ടായത്. വൈക്കം-പൂത്തോട്ട റൂട്ടിൽ എറണാകുളത്തേക്കു പോകുകയായിരുന്ന വാഹനം നാനാടത്ത് എത്തിയപ്പോൾ പോസ്റ്റിലേക്ക് ഇടിച്ചുകയറുകയായിരുന്നു. ‌ വാഹനം ഓടിച്ചിരുന്നയാൾ ഉറങ്ങിപ്പോയതാണ് അപകടത്തിനു കാരണമായത്. സ്കോർപിയോ വാഹനം റോഡരികിലെ ഇലക്‌ട്രിക് പോസ്റ്റിലേക്ക് ഇടിച്ചുകയറി പോസ്റ്റ് ഒടിഞ്ഞു. റോഡരികിലെ ഓടയോടു ചേർന്നുളള കോൺക്രീറ്റ് ഭിത്തിയിൽ ഇടിച്ചു വാഹനം നിന്നു. അപകടത്തിൽ കാറിൽ സഞ്ചരിച്ചിരുന്ന ഇരുവരും പരിക്കേൽക്കാതെ രക്ഷപ്പെട്ടു. തുടർന്ന് നാട്ടുകാരും പോലീസും കെഎസ്ഇബി അധികൃതരും സംഭവസ്ഥലത്ത് എത്തിയാണ് വാഹനം നീക്കി വൈദ്യുതി പോസ്റ്റ് പുനഃസ്ഥാപിച്ചത്.

പാലാക്കരി ഫിഷ് ഫാമിലെത്തുന്ന സന്ദർശകർക്ക് ഇനി ബഗിയിൽ ചുറ്റിസഞ്ചരിക്കാം

കാട്ടിക്കുന്ന്: ചെമ്പ് കാട്ടിക്കുന്നിലെ പാലാക്കരി ഫിഷ്ഫാമിലെത്തുന്ന സന്ദർശകർക്ക് ഇനി ബഗി ഉപയോഗിച്ച് ഫാമിലൂടെ സഞ്ചരിച്ച് വേമ്പനാട് കായലിന്‍റെ സൗന്ദര്യം നുകരാം. ടൂറിസം പ്രവർത്തനങ്ങളുടെ ഭാഗമായി വാങ്ങിയ ഇലക്ട്രിക് ബഗിയുടെ ഉദ്ഘാടനം മത്സ്യഫെഡ് ചെയർമാൻ ടി. മനോഹരൻ നിർവഹിച്ചു. മത്സ്യ ഫെഡ് ഭരണസമിതി അംഗം എസ്. ബാഹുകൻ അധ്യക്ഷത വഹിച്ചു. മത്സ്യഫെഡ് ഭരണസമിതി അംഗങ്ങളായ ജി. രാജാദാസ്, സബീന സ്റ്റാൻലി, മത്സ്യഫെഡ് കേന്ദ്ര ഓഫീസിലെ മാനേജരും ഫിഷറീസ് ജോയിന്‍റ് ഡയറക്ടറുമായ കെ. സുഹൈർ,ജില്ലാ മാനേജർ ഡോ. ജോയ്സ് ഏബ്രഹാം, സൂപ്രണ്ട് ജോർജ്, ഫാം മാനേജർ അജിത്ത് കൊച്ചുമോൻ എന്നിവർ പ്രസംഗിച്ചു. മത്സ്യഫെഡിന്‍റെ കീഴിലുള്ള ഫാമുകളിൽ അക്വാ ടൂറിസം പ്രവർത്തനങ്ങൾ വിപുലപ്പെടുത്തുന്നതിന്‍റെ ഭാഗമായി ഏർപ്പെടുത്തിയ ബഗി ഫാമിലെത്തുന്ന വയോധികരടക്കമുള്ള സന്ദർശകർക്ക് ഏറെ ഉപകാരപ്രദമാകുമെന്ന് മത്സ്യഫെഡ് ചെയർമാൻ ടി. മനോഹരൻ പറഞ്ഞു.

പാലത്തിന്‍റെ പ്രവേശനപാത നിർമാണത്തിനായുള്ള ഇരുമ്പുകമ്പികൾ മോഷ്ടിച്ചയാൾ പിടിയിൽ

കുമരകം: കോണത്താറ്റ് പാലത്തിന്‍റെ പ്രവേശന പാത നിർമാണത്തിന് സൂക്ഷിച്ചിരുന്ന ഇരുമ്പ് കമ്പികൾ മോഷ്ടിച്ച പ്രതി പിടിയിൽ. കുമരകം സ്വദേശി കുന്നത്തുകളത്തിൽ ബിനോയ്‌ വിശ്വനാഥനെ (മണിക്കുട്ടൻ) യാണ് കുമരകം പോലീസ് കസ്റ്റഡിയിൽ എടുത്തത്. 1,881 കിലോ ഇരുമ്പ് കമ്പികൾ മോഷണം പോയതായി കഴിഞ്ഞ ദിവസമാണ് പാലത്തിന്‍റെ കരാറുകാരൻ കുമരകം പോലീസിൽ പരാതി നൽകിയത്. ഇതിന്‍റെ അടിസ്ഥാനത്തിൽ പ്രദേശത്തെ സിസി ടിവി ദൃശ്യങ്ങൾ കേന്ദ്രീകരിച്ച് പോലീസ് നടത്തിയ അന്വേഷണത്തിലാണ് പ്രതിയെ പിടികൂടിയത്. ഇയാൾ പല ദിവസങ്ങളിലായി എത്തിയാണ് മോഷണം നടത്തിയതെന്നാണ് പോലീസിനു ലഭിച്ച വിവരം. കോണത്താറ്റ് പാലത്തിന്‍റെ പ്രവേശന പാതയുടെ നിർമാണം ഇഴഞ്ഞുനീങ്ങുകയാണ് എന്നാരോപിച്ച് കഴിഞ്ഞ ദിവസം കോൺഗ്രസ് നടത്തിയ സമരത്തിൽ പങ്കെടുത്ത ആളാണ് ഇപ്പോൾ അറസ്റ്റിലായ പ്രതി. കുമരകം എസ് എച്ച്ഒ കെ. ഷിജിയുടെ നേതൃത്വത്തിലാണ് പ്രതിയെ പിടികൂടിയത്. പ്രതിയെ കോടതിയിൽ ഹാജരാക്കി. മോഷണക്കേസ് രാഷ്‌ട്രീയവത്കരിക്കാൻ ശ്രമമെന്ന് കോൺഗ്രസ് കുമരകം: കോണത്താറ്റ് പാലത്തിന്‍റെ പ്രവേശന പാതയുടെ നിർമാണത്തിനായുള്ള ഇരുമ്പുകമ്പി മോഷണം പോയ സംഭവത്തിൽ കോൺഗ്രസിനെ പഴി ചാരാൻ വിഫലശ്രമം നടക്കുന്നതായി കുമരകം മണ്ഡലം കമ്മറ്റി. കോൺഗ്രസിന്‍റെ മെമ്പർഷിപ്പ് ഇല്ലാത്ത അനുഭാവി മാത്രമായ വ്യക്തിയെ കരുവാക്കി യഥാർഥ പ്രതികളെ രക്ഷിക്കുന്നതിനാണ് ശ്രമം നടക്കുന്നത്. കുമരകത്തെ സിപിഎമ്മും പോലീസും ചേർന്ന് നടത്തുന്ന ഈ നാടകം ജനങ്ങൾ തിരിച്ചറിയും ആറുമാസം കൊണ്ട് പണിതീർക്കും എന്നു പറഞ്ഞ പാലം മൂന്ന് വർഷമായിട്ടും തീർക്കാത്തതിൽ പ്രതിഷേധിച്ച് കോൺഗ്രസ് സമരം നടത്തിയതിന്‍റെ വൈരാഗ്യമാണ് ഈ മോഷണ നാടകത്തിൽ പ്രതിഫലിച്ചിരിക്കുന്നത്. യഥാർഥമായിട്ടും കമ്പി മോഷ്ടിച്ച പ്രതികളെ എത്രയും വേഗം അറസ്റ്റ് ചെയ്യണമെന്ന് കോൺഗ്രസ് ആവശ്യപ്പെട്ടു.

ആർപ്പൂക്കരയിൽ വീടിന് തീപിടിച്ചു

ഗാന്ധിനഗർ: വീടിന് തീപിടിച്ചു. ആർപ്പൂക്കര ചാത്തുണ്ണിപ്പാറയിൽ ഡോ. അബിന്‍റെ വീടിനാണ് തീപിടിച്ചത്. ഇദ്ദേഹം വാടകയ്ക്ക് താമസിക്കുന്ന വീടാണിത്. ഇന്നലെ വൈകുന്നേരമാണ് സംഭവം. ഈ സമയം വീടിനുള്ളിൽ ഉറങ്ങുകയായിരുന്ന ഇയാൾ വീടിന്‍റെ പിന്നിലെ വാതിലിലൂടെ പുറത്തിറങ്ങി രക്ഷപ്പെട്ടതിനാൽ ദുരന്തം ഒഴിവായി. വീടിനുള്ളിലെ പ്രിന്‍ററിലുണ്ടായ ഷോർട്ട് സർക്യൂട്ടാണ് തീപിടിത്തത്തിന് ഇടയാക്കിയതെന്നാണ് പ്രാഥമിക നിഗമനം. കോട്ടയം അഗ്നിശമനസേനാംഗങ്ങളെത്തി തീ അണച്ചു.

എൻഎക്‌സ്‌സിസി ജില്ലാപ്രതിനിധി സമ്മേളനം

കോട്ടയം: നാഷണൽ എക്‌സ് സർവീസ്‌മെൻ കോ-ഓർഡിനേഷൻ കമ്മിറ്റിയുടെ ജില്ലാസമ്മേളന ഭാഗമായി നടന്ന പ്രതിനിധി സമ്മേളനം കൂരോപ്പട പഞ്ചായത്ത് പ്രസിഡന്‍റ് അമ്പിളി മാത്യു ഉദ്ഘാടനം ചെയ്തു. ജില്ലാപ്രസിഡന്‍റ് വി.കെ. മത്തായി അധ്യക്ഷത വഹിച്ചു. ജില്ലാസെക്രട്ടറി ഡി. മാത്യൂസ് റിപ്പോർട്ടും ട്രഷറർ ജോസ് പടിയറ കണക്കും അവതരിപ്പിച്ചു. സംസ്ഥാന പ്രസിഡന്‍റ് എം.ബി. ഗോപിനാഥ് മുഖ്യപ്രഭാഷണം നടത്തി. പഞ്ചായത്തംഗം കുഞ്ഞൂഞ്ഞമ്മ കുര്യൻ, ജനറൽ കൺവീനർ കെ.എം. ഇട്ടി തുടങ്ങിയവർ പ്രസംഗിച്ചു. തെരഞ്ഞെടുപ്പിൽ സംസ്ഥാന സെക്രട്ടറി കെ.എം. പ്രതാപൻ വരണാധികാരിയായി. തുടർന്നുനടന്ന സമ്മേളനത്തിൽ അന്നമ്മ തോമസ്, യമുന രാധാകൃഷ്ണൻ, പി.എസ്. ജോൺ, എം.എം. മാത്യു, എ.സി. ബാബു, എൻ.വി.തോമസ്, എം.എൻ. വിനോദ്, സുരേന്ദ്രബാബു, മോഹനചന്ദ്രൻ തുടങ്ങിയവർ പ്രസംഗിച്ചു. ജില്ലാപ്രസിഡന്‍റായി വി.കെ. മത്തായി, സെക്രട്ടറിയായി എ.ആർ. വിജയൻനായർ, ട്രഷററായി ജോസ് പടിയറ എന്നിവരെ തെരഞ്ഞെടുത്തു.

വീടിന്‍റെ മുകൾഭാഗം വൃത്തിയാക്കുന്നതിനിടെ താഴെവീണ് പരിക്കേറ്റ ഗൃഹനാഥൻ മരിച്ചു

ഗാന്ധിനഗർ: വീടിന്‍റെ മുകൾ ഭാഗം വൃത്തിയാക്കുന്നതിനിടെ താഴെവീണ് പരിക്കേറ്റ് മെഡിക്കൽ കോളജ് ആശുപത്രിയിൽ ചികിത്സയിലായിരുന്ന ഗൃഹനാഥൻ മരിച്ചു. വൈക്കം കിഴക്കേനട പുതുപറമ്പത്ത് എസ്. അനിൽ കുമാർ (59) ആണ് മരിച്ചത്. അനിൽ കുമാർ കഴിഞ്ഞ 20ന് വീടിന്‍റെ മുകൾഭാഗം വൃത്തിയാക്കുന്നതിനിടെ താഴെ വീണ് തലയ്ക്കും നെഞ്ചിനും കാലിനും പരിക്കേറ്റിരുന്നു. തുടർന്ന് തെള്ളകത്തെ സ്വകാര്യ ആശുപത്രിയിലും പിന്നീട് മെഡിക്കൽ കോളജ് ആശുപത്രി സർജറി ഐസിയുവിലും പ്രവേശിപ്പിച്ചു. എന്നാൽ ഇന്നലെ പുലർച്ചെ മരണം സംഭവിച്ചു. തുടർന്ന് മേൽ നടപടികൾക്ക് ശേഷം മൃതദേഹം ബന്ധുക്കൾക്ക് വിട്ട് നൽകി. ഭാര്യ: ജ്യോതി. മകൻ: അഭിജിത്ത് (സൗത്ത് ഇന്ത്യൻ ബാങ്ക്).

പാറപ്പാടം ക്ഷേത്രത്തില്‍ മോഷണം; തൂക്കുവിളക്കുകൾ കവർന്നു

കോട്ടയം: പാറപ്പാടം ദേവീക്ഷേത്രത്തില്‍ മോഷണം. ക്ഷേത്രത്തിന്‍റെ ചുറ്റുമതിലിനുള്ളില്‍ സൂക്ഷിച്ചിരുന്ന തൂക്ക് വിളക്കുകള്‍ മോഷണം പോയി. 47 വിളക്കുകളിൽ 26 എണ്ണമാണ് കവർന്നത്. ശേഷിച്ച 21 വി‍ളക്കുകൾ അഴിച്ചുവച്ചെങ്കിലും മോഷ്ടാവിന് കൊണ്ടുപോകാൻ കഴിഞ്ഞില്ല. ഇന്നലെ പുലര്‍ച്ചെ രണ്ടോടെയാണു മോഷണം നടന്നത്. അര്‍ധരാത്രിയില്‍ ക്ഷേത്രത്തിനുള്ളില്‍ അസ്വാഭാവികമായ ശബ്ദം കേട്ട് ഉണര്‍ന്ന അയല്‍വാസിയാണ് മോഷണം നടക്കുന്നത് കണ്ടത്. തുടര്‍ന്ന് ഇയാള്‍ വിവരം പോലീസില്‍ അറിയിച്ചു. കണ്‍ട്രോള്‍ റൂം പോലീസ് സംഘം സ്ഥലത്ത് എത്തിയപ്പോഴേക്കും മോഷ്ടാവ് രക്ഷപ്പെട്ടു.

ഫെഡറൽ ബാങ്ക് എംപ്ലോയീസ് യൂണിയൻ ഓൾ ഇന്ത്യ കോൺഫറൻസിന് സമാപനമായി

കോട്ടയം: രണ്ട് ദിവസമായി നടന്ന ഫെഡറൽ ബാങ്ക് എംപ്ലോയീസ് യൂണിയൻ ഓൾ ഇന്ത്യ കോൺഫറൻസിനു സമാപനമായി. മാമ്മൻ മാപ്പിള ഹാളിൽ നടന്ന സമ്മേളനം ഇന്നലെയാണ് സമാപിച്ചത്. യൂണിയൻ അഖിലേന്ത്യ പ്രസിഡന്‍റായി വിശാൽ താക്കറും ജനറൽ സെക്രട്ടറിയായി എ.ആർ. സുജിത് രാജുവും ട്രഷറാറായി വി.പി ബിനോയും തെരഞ്ഞെടുക്കപ്പെട്ടു. മറ്റു ഭാരവാഹികളായി പി.എം അംബുജം, സി.ആർ. ശ്രീലസിത്ത്, സുമിത് സഹദേവൻ നമ്പ്യാർ, വി.പി. ശ്രീവിദ്യ, എൻ. സെൽവം, മനോജ് (വൈസ് പ്രസിഡന്‍റുമാർ), പി.ആർ. സുജിത് (സെക്രട്ടറി), എസ്. ശരത് (ഓർഗനൈസിംഗ് സെക്രട്ടറി), ഉജ്വൽ വിജയകുമാർ, പി.എസ്. ഹരികൃഷ്ണൻ, എസ്. ഹരിശങ്കർ, നഹാസ് പി. സലിം, കെ.എസ്. വിമൽ, അഭിജിത്ത് ദാസ്, ഗാർഗാരെ ഷക്കീൽ ഗുലാബ്, പി. അമൽദാസ്, സോളങ്കി സുരേഷ് റാവു, അഖിൽ എസ്. അപ്പുക്കുട്ടൻ, ഭവിൻകുമാർ ദയലാൽ മക്‌സാന, രഞ്ജു രാമചന്ദ്രൻ (അസി. ട്രഷറാർ) എന്നിവരെയും തെരഞ്ഞെടുത്തു.

മരുന്ന് ദുരുപയോഗം: ബോധവത്കരണ സെമിനാര്‍ നടത്തി

കോട്ടയം: കോട്ടയം ഡ്രഗ്‌സ് കണ്‍ട്രോള്‍ വകുപ്പ് മരുന്ന് ദുരുപയോഗത്തിനെതിരേ ബോധവത്കരണ സെമിനാര്‍ സംഘടിപ്പിച്ചു. കോട്ടയം നാര്‍കോട്ടിക് സെല്‍ ഡിവൈഎസ്പി എ.ജെ. തോമസ് ഉദ്ഘാടനം ചെയ്തു. അസിസ്റ്റന്‍റ് ഡ്രഗ്‌സ് കണ്‍ട്രോളര്‍ ഡോ. അജു ജോസഫ് കുര്യന്‍ അധ്യക്ഷത വഹിച്ചു. എക്‌സൈസ് ഇന്‍സ്‌പെക്ടര്‍ എ. അഖില്‍, കേരള കെമിസ്റ്റ് ആന്‍ഡ് ഡ്രഗിസ്റ്റ് അസോസിയേഷന്‍ പ്രസിഡന്‍റ് ജോസഫ് സെബാസ്റ്റ്യന്‍, കേരള പ്രൈവറ്റ് ഫാര്‍മസിസ്റ്റ് അസോസിയേഷന്‍ സംസ്ഥാന സെക്രട്ടറി ടി.ആര്‍. നവജി, ഡോ. ജമീല ഹെലന്‍ ജേക്കബ്, ഡോ. ബബിത കെ. വാഴയില്‍ തുടങ്ങിയ പ്രസംഗിച്ചു.

ശ്രേഷ്ഠ കാതോലിക്കാ ബാവായ്ക്കു സ്വീകരണം: വാഹന വിളംബര ഘോഷയാത്ര നടത്തി

മണർകാട്: യാക്കോബായ സുറിയാനി സഭയുടെ ശ്രേഷ്ഠ കാതോലിക്കാ മാർ ബസേലിയോസ് ജോസഫ് ബാവായ്ക്ക് മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിന്‍റെ ആഭിമുഖ്യത്തിൽ ഒന്നിന് നൽകുന്ന സ്വീകരണത്തോട് അനുബന്ധിച്ചു വാഹന വിളംബര ഘോഷയാത്ര നടത്തി. കത്തീഡ്രൽ സഹവികാരിയും പ്രോഗ്രാം ജോയിന്‍റ് കൺവീനറുമായ ഫാ. ലിറ്റു തണ്ടാശേരി ഫ്ലാഗ് ഓഫ് ചെയ്തു. വിളംബര ഘോഷയാത്രയക്ക് കോട്ടയം ഭദ്രാസനത്തിലെ വിവിധ പള്ളികളിൽ സ്വീകരണങ്ങൾ നൽകി. മണർകാട് കത്തീഡ്രലിൽനിന്ന് ആരംഭിച്ച വിളംബര ഘോഷയാത്രയ്ക്ക് തിരുവഞ്ചൂർ സെന്‍റ് ഇഗ്നാത്തിയോസ് ഏലിയാസ് തൃതീയൻ കുരിശുപള്ളി, പാറമ്പുഴ സെന്‍റ് ജോൺസ് പള്ളി, പൊൻപള്ളി സെന്‍റ് ജോർജ് പള്ളി, നീലിമംഗലം സെന്‍റ് മേരീസ് പള്ളി, പേരൂർ മർത്തശ്മൂനി പള്ളി, തിരുവഞ്ചൂർ സെന്‍റ് തോമസ് പള്ളി, തുത്തൂട്ടി മോർ ഗ്രിഗോറിയോസ് ചാപ്പൽ, അരീപ്പറമ്പ് സെന്‍റ് മേരീസ് പള്ളി, വെള്ളൂർ സെന്‍റ് സൈമൺസ് പള്ളി, പങ്ങട സെന്‍റ് മേരീസ് പള്ളി, പാമ്പാടി സിംഹാസനപ്പള്ളി, സെന്‍റ് ഇഗ്നാത്തിയോസ് കടവുംഭാഗം പള്ളി, മീനടം സെന്‍റ് ഇഗ്നാത്തിയോസ് പള്ളി, മീനടം സെന്‍റ് ജോൺസ് പള്ളി, പുതുപ്പള്ളി സെന്‍റ് ജോർജ് പള്ളി, മാങ്ങാനം സെന്‍റ് മേരീസ് ചാപ്പൽ, പാണംപടി സെന്‍റ് മേരീസ് പള്ളി, തിരുവാർപ്പ് മർത്തശ്മൂനി പള്ളി, കുമരകം ആറ്റാംമംഗലം സെന്‍റ് ജോൺസ് പള്ളി, സെന്‍റ് തോമസ് ചെങ്ങളം, സെന്‍റ് ജോസഫ് കത്തീഡ്രൽ, വടവാതൂർ മാർ അപ്രേം പള്ളി എന്നീ പള്ളികളുടെ സ്വീകരണങ്ങൾ ഏറ്റുവാങ്ങി തിരിതെ മണർകാട് കത്തീഡ്രലിൽ എത്തി. കത്തീഡ്രൽ ട്രസ്റ്റിമാരായ സുരേഷ് കെ. ഏബ്രഹാം, ബെന്നി ടി. ചെറിയാൻ, ജോർജ് സഖറിയാ, സെക്രട്ടറി പി.എ. ചെറിയാൻ എന്നിവർ നേതൃത്വം നൽകി.

മെഡിക്കൽ കോളജ് ഗൈനക്കോളജി വിഭാഗം ലാബിലെ രക്തപരിശോധനാ മെഷീൻ തകരാറിൽ; രോഗികൾ വലയുന്നു

ഗാന്ധിനഗർ: മെഡിക്കൽ കോളജ് ആശുപത്രി ഗൈനക്കോളജി വിഭാഗം ലാബിലെ ബയോ കെമസ്ട്രി മെഷീൻ തകരാറിൽ. സംഭവത്തെത്തുടർന്ന് വിവിധ രക്ത പരിശോധനയ്ക്കായി ഗൈനക്കോളജിയിൽ ചികിത്സയിലുള്ളവരുടെ ബന്ധുക്കൾ ആശുപത്രിയിലെ സെൻട്രലൈസിഡ് ലാബ് പ്രവർത്തിക്കുന്ന പൊടിപാറ ബിൽഡിംഗിൽ എത്തേണ്ടിവരുന്നു. ഒരു മാസമായി ഗൈനക്കോളജി വിഭാഗം ലാബിലെ ബയോ കെമസ്ട്രി മെഷീൻ തകരാറിലാണ്. ഗർഭിണികളും രോഗികളുമായി നുറുകണക്കിന് ആളുകളാണ് ഗൈനക്കോളജിയിൽ ചികിത്സയിലുള്ളത്. ബയോ കെമസ്ട്രി മെഷീൻ തകരാറിലായതോടെ ആർഎഫ്ടി, എൽഎഫ്ടി, ഷുഗർ പരിശോധന തുടങ്ങിയ സാധാരണ എല്ലാവർക്കും വേണ്ടിവരുന്ന പരിശോധനയെ ദോഷകരമായി ബാധിച്ചിരിക്കുകയാണ്. തുടർന്ന് രക്തസാമ്പിളുമായി രോഗിയുടെ ബന്ധുക്കൾ ഗൈനക്കോളജിയിൽനിന്ന് അകലെയുള്ള പൊടിപാറ ബിൽഡിംഗിലെത്തി ഇവിടുത്തെ ലാബിൽ പരിശോധന നടത്തേണ്ട സ്ഥിതിയാണ്. ആശുപത്രിയിലെ എല്ലാ വിഭാഗങ്ങളിൽ നിന്നുള്ള രോഗികളാണ് വിവിധ പരിശോധനയ്ക്കായി പൊടിപാറ ബിൽഡിംഗിലെ സെൻട്രലൈസിഡ് ലാബിലെത്തുന്നത്. ‌ഇവിടുത്തെ തിരക്ക് കുറയ്ക്കുന്നതിനും ഗൈനക്കോളജിയിൽ ചികിത്സയിലുള്ളവരുടെ സൗകര്യാർഥവുമാണ് ഗൈനക്കോളജിക്ക് പ്രത്യേകം ലാബ് സംവിധാനം ഏർപ്പെടുത്തിരിക്കുന്നത്.

എന്‍റെ കേരളത്തിന് ആവേശമായി ആടിയും പാടിയും ആശാസംഗമം

കോട്ടയം: ആടിയും പാടിയും ആശാവര്‍ക്കര്‍മാരും ആരോഗ്യ പ്രവര്‍ത്തകരും എന്‍റെ കേരളം പ്രദര്‍ശനമേളയെ ഇന്നലെ ആവേശത്തിലാറാടിച്ചു. മേളയുടെ ഭാഗമായി ആരോഗ്യ വകുപ്പ് നടത്തിയ ആശ - ആരോഗ്യ പ്രവര്‍ത്തക സംഗമത്തിലാണ് ജീവനക്കാരും ആശാപ്രവര്‍ത്തകരും കലാവിരുന്നൊരുക്കിയത്. ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയ സംഗമം ഉദ്ഘാടനം ചെയ്തു. പാലാ ജനറല്‍ ആശുപത്രിയിലെ ഡോക്ടര്‍മാരടക്കമുള്ള ജീവനക്കാര്‍ അവതരിപ്പിച്ച സൂംബാ നൃത്തത്തിനൊപ്പം സദസിലിരുന്നവരും ആവേശത്തോടെ ചുവടുവച്ചു. ബ്രഹ്മമംഗലം പ്രാഥമികാരോഗ്യ കേന്ദ്രത്തിലെ ജീവനക്കാര്‍ അവതരിപ്പിച്ച സംഘനൃത്തവും തിരുവാര്‍പ്പ് കുടുംബാരോഗ്യകേന്ദ്രത്തിലെ ജ്യോതി ഹരികുമാറിന്‍റെ ഫ്യൂഷന്‍ ഡാന്‍സും വെളിയന്നൂര്‍ പ്രാഥമികാരോഗ്യ കേന്ദ്രത്തിനു കീഴിലുള്ള ആശാ പ്രവര്‍ത്തക സ്നേഹാ സജിയുടെ നാടോടിനൃത്തവും കൈയടികളോടെയാണ് സദസ് ഏറ്റെടുത്തത്. ജില്ലയിലെ തദ്ദേശ സ്വയംഭരണ സ്ഥാപന തലത്തില്‍ മികവ് തെളിയിച്ച ആശാ പ്രവര്‍ത്തകരെ സംഗമത്തില്‍ ആദരിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയ എന്നിവര്‍ മെഡലുകള്‍ അണിയിച്ചു. ആരോഗ്യകേരളം ജില്ലാ പ്രോഗ്രാം മാനേജര്‍ ഡോ. വ്യാസ് സുകുമാരന്‍ ചടങ്ങില്‍ പങ്കെടുത്തു.

കൂവപ്പള്ളി കുരിശുമലയിൽ പുതുഞായർ ആചരിച്ചു

കാഞ്ഞിരപ്പള്ളി: കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രലിന്‍റെ നേതൃത്വത്തിൽ പുരാതന തീർഥാടനകേന്ദ്രമായ കൂവപ്പള്ളി കുരിശുമലയിൽ പുതുഞായർ ആചരിച്ചു. രാവിലെ ഒന്പതിന് കൂവപ്പള്ളി മലബാര്‍ കവലയില്‍നിന്ന് കുരിശുമലയിലേക്കു സ്ലീവാപ്പാത നടത്തി. തുടർന്ന് 10.30ന് കാഞ്ഞിരപ്പള്ളി രൂപത വിശ്വാസ പരിശീലനകേന്ദ്രം ഡയറക്ടർ ഫാ. തോമസ് വാളന്മനാൽ വിശുദ്ധ കുർബാന അർപ്പിച്ച് സന്ദേശം നൽകി. പുതുഞായർ ആചരണത്തിന്‍റെ ഭാഗമായി കൂവപ്പള്ളി കുരിശുമലയിലേക്ക് ഇന്നലെ നിരവധി വിശ്വാസികളാണ് കുരിശിന്‍റെ വഴി പ്രാര്‍ഥനകള്‍ ചൊല്ലി എത്തിയത്. കത്തീഡ്രൽ വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേരി, അസിസ്റ്റന്‍റ് വികാരിമാരായ ഫാ. തോമസുകുട്ടി ആലപ്പാട്ടുകുന്നേൽ, ഫാ. ടോണി മുളങ്ങാശേരിൽ എന്നിവർ നേതൃത്വം നൽകി.

എരുമേലി വിമാനത്താവളം; ഭൂമി ഏറ്റെടുക്കാൻ വീണ്ടും വിജ്ഞാപനം

എരുമേലി: ശബരിമല വിമാനത്താവളത്തിന് എരുമേലിയിൽ ഭൂമി ഏറ്റെടുക്കാൻ സർക്കാർ പ്രാഥമിക വിജ്ഞാപനം പുറപ്പെടുവിച്ചു. ഇത് രണ്ടാം തവണയാണ് വിജ്ഞാപനം പുറപ്പെടുവിക്കുന്നത്. 2263 ഏക്കർ ചെറുവള്ളി എസ്റ്റേറ്റ് ഭൂമിയും 307 ഏക്കർ സ്വകാര്യ ഭൂമിയുമാണ് ഏറ്റെടുക്കേണ്ടത്. പാലാ സബ് കോടതിയിലുള്ള എസ്റ്റേറ്റിന്‍റെ ഉടമസ്ഥാവകാശ തർക്കം തീർപ്പാകാതെ സർക്കാരിന് എങ്ങനെ എസ്റ്റേറ്റ് ഏറ്റെടുക്കാനാകും എന്നതാണ് നിലവിൽ പ്രസക്തമായ വിഷയം. ഇതും റദ്ദാകുമോ ? ആദ്യ വിജ്ഞാപനം ഹൈക്കോടതി ഇടപെടലിൽ റദ്ദാക്കിയിരുന്നു. സ്വതന്ത്ര ഏജൻസി നടത്തേണ്ട സാമൂഹിക ആഘാത പഠനം സർക്കാർ ബന്ധമുള്ള ഏജൻസി നടത്തി എന്നത് ഉൾപ്പെടെ പിഴവുകൾ ഉന്നയിച്ച് ചെറുവള്ളി എസ്റ്റേറ്റ് അധികൃതർ കോടതിയെ സമീപിച്ചതിനെ തുടർന്നാണ് ആദ്യ വിജ്ഞാപനം റദ്ദായത്. ഈ പിഴവുകൾ പരിഹരിച്ചാണ് വീണ്ടും പഠനവും വിദഗ്ധ സമിതിയുടെ ശിപാർശയുമായി ഇപ്പോൾ പുതിയ വിജ്ഞാപനമായിരിക്കുന്നത്. എന്നാൽ ഈ വിജ്ഞാപനത്തിലും പിഴവുകൾ ഉന്നയിച്ച് വീണ്ടും നിയമ വ്യവഹാരം നേരിട്ടേക്കാം. പാലാ സബ് കോടതിയിലുള്ള എസ്റ്റേറ്റിന്‍റെ ഉടമസ്ഥാവകാശ തർക്കവും ഭൂമി ഏറ്റെടുക്കലിന് തടസമായി ഉന്നയിക്കപ്പെടാം. തീരാതെ തർക്കം പാലാ സബ് കോടതിയിൽ ചെറുവള്ളി എസ്റ്റേറ്റിന്‍റെ ഉടമസ്ഥാവകാശം സംബന്ധിച്ച് കേസ് നടന്നുകൊണ്ടിരിക്കുകയാണ്. ജൂണിൽ അടുത്ത വിസ്താരം ആരംഭിക്കും. ഈ കേസ് തീർപ്പാകാതെ എങ്ങനെ എസ്റ്റേറ്റ് ഏറ്റെടുക്കാൻ കഴിയും എന്നത് പ്രധാന നിയമ പ്രശ്നമാണ്. പത്തനംതിട്ടയിലേക്ക് ഇതിനിടെയാണ് പത്തനംതിട്ട ജില്ലയിൽ വിമാനത്താവള പദ്ധതി ആവിഷ്‌കരിക്കുമെന്ന് മുഖ്യമന്ത്രി പ്രഖ്യാപിച്ചത്. കഴിഞ്ഞ ദിവസം പത്തനംതിട്ടയിൽ സംസ്ഥാന സർക്കാരിന്‍റെ ഭരണ വാർഷിക പരിപാടിയിൽ വച്ചാണ് മുഖ്യമന്ത്രി ഈ പ്രഖ്യാപനം നടത്തിയത്. എന്നാൽ എരുമേലിയിലെ പദ്ധതി ഒഴിവാക്കുമെന്നോ പകരം ആണെന്നോ മുഖ്യമന്ത്രി വ്യക്തമാക്കിയില്ല. നിലവിൽ പത്തനംതിട്ട ജില്ലയിലെ കൊടുമൺ എസ്റ്റേറ്റ് ശബരിമല വിമാനത്താവള പദ്ധതിക്ക് പരിഗണിക്കണമെന്ന നിർദേശം ഹൈക്കോടതിയിൽ നിന്നുയർന്നതുമാണ്.

സോനറ്റ് ജോസിന് ആശംസകളുമായി മാർ ജോസ് പുളിക്കൽ

കാഞ്ഞിരപ്പള്ളി: സിവിൽ സർവീസ് പരീക്ഷയിൽ 54-ാം റാങ്ക് നേടിയ സോനറ്റ് ജോസ് ഈറ്റയ്ക്കക്കുന്നേലിന് ഭവനത്തിലെത്തി ആശംസകൾ നേർന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. വിശ്വാസബോധ്യത്തിന്‍റെ ശക്തിയിൽ പ്രതിസന്ധികളിൽ തളരാതെ ഉറച്ച ലക്ഷ്യബോധത്തോടെ പരിശ്രമം തുടർന്ന സോനറ്റ് അഭിനന്ദനീയ മാതൃകയാണ് നൽകിയിരിക്കുന്നതെന്ന് മാർ ജോസ് പുളിക്കൽ പറഞ്ഞു. സാമൂഹ്യ പ്രതിബദ്ധതയോടെ വർത്തിച്ച് മൂല്യബോധത്തോടെ പെരുമാറുന്ന മികച്ച ഉദ്യോഗസ്ഥയായി വർത്തിക്കാൻ സോനറ്റിന് കഴിയട്ടെയെന്ന് മാർ ജോസ് പുളിക്കൽ ആശംസിച്ചു. പാർശ്വവത്കരിക്കപ്പെട്ടവരെ പരിഗണിക്കുന്നതിനും മികച്ച വിദ്യാഭ്യാസത്തിലൂടെ കർമശേഷിയുള്ള പുതിയ തലമുറയെ വാർത്തെടുക്കുന്നതിനുമുള്ള ആത്മാർഥമായ ആഗ്രഹമാണ് സിവിൽ സർവീസ് ലക്ഷ്യത്തിന് അധ്വാനിക്കുന്നതിന് പ്രേരണയായതെന്ന് സോനറ്റ് പറഞ്ഞു. ഇടവകക്കൂട്ടായ്മയും യുവദീപ്തി-എസ്എംവൈഎം, കുടുംബ കൂട്ടായ്മ, സ്റ്റുഡന്‍റ് പോലീസ് എന്നിവയും തന്‍റെ ലക്ഷ്യബോധത്തെ രൂപീകരിക്കുന്നതിന് നൽകിയ പ്രേരണയും പ്രചോദനവും ഹൃദയപൂർവം സ്മരിക്കുന്നതായും സോനറ്റ് പറഞ്ഞു. കാഞ്ഞിരപ്പള്ളി രൂപത പുഞ്ചവയൽ ഇടവകാംഗമായ സോനറ്റ് ഈറ്റയ്ക്കക്കുന്നേൽ രൂപത യുവദീപ്തി-എസ്എംവൈഎം സജീവ പ്രവർത്തകയും പുഞ്ചവയൽ യൂണിറ്റ് പ്രസിഡന്‍റുമായിരുന്നു. പുഞ്ചവയൽ പള്ളി വികാരി ഫാ. സെബാസ്റ്റ്യൻ കിടങ്ങത്താഴെ, രൂപത പാസ്റ്ററൽ അനിമേഷൻ ഡയറക്ടർ ഫാ. സ്റ്റാൻലി പുള്ളോലിക്കൽ, ഫാ. ജേക്കബ് ചാത്തനാട്ട്, കുടുംബകൂട്ടായ്മ അംഗങ്ങൾ എന്നിവരും രൂപതാധ്യക്ഷനൊപ്പം ഭവനത്തിലെത്തിയിരുന്നു. ആദരിച്ചു മുണ്ടക്കയം: സിവിൽ സർവീസ് പരീക്ഷയിൽ 54-ാം റാങ്ക് നേടി ഉന്നത വിജയം കരസ്ഥമാക്കിയ സോനറ്റ് ജോസിനെ കോൺഗ്രസ് മുണ്ടക്കയം ബ്ലോക്ക് കമ്മിറ്റി വീട്ടിലെത്തി ആദരിച്ചു. ബ്ലോക്ക് പ്രസിഡന്‍റ് ബിനു മറ്റക്കര, ഡിസിസി നിർവഹസമതി അംഗം റോയ് കപ്പലുമാക്കൽ, വി.ടി. അയൂബ് ഖാൻ, കെ.എസ്. രാജു, ബി. ജയചന്ദ്രൻ, കെ.കെ. ജനാർദനൻ, തുടങ്ങിയവർ പ്രസംഗിച്ചു.

കാഞ്ഞിരപ്പള്ളി ബൈപാസ്: പില്ലർ നിര്‍മാണം ആരംഭിച്ചു

കാഞ്ഞിരപ്പള്ളി: കാഞ്ഞിരപ്പള്ളി ബൈപാസിനായി നിര്‍മിക്കുന്ന മേല്‍പ്പാലത്തിന്‍റെ അപ്രോച്ച് റോഡുമായി ബന്ധിപ്പിക്കുന്ന രണ്ടാമത്തെ ഭിത്തിയുടെയും പില്ലറിന്‍റെയും നിര്‍മാണം ആരംഭിച്ചു. ടൗണ്‍ഹാളിന് സമീപത്തും മണിമല റോഡിന് സമീപത്തുമായി രണ്ടിടങ്ങളിലായി നാല് പില്ലറുകളാണുള്ളത്. ടൗണ്‍ഹാളിന് സമീപത്തെ പില്ലറുകളുടെ നിര്‍മാണ പ്രവർത്തനങ്ങളാണ് ആരംഭിച്ചത്. ദേശീയപാതയില്‍ പഞ്ചായത്ത് ഓഫീസ് പടിക്കല്‍നിന്ന് ആരംഭിച്ച് മണിമല റോഡിനും ചിറ്റാര്‍ പുഴയ്ക്കും കുറുകെയാണ് മേല്‍പ്പാലം നിര്‍മിക്കുന്നത്. അടുത്ത പില്ലറിന്‍റെ സ്ഥാനം മണിമല റോഡരികില്‍ വരുന്നതിനാല്‍ ഗതാഗത നിയന്ത്രണം ഏര്‍പ്പെടുത്തേണ്ടി വരുമെന്നതിനാല്‍ ആദ്യ രണ്ടു പില്ലറുകള്‍ നിര്‍മിച്ച ശേഷമാകും മറ്റുള്ളവ നിര്‍മിക്കുക. ദേശീയപാതയ്ക്ക് സമീപമുള്ള ആദ്യത്തെ തൂണിന്‍റെ കോണ്‍ക്രീറ്റിംഗ് പൂർത്തിയാക്കിയിരുന്നു. നിര്‍ദിഷ്ട പദ്ധതി പ്രദേശത്തെ ഉയര്‍ന്ന ഭാഗം ഇടിച്ചുനിരത്തിയും താഴ്ന്ന ഭാഗങ്ങളില്‍ മണ്ണിട്ടു നികത്തിയും റോഡ് വെട്ടിയിരുന്നു. ബൈപാസ് അവസാനിക്കുന്ന ഫാബീസ് ഓഡിറ്റോറിയത്തിനു സമീപം ടാറിംഗ് ജോലികളുടെ ഭാഗമായി മെറ്റൽ നിരത്തുന്ന പ്രവർത്തനങ്ങളും ആരം ഭിച്ചു. ബൈപാസ് നിർമാണത്തിന്‍റെ ഭാഗമായി പഞ്ചായത്ത് ഓഫീസിനു മുന്പിലെ മണ്ണും മാറ്റിയിരുന്നു. ദേശീയപാതയിൽനിന്നു ബൈപാസിലേക്കു തിരിയുന്ന ഇവിടെ റൗണ്ടാന നിർമിക്കാനാണ് പദ്ധതി. ഹൈമാസ്റ്റ് ലൈറ്റ് ഉൾപ്പെടെ ആവശ്യമായ വെളിച്ചത്തിനുള്ള സംവിധാനങ്ങളും സുരക്ഷാ ക്രമീകരണങ്ങളും ഏർപ്പെടുത്തും. ഇവിടെ നിന്നാണ് മണിമല റോഡിനും ചിറ്റാർപുഴയ്ക്കും മീതേയുള്ള മേൽപ്പാലം നിർമിക്കുന്നത്. റോഡ്‌സ് ആന്‍ഡ് ബ്രിഡ്ജസ് ഡെവലപ്‌മെന്‍റ് കോര്‍പറേഷനാണു പദ്ധതിയുടെ നിര്‍മാണച്ചുമതല. ദേശീയപാത 183ല്‍ കാഞ്ഞിരപ്പള്ളി പഞ്ചായത്ത് ഓഫീസിനു മുന്പിലെ വളവില്‍ നിന്നാരംഭിച്ച് പൂതക്കുഴിയില്‍ ഫാബീസ് ഓഡിറ്റോറിയത്തിനു സമീപം ദേശീയപാതയില്‍ പ്രവേശിക്കുന്ന ബൈപാസിന്‍റെ ദൂരം 1.80 കിലോമീറ്ററാണ്.

പോസ്റ്റ് ഒടിഞ്ഞ് കാർഷെഡിനു മുകളിൽ വീണു

കാഞ്ഞിരപ്പള്ളി: ശക്തമായ കാറ്റിൽ പോസ്റ്റ് ഒടിഞ്ഞ് കാർഷെഡിന്‍റെ മുകളിലേക്കു വീണു. കുന്നുംഭാഗം പെരുന്നേപറന്പിൽ പയസ് ജോസഫിന്‍റെ വീടിന് സമീപത്തുനിന്ന പോസ്റ്റാണ് ഒടിഞ്ഞു വീണത്. അപകടത്തിൽ കാറിനും കാർഷെഡിനും ഭാഗികമായി നാശമുണ്ടായി. ഇന്നലെ വൈകുന്നേരം നാലോടെ മഴയ്ക്കൊപ്പം വീശിയടിച്ച ശക്തമായ കാറ്റിലാണ് പോസ്റ്റ് ഒടിഞ്ഞ് വീണത്.

മുണ്ടക്കയം 31-ാംമൈലിൽ പാതയോരത്ത് ബൈക്ക് ഉപേക്ഷിച്ച നിലയിൽ

മുണ്ടക്കയം: മുപ്പത്തൊന്നാം മൈൽ പാലത്തിന് സമീപം എംഇഎസ് റോഡിൽ ബൈക്ക് ഉപേക്ഷിച്ച നിലയിൽ കണ്ടെത്തി. നമ്പർ പ്ലേറ്റുകൾ ഊരി മാറ്റിയ നിലയിലാണ് വാഹനം കഴിഞ്ഞ ഒരു മാസമായി റോഡിന്‍റെ വശത്തിരിക്കുന്നത്. ബജാജിന്‍റെ ഏറ്റവും പുതിയ മോഡലിലുള്ള ബ്ലാക്ക് പൾസർ ബൈക്കാണ് നാളുകളായി ഉടമസ്ഥൻ ഇല്ലാതെ റോഡിന്‍റെ വശത്ത് പാർക്ക് ചെയ്തിരിക്കുന്നത്. വാഹനത്തിന്‍റെ സ്പെയർ പാർട്സുകളിൽ പാതിഭാഗവും ഊരി മാറ്റിയ നിലയിലാണ്. മറ്റ് ഏതോ ടൂവീലറിന്‍റെ ബാറ്ററി ഇതിൽ താത്കാലികമായി വച്ചുപിടിപ്പിച്ചാണ് വാഹനം ഓടിച്ചിരിക്കുന്നത്. ബൈക്ക് മോഷ്ടിച്ചു കൊണ്ടുവന്നതോ അല്ലെങ്കിൽ ലഹരി സംഘങ്ങൾ ഇവിടെ ഉപേക്ഷിച്ചതോ എന്ന സംശയമാണ് നാട്ടുകാർക്കുള്ളത്. വാഹനം ഉപേക്ഷിച്ച നിലയിൽ കണ്ടെത്തിയ വിവരം പോലീസിനെ അറിയിച്ചെങ്കിലും നടപടി ഉണ്ടാകുന്നില്ലെന്ന് നാട്ടുകാർ ആരോപിച്ചു. വാഹനത്തിന്‍റെ എൻജിൻ നമ്പരടക്കം പരിശോധിച്ചാൽ ഇത് മോഷ്ടിച്ച ബൈക്കാണോ അല്ലെങ്കിൽ ലഹരി കടത്ത്‌ അടക്കമുള്ള സംഭവങ്ങളെ തുടർന്ന് പിടിക്കാതിരിക്കാൻ ഉപേക്ഷിച്ചതാണോ എന്ന വ്യക്തമായ വിവരം ലഭിക്കും. എന്നാൽ ഇതിനും അധികൃതർ തയാറാകുന്നില്ലെന്നു നാട്ടുകാർ പറഞ്ഞു.

പനമറ്റം മേഖലയിൽ കാറ്റ്; വൻ നാശനഷ്ടം

പനമറ്റം: പനമറ്റം ഹെൽത്ത് സെന്‍റർ ഭാഗത്ത് ഇന്നലെ വൈകുന്നേരം നാലോടെ മഴയ്ക്കൊപ്പം വീശിയടിച്ച കാറ്റിൽ നാശനഷ്ടം. പനമറ്റം-തമ്പലക്കാട് റോഡിലേയ്ക്ക് ഒടിഞ്ഞുവീണ തേക്കുമരം ഒരു മണിക്കൂറോളം ഗതാഗതതടസമുണ്ടാക്കി. ഹെൽത്ത് സെന്‍ററിനും പുതിയകത്തിനുമിടയിലായിരുന്നു കാറ്റ് നാശം വിതച്ചത്. വൈദ്യുതികമ്പികളും പൊട്ടിവീണു. കാഞ്ഞിരപ്പള്ളിയിൽനിന്നു ഫയർഫോഴ്‌സെത്തിയാണ് മരങ്ങൾ വെട്ടിമാറ്റി ഗതാഗതം പുനഃസ്ഥാപിച്ചത്. പറപ്പിള്ളാത്ത് ചന്ദ്രബാബുവിന്‍റെ 50 ഇഞ്ച് വണ്ണമുള്ള തേക്കാണ് റോഡിലേക്ക് ഒടിഞ്ഞു വീണത്. പറപ്പിള്ളാത്ത് ഉണ്ണിയുടെ രണ്ട് തേക്ക്, ഒരുപ്ലാവ്, രണ്ട് റബർ എന്നിവയും കാറ്റിൽ ഒടിഞ്ഞുവീണു. സമീപത്തെ നിരവധി പേരുടെ കപ്പ, വാഴ കൃഷികൾക്കും കാറ്റ് നാശമുണ്ടായി. മേഖലയിൽ കനത്ത ഇടിമിന്നലുമുണ്ടായി.

പാലാ ബാര്‍ അസോസിയേഷന്‍ വനിതകളുടെ നിയന്ത്രണത്തില്‍

പാലാ: പാലാ ബാര്‍ അസോസിയേഷന്‍റെ ഭരണസമിതിയില്‍ എല്ലാ സ്ഥാനത്തേക്കും തെരഞ്ഞെടുക്കപ്പെട്ടത് വനിതകള്‍. പ്രസിഡന്‍റ് സ്ഥാനത്തേക്കു നടന്ന തെരഞ്ഞെടുപ്പില്‍ 97 വോട്ടുകളുടെ ഭൂരിപക്ഷത്തിനാണ് ഉഷാ മേനോന്‍ തെരഞ്ഞെടുക്കപ്പെട്ടത്. ഇതാദ്യമായാണ് മുഴുവന്‍ പദവികളിലും വനിതകള്‍ തെരഞ്ഞെടുക്കപ്പെടുന്നത്. മിനിമോള്‍ സിറിയക്-വൈസ് പ്രസിഡന്‍റ്, ആര്‍. രമ്യ-സെക്രട്ടറി, പ്രജിഷ ജോസ്-ജോയിന്‍റ് സെക്രട്ടറി, നിഷ നിര്‍മല ജോര്‍ജ്, ആശ രവി-വനിതാ പ്രതിനിധികൾ, സോളിമോള്‍ സെബാസ്റ്റ്യന്‍, രമ്യ റോസ് ജോര്‍ജ്, കെ.ജി. മഞ്ജുഷ, പി.എസ്. സഞ്ജു, ഗായത്രി രവീന്ദ്രന്‍, മാഗി ബല്‍റാം, ടിനു സ്‌കറിയ, എന്‍.ജി. ദീപ, ഐറിന്‍ എലിസബത്ത്-എക്‌സിക്യൂട്ടീവ് കമ്മിറ്റി അംഗങ്ങള്‍ എന്നിവരാണു മറ്റു ഭാരവാഹികൾ. സ്ത്രീശക്തീകരണത്തിന്‍റെ കാലഘട്ടത്തില്‍ പാലാ ബാര്‍ അസോസിയേഷനില്‍ വനിതകള്‍ മാത്രമുള്‍പ്പെടുന്ന ഭരണസമിതി ചുമതലയേൽക്കുന്നതു ശ്രദ്ധേയമായി.

മാർത്തോമ്മാമാർഗം ഏറ്റുചൊല്ലി കുറവിലങ്ങാട്ട് പുതുഞായർ ആചരണം

കുറവിലങ്ങാട്: മാർത്തോമ്മാ ശ്ലീഹാ സമ്മാനിച്ച ക്രൈസ്തവ വിശ്വാസം ഏറ്റുപറഞ്ഞ് ആയിരങ്ങൾ മുത്തിയമ്മയുടെ സന്നിധിയിൽ സംഗമിച്ചു. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന പള്ളിയിലെ പുതുഞായർ ആചരണത്തിന്‍റെ ഭാഗമായാണ് വിശ്വാസത്തിന്‍റെ പരസ്യപ്രഖ്യാപനമൊരുക്കി തിരുക്കർമങ്ങളും പ്രദക്ഷിണവും നടത്തിയത്. പുതുഞായർ ആചരണത്തിനൊപ്പം വിശുദ്ധ ഗീവർഗീസ് സഹദായുടെ തിരുനാളാഘോഷവും നടത്തി. ഫ്രാൻസിസ് മാർപാപ്പയുടെ മരണവുമായി ബന്ധപ്പെട്ട് ദുഃഖാചരണം കണക്കിലെടുത്ത് ആത്മീയചടങ്ങുകളിൽനിന്ന് ആഘോഷങ്ങൾ പൂർണമായി ഒഴിവാക്കിയിരുന്നു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി വിശുദ്ധ കുർബാനയിൽ കാർമികത്വം വഹിച്ചു. ആയിരങ്ങൾ പങ്കുചേർന്ന ജപമാല മെഴുകുതിരി പ്രദക്ഷിണവും നടന്നു. സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. തോമസ് താന്നിമലയിൽ, ഫാ. ജോസഫ് ചൂരയ്ക്കൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ എന്നിവർ തിരുക്കർമങ്ങളിൽ സഹകാർമികരായി.

മുഖ്യമന്ത്രി പിണറായി വിജയന്‍ നാളെ കോട്ടയത്ത്

കോട്ടയം: എല്‍ഡിഎഫ് സര്‍ക്കാരിന്‍റെ നാലാം വാര്‍ഷികാഘോഷങ്ങളുടെ ഭാഗമായി നാളെ കോട്ടയത്ത് മുഖ്യമന്ത്രി പിണറായി വിജയന്‍ സര്‍ക്കാരിന്‍റെയും എല്‍ഡിഎഫിന്‍റെയും പരിപാടികളില്‍ പങ്കെടുക്കും. രാവിലെ 10നു കോട്ടയത്ത് ആന്‍സ് കണ്‍വന്‍ഷന്‍ സെന്‍ററില്‍ മുഖ്യമന്ത്രി സമൂഹത്തിലെ വിവിധ ശ്രേണിയില്‍പ്പെട്ട അഞ്ഞൂറോളം പേരുമായി സംവദിക്കും. വൈകുന്നേരം നാലിന് കോട്ടയം നെഹ്‌റു സ്റ്റേഡിയത്തില്‍ നടക്കുന്ന എല്‍ഡിഎഫ് നേതൃത്വത്തിലുള്ള മഹായോഗത്തില്‍ മുഖ്യമന്ത്രി പ്രസംഗിക്കും. മന്ത്രിമാരും ഘടകകക്ഷി സംസ്ഥാന നേതാക്കളും യോഗത്തില്‍ പ്രസംഗിക്കും. 50,000 പേര്‍ പങ്കെടുക്കുന്നു സംഘാടകർ പറഞ്ഞു. എല്‍ഡിഎഫ് ജില്ലാ കണ്‍വീനര്‍ പ്രഫ. ലോപ്പസ് മാത്യു, സിപിഎം ജില്ലാ സെക്രട്ടറി ടി.ആര്‍. രഘുനാഥന്‍, സിപിഐ ജില്ലാ സെക്രട്ടറി വി.ബി. ബിനു, ബെന്നി മൈലാടൂര്‍, എം.റ്റി. കുര്യന്‍, സണ്ണി തോമസ്, മാത്യൂസ് ജോര്‍ജ്, പ്രശാന്ത് നന്ദകുമാര്‍, ഔസേപ്പച്ചന്‍ തകിടിയേല്‍, ജിയാഷ് കരീം, ബോബന്‍ തെക്കേല്‍ തുടങ്ങിയ ഘടകകക്ഷി നേതാക്കള്‍ പരിപാടികള്‍ക്ക് നേതൃത്വം നല്‍കും.

തിരുവാതുക്കലിൽ കൊല്ലപ്പെട്ട ദമ്പതികളുടെ സംസ്‌കാരം നടത്തി

കോട്ടയം: തിരുവാതുക്കലിൽ കൊല്ലപ്പെട്ട ദമ്പതികളുടെ സംസ്‌കാരം നടത്തി. ശ്രീവത്സം വീട്ടിൽ ടി.കെ. വിജയകുമാർ (70), ഭാര്യ ഡോ. മീര (67) എന്നിവരുടെ മൃതദേഹങ്ങളാണ് ഇന്നലെ സംസ്‌കരിച്ചത്. തിരുനക്കര ഇന്ദ്രപ്രസ്ഥം ഓഡിറ്റോറിയത്തിലും വീട്ടിലും മൃതദേഹങ്ങൾ പൊതുദർശനത്തിന് വച്ചിരുന്നു. മന്ത്രി വി.എൻ. വാസവൻ, തിരുവഞ്ചൂർ രാധാകൃഷ്ണൻ എംഎൽഎ എന്നിവർ വീട്ടിലെത്തി അന്ത്യോപചാരമർപ്പിച്ചു. ഓഡിറ്റോറിയത്തിലും വീട്ടിലുമായി സമൂഹ്യ രാഷ്‌ട്രീയ രംഗത്തുള്ളവരും ജീവനക്കാരും അന്തിമോപചാരം അർപ്പിക്കാനെത്തി. യുഎസിലുള്ള മകൾ ഗായത്രി കഴിഞ്ഞ ദിവസം നാട്ടിലെത്തിയിരുന്നു. വിജയകുമാറിനെയും ഭാര്യ മീരയെയും മുൻ ജീവനക്കാരനായ ആസാം സ്വദേശി അമിത് ഉറാംഗ് കോടാലിക്ക് തലയ്ക്കടിച്ച് കൊലപ്പെടുത്തുകയായിരുന്നു. മകൻ ഗൗതം അന്ത്യവിശ്രമം കൊള്ളുന്നയിടത്തിന് സമീപത്തായാണ് ഇരുവർക്കും അന്ത്യവിശ്രമം. മകൾ ഡോ. ഗായത്രി, വിജയകുമാറിന്‍റെ സഹോദരൻ വിശ്വനാഥൻ എന്നിവർ ചേർന്ന് ചിതയ്ക്ക് തീകൊളുത്തി മൃതദേഹങ്ങൾ വീട്ടുവളപ്പിൽ സംസ്‌കരിച്ചു.

ബ്ലോക്ക് പഞ്ചായത്തിന്‍റെ നേതൃത്വത്തിൽ കുറവിലങ്ങാട് പഞ്ചായത്തിൽ രണ്ടാമത് കളിസ്ഥലം

കുറവിലങ്ങാട്: മാണികാവിൽ എംവിഐപിയുടെ സ്ഥലത്ത് പൊതു കളിസ്ഥലം നിർമിക്കാൻ സർക്കാർ അനുമതി നൽകി. മാണികാവിൽ മുവാറ്റുപുഴ നദീതട ജലസേചന പദ്ധതിക്കായി കനാൽ നിർമാണത്തോടനുബന്ധിച്ച് തുരങ്കത്തിനായി ഏറ്റെടുത്ത സ്ഥലത്തിൽ ഉപയോഗമില്ലാതെ കിടക്കുന്ന സ്ഥലം പൊതു കളിസ്ഥലം നിർമിക്കുന്നതിന് വിട്ടുനൽകണമെന്ന ഉഴവൂർ ബ്ലോക്ക് പഞ്ചായത്തിന്‍റെ അപേക്ഷയിലാണ് തീരുമാനം. മന്ത്രി റോഷി അഗസ്റ്റിന് ബ്ലോക്ക് പഞ്ചായത്തംഗം പി.സി. കുര്യനാണ് നിവേദനം സമർപ്പിച്ചിരുന്നത്. പുതിയ സർക്കാർ ഉത്തരവോടെ 73 മീറ്റർ നീളത്തിലും 40 മീറ്റർ വീതിയിലുമായി 2920 ചതുരശ്ര മീറ്റർ ഭൂമി കളിസ്ഥലത്തിനായി പ്രയോജനപ്പെടുത്താനാകും. ലഹരി വസ്തുക്കളുടെ ഉപയോഗം വ്യാപകമാകുന്ന സാഹചര്യത്തിൽ യുവജനങ്ങളെ കളിക്കളത്തിലേക്ക് ആകർഷിക്കുന്നതിന് ജലസേചന വകുപ്പിന്‍റെ അനുയോജ്യമായ സ്ഥലങ്ങളിൽ കളിസ്ഥലം നിർമിക്കുന്നതിന് തദ്ദേശ സ്വയംഭരണ സ്ഥപനങ്ങൾക്ക് അനുമതി നൽകുമെന്ന് മന്ത്രി റോഷി അഗസ്റ്റിൻ കഴിഞ്ഞ നിയമസഭാ സമ്മേളനത്തിൽ അറിയിച്ചിരുന്നു. ഇതനുസരിച്ചുള്ള ആദ്യ അനുമതിയാണ് കുറവിലങ്ങാടിന് ലഭിച്ചിട്ടുള്ളത്. മാണികാവിലെ കളിസ്ഥല നിർമാണം ഉഴവൂർ ബ്ലോക്ക് പഞ്ചായത്ത് ഈ വർഷത്തെ പദ്ധതിയിൽ ഉൾപ്പെടുത്തിയിട്ടുണ്ട്. കോട്ടയം ജില്ലാ പഞ്ചായത്ത് കുറവിലങ്ങാട് ഡിവിഷൻ വിഹിതമായി 10 ലക്ഷം രൂപയും ഈ പദ്ധതിക്ക് നൽകും. ടെൻഡർ നടപടികൾ പൂർത്തിയാകുന്നതനുസരിച്ച് കളി സ്ഥലത്തിന്‍റെ നിർമാണം ആരംഭിക്കുമെന്ന് ബ്ലോക്ക് പഞ്ചായത്ത് അംഗം പി.സി. കുര്യൻ അറിയിച്ചു. ഉഴവൂർ ബ്ലോക്ക് പഞ്ചായത്തിന്‍റെ പദ്ധതിയിൽപ്പെടുത്തി 2021-22 വർഷം പഞ്ചായത്ത് 12-ാം വാർഡിൽ ബ്ലോക്ക് പഞ്ചായത്ത് സ്ഥലത്ത് മിനി സ്റ്റേഡിയം നിർമിച്ചിരുന്നു.

പുണ്യം വാനപ്രസ്ഥ കേന്ദ്രത്തിന്‍റെ പുതിയ മന്ദിരോദ്ഘാടനം

വാഴൂര്‍: തീർഥപാദപുരം കേന്ദ്രമാക്കി പ്രവര്‍ത്തിക്കുന്ന പുണ്യം ട്രസ്റ്റിന്‍റെ കീഴിലുള്ള വാനപ്രസ്ഥകേന്ദ്രത്തിന്‍റെ പുതിയ മന്ദിരത്തിന്‍റെ ഉദ്ഘാടനം ഇന്നു രാവിലെ 11ന് കേരള ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ നിര്‍വഹിക്കും. സ്വാഗതസംഘം ചെയര്‍മാന്‍ ജി. രാമന്‍ നായര്‍ അധ്യക്ഷത വഹിക്കും. മാതൃസമിതിയുടെ യോഗ, കൗണ്‍സലിംഗ് കേന്ദ്രം എസ്എന്‍ ട്രസ്റ്റ് എക്സിക്യൂട്ടീവ് മെംബര്‍ പ്രീതി നടേശന്‍ ഉദ്ഘാടനം ചെയ്യും. പുണ്യം ഭവനദാന പദ്ധതിയുടെ ആദ്യ വീടിനുള്ള ഭൂദാനം രാഷ്‌ട്രീയ സ്വയംസേവകസംഘം ദക്ഷിണ കേരളം പ്രാന്ത സംഘചാലക് പ്രഫ. എം.എസ്. രമേശന്‍ നിര്‍വഹിക്കും. മള്ളിയൂര്‍ പരമേശ്വരന്‍ നമ്പൂതിരി, ചീഫ് വിപ്പ് ഡോ. എന്‍. ജയരാജ്, രാഷ്‌ട്രീയ സ്വയംസേവക സംഘം വിഭാഗ് സംഘചാലക് പി.പി. ഗോപി, വാഴൂര്‍ പഞ്ചായത്ത് പ്രസിഡന്‍റ് തോമസ് വെട്ടുവേലില്‍, എന്‍എസ്എസ് ഡയറക്ടര്‍ ബോര്‍ഡ് അംഗം എം.എസ്. മോഹന്‍, എസ്എന്‍ഡിപി യോഗം ചങ്ങനാശേരി യൂണിയന്‍ പ്രസിഡന്‍റ് ഗിരീഷ് കോനാട്ട്, കേരള വിശ്വകര്‍മസഭ സംസ്ഥാന വര്‍ക്കിംഗ് പ്രസിഡന്‍റ് കെ.കെ. ഹരി, കെപിഎംഎസ് സംസ്ഥാന അസിസ്റ്റന്‍റ് സെക്രട്ടറി എന്‍.കെ. റജി, കൊച്ചിന്‍ എക്‌സ്‌പോര്‍ട്‌സ് പ്രൈവറ്റ് ലിമിറ്റഡ് ചെയര്‍മാന്‍ ജി. ചന്ദ്രശേഖരപിള്ള, വാഴൂര്‍ പഞ്ചായത്തംഗം പ്രഫ. പുഷ്‌കലാദേവി, റബര്‍ബോര്‍ഡ് എക്സിക്യൂട്ടീവ് മെംബര്‍ എന്‍. ഹരി, ട്രസ്റ്റ് മാനേജിംഗ് ട്രസ്റ്റി ആര്‍. അനില്‍കുമാര്‍ തുടങ്ങിയവർ പ്രസംഗിക്കും. രണ്ടു പതിറ്റാണ്ടിലേറെയായി സാമൂഹ്യ സേവന രംഗത്തു വാഴൂർ പുണ്യം ട്രസ്റ്റ് പ്രവര്‍ത്തിച്ചു വരുന്നു. 22 കുട്ടികൾ ബാലഭവനത്തിൽ താമസിച്ച് പഠിക്കുന്നു. വാർധക്യത്തിൽ ഒറ്റപ്പെട്ടു പോയ 24 പേർ പുണ്യം വാനപ്രസ്ഥ കേന്ദ്രത്തിലുണ്ട്. വൈദ്യസഹായം, വിദ്യാഭ്യാസം, മംഗല്യം, ഭവനദാനം, പട്ടിണി രഹിത ഗ്രാമം, യോഗ കൗൺസലിംഗ് തുടങ്ങിയ നിരവധി പദ്ധതികളും ഇവിടെയുണ്ട്.

മേയ് ദിന റാലിയും പൊതുസമ്മേളനവും

കോട്ടയം: മേയ് ഒന്നിന് സിഐടിയു ആഭിമുഖ്യത്തില്‍ റാലിയും പൊതുസമ്മേളനവും നടത്തും. കോട്ടയത്ത് റാലി രാവിലെ പത്തിന് സിപിഎം പോളിറ്റ് ബ്യൂറോ അംഗം എ. വിജയരാഘവന്‍ ഉദ്ഘാടനം ചെയ്യും. മുണ്ടക്കയത്ത് രാവിലെയും വൈക്കത്ത് വൈകുന്നേരവും എളമരം കരീം ഉദ്ഘാടനം ചെയ്യും. ചങ്ങനാശേരിയില്‍ കെ. കെ. ശൈലജ, പാമ്പാടിയില്‍ മന്ത്രി വി.എന്‍. വാസവന്‍, തലയോലപ്പറമ്പില്‍ വൈക്കം വിശ്വന്‍, ഈരാറ്റുപേട്ടയില്‍ കെ.ജെ. തോമസ്, കടുത്തുരുത്തിയില്‍ സി.ബി. ചന്ദ്രബാബു, പാലായില്‍ ടി.ആര്‍. രഘുനാഥന്‍, ഏറ്റുമാനൂരില്‍ കെ. അനില്‍കുമാര്‍, പൊന്‍കുന്നത്ത് റെജി സഖറിയ എന്നിവര്‍ റാലി ഉദ്ഘാടനം ചെയ്യും.

ജോബ് സ്റ്റേഷന് വാഴൂർ ബ്ലോക്ക് പഞ്ചായത്തിൽ തുടക്കം

വാഴൂർ: അഭ്യസ്തവിദ്യർക്ക് വളരെ എളുപ്പത്തിൽ തൊഴിൽ കണ്ടെത്തുന്നതിന് ആവശ്യമായ സഹായങ്ങൾ നൽകുകയെന്ന ഉദ്ദേശ്യത്തോടെ വാഴൂർ ബ്ലോക്ക് പഞ്ചായത്തിൽ ജോബ് സ്റ്റേഷന്‍റെ പ്രവർത്തനം ആരംഭിച്ചു. നോളഡ്ജ് ഇക്കോണമി മിഷന്‍റെ ഡിജിറ്റൽ വർക്ക് ഫോഴ്സ് മാനേജ്മെന്‍റ് സിസ്റ്റത്തിന്‍റെ ഭാഗമായാണ് ജോബ് സ്റ്റേഷന്‍റെ പ്രവർത്തനം. ബ്ലോക്കിലെ ആറ് പഞ്ചായത്തുകളിൽനിന്നായി തെരഞ്ഞെടുക്കപ്പെട്ട ലോക്കൽ റിസോഴ്സ് പേഴ്സൺമാരുടെ അർധദിന പരിശീലനവും നടത്തി. എല്ലാ പഞ്ചായത്തുകളിലും ഫെസിലിറ്റേഷൻ സെന്‍ററുകൾ ആരംഭിക്കും. ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി ഉദ്ഘാടനം ചെയ്തു. വൈസ് പ്രസിഡന്‍റ് ഗീത എസ്. പിള്ള അധ്യക്ഷത വഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ഷാജി പാമ്പൂരി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പി.എം. ജോൺ, പഞ്ചായത്ത് പ്രസിഡന്‍റുമാരായ റംലാ ബീഗം, രാജമ്മ രവീന്ദ്രൻ, ആർജിഎസ്എ ജില്ലാ കോ-ഓർഡിനേറ്റർ സിന്ദൂര സന്തോഷ്, ബ്ലോക്ക് പഞ്ചായത്ത് സെക്രട്ടറി പി.എൻ. സുജിത്, ബ്ലോക്ക് പഞ്ചായത്ത് മെംബർമാർ എന്നിവർ പ്രസംഗിച്ചു.

കുറിച്ചി അദ്വൈത വിദ്യാശ്രമം എച്ച്എസ്എസ് നവതി സ്മാരക സമുച്ചയ സമർപ്പണം 29ന്

കോട്ടയം: കുറിച്ചി അദ്വൈത വിദ്യാശ്രമം ഹയര്‍ സെക്കന്‍ഡറി സ്‌കൂളില്‍ പുതിയതായി നിര്‍മിച്ച നവതി സ്മാരക സമുച്ചയം മുഖ്യമന്ത്രി പിണറായി വിജയന്‍ നാടിന് സമര്‍പ്പിക്കും. 29നു വൈകുന്നേരം 3.30ന് സ്‌കൂള്‍ അങ്കണത്തില്‍ ചേരുന്ന സമ്മേളനത്തില്‍ ശിവഗിരി ശ്രീനാരായണധര്‍മ സംഘം പ്രസിഡന്‍റ് സച്ചിദാനന്ദ സ്വാമി അധ്യക്ഷത വഹിക്കും. കേന്ദ്ര സഹമന്ത്രി ജോര്‍ജ് കുര്യന്‍ വിശിഷ്ടാതിഥിയായിരിക്കും. കെ.ജി. ബാബു രാജന്‍ സ്‌കൂള്‍ മുഖമണ്ഡപ സമര്‍പ്പണം നടത്തും. ജനറല്‍ സെക്രട്ടറി ശുഭാംഗാനന്ദ സ്വാമി, മന്ത്രി വി.എന്‍. വാസവന്‍, സ്‌കൂള്‍ കോര്‍പ്പറേറ്റ് മാനേജര്‍ വിശാലാനന്ദ സ്വാമി, ശിവഗിരി മഠം ട്രഷറര്‍ ശാരദാനന്ദ സ്വാമി, മുന്‍ കേന്ദ്രസഹമന്ത്രി വി. മുരളീധരന്‍, എസ്എന്‍ഡിപി യോഗം വൈസ്പ്രസിഡന്‍റ് തുഷാര്‍ വെള്ളാപ്പള്ളി, കൊടിക്കുന്നില്‍ സുരേഷ് എംപി, ജോബ് മൈക്കിള്‍ എംഎല്‍എ, കുറിച്ചി പഞ്ചായത്ത് പ്രസിഡന്‍റ് സുജാത സുശീലന്‍, പ്രിന്‍സിപ്പല്‍ വി. അരുണ്‍, ഹെഡ്മിസ്ട്രസ് എസ്.ടി. ബിന്ദു എന്നിവര്‍ പ്രസംഗിക്കും. ഇന്ന് രാവിലെ 10ന് വിദ്യാഭ്യാസ സെമിനാറില്‍ അദ്വൈതാനന്ദ സ്വാമി അധ്യക്ഷത വഹിക്കും. ഡോ. ജ്യോതിസ് ഉദ്ഘാടനം നിര്‍വഹിക്കും. നാളെ ഉച്ചകഴിഞ്ഞ് 2.30നു പൂര്‍വ അധ്യാപക-വിദ്യാര്‍ഥി കുടുംബ സംഗമം തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്യും. സ്വാമി വിശാലാനന്ദ അധ്യക്ഷത വഹിക്കും. പത്രസമ്മേളനത്തില്‍ സ്‌കൂള്‍ മാനേജര്‍ സ്വാമി വിശാലാനന്ദ, ആഘോഷ കമ്മിറ്റി ചെയര്‍മാര്‍ പി.എസ്. ബാബുറാം, പബ്ലിസിറ്റി കമ്മിറ്റി ചെയര്‍മാര്‍ കുറിച്ചി സദന്‍ എന്നിവര്‍ പങ്കെടുത്തു.

ഫ്രാന്‍സിസ് മാര്‍പാപ്പയ്ക്ക് ആദരമര്‍പ്പിച്ച് ചങ്ങനാശേരിയില്‍ വിലാപയാത്ര

ചങ്ങനാശേരി: ഫ്രാന്‍സിസ് മാര്‍പാപ്പയ്ക്ക് ആദരവര്‍പ്പിച്ച് ചങ്ങനാശേരിയില്‍ വിലാപ യാത്ര നടത്തി. സെന്‍റ് മേരീസ് മെത്രാപ്പോലീത്തന്‍ പള്ളിയുടെ നേതൃത്വത്തിലാണ് മാര്‍പാപ്പയ്ക്ക് ആദരവര്‍പ്പിച്ച് ടൗണ്‍ ചുറ്റി വിലാപയാത്ര നടത്തിയത്. നൂറുകണക്കിന് വിശാസികള്‍ വിലാപയാത്രയില്‍ പങ്കെടുത്തു. തുടര്‍ന്നു പള്ളിയില്‍ അനുസ്മരണ കര്‍മങ്ങള്‍ക്ക് വികാരി ഫാ. ജോസഫ് വാണിയപ്പുരയ്ക്കല്‍, മുഖ്യാകാര്‍മികത്വം വഹിച്ചു. അസിസ്റ്റന്‍റ് വികാരിമാരായ ഫാ. നിഖില്‍ അറയ്ക്കത്തറ, ഫാ. ഷെറിന്‍ കുറശേരി, ഫാ. സിറിള്‍ കളരിക്കല്‍ എന്നിവര്‍ സഹകാര്‍മികത്വം വഹിച്ചു. കൈക്കാരന്‍മാരായ എ.ജെ. ജോസഫ് ആലഞ്ചേരി, കുര്യാച്ചന്‍ ഒളശ, ചാള്‍സ് പാലാത്ര എന്നിവര്‍ നേതൃത്വം നല്‍കി.

ജോയ് നീരാളക്കാട്ടില്‍ അനുസ്മരണം

കടുത്തുരുത്തി: കോണ്‍ഗ്രസ് മുന്‍ ബ്ലോക്ക് പ്രസിഡന്‍റും കടുത്തുരുത്തി അര്‍ബന്‍ ബാങ്ക് മുന്‍ ചെയര്‍മാനുമായിരുന്ന ജോയ് നീരാളക്കോടിന്‍റെ 19-ാം ചരമവാര്‍ഷികദിനം ആചരിച്ചു. കടുത്തുരുത്തി ഐഎന്‍ടിയുസി ഭവനില്‍ നടന്ന പരിപാടി കെപിസിസി ജനറല്‍ സെക്രട്ടറി എസ്.അശോകന്‍ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ജയിംസ് പുല്ലാപ്പള്ളി അധ്യക്ഷത വഹിച്ച യോഗത്തില്‍ ടോമി കല്ലാനി മുഖ്യപ്രഭാഷണം നടത്തി. സിറിയക് മാത്യു പുഞ്ചത്തലയ്ക്കല്‍, ബേബി തൊണ്ടംകുഴി, സി.എം. ഫിലിപ്‍, മധു ഏബ്രഹാം, ടോമി പ്രാലടിയില്‍, സി.കെ. ശശി, നോബി മുണ്ടയ്ക്കന്‍ തുടങ്ങിയവര്‍ പ്രസംഗിച്ചു.

ഓഫീസ് ഉദ്ഘാടനം

കടുത്തുരുത്തി: കേരള സ്റ്റേറ്റ് ഭാരത് സ്‌കൗട്ട് ആന്‍ഡ് ഗൈഡ്‌സ് കടുത്തുരുത്തി ജില്ലാ അസോസിയേഷന്‍റെ പുതിയ ഓഫീസ് ഉദ്ഘാടനവും സര്‍വീസില്‍നിന്ന് വിരമിക്കുന്ന അധ്യാപകര്‍ക്കുള്ള യാത്രയ്‌യപ്പ് സമ്മേളനവും നടത്തി. അസോസിയേഷൻ ജില്ലാ ചീഫ് കമ്മീഷണറും കടുത്തുരുത്തി ജില്ലാ വിദ്യാഭ്യാസ ഓഫീസറുമായ എ.സി. സീന ഉദ്ഘാടനം ചെയ്തു. കുറവിലങ്ങാട് ഉപജില്ലാ വിദ്യാഭ്യാസ ഓഫീസർ ഡോ. ആര്‍. ബിന്ദുജി മുഖ്യപ്രഭാഷണം നടത്തി. ഗവണ്‍മെന്‍റ് വിഎച്ച്എസ്എസ് കാണക്കാരി പ്രിന്‍സിപ്പൽ ഷിനി, ഹെഡ്മിസ്ട്രസ് ജാസ്മിന്‍, സര്‍വീസില്‍ നിന്നു വിരമിക്കുന്ന ജില്ലാ ചീഫ് കമ്മീഷണര്‍ എ.സി. സീന, അധ്യാപകരായ ആമ്പിള്‍ വി. ജയിംസ്, ജോണ്‍ മാത്യു, സിസ്റ്റര്‍ റോസ് മൈക്കിള്‍ എന്നിവര്‍ക്ക് യാത്രയയപ്പ് നല്‍കി.

വൈക്കത്തുനിന്നു കാണാതായ പെൺകുട്ടിയെ ഗോവയിൽ യുവാവിനൊപ്പം കണ്ടെത്തി

വൈക്കം: കഴിഞ്ഞ ദിവസം സേ പരീക്ഷാ പരിശീലന ക്ലാസിന് പോയ ശേഷം കാണാതായ വിദ്യാർഥിനിയെ കണ്ടെത്തി. ഗോവയിലെ പനാജിക്കടുത്ത് ബസിൽ യാത്ര ചെയ്യുന്നതിനിടെയാണ് പതിമൂന്നുകാരിയായ വിദ്യാർഥിനിയെ ഗോവ പോലീസ് കണ്ടെത്തിയത്. ഇൻസ്റ്റഗ്രാം വഴി പരിചയപ്പെട്ട തിരുവനന്തപുരം സ്വദേശിയായ യുവാവുമായി പെൺകുട്ടി പോയെന്ന് സൂചന ലഭിച്ചതിനെ ത്തുടർന്ന് പോലീസ് യുവാവിന്‍റെ മൊബൈൽ ഫോൺ ലോക്കേഷൻ കേന്ദ്രീകരിച്ച് നടത്തിയ അന്വേഷണത്തിൽ പാലക്കാട് ഇവർ എത്തിയതായി സൂചന ലഭിച്ചു. തുടർന്ന് യുവാവിന്‍റെ ഫോൺ സ്വിച്ച് ഓഫായി. വൈക്കത്തുനിന്ന് വനിതാ പോലീസ് ഉൾപ്പെട്ട സംഘം ബംഗളൂരുവിൽ അന്വേഷണം നടത്തുന്നതിനിടെയാണ് പെൺകുട്ടിയെ കണ്ടെത്തിയതായി വിവരം ലഭിച്ചത്.തുടർന്ന് വൈക്കം പോലീസ് സംഘം ഗോവയിലേക്ക് തിരിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]