ADVERTISEMENT

ADVERTISEMENT

ബ്രോക്കേഴ്സ് അസോ. ചെറുപുഴ ഏരിയാ സമ്മേളനം

ചെറുപുഴ: കേരളാ സ്റ്റേറ്റ് യൂസ്ഡ് വെഹിക്കിൾ ഡീലേഴ്സ് ആൻഡ് ബ്രോക്കേഴ്സ് അസോസിയേഷൻ ചെറുപുഴ ഏരിയാ സമ്മേളനം സംസ്ഥാന വൈസ് പ്രസിഡന്‍റ് ശശിധരൻ നായർ ഉദ്ഘാടനം ചെയ്തു. ഏരിയാ പ്രസിഡന്‍റ് സജി ഫ്രാൻസിസ് അധ്യക്ഷത വഹിച്ചു.

ജില്ലാ പ്രസിഡന്‍റ് മുരളീധരൻ നായർ, പി.വി. രാജേന്ദ്രൻ, സുനിൽ തോമസ്, തോമസ് ജോൺ എന്നിവർ പ്രസംഗിച്ചു. പുതിയ ഭാരവാഹികളായി സജി ഫ്രാൻസീസ്-പ്രസിഡന്‍റ്, സുനിൽ തോമസ്-സെക്രട്ടറി, തോമസ് ജോൺ-ട്രഷറർ എന്നിവരെ തെരഞ്ഞെടുത്തു.

ADVERTISEMENT

കണ്ണൂർ യൂണിവേഴ്സിറ്റിയുടെ അവഗണന അവസാനിപ്പിക്കണം

കണ്ണൂര്‍: കണ്ണൂർ സർവകലാശാല സമാന്തര മേഖലയിലെ വിദ്യാർഥികളെ അവഗണിച്ച് പഠന സാഹചര്യം നിഷേധിക്കുകയാണെന്നും ഇതിനെതിരെ ശക്തമായ പ്രക്ഷോഭം സംഘടിപ്പിക്കുമെന്നും പാരലൽ കോളജ് അസോസിയേഷൻ ഭാരവാഹികൾ അറിയിച്ചു. റഗുലർ മേഖലയിലെ വിദ്യാർഥികളുടെ ഒന്നും രണ്ടും സെമസ്റ്റർ പരീക്ഷകളുടെ ഫലപ്രഖ്യാപനം നടത്തിയിട്ടും ഒന്നാം വർഷ പ്രൈവറ്റ് രജിസ്ട്രേഷൻ വിദ്യാർഥികളുടെ ഒന്നാം സെമസ്റ്റർ പരീക്ഷ നടത്താൻ പോലും സർവകലാശാല തയാറായിട്ടില്ല. രണ്ടുമാസം മുമ്പ് സര്‍വകലാശാലയില്‍ അന്വേഷിച്ചപ്പോള്‍ പരീക്ഷാ നടത്തിപ്പുമായി ബന്ധപ്പെട്ട് നടപടികൾക്ക് ഐടി വിംഗിനെ ചുമതലപ്പെടുത്തിയിട്ടുണ്ടെന്നാണ് മറുപടി നൽകിയത്. എന്നാൽ നടപടി ഉണ്ടായിട്ടില്ല. ജൂണിൽ അടുത്ത അധ്യയന വർഷം ആരംഭിക്കുന്പോൾ പരീക്ഷ നടത്താതെ എങ്ങിനെ തുടർപ‍ഠനം സാധ്യമാകുമെന്ന് ആശങ്കയിലാണ് വിദ്യാർഥികളെന്നും അസോസിയേഷൻ ഭാരവാഹികൾ ചോദിച്ചു. ‌1500 വിദ്യാര്‍ഥികളാണ് പ്രൈവറ്റായി രജിസ്റ്റര്‍ ചെയിതിരിക്കുന്നത്. രജിസ്‌ട്രേഷന്‍ ഫീസും പരീക്ഷാ ഫീസും ഉള്‍പ്പെടെ ഒരു വിദ്യാര്‍ഥിയില്‍ നിന്ന് 16000 രൂപ അടയ്ക്കുന്നുണ്ട് . എന്നാൽ സ്റ്റഡി മെറ്റീരിയലുകളോ കോൺടാക്ട് ക്ലാസുകളോ കൃത്യമായി ലഭിച്ചിട്ടില്ല. ശ്രീനാരായണഗുരു ഓപ്പണ്‍ സര്‍വകലാശാലയുടെ അവസ്ഥയും സമാനരീതിയിലാണെന്ന് അസോസിയേഷൻ ഭാരവാഹികൾ പറഞ്ഞു. മൂന്നാം വര്‍ഷ വിദ്യാര്‍ഥികളുടെ അഞ്ചാം സെമസ്റ്റര്‍ പരീക്ഷയുടെ സിലബസ് പോലും ഇനിയും പ്രഖ്യാപിച്ചിട്ടില്ല. മൂന്ന് വര്‍ഷം കഴിഞ്ഞിട്ടും സിലബസും സ്റ്റഡി മെറ്റീരിയലുകളും നല്‍കിയിട്ടില്ല. ഇതേ നിലപാടാണ് യൂണിവേഴ്സിറ്റികൾ തുടരുന്നതെങ്കിൽ വിദ്യാർഥികളെയും രക്ഷിതാക്കളെയും പങ്കെടുപ്പിച്ച് ശക്തമായ പ്രക്ഷോഭത്തിന് അസോസിയേഷൻ നേതൃത്വം നൽകുമെന്നും ഭാരവാഹികൾ പറഞ്ഞു. പത്രസമ്മേളനത്തിൽ പാരലൽ കോളജ് അസോസിയേഷന്‍ പ്രസിഡന്‍റ് കെ.എൻ. രാധാകൃഷ്ണൻ, സി. അനിൽകുമാർ, എൻ.വി.പ്രസാദ്, പി.എസ്.അനന്ദ നാരായണൻ എന്നിവർ പങ്കെടുത്തു.

ബംഗാള്‍ സ്വദേശിയുടെ കൊലപാതകം: സഹോദരി ഭര്‍ത്താവ് അറസ്റ്റില്‍

കാസര്‍ഗോഡ്: ഇതര സംസ്ഥാനതൊഴിലാളിയെ കൊലപ്പെടുത്തിയ കേസില്‍ സഹോദരി ഭര്‍ത്താവ് അറസ്റ്റില്‍. പശ്ചിമബംഗാള്‍ ജല്‍പായ്ഗുരി സ്വദേശി സുശാന്ത റോയിയെ (28) കൊലപ്പെടുത്തിയ സംഭവത്തില്‍ നാട്ടുകാരനായ സഞ്ജിത് റോയിയെ (35) ആണ് കാസര്‍ഗോഡ് ടൗണ്‍ പോലീസ് അറസ്റ്റ് ചെയ്തത്. 21ന് പുലര്‍ച്ചെ 1.10ഓടെയാണ് സുശാന്തയെ വര്‍ക്ക് സൈറ്റില്‍ വായില്‍ നിന്ന് ചോരവാര്‍ന്ന് മരിച്ചനിലയില്‍ കണ്ടെത്തിയത്. മൂന്നുമാസം മുമ്പാണ് സുശാന്ത കാസര്‍ഗോട്ടെത്തുന്നത്. കാസര്‍ഗോഡ് പുതിയ ബസ് സ്റ്റാന്‍ഡിനു സമീപം ആനബാഗിലുവില്‍ മുസ്‌ലിം ലീഗ് ജില്ലാ കമ്മിറ്റി ഓഫീസ് കെട്ടിടത്തിന്‍റെ നിര്‍മാണതൊഴിലാളിയായിരുന്നു. സംഭവദിവസം സുശാന്ത അമിതമായി മദ്യപിച്ച് അക്രമസക്തനാവുകയും വര്‍ക്ക് സൈറ്റില്‍ ഉണ്ടായ മറ്റുള്ളവരോട് ബഹളം വയ്ക്കുകയും റോഡില്‍ കൂടി പോകുന്നവരെ അസഭ്യം പറയുകയും ചെയ്തിരുന്നു. സമീപത്തു താമസിക്കുന്ന മലയാളി തൊഴിലാളികളുടെ അടുത്തുപോയി വഴക്കുണ്ടാക്കി. തിരിച്ചുവന്ന് സഞ്ജിത്തിനോട് തട്ടിക്കയറുകയും മർദിക്കുകയും ചെയ്തു. ഇതില്‍ പ്രകോപിതനായ സഞ്ജിത് കൈയില്‍ കിട്ടിയ മരക്കഷ്ണമെടുത്ത് സുശാന്തയുടെ കഴുത്തിനിട്ട് അടിച്ചു. അടികൊണ്ട് സുശാന്ത് റോയ് കുറച്ച് ദൂരം നടന്ന് നിലത്തു വീണുമരിക്കുകയായിരുന്നു. സഞ്ജിത്തിനെതിരെ ബിഎന്‍എസ് 105 (മനഃപൂര്‍വമല്ലാത്ത നരഹത്യ) വകുപ്പ് പ്രകാരമാണ് കേസെടുത്തിരിക്കുന്നത്. സുശാന്തയുടെ സഹോദരിയെയാണ് സഞ്ജിത് വിവാഹം ചെയ്തിരിക്കുന്നത്. ഇന്‍സ്‌പെക്ടര്‍ പി.നളിനാക്ഷന്‍റെ നേതൃത്വത്തിലാണ് അന്വേഷണം നടന്നത്.

രാജ്യത്തെ ആദ്യ അന്താരാഷ്‌ട്ര ആയുർവേദ ഗവേഷണ കേന്ദ്രം കണ്ണൂരിൽ ഒരുങ്ങുന്നു

കണ്ണൂർ: ആയുർവേദത്തിന്‍റെ അനന്ത സാധ്യതകളിലേക്ക് തുറക്കുന്ന രാജ്യത്തെ ആദ്യ അന്താരാഷ്‌ട്ര ആയുർവേദ ഗവേഷണ കേന്ദ്രം കണ്ണൂർ ജില്ലയിലെ പടിയൂർ-കല്യാട് പഞ്ചായത്തിൽ ഒരുങ്ങുന്നു. 311 ഏക്കറിലാണ് ഗവേഷണ കേന്ദ്രം സ്ഥാപിക്കുന്നത്. ആദ്യഘട്ടം പൂർത്തിയാക്കുന്നതിന് 300 കോടിരൂപയാണ് വകയിരുത്തിയത്. ആയുർവേദത്തിന്‍റെ സമഗ്ര വികസനം, അമൂല്യമായ ഔഷധ സസ്യങ്ങളുടെ സംരക്ഷണം എന്നിവയെല്ലാം പദ്ധതിയിൽ ഉൾപ്പെടും. ആയുർവേദ ജ്ഞാനങ്ങളും ലോകത്തിലെ വിവിധ പാരമ്പര്യ ചികിത്സാ രീതികളും പ്രദർശിപ്പിക്കുന്ന അന്താരാഷ്ട്ര മ്യൂസിയവും ഒരുക്കും.അത്യാധുനിക സൗകര്യങ്ങളുള്ള റിസർച്ച് സെന്‍ററും 100 കിടക്കകളുള്ള ആശുപത്രിയുമാണ് ഒന്നാം ഘട്ടത്തിൽ ഒരുക്കുന്നത്. ആദ്യഘട്ടത്തിൽ വയോജനങ്ങളെ ബാധിക്കുന്ന അസുഖങ്ങൾ, കാൻസർ എന്നിവയിൽ ഗവേഷണം ആരംഭിക്കും. അഡ്മിനിസ്‌ട്രേറ്റീവ് ബ്ലോക്ക്, ശാസ്ത്രജ്ഞന്മാർക്കുള്ള ക്വാട്ടേഴ്‌സ്, ഫാക്കൽറ്റികൾക്കും വിദ്യാർഥികൾക്കുമുള്ള ഹൗസിംഗ് സംവിധാനം എന്നിവ അന്താരാഷ്ട്ര ഗവേഷണ കേന്ദ്രത്തിൽ ഉണ്ടാകും. പഴമയും പുതുമയും കൂടിച്ചേർന്ന് അത്യാധുനിക സംവിധാനങ്ങളോടെയാകും സെന്‍ററിന്‍റെ നിർമാണം. കണ്ണൂർ അന്താരാഷ്ട്ര വിമാനത്താവളത്തിൽനിന്ന് 15 കിലോമീറ്റർ മാത്രം ദൂരമായതിനാൽ വലിയ രീതിയിൽ ആഭ്യന്തര, വിദേശ ടൂറിസ്റ്റുകളെയും ആകർഷിക്കാൻ കഴിയും.

ചന്ദനക്കാംപാറയിൽ അഖില കേരള ബാസ്കറ്റ്ബോൾ ടൂർണമെന്‍റ് നാളെ തുടങ്ങും

പയ്യാവൂർ: മുപ്പത്തൊമ്പതാമത് ചെറുപുഷ്പം അഖില കേരള പുരുഷ, വനിത ബാസ്കറ്റ്ബോൾ ടൂർണമെന്‍റ് നാളെ മുതൽ 27 വരെ ചന്ദനക്കാംപാറ ചെറുപുഷ്പ ഫ്ലഡ്‌ലിറ്റ് സ്റ്റേഡിയത്തിൽ നടക്കും. നാളെ രാത്രി 7.30ന് സജീവ് ജോസഫ് എംഎൽഎ ഉദ്ഘാടനം ചെയ്യും. തലശേരി അതിരൂപത വികാരി ജനറാൾ മോൺ. ആന്‍റണി മുതുകുന്നേൽ അധ്യക്ഷത വഹിക്കും. ചന്ദനക്കാംപാറ ഇടവക വികാരി ഫാ. ജോസഫ് ചാത്തനാട്ട് ആമുഖ പ്രഭാഷണം നടത്തും. ടൂർണമെന്‍റ് ഫൈനലിൽ പുരുഷവിഭാഗം വിജയികൾക്ക് വരമ്പകത്ത് മാത്യു മെമ്മോറിയൽ എവർറോളിംഗ് ട്രോഫിയും 15,001 രൂപയും റണ്ണേഴ്സ് അപ്പ് ടീമിന് കൂവപ്പാറയിൽ ജോൺ മെമ്മോറിയൽ എവർറോളിംഗ് ട്രോഫിയും 10,001 രൂപയും വനിതാ വിഭാഗം വിജയികൾക്ക് ചന്ദനക്കാംപാറ ഹൈടെക് ബിൽഡേഴ്സ് നൽകുന്ന എവർറോളിംഗ് ട്രോഫിയും 15,001 രൂപയും റണ്ണേഴ്സ് അപ്പ് ടീമിന് ഷോണി മുല്ലക്കരി മെമ്മോറിയൽ എവർറോളിംഗ് ട്രോഫിയും 10,001 രൂപയും സമ്മാനമായി ലഭിക്കും. ചന്ദനക്കാംപാറയുടെ മലയോര മണ്ണിൽ ബാസ്കറ്റ്ബോൾ കളിച്ച് വളർന്ന് അന്തർദേശീയ തലങ്ങളിൽ തിളങ്ങിയ സീനിയർ താരങ്ങളെയും ചന്ദനക്കാംപാറ ചെറുപുഷ്പ എൽപി സ്കൂളിൽ നിന്ന് വിരമിച്ച മുഖ്യാധ്യാപകൻ തോമസ് മാത്യുവിനെയും ചടങ്ങിൽ ആദരിക്കും. 27ന് വൈകുന്നേരം 7.30ന് നടക്കുന്ന സമാപന സമ്മേളനം എം.വി. ഗോവിന്ദൻ എംഎൽഎ ഉദ്ഘാടനം ചെയ്യും. പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ അധ്യക്ഷത വഹിക്കും. തലശേരി അതിരൂപത കോർപറേറ്റ് മാനേജർ ഫാ. മാത്യു ശാസ്താംപടവിൽ മുഖ്യ പ്രഭാഷണം നടത്തും.

"വലിയ ഇടയന്‍റെ അനുഗ്രഹം അവിസ്മരണീയം'

ആലക്കോട്: ഫ്രാൻസിസ് മാർപാപ്പ ഓർമയാകുമ്പോൾ വത്തിക്കാനിലെ വാർത്താവിനിമയ കാര്യാലയത്തിലെ ഉപദേശകനായ ആലക്കോട് സ്വദേശിയും സലേഷ്യൻസ് ഓഫ് ഡോൺ ബോസ്കോ സന്യാസ സഭാംഗവുമായ ഫാ. ജോർജ് പ്ലാത്തോട്ടം വലിയ ഇടയനെക്കുറിച്ചുള്ള ദീപ്‌ത സ്‌മരണകളിലാണ്. പരിശുദ്ധ സിംഹാസനത്തിന്‍റെ മുഴുവൻ വാർത്താവിനിമയ കാര്യങ്ങളും നിയന്ത്രിക്കുന്ന ഡികാസ്റ്ററി ഓഫ് കമ്യൂണിക്കേഷൻ അംഗമായി ഫാ. ജോർജ് പ്ലാത്തോട്ടത്തെ 2022ലാണ് ഫ്രാൻസിസ് മാർപാപ്പ നിയമിച്ചത്. ഏഷ്യയിൽ നിന്നുള്ള ഏക ഉപദേശ സമിതി അംഗമാണ്. വത്തിക്കാനിലെത്തി ഫ്രാൻസിസ് മാർപാപ്പയുടെ അനുഗ്രഹം നേടാൻ സാധിച്ചതാണ് ജീവിതത്തിലെ ഏറ്റവും അനുഗ്രഹ മുഹൂർത്തമെന്ന് അദ്ദേഹം പറയുന്നു. ആലക്കോട് പ്ലാത്തോട്ടത്തിൽ പരേതരായ വർക്കി-അന്നമ്മ ദന്പതികളുടെ മകനാണ് ഫാ.ജോർജ്. മാധ്യമപ്രവർത്തകനും കമ്യൂണിക്കേഷൻസ് വിദഗ്ധനുമായ അദ്ദേഹം ഇപ്പോൾ ആസാമിലെ ഗുവാഹത്തിയിലാണ്.

നവപുരം മതാതീത ദേവാലയ മഹോത്സവം 26 മുതൽ

ചെറുപുഴ: പ്രാപ്പൊയിൽ കക്കോട്ടെ നവപുരം മതാതീത ദേവാലയ മഹോത്സവം 26 മുതൽ മേയ് നാലു വരെ നടക്കും. 26ന് വൈകുന്നേരം 3:30ന് പ്രാപ്പൊയിൽ നാരായണൻ കൊടി ഉയർത്തും. തുടർന്ന് ഗ്രന്ഥം നിറ, അക്ഷരദീപം കൊളുത്തൽ, തീർഥാടക സ്വീകരണം, കാവ്യാർച്ചന, ബാവുൽ ഗായിക ശാന്തി പ്രിയയുടെ ബാവുൽ ഗാനാർച്ചന, ഗസൽ ഗായകൻ എറണാകുളം താൻസെന്‍റെ നേതൃത്വത്തിൽ ഗസൽ ഗാനാവതരണം, 150 ലധികം ഭാഷകളിൽ പാടി ശ്രദ്ധേയയായ സൗവർണിക താൻസന്‍റെ ഗാനാവതരണവം നടക്കും. 27ന് രാവിലെ 10 മുതൽ പുസ്തക സമർപ്പണം. മൗലിക കൃതി അവതരണത്തിനുള്ള ചെറുശേരി കലാസാഹിത്യ സഭ, ബഹുഭാഷാ കവിസമ്മേളനം. ബ്യാരി, കന്നട, തുളു, ഉറുദു, സംസ്കൃതം, ഹിന്ദി, മറാഠി, ഇംഗ്ലീഷ്, ഹവ്യക, കാരഡ, മലയാളം തുടങ്ങിയ ഭാഷകളിൽ കവിതകൾ എഴുതുന്ന കവികൾ കവിത അവതരിപ്പിക്കും. ദ്രാവിഡ ഭാഷാ പുരസ്കാരദാനം, പുസ്തക പ്രകാശനങ്ങൾ കലാസാഹിത്യ സാംസ്കാരിക മേഖലകളിൽ മികച്ച സംഭാവനകൾ നൽകിയ പ്രതിഭകളെ ആദരിക്കുന്ന ചടങ്ങ് എന്നിവ ഉണ്ടാകും. 28, 29 തീയതികളിൽ വൈകുന്നേരം ആറിന് കാവ്യാർച്ചന, പുസ്തക സമർപ്പണം. 29ന് വൈകുന്നേരം ആറ് മുതൽ നൃത്ത സന്ധ്യ, കൈകൊട്ടിക്കളി, തിരുവാതിര, കേരള കലാമണ്ഡലത്തിൽ നിന്ന് സംഗീതത്തിൽ ഡോക്ടറേറ്റ് നേടിയ ഡോ. പയ്യാവൂർ ഉണ്ണികൃഷ്ണന്‍റെ ഗാനാർച്ചന, അഞ്ജന രാജേഷിന്‍റെ ക്ലാസിക്കൽ നൃത്തം എന്നിവ നടക്കും. മേയ് ഒന്നിനും രണ്ടിനും വൈകുന്നേരം ആറു മുതൽ പുസ്തക സമർപ്പണം, കാവ്യാർച്ചന. മേയ് മൂന്നിന് ഉച്ചയ്ക്ക് രണ്ടു മുതൽ നവപുരം ദ്വിദിനസാഹിത്യ ക്യാമ്പ് ആരംഭിരിക്കും. നവീന കവിതയുടെ രസതന്ത്രം, കഥയുടെ കാലത്രയം, നാടോടി സാഹിത്യവും ആധുനികസാഹിത്യവും, ബാലസാഹിത്യത്തിന്‍റെ സാംസ്കാരിക വഴക്കങ്ങൾ, സംസ്കാര നിർമിതിയിൽ സാഹിത്യത്തിന്‍റെ പങ്ക് തുടങ്ങിയവയിൽ സെമിനാർ നടക്കും. മേയ് നാലിന് രാവിലെ ഒന്പത് മുതൽ ചെറുശേരി കലാസാഹിത്യ സഭ, മൗലിക കൃതികളുടെ അവതരണം, നവപുരം കലാസാഹിത്യ പുരസ്കാരദാനം, പ്രതിഭകൾക്ക് ആദരം പുസ്തക പ്രകാശനങ്ങൾ, മികച്ച പുസ്തകങ്ങളെക്കുറിച്ച് പുസ്തക സംവാദം മുതലായ നടക്കും. 4.30ന് കൊടിയിറക്കം.

അലങ്കാര മത്സ്യക്കൃഷി പരിശീലന ക്ലാസ്

ചെറുപുഴ: വനിതാ ശിശു വികസന വകുപ്പിന്‍റെ ആഭിമുഖ്യത്തിൽ ബേട്ടി ബച്ചാവോ ബേട്ടി പഠാവോ പദ്ധതിയിലുൾപ്പെടുത്തി പെൺകുട്ടികൾക്കായി അലങ്കാര മത്സ്യക്കൃഷി പരിശീലനം ആരംഭിച്ചു. സമൂഹത്തിൽ പെൺകുട്ടികൾക്കും സാമ്പത്തിക ഭദ്രത ഉറപ്പു വരുത്തുക എന്ന ലക്ഷ്യത്തോടെയാണ് പരിശീലനം ആരംഭിച്ചത്. 15നും 25നും ഇടയിൽ പ്രായമുള്ള പെൺകുട്ടികൾക്കാണ് ചെറുപുഴ പ്രശാന്ത് ഓഡിറ്റോറിയത്തിൽ രണ്ടുദിവസമായി നടക്കുന്ന പരിശീലനം. ചെറുപുഴ പഞ്ചായത്തിന്‍റെയും ഫിഷറീസ് വകുപ്പിന്‍റെയും സംയുക്താഭിമുഖ്യത്തിൽ നടക്കുന്ന മത്സ്യകൃഷി പരിശീലന ക്ലാസ് പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം. ബാലകൃഷ്ണൻ അധ്യക്ഷത വഹിച്ചു. കെ. രാധ, പി. ഗീത, ടി. സജിന എന്നിവർ പ്രസംഗിച്ചു. ഡോ. പി. ഡോണ, ഡോ. ചിത്ര സോമൻ, ആശ ഗോപൻ എന്നിവർ ക്ലാസുകൾക്ക് നേതൃത്വം നൽകി. ഇന്ന് അക്വേറിയ നിർമാണത്തെക്കുറിച്ച് കർഷകനായ മാത്യു തോമസ് ക്ലാസെടുക്കും.

ഉമ്മൻ ചാണ്ടി സ്മാരക വോളിബോൾ ടൂർണമെന്‍റിന് ആവേശോജ്വല തുടക്കം

ചെറുപുഴ: വയക്കര, പെരിങ്ങോം മണ്ഡലം കോൺഗ്രസ് കമ്മിറ്റികളും കെ.പി. നൂറുദ്ദീൻ ചാരിറ്റബിൾ ട്രസ്റ്റും സംയുക്തമായി സംഘടിപ്പിക്കുന്ന ബി. അബ്ദുള്ള എവർ റോളിംഗ് സ്വർണക്കപ്പിനായുള്ള ഉമ്മൻ ചാണ്ടി സ്മാരക രണ്ടാമത് വോളിബോൾ ടൂർണമെന്‍റിന് ആവേശോജ്വല തുടക്കം. പാടിയോട്ടുചാൽ നെഹ്റു ഫ്ലഡ്‌ലിറ്റ് സ്റ്റേഡിയത്തിൽ ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. സംഘാടക സമിതി ചെയർമാൻ മഹേഷ് കുന്നുമ്മൽ അധ്യക്ഷത വഹിച്ചു. വി. കൃഷ്ണൻ, എം. ഉമ്മർ, രവി പൊന്നംവയൽ, എ.കെ. രാജൻ, എം. കരുണാകരൻ, ടി.പി. ചന്ദ്രൻ എന്നിവർ പ്രസംഗിച്ചു. ഭഗത് സിംഗ് അന്നൂർ, യംഗ് സ്റ്റാർ മാതമംഗലം, ഷൈനിംഗ് സ്റ്റാർ ചുണ്ട, റെഡ് സ്റ്റാർ ആലക്കാട്, എച്ച്ആർഡിഎസ് സ്പോർട്സ് അക്കാദമി കരുവഞ്ചാൽ, ഫൈറ്റേഴ്സ് പാണപ്പുഴ, റിവർ സ്റ്റാർ പറവൂർ, നവപ്രഭ ചട്യോൾ എന്നീ ടീമുകളാണ് ടൂർണമെന്‍റിൽ മാറ്റുരയ്ക്കുന്നത്. ഉദ്ഘാടന മത്സരത്തിൽ ഷൈനിംഗ് സ്റ്റാർ ചുണ്ട യംഗ് സ്റ്റാർ മാതമംഗലത്തെ നേരിട്ടു.

കിണർ വെള്ളം മലിനമായി; പരിഹാരം കാത്ത് വീട്ടുകാർ

തളിപ്പറമ്പ്: വർഷങ്ങളായി ഉപയോഗിക്കുന്ന കിണറുകൾ മലിനമായതിനെ തുടർന്ന് കുടിവെള്ളത്തിനായി കുടുംബങ്ങൾ അനുഭവിക്കുന്ന ബുദ്ധിമുട്ടിന് പരിഹാരമുണ്ടാക്കണമെന്ന ആവശ്യം ശക്തമായി. തളിപ്പറമ്പ് നഗരസഭയിലെ ഏഴാംമൈലിലെ കെ. ഷെരീഫ്, തൃച്ചംബരത്തെ പി.വി. പ്രകാശൻ എന്നിവരുടെ വീടുകളിലെ കിണർ വെള്ളമാണു മലിനമായത്. തൃച്ചംബരം ദേശീയ പാതയോരത്ത് തളിപ്പറമ്പ് നഗരസഭ 26-ാം വാർഡിൽ കഴിഞ്ഞ 56 വർഷമായി താമസക്കാരനാണ് റിട്ട. എസ്ഐ പി.വി. പ്രകാശനും കുടുംബവും. കഴിഞ്ഞ രണ്ടാഴ്ച മുമ്പാണു കിണറ്റിലെ വെള്ളത്തിന് അസ്വാഭാവികമായ ഗന്ധവും നിറവ്യത്യാസവും ശ്രദ്ധയിൽപ്പെട്ടത്. തുടർന്ന് നഗരസഭ കൗൺസിലറെ വിവരമറിയിക്കുകയും കിണർ വെള്ളം പരിശോധിക്കുകയും ചെയ്തു. പരിശോധനയിൽ ഉപയോഗയോഗ്യമല്ലെന്ന് കണ്ടെത്തിയതിനെ തുടർന്ന് വെള്ളം മുഴുവൻ മാറ്റി കിണർ ശുചീകരിച്ചു. എന്നാൽ, തുടർന്നും കിണറ്റിലെ വെള്ളത്തിന് നിറവ്യത്യസവും ദുർഗന്ധവും അനുഭവപ്പെടുന്നുണ്ട്. സമീപത്തെ സ്ഥാപനങ്ങളിലെ മലിനജല ടാങ്കുകൾ ചോർന്നതാകാം വെള്ളം മലിനമാകാൻ കാരണമെന്നാണു കരുതുന്നതെന്ന് പ്രകാശൻ പറയുന്നു. ഇപ്പോൾ വീണ്ടും കിണർ ശുചീകരിച്ചെങ്കിലും പഴയരീതിയിൽ വെള്ളം മലിനമായിരിക്കുകയാണ്. ജപ്പാൻ കുടിവെള്ളമാണ് ഏകആശ്രയം. എല്ലാ ദിവസവും വെള്ളം ലഭിക്കാത്തത് ബുദ്ധിമുട്ടാണ്. ബന്ധപ്പെട്ടവർ അടിയന്തരമായി പരിശോധന നടത്തി വെള്ളം മലിനമാകുന്നതിന്‍റെ യഥാർഥ കാരണം കണ്ടെത്തി പരിഹാരമുണ്ടാക്കണമെന്നാണു പ്രകാശൻ ആവശ്യപ്പെടുന്നത്. ഏഴാംമൈലിലെ കെ. ഷെരീഫിന്‍റെയും സഹോദരിയുടെയും വീട്ടിലെ കിണർ വെള്ളം കഴിഞ്ഞ ഡിസംബർ 20 മുതൽ ഉപയോഗിക്കാൻ പറ്റാത്ത നിലയിൽ മലിനമായിരിക്കുകയാണ്. ദുർഗന്ധവും നിറവ്യത്യാസവും കാരണം അടുത്ത വീട്ടിൽ നിന്നും കൊണ്ടുവരുന്ന വെള്ളമാണ് ഉപയോഗിക്കുന്നത്. രണ്ട് കുട്ടികൾക്ക് മഞ്ഞപ്പിത്ത ബാധയുണ്ടായി.

പയ്യാമ്പലം ശ്മശാനത്തിലെ വീഴ്ച; ഉദ്യോഗസ്ഥർക്കെതിരേ നടപടിക്ക് നിർദേശം

കണ്ണൂര്‍: കോര്‍പറേഷനു കീഴിലുള്ള പയ്യാമ്പലം ശ്മശാനത്തിലേക്ക് ആവശ്യമായ വിറക്, ചിരട്ട എന്നിവ യഥാസമയം എത്തിക്കുന്നതിൽ വീഴ്ച വരുത്തിയ ഉദ്യോഗസ്ഥർക്കെതിരേ വകുപ്പ്തല നടപടികൾ സ്വീകരിക്കുന്നതിന് നിർദേശം നൽകിയിട്ടുണ്ടെന്ന് മേയർ മുസ്‌ലിഹ് മഠത്തിൽ അറിയിച്ചു.തുടര്‍ച്ചയായി അവധിദിവസങ്ങൾ വന്നതിന്‍റെ പ്രയാസങ്ങളാണ് ഉണ്ടായത്. ശവദാഹത്തിൽ പോലും രാഷ്‌ട്രീയം കലർത്തി നേട്ടം കൊയ്യാൻ പറ്റുമോ എന്ന് കരുതുന്ന സിപിഎം, ബിജെപി നേതാക്കൾ പ്രചരിപ്പിക്കുന്നത് പോലെ ശവദാഹം പൂര്‍ണമായും നിലയ്ക്കുന്ന ഒരു സാഹചര്യവും പയ്യാമ്പലത്ത് ഉണ്ടായിട്ടില്ല. കോർപ്പറേഷൻ പരിധിയിൽ നിന്ന് മാത്രമല്ല സമീപ പഞ്ചായത്തുകളിൽ നിന്നും നിരവധി മൃതദേഹങ്ങൾ ദിവസം തോറും പയ്യാമ്പലത്ത് ശവദാഹത്തിനായി എത്തുന്നുണ്ട്. ശരാശരി പത്തോളം മൃതദേഹങ്ങളാണ് ഇത്തരത്തിൽ എത്തിച്ചേരുന്നത്. പരാതികൾ ഇല്ലാതെ നടത്തുന്നതിന് നടപടികൾ സ്വീകരിക്കുന്നുമുണ്ട്. പ്രസ്തുത ദിവസം തന്നെ ആവശ്യമായ വിറക് ശ്മശാനത്തില്‍ ഇറക്കിയിട്ടുണ്ട്. കൂടാതെ ഡിപ്പാര്‍ട്ട്മെന്‍റലായി തന്നെ 15 ടണ്ണോളം വിറക് ഇറക്കി സ്റ്റോക്ക് ചെയ്തിട്ടുമുണ്ട്. വസ്തുത ഇതായിരിക്കെ കോർപറേഷനെതിരേ ആയുധം തേടി നടക്കുന്ന സിപിഎം-ബിജെപി മുന്നണി നടത്തിയ സംയുക്ത നാടകമായിരുന്നു കഴിഞ്ഞദിവസം അരങ്ങേറിയതെന്നും മേയർ പറഞ്ഞു.

ഭീകര വിരുദ്ധ പ്രതിജ്ഞ എടുത്തു

പേരാവൂർ: പഹൽഗാം ഭീകരാക്രമണത്തിൽ കൊല്ലപ്പെട്ടവർക്ക് ആദരാഞ്ജലികൾ അർപ്പിച്ചു കൊണ്ട് പേരാവൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ ദീപം തെളിയിച്ച് പ്രണാമമർപ്പിക്കുകയും ഭീകര വിരുദ്ധ പ്രതിജ്ഞ എടുക്കുകയും ചെയ്തു. ഡിസിസി വൈസ് പ്രസിഡന്‍റ് സുദീപ് ജയിംസ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ജൂബിലി ചാക്കോ അധ്യക്ഷത വഹിച്ചു. പൊയിൽ മുഹമ്മദ്, പൂക്കോത്ത് അബുബക്കർ, സി.ജെ. മാത്യു, കെ എം ഗിരീഷ്, സുഭാഷ് ബാബു തുടങ്ങിവർ പ്രസംഗിച്ചു. മട്ടന്നൂർ: ജമ്മു കാഷ്മീരിലെ പഹൽഗാമിലുണ്ടായ ഭീകര ആക്രമണത്തിൽ മരണമടഞ്ഞവരോടുള്ള ആദരസൂചകമായി കോളയാട് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ മെഴുകുതിരി കത്തിച്ച് ആദരാഞ്ജലികൾ അർപ്പിച്ചു. മാലൂർ സിറ്റിയിൽ കോൺഗ്രസ് മാലൂർ മണ്ഡലം പ്രസിഡന്‍റ് പാറ വിജയൻ ഭീകര വിരുദ്ധ പ്രതിജ്ഞ ചൊല്ലിക്കൊടുത്തു. കോളയാട് ബ്ലോക്ക് കമ്മിറ്റി പ്രസിഡന്‍റ് കാഞ്ഞരോളി രാഘവൻ, നേതാക്കളായ പുളുക്കായി ഗോവിന്ദൻ, രജീഷ് മാറോളി, സുധാകരൻ നീർവേലി, എ. ജയരാജൻ, സി. ഭാർഗവൻ, ചമ്പാടൻ മോഹനൻ, എം. പ്രഭാകരൻ, കെ.ടി. ഗംഗാധരൻ, തുടങ്ങിയവർ നേതൃത്വം നൽകി.

ഇരിട്ടിയിലെ നിശബ്ദ സൗഹൃദങ്ങൾക്ക് ഒത്തുകൂടാൻ ഇടം ഒരുങ്ങുന്നു

ഇരിട്ടി: സംസാരശേഷിയില്ലാത്തവ ഇരിട്ടി മേഖലയിലുള്ളവർക്ക് ഒത്തു കൂടാനും സൗഹൃദം പങ്കിടാനുമായി ഇടം ഒരുങ്ങുന്നു. ജില്ലാ ബധിര അസോസിയേഷന്‍റെ കീഴിൽ ഇരിട്ടി കേന്ദ്രീകരിച്ച് പ്രവൃത്തിച്ചുവരുന്ന 60ൽ അധികംഅംഗങ്ങൾ ഉള്ള സംഘടനയാണ് ഇരിട്ടി താലൂക്ക് റിക്രിയേഷൻ ക്ലബ് ഫോർ ദി ഡെഫ് ആണ് അംഗങ്ങൾക്ക് ഒന്നിച്ചിരിക്കാനും സൗഹൃദങ്ങൾ പങ്കിടാനും ഒത്തുകൂടാനുമായി ഒരിടം ഒരുക്കുന്നത്. വർഷങ്ങളായി ഇവരുടെ കൂട്ടായ്മ പ്രവർത്തിക്കുന്നുണ്ടെങ്കിലും ഒന്നിച്ചിരിക്കാനും ഒത്തുകൂടാനും സ്ഥിരമായി ഒരിടമില്ലാത്തത് ഇവരെ അലട്ടിയിരുന്നു. ക്രിസ്തുമസിനും പെരുന്നാളിനുമെല്ലാം പരിമിതികൾക്ക് നടുവിലും സംഘടനയിലെ അംഗങ്ങൾ കുടുംബത്തോടൊപ്പം ഒത്തുകൂടിയിരുന്നു. അപ്പോഴെല്ലാം സ്വന്തമായി ഒരു സ്ഥലം ഇതിനായി വേണമെന്നായിരുന്നു ഇവരുടെ ആഗ്രഹം. ടൗണിൽ വൻ തുക ഡെപ്പോസിറ്റ് നൽകി ഒരു മുറിയെടുത്ത് പ്രതിമാസം വാടകയുൾപ്പടെ നൽകി ഇത്തരമൊരു സംവിധാനം ഒരുക്കുക എന്നത് സംഘടനയ്ക്ക് സാധ്യമായിരുന്നില്ല. എങ്കിലും ഇവരുമായി അടുത്ത ബന്ധം പുലർത്തി വരുന്ന വി.ജി. സുനിലിനൊപ്പം ഒരു മുറിക്കായുള്ള അന്വേഷണം തുടർന്നു കൊണ്ടേയിരുന്നു. അന്വേഷണങ്ങൾക്കൊടുവിൽ ഇരിട്ടി പയഞ്ചേരി മുക്കിൽ ഡെപ്പോസിറ്റില്ലാതെ വാടക മാത്രം നൽകിയാൽ മതിയെന്ന ധാരണയിൽ കെട്ടിട ഉടമ മുറി നൽകാൻ തയാറായി. മുറി കിട്ടിയതോടെയാണ് വർഷങ്ങളായുള്ള ഇവരുടെ സ്വപ്നം പൂവണിയുന്നത്. 27ന് പയഞ്ചേരി മുക്കിലെ ക്ലബിന്‍റെ ഉദ്ഘാടനം നടത്തും. ഇരിട്ടി, ഉളിക്കൽ, മട്ടന്നൂർ, കീഴ്പള്ളി, കൊട്ടിയൂർ തുടങ്ങിയ മേഖലകളിലെ അംഗങ്ങളാണ് ഇരിട്ടി താലൂക്ക് റിക്രിയേഷൻ ക്ലബ് ഫോർ ദി ഡെഫിലുള്ളത്. അംഗങ്ങളിൽ പലരുടെയും പങ്കാളികളും സംസാരശേഷി ഇല്ലാത്തവരാണ്.

ലൈബ്രറി കൗൺസിൽ വാർഷികാഘോഷം

ഇരിട്ടി: ഇരിട്ടി താലൂക്ക് ലൈബ്രറി കൗൺസിൽ ദശവാർഷികാഘോഷ സമാപനത്തിന്‍റെ ഭാഗമായി നടന്ന സാംസ്കാരിക സമ്മേളനം "അക്ഷരജ്വാല' ഇരിട്ടി ഇ.കെ. നായനാർ ഓഡിറ്റോറിയത്തിൽ സിനിമാ നടി ഗായത്രി വർഷ ഉദ്ഘാടനം ചെയ്തു. ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ അധ്യക്ഷത വഹിച്ചു. സാംസ്‌കാരിക ഘോഷയാത്ര ഇരിട്ടി ബ്ലോക്ക് പഞ്ചായത്ത് ഓഫിസ് പരിസരത്തു നിന്നാരംഭിച്ച് ഇരിട്ടിയിൽ സമാപിച്ചു. താലൂക്കിലെ ഗ്രന്ഥശാലകളിലെ വനിതാ സെക്രട്ടറിമാരെ ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ ആദരിച്ചു. ഇരിട്ടി നഗരസഭ ചെയർപേഴ്സൺ കെ. ശ്രീലത, ലൈബ്രറി കൗൺസിൽ സംസ്ഥാന സമിതിയംഗം കെ.എ. ബഷീർ, ജില്ലാ കൗൺസിൽ അംഗം ലക്ഷ്മി, ലൈബ്രറി കൗൺസിൽ താലൂക്ക് സെക്രട്ടറി രഞ്ജിത്ത് കമൽ, ലൈബ്രറി കൗൺസിൽ താലൂക്ക് പ്രസിഡന്‍റ് പി. കുഞ്ഞികൃഷ്ണൻ, കെ. ശ്രീധരൻ, പ്രദീപൻ കണ്ണോത്ത്, കെ.വി. രാഘവൻ, പി. രഘു, എം.സി. ജയകൃഷ്ണൻ എന്നിവർ പ്രസംഗിച്ചു. അദീന നാടക നാട്ടറിവ് വീട് അവതരിപ്പിച്ച പാട്ടുറവ നാടൻ പാട്ടുമേള അരങ്ങേറി.

കുടിവെള്ള പൈപ്പ് ലൈന്‍; പരിശോധന നടത്തി

ഇരിട്ടി: നഗരസഭയിൽ കിഫ്ബി ഫണ്ടിൽ നടപ്പിലാക്കുന്ന കുടിവെള്ള പദ്ധതിയുടെ പൈപ്പ് ലൈൻ സ്ഥാപിക്കുന്നതിനായി ഇരിട്ടി-പേരാവൂർ റോഡരികിൽ കുഴിയെടുക്കുന്നതുമായി ബന്ധപ്പെട്ട് പരിശോധന നടത്തി. സണ്ണി ജോസഫ്‌ എംഎല്‍എ, നഗരസഭ അധ്യക്ഷ കെ. ശ്രീലത എന്നിവരുടെ നേതൃത്വത്തില്‍ വാട്ടർ അഥോറിറ്റി എക്സിക്യൂട്ടീവ് എൻജിനിയർ നൗഫല്‍, പിഡബ്ല്യുഡി റോഡ് വിഭാഗം അസിസ്റ്റന്‍റ് എക്സിക്യൂട്ടീവ് എൻജിനിയർ ഷീല ചോരന്‍, അസിസ്റ്റന്‍റ് എൻജിനിയർ രേഷ്മ, കോൺട്രാക്ടർ തുടങ്ങിയവരുടെ സാന്നിധ്യത്തിലാണ് സ്ഥല പരിശോധന നടത്തിയത്. ഇനി പൈപ്പിടൽ മാത്രമാണ് അവശേഷിക്കുന്നത്. പ്രവൃത്തി പൂർത്തിയായാൽ ഉടൻ തന്നെ റോഡ് പഴയ രൂപത്തിൽ പുനഃസ്ഥാപിക്കുന്നതിനും തീരുമാനിച്ചു.

വിട പറഞ്ഞത് കൃഷിക്കൊപ്പം രാഷ്‌ട്രീയ പ്രവർത്തനം നടത്തിയ കർമയോഗി

പയ്യന്നൂർ: പയ്യന്നൂരിന് നഷ്ടമായത് കൃഷിക്കൊപ്പം രാഷ്‌ട്രീയ പ്രവർത്തനം നടത്തി ജനഹൃദയങ്ങളിൽ വേരോട്ടമുണ്ടാക്കിയ കെആർ എന്ന ദ്വയാക്ഷരങ്ങളിൽ അറിയപ്പെട്ടിരുന്ന സിപിഎമ്മിന്‍റെ ജനകീയ മുഖം. 1968ൽ സിപിഎം അംഗത്വം നേടി അഞ്ചര പതിറ്റാണ്ട് പിന്നിട്ട അദ്ദേഹത്തിന്‍റെ കറകളഞ്ഞ രാഷ്‌ട്രീയ ജീവിതം വിരുദ്ധ ചേരികളിലുള്ള മറ്റു രാഷ്‌ട്രീയ നേതാക്കൾക്കും കെആറിനെ സ്വീകാര്യനാക്കി. ഗണേഷ് ബീഡി തൊഴിലാളിയായിരിക്കെ ബീഡി തൊഴിലാളികളെ സംഘടിപ്പിച്ചാണു ട്രേഡ് യൂണിയൻ രംഗത്ത് സജീവമാകുന്നത്. ഭക്ഷ്യസമരം, മിച്ച ഭൂമി സമരം, പയ്യന്നൂർ ഷണ്മുഖ പ്രസ് സമരം തുടങ്ങിയവയിൽ പങ്കെടുത്ത് ജയിൽവാസമനുഷ്ഠിച്ചു. നഗരസഭ കൗൺസിലറായും സ്റ്റാൻഡിംഗ് കമ്മിറ്റി ചെയർമാനായും പ്രവർത്തിച്ച കെആർ പയ്യന്നൂരിന്‍റെ വികസന പ്രവർത്തനങ്ങളിൽ നടത്തിയ ഇടപെടലുകൾ ശ്രദ്ധേയമായിരുന്നു. സിപിഎം അവിഭക്ത പയ്യന്നൂർ ലോക്കൽ സെക്രട്ടറി, കെആർസിഐടിയു പയ്യന്നൂർ ഏരിയാ പ്രസിഡന്‍റ്,വെള്ളൂർ ജനത ചാരിറ്റബിൾ സൊസൈറ്റി, കൈരളി ഹോട്ടൽ, പയ്യന്നൂർ ദിനേശ് ബീഡി സഹകരണ സംഘം എന്നിവയുടെ പ്രസിഡന്‍റ്, ദിനേശ് കേന്ദ്രസംഘം ഡയറക്‌ടർ എന്നീ നിലകളിൽ പ്രവർത്തിച്ചു. രാവിലെ എഴുന്നേറ്റാലുടൻ വയലിലെ ജോലികളിൽ മുഴുകുന്ന കെആർ അതിനുശേഷമാണ് സൈക്കിളിൽ നഗരത്തിലെത്തി രാഷ്‌ട്രീയ പ്രവർത്തനം നടത്തിയിരുന്നത്. ആറു പ്രാവശ്യം സൈക്കിൾ മോഷണം പോയി. കെആറിന്‍റെ സൈക്കിളാണെന്ന് വാർത്തകളിലൂടെ അറിയുന്ന മോഷ്ടാക്കൾ നാലുപ്രാവശ്യം യഥാസ്ഥാനത്ത് സൈക്കിൾ തിരിച്ചെത്തിച്ചു. 2011ൽ നടന്ന കർഷക സമരത്തിന്‍റെ ഭാഗമായി നടന്ന സർക്കാർ ഓഫീസ് ഉപരോധത്തിൽ പങ്കെടുത്തതിന്‍റെ പേരിൽ കെആറിന്‍റെ പുരയിടം ജപ്തി ചെയ്യാൻ മുൻസിഫ് കോടതിയുടെ ഉത്തരവുണ്ടായിരുന്നു. സിപിഎം നേതാക്കൾ മുൻസിഫ് കോടതിയിൽ പിഴയൊടുക്കിയാണ് ജപ്തി നടപടികൾ പിൻവലിപ്പിച്ചത്. മുഖ്യമന്ത്രി അനുശോചിച്ചു സിപിഎം പയ്യന്നൂർ മുൻ ഏരിയാ കമ്മിറ്റിയംഗവും സിഐടിയു കണ്ണൂർ ജില്ലാ കമ്മിറ്റിയംഗവുമായ കെ. രാഘവന്‍റെ നിര്യാണത്തിൽ മുഖ്യമന്ത്രി പിണറായി വിജയൻ അനുശോചിച്ചു. മൂന്ന് ദശാബ്ദത്തിലേറെ പയ്യന്നൂർ ഏരിയ കമ്മറ്റി അംഗമായി പ്രവർത്തിച്ച അദ്ദേഹം പയ്യന്നൂരിന്‍റെ വികസന പ്രവർത്തനങ്ങളിലും ട്രേഡ് യൂണിയൻ രംഗത്തും സജീവമായിരുന്നുവെന്ന് മുഖ്യമന്ത്രി അനുസ്മരിച്ചു.

കൊളക്കാട് സെന്‍റ് തോമസ് തീർഥാടന കേന്ദ്രത്തിൽ തിരുനാൾ തുടങ്ങി

കൊളക്കാട്: വിശുദ്ധ തോമാശ്ലീഹായുടെ തിരുശേഷിപ്പ് പ്രതിഷ്ഠിതമായ കൊളക്കാട് സെന്‍റ് തോമസ് തീർഥാടന കേന്ദ്രത്തിൽ തിരുനാളിനും പുതുഞായർ ആചരണത്തിനും തുടക്കം കുറിച്ച് ഇടവക വികാരി ഫാ. തോമസ് പട്ടാംകുളം കൊടിയേറ്റി. തുടർന്ന് നടന്ന തിരുക്കർമങ്ങൾക്ക് ഫാ. പോൾ വള്ളോപ്പിള്ളി കാർമികത്വം വഹിച്ചു. ഇന്നുരാവിലെ 10ന് കുരിശുമല തീർഥാടന പള്ളിയിൽ വച്ച് രോഗികളെയും പ്രായമായവരെയും ആദരിക്കും. തിരുകർമ്മങ്ങൾക്ക് ഫാ. ഇമ്മാനുവൽ കണ്ടത്തിൽ കാർമികത്വം വഹിക്കും. വൈകുന്നേരം നാലിന് വിശുദ്ധ കുർബാനയ്ക്കും തിരുക്കർമങ്ങൾക്കും ഫാ. അഗസ്റ്റിൻ അറയ്ക്കൽ കാർമികത്വം വഹിക്കും. 25ന് റോമൻ ലത്തീൻ റീത്തിലുള്ള വിശുദ്ധ കുർബാനയ്ക്കും തിരുക്കർമങ്ങൾക്കും കണ്ണൂർ രൂപത യുടെ സഹായ മെത്രാൻ ഡോ. ഡെന്നിസ് കുറുപ്പശേരി കാർമികത്വം വഹിക്കും. 26ന് വൈകുന്നേരം 4.30ന് തിരുക്കർമങ്ങൾക്ക് തലശേരി അതിരൂപത ചെറുപുഷ്പ മിഷൻ ലീഗ് ഡയറക്ടർ ഫാ. ജോസഫ് വടക്കേ പറമ്പിൽ കാർമികത്വം വഹിക്കും. 27ന് പുലർച്ചെ മൂന്നിന് തലശേരി അതിരൂപത ആർച്ച്ബിഷപ് മാർ. ജോസഫ് പാംപ്ലാനിയുടെ നേതൃ ത്വത്തിൽ അതിരൂപത സാന്തോം തീർഥാടനം. തുടർന്ന് അഞ്ചിന് ആർച്ച് ബിഷപിന്‍റെ നേതൃത്വത്തിൽ സമൂഹബലി കുരിശുമലയിൽ. രാവിലെ ഏഴ്, 8.15, 9.30നും കുരിശുമുലയിലും, ആറ്, 7.30, 9.15 താഴെ പള്ളിയിലും വിശുദ്ധ കുർബാനയ്ക്ക് യഥാക്രമം ഫാ. ആന്‍റണി അമ്പാട്ട്, ഫാ. ജോസഫ് തകിടിയേൽ, ഫാ. ജോബി കാരക്കാട്ട്, ഫാ. ജോസഫ് കാക്കരമറ്റം, ഫാ. മാത്യു വടക്കേപ്പാറ ഒസിഡി, ഫാ. മാത്യു പാലമറ്റം തുടങ്ങിയവർ കാർമികത്വം വഹിക്കും. രാവിലെ ഒന്പതിന് ക്രൂശിതനോടൊപ്പം കുരിശുമലയിലേക്ക് കുരിശിന്‍റെവഴിയും ഉണ്ടായിരിക്കും. തുടർന്ന് 11ന് കുരിശുമലയിൽ തിരുക്കർമങ്ങൾക്ക് പേരാവൂർ മേജർ ആർക്കി എപ്പിസ്കോപ്പൽ ആർച്ച് പ്രീസ്റ്റ് ഫാ. മാത്യു തെക്കേമുറി നേതൃത്വം നല്കും.

സംസ്ഥാന ഭക്ഷ്യ കമ്മീഷൻ ചെയർമാൻ ആറളം ഗോത്രവർഗ മേഖല സന്ദർശിച്ചു

ഇരിട്ടി: ആറളം ഗോത്രവർഗ മേഖല സംസ്ഥാന ഭക്ഷ്യ കമ്മീഷൻ ചെയർമാൻ ഡോ. ജിനു സക്കറിയ ഉമ്മൻ സന്ദർശിച്ചു. ദേശീയ ഭക്ഷ്യ ഭദ്രതാ നിയമം വിഭാവനം ചെയ്ത രീതിയിൽ ഭക്ഷ്യ ധാന്യങ്ങൾ ശരിയായ അളവിലും ഗുണനിലവാരത്തിലും ഗുണഭോക്താകൾക്ക് ലഭിക്കുന്നുണ്ടോ എന്നുള്ള പരിശോധനയുടെ ഭാഗമായാണ് സന്ദർശനം നടത്തിയത്. ഫാമിലെ അങ്കണവാടികൾ, ഗോത്രവർഗ ഉന്നതികളിലെ വീടുകൾ, റേഷൻകട എന്നിവ കമ്മീഷൻ സന്ദർശിച്ചു. മൂന്നു വയസിൽ താഴെയുള്ള കുട്ടികളുടെ പോഷകാഹാര വിതരണം, മൂന്നു വയസ് മുതൽ ആറു വയസ് വരെയുള്ള കുട്ടികളുടെ പോഷകാഹാര വിതരണം, ഗർഭിണികൾക്കുള്ള പോഷകാഹാര വിതരണം, ജനനി ജന്മരക്ഷാ പദ്ധതിയുടെ രജിസ്‌ട്രേഷൻ എന്നീ കാര്യങ്ങളെകുറിച്ച് കമ്മീഷൻ വിശദമായി അന്വേഷിക്കുകയും പരിശോധന നടത്തുകയും ചെയ്തു. ബ്ലോക്ക് ഒന്പതിൽ പുതിയ റേഷൻ കട അനുവദിക്കണമെന്ന് താമസക്കാർ കമ്മീഷൻ ചെയർമാനോട് ആവശ്യപ്പെട്ടു. ഇക്കാര്യം അനുഭാവപൂർവം പരിഗണിക്കുമെന്ന് കമ്മീഷൻ ഉറപ്പ് നൽകി. ആറളം പഞ്ചായത്ത്‌ പ്രസിഡന്‍റ് കെ.പി. രാജേഷ്, വാർഡ് മെംബർ മിനി ദിനേശൻ, ജില്ലാ സപ്ലൈ ഓഫിസർ ജി. സുമ, ഇരിട്ടി താലൂക്ക് സപ്ലൈ ഓഫിസർ ബി. ജയശങ്കർ, ജൂണിയർ സൂപ്രണ്ട് കെ.വി. ബിജു, റേഷനിംഗ് ഇൻസ്‌പെക്ടർമാരായ കെ.കെ.സന്തോഷ്‌, പീറ്റർ ചാൾസ്, മുഹമ്മദ്‌ ആഷിഖ്, കമലാക്ഷൻ, ഐസിഡിഎസ് ജില്ലാ പ്രോഗ്രാം ഓഫിസർ പി.എ. ബിന്ദു, ഇരിട്ടി സിഡിപിഒ ഷീന എം. കണ്ടത്തിൽ, സൂപ്പർവൈസർമാരായ ടി.കെ. ബീന, ജിസ്മി, ഫുഡ്‌ സേഫ്റ്റി ഓഫിസർ മഹേഷ്‌, എസ്ടിഡിഡി ജില്ലാ ഓഫിസർ, ടിആർഡിഎം, ഫാം അഡ്മിനിസ്ട്രേഷൻ ഓഫിസർ ഡോ. കെ.പി. നിധീഷ്കുമാർ എന്നിവരടങ്ങുന്ന ഉദ്യോഗസ്ഥ സംഘവും സംസ്ഥാന ഭക്ഷ്യകമ്മീഷൻ ചെയർമാനൊപ്പമുണ്ടായിരുന്നു.

മലപ്പട്ടം വനിതാ ഇന്‍ഡസ്ട്രിയല്‍ പാര്‍ക്ക് നാടിന് സമർപ്പിച്ചു

കണ്ണൂർ: ഇരിക്കൂര്‍ ബ്ലോക്ക് പഞ്ചായത്തിന്‍റെ നേതൃത്വത്തില്‍ മലപ്പട്ടത്ത് ആരംഭിച്ച വനിതാ ഇന്‍ഡസ്ട്രിയല്‍ പാര്‍ക്ക് മന്ത്രി പി. രാജീവ് ഉദ്ഘാടനം ചെയ്തു. വികസനത്തിന്‍റെ രാഷ്ട്രീയത്തില്‍ കക്ഷി രാഷ്ട്രീയത്തിനതീതമായി യോജിപ്പുണ്ടാവണമെന്നും കൂടുതല്‍ സംരംഭങ്ങള്‍ ഉയര്‍ന്നുവരണമെന്നും മന്ത്രി പറഞ്ഞു. കേരളത്തില്‍ നിലവില്‍ 31 ശതമാനവും വനിതാ സംരംഭങ്ങളാണ്. ഇരിക്കൂര്‍ ബ്ലോക്ക് പഞ്ചായത്ത് പൈതല്‍ മലയില്‍ ഒരേക്കര്‍ ഭൂമിയില്‍ നടപ്പിലാക്കാന്‍ പോകുന്ന ഡെസ്റ്റിനേഷന്‍ ടൂറിസം വികസന പദ്ധതിയുടെ ഡിപിആര്‍ മന്ത്രി പ്രകാശനം ചെയ്തു. ഇരിക്കൂര്‍ ബ്ലോക്ക് പഞ്ചായത്ത് പ്രസിഡന്‍റ് റോബര്‍ട്ട് ജോര്‍ജ് അധ്യക്ഷത വഹിച്ചു. ഇരിക്കൂര്‍ ബ്ലോക്ക്പഞ്ചായത്ത് അസിസ്റ്റന്‍റ് എക്സിക്യുട്ടീവ് എൻജിനിയര്‍ ആര്‍. മനോജ് കുമാര്‍ റിപ്പോര്‍ട്ട് അവതരിപ്പിച്ചു. 60 സെന്‍റ് ഭൂമിയില്‍ 92.80 മീറ്റര്‍ സ്‌ക്വയര്‍ വിസ്തീര്‍ണമുള്ള ഒരുനില കെട്ടിടത്തിന്‍റെ നിര്‍മാണ ചെലവ് 26 ലക്ഷം രൂപയാണ്. കെട്ടിടം വനിതാ സംരംഭകര്‍ക്ക് വാടകയ്ക്ക് നല്‍കും. ഇരിക്കൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് ഒ.എസ്. ലിസി, ഇരിക്കൂര്‍ ബ്ലോക്ക് പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയര്‍മാന്‍ ജോര്‍ജ് ജോസഫ്, ഇരിക്കൂര്‍ ബ്ലോക്ക് പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയര്‍പേഴ്സണ്‍ കെ.പി. രേഷ്മ, ഇരിക്കൂര്‍ ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയര്‍മാന്‍ പി.കെ. മുനീര്‍, ഇരിക്കൂര്‍ ബ്ലോക്ക് പഞ്ചായത്ത് സെക്രട്ടറി ബി. രാജേശ്വരി, മലപ്പട്ടം പഞ്ചായത്ത് പ്രസിഡന്‍റ് കെ.പി. രമണി, മലപ്പട്ടം പഞ്ചായത്ത് വൈസ് പ്രസിഡന്‍റ് ഇ. ചന്ദ്രൻ, ഇരിക്കൂര്‍ ബ്ലോക്ക് പഞ്ചായത്ത് വ്യവസായ വികസന ഓഫീസര്‍ ടി.വി. ശ്രീകാന്ത്, രാഷ്ട്രീയ പ്രതിനിധികളായ എം.സി. രാഘവന്‍, എം.പി. രാധാകൃഷ്ണന്‍, പി.പി. ഉണ്ണിക്കൃഷ്ണന്‍, എം.പി. സാജന്‍ തുടങ്ങിയവര്‍ പങ്കെടുത്തു.

റീ സർവേ സൂപ്രണ്ട് ഓഫീസ് മാറ്റരുത്: സർവകക്ഷി യോഗം

ശ്രീകണ്ഠപുരം: ശ്രീകണ്ഠപുരത്ത് പ്രവർത്തിച്ചുവരുന്ന റീ സർവേ സൂപ്രണ്ട് ഓഫീസ് മട്ടന്നൂരിലേക്ക് മാറ്റുന്ന നടപടി പുനഃപരിശോധിക്കണമെന്ന് സർവകക്ഷിയോഗം ആവശ്യപ്പെട്ടു. ശ്രീകണ്ഠപുരം മുനിസിപ്പൽ ഓഫീസിൽ വിളിച്ചു ചേർത്ത സർവകക്ഷിയോഗം സജീവ് ജോസഫ് എംഎൽഎ ഉദ്ഘാടനം ചെയ്തു. മുനിസിപ്പൽ ചെയർപേഴ്സൺ കെ.വി. ഫിലോമിന അധ്യക്ഷത വഹിച്ചു. ഓഫീസ് ശ്രീകണ്ഠപുരത്ത് തന്നെ നിലനിർത്തണമെന്നാവശ്യപ്പെട്ട് വകുപ്പ് മന്ത്രിക്ക് നിവേദനം നൽകാനും യോഗം തീരുമാനിച്ചു. മുനിസിപ്പൽ വൈസ് ചെയർമാൻ കെ. ശിവദാസൻ, ജനപ്രതിനിധികൾ, ഉദ്യോഗസ്ഥർ, വിവിധ സംഘടനാ പ്രതിനിധികൾ, രാഷ്‌ട്രീയപാർട്ടി പ്രതിനിധികൾ എന്നിവർ പങ്കെടുത്തു.

വേനൽ മഴയിൽ നാശനഷ്ടം

ചെറുപുഴ: വേനൽമഴയിൽ ചെറുപുഴയിൽ വീണ്ടും നാശനഷ്ടം. ഇന്നലെ വൈകുന്നേരം നാലരയോടെ ഉണ്ടായ കാറ്റിലും മഴയിലും കോലുവള്ളി, പാണ്ടിക്കടവ്, പാറോത്തുംനീർ എന്നിവിടങ്ങളിൽ നാശ നഷ്ടമുണ്ടായി. വീടുകൾക്കും കൃഷിക്കുമാണ് നാശമുണ്ടായത്. പാറോത്തുംനീരിലെ കെ.പി. കാർത്ത്യായനിയുടെ വീടിന് മുകളിൽ തെങ്ങ് വീണ് വീടിന്‍റെ മേൽക്കൂര തകർന്നു. പാണ്ടിക്കടവിലെ ജാനകിയമ്മയുടെ വീടിന്‍റെ മേൽക്കൂര കാറ്റിൽ പറന്നു പോയി. കോലു വള്ളിയിലെ വി.വി. ദാമോദരന്‍റെ കിണറിന് മുകളിലേക്ക് സമീപവാസിയുടെ റബർ ഒടിഞ്ഞ് വീണ് നാശമുണ്ടായി. റബർ, വാഴ, തെങ്ങ്, കമുക് തുടങ്ങിയ കൃഷികളും ഇവിടെ നശിച്ചു.

കാർ ലോറിക്കടിയിലേക്ക് ഇടിച്ചുകയറി രണ്ടുപേർക്ക് പരിക്ക്

ചെറുപുഴ: കാർ ലോറിക്കടിയിലേക്ക് ഇടിച്ചുകയറി രണ്ടു പേർക്ക് പരിക്കേറ്റു. കാറിലുണ്ടായിരുന്ന ഫാ. പ്രിയേഷ് കളരിമുറിയിൽ (49), സുരേഷ് (61) എന്നിവർക്കാണ് പരിക്കേറ്റത്. മലയോര ഹൈവേയിൽ ചെറുപുഴ മത്സ്യ മാർക്കറ്റിന് സമീപത്തെ പെട്രോൾ പമ്പിനടുത്ത് തിങ്കളാഴ്ച രാത്രിയായിരുന്നു അപകടം. പുളിങ്ങോത്ത് നിന്നും ചെറുപുഴയിലേക്ക് വരികയായിരുന്നു കാർ. ഒരു ബൈക്ക് യാത്രക്കാരനെ രക്ഷിക്കാനുള്ള ശ്രമത്തിനിടെ കാർ നിർത്തിയിട്ടിരുന്ന ലോറിയിൽ ഇടിക്കുകയായിരുന്നു. പരിക്കേറ്റവരെ കാക്കയംചാൽ സെന്‍റ് സെബാസ്റ്റ്യൻസ് ആശുപത്രിയിൽ പ്രവേശിപ്പിച്ചു. പരിക്ക് ഗുരുതരമായതിനെ തുടർന്ന് സുരേഷിനെ കണ്ണൂരിലെ സ്വകാര്യ ആശുപത്രിയിലേക്ക് മാറ്റി.

ഈയ്യഭരണി തുരുത്ത് ടൂറിസം പദ്ധതി ഇഴയുന്നു

ആലക്കോട്: ജൈവ വൈവിധ്യ പൈതൃക കേന്ദ്രമായി പ്രഖ്യാപിച്ച ഈയ്യഭരണ തുരത്തിന്‍റെ ടൂറിസം വികസന പദ്ധതികൾ ഇഴഞ്ഞു നീങ്ങുന്നു. അനന്തസാധ്യതകളുണ്ടായിട്ടും വികസന പ്രവൃത്തികൾ വേണ്ടരീതിയിൽ മുന്നോട്ടു പോകാത്ത അവസ്ഥയിലാണ് ഈ വിനോദ സഞ്ചാര കേന്ദ്രം. ആലക്കോട് പഞ്ചായത്തിൽ കുട്ടാപറമ്പിനും പരപ്പക്കുമിടയിൽ കുപ്പം പുഴയുടെ ഭാഗമായ ഈയ്യഭരണിയിൽ പുഴ രണ്ടായി പിരിഞ്ഞുണ്ടായതാണ് ഈയ്യഭരണി തുരുത്ത്. ജൈവവൈവിധ്യ പാർക്കും വിനോദസഞ്ചാരകേന്ദ്രവുമാണ് ഇവിടെ വിഭാവനം ചെയ്തിരുന്നത്. കുടക് വനമേഖലയിൽനിന്നും പൈതൽമലയിൽനിന്നും ഉത്ഭവിക്കുന്ന ചെറുപുഴകളും നീരൊഴുക്കുകളും കൂടിച്ചേരുന്ന പ്രദേശാണിത്. ഈയ്യഭരണി തുരുത്തിന് മുകൾ ഭാഗത്ത് പുഴ രണ്ടായി പിരിഞ്ഞൊഴുകുന്നയിടം അഞ്ചേക്കേറിലധികം കരഭൂമിയാണ്. വൻമരങ്ങളും കുറ്റിച്ചെടികളും ഔഷധസസ്യങ്ങളാലും സമൃദ്ധമാണ് ഈ പ്രദേശം. ടൂറിസം വികസനത്തിന്‍റെ ഭാഗമായി സഞ്ചാരികൾക്കായി നടപ്പാലങ്ങൾ, നടപ്പാതകൾ എന്നിവ ഒരുക്കുകയും വിശ്രമത്തിനായുള്ള സൗകര്യങ്ങളും ഒരുക്കിയിരുന്നു. ഇതോടെ ദൂരസ്ഥലങ്ങളിൽ നിന്നു പോലും സഞ്ചാരികൾ എത്തിയിരുന്നു. ജില്ലാ ടൂറിസം പ്രമോഷൻ കൗൺസിലുമായി ചേർന്നും വികസന പദ്ധതികൾ വിഭാവനം ചെയ്തിരുന്നു. സ്വകാര്യ വ്യക്തി സൗജന്യമായി നൽകിയ സ്ഥലത്ത് 15 ലക്ഷം രൂപ ചെലവിൽ വിനോദ സഞ്ചാരികൾക്ക് വിശ്രമത്തിനും ഓഫീസിനുമായി കെട്ടിടവും നിർമിച്ചു.എന്നാൽ കാലമേറെയായിട്ടും വൈദ്യുതി കണക്ഷൻ എടുക്കാൻ പോലും നടപടി ഉണ്ടായില്ല. അപൂർവയിനം സസ്യലതാദികൾ, നിരവധി പുഴമത്സ്യങ്ങൾ, അപൂർവയിനം പക്ഷികളുടെ സങ്കേതം എന്നീ നിലകളിൽ ഇവിടം പ്രാധാന്യം നേടിയിട്ടുണ്ട്. ഔഷധസസ്യ ങ്ങൾ, നീരൊഴുക്കുള്ള നിരവധി ചെറുചാലുകൾ തുടങ്ങിയവയുമുണ്ട്. എന്നാൽ ആവശ്യമായ സംരക്ഷണമോ പരിചരണമോ ഏർപ്പെടുത്തുന്നതിൽ വീഴ്ച വന്നതോടെ സാമൂഹ്യവിരുദ്ധർ ഇവ നശിപ്പിച്ചു. തുരിത്തിന്‍റെ വികസനത്തിന് പഞ്ചായത്ത് ഭരണസമിതിയും പ്രാദേശിക വികസ നസമിതികളും ചേർന്ന് ജനകീയ കൂട്ടായ്മയിൽപദ്ധതികൾ ആവിഷ്കരിച്ചു നടപ്പാക്കണമെന്ന ആവശ്യം ശക്തമാണ്.

വല്യമ്മ വിറക് വെട്ടുന്നതിനിടെ കത്തികൊണ്ട് ഒന്നര വയസുകാരന് ദാരുണാന്ത്യം

ആലക്കോട്: വല്യമ്മ വിറക് വെട്ടുന്നതിനിടെ കത്തി തലയിൽക്കൊണ്ട് ഒന്നര വയസുകാരന് ദാരുണാന്ത്യം. ആലക്കോട് കോളി അങ്കണവാടിക്കു സമീപം മച്ചിനി വിഷ്ണു-പ്രിയ ദമ്പതികളുടെ മകൻ ദയാൽ ആണ് മരിച്ചത്. ഇന്നലെ വൈകുന്നേരം അഞ്ചോടെ വീടിനു സമീപത്തുനിന്ന് വിറക് വെട്ടുകയായിരുന്ന വല്യമ്മ നാരായണിയുടെ അരികിലെത്തിയ കുട്ടിയുടെ തലയിൽ അബദ്ധത്തിൽ കത്തി പതിക്കുകയായിരുന്നു. ഉടൻ ആലക്കോട് സഹകരണ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. 80 വയസുള്ള നാരായണിക്ക് കണ്ണിന് കാഴ്ചക്കുറവുണ്ട്. പോസ്റ്റുമാർട്ടത്തിനായി ദയാലിന്‍റെ മൃതദേഹം പരിയാരത്തെ കണ്ണൂർ ഗവ. മെഡിക്കൽ കോളജിലേക്ക് മാറ്റി. ദീഷിത ഏക സഹോദരിയാണ്.

എംഎ ഹിസ്റ്ററി വിഭാഗം മാറ്റാനുള്ള നീക്കം: എസ്എഫ്ഐ‌ വിസിയെ ഉപരോധിച്ചു

കണ്ണൂർ: മാങ്ങാട്ട്പറമ്പ് കാമ്പസിൽ പ്രവർത്തിക്കുന്ന എംഎ ഹിസ്റ്ററി വിഭാഗം പാലയാട് കാമ്പസിലേക്ക് മാറ്റാനുള്ള നീക്കത്തിൽ പ്രതിഷേധിച്ച് എസ്എഫ്ഐ കണ്ണൂർ യൂണിവേഴ്സിറ്റി ആസ്ഥാനത്തേക്ക് നടത്തിയ മാർച്ചിൽ സംഘർഷം. പ്രകടനമായെത്തിയ പ്രവർത്തകരെ യൂണിവേഴ്സിറ്റി കവാടത്തിൽ പോലീസ് തടഞ്ഞു. പോലീസിനെ മറികടന്ന് കാന്പസിലേക്ക് പ്രവർത്തകർ തള്ളിക്കയറാൻ ശ്രമിച്ചതിനെ തുടർന്ന് പോലീസും സമരക്കാരും തമ്മിൽ ഉന്തും തള്ളുമുണ്ടായി. ഏതാനും പേർ മറ്റു വഴികളിലൂടെ കാന്പസിലേക്ക് പ്രവേശിച്ച് വൈസ് ചാൻസലറുടെ മുറിയിലേക്ക് ഇരച്ചു കയറി. തുടർന്ന് ഓഫീസിൽ കുത്തിയിരുന്ന് വൈസ് ചാൻസലർ പ്രഫ. ഡോ. കെ.കെ. സാജുവിനെ ഉപരോധിച്ചു. സമരക്കാർ മണിക്കൂറുകളോളം ഓഫീസിലിരുന്ന് മുദ്രാവാക്യം വിളിച്ചു. പോലീസ് എത്തിയെങ്കിലും സമരക്കാരെ അറസ്റ്റ് ചെയ്തു നീക്കാൻ തയാറായില്ല. ഇതിനിടെ സ്ഥലത്തെത്തിയ സിൻഡിക്കേറ്റംഗം വൈഷ്ണവ് മഹേന്ദ്രൻ വിസിയുമായി ചർച്ച നടത്തി. വിഷയം അടുത്ത സിൻഡിക്കേറ്റിൽ ചർച്ച ചെയ്യാമെന്നും അതുവരെ നടപടികളുണ്ടാകില്ലെന്നും വിസി ഉറപ്പ് നൽകിയതിനെ തുടർന്ന് സമരം അവസാനിപ്പിച്ചു. മാർച്ച് സംസ്ഥാന ജോയിന്‍റെ സെക്രട്ടറി വിപിൻരാജ് ഉദ്ഘാടനം ചെയ്തു. സിൻഡിക്കേറ്റ് പോലുമറിയാതെ അടിസ്ഥാന സൗകര്യമില്ലാത്ത പാലയാട് കാന്പസിലേക്ക് പഠനവിഭാഗം മാറ്റാനുള്ള നീക്കത്തിന് പിന്നിൽ വൈസ്ചാൻസലറുടെ സ്വാർഥ താത്പര്യമാണെന്ന് വിപിൻ രാജ് ആരോപിച്ചു. ജില്ലാ പ്രസിഡന്‍റ് ടി.പി. അഖില അധ്യക്ഷത വഹിച്ചു. ജില്ലാ സെക്രട്ടറി ശരത് രവീന്ദ്രൻ, ജോയൽ തോമസ്, കെ.നിവേദ്, സ്വാതി പ്രദീപൻ , സനന്ദ്കുമാർ എന്നിവർ സമരത്തിന് നേതൃത്വം നൽകി.

ദിനേശ് സ്കൂൾ മാർക്കറ്റ് ഉദ്ഘാടനം ചെയ്തു

കണ്ണൂർ: പയ്യാന്പലം ദിനേശ് സൂപ്പർമാർക്കറ്റിൽ ദിനേശ് സ്കൂൾ മാർക്കറ്റ് ടി.ഐ. മധുസൂദനൻ എംഎൽഎ ഉദ്ഘാടനം ചെയ്തു. കേരള ദിനേശ് ചെയർമാൻ എം.കെ. ദിനേശ് ബാബു അധ്യക്ഷത വഹിച്ചു. കണ്ണൂർ കെഎംഎം ഗവ. വനിത കോളജ് പ്രിൻസിപ്പൽ ഡോ. കെ.ടി. ചന്ദ്രമോഹനൻ ആദ്യവില്പന ഏറ്റുവാങ്ങി. കേന്ദ്ര സംഘം സെക്രട്ടറി എം.എം. കിഷോർകുമാർ, ഡയറക്ടർമാരായ പി. കമലാക്ഷൻ, എം. ഗംഗാധരൻ, വി. ബാലൻ, എം.പി. രഞ്ജിനി, വി. സതി, മണ്ടൂക്ക് മോഹനൻ, കേന്ദ്ര സംഘം ഓഫീസ് മാനേജർ എം. പ്രകാശൻ, മാർക്കറ്റിംഗ് മാനേജർ എം. സന്തോഷ് കുമാർ എന്നിവർ പ്രസംഗിച്ചു. പുതുമയോടെ മുന്നോട്ട് എന്ന കാപ്ഷനിൽ ആരംഭിച്ച സ്കൂൾ മാർക്കറ്റിൽ വിദ്യാർഥികൾക്ക് ആവശ്യങ്ങൾക്ക് ആവശ്യമായ കുടകൾ, ബാഗുകൾ, നോട്ടുബുക്കുകൾ, പെൻ, പെൻസിൽ, വാട്ടർ ബോട്ടിൽ, സ്കെയിൽ, ഷാർപ്പ്നർ, ഇൻസ്ട്രുമെന്‍റ് ബോക്സ്, സെല്ലോടേപ്പ്, ലഞ്ച് ബോക്സ് തുടങ്ങി മുഴുവൻ ഉത്പന്നങ്ങളും വന്പിച്ച ഡിസ്കൗണ്ടിൽ ലഭ്യമാകുമെന്നതാണ് ദിനേശ് സ്കൂൾ മാർക്കറ്റിന്‍റെ പ്രത്യേകത. സ്കൂൾ, കോളജ് കോ-ഓപ്പറേറ്റീവ് സൊസൈറ്റികൾ തുടങ്ങിയവയ്ക്ക് പ്രത്യേക പാക്കേജുകളും ലഭ്യമാണ്.

സ്വർണം വാങ്ങി പണം ഗൂഗിൾ പേ ചെയ്തെന്ന് പറഞ്ഞ് കബളിപ്പിച്ച യുവാവ് അറസ്റ്റിൽ

കണ്ണൂർ: ജ്വല്ലറിയിലെത്തി സ്വർണം വാങ്ങി പണം ഗൂഗിൾ പേ ചെയ്തെന്ന് പറഞ്ഞ് സ്ക്രീൻ ഷോട്ട് കാണിച്ച് കടയുടമയെ കബളിപ്പിച്ച യുവാവ് അറസ്റ്റിൽ. അരോളി സ്വദേശി ഇ.ജി. അഭിഷകിനെയാണ്(24) പിണറായിൽ വച്ച് എടക്കാട് പോലീസ് അറസ്റ്റ് ചെയ്തത്. മാർച്ച് എട്ടിനാണ് കേസിനാസ്പദമായ സംഭവം. ചാലയിലെ ബാലൻ ജ്വല്ലറിയിൽ എത്തി 15 ഗ്രാം സ്വർണാഭരണങ്ങൾ വാങ്ങുകയായിരുന്നു. കൈയിൽ കുറച്ച് പണമേയുള്ളുവെന്നും ബാക്കി പണം എടിഎമ്മിൽനിന്ന് എടുത്തു തരാമെന്നും പറഞ്ഞു. തുടർന്ന് എടിഎമ്മിൽ എത്തിയെങ്കിലും ബാങ്ക് അവധിയായതിനാൽ പണം കിട്ടിയില്ല. ഇതോടെ പണം ഗൂഗിൾപേ ചെയ്തു തരാമെന്ന് കടയുടമയോട് പറഞ്ഞു.തുടർന്ന് നേരത്തെ തയാറാക്കിയ 1, 30,000 രൂപ ഗൂഗിൾപേ ചെയ്തുവെന്നതിന്‍റെ സ്ക്രീൻ ഷോട്ട് കാണിക്കുകയും ചെയ്തു. പണം അക്കൗണ്ടിൽ വന്നെന്ന വിശ്വാസത്തിൽ കടയുടമ സ്വർണാഭരണങ്ങൾ പ്രതിക്ക് നല്കി. എന്നാൽ, കുറച്ചുകഴിഞ്ഞ് അക്കൗണ്ട് ബാലൻസ് നോക്കിയപ്പോഴാണ് പണം ലഭിച്ചിട്ടില്ലെന്ന് കടയുടമയ്ക്ക് മനസിലായത്. ബിൽ അടിക്കാൻ തന്ന ഫോൺ നമ്പറിൽ വിളിച്ചെങ്കിലും ബന്ധപ്പെടാൻ സാധിച്ചില്ല. തുടർന്ന്എടക്കാട് പോലീസിൽ പരാതി നല്കുകയായിരുന്നു. സിസിടിവി കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. പ്രതി സമാനമായ രീതിയിൽ നിരവധി തട്ടിപ്പ് നടത്തിയിട്ടുണ്ടെന്ന് പോലീസ് പറഞ്ഞു. ബാങ്ക് അവധി ദിവസങ്ങളിലാണ് പ്രധാനമായും തട്ടിപ്പ് നടത്തുന്നത്. എടക്കാട് എസ്ഐമാരായ എൻ. ഡിജേഷ്, ഷാജി, സിപിഒ ലെവൻ,രസന്ത് എന്നിവരുടെ നേതൃത്വത്തിലാണ് പ്രതിയെ പിടികൂടിയത്.

ആറാമൂഴത്തില്‍ മികച്ച റാങ്കുമായി രാഹുല്‍

ഉദുമ: ഏഴുവര്‍ഷത്തെ കഠിനാധ്വാനത്തിനൊടുവില്‍ സിവില്‍ സര്‍വീസ് പരീക്ഷയില്‍ മികച്ച റാങ്കുമായി ഉദുമ കൊവ്വല്‍ വടക്കുംപുറം സ്വദേശി രാഹുല്‍ രാഘവന്‍. കഴിഞ്ഞവര്‍ഷത്തെ 714-ാം റാങ്ക് ഇത്തവണ 404 ആയി രാഹുല്‍ മെച്ചപ്പെടുത്തി. കഴിഞ്ഞവര്‍ഷം ഐആര്‍എസിന് (ഇന്ത്യന്‍ റവന്യു സര്‍വീസ്) സെലക്‌ഷന്‍ കിട്ടിയതാണ്. നാഗ്പൂരില്‍ ട്രെയിനിംഗിന് ചേര്‍ന്നെങ്കിലും അവധിയെടുത്ത് വീണ്ടും പരിശ്രമം തുടര്‍ന്നു. തന്‍റെ ജീവിതസ്വപ്‌നമായ ഐഎഎസ് നേടിയെടുത്തേ മതിയാകൂ എന്ന നിശ്ചയദാര്‍ഢ്യമായിരുന്നു ഈ ചെറുപ്പക്കാരന്‍റെ കരുത്ത്. ഒടുവിൽ തന്‍റെ സ്വപ്‌നനേട്ടത്തിനരികില്‍ എത്തിയിരിക്കുകയാണ് ഈ 28കാരന്‍. ഉദുമ ജിഎച്ച്എസ്എസിലായിരുന്നു ഒന്നു മുതല്‍ പ്ലസ്ടു വരെ പഠനം. ഇതിനുശേഷം തിരുവനന്തപുരം കോളജ് ഓഫ് എന്‍ജിനിയറിംഗില്‍ മെക്കാനിക്കല്‍ എന്‍ജിനിയറിംഗിന് ചേര്‍ന്നു. ഇക്കാലത്താണ് സിവില്‍ സര്‍വീസ് എന്ന ആഗ്രഹം മനസില്‍ കയറിയത്. പഠനശേഷം മറ്റു ജോലിക്കൊന്നും ശ്രമിക്കാതെ മുഴുവന്‍ സമയവും സിവില്‍ സര്‍വീസ് കോച്ചിംഗിനായി നീക്കിവച്ചു. തിരുവന്തപുരത്തെ ഐ ലേണ്‍ ഇന്‍സ്റ്റിറ്റ്യൂട്ടിലായിരുന്നു പഠനം. ഇവിടെ പഠനത്തോടൊപ്പം അധ്യാപകനായും ജോലി ചെയ്തു. ഇതിനു മുമ്പ് നാലുതവണയും ഇന്‍റര്‍വ്യുവില്‍ പങ്കെടുത്തിരുന്നു. ഉദുമയിലെ റേഷന്‍കട ഉടമ എം. രാഘവന്‍റെയും പള്ളിക്കര സിഎച്ച്‌സിയിലെ സ്റ്റാഫ് നഴ്‌സ് ടി. ചിന്താമണിയുടെയും മകനാണ്. ചേച്ചി രചന ജില്ലാ വ്യവസായകേന്ദ്രത്തിലെ റിസോഴ്‌സ് പേഴ്‌സണ്‍ ആണ്.

സഹകരണ സ്ഥാപനങ്ങൾ തലമുറയുടെ ആവശ്യം: മാർ ജോസഫ് പാംപ്ലാനി

ഇരിട്ടി: പരസ്പര സഹകരണമാണ് ഒരു സമൂഹത്തിന്‍റെ വളർച്ചയുടെ അടിസ്ഥാനമെന്നും അതുകൊണ്ടു തന്നെ സഹകരണ സ്ഥാപനങ്ങൾ തലമുറയുടെ ആവശ്യമാണെന്നും തലശേരി ആർച്ച്ബിഷപ് മാർ ജോസഫ് പാംപ്ലാനി. അതിരൂപതയുടെ കീഴിലുള്ള എഡ്യൂക്കേഷണൽ ഇൻസ്‌റ്റിറ്റ്യൂ ഷൻസ് കോ-ഓപ്പറേറ്റീവ് സൊസൈറ്റിയുടെ (ട്രെയിക്സ്) മൂന്നാമത്തെ ശാഖ ഇരിട്ടി - തന്തോട് റോഡിലുള്ള സാൻജോസ് റിവർവ്യൂ ഹൈറ്റ്സിൽ ഉദ്ഘാടനം ചെയ്തു പ്രസംഗിക്കുകയായിരുന്നു ആർച്ച് ബിഷപ് . ഇന്ത്യൻ ബാങ്കിംഗ് രംഗത്ത് രണ്ടാം സ്ഥാനത്തുള്ള ബാങ്ക് ഓഫ് ബറോഡയെ പോലെ കേരളത്തിലെ സഹകരണരംഗത്തെ ബാങ്ക് ഓഫ് ബറോഡയാണ് ട്രെയിക്സ് എന്നും മാർ ജോസഫ് പാംപ്ലാനി ചൂണ്ടിക്കാട്ടി. ട്രെയിക്സ് അതിരൂപത കോർപറേറ്റ് മാനേജർ ഫാ. മാത്യു ശാസ്‌താംപടവിൽ അധ്യക്ഷത വഹിച്ചു. സണ്ണി ജോസഫ് എംഎൽഎ ആദ്യനിക്ഷേപം സ്വീകരിച്ചു. സ്ട്രോംഗ് മുറി ആൻഡ് ലോക്കർ സഹകരണ സംഘം ജോയിന്‍റ് രിജിസ്ട്രാർ (ജനറൽ) വി. രാമകൃഷ്‌ണനും കംപ്യൂട്ടർ സ്വിച്ച് ഓൺ കർമം വിമൽജ്യോതി എൻജിനിയറിംഗ് കോളജ് മാനേജർ ഫാ. ജയിംസ് ചെല്ലങ്കോട്ടും ഓഹരി സമാഹരണം അസിസ്റ്റന്‍റ് രജിസ്ട്രാർ (ജനറൽ) എ.കെ. ഉഷയും ലോഗോ പ്രകാശനം പായം പഞ്ചായത്ത് പ്രസിഡന്‍റ് പി. രജനിയും നിർവഹിച്ചു. ചീഫ് പ്രമോട്ടർ കെ.ജെ. ജോർജിനെ ആദരിച്ചു. ഡയറക്‌ടർമാരായ തലശേരി അതിരൂപത വികാരി ജനറൽ മോൺ. സെബാസ്‌റ്റ്യൻ പാലാക്കുഴി, പ്രൊക്കുറേറ്റർ ഫാ. ഡോ. ജോജി കാക്കരമറ്റം, സഹകരണ വകുപ്പ് യൂണിറ്റ് ഇൻസ്പെക്‌ടർ കെ.പി. ശ്രീജിത്ത്കുമാർ, പായം പഞ്ചായത്തംഗം പി.പി. കുഞ്ഞൂഞ്ഞ്, അധ്യാപക പ്രതിനിധി മാത്യു ജോസഫ്, ഇരിട്ടി സെന്‍റ് ജോസഫ്‌സ് പള്ളി വികാരി ഫാ. ജോസഫ് കളരിക്കൽ, സംഘം വൈസ് പ്രസിഡന്‍റ് ജിമ്മി ജോസഫ്, സെക്രട്ടറി ബിന്ദു. എം. ജോർജ്, ശാഖാ മാനേജർ ജോഷി തോമസ് മരങ്ങാട്ടുമ്യാലിൽ എന്നിവർ പ്രസംഗിച്ചു.

കണ്ണൂർ ഗവ. മെഡിക്കൽ കോളജ് അഴിമതിക്കെതിരേ സമഗ്രാന്വേഷണം വേണം: കേരള എൻജിഒഎ

കണ്ണൂർ: കണ്ണൂർ ഗവ. മെഡിക്കൽ കോളജ് ആശുപത്രിയുടെ വികസന സമിതി ഫണ്ട് പരിശോധനയിൽ ലക്ഷങ്ങളുടെ തിരിമറി നടന്നതായി വന്ന ഓഡിറ്റ് റിപ്പോർട്ടിന്‍റെ അടിസ്ഥാനത്തിൽ സമഗ്രമായ അന്വേഷണം നടത്തി കുറ്റക്കാർക്കെതിരേ മാതൃകാപരമായ ശിക്ഷ നടപടികൾ സ്വീകരിക്കണമെന്ന് കേരള എൻജിഒ അസോസിയേഷൻ കണ്ണൂർ ജില്ലാ കമ്മിറ്റി ആവശ്യപ്പെട്ടു. 2022- 23 വാർഷിക കാലയളവിലെ ഓഡിറ്റ് റിപ്പോർട്ടിലെ അപാകതകളാണ് പുറത്തുവന്നിട്ടുള്ളത്, തുടർന്നുള്ള സാമ്പത്തിക വർഷങ്ങളിലെ കണക്കുകൾ പോലും വികസന സമിതിക്ക് ഇതുവരേയും സമർപ്പിക്കുവാൻ സാധിച്ചിട്ടില്ല. ഓൺലൈൻ പ്ലാറ്റ്ഫോമുകൾ മുഖാന്തിരം വികസന സമിതിയിലേക്ക് വന്ന ഫണ്ടുകൾ കണക്കുകളിൽ രേഖപ്പെടുത്തിയിട്ടില്ല എന്നത് ഏറെ ആശങ്ക ഉണർത്തുന്നതാണ്. പരിയാരം മെഡിക്കൽ കോളജിനെ സർക്കാർ ഏറ്റെടുത്തിട്ട് പോലും ഇത്രയധികം അപാകതകൾ സംഭവിക്കുന്നു എന്നുള്ളത് ദുരൂഹതകൾ ഉയർത്തുന്നതാണ്, തീർച്ചയായും ഇതിനു പിന്നിൽ പ്രവർത്തിച്ച മുഴുവൻ ആളുകളെയും നിയമത്തിനു മുന്നിൽ കൊണ്ടുവരണമെന്നും അസോസിയേഷൻ ആവശ്യപ്പെട്ടു.

അഖില കേരള വായനോത്സവം 25 മുതൽ 27 വരെ കണ്ണൂർ എൻജിനിയറിംഗ് കോളജിൽ

കണ്ണൂർ: സംസ്ഥാനലൈബ്രറി കൗൺസിൽ സംഘടിപ്പിക്കുന്ന അഖില കേരള വായനോത്സവത്തിന്‍റെ സംസ്ഥാനതല മത്സരം 25 മുതൽ 27 വരെ ധർമശാലയിലുള്ള കണ്ണൂർ എൻജിനിയറിംഗ് കോളജിൽ നടക്കും. 25ന് വൈകുന്നേരം അഞ്ചിന് മന്ത്രി ആർ. ബിന്ദു ഉദ്ഘാടനം ചെയ്യും. ഹൈസ്കൂൾ, മുതിർന്നവർ എന്നിങ്ങനെ മൂന്നു വിഭാഗങ്ങളിലായുള്ള മത്സരത്തിൽ 56 പേരാണ് മത്സരിക്കുന്നത്. 26ന് രാവിലെ 8.30 മുതൽ 11 വരെ മത്സരാർഥികൾക്കുള്ള എഴുത്തു പരീക്ഷ, പത്തിന് വരയും വരിയും എന്ന പരിപാടി നടക്കും. ചിത്രകാരൻ വർഗീസ് കളത്തിൽ, ഡോ. എ.എസ്. പ്രശാന്ത് കൃഷ്ണൻ എന്നിവർ നേതൃത്വം നൽകും. 11.30 മുതൽ ക്വിസ്, ഉച്ച കഴിഞ്ഞ് രണ്ടു മുതൽ പറശിനിക്കടവ് ജലയാത്ര, വൈകുന്നേരം നാലര മുതൽ ആറു വരെ അഭിമുഖം എന്നിവ നടക്കും. തുടർന്ന് കൊട്ടും പാട്ടും നടക്കും. 27 ന് കഥാകൃത്ത് ടി. പദ്മനാഭനും മത്സരാർഥികളും തമ്മിലുള്ള സംവാദം, ബാവുൽ ഗായിക ശാന്തി പ്രിയയുടെ ബാവുൽ സംഗീതം. ഉച്ചകഴിഞ്ഞ് 2.30 ന് നടക്കുന്ന സമാപന സമ്മേളനം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്ത് സമ്മാനദാന നിർവഹിക്കും. എം. മുകുന്ദൻ മുഖ്യപ്രഭാഷണം നടത്തും.

കേരളത്തില്‍ മൈക്രോ വ്യവസായങ്ങള്‍ക്ക് വന്‍ സാധ്യത: മന്ത്രി രാജീവ്

കണ്ണൂർ: കേരളത്തില്‍ മൈക്രോ വ്യവസായങ്ങള്‍ക്ക് വന്‍ സാധ്യതയാണുള്ളതെന്നും പ്രായഭേദമന്യേ ആര്‍ക്കും സംരംഭകരാകാന്‍ കഴിയുന്ന അനുകൂല സാഹചര്യമാണ് സംസ്ഥാനത്തുള്ളതെന്നും മന്ത്രി പി. രാജീവ്. മയ്യില്‍ റൈസ് പ്രൊഡ്യൂസര്‍ കമ്പനി ലിമിറ്റഡ് പുതുതായി വിപണിയിലിറക്കുന്ന ഗാബ റൈസ് പ്രോഡക്ട് വിപണിയിൽ ഇറക്കുന്നതിന്‍റെയും ജില്ലാപഞ്ചായത്ത് കെട്ടിടത്തിലെ വിപുലീകരിച്ച കേരളാ ഗ്രോ വിപണന കേന്ദ്രത്തിന്‍റെയും ഉദ്ഘാടനം ജില്ലാപഞ്ചായത്ത് ഹാളില്‍ നിര്‍വഹിച്ച് പ്രസംഗിക്കുകയായിരുന്നു അദ്ദേഹം. ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍ മന്ത്രിയില്‍ നിന്നും ഉത്പന്നം ഏറ്റുവാങ്ങി. ജില്ലാപഞ്ചായത്ത് പ്രസിഡന്‍റ് കെ.കെ. രത്നകുമാരി അധ്യക്ഷത വഹിച്ചു. ഗാബ റൈസ് മുളപ്പിച്ച നെല്ല് നിരവധി ആരോഗ്യ ഗുണങ്ങളുള്ള ഗാമ അമിനോ ബ്യൂട്ടിറിക് ആസിഡ് അടങ്ങുന്ന അരിയാക്കി മാറ്റിയാണ് ഗാബ റൈസ് എന്ന പേരില്‍ വിപണിയിലെത്തിച്ചിരിക്കുന്നത്. ഇന്ത്യയിലെ തന്നെ ആദ്യ സംരംഭമാണിത്. കേരള കാര്‍ഷിക സര്‍വകലാശാലയുടെയും കൃഷി വിജ്ഞാന കേന്ദ്രത്തിന്‍റെയും സഹകരണത്തോടെയാണ് മയ്യില്‍ റൈസ് പ്രൊഡ്യൂസര്‍ കമ്പനി ഉത്പന്നം വികസിപ്പിച്ചത്. നബാര്‍ഡ് വഴി കമ്പനിക്ക് ധനസഹായവും ലഭിച്ചിട്ടുണ്ട്.

ഓഡിറ്റ് പരിശോധനയിൽ കണ്ണൂർ ഗവ. മെഡിക്കൽ കോളജിൽ വ്യാപക ക്രമക്കേട്

പരിയാരം: കണ്ണൂർ ഗവ. മെഡിക്കൽ കോളജ് ആശുപത്രി വികസന സമിതിയുടെ പ്രവർത്തനങ്ങളെക്കുറിച്ച് ഓഡിറ്റ് വിഭാഗത്തിന്‍റെ ഓഡിറ്റ് റിപ്പോർട്ടിൽ രൂക്ഷ വിമർശനം. ജില്ലാ കളക്ടർ ചെയർമാനായ സമിതിയുടെ എക്സിക്യൂട്ടീവ് യോഗവും ജനറൽ ബോഡിയും വിളിച്ചു ചേർക്കുന്നതിലെ വീഴ്ച, ആശുപ്രതിയിൽ സൂക്ഷിക്കേണ്ട സാമ്പത്തിക രജിസ്റ്ററുകളുടെ അഭാവം, ആശുപത്രി വികസനസമിതിയുടെ വരുമാനത്തിൽനിന്ന് 10 ലക്ഷത്തോളം രൂപ കാണാതായത് തുടങ്ങിയവ ഉൾപ്പെടെ ഗുരുതരമായ അപാകതകളും ക്രമക്കേടും ചൂണ്ടിക്കാണിക്കുന്നതാണ് 2022-23 സാമ്പത്തിക വർഷത്തെ ഓഡിറ്റ് റിപ്പോർട്ട്. 2023-24 സാമ്പത്തിക വർഷത്തെ കണക്കുകൾ ആശുപത്രി അധികൃതർക്ക് ഹാജരാക്കാൻ സാധിക്കാത്തതിൽ ഓഡിറ്റ് നടത്താൻ പോലും സാധിച്ചില്ലെന്ന് പൊതുപ്രവർത്തകനായ എം.വി. ശില്പരാജിനു ലഭിച്ച വിവരാവകാശരേഖയിൽ പറയുന്നു. എച്ച്‌ഡിഎസ് ഫാർമസി, ആശുപത്രി വരുമാനം എന്നീ ഇനങ്ങളിൽ നീക്കിയിരിപ്പും പാസ്ബുക്കും തമ്മിൽ 10,22,355 രൂപയുടെ വ്യത്യാസം കണ്ടെത്തി. ശരിയായ കണക്ക് സൂക്ഷിക്കാത്തതിനാൽ ഫാർമസി വരുമാനത്തിലും വ്യത്യാസം കണ്ടെത്തി. മെഡിക്കൽ കോളജ് കാന്പസിൽ വാടകയ്ക്ക് നൽകിയ കെട്ടിടങ്ങളിൽനിന്ന് 2020-23 കാലയളവിൽ 29,07,124 രൂപയാണ് കുടിശിക ലഭിക്കാനുള്ളത്. വാടകക്കുടിശികയിൽ വീഴ്ച വരുത്തിയാൽ 24 ശതമാനം നിരക്കിൽ പിഴപ്പലിശ ഈടാക്കാൻ കരാറുണ്ടെങ്കിലും അത് ഈടാക്കിയിട്ടില്ലെന്നും റിപ്പോർട്ട് പറയുന്നു. യോഗങ്ങൾ യഥാസമയം വിളിച്ചു ചേർക്കാത്തത് ഗുരുതര വീഴ്ചയായി റിപ്പോർട്ടിൽ പറയുന്നു. വികസനസമിതി എക്സ‌ിക്യൂട്ടീവ് കമ്മിറ്റിയുടെ കാലാവധി 2022ൽ തീർന്നതാണെങ്കിലും പുനഃസംഘടിപ്പിക്കുകയോ തുടരാൻ അനുമതി വാങ്ങുകയോ ചെയ്തില്ല. കാലാവധി കഴിഞ്ഞ മരുന്നുകളുടെ ‌സ്റ്റോക്ക് യഥാസമയം മരുന്നു കമ്പനിക്ക് തിരിച്ചു നൽകാത്തതിനാൽ ലക്ഷക്കണക്കിനു രൂപയുടെ നഷ്ട‌ം സംഭവിച്ചു. കാലാവധി കഴിഞ്ഞ 3,000 മരുന്നുകൾ സ്റ്റോക്കിൽ ഉൾപ്പെടുത്താത്തത് ഗുരുതര വീഴ്ചയായി റിപ്പോർട്ടിൽ പറയുന്നു.

രോഗം ഭേദമായി; രണ്ടു വീൽചെയറും മൂന്ന് വാക്കേഴ്സും ആശുപത്രിക്ക് കൈമാറി

മാഹി: പള്ളൂർ കമ്യൂണിറ്റി ഹെൽത്ത് സെന്‍ററിൽ ഡയബറ്റിക്ക് ഫൂട്ട് അൾസറുമായെത്തിയ 68 കാരിക്ക് ഒരാഴ്ചയ്ക്കകം അസുഖം ഭേദമായി. ഇതേ തുടർന്ന് രോഗിയുടെ ബന്ധുക്കൾ പള്ളൂർ ആശുപത്രിക്ക് സൗജന്യമായി രണ്ട് വീൽ ചെയറും മൂന്ന് വാക്കേഴ്സും കൈമാറി. പയ്യന്നൂർ കുഞ്ഞിമംഗലം ഫാത്തിമ മൻസിലിൽ കുഞ്ഞയിസുവാണ് കഴിഞ്ഞ 12 ന് ചികിത്സയ്ക്കായി പള്ളൂർ ആശുപത്രിയിൽ എത്തിയത്. ജനറൽ ഫിസിഷ്യനും ഡയബറ്റിക് ഫൂട്ട് അൾസർ ചികിത്സാ വിദഗ്ധനുമായ ഡോ.ടി.വി. പ്രകാശിന്‍റെ ഒരാഴ്ച നീണ്ട ചികിത്സയെ തുടർന്നാണ് രോഗം ഭേദമായി കഴിഞ്ഞ ദിവസം ആശുപത്രി യിൽ നിന്ന് സിസ്ചാർജായത്. പള്ളൂർ ആശുപത്രി ജീവനക്കാരോടും ഡോക്ടർ ടി.വി.പ്രകാശിനോടും ഉള്ള നന്ദിയും കടപ്പാടും അറിയിച്ചു കൊണ്ടാണ് ഇവരുടെ ഭർത്താവ് മുഹമ്മദ് ആശുപത്രി ഉപകരണ ങ്ങൾ കൈമാറിയത്.

രാജ്യത്തെ ഏറ്റവും മികച്ച പോലീസ് കേരളത്തിലേത്: മന്ത്രി

കണ്ണൂർ: രാജ്യത്തെ ഏറ്റവും മികച്ച പ്രൊഫഷണൽ പോലീസ് സംവിധാനമുള്ള സംസ്ഥാനമാണ് കേരളമെന്ന് വ്യവസായ മന്ത്രി പി. രാജീവ്. കേരള പോലീസ് ഓഫീസേഴ്സ് അസോസിയേഷൻ( കെപിഒഎ) കണ്ണൂർ സിറ്റി ജില്ലാ സമ്മേളനം കണ്ണൂർ സാധു കല്യാണ മണ്ഡപത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. കെപിഒഎ ജില്ലാ പ്രസിഡന്‍റ് പി.എ. ബിനുമോഹൻ അധ്യക്ഷത വഹിച്ചു. കണ്ണൂർ റേഞ്ച് ഡിഐജി ജി.എച്ച്. യതീഷ് ചന്ദ്ര, സിറ്റി പോലീസ് കമ്മീഷണർ പി. നിധിൻരാജ് എന്നിവർ വിശിഷ്ടാതിഥികളായിരുന്നു. അഡീഷണൽ എസ്പി കെ.വി. വേണുഗോപാലൻ, തലശേരി എഎസ്പി പി.ബി.കിരൺ, കെപിഒഎ സംസ്ഥാന ജോയിന്‍റെ സെക്രട്ടറിമാരായ പി.രമേശൻ, പി.പി.മഹേഷ്, ക്രൈംബ്രാഞ്ച് എസിപി ജോഷി ജോസ്, കെപിഒഎ സ്റ്റേറ്റ് എക്സിക്യുട്ടീവ് അംഗം പി.വി.രാജേഷ്, കെപിഎ ജില്ലാ സെക്രട്ടറി സിനീഷ് വടവതി, പ്രസിഡന്‍റ് ഒ.വി. ജനാർദ്ദനൻ, ടി.പ്രജീഷ്, എം.ശ്രീജിത്ത് എന്നിവർ പ്രസംഗിച്ചു. ഈ മാസം സർവീസിൽ നിന്നും വിരമിക്കുന്ന എം.പ്രദീപ്കുമാർ, എം.കൃഷ്ണൻ, എൻ.പി. കൃഷ്ണൻ, കെ. രാധാകൃഷ്ണൻ, കെ.പ്രദീപൻ, കെ.പി. രനീഷ്കുമാർ, കെ.രാജീവൻ, യു. ഹരീന്ദ്രൻ, എം. രാഘവൻ, വിനോദ് കുമാർ, കെ.സി.മഹേഷ്, കെ. സുധാകരൻ, വി.എൻ. വിനോദൻ, എൽ.വി.അരുൺകുമാർ, കെ.വി.ദിനേശൻ, വി.എം.രാജീവൻ എന്നിവർക്ക് യാത്രയയപ്പ് നൽകി.

പറവകള്‍ക്ക് ദാഹജലം പദ്ധതി

ഇരിട്ടി: ഓയിസ്‌ക ഇന്‍റര്‍നാഷണല്‍ ഇരിട്ടി വുമണ്‍സ് ചാപ്റ്ററിന്‍റെ നേതൃത്വത്തില്‍ പറവകള്‍ക്ക് ദാഹജലം പദ്ധതി നടപ്പിലാക്കി. ഓയിസ്‌ക ജില്ലാ സെക്രട്ടറി പ്രഭാകരന്‍ കാക്കോത്താണ് പദ്ധതിക്കാവശ്യമായ മുളന്തണ്ട് ഒരുക്കി നല്‍കിയത്. എല്ലാ അംഗങ്ങളും അവരവരുടെ വീടുകളില്‍ അവ സ്ഥാപിക്കുകയും ചെയ്തു. പക്ഷികള്‍ ഇരുന്ന് വെള്ളം കുടിക്കുന്നതിന്‍റെ ഫോട്ടോ എടുക്കുന്നവര്‍ക്ക് പ്രത്യേക സമ്മാനവും നല്‍കുമെന്ന് ഭാരവാഹികള്‍ അറിയിച്ചു. ഓയിസ്‌ക ജില്ലാ പ്രസിഡന്‍റ് ജയ്‌സണ്‍ ബേസില്‍, ഇരിട്ടി ചാപ്റ്റര്‍ പ്രസിഡന്‍റ് ബാബു ജോസഫ്, സെക്രട്ടറി ഡോ. ജി. ശിവരാമകൃഷ്ണന്‍ എന്നിവര്‍ പങ്കെടുത്തു.

പുറവയൽ സെന്‍റ് ജോർജ് പള്ളിയിൽ തിരുനാൾ തുടങ്ങി

ഉളിക്കൽ: പുറവയൽ സെന്‍റ് ജോർജ് പള്ളിയിൽ തിരുനാളിന് തുടക്കം കുറിച്ച് കൊടിയേറ്റിനും തിരുകർമങ്ങൾക്കും തലശേരി അതിരൂപത ആർച്ച്ബിഷപ് മാർ ജോസഫ് പാംപ്ലാനി കാർമികത്വം വഹിച്ചു. ഇന്നു രാവിലെ 6.30ന് വിശുദ്ധ കുർബാനക്ക് ഇടവക വികാരി ഫാ. ജോർജ് ഇലവുംകുന്നേലും നാളെ രാവിലെ 7.30 ന് കുട്ടികളുടെ പ്രഥമ ദിവ്യകാരുണ്യ സ്വീകരണവും വിശുദ്ധ കുർബാനക്കും ആർച്ച്ബിഷപ് എമരിറ്റസ് മാർ ജോർജ് ഞറളക്കാട്ടും കാർമികത്വം വഹിക്കും. 25ന് വൈകുന്നേരം 5.30ന് വിശുദ്ധ കുർബാനക്കും തിരുകർമങ്ങൾക്കും ഫാ. ജിന്‍റോ ജോർജ് (ഒഎംഎം), 26ന് വൈകുന്നേരം അഞ്ചിന് ആഘോഷമായ വിശുദ്ധ കുർബാനക്കും തിരുകർമങ്ങൾക്കും മോൺ. മാത്യു ഇളംതുരുത്തിപടവിലും കാർമികത്വം വഹിക്കും. 7.30ന് സൺഡേ സ്കൂളും വിവിധ ഭക്തസംഘടനകളും ചേർന്ന് അവതരിപ്പിക്കുന്ന കലാസന്ധ്യ. 27ന് രാവിലെ ആറിന് വിശുദ്ധ കുർബാന. ഒന്പതിന് നടക്കുന്ന ആഘോഷമായ വിശുദ്ധ കുർബാനക്കും നൊവേനക്കും ഫാ. ജോസഫ് പൂവത്തോലിൽ കാർമികത്വം വഹിക്കും. തുടർന്ന് പ്രദക്ഷിണം, സമാപനാശീർവാദം, പ്രസുദേന്തി വാഴ്‌ച, ഊട്ടുനേർച്ച എന്നിവ നടക്കും.

ആറളം ഫാമിൽ ഭീതി പരത്തി കാട്ടാനക്കൂട്ടം

ഇരിട്ടി: തുരത്തിയിട്ടും തുരത്തിയിട്ടും ഒഴിയാതെ ആറളം ഫാമിലെ കാട്ടാന ഭീഷണി. അക്രമകാരിയായ രണ്ടു മോഴകളും മൂന്നു കൊന്പനാനകളുമാണ് ഫാം മേഖലയിൽ ഇപ്പോൾ ചുറ്റിത്തിരിയുന്നത്. കഴിഞ്ഞ ദിവസം ആറാം ബ്ലോക്കിലെ കഞ്ഞിപ്പുര കാട്ടാന തകർത്തു. തൊഴിലാളികളും ജീവനക്കാരും ഭക്ഷണം പാകം ചെയ്ത് കഴിക്കുന്നതിനായി നിർമിച്ച കെട്ടിടത്തിനോട് ചേർന്നുള്ള ഷെഡാണ് കാട്ടാന തകർത്തത്. കഞ്ഞിപ്പുരയുടെ ഭിത്തി കുത്തിയിളക്കി മറിച്ചിടാനും ശ്രമം നടന്നു. ഭിത്തിയുടെ പലഭാഗങ്ങളിലും കൊന്പ് കൊണ്ട് കുത്തിയതിന്‍റെ അടയാളങ്ങളുണ്ട്. ആറാം ബ്ലോക്കിൽ ഒരു മോഴയാന ഉൾപ്പെടെ ആറ് ആനകളുണ്ടെന്ന് ഫാമിലെ സുരക്ഷാ ജീവനക്കാർ പറയുന്നു. കാട്ടാനകൾ കഞ്ഞിപ്പുര പൊളിക്കുന്നത് കണ്ട് സെക്യൂരിറ്റി ജീവനക്കാർ പടക്കം പൊട്ടിച്ചും ശബ്ദമുണ്ടാക്കുകയും ചെയ്തതിനെ തുടർന്നാണ് ആനക്കൂട്ടം പിൻവാങ്ങിയത്. തെങ്ങും കശുമാവും നശിപ്പിച്ചിരുന്ന കാട്ടാനകൾ ഇപ്പോൾ റബർ മരങ്ങളും നശിപ്പിക്കുകയാണ്. റബർ മരത്തിന്‍റെ കരിന്തൊലി ആനകൾ പൊളിച്ചെടുത്ത് തിന്നുകയാണ്. തൊലി പൊളിച്ചെടുക്കുന്നതോടെ മരങ്ങൾ ക്രമേണ ഉണങ്ങി നശിക്കും. കൊലയാളി മോഴ ഇപ്പോഴും വിലസുന്നു‌ ആറളം ഫാമിൽ അപകടകാരികളായ മോഴയുൾപ്പെടെയുള്ള കാട്ടാനകളെ മയക്കുവെടി വച്ച് പിടികൂടി ജനങ്ങളുടെ സുരക്ഷിതത്വം ഉറപ്പാക്കണമെന്ന് താമസക്കാർ ആവശ്യപ്പെടുന്നു. ആറളത്തും സമീപ പ്രദേശങ്ങളിലും നിരവധി പേരെ വകവരുത്തിയ കൊലയാളി മോഴയാന ഇപ്പോഴും ഇവിടെ തന്നെയുണ്ട്. മുന്പ് കൊലയാളിയാനയായ ചുള്ളിക്കൊന്പനെ മയക്കുവെടിവച്ച് പിടികൂടിയതു പോലം ഇവിടെയുള്ള ആനക്കൂട്ടത്തെ വെടിവച്ച് പിടികൂടി നാടുകടത്താൻ നടപടി വേണമെന്നാണ് നാട്ടുകാരുടെ ആവശ്യം. പത്ത് വർഷത്തിനുള്ളിൽ കാട്ടാനക്കലിയിൽ 15 ജീവനുകളാണ് പൊലിഞ്ഞത്. ആറളംവന്യജീവി സങ്കേതത്തിലുള്ളതിനേക്കാൾ ആനകൾ ഇപ്പോൾ ഫാം മേഖലയിലുണ്ടെന്നും താമസക്കാർ പറയുന്നു. വനംവകുപ്പിന്‍റെ അനാസ്ഥയെന്ന് തൊഴിലാളികൾ ആറളം ഫാം, പുനരധിവാസ മേഖലകളിൽ കാട്ടാനകൾ വിലസുന്പോഴും നടപടിയെടുക്കേണ്ട വനം വകുപ്പ് നിസംഗത പുലർത്തുകയാണെന്ന് ഫാം തൊഴിലാളികൾ ആരോപിച്ചു. ഫാം കൃഷിയിടത്തിൽ നിന്നും ആനകളെ തുരത്താൻ വകുപ്പ് താത്പര്യം കാട്ടുന്നില്ല. ജീവൻ പണയം വച്ചാണ് ഫാമിൽ തൊഴിലാളികൾ ജോലി ചെയ്യുന്നത്. ഡിഎഫ്ഒ നേരിട്ടെത്തി ആനതുരത്തിലിന് നേതൃത്വം നൽകണമെന്നും ഇവർ ആവശ്യപ്പെട്ടു. അല്ലാത്തപക്ഷം സ്ത്രീ തൊഴിലാളികൾ ഉൾപ്പെടെയുള്ളവർ ഇറങ്ങി ഫാമിൽ തമ്പടിച്ചിരുന്ന മുഴുവൻ ആനകളെയും തുരത്തി വൈദ്യുത വേലി ചാർജ് ചെയ്യുമെന്ന് തൊഴിലാളികൾ പറഞ്ഞു.

പ്ലാറ്റിനം ജൂബിലി ആഘോഷത്തിൽ മെഗാ മാർഗംകളി അരങ്ങേറി

ഇരിട്ടി: അങ്ങാടിക്കടവ് സേക്രഡ് ഹാർട്ട് പള്ളിയിൽ പ്ലാറ്റിനം ജൂബിലി ആഘോഷത്തിന്‍റെ ഭാഗമായി 75 നർത്തകർ പങ്കെടുത്ത മെഗാ മാർഗംകളി അരങ്ങേറി. ഈസ്റ്റർ കുർബാനയ്ക്ക് ശേഷമാണ് മാർഗംകളി സംഘടിപ്പിച്ചത്. കെസിവൈഎം സംഘടനയുടെ നേതൃത്വത്തിൽ മാതൃവേദി, മതബോധനം, ക്രെഡിറ്റ് യൂണിയൻ എന്നീ സംഘടനകളുടെ സഹകരണത്തോടെയായിരുന്നു മാർഗംകളി അവതരിപ്പിച്ചത്. ഫാ. ഫിലിപ്പ് മുട്ടുമണ്ണിൽ ഉദ്ഘാടനം ചെയ്തു. ഇടവക വികാരി ഫാ. ബോബൻ റാത്തപ്പള്ളി, മുഖ്യാതിഥിതിയായിരുന്നു. ജെസ്‌ലിൻ കുറ്റാരപ്പിള്ളിൽ, എൽഫീന ആലപ്പാട്ട്, അനിയാ പറയാനിക്കൽ, റെയ്‌ച്ചൽ കിളിചുണ്ടൻമാക്കൽ, ഡെൽന കാളമ്പാനാൽ, എയ്ഞ്ചൽ ഇടയാട്ടുപള്ളിയിൽ, എയ്ഞ്ചൽ വടക്കേക്കര, ക്രിസ്റ്റിന കാഞ്ഞിരത്തിനാൽ, ആനന്ദ മേച്ചിറാകത്ത്, പ്രസീന ഇടയാട്ടുപള്ളിയിൽ, ജെയ്‌മോൾ കിളിചുണ്ടൻമാക്കൽ, ആതിര പാറപ്പുറത്ത് എന്നിവർ നേതൃത്വം നൽകി. ആറുവയസു മുതൽ അറുപത് വയസുവരെയുള്ളവർ പങ്കെടുത്തു. കലോത്സവ വേദികളിൽ മാത്രം ചുരുങ്ങിപ്പോയ സുറിയാനി ക്രൈസ്തവ അനുഷ്ഠാന കലാരൂപമായ മാർഗംകളി പുതുതലമുറയ്ക്ക് പകർന്നുകൊടുക്കുക എന്നതാണ് മെഗാ മാർഗംകളിയുടെ ലക്ഷ്യമെന്ന് പ്രോഗ്രാം കോ-ഓർഡിനേറ്റർ ഫാ. പ്രിൻസ് വെട്ടുകാട്ടിൽ പറഞ്ഞു.

എല്ലാ പഞ്ചായത്തുകളിലും കളിക്കളം നിർമിക്കും: മന്ത്രി അബ്ദുറഹ്മാൻ

ഉളിക്കൽ: സംസ്ഥനത്തെ എല്ലാ പഞ്ചായത്തുകളിലും കളിക്കളം നിർമിക്കുമെന്ന് കായിക മന്ത്രി വി. അബ്ദുറഹിമാൻ. ഒരു പഞ്ചായത്തിൽ ഒരു കളിക്കളം പദ്ധതിയിൽ ഉൾപ്പെടുത്തി ഉളിക്കൽ ഹയർ സെക്കൻഡറി സ്കൂളിൽ നിർമിക്കുന്ന മൈതാനം പ്രവൃത്തിയും പ്രധാന മന്ത്രി ജൻ വികാസ് കാര്യക്രം പദ്ധതിയുടെ ഭാഗമായി നിർമിച്ച ക്ലാസ് മുറികളുടെ ഉദ്ഘാടനവും നിർവഹിച്ചു പ്രസംഗിക്കുകയായി രുന്നു അദേഹം. വരും കാലങ്ങളിൽ കായികം എന്ന വിഷയം സിലബസാക്കുമെന്നും മന്ത്രി പറഞ്ഞു. സജീവ് ജോസഫ് എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി വിശിഷ്ടാതിഥി യായി പങ്കെടുത്തു. ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ, ഇരിക്കൂർ ബ്ലോക്ക് പഞ്ചായത്ത് പ്രസിഡന്‍റ് റോബർട്ട് ജോർജ്, ബ്ലോക്ക് പഞ്ചായത്ത് വൈസ് പ്രസിഡന്‍റ് ഒ.എസ്. ലിസി, കണ്ണൂർ എഡിഎം പദ്മചന്ദ്രക്കുറിപ്പ്, ന്യൂനപക്ഷ ക്ഷേമ ഡയറക്ടർ സബിൻ സമീദ്, സ്കൂൾ പ്രിൻസിപ്പൽ ഇ.എം. ജോർജ്, മുഖ്യാധ്യാപകൻ എം.വി. സുനിൽകുമാർ തുടങ്ങിയവർ പ്രസംഗിച്ചു.

മരം കടപുഴകി കാറിൽ വീണു: യാത്രികർ രക്ഷപ്പെട്ടത് തലനാരിഴയ്ക്ക്

തലശേരി: റോഡരികിലെ തണൽ മരം കടപുഴകി കാറിനു മേൽ വീണുണ്ടായ അപകടത്തിൽ തലനാരിഴയ്ക്ക് യാത്രികർ പരിക്കേൽക്കാതെ രക്ഷപ്പെട്ടു. വ്യാപാരി വ്യവസായി ഏകോപന സമിതി തലശേരി യൂണിറ്റ് പ്രസിഡന്‍റും വ്യാപാര പ്രമുഖനുമായ വി.കെ. ജവാദ് അഹമ്മദും കുടുംബാംഗങ്ങളുമാണ് സെക്കൻഡുകളുടെ ഇടവേളയിൽ അത്ഭുതകരമായി രക്ഷപ്പെട്ടത്. മരം വീഴുന്നതിന് തൊട്ടുമുന്പ് യാത്രികർ കാറിൽ നിന്നിറങ്ങിയതിനാലാണ് ദുരന്തം ഒഴിവായത്. ഞായറാഴ്ച രാവിലെ കൂത്തുപറന്പ് വില്ലേജ് ഓഫീസിനു മുന്നിലായിരുന്നു സംഭവം. ചെന്നൈയിൽ നിന്നും വിമാന മാർഗം മട്ടന്നൂർ എയർപോർട്ടിൽ എത്തിയ ജവാദ് അഹമ്മദ് കുടുംബത്തോടൊപ്പം കാറിൽ തലശേരിയിലേക്ക് പുറപ്പെട്ടതായിരുന്നു. യാത്രയ്ക്കിടെ കൂത്തുപറമ്പിലെ തന്‍റെ സ്ഥാപനത്തിൽ കയറുന്നതിനായി റോഡരികിൽ കാർ നിർത്തി എല്ലാവരും പുറത്തിറങ്ങിയ ഉടനായിരുന്നു മരം കടപുഴകി വീണത്. കാർ പൂർണമായും തകർന്നു.

കാർ നിയന്ത്രണം വിട്ട് കാറിലും വൈദ്യുത തൂണിലും ഇടിച്ചു; രണ്ടുപേർക്ക് പരിക്ക്

മട്ടന്നൂർ: തെരൂർ പാലയോട് കാർ നിയന്ത്രണം വിട്ടു മറ്റൊരു കാറിലും വൈദ്യുത തൂണിലും മതിലിലും ഇടിച്ച് അപകടം. അപകടത്തിൽ രണ്ടുപേർക്ക് പരിക്കേറ്റു. ഇന്നലെ രാവിലെ പത്തോടെ മട്ടന്നൂർ-ചാലോട് റോഡിൽ തെരൂർ പാലയോട് മുസ്‌ലിം പള്ളിക്ക് മുന്നിലായിരുന്നു അപകടം. മട്ടന്നൂർ ഭാഗത്ത് നിന്നും കണ്ണൂർ ഭാഗത്തേക്ക് പോകുകയായിരുന്ന കാർ, കുന്നിറക്കത്തിൽ നിന്ന് നിയന്ത്രണം വിട്ടു വൈദ്യുത തൂണിലും റോഡരികിൽ നിർത്തിയിട്ട ആൾട്ടോ കാറിലും പിന്നീട് മദ്രസയുടെ മതിലിലും ഇടിക്കുകയായിരുന്നു. ആൾട്ടോ കാർ പൂർണമായും മതിലും തകർന്നു. ഇരു കാറിലുള്ളവർക്കാണ് പരിക്കേറ്റത്. ഇവർ ആശുപത്രിയിൽ ചികിത്സ തേടി. വൈദ്യുത തൂൺ തകർന്നതിനാൽ പ്രദേശത്ത് വൈദ്യുത ബന്ധം തടസപ്പെട്ടു.

പിലാത്തറ വ്യാകുലമാതാ പള്ളിയിൽ തിരുനാള്‍ ഇന്നു മുതൽ

പിലാത്തറ: പിലാത്തറ വ്യാകുലമാതാ ഫൊറോന പള്ളിയിൽ തിരുനാളാഘോഷങ്ങള്‍ ഇന്നു മുതൽ മേയ് രണ്ടുവരെ നടക്കും. വൈകുന്നേരം 5.30ന് ഇടവക വികാരി ഫാ. ബെന്നി മണപ്പാട്ട് കൊടിയേറ്റും. തുടര്‍ന്നു നടക്കുന്ന ദിവ്യബലിക്ക് ഫാ. ജസ്റ്റിന്‍ എടത്തില്‍ കാര്‍മികത്വം വഹിക്കും. 26 വരെയുള്ള ദിവസങ്ങളില്‍ വൈകുന്നേരം ആറിന് നടക്കുന്ന ദിവ്യബലിക്ക് ഫാ. റോയി നെടുന്താനം, ഫാ. രാജന്‍ ഫൗസ്‌തോ, ഫാ.മെല്‍വിന്‍ ദേവസി, ഫാ. ജോയി പൈനാടത്ത്, ഫാ. മാത്യു കുഴിമല എന്നിവര്‍ മുഖ്യകാര്‍മികരാകും. 27ന് രാവിലെ 9.30ന് നടക്കുന്ന ദിവ്യബലിക്ക് ഫാ. ഷാജു ആന്‍റണി കാര്‍മികത്വം വഹിക്കും. 28, 29 ദിവസങ്ങളില്‍ വൈകുന്നേരം ആറിന് നടക്കുന്ന ദിവ്യബലിക്ക് ഫാ. ഷിറോണ്‍ ആന്‍റണി, ഫാ. മാത്യു ഡാനിയേല്‍ എന്നിവര്‍ കാര്‍മികരാകും. 29ന് രാത്രി ഏഴിന് കലാസന്ധ്യ അരങ്ങേറും. തിരുനാള്‍ ജാഗരമായ 30ന് വൈകുന്നേരം 5.30ന് നടക്കുന്ന ദിവ്യബലിക്ക് ഫാ. ഷോബി ജോര്‍ജ് മുഖ്യകാര്‍മികത്വം വഹിക്കും. തുടര്‍ന്ന് മാതാവിന്‍റെ തിരുസ്വരൂപവുമായുള്ള പ്രദക്ഷിണം. പ്രധാന തിരുനാള്‍ ദിനമായ മേയ് ഒന്നിന് രാവിലെ 10.30ന് നടക്കുന്ന ആഘോഷമായ ദിവ്യബലിക്ക് കണ്ണൂര്‍ രൂപത പ്രൊക്യുറേറ്റര്‍ ഫാ. ജോര്‍ജ് പൈനാടത്ത് പ്രധാന കാര്‍മികനാകും. നേര്‍ച്ച ഭക്ഷണ വിതരണവും രാത്രി ഏഴിന് "യാനം' നാടകവും നടക്കും. രണ്ടിന് വൈകുന്നേരം ആറിന് ഫാ. പ്രിന്‍സ് നെല്ലരിയിലിന്‍റെ കാര്‍മികത്വത്തില്‍ നടക്കുന്ന ദിവ്യബലിക്കു ശേഷം കൊടിയിറക്കുന്നതോടെ തിരുനാള്‍ സമാപിക്കും.

മാലിന്യ സംസ്‌കരണത്തിന്‍റെ പുതിയ മുഖം

കണ്ണൂർ: ജൈവ മാലിന്യങ്ങളും ജന്തുജന്യ മാലിന്യങ്ങളും പ്രായോഗിക രീതിയില്‍ സംസ്‌കരിക്കാന്‍ ജില്ലയില്‍ നടപ്പിലാക്കിയ തുമ്പൂര്‍മുഴി കമ്പോസ്റ്റിംഗ് സംവിധാനം മാലിന്യ സംസ്‌കരണത്തിന് പുതിയമുഖം നല്കുന്നു. 70 ശതമാനം സ്വച്ഛ് ഭാരത് മിഷന്‍റെയും 30 ശതമാനം പഞ്ചായത്ത് ഫണ്ടും ഉപയോഗിച്ച് ശുചിത്വമിഷന്‍റെ കീഴിലാണ് പദ്ധതി നടപ്പിലാക്കിയത്. ജില്ലയില്‍ 59 ഇടങ്ങളിലാണ് പദ്ധതി നടപ്പിലാക്കിയിട്ടുള്ളത്. ഇതില്‍ ജില്ലയിലെ 27 ഗ്രാമപഞ്ചായത്തുകള്‍, രണ്ടു ബ്ലോക്ക് പഞ്ചായത്തുകള്‍, ആറ് നഗരസഭകൾ, ഒരു കോര്‍പറേഷന്‍ എന്നിങ്ങനെ 36 ഇടങ്ങളില്‍ നിലവില്‍ തുമ്പൂര്‍മുഴി പ്രവര്‍ത്തിക്കുന്നുണ്ട്. ജില്ലയില്‍ ആദ്യമായി പദ്ധതി പ്രാവര്‍ത്തികമാക്കിയത് ആന്തൂര്‍ നഗരസഭയിലാണ്. ഹരിതകര്‍മ സേനയാണ് ഈ പദ്ധതി ഏറ്റെടുത്ത് നടത്തുന്നത്. ഇതിലൂടെ ശേഖരിക്കുന്ന വളം വില്പന നടത്തുന്നുമുണ്ട്. വളരെ ചെലവുകുറഞ്ഞതും പൂര്‍ണമായും പരിസ്ഥിതി സൗഹൃദപരമായ കമ്പോസ്റ്റിംഗ് രീതി എന്ന നിലയിലും മാലിന്യ നിര്‍മാര്‍ജനത്തിന് ഏറ്റവും അനുയോജ്യമായ രീതി എന്ന നിലയിലും ആഗോളതലത്തില്‍ അംഗീകാരം ലഭിച്ചിട്ടുള്ള സാങ്കേതിക വിദ്യയാണിത്. ഇന്ത്യന്‍ ഗ്രാമീണ കാര്‍ഷിക മേഖലയിലെ ഏറ്റവും ഉപയുക്തമായ നാലു മാലിന്യ സംസ്‌കരണ മാര്‍ഗങ്ങളില്‍ ഒന്നായി യുനൈറ്റഡ് നേഷന്‍സ് ഡവലപ്മെന്‍റ് പ്രോഗ്രാം കാലാവസ്ഥാ നിയന്ത്രണ കമ്മിറ്റി തെരഞ്ഞെടുത്തിരിക്കുന്നത് തുമ്പൂര്‍മുഴി മോഡല്‍ എയ്റോബിക് കമ്പോസ്റ്റിംഗ് സാങ്കേതിക വിദ്യയാണ്.

വിറകില്ല: പയ്യാന്പലത്ത് സംസ്കാരത്തിനായി മൃതദേഹങ്ങളുമായി ബന്ധുക്കൾ കാത്തിരുന്നു

കണ്ണൂർ: പയ്യാന്പലത്തെ കോർപറേഷൻ ശ്മശാനത്തിൽ വീണ്ടും വിറകു ക്ഷാമം. വിറകില്ലാഞ്ഞതിനെ തുടർന്ന് ഇന്നലെ സംസ്കാര ക്രിയകൾക്ക് മൃതദേഹങ്ങളുമായെത്തിയവർ മണിക്കൂറുകളോളം കാത്തിരിക്കേണ്ടി വന്നു. മൃതദേഹങ്ങൾ സംസ്കരിക്കാനെത്തിച്ചവർ പ്രതിഷേധിച്ചത് സംഘർഷാവസ്ഥയക്കും ഇടയാക്കി. തുടർന്ന് മരിച്ചവരുടെ ബന്ധുക്കൾ തന്നെ പുറത്ത് നിന്നും വിറകെത്തിച്ചാണ് സംസ്കാര ക്രിയകൾ നടത്തിയത്. ഇതിനു ശേഷം മൃതദേഹവുമായി എത്തിയവരിൽ നിന്ന് വിറകില്ലാത്തതിനാൽ സംസ്കാര ക്രിയകളുടെ രസീത് മുറിക്കാൻ കോർപറേഷൻ ഉദ്യോഗസ്ഥർ തയാറായില്ല. ഇതും വാക്കേറ്റത്തിന് ഇടയാക്കി. തുടർന്ന് ഏറെ സമയത്തിന് ശേഷം കോർപറേഷൻ വിറകെത്തിച്ചാണ് സംസ്കാരം നടത്തിയത്. വിവരമറിഞ്ഞ് ‌സിപിഎം ജില്ലാ സെക്രട്ടറി കെ.കെ. രാഗേഷ്, ഏരിയാ സെക്രട്ടറി കെ.പി. സുധാകരൻ ഉൾപ്പെടെയുള്ളവർ സ്ഥലത്തെത്തിയിരുന്നു. സമഗ്രാന്വേഷണം വേണം: സിപിഎം നാട്ടിലെവിടെയും കേട്ടുകൾവിയിലാത്ത കാര്യങ്ങളാണ് കണ്ണൂർ കോർപറേഷന്‍റെ അധീനതയിലുള്ള പയ്യാമ്പലം ശ്മശാനത്തിൽ നടന്നതെന്നും ഇതു സംബന്ധിച്ച് സമഗ്രാന്വേഷണം നടത്തണമെന്നും സിപിഎം ജില്ലാ സെക്രട്ടറി കെ.കെ. രാഗേഷ് ആവശ്യപ്പെട്ടു. വിറകില്ലാത്തത് കാരണം മൃതദേഹങ്ങളുമായി എത്തിയ ബന്ധുക്കൾ രണ്ടുമണിക്കൂറോളമാണ് സംസ്കാര ക്രിയകൾക്ക് കാത്തിരിക്കേണ്ടി വന്നത്. കോർപറേഷൻ മൃതദേഹത്തോട് അനാദരവാണ് കാട്ടിയത്. ഇത് സംബന്ധിച്ച കാര്യങ്ങൾ മന്ത്രിയെ അറിയിച്ചിട്ടുണ്ട്. സിപിഎം കണ്ണൂർ ഏരിയാ കമ്മിറ്റി ഇക്കാര്യത്തിൽ പരാതി നൽകുമെന്ന് സെക്രട്ടറി കെ.പി. സുധാകരൻ പറഞ്ഞു.

മാലിന്യ സംസ്‌കരണത്തിന്‍റെ പുതിയ മുഖം

കണ്ണൂർ: ജൈവ മാലിന്യങ്ങളും ജന്തുജന്യ മാലിന്യങ്ങളും പ്രായോഗിക രീതിയില്‍ സംസ്‌കരിക്കാന്‍ ജില്ലയില്‍ നടപ്പിലാക്കിയ തുമ്പൂര്‍മുഴി കമ്പോസ്റ്റിംഗ് സംവിധാനം മാലിന്യ സംസ്‌കരണത്തിന് പുതിയമുഖം നല്കുന്നു. 70 ശതമാനം സ്വച്ഛ് ഭാരത് മിഷന്‍റെയും 30 ശതമാനം പഞ്ചായത്ത് ഫണ്ടും ഉപയോഗിച്ച് ശുചിത്വമിഷന്‍റെ കീഴിലാണ് പദ്ധതി നടപ്പിലാക്കിയത്. ജില്ലയില്‍ 59 ഇടങ്ങളിലാണ് പദ്ധതി നടപ്പിലാക്കിയിട്ടുള്ളത്. ഇതില്‍ ജില്ലയിലെ 27 ഗ്രാമപഞ്ചായത്തുകള്‍, രണ്ടു ബ്ലോക്ക് പഞ്ചായത്തുകള്‍, ആറ് നഗരസഭകൾ, ഒരു കോര്‍പറേഷന്‍ എന്നിങ്ങനെ 36 ഇടങ്ങളില്‍ നിലവില്‍ തുമ്പൂര്‍മുഴി പ്രവര്‍ത്തിക്കുന്നുണ്ട്. ജില്ലയില്‍ ആദ്യമായി പദ്ധതി പ്രാവര്‍ത്തികമാക്കിയത് ആന്തൂര്‍ നഗരസഭയിലാണ്. ഹരിതകര്‍മ സേനയാണ് ഈ പദ്ധതി ഏറ്റെടുത്ത് നടത്തുന്നത്. ഇതിലൂടെ ശേഖരിക്കുന്ന വളം വില്പന നടത്തുന്നുമുണ്ട്. വളരെ ചെലവുകുറഞ്ഞതും പൂര്‍ണമായും പരിസ്ഥിതി സൗഹൃദപരമായ കമ്പോസ്റ്റിംഗ് രീതി എന്ന നിലയിലും മാലിന്യ നിര്‍മാര്‍ജനത്തിന് ഏറ്റവും അനുയോജ്യമായ രീതി എന്ന നിലയിലും ആഗോളതലത്തില്‍ അംഗീകാരം ലഭിച്ചിട്ടുള്ള സാങ്കേതിക വിദ്യയാണിത്. ഇന്ത്യന്‍ ഗ്രാമീണ കാര്‍ഷിക മേഖലയിലെ ഏറ്റവും ഉപയുക്തമായ നാലു മാലിന്യ സംസ്‌കരണ മാര്‍ഗങ്ങളില്‍ ഒന്നായി യുനൈറ്റഡ് നേഷന്‍സ് ഡവലപ്മെന്‍റ് പ്രോഗ്രാം കാലാവസ്ഥാ നിയന്ത്രണ കമ്മിറ്റി തെരഞ്ഞെടുത്തിരിക്കുന്നത് തുമ്പൂര്‍മുഴി മോഡല്‍ എയ്റോബിക് കമ്പോസ്റ്റിംഗ് സാങ്കേതിക വിദ്യയാണ്.

ഭൂമി തങ്ങളുടേതെന്ന് ഈറ്റിശേരി ഇല്ലക്കാർ

തളിപ്പറമ്പ്: തളിപ്പറമ്പിൽ വഖഫ് ഭൂമിയുമായി ബന്ധപ്പെട്ട തർക്ക വിഷയം ചർച്ചയാകുന്നതിനിടെ ഭൂമിയുടെ അവകാശമുന്നയിച്ച് നരിക്കോട് ഈറ്റിശേരി ഇല്ലം കുടുംബാംഗങ്ങൾ രംഗത്ത്. തളിപ്പറമ്പ് ജമാഅത്ത് പള്ളിക്ക് കീഴിലുള്ള 600 ഏക്കറോളം ഭൂമി തങ്ങളുടേതാണെന്ന അവകാശവാദമാണ് ഇവർ ഉന്നയിച്ചിരിക്കുന്നത്. പൂർവികർ വാക്കാൽ ലീസിന് നൽകിയതാണ് ഈ ഭൂമിയെന്നും സിഡിഎംഇഎ കോടതിയിൽ നൽകിയ ഹർജിയിൽ ഇക്കാര്യം സൂചിപ്പിക്കുന്നുണ്ടെന്നും ഇല്ലത്തിന്‍റെ ഇപ്പോഴത്തെ അവകാശികൾ പറഞ്ഞു. തളിപ്പറമ്പ് നഗരത്തിലെ നിരവധി പ്രദേശങ്ങൾ വർഷങ്ങൾക്ക് മുന്പ് നരിക്കോട് ഈറ്റിശേരി ഇല്ലത്തിന്‍റെ അധീനതയിലായിരുന്നു. നഗരത്തിലെ പലരുടെയും ആധാരങ്ങളിൽ ഉൾപ്പെടെ നരിക്കോട് ഇല്ലത്തിന്‍റെ പേര് പരാമർശിക്കുന്നുണ്ട്. തങ്ങളുടെ മുൻതലമുറയിൽ പെട്ടവരുടെ അധീനതയിലുള്ള ഭൂമി പാട്ടത്തിന് നൽകിയതല്ലാതെ വഖഫ് ബോർഡിന് നൽകിയിട്ടുണ്ടെന്നത് കേട്ടു കേൾവി പോലുമില്ലാത്ത കാര്യമാണെന്നും ഇവർ പറഞ്ഞു. വഖഫ് അവകാശവാദം ഉന്നയിക്കുന്ന 600 ഏക്കർ മറുപാട്ടം നൽകിയതായി ഒരു രേഖയുമില്ലെന്നും ഇവർ പറയുന്നു. അതേസമയം, തളിപ്പറമ്പ് സർ സയ്യിദ് കോളജ് ഉൾപ്പെടെയുള്ള സ്ഥാപനങ്ങളുടെ നടത്തിപ്പുകാരായ കണ്ണൂർ ഡിസ്ട്രിക്ട് മുസ് ലിം എഡ്യുക്കേഷനൽ അസോസിയേഷൻ (സിഡിഎംഇഎ) കോടതിയിൽ നൽകിയ ഹർജിയിൽ 25 ഏക്കർ ഭൂമി വഖഫ് ഭൂമിയല്ലെന്നും നരിക്കോട് ഇല്ലത്തിന്‍റേതാണെന്ന് പറഞ്ഞത് വിവാദമായിരുന്നു. ഇതിനു പിന്നാലെ ലീഗ് നേതൃത്വം ഇടപെട്ട് സിഡിഎംഇഎയെ തിരുത്തിച്ചിരുന്നു. വഖഫ് ബോർഡിന്‍റെ അനുമതിയോടെ ഉണ്ടാക്കിയ വാടക കരാർ പ്രകാരം കഴിഞ്ഞ 54 വർഷമായി വാടക നൽകിയ 25 ഏക്കർ സ്ഥലത്തിന്‍റെ ഉടമസ്ഥാവകാശം നരിക്കോട് ഈറ്റിശേരി ഇല്ലത്തിനാണെന്ന സിഡിഎംഇഎയുടെ നിലപാടിനെതിരേ വലിയ പ്രതിഷേധമാണ് ഉയർന്നിരുന്നത്. കേന്ദ്രസർക്കാർ കൊണ്ടുവന്ന വഖഫ് ഭേദഗതി നിയമത്തെ പിന്തുണയ്ക്കുന്ന നിലപാടാണ് സർ സയ്യിദ് കോളജ് ഉൾപ്പെടെയുള്ള വിദ്യാഭ്യാസ സ്ഥാപനങ്ങളുടെ മേധാവികളായ സിഡിഎംഇഎ സ്വീകരിക്കുന്നതെന്നാണ് തളിപ്പറമ്പ് മഹല്ല് വഖഫ് സ്വത്ത് സംരക്ഷണസമിതി ഭാരവാഹികളുടെ ആരോപണം.

വിലയിടിവ്; കണ്ണൂരിൽ കോഴിക്കർഷകർക്ക് നിരാശ

കേളകം: ഈസ്റ്റർ വിപണി ലക്ഷ്യമിട്ട കോഴിക്കർഷകർക്ക് നിരാശ. കോഴി വില ഇടിഞ്ഞ് 72 രൂപയിൽ എത്തി. വിഷുവിന് 96 രൂപ മൊത്തം വിലയുണ്ടായിരുന്ന കോഴിക്കാണ് ഇപ്പോൾ വിലയിടിഞ്ഞത്. കോഴിവില കുറഞ്ഞതോടെ കോഴിഫാം നടത്തുന്നവർക്ക് നഷ്ടത്തിന്‍റെ കണക്കാണ്. കിലോഗ്രാമിന് 72 രൂപയ്ക്കാണ് ഇന്നലെ ജില്ലയിലെ ഫാമുകളിൽ മൊത്ത വിതരണക്കാർ വാങ്ങിയത്. 48 രൂപയ്ക്ക് വാ ങ്ങിയ കുഞ്ഞുങ്ങളെയാണ് 45 ദിവസത്തെ തീറ്റയും മരുന്നും പരിചരണവുമെല്ലാം നല്കി വിൽക്കുന്നത്. ഈ വർഷത്തെ ഏറ്റവും വിലക്കുറവാണിത്. അതേ സമയം വ്യാപാര സ്ഥാപനങ്ങളിൽ ആനുപാതികമായ കുറവില്ല. ജില്ലയുടെ വിവിധ ഭാഗങ്ങളിൽ കോഴിക്ക് 110 രൂപ മുതൽ130 രൂപ വരെയും ഇറച്ചിക്ക് 190 മുതൽ 210 രൂപ വരെയും വില ഈടാക്കുന്നുണ്ട്. ഫാമുകളിൽ കഴിഞ്ഞ ദിവസങ്ങളിലുണ്ടായ വിലക്കുറവിന് കാരണം ജില്ലയിലെയും തമിഴ്നാട്ടിലെയും ഫാമുകൾ തമ്മിലുള്ള കിടമത്സരമാണ്. ജില്ലയിലെ ഫാമുകളിലേക്ക് വലിയ തോതിൽ കോഴിക്കുഞ്ഞുങ്ങളെത്തുന്നത് തമിഴ്നാട്ടിൽ നിന്നാണ്. അവധിക്കാല സീസൺ സ്വപ്നം കണ്ട ജില്ലയിലെ ഫാമുകളിലെല്ലാം വളർച്ചയെത്തിയ കോഴികളെ വലിയ തോതിൽ സംഭരിച്ചിട്ടുള്ള സമയമാണിത്. അതേസമയം, കേരളത്തിലെ ഫാമുകൾക്കെതിരെയുള്ള തമിഴ്നാട് ലോബിയുടെ നീക്കത്തിന്‍റെ ഭാഗമാണ് വില കുറയ്ക്കലെന്ന് കോഴിഫാം നടത്തിപ്പുകാർ പറയുന്നു. കോഴി വില നിർണയത്തിൽ വലിയ പങ്കു വഹിക്കുന്നത് തമിഴ്നാട് ബ്രോയിലർ കോ-ഓർഡിനേഷൻ കമ്മിറ്റി (ബിസിസി) ആണ്. കോഴിഫാമുകളെ ഇല്ലാതാക്കി കുത്തക സ്വന്തമാക്കാനുള്ള ശ്രമമാണ് ഇതിന് പിന്നിലെന്നാണ് കേരളത്തിലെ കർഷകരുടെ ആരോപണം. കോഴികളെ നിശ്ചിത സമയപരിധി വരെ മാത്രമേ ഫാമുകളിൽ നിർത്താനാകു. അതുകൊണ്ടു തന്നെ വില കുറഞ്ഞാലും കൂടിയാലും വിറ്റൊഴിക്കുകയേ കർഷകർക്ക് മുന്നിൽ മാർഗമുള്ളൂ. വളർച്ചയെത്തിയ ശേഷം കോഴികളെ ഫാമുകളിൽ നിർത്തുന്നത് തീറ്റ ഇനത്തിൽ വീണ്ടും വലിയ നഷ്ടം വരുത്തും. തീറ്റയും പരിചരണവുമേകി വില്ക്കുമ്പോൾ ഇന്നലത്തെ വിലപ്രകാരം ചെലവു തുകയുടെ പകുതി പോലും തിരിച്ചു കിട്ടാത്ത സ്ഥിതിയാണ്. കോഴിക്കുഞ്ഞിന്‍റെ വില, തീറ്റ, മരുന്ന്, പരിചരണ ചെലവ് എന്നിവ പ്രകാരം ഒരു കിലോ കോഴിക്ക് 98 രൂപ വരെ ചെലവ് വരുമെന്നാണ് കർഷകർ പറയുന്നത്. ഫാമുകളിൽ വലിയ വില കുറവുണ്ടെങ്കിലും ആനുപാതികമായ വിലക്കുറവ് ഉപഭോക്താക്കൾക്ക് ലഭിക്കുന്നില്ലെന്നാണ് ഫാം ഉടമകൾ പറയുന്നത്. കഴിഞ്ഞവർഷം ഇതേസമയത്ത് ഒരുകിലോ കോഴിക്ക് ഫാമുകളിൽ 148 രൂപ വിലയുണ്ടായിരുന്നു.

വാർഷികാഘോഷം നടത്തി

പയ്യാവൂർ: കാഞ്ഞിലേരി പൊതുജന വായനശാല ആൻഡ് ഗ്രന്ഥാലയം വാർഷികം ആഘോഷിച്ചു. മുൻകാല ഭാരവാഹികൾ ചേർന്ന് ദീപം തെളിച്ച് ഉദ്ഘാടനം ചെയ്തു. വായനശാല പ്രസിഡന്‍റ് പി. ജനാർദനൻ അധ്യക്ഷത വഹിച്ചു. സെക്രട്ടറി ഇ.പി. ജയപ്രകാശ് ആമുഖ പ്രഭാഷണം നടത്തി. നഗരസഭ കൗൺസിലർ എം. ഷിജിൻ ഭരണഘടനയുടെ ആമുഖം വായിച്ചു. ഹരിതകർമ സേനാംഗങ്ങളെയും വിവിധ മേഖലകളിൽ മികവ് തെളിയിച്ചവരെയും ആദരിച്ചു. മിനേഷ് മണക്കാട്ട് പാട്ടും വർത്തമാനവും അവതരിപ്പിച്ചു. കെ.വി. ശശിധരൻ, പി. കുഞ്ഞിരാമൻ, സി.കെ. മധു, കെ. രാജേഷ്, എ.വി. രമേശൻ എന്നിവർ പ്രസംഗിച്ചു. പരിക്കളം നാടകവേദിയുടെ "അരക്കില്ലം' നാടകം അവതരിപ്പിച്ചു. നാടക പ്രവർത്തകരായ എം. അനിൽകുമാർ, രഞ്ജിത്ത് വെങ്ങോടൻ എന്നിവരെ ചടങ്ങിൽ ഇ. കുഞ്ഞികൃഷ്ണൻ, വി.സി. രാമചന്ദ്രൻ എന്നിവർ ആദരിച്ചു.

ഓവുചാലുകൾ മണ്ണിട്ടുമൂടി: മലിനജലം കെട്ടിക്കിടക്കുന്നു

തളിപ്പറമ്പ്: ദേശീയപാത നിർമാണത്തിന്‍റെ ഭാഗമായി ഓവുചാലുകൾ മണ്ണിട്ട് മൂടിയതു കാരണം മലിനജലം കെട്ടിക്കിടന്ന് ദുർഗന്ധം പരത്തുന്നത് പ്രദേശത്തുള്ളവർക്ക് ദുരിതമാകുന്നു. ഒന്നാം വാർഡിലൂടെ കടന്നുപോകുന്ന ഓവുചാൽ നികത്തിയത് കാരണം മലിനജലം മുപ്പത്തിനാലാം വാർഡിൽ ഒഴുകി പോകാതെ കെട്ടിക്കിടക്കുകയാണ്. ഇത് കൊതുകുശല്യത്തിനൊപ്പം രോഗ ഭീഷണിക്കും കാരണമാകുന്നുണ്ട്. ബന്ധപ്പെട്ടവർ അടിയന്തരമായി ഇടപെട്ട് മലിനജലം ഒന്നാം വാർഡിലെ പുഴയുടെ ഭാഗത്തേക്ക് ഒഴുക്കിവിടുന്നതിനുള്ള നടപടി സ്വീകരിക്കണമെന്ന് മുപ്പത്തിനാലാം വാർഡ് കൗൺസിലർ കെ.എം. ലത്തീഫ് ആവശ്യപ്പെട്ടു.

അടിസ്ഥാന സൗകര്യ വികസനം പുതിയ തൊഴില്‍ സാധ്യത സൃഷ്ടിക്കുന്നു: മന്ത്രി ബാലഗോപാൽ

കണ്ണൂർ: അടിസ്ഥാന സൗകര്യ വികസനത്തിലൂടെ കേരളത്തില്‍ പുതിയ തൊഴില്‍ സാധ്യതകള്‍ ഉണ്ടാകുന്നുണ്ടെന്നും ഇതിലൂടെ യുവജനങ്ങള്‍ക്ക് വിദേശങ്ങളിലേക്ക് ജോലി തേടി പോകേണ്ട സാഹചര്യം ഇല്ലാതാകുമെന്നും ധനമന്ത്രി കെ.എന്‍. ബാലഗോപാല്‍. ചെറുപുഴ സബ് ട്രഷറിയുടെ പുതിയ കെട്ടിടത്തിന്‍റെ ശിലാസ്ഥാപനം നിര്‍വഹിച്ചു പ്രസംഗിക്കുകയായിരുന്നു മന്ത്രി. രാജ്യത്ത് ഏറ്റവും മികച്ച രീതിയില്‍ പ്രവര്‍ത്തിക്കുന്ന ട്രഷറി സംവിധാനമാണ് കേരളത്തിലേത്. ട്രഷറികളുടെ നവീകരണത്തിന്‍റെ ഭാഗമായി ഇടപാടുകാരുടെ അഭിപ്രായങ്ങളുംകൂടി പരിഗണിച്ചാണ് കെട്ടിടങ്ങളും അനുബന്ധ സൗകര്യങ്ങളും ഒരുക്കുന്നതെന്നും മന്ത്രി പറഞ്ഞു. ടി.ഐ. മധുസൂദനന്‍ എംഎല്‍എ അധ്യക്ഷനായിരുന്നു. ട്രഷറി അടിസ്ഥാന സൗകര്യ വികസന പദ്ധതിയില്‍ (ടിഐഡിപി) ഉള്‍പ്പെടുത്തി ചെറുപുഴ പഞ്ചായത്ത് ഓഫീസിനു സമീപം ജനകീയ സമിതിയുടെ നേതൃത്വത്തില്‍ വാങ്ങി നല്‍കിയ സ്ഥലത്താണ് പുതിയ ട്രഷറി കെട്ടിടം നിര്‍മിക്കുക. 1,66,10,202 രൂപയാണ് അടങ്കല്‍ തുക. എച്ച്എല്‍എല്‍ ലിമിറ്റഡിനാണ് നിര്‍മാണ ചുമതല. ചെറുപുഴ പഞ്ചായത്ത് പ്രസിഡന്‍റ് കെ.എഫ്. അലക്സാണ്ടര്‍, എരമം-കുറ്റൂര്‍ പഞ്ചായത്ത് പ്രസിഡന്‍റ് ടി.ആര്‍. രാമചന്ദ്രന്‍, ജില്ലാപഞ്ചായത്ത് അംഗം എം. രാഘവന്‍, പയ്യന്നൂര്‍ ബ്ലോക്ക് പഞ്ചായത്ത് അംഗം ദാമോദരന്‍, ചെറുപുഴ പഞ്ചായത്ത് അംഗം എം.ബാലകൃഷ്ണന്‍, ട്രഷറി വകുപ്പ് ഡയറക്ടര്‍ വി. സാജന്‍, കോഴിക്കോട് ഡപ്യൂട്ടി ഡയറക്ടര്‍ കെ.ജി. രമാദേവി, ജില്ലാ ട്രഷറി ഓഫീസര്‍ ടി. ബിജു, ട്രഷറി സ്ഥലം വാങ്ങല്‍ ജനകീയ കമ്മിറ്റി കണ്‍വീനര്‍ കെ.ഡി. അഗസ്റ്റിന്‍, വിവിധ രാഷ്‌ട്രീയ പാര്‍ട്ടി പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ബയോമൗണ്ടൻ പുട്ടുപൊടി ‌യൂണിറ്റിന് ശിലാസ്ഥാപനം നടത്തി

ഇരിട്ടി: ബയോമൗണ്ടൻ ഫാർമേഴ്‌സ് കന്പനിയുടെ മൂന്നാമത് സംരംഭത്തിന് ആർച്ച്ബിഷപ് എമരിറ്റസ് മാർ ജോർജ് ഞറളക്കാട്ട് ശിലാസ്ഥാപനം നടത്തി. ബയോമൗണ്ടന്‍റേയും ബംഗളൂരുവിലെ സംരംഭകൻ ചിറ്റാരിക്കൽ നെടുതുരുത്തിൽ ഷിജോ ജോർജിന്‍റേയും സംയുക്ത പദ്ധതിയായ പുട്ടുപൊടി യൂണിറ്റാണിത്. തലശേരി അതിരൂപത കുന്നോത്ത് വിട്ടുനൽകിയ 10 ഏക്കർ സ്ഥലത്താണ് സർക്കാർ അംഗീകാരത്തോടെ ഇൻഡസ്ട്രിയൽ പാർക്ക് പ്രവർത്തിക്കുന്നത്. പുട്ടുപൊടി യൂണിറ്റ് ജൂലൈയിൽ പ്രവർത്തന സജ്ജമാകും. പ്രതിദിനം 2.5 ടൺ ഉത്പാദന ശേഷിയുള്ള സംരംഭത്തിനു 2.5 കോടി രൂപയാണ് ചെലവ്. 10 പേർക്ക് നേരിട്ടു തൊഴിൽ ലഭിക്കും. ബയോമൗണ്ടൻ ചെയർമാൻ മോൺ. സെബാസ്‌റ്റ്യൻ പാലാക്കുഴി അധ്യക്ഷത വഹിച്ചു. എംഎൽഎമാരായ സണ്ണി ജോസഫ്, സജീവ് ജോസഫ്, പായം പഞ്ചായത്ത് പ്രസിഡന്‍റ് പി. രജനി, വൈസ് പ്രസിഡന്‍റ് എം. വിനോദ്‌കുമാർ, മാനേജിംഗ് ഡയറക്ടർ ഫാ. ബെന്നി നിരപ്പേൽ, ഡയറക്‌ടർമാരായ റവ. ഡോ. ജോജി കാക്കരമറ്റത്തിൽ, പി.ടി. ജോസ്, കുന്നോത്ത് സെന്‍റ് തോമസ് ഫൊറോന വികാരി ഫാ. സെബാസ്‌റ്റ്യൻ മുക്കിലിക്കാട്ട്, ഇരിട്ടി സെന്‍റ് ജോസഫ്‌സ് പള്ളി വികാരി ഫാ. ജോസഫ് കളരിക്കൽ എന്നിവർ പ്രസംഗിച്ചു.

ട്രെയിക്‌സിന്‍റെ പുതിയ ശാഖ ഇന്ന് ഇരിട്ടിയിൽ ഉദ്ഘാടനം ചെയ്യും

ഇരിട്ടി: തലശേരി അതിരൂപതയുടെ കീഴിലുള്ള എഡ്യുക്കേഷണല്‍ ഇൻസ്റ്റിറ്റ്യൂഷൻസ് കോ-ഓപ്പറേറ്റീവ് സൊസൈറ്റിയുടെ(ട്രെയിക്‌സ്) മൂന്നാമത്തെ ശാഖ ഇരിട്ടി-തന്തോട് റോഡിലുള്ള "സാന്‍ജോസ് റിവര്‍വ്യൂ ഹൈറ്റ്‌സില്‍ ' ഇന്നുമുതൽ പ്രവർത്തനം ആരംഭിക്കും. ഇതിന്‍റെ ആശീർവാദ കർമവും ഉദ്ഘാടനവും ഉച്ചകഴിഞ്ഞ് 2.30 തിന് തലശേരി ആർച്ച്ബിഷപ് മാർ ജോസഫ് പാംപ്ലാനി നിർവഹിക്കും. ട്രെയിക്‌സ് പ്രസിഡന്‍റും തലശേരി അതിരൂപത കോർപറേറ്റ് മാനേജരുമായ ഫാ. മാത്യു ശാസ്താംപടവില്‍ ചടങ്ങിൽ അധ്യക്ഷത വഹിക്കും. സണ്ണി ജോസഫ് എംഎൽഎ ആദ്യ നിക്ഷേപം സ്വീകരിക്കും. സ്‌ട്രോംഗ് റൂം ആൻഡ് ലോക്കറിന്‍റെ താക്കോൽ കൈമാറൽ ഉദ്ഘാടനം സഹകരണസംഘം ജോയിന്‍റ് രജിസ്ട്രാര്‍ (ജനറല്‍) വി.രാമകൃഷ്ണനും കംപ്യൂട്ടർ സ്വിച്ച് ഓൺ കർമം സഹകരണസംഘം ജോയിന്‍റ് ഡയറക്ടര്‍ (ഓഡിറ്റ്) പി.വി. വത്സരാജും ഓഹരി സമാഹരണം സഹകരണസംഘം അസി. രജിസ്ട്രാര്‍ (ജനറല്‍) എ.കെ. ഉഷയും ലോഗോ റിലീസിംഗ് പായം പഞ്ചായത്ത് പ്രസിഡന്‍റ് പി.രജനിയും നിർവഹിക്കും. ‌ ട്രെയിക്‌സ് ചീഫ് പ്രൊമോട്ടർ കെ.ജെ. ജോര്‍ജിനെ ചടങ്ങിൽ ആദരിക്കും. ട്രെയിക്‌സ് ഡയറക്ടർ മോണ്‍. സെബാസ്റ്റ്യന്‍ പാലാക്കുഴി, ധര്‍മടം കോ-ഓപ്പറേറ്റീവ് യൂണിറ്റ് ഇന്‍സ്‌പെക്ടര്‍ കെ.പി. ശ്രീജിത്ത് കുമാർ, പായം പഞ്ചായത്ത് മെംബർ പി.പി. കുഞ്ഞൂഞ്ഞ്, അധ്യാപക പ്രതിനിധി മാത്യു ജോസഫ് എന്നിവർ പ്രസംഗിക്കും. ട്രെയിക്‌സ് വൈസ് പ്രസിഡന്‍റ് ജിമ്മി ജോസഫ് സ്വാഗതവും ട്രെയിക്‌സ് സെക്രട്ടറി ബിന്ദു എം.ജോർജ് നന്ദിയും പറയും. നിലവില്‍ തലശേരി ഹെഡ് ഓഫീസ് മെയിന്‍ ബ്രാഞ്ചും കോഴിക്കോട് ജില്ലയില്‍ താമരശേരി ബ്രാഞ്ചും പ്രവര്‍ത്തിച്ചുവരുന്നു. മൂന്നാമത്തെ ബ്രാഞ്ചാണ് ഇരിട്ടിയില്‍ തുറന്ന് പ്രവര്‍ത്തനം ആരംഭിക്കുന്നത്. പുതിയ ബ്രാഞ്ചില്‍ സ്വര്‍ണ പണയ വായ്പയും സേഫ് ലോക്കര്‍ സംവിധാനവും ഏര്‍പ്പെടുത്തുന്നുണ്ട്. കാസര്‍ഗോഡ്, കണ്ണൂര്‍, കോഴിക്കോട്, മലപ്പുറം റവന്യൂ ജില്ലകളിലായി പരന്നുകിടക്കുന്ന തലശേരി, താമരശേരി രൂപതകളിലെ ഗവണ്‍മെന്‍റ് എയ്ഡഡ് വിദ്യാഭ്യാസ സ്ഥാപനങ്ങളിലെ ജീവനക്കാരുടെ സാമ്പത്തിക ഉന്നമനം ലക്ഷ്യമാക്കി 1985 നവംബർ 20 തിനാണ് മാര്‍ സെബാസ്റ്റ്യന്‍ വള്ളോപ്പിള്ളിയുടെ ആശീർവാദത്തോടെ തലശേരി രൂപത എഡ്യുക്കേഷണല്‍ ഇന്‍സ്റ്റിറ്റ്യൂഷൻസ് കോ-ഓപ്പറേറ്റീവ് സൊസൈറ്റി ലിമിറ്റഡ് (ട്രെയിക്‌സ്) പ്രവർത്തനം ആരംഭിച്ചത്. നിലവിൽ, തലശേരി ആർച്ച്ബിഷപ് മാർ ജോസഫ് പാംപ്ലാനിയാണ് ട്രെയിക്സിന്‍റെ രക്ഷാധികാരി. ഫാ. മാത്യു ശാസ്താംപടവിലിന്‍റെ നേതൃത്വത്തിലുള്ള 10 അംഗ ഭരണസമിതിയാണ് 40-ാം വര്‍ഷത്തിലേക്ക് കടക്കുന്ന ട്രെയിക്‌സിന് നേതൃത്വം നല്‍കുന്നത്. 11450 രൂപ ഓഹരി മൂലധനവും 30 മെംബര്‍മാരുമായി തലശേരി വീനസ് കോര്‍ണറില്‍ പ്രവര്‍ത്തനം ആരംഭിച്ച ട്രെയിക്‌സിന് ഇന്ന് 4000 മെംബര്‍മാരും രണ്ടു കോടിയുടെ പിരിഞ്ഞുകിട്ടിയ ഓഹരി മൂലധനവും നേടിയിട്ടുണ്ട്. തുടര്‍ച്ചയായി ലാഭത്തില്‍ പ്രവര്‍ത്തിച്ചുവരുന്ന സംഘം 37 വര്‍ഷമായി മെംബര്‍മാര്‍ക്ക് ഡിവിഡന്‍റ് നല്‍കിവരുന്നു. സഹകരണ സംഘങ്ങളുടെ ക്ലാസിഫിക്കേഷന്‍ ക്രെഡിറ്റ് സംഘങ്ങളുടെ വിഭാഗത്തില്‍ ക്ലാസ് ഒന്നിൽ പ്രവര്‍ത്തിച്ചുവരുന്ന സൊസൈറ്റി സ്‌പെഷല്‍ ഗ്രേഡിലേക്ക് ഉയര്‍ത്തുവാനുള്ള അപേക്ഷ രജിസ്ട്രാര്‍ക്ക് നല്‍കിയിട്ടുണ്ട്. ഓഡിറ്റ് ക്ലാസിഫിക്കേഷന്‍ സ്ഥിരമായി 'എ' ഗ്രേഡിലാണ്.

എല്ലാവരെയും സമന്മാരായി കണ്ട വ്യക്തിത്വം: മാര്‍ മാത്യു മൂലക്കാട്ട്

കോട്ടയം: അജപാലനശുശ്രൂഷയില്‍ വേറിട്ട വ്യക്തിമുദ്ര പതിപ്പിച്ച ഇടയശ്രേഷ്ഠനായിരുന്നു ഫ്രാന്‍സിസ് മാര്‍പാപ്പ. അശരണരെയും പാവപ്പെട്ടവരെയും ചേര്‍ത്തുനിര്‍ത്തിയിരുന്ന പാപ്പ തികഞ്ഞ മനുഷ്യസ്നേഹിയും എല്ലാവരെയും സമന്മാരായി കാണുന്ന വ്യക്തിത്വത്തിന് ഉടമയുമായിരുന്നു. കോട്ടയം അതിരൂപത ഫ്രാന്‍സിസ് മാര്‍പാപ്പയ്ക്കുവേണ്ടി പ്രാര്‍ഥിക്കുകയും അനുശോചനം അറിയിക്കുകയും ചെയ്യുന്നു. ലാറ്റിനമേരിക്കന്‍ പശ്ചാത്തലത്തില്‍ വളര്‍ന്നുവന്ന പാപ്പായുടെ ജീവിതപശ്ചാത്തലങ്ങളും മുന്‍കാല അനുഭവങ്ങളും സഭയെ വേറിട്ടതും ശക്തവുമായ വഴിയിലൂടെ നയിക്കുവാന്‍ അദ്ദേഹത്തിനു ശക്തി പകര്‍ന്നു. സഭയ്ക്കുള്ളിലും പുറത്തും നവീകരണത്തിന്‍റെ വക്താവായിരുന്ന മാര്‍പാപ്പ തികഞ്ഞ പരിസ്ഥിതി സ്നേഹി കൂടിയായിരുന്നു. ജീവിതം മുഴുവന്‍ സുവിശേഷാനുസരണം ജീവിച്ച് ഉയിര്‍പ്പിന്‍റെ സന്ദേശം ലോകത്തിനു നല്കി പാപ്പ വിടവാങ്ങിയിരിക്കുകയാണ്. പല ചാക്രിക ലേഖനങ്ങളും ഗ്രന്ഥങ്ങളും രചിച്ചെങ്കിലും പാപ്പയുടെ ജീവിതമാണ് ലോകത്തിനു നല്കിയ ഏറ്റവും വലിയ സന്ദേശമടങ്ങിയ ഗ്രന്ഥം. അദ്ദേഹത്തിന്‍റെ പ്രചോദനാത്മകമായ ആത്മീയ നേതൃത്വം തലമുറകള്‍ക്ക് പ്രകാശം ചൊരിയും.

സമാനതകളില്ലാത്ത വ്യക്തിത്വത്തിന്‍റെ ഉടമ: മാർ ജോസഫ് പണ്ടാരശേരിൽ

കണ്ണൂർ: സമാനതകളില്ലാത്ത വ്യക്തിത്വത്തിന്‍റെ ഉടമയായിരുന്നു ഫ്രാൻസിസ് പാപ്പയെന്ന് കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ. 11 വർഷത്തെ വലിയ മുക്കുവന്‍റെ ശുശ്രൂഷ ചെയ്ത ഫ്രാൻസിസ് പാപ്പ പാർശ്വവത്കരിക്കപ്പെട്ടവരുടെയും അശരണരുടെയും യുദ്ധക്കെടുതി അനുഭവിക്കുന്നവരെയൊക്കെ പക്ഷത്ത് നിന്നുകൊണ്ട് അവരുടെ ശബ്ദമാകാൻ കഴിഞ്ഞു. കരുണയുടെ വർഷം പ്രഖ്യാപിച്ചുകൊണ്ട് കരുണയുടെ അപ്പോസ്തലനായി. 2025 ജൂബിലി വർഷം പ്രഖ്യാപിച്ച് പ്രത്യാശയുടെ പ്രവാചകനായി. "നാം സോദരർ' എന്ന ചാക്രിക ലേഖനത്തിലൂടെ സഹോദര സ്നേഹത്തിന് പുതുനിർവചനങ്ങൾ നൽകി. യുവജനങ്ങളുടെ സുഹൃത്തായും നവമാധ്യമങ്ങളെ ഫലപ്രദമായി ഉപയോഗിച്ചും മുത്തശി മുത്തശന്മാരുടെ ദിനം പ്രഖ്യാപിച്ചതൊക്കെ പാപ്പ കാലത്തിനിണങ്ങിയ അജപാലകനായി. ലളിതമായ ജീവിതശൈലിയും പ്രകൃതി സ്നേഹവും സിനഡാത്മക കാഴ്ചപ്പാടുമൊക്കെ പാപ്പയെ കത്തോലിക്കർക്കു മാത്രമല്ല ഏവർക്കും പ്രിയങ്കരനാക്കി മാറ്റിയെന്നും മാർ ജോസഫ് പണ്ടാരശേരിൽ അനുശോചന സന്ദേശത്തിൽ പറഞ്ഞു.

നഷ്ടമായത് ലോകത്തിന്‍റെ പ്രത്യാശ: ബ്രദർ മാത്യു കാവുങ്കൽ

ലോകത്തിന്‍റെ സ്നേഹനിധിയും പ്രത്യാശയുമായിരുന്നു പരിശുദ്ധ പിതാവ് ഫ്രാൻസിസ് മാർപാപ്പായെന്ന് മോണ്ട്ഫോർട്ട് ബ്രദേഴ്സ് ഓഫ് സെന്‍റ് ഗബ്രിയേൽ സഭാംഗമായ ബ്രദർ മാത്യു കാവുങ്കൽ അനുസ്മരിച്ചു. കരുണയും സ്നേഹവും നിറഞ്ഞ മാർപാപ്പാ മോണ്ട്ഫോർട്ട് ബ്രദേഴ്സ് ഓഫ് സെന്‍റ് ഗബ്രിയേലിനെ വളരെ സ്നേഹിച്ച പിതാവായിരുന്നു. എനിക്ക് പല തവണ പിതാവിനെ കാണാനും സംസാരിക്കാനുമുള്ള സാഹചര്യങ്ങൾ ലഭിച്ചിട്ടുണ്ട്. ഈശോയുടെ സുവിശേഷം പ്രഘോഷിക്കുകയും എളിമയോടെ ജീവിക്കുകയും ഈശോയുടെ അളവില്ലാത്ത സ്നേഹം ധൈര്യത്തോടെ പങ്കുവയ്ക്കുകയും പാവങ്ങൾക്കു വേണ്ടി എങ്ങനെ ജീവിക്കണം എന്നു മാതൃക കാട്ടിത്തരുകയും ചെയ്തു. എന്‍റെ സഹായം പദ്ധതി വഴി എന്‍റെ ജീവിതം അനേകായിരം പാവങ്ങൾക്കായി സമർപ്പിച്ചിട്ടുള്ളത് പിതാവിന് നല്ലതു പോലെ അറിയാമായിരുന്നു. അതേപ്പറ്റി സന്തോഷിക്കുകയും എന്നെ പ്രോത്സാഹിപ്പിക്കുകയും ചെയ്തിട്ടുണ്ട്. ‌"വിദ്യാഭ്യാസ സഹായം' പ്രകാശം നൽകുന്ന സൽപ്രവൃത്തിയാണെന്ന് പരിശുദ്ധ പിതാവ് പറഞ്ഞതും തന്നെ ഏറെ പ്രചോദിപ്പിച്ചുവെന്നും ബ്രദർ കാവുങ്കൽ പറഞ്ഞു.

പ്രവാചകശബ്ദം ഇനിയും പ്രതിധ്വനിക്കും: ഡോ. അലക്സ് വടക്കുംതല

കണ്ണൂർ: ഫ്രാൻസിസ് പാപ്പയുടെ പ്രവാചകശബ്ദം ഇനിയും പ്രതിധ്വനിക്കുമെന്ന് കേരള കാത്തലിക് ബിഷപ്‌സ് കൗൺസിൽ സെക്രട്ടറിയും കണ്ണൂർ ബിഷപ്പുമായ ഡോ. അലക്സ് വടക്കുംതല അനുശോചന സന്ദേശത്തിൽ പറഞ്ഞു. അഗാധമായ വിനയവും അതിരറ്റ കാരുണ്യവും ആഴത്തിലുള്ള ആത്മീയ ഉൾക്കാഴ്ചയുമുള്ള ഒരു മനുഷ്യനായിരുന്നു ഫ്രാൻസിസ് പാപ്പ. ലാളിത്യത്തിന്‍റെയും സേവനത്തിന്‍റെയും കാരുണ്യത്തിന്‍റെയും പാത തെരഞ്ഞെടുത്ത പാപ്പ തുടക്കംമുതൽ തന്നെ അടുപ്പത്തിന്‍റെ ആംഗ്യങ്ങളിലൂടെയാണ് ഹൃദയങ്ങളെ കീഴടക്കിയത്. തന്‍റെ തെരഞ്ഞെടുപ്പിന്‍റെ ദിവസം തന്നെ ലോകത്തിന്‍റെ പ്രാർഥനകൾ യാചിക്കുകയും ദാസന്മാരുടെ ദാസനാണ് താനെന്നും നിരന്തരം ഓർമിപ്പിക്കുകയും ചെയ്തിരുന്നു. തന്‍റെ സേവനത്തിന്‍റെ കാലയളവിൽ ഫ്രാൻസിസ് പാപ്പ ക്രിസ്‌തുവിന്‍റെ കാരുണ്യത്തിന്‍റെ മുഖം ആധുനിക ലോകത്തിന് മുന്നിൽ പ്രതിഫലിപ്പിക്കുന്നതിനായി അക്ഷീണം പ്രവർത്തിച്ചു. മുറിവേറ്റവർക്കും ക്ഷീണിതർക്കും പരിഗണന കണ്ടെത്താൻ കഴിയുന്ന ഒരു "ഫീൽഡ് ഹോസ്‌പിറ്റൽ' ആയി സഭയെ അദ്ദേഹത്തിന്‍റെ പഠനത്തിലും പ്രവൃത്തികളിലും ഊന്നിപ്പറഞ്ഞു. പാർശ്വവത്കരിക്കപ്പെട്ടവരെ മുഖ്യധാരയിലേക്ക് കൊണ്ടുവരാൻ നേതൃത്വം നല്‌കി. ദരിദ്രർ, കുടിയേറ്റക്കാർ, രോഗികൾ, വൃദ്ധർ, തടവിലാക്കപ്പെട്ടവർ എന്നിവരെ അദ്ദേഹം മറന്നില്ല. മറിച്ച് അദ്ദേഹത്തിന്‍റെ ദൗത്യത്തിൽ അവർക്ക് മുൻഗണന നൽകി. സുവിശേഷം ഒരു ആശയമല്ല, മറിച്ച് സ്നേഹത്തിന്‍റെ നീതിയുടെയും ആർദ്രതയുടെയും ഒരു സജീവാനുഭവമാണെന്ന് അദ്ദേഹം നമ്മെ ഓർമിപ്പിച്ചു. സാമ്പത്തിക നേട്ടങ്ങളെക്കാൾ മനുഷ്യന്‍റെ അന്തസ് മുൻനിർത്തി നമ്മുടെ ഇടയിലെ എളിയവരുടെ നിലവിളികളെ ഒരിക്കലും അവഗണിക്കരുതെന്ന് രാഷ്‌‌ട്രങ്ങളെയും ഭരണാധിപന്മാരെയും വെല്ലുവിളിച്ചുകൊണ്ട് ദരിദ്രരുടെ ആഗോള ശബ്ദമായി പാപ്പ മാറി. തടവുകാരോടുള്ള അദ്ദേഹത്തിന്‍റെ ഇടപെടൽ പ്രത്യേകിച്ചും വികാരഭരിതമായിരുന്നു. അവസാന ദിനങ്ങളിൽ പോലും ശാരീരിക ബലഹീനതകൾക്കിടയിലും ഫ്രാൻസിസ് പാപ്പ ആത്മാവിന്‍റെ ശക്തി പ്രസരിപ്പിച്ചുകൊണ്ടിരുന്നുവെന്നും ബിഷപ് അനുശോചനക്കുറിപ്പിൽ പറഞ്ഞു.

പാവങ്ങളുടെ പക്ഷത്ത് നിലയുറപ്പിച്ച പാപ്പ: മാർ ജോസഫ് പാംപ്ലാനി

തലശേരി: ഫ്രാൻസിസ് മാർപാപ്പയുടെ വിയോഗം ആഗോള കത്തോലിക്കാ സഭയ്ക്കും ഈ കാലഘട്ടത്തിനും തീരാനഷ്ടമെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി അനുസ്മരിച്ചു. ലാറ്റിൻ അമേരിക്കൻ പശ്ചാത്തലത്തിൽനിന്നു വന്ന അദ്ദേഹം പാവങ്ങളുടെ പക്ഷത്ത് സഭ നിലയുറപ്പിക്കണം എന്ന നിർബന്ധ ബുദ്ധിയുള്ള വ്യക്തിയായിരുന്നു. തികച്ചും ലളിതമായ ജീവിതശൈലി സ്വന്തമാക്കിയ മാർപാപ്പ പാവങ്ങൾക്ക് വേണ്ടി നിരന്തരം സംസാരിച്ചു. ലോകമെങ്ങുമുള്ള അഭയാർഥികളുടെ ആശാകേന്ദ്രമായിരുന്നു ഫ്രാൻസിസ് മാർപാപ്പ. സഭ പാവങ്ങളുടെ സഭയാകണമെന്ന് മാർപാപ്പ ചിന്തിച്ചിരുന്നു. സഭയുടെ ഭരണക്രമത്തിൽ വിപ്ലവകരമായ മാറ്റങ്ങൾ വരുത്തിയ പാപ്പയാണ് ഫ്രാൻസിസ് മാർപാപ്പ. സിനഡാലിറ്റി എന്ന ആശയം മാർപാപ്പ ഉയർത്തിപ്പിടിച്ചു. അധികാരസ്ഥാനങ്ങളിൽ ഇരിക്കുന്നവർ ഏകപക്ഷീയമായിട്ടല്ല തീരുമാനങ്ങൾ എടുക്കേണ്ടതെന്നും മറിച്ച് കൂട്ടായ്മയുടെയും പരസ്പരം മനസിലാക്കുന്നതിന്‍റെയും അടിസ്ഥാനത്തിലായിരിക്കണം തീരുമാനങ്ങൾ എന്നുമുള്ള നിർബന്ധ ബുദ്ധി ഉണ്ടായിരുന്നു. മറ്റുള്ളവരെ ശ്രദ്ധയോടെ ശ്രദ്ധിക്കേണ്ടതിന്‍റെ പ്രാധാന്യം അദ്ദേഹം ലോകത്തെ പഠിപ്പിച്ചു. ഇതര മതസ്ഥരുമായി സൗഹൃദത്തിൽ കഴിയേണ്ടവരാണ് ക്രൈസ്തവരെന്ന് ശഠിച്ചു. അബുദാബിയിലെ ഗ്രാൻഡ് ഇമാമുമായി നടത്തിയ ചരിത്രപ്രസിദ്ധമായ സംഗമം ലോകചരിത്രത്തിൽ തന്നെ ഇടം പിടിക്കുന്നതാണ്. മതങ്ങൾ സ്നേഹത്തിലും സൗഹാർദത്തിലും കഴിയുമ്പോൾ മാത്രമേ ഭൂമിയിൽ ദൈവരാജ്യം സ്ഥാപിക്കപ്പെടുകയുള്ളൂവെന്ന് അദ്ദേഹം വിശ്വസിച്ചിരുന്നു. ഫ്രാൻസിസ് മാർപാപ്പ സമാധാനത്തിന്‍റെ അപ്പോസ്തലൻ ആയിരുന്നു. വ്യക്തിപരമായി പലതവണ കണ്ടുമുട്ടാനും സംസാരിക്കാനും കഴിഞ്ഞതിന്‍റെ ഓർമകൾ മനസിലുണ്ട്. തലശേരി അതിരൂപതയോട് പൈതൃകമായ വാത്സല്യം ഫ്രാൻസിസ് മാർപാപ്പ പ്രകടിപ്പിച്ചിരുന്നു. ചെമ്പേരി ലൂർദ് മാതാ പള്ളിയെ ബസിലിക്കാ പദവിയിലേക്ക് ഉയർത്തിയത് ഫ്രാൻസിസ് മാർപാപ്പയായിരുന്നുവെന്നും മാർ പാംപ്ലാനി അനുസ്മരിച്ചു.

അമ്മ ഫോൺ ഉപയോഗം നിയന്ത്രിക്കാൻ പറഞ്ഞതിന് വിദ്യാർഥിനി ജീവനൊടുക്കി

തലശേരി: ഫോണിൽനിന്നും വാട്സ് ആപ്പ് ഡിലീറ്റ് ചെയ്യാൻ അമ്മ നിർദേശിച്ചതിനു പിന്നാലെ പതിനാലുകാരി ജീവനൊടുക്കി. തിരുവനന്തപുരം ഉള്ളൂർ സ്വദേശി അനൂപ്-ധരണ്യ ദന്പതികളുടെ മകൾ ആദിത്യയെയാണ് മാതൃസഹോദരിയുടെ വീട്ടിലെ സ്റ്റെയർകേസിൽ തൂങ്ങി മരിച്ച നിലയിൽ കണ്ടെത്തിയത്. തിരുവനന്തപുരം പട്ടം സെന്‍റ് മേരീസ് സ്കൂൾ വിദ്യാർഥിനിയാണ്. വേനലവധിക്ക് തലശേരി കൊടുവള്ളി റസ്റ്റ് ഹൗസിനു സമീപത്തെ ആമിന ക്വാർട്ടേഴ്സിൽ മാതൃസഹോദരിക്കൊപ്പം താമസിക്കാനെത്തിയതായിരുന്നു. ഞായറാഴ്ച വൈകുന്നേരം നാലോടെയാണ് സംഭവം. മകളെ സ്ഥിരമായി ഓൺലൈനിൽ കണ്ടതോടെ വാട്ട്സ് ആപ്പ് ഡിലീറ്റ് ചെയ്യാൻ തിരുവനന്തപുരത്തുള്ള അമ്മ ഫോണിലൂടെ ആവശ്യപ്പെട്ടിരുന്നു. ഇതിനു പിന്നാലെയാണ് തൂങ്ങിമരിച്ച നിലയിൽ കണ്ടെത്തിയത്. തലശേരി ജനറൽ ആശുപത്രിയിൽ പോസ്റ്റുമോർട്ടം ചെയ്ത ശേഷം മൃതദേഹം നാട്ടിലേക്ക് കൊണ്ടുപോയി. സഹോദരി: ദിക്ഷ.

കേന്ദ്ര ഫണ്ടിൽ നിർമിച്ച ക്ലാസ് മുറികളുടെ ഉദ്ഘാടനം ഇന്ന്; ക്ഷണക്കത്തിൽ പ്രധാനമന്ത്രിയുടെ ഫോട്ടോ ഇല്ലാത്തതിൽ വിവാദം

പയ്യാവൂർ: കേന്ദ്ര പദ്ധതിയിൽ ഉൾപ്പെടുത്തി ഉളിക്കൽ ഗവ. ഹയർസെക്കൻഡറി സ്കൂളിൽ നിർമിച്ച ആറ് ക്ലാസ് മുറികളുടെ ഉദ്ഘാടന ചടങ്ങിന്‍റെ ക്ഷണക്കത്തിൽ പ്രധാനമന്ത്രിയുടെ ഫോട്ടോ ഉൾപ്പെടുത്താതതിനെ ചൊല്ലി വിവാദം. ന്യൂനപക്ഷ ന്യൂനപക്ഷ മേഖലകളിൽ അടിസ്ഥാന സൗകര്യങ്ങൾ വികസിപ്പിക്കുന്നതിന്‍റെ ഭാഗമായി കേന്ദ്രസർക്കാർ നടപ്പാക്കുന്ന പ്രധാനമന്ത്രി ജൻ വികാസ് കാര്യക്രം പദ്ധതി പ്രകാരം 49 ലക്ഷം രൂപാ ചെലവിലവാണ് സ്കൂളിൽ ക്ലാസ് മുറികൾ നിർമിച്ചത്. എന്നാൽ ബിജെപി വിരോധം കാരണം രാഷ്‌ട്രീയ പ്രേരിതമായി പ്രധാന മന്ത്രിയുടെ ഫോട്ടോ സംഘാടകർ ഒഴിവാക്കിയതാണെന്ന് ബിജെപി ആരോപിച്ചു. ഇന്ന് സംസ്ഥാന ന്യൂനപക്ഷ മന്ത്രി ഉച്ച കഴിഞ്ഞ് മൂന്നിനാണ് ക്ലാസ് മുറികളുടെ ഉദ്ഘാടനം നിർവഹിക്കുന്നത്. പ്രധാന മന്ത്രിയുടെ ഫോട്ടോ ഒഴിവാക്കിയ സംഘാടക സമിതി നിലപാടിൽ പ്രതിഷേധിച്ച് ഉച്ച കഴിഞ്ഞ് രണ്ടിന് സ്കൂളിലേക്ക് ബിജെപി മാർച്ച് നടത്തും. മാർച്ച് കണ്ണൂർ നോർത്ത് ജില്ലാ പ്രസിഡന്‍റ് കെ.കെ.വിനോദ് കുമാർ ഉദ്ഘാടനം ചെയ്യുമെന്ന് ഇരിക്കൂർ മണ്ഡലം പ്രസിഡന്‍റ് സഞ്ജു കൃഷ്ണകുമാർ അറിയിച്ചു.

തിരുനാൾ ആഘോഷങ്ങൾ

പെരിങ്ങാല വിശുദ്ധ യൂദാശ്ലീഹായുടെ തീർഥാടന പള്ളിയിൽ തേർത്തല്ലി: പെരിങ്ങാല വിശുദ്ധ യൂദാശ്ലീഹായുടെ തീർഥാടന പള്ളിയിൽ യൂദാശ്ലീഹായുടെ നൊവേനയും തിരുനാൾ ആഘോഷവും 25 മുതൽ മേയ് 4 വരെ നടക്കും. 25ന് വൈകുന്നേരം 3:45ന് ദിവ്യകാരുണ്യ ആരാധന. 4.15 ന് തിരുന്നാളിന് തുടക്കം കുറിച്ച് ഇടവക വികാരി ഫാ. മാത്യു കായംമ്മക്കൽ കൊടിയേറ്റും. തുടർന്ന് ആഘോഷമായ കുർബാന വചന സന്ദേശം നൊവേന. മേയ് രണ്ടുവരെ തിരുനാൾ ദിവസങ്ങളിൽ വൈകുന്നേരം നാലിന് ദിവ്യകാരുണ്യ ആരാധന, വിശുദ്ധ കുർബാന, വചന സന്ദേശം, പ്രസുദേന്തി വാഴ്ച, നൊവേന എന്നിവ നടക്കും. ഫാ. ജോസഫ് പൂവന്നിക്കുന്നേൽ, ഫാ. സഞ്ജയ് കുരീക്കാട്ടിൽ, ഫാ. ജയ്സൺ പള്ളിക്കര, ഫാ. ജോസഫ് കാനക്കാട്ട്, ഫാ. ഷാജി ചിലമ്പിക്കുന്നേൽ, ഫാ. ഏബ്രഹാം മഠത്തിമ്യാലിൽ, മോൺ. മാത്യു ഇളംതുരുത്തിപടവിൽ എന്നിവർ കാർമികത്വം വഹിക്കും. മേയ് രണ്ടിന് രാത്രി ഏഴിന് ഗാനമേള. മൂന്നിന് വൈകുന്നേരം 4.30ന് ദിവ്യകാരുണ്യ ആരാധന. അഞ്ചിന് ആഘോഷമായ വിശുദ്ധ കുർബാനയ്ക്ക് ഫാ. ഷോജിൻ കണിയാംകുന്നേൽ, ഫാ. ജോയൽ പനച്ചിപ്പുറം, ഫാ. ജോസഫ് കൈതക്കുളത്ത്, ഫാ. നിബിൻ അരീക്കത്താഴെ എന്നിവർ കാർമികത്വം വഹിക്കും. 6.30 ന് വിശ്വാസപ്രഘോഷണ റാലി, ലദീഞ്ഞ്, വാദ്യമേളങ്ങൾ, സ്നേഹവിരുന്ന് തുടർന്ന് മ്യൂസിക്കൽ ഫ്യൂഷൻ ഷോ. സമാപനദിനമായ നാലിന് രാവിലെ ഒന്പതിന് ആഘോഷമായ റാസ കുർബാനയ്ക്ക് ഫാ. മാത്യു കുന്നേൽ, ഫാ. തോമസ് മേനപ്പാട്ട് പടിക്കൽ എന്നിവർ കാർമികത്വം വഹിക്കും. തുടർന്ന് പെരിങ്ങാല കുരിശടിയിലേക്ക് പ്രദക്ഷിണം. പള്ളിയിൽ സമാപന ആശീർവാദം. വെള്ളരിയാനം ഹോളിക്രോസ് പള്ളിയിൽ പെരുമ്പടവ്: വെള്ളരിയാനം ഹോളിക്രോസ് പള്ളിയിൽ പരിശുദ്ധ മാതാവിന്‍റേയും വിശുദ്ധ ഗീവർഗീസ് സഹദായയുടെയും വിശുദ്ധ സെബസ്ത്യാനോസിന്‍റേയും സംയുക്ത തിരുനാളും നൊവേനയും 24 മുതൽ 27 വരെ നടത്തപ്പെടും. 24ന് വൈകുന്നേരം 3.30ന് ജപമാല, നാലിന് വികാരി ഫാ.തോമസ് ചക്കാനിക്കുന്നേൽ കൊടിയേറ്റും. തുടർന്ന് തിരുസ്വരൂപ പ്രതിഷ്ഠ. 4.30ന് തിരുനാൾ കുർബാന, നൊവേന എന്നിവയ്ക്ക് ഫാ. എയ്ഷ്യൽ ജോസഫ് ആനക്കല്ലിൽ കാർമികത്വം വഹിക്കും. 25, 26 തീയതികളിൽ വൈകുന്നേരം നാലിന് ജപമാല. 4.30ന് തിരുന്നാൾ കുർബാന, നൊവേന എന്നിവയ്ക്ക് ഫാ. സിറിൽ പട്ടാശേരി, ഫാ. മാത്യു പ്രവർത്തുംമലയിൽ എന്നിവർ കാർമികത്വം വഹിക്കും. 25ന് വൈകുന്നേരം 6:45ന് കലാവിരുന്ന്. 26ന് വൈകുന്നേരം ഏഴിന് വിശ്വാസപ്രഘോഷണ പ്രദക്ഷിണം. ഫാ. ജോയൽ പനച്ചിപ്പുറം തിരുനാൾ സന്ദേശം നല്കും. രാത്രി 8.30ന് പള്ളിയിലേക്ക് പ്രദക്ഷിണം. തുടർന്ന് സമാപന ആശീർവാദം. 27 ന് രാവിലെ ഏഴിന് വിശുദ്ധ കുർബാന. പത്തിന് മോൺ. ആന്‍റണി മുതുകുന്നേലിന്‍റെ കാർമികത്വത്തിൽ തിരുനാൾ കുർബാന, വചന സന്ദേശം. 12ന് പ്രദക്ഷിണം. 12.30ന് സ്നേഹവിരുന്ന്. കാര്യപ്പള്ളി സെന്‍റ് മേരീസ് പള്ളിയിൽ പെരുമ്പടവ്: കാര്യപ്പള്ളി സെന്‍റ് മേരിസ് പള്ളിയിൽ പരിശുദ്ധ കന്യകാ മറിയത്തിന്‍റേയും വിശുദ്ധ സെബസ്ത്യാനോസിന്‍റേയും തിരുനാൾ മഹോത്സവം 25 മുതൽ മേയ് നാലുവരെ നടക്കും. 25ന് വൈകുന്നേരം നാലിന് ജപമാല. 4.25 ന് ഇടവക വികാരി ഫാ. അനിൽ മങ്ങാട്ട് കൊടിയേറ്റും. 4.30ന് ഫാ. ഏബ്രഹാം മഠത്തിമ്യാലിന്‍റെ കാർമികത്വത്തിൽ വിശുദ്ധ കുർബാന. തുടർന്ന് സെമിത്തേരി സന്ദർ ശനം. ഒപ്പീസ്. 26, 28, 29, 30, മേയ് ഒന്ന് തീയതികളിൽ വൈകുന്നേരം നാലിന് ജപമാല. 4.30ന് വിശുദ്ധ കുർബാന, നൊവേന എന്നിവയ്ക്ക് ഫാ. വിനോദ് മങ്ങാട്ടിൽ, ഫാ. സി.എം. ജോജി, ഫാ. കുര്യാക്കോസ് പ്ലാവ് നിൽക്കുംപറമ്പിൽ, ഫാ. മാത്യു പ്രവർത്തുംമലയിൽ, ഫാ. സജി കിഴക്കേക്കര എന്നിവർ കാർമികത്വം വഹിക്കും. 27ന് രാവിലെ 8:30ന് ജപമാല, ഒന്പതിന് വിശുദ്ധ കുർബാന, നൊവേന. തുടർന്ന് ആദ്യകുർബാന സ്വീകരണം. മേയ് രണ്ടിന് വൈകുന്നേരം 4.30ന് കുരിശുപള്ളി വെഞ്ചരിപ്പ്. തിരുനാൾ കുർബാന, നൊവേന എന്നിവയ്ക്ക് ഫാ.ജോസഫ് മുട്ടത്തുകുന്നേൽ കാർമികത്വം വഹിക്കും. വൈകുന്നേരം 6.45 ഭക്ത സംഘടനകളുടെ കലാ വിരുന്ന്. മൂന്നിന് വൈകുന്നേരം അഞ്ചിന് തിരുനാൾ കുർബാനയ്ക്ക് ഫാ. പ്രകാശ് കാഞ്ഞിരത്തിങ്കൽ കാർമികത്വം വഹിക്കും. 6.45 ന് വെള്ളോറ ടൗൺ പന്തലിലേക്ക് പ്രദക്ഷി ണം. തുടർന്ന് വചന സന്ദേശം രാത്രി ഒന്പതിന് ഗാനമേള. സമാപന ദിനമായ നാലിന് രാവിലെ പത്തിന് ഫാ. സെബാസ്റ്റ്യൻ ഐസക്കിന്‍റെ കാർമികത്വത്തിൽ ആഘോഷമായ തിരുനാൾ കുർബാന. വൈകുന്നേരം 6.45ന് കുരിശടിയിലേക്ക് പ്രദക്ഷിണം. സമാപന ആശീർവാദം, സ്നേഹവിരുന്ന് കൊടിയിറക്ക്.

വാദ്യോപകരണങ്ങൾ വിതരണം ചെയ്തു

നടുവിൽ: നടുവിൽ പഞ്ചായത്ത് വാർഷിക പദ്ധതിയിൽ ഉൾപ്പെടുത്തി പട്ടിക വർഗ വിഭാഗം യുവാക്കൾക്ക് വാദ്യോപകരണങ്ങൾ വിതരണം ചെയ്തു. പ്രസിഡന്‍റ് ബേബി ഓടംപള്ളിൽ ഉദ്ഘാടനം ചെയ്തു.വൈസ് പ്രസിഡന്‍റ് സി.എച്ച്. സീനത്ത് അധ്യക്ഷത വഹിച്ചു. സ്ഥിരം സമിതി അധ്യക്ഷരായ സെബാസ്റ്റ്യൻ വിലങ്ങോലിൽ,ജോസ് ആലിലക്കുഴിയിൽ, അംഗം പി. ബഷീറ,അസി. സെക്രട്ടറി എം.ജി. സുഭാഷ്,കെ.കെ. സുരേഷ് എന്നിവർ പ്രസംഗിച്ചു. 5,90,000 രൂപയാണ് വാദ്യോപകരണ വിതരണത്തിനായി വകയിരുത്തിയത്.

വീട് നിർമാണത്തിന് സന്നദ്ധ സേവനവുമായി തൊഴിലുറപ്പ് വനിതാ തൊഴിലാളികൾ

ചെമ്പേരി: ഏരുവേശി പഞ്ചായത്ത് ഏഴാം വാർഡിൽ ആശ്രയ പദ്ധതിയിൽ ഉൾപ്പെടുത്തി അറ്റകുറ്റപണി നടത്തുന്ന വീടിന്‍റെ പണിക്ക് തൊഴിലുറപ്പ് വനിതാ തൊഴിലാളികളുടെ കൈത്താങ്ങ്. കല്യാണി കണ്ണംചിറയുടെ വീട് നിർമാണത്തിലാണ് സന്നദ്ധസേവനവുമായി തൊഴിലുറപ്പ് വനിതാ തൊഴിലാളികൾ എത്തിയത്. പ്രായമായ കല്യാണിയും തളർവാത രോഗിയായ മകനും മാത്രമാണ് വീട്ടിലുള്ളത്. വീട് സ്ഥിതി ചെയ്യുന്ന ഭാഗത്തേക്ക് റോഡ് സൗകര്യം ഇല്ലാത്ത അവസ്ഥയിൽ നിർമാണ സാമഗ്രികൾ കുറേ ദൂരം തലച്ചുമടായി എത്തിക്കേണ്ടതുണ്ട്. എന്നാൽ ഇതിനുള്ള സാന്പത്തികാവസ്ഥ കുടുംബത്തിനില്ല. ഇക്കാര്യം മനസിലാക്കിയ തൊഴിലുറപ്പ് വനിതാ തൊഴിലാളികൾ അയൽവാസികളുടെ സഹകരണത്തോടെ ചെങ്കല്ല്, മണൽ, സിമന്‍റ്, ഓട് തുടങ്ങിയ വസ്തുക്കൾ തലച്ചുമടമായി എത്തിച്ചു നൽകുകയായിരുന്നു. വാർഡ് മെംബർ എം.ഡി.രാധാമണി. കുടുംബശ്രീ എഡിഎസ് പ്രസിഡന്‍റ് ഫാത്തിമ, സിഡിഎസ് മെന്പർ ദീപ മനോജ്, തൊഴിലുറപ്പ് മേറ്റ് പി.കെ.വി.മഞ്ജുള, എം.സി.അഭിലാഷ്, റോയി ആലത്തൂർ എന്നിവർ നേതൃത്വം നൽകി.

വീടാക്രമിച്ച അഞ്ചു പേർക്കെതിരെ കേസ്

പരിയാരം: തീയക്ഷേമസഭയെ അനുകൂലിച്ച് സംസാരിച്ച വിരോധത്തിൽ വീടാക്രമിച്ചതായി പരാതി. കാരാട്ടെ കുന്നപ്പട വീട്ടില്‍ കെ.പ്രകാശന്‍റെ (52) വീടിനു നേരെയാണ് അക്രമം നടന്നത്. അഞ്ചംഗം സംഘം അതിക്രമിച്ച് കയറി വരാന്തയിലെയും കിടപ്പ്മുറികളുടെയും ജനൽ ചില്ലുകൾ അടിച്ചു തകർക്കുകയായിരുന്നു. പതിനായിരം രൂപയുടെ നഷ്ടം സംഭവിച്ചതായി പ്രകാശൻ പോലീസിൽ നൽകിയ പരാതിയിൽ പറയുന്നു. പ്രകാശന്‍റെ പരാതിയിൽ ആറത്തിപ്പറമ്പിലെ രതീഷ്, കണ്ടാലറിയാവുന്ന മറ്റ് നാലുപേർക്കെതിരെയും പോലീസ് കേസെടുത്തു. ‌ 19ന് രാത്രി പത്തോടെയായിരുന്നു സംഭവം. കുഞ്ഞിമംഗലം മല്ലിയോട്ട് പാലോട്ട്കാവ് ഉല്‍സവവുമായി ബന്ധപ്പെട്ട് വാഹന പാര്‍ക്കിംഗിന ചൊല്ലി കഴിഞ്ഞ ദിവസം പ്രദേശത്ത് സംഘര്‍ഷമുണ്ടായിരുന്നു. ഇതേപ്പറ്റി പ്രകാശന്‍ പരസ്യമായി അഭിപ്രായപ്രകടനം നടത്തിയതാണ് പ്രകോപനത്തിന് കാരണമെന്നാണ് പരാതിയില്‍ പറയുന്നത്.

മട്ടന്നൂർ പഴശിയിലെ സർക്കാർ ആയുർവേദ ആശുപത്രി ; ആദ്യഘട്ട നിർമാണം പൂർത്തിയായി

മട്ടന്നൂർ: പഴശിയിൽ നിർമിക്കുന്ന സർക്കാർ ആയുർവേദ ആശുപത്രിയുടെ നിർമാണ പ്രവൃത്തികൾ വിലയിരുത്തി. ഈ വർഷം അവസാനത്തോടെ ആശുപത്രിയുടെ പ്രവർത്തനം ആരംഭിക്കാനുള്ള ശ്രമത്തിലാണ് അധികൃതർ. 17 കോടി രൂപ ചെലവിലാണ് 50 കിടക്കകളുള്ള ആശുപത്രി നിർമിക്കുന്നത്. കെ.കെ.ശൈലജ എംഎൽഎയുടെ അധ്യക്ഷതയിൽ ചേർന്ന യോഗമാണ് നിർമാണ പ്രവൃത്തികൾ വിലയിരുത്തിയത്. പഴശി കന്നാട്ടുംകാവിലാണ് ആധുനിക സൗകര്യങ്ങളോടെ ആയുർവേദ ആശുപത്രിയുടെ നിർമാണം നടക്കുന്നത്. ആദ്യഘട്ട നിർമാണ പ്രവൃത്തികൾ പൂർത്തിയായി കഴിഞ്ഞു. ഗ്രൗണ്ട് ഫ്ലോർ ഉൾപ്പെടെ മൂന്നു നിലകളുടെ നിർമാണം പൂർത്തിയായി. ഇന്‍റഗ്രേറ്റഡ് ഹെൽത്ത് സെന്‍റർ എന്ന നിലയിൽ ഗ്രൗണ്ട് ഫ്ലോർ ഉൾപ്പെടെ അഞ്ച് നിലകളുള്ള കെട്ടിടമാണ് നിർമിക്കുന്നത്. ആശുപത്രി യാഥാർഥ്യമാകുന്നത്തോടെ സംസ്ഥാനത്തെ തന്നെ മികച്ച ആശുപത്രിയായി ഇത് മാറും. ആയുർവേദത്തിനാണ് പ്രാധാന്യമെങ്കിലും മറ്റ് വിഭാഗങ്ങളിലെ ഡോക്ടർമാരുടെ പരിശോധനയും ഇവിടെയുണ്ടാകും. സാധാരണക്കാർക്ക് സൗജന്യ ചികിത്സ ലഭിക്കും. വിമാനത്താവളത്തിനു തൊട്ടടു ത്ത പ്രദേശമായതിനാൽ കേരളത്തിന്‍റെ പാരമ്പര്യ ചികിത്സയായ ആയുർവേദത്തെ തേടി വരുന്ന ആഭ്യന്തര-വിദേശ യാത്രികർ കൂടി ഇവിടെ എത്തും. താഴത്തെ നിലയിൽ ഒപി അടയ്ക്കമുള്ള സംവിധാനങ്ങളും ഒന്നും രണ്ടും നിലകളിൽ വാർഡുകളുമാണ് ഉണ്ടാകുക. കേന്ദ്രപദ്ധതി പ്രകാരം ആദ്യം ഒന്പതു കോടി രൂപയാണ് പദ്ധതിക്കായി അനുവദിച്ചിരുന്നത്. ഇത് തികയാതെ വന്നതോടെ രണ്ടു കോടി രൂപ കൂടി സംസ്ഥാന സർക്കാർ അനുവദിച്ചു. പിന്നീട് കേന്ദ്ര-സംസ്ഥാന വിഹിതമായി ആറു കോടി രൂപയും ചേർന്ന് 17 കോടി രൂപ ചെലവിലാണ് ആശുപത്രി നിർമിക്കുന്നത്. രണ്ടാംഘട്ട നിർമാണ പ്രവർത്തനങ്ങൾ പുരോഗമിക്കുകയാണ്. ആയുർവേദത്തിന്‍റെ പരമ്പരാഗത ചികിത്സാ രീതികൾക്കൊപ്പം തന്നെ അധുനിക സംവിധാനങ്ങളും ഉപയോഗപ്പെടുത്തിയുള്ള ചികിത്സാ സംവിധാനമാണ് ഇവിടെ ലഭ്യമാക്കുക.

അശരണർക്ക് സഹായമെത്തിക്കാൻ ഓട്ടോയുമായി ഓടുകയാണ് ബിജു

ഉളിക്കൽ: അശരണർക്കും സഹായമാവശ്യമുള്ളവരിലേക്കും ഏതു സമയവും ഓടിയെത്തുന്ന ഒരു ഓട്ടോയും ഡ്രൈവറുമുണ്ട് ഉളിക്കൽ ടൗണിൽ. ദൈവപൈതൽ എന്ന ഓട്ടോ റിക്ഷയും ബിജുവെന്ന ഡ്രൈവറുമാണത്. ഓട്ടോ ഓടിച്ച് കുടുംബം പുലർത്തുന്ന ബിജു തന്‍റെ വരുമാനത്തിൽ മിച്ചം പിടിച്ചും സഹായമനസ്കർ നൽകുന്ന സഹായങ്ങളുമാണ് അർഹരായവരിൽ എത്തിച്ചു നൽകുന്നത്. ഓട്ടോ ഓടിച്ച് വരുമാനമുണ്ടാക്കുന്നതിനെക്കാളും ദൈവപൈതൽ ബിജു ഓടിക്കുന്നത് സഹായമെത്തിക്കാനാണ്. സാധാരണ കുടുംബത്തിലെ അംഗമായ ബിജുവിന്‍റെ പത്താംതരം വരെയുള്ള പഠനം അധ്യാപകരുടെ സഹായത്താലും ഒപ്പം ഒരു ബേക്കറിയിൽ ജോലി ചെയ്തു കിട്ടുന്ന ചെറിയ വരുമാനത്തിലൂടെയുമായിരുന്നു. ഒരിക്കൽ നെല്ലിക്കാംപൊയിൽ പള്ളിയിലെ ദിവ്യബലിക്ക് മധ്യേ അന്നത്തെ അസി. വികാരി ഫാ. ടോമി എടാട്ട് നൽകിയ വചന സന്ദേശം ബിജുവിന്‍റെ മനസിനെ ആഴത്തിൽ സ്പർശിച്ചു. അശരണർക്കായി തന്നെകൊണ്ട് കഴിയുന്നത് ചെയ്യണമെന്ന തീരുമാനമെടുത്തായിരുന്നു അന്നു പള്ളിയിൽ നിന്നിറങ്ങിയത്. കണ്ണൂർ, എടൂർ, കൂട്ടുപുഴ, ചെമ്പേരി, കോളയാട് തുടങ്ങിയ സ്ഥലങ്ങളിലെ അനാഥമന്ദിരങ്ങളിലെ അന്തേവാസികളുടെ മുടിവെട്ടിക്കൊടുത്തും ഷേവ് ചെയ്തുമായിരുന്നു കാരുണ്യ പ്രവർത്തനങ്ങൾ ആരംഭിച്ചത്. ഇതോടൊപ്പം 10 വർഷം ദേവാലയ ശുശ്രൂഷി ആയി സേവനം ചെയ്തു. പിന്നീടാണ് ശുശ്രൂഷയും സ്വന്തം ഉപജീവനും ലക്ഷ്യമാക്കി ഓട്ടോറിക്ഷ വാങ്ങിയത്. ഇതിന് ദൈവപൈതൽ എന്ന് പേരും നൽകി. വിശ്രമം ഇല്ലാത്ത ദൈവപൈതൽ പകൽ മുഴുവൻ ദൈവപൈതൽ സഹായങ്ങളുമായി ജില്ലയുടെ വിവിധ ഭാഗങ്ങളിൽ ഓടിക്കൊണ്ടേയിരിക്കും. രോഗികളെ ആശുപത്രിയിലെത്തിക്കൽ, ആവശ്യക്കാർക്ക് മരുന്നും ഭക്ഷണവും വാങ്ങി നൽകൽ എന്നീ സേവനങ്ങൾക്കായി ഓടുന്ന ബിജു രാത്രി ഓട്ടോ ഓടിച്ചാണ് കുടുംബം പുലർത്താനുള്ള വരുമാനം കണ്ടെത്തുന്നത്. ഇതിനിടെ കുടുംബ സ്വത്തായ 38 സെന്‍റ് സ്ഥലത്ത് മറ്റുള്ളവരുടെ സഹായത്തോടെ രണ്ടു ഭവനങ്ങൾ നിർമിച്ചു നിരാലംബരായവരെ താമസിപ്പിക്കുന്നുമുണ്ട്. 600ഓളം രോഗികളെ വിവിധ തലങ്ങളിലായി സഹായിക്കുകയും ചെയ്യുന്നു. ക്രിസ്മസ്, ഓണം, ഈസ്റ്റർ തുടങ്ങിയ വിശേഷ ദിവസങ്ങളിൽ നിത്യോപയോഗ സാധനങ്ങൾ ഉൾകൊള്ളുന്ന കിറ്റുകളും പലർക്കും എത്തിച്ചു കൊടുക്കും. ബിജുവിന്‍റെ ജീവകാരുണ്യ പ്രവർത്തനങ്ങളെ കുറിച്ചറിഞ്ഞ വിവിധ സംഘടനകൾ, രാഷ്‌ട്രീയ സാമൂഹിക രംഗങ്ങളിലെ പ്രമുഖർ ബിസിനസുകാർ തുടങ്ങിയവരുടെ നിർലോഭമായ സഹകരണവും ലഭിക്കുന്നുണ്ട്. എന്നാൽ, ഇവരിൽ ഒരാളിൽ നിന്നും പോലും ബിജു പണം നേരിട്ട് വാങ്ങാറില്ല. നേരിട്ട് ആവശ്യക്കാരിലേക്ക് എത്തിക്കുന്നതിനുള്ള സൗകര്യമൊരുക്കി നൽകുകയാണ് ചെയ്യുക. ഇത്തവണ വിഷു, ഈസ്റ്റർ ആഘോഷങ്ങളോട് അനുബന്ധിച്ച് 500 ഓളം കിറ്റുകളാണ് ബിജു വിതരണം ചെയ്തത്.ജീവകാരുണ്യ, സേവന പ്രവർത്തനങ്ങൾക്ക് ചങ്ങനാശേരി അതിരൂപത ബിജുവിനെ പുരസ്കാരം നൽകി ആദരിച്ചിട്ടുണ്ട്. അതിരൂപതയുടെ സമർപ്പിത അവാർഡായ ഫാ. റോയി മുളകുപാടം സ്മാരക ജീവകാരുണ്യ അവാർഡ് നൽകിയാണ് ബിജുവിനെ ആദരിച്ചത്. തലശേരി അതിരൂപതയും പുരസ്കാരം നൽകി ആദരിച്ചിട്ടുണ്ട്. ഷെല്ലിയാണ് ഭാര്യ. അനുഗ്രഹ്, അർപിത്, ഗ്രേസ്, ആഗ്നസ് എന്നിവർ മക്കളാണ്.

കണ്ണൂർ ഗവ. മെഡിക്കൽ കോളജിൽ ജലവിതരണം പുനഃസ്ഥാപിച്ചു

പരിയാരം: കണ്ണൂര്‍ ഗവ.മെഡിക്കല്‍ കോളജിലെ തടസപ്പെട്ട ജലവിതരണം പുനഃസ്ഥാപിച്ചു. പിലാത്തറക്കടുത്ത് ടാറ്റാ കമ്യൂണിക്കേഷന്‍സ് കമ്പനി കേബിള്‍ സ്ഥാപിക്കാനായി മെഡിക്കല്‍ കോളജ് അധികൃതരെ അറിയിക്കാതെയും അനുമതി തേടാതെയും നാഷണല്‍ ഹൈവേ അധികൃതരെ മാത്രം അറിയിച്ച് അലക്ഷ്യമായി ഡ്രില്ലിംഗ് നടത്തിയതിനെ തുടർന്ന് മെഡിക്കൽ കോളജിലേക്കുള്ള പ്രധാന പൈപ്പ് പൊട്ടിയതായിരുന്നു ജലവിതരണം തടസപ്പെടാനിടയാക്കിയത്. പ്രധാന പൈപ്പിന്‍റെ എട്ട് ഇടങ്ങളിലായിരുന്നു പൊട്ടലുണ്ടായത്. മെഡിക്കല്‍ കോളജിലെ എൻജിനിയറിംഗ് വിഭാഗം മേഘാ കണ്‍സ്ട്രക്ഷന്‍സുമായി ചേര്‍ന്ന് പിഡബ്ല്യുഡി ഓഫീസുമായി ബന്ധപ്പെട്ട് റിപ്പയറിന് ആവശ്യമായ സാമഗ്രികള്‍ ലഭ്യമാക്കിയാണ് പൈപ്പ് അറ്റകുറ്റപണി നടത്തി കുടിവെള്ളം പുനഃസ്ഥാപിച്ചത്. പൈപ്പ്പൊട്ടിച്ച് കുടിവെള്ളം വിതരണം മുടക്കിയയതിന് ടാറ്റാ കമ്യൂണിക്കേഷന്‍ കന്പനിക്കെതിരെ നിയമ നടപടികൾ സ്വീകരിക്കാനും നഷ്ടപരിഹാരം ഈടാക്കാനും തീരുമാനിച്ചിട്ടുണ്ടെന്ന് മെഡിക്കൽ കോളജ് അധികൃതർ പറഞ്ഞു. പൈപ്പ് പൊട്ടി ജല വിതരണം മുടങ്ങിയത് ആശുപത്രി പ്രവർത്തനത്തെ ബാധിക്കാതിരിക്കാൻ വാട്ടർ അഥോറിറ്റിയുമായി ബന്ധപ്പെട്ട ടാങ്കറുകളിൽ വെള്ളമെത്തിച്ചാണ് ആശുപത്രി പ്രവർത്തനം നടത്തിയത്. കൂടാതെ ജീവനക്കാർ, വിദ്യാർഥികൾ സന്നദ്ധ സേവന സംഘടനകൾ എന്നിവയുടെ സഹായത്തോടെയും വെള്ളമെത്തിച്ചിരുന്നു. ആശുപത്രി വികസന സമിതി 35 ലക്ഷത്തോളം രൂപ ചെലവിട്ട് എമ്പേറ്റില്‍ നിന്ന് വാട്ടര്‍ അഥോറിറ്റിയുടെ പ്രത്യേക ലൈന്‍ മെഡിക്കല്‍ കോളജിലേക്ക് സ്ഥാപിക്കുന്നുണ്ട്. ഈ പ്രവൃത്തി ഏതാനും ദിവസങ്ങള്‍ക്കകം പൂര്‍ത്തികരിക്കുന്നതോടെ ആശുപത്രിയുടെ പ്രധാന ജലസ്രോതതായ വണ്ണാത്തിപുഴയില്‍ നിന്നുള്ള ജലം ലഭ്യമാകാതെ വരുന്ന സാഹചര്യത്തിലും ജലപ്രതിസന്ധിയില്ലാതെ ആശുപത്രി പ്രവർത്തനം സുഗമമായി നടത്താനാകും.

സോളാർ വേലി തകർത്ത സംഭവം; വനംവകുപ്പും പഞ്ചായത്ത് പ്രസിഡന്‍റും സ്ഥലം സന്ദർശിച്ചു

ഇരിട്ടി: ആറളം ആദിവാസി പുനരധിവാസ മേഖലയും ആറളം വന്യജീവി സങ്കേതവും അതിരിടുന്ന പ്രദേശത്ത് വന്യമൃഗങ്ങൾ കടയ്ക്കാതിരിക്കാൻ സ്ഥാപിച്ച അഞ്ചര കിലോമീറ്റർ താത്കാലിക സോളാർ വേലി തകർത്ത സ്ഥലം വനംവകുപ്പ് ഉദ്യോഗസ്ഥരും പഞ്ചായത്ത് പ്രസിഡന്‍റും സന്ദർശിച്ചു. വേലി വ്യാപകമായി നശിപ്പിച്ച വാർത്ത കഴിഞ്ഞദിവസം ദീപിക റിപ്പോര്‍ട്ട് ചെയ്തിരുന്നു. ഒരുമാസം മുമ്പ് മാത്രം നിർമിച്ച സോളാർ വേലി ഇരട്ട ലൈൻ ഫെൻസിംഗ് സ്ഥാപിക്കുന്നതിന്‍റെ ഭാഗമായി നശിപ്പിച്ചത് വാർത്തയായതോടെ ഡിഎഫ്ഒ റേഞ്ച് ഓഫീസറോട് റിപ്പോർട്ട് ആവശ്യപ്പെട്ടിരുന്നു. ഇതേ തുടർന്ന് ആറളം വന്യജീവി സങ്കേതം അസിസ്റ്റന്‍റ് വാർഡൻ റേഞ്ച് ഓഫീസർ രമ്യ രാഘവൻ, ആറളം ഗ്രാമപഞ്ചായത്ത് പ്രസിഡന്‍റ് കെ.പി. രാജേഷ്, പഞ്ചായത്ത് അംഗം മിനി ദിനേശൻ, ആർആർടി ഉദ്യോഗസ്ഥർ, കരാറുകാരൻ, അനെർട്ട് ജീവനക്കാർ എന്നിവർ സംഭവസ്ഥലം സന്ദർശിച്ചു. മണ്ണിനടിയിലായ പഴയ സോളാർ വേലിയുടെ ഭാഗങ്ങൾ മുഴുവൻ പുറത്തെടുത്ത് വനം വകുപ്പിനെ ഏല്പിക്കുമെന്നും പുതുതായി നിർമിക്കാൻ ഉദേശിക്കുന്ന ഇരട്ട ലൈൻ ഫെൻസിംഗ് ഒരാഴ്ചയ്ക്കുള്ളിൽ നിർമാണ പൂർത്തിയാക്കി സ്ഥാപിക്കുമെന്നും കരാറുകാരൻ ഗ്രാമപഞ്ചായത്ത് പ്രസിഡൻറിന് ഉറപ്പു നല്കി.

ചോദ്യപേപ്പർ ചോർച്ച: കെഎസ്‌യു, എംഎസ്എഫ് മാർച്ചിൽ സംഘർഷം

കണ്ണൂർ: ചോദ്യപേപ്പർ ചോർച്ചയ്ക്ക് ഉത്തരവാദികളായവരുടെ പേരിൽ നടപടി സ്വീകരിക്കണമെന്നാവശ്യപ്പെട്ട് കെഎസ്‌യു, എംഎസ്എഫ് പ്രവർത്തകർ കണ്ണൂർ യൂണിവേഴ്സിറ്റി മാർച്ചും ഉപരോധവും നടത്തി. യൂണിവേഴ്സിറ്റി ആസ്ഥാനത്തേക്ക് സമരക്കാർ ഇരച്ചുകയറാൻ നടത്തിയ ശ്രമം സംഘർഷത്തിൽ കലാശിച്ചു. ഒരു പോലീസുകാരന് പരിക്കേറ്റു. പരിക്കേറ്റ പോലീസ് ഉദ്യോഗസ്ഥൻ ലിജീഷിനെ ജില്ലാ ആശുപത്രിയിൽ പ്രവേശിപ്പിച്ചു.സമരക്കാരെ പോലീസ് തടഞ്ഞതിനെ തുടർന്ന് സമരക്കാരും പോലീസുമായി ഉന്തും തള്ളുമുണ്ടായി. പോലീസ് ബലം പ്രയോഗിച്ച് സമരക്കാരെ അറസ്റ്റ് ചെയ്തു നീക്കി. കെഎസ്‌യു ഉപരോധം ജില്ലാ പ്രസിഡന്‍റ് എം.സി. അതുൽ ഉദ്ഘാടനം ചെയ്തു. സിൻഡിക്കേറ്റംഗം അശിത് അശോകൻ അധ്യക്ഷത വഹിച്ചു. വൈസ് പ്രസിഡന്‍റ് അർജുൻ കോറോം, കാവ്യ, തീർഥ കുറ്റ്യാട്ടൂർ, അനഘ തുടങ്ങിയവർ നേതൃത്വം നൽകി. എംഎസ്എഫ് നടത്തിയ സമരത്തിനിടെ പോലീസിനെ തള്ളി മാറ്റി യൂണിവേഴ്സിറ്റി ആസ്ഥാനത്തേക്ക് കടക്കാൻ നടത്തിയ ശ്രമം പോലീസ് തടഞ്ഞു. പ്രവർത്തകരും പോലീസും തമ്മിൽ ഉന്തും തള്ളുമുണ്ടായി. ഇവരെ ബലം പ്രയോഗിച്ച് പോലീസ് അറസ്റ്റ് ചെയ്തു നീക്കി. എംഎസ്എഫ് ജില്ലാ ജനറൽ സെക്രട്ടറി കെ.ആർ. റംഷാദ്, യൂനുസ് പടന്നോട്ട്, ഷഹബാസ് തലശേരി, സൽമാൻ പുഴാതി, കെ.വി. ഷൈൻ, ജവാദ് ധർമടം, അജ്നാസ് പുല്ലൂപ്പി തുടങ്ങിയവരുടെ നേതൃത്വത്തിലാണ് സമരം നടത്തിയത്. ടൗൺ സിഐ ശ്രീജിത്ത് കൊടേരി, എസ്ഐ വി.വി. ദീപ്തി എന്നിവരുടെ നേതൃത്വത്തിൽ യൂണിവേഴ്സിറ്റ് ആസ്ഥാനത്ത് വൻ സുരക്ഷയായിരുന്നു ഒരുക്കിയത്.

കൈതപ്രം രാധാകൃഷ്ണന്‍ വധം: സന്തോഷിന് തോക്ക് നല്‍കിയ പ്രതി അറസ്റ്റിൽ

പരിയാരം: കൈതപ്രത്തെ പ്രാദേശിക ബിജെപി നേതാവും ഗുഡ്സ് ഡ്രൈവറുമായ കെ.കെ രാധാകൃഷ്ണനെ വെടിവെച്ചുകൊന്ന കേസില്‍ പ്രതി സന്തോഷിന് തോക്ക് എത്തിച്ച് നല്കിയയാൾ അറസ്റ്റിൽ. പെരുമ്പടവ് അടുക്കത്തെ വെട്ടുപാറ വീട്ടില്‍ സിജോ ജോസഫിനെയാണ്(35) കേസന്വേഷിക്കുന്ന പരിയാരം എസ്എച്ച്ഒ എം.പി.വിനീഷ്‌കുമാര്‍ അറസ്റ്റ് ചെയ്തത്. ഇയാളുടെ കെഎല്‍-60 എ 3401 ആള്‍ട്ടോ കാറും പോലീസ് കസ്റ്റഡിയിലെടുത്തു. കേസിലെ പ്രതി സന്തോഷിന് രാധാകൃഷ്ണനെ വെടിവെച്ചുകൊല്ലാനുള്ള തോക്ക് നല്‍കിയത് സിജോയാണെന്ന് ചോദ്യം ചെയ്യലില്‍ സന്തോഷ് വെളിപ്പെടുത്തിയിരുന്നു.ഇതിന്‍റെ അടിസ്ഥാനത്തില്‍ പോലീസ് നടത്തിയ അന്വേഷണത്തില്‍ സിജോയുടെ കാറിലാണ് തോക്ക് പെരുമ്പടവില്‍ എത്തിച്ചതെന്ന് വ്യക്തമായതിനെതുടർന്നാണ് അറസ്റ്റ് ചെയ്തത്. സന്തോഷ് ഈ തോക്കുമായി ഓട്ടോറിക്ഷയിലാണ് കൈതപ്രത്ത് എത്തി രാധാകൃഷ്ണനെ വെടിവെച്ചു കൊന്നത്. മാര്‍ച്ച് 20 നാണ് രാധാകൃഷ്ണന്‍ പുതുതായി പണിയുന്ന വീടിന് സമീപം വെച്ച് രാത്രി ഏഴോടെ കൊല്ലപ്പെട്ടത്.എസ്ഐ സി.സനീത്, എഎസ്ഐ ചന്ദ്രന്‍, സിപിഒ ഷിബു എന്നിവരും പ്രതിയെ പിടികൂടിയ സംഘത്തില്‍ ഉണ്ടായിരുന്നു.

ഓൺലൈൻ തട്ടിപ്പിൽ 1.41 ലക്ഷം നഷ്ടമായി

കണ്ണൂർ: ജില്ലയിൽ ഓൺലൈൻ തട്ടിപ്പിൽ വിവിധ പരാതികളിലായി 1,41,604 രൂപ നഷ്ടമായി. എഡ്യുക്കേഷൻ സ്ഥാപനത്തിൽ അഡ്മിഷനെടുത്ത് കൊടുത്താൽ ലാഭം ലഭിക്കുമെന്ന് പറഞ്ഞ് വിശ്വസിപ്പിച്ച് ധർമടം സ്വദേശിനിക്ക് 69,288 രൂപ നഷ്ടമായി. വാട്സ് ആപ് വഴി വന്ന ഇവോക എന്ന ഒരു ഓൺലൈൻ എഡ്യുക്കേഷൻ സ്ഥാപനത്തിൽ പുതിയ അഡ്മിഷൻ എടുത്തു നല്കുകയാണെങ്കിൽ ഉയർന്ന ലാഭം ലഭിക്കുമെന്ന് പറഞ്ഞ് വിശ്വസിപ്പിച്ച് ആദ്യം പണം നിക്ഷേപിക്കണമെന്നും അഡ്മിഷൻ എടുത്ത് നല്കുമ്പോൾ പണം തിരികെ നല്കുമെന്ന് പറഞ്ഞായിരുന്നു തട്ടിപ്പ്. ഫേസ്ബുക്ക് വഴി കണ്ട പരസ്യത്തെ തുടർന്ന് ഡ്രോൺ വാങ്ങുന്നതിനായി പണം നിക്ഷേപിച്ച വളപട്ടണത്ത് താമസിച്ച് വരുന്ന അതിഥിതൊഴിലാളിക്ക് 42,318 രൂപ നഷ്ടപ്പെട്ടു. പണം നല്കിയിട്ടും ഓഡർ ചെയ്ത സാധനമോ വാങ്ങിയ പണമോ തിരിച്ച് നല്കാതെ വഞ്ചിച്ചെന്ന് പരാതിയിൽ പറയുന്നു. സുഹൃത്തെന്ന വ്യാജേന വാട്സ് ആപ് വഴി ചാറ്റ് ചെയ്ത് മയ്യിൽ സ്വദേശിയുടെ 15,000 രൂപ തട്ടിയെടുത്തു. വാട്സ് ആപ് വഴി ട്രേഡിംഗ് ചെയ്യാനെന്ന് പറഞ്ഞ് പിണറായി സ്വദേശിയുടെ 14,998 രൂപ തട്ടിയെടുത്തതായി പരാതി. ട്രേഡിംഗ് ചെയ്ത് ഉയർന്ന ലാഭമുണ്ടാക്കാൻ എഐ സോഫ്റ്റ്‌വെയർ വാങ്ങണമെന്ന് പറഞ്ഞ് വിശ്വസിപ്പിച്ച് പണം തട്ടിയെന്നായിരുന്നു പരാതി.

നിരോധിത പുകയില ഉത്പന്നങ്ങളുമായി രണ്ടുപേർ പിടിയിൽ

കണ്ണൂർ: വില്പനയ്ക്കായി എത്തിച്ച നിരോധിത പുകയില ഉത്പന്നങ്ങളുമായി ഇതരസംസ്ഥാന തൊഴിലാളിയടക്കം രണ്ട് പേരെ കണ്ണൂർ ടൗൺ പോലീസ് പിടികൂടി. കണ്ണൂർ റെയിൽവേ സ്റ്റേഷന് സമീപത്ത് നിന്നും ഉത്തർപ്രദേശ് സ്വദേശിയായ ജാൻഗലി(38), അത്താഴകുന്നിൽ നിന്നും കൊറ്റാളി സ്വദേശി പി.പി. അബ്ദുൾ ജലീലിനെയുമാണ്(36) പോലീസ് പിടികൂടിയത്. കഴിഞ്ഞ ദിവസം പുലർച്ചെ കണ്ണൂർ നഗരത്തിലും, കക്കാട്, പുല്ലൂപ്പി കടവ് ഭാഗങ്ങളിൽ പോലീസ് നൈറ്റ് പട്രോളിഗ് നടത്തിവരവെ സംശയാസ്പദമായി കണ്ടതിനെ തുടർന്ന് പരിശോധിച്ചപ്പോഴാണ് നിരോധിത പുകയില ഉത്പന്നങ്ങൾ പിടികൂടിയത്. വില്പനയ്ക്കായി കൊണ്ടുവന്നതാണ് ഇവയെന്ന് ഇരുവരും പോലീസിനോട് പറഞ്ഞു.

ചേംബർ സെവൻസ് സ്വർണക്കപ്പ് 21 മുതൽ കണ്ണൂരിൽ

കണ്ണൂർ: നോർത്ത് മലബാർ ചേംബർ ഓഫ് കൊമേഴ്സ് മൂന്നാമത് സെവൻസ് സ്വർണക്കപ്പ് ഫുട്ബോ ൾ ടൂർണമെന്‍റ് 21 മുതൽ 28 വരെ നടക്കും. കണ്ണൂർ പോലീസ് ടർഫ് ഗ്രൗണ്ടിൽ 21ന് വൈകുന്നേരം ആറിന് സിറ്റി പോലീസ് കമ്മീഷണർ പി. നിധിൻ രാജ് ഉദ്ഘാടനം ചെയ്യുമെന്ന് പ്രസിഡന്‍റ് ടി.കെ. രമേഷ് കുമാർ പത്രസമ്മേളനത്തിൽ അറിയിച്ചു. ഉദ്ഘാടന മത്സരത്തിൽ നിക്‌‌ഷാൻ ഇലക്‌ട്രോണിക്സ് കണ്ണൂർ-എബിസി സെയിൽ കോർപറേഷൻ കണ്ണൂരിനെ നേരിടും. തുടർന്നുള്ള മത്സരങ്ങളിൽ കോളേജ് ഓഫ് കൊമെഴ്സ്, മരിയഗ്രൂപ്പ്, ടോപ് കൺസ്ട്രക്‌ഷൻ, ഇരിട്ടി, ഡയമണ്ട് പെയിന്‍റ്സ്, മലബാർ ഗോൾഡ്, കെ.എൽ. അബ്ദുൾ സത്താർ തുടങ്ങിയ ടീമുകൾ മാറ്റുരയ്ക്കും. ഉദ്ഘാടന പരിപാടിയിൽ ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ, നിക്‌ഷാൻ ഇലക്‌ട്രോണിക്സ് എംഡി എം.എം.വി. മൊയ്തു, മുൻ സന്തോഷ് ട്രോഫി താരം ബിനീഷ് കിരൺ എന്നിവർ മുഖ്യാതിഥികളായിരിക്കും.

സ്വകാര്യ ബസിന് പിന്നിൽ മറ്റൊരു ബസിടിച്ച് ആറുപേർക്ക് പരിക്ക്

മട്ടന്നൂർ: ഉളിയിൽ പാലത്തിനു സമീപം സ്വകാര്യ ബസിന് പിന്നിൽ മറ്റൊരു ബസിടിച്ച് അപകടം. ബസ് യാത്രക്കാരായ ആറുപേർക്ക് പരിക്കേറ്റു. ഇന്നലെ രാവിലെ പത്തോടെയായിരുന്നു അപകടം. മട്ടന്നൂർ ഭാഗത്ത് നിന്ന് ഇരിട്ടി ഭാഗത്തേക്ക് പോകുകയായിരുന്ന ബസുകളാണ് അപകടത്തിൽപ്പെട്ടത്. തലശേരിയിൽ നിന്ന് ഇരിട്ടിയിലേക്ക് പോകുകയായിരുന്ന ആസ്റ്റോറിയോ ബസിന് പിന്നിൽ കണ്ണൂരിൽ നിന്ന് ഇരിട്ടിയിലേക്ക് പോകുകയായിരുന്ന ഹരിശ്രീ ബസിടിക്കുകയായിരുന്നു. ഇരു ബസുകളിലെയും യാത്രക്കാരായ ആറുപേർക്കാണ് പരിക്കേറ്റത്. ഇവർ വിവിധ ആശുപത്രികളിൽ ചികിത്സ തേടി. മത്സരയോട്ടമാണ് ബസുകൾ അപകടത്തിന് കാരണമെന്ന് പറഞ്ഞ് നാട്ടുകാർ പ്രതിഷേധിച്ചു.മട്ടന്നൂർ സിഐ എം. അനിൽ സ്ഥലത്തെത്തി ബസുകളിലെ ഡ്രൈവർമാർക്കെതിരേ കർശന നടപടി സ്വീകരിക്കുമെന്ന് പറഞ്ഞതോടെയാണ് നാട്ടുകാർ പിരിഞ്ഞുപോയത്. അപകടത്തെ തുടർന്ന് അരമണിക്കൂറോളം റോഡിൽ ഗതാഗതം തടസപ്പെട്ടു. പഴയ പാലത്തിലൂടെ വാഹനങ്ങൾ കടത്തിവിട്ടാണ് ഗതാഗതം നിയന്ത്രിച്ചത്. പോലീസ് അപകടത്തിൽപ്പെട്ട വാഹനങ്ങൾ റോഡിൽ നിന്ന് നീക്കം ചെയ്താണ് ഗതാഗതം പുനഃസ്ഥാപിച്ചത്. വാഹനങ്ങളുടെ അമിത വേഗതയും മത്സരയോട്ടവും കാരണം നിരവധി അപകടങ്ങളാണ് ഉളിയിൽ പാലത്തിന് സമീപം നടന്നത്. അടുത്തകാലത്തുണ്ടായ അപകടത്തിൽ ഏഴോളം പേർ മരിക്കുകയും നിരവധി പേർക്ക് പരിക്കേൽക്കുകയും ചെയ്തിരുന്നു. അപകടം പതിവായ സ്ഥലത്ത് വേഗത കുറയ്ക്കാനുള്ള ബോർഡുകൾ സ്ഥാപിക്കണമെന്ന് നാട്ടുകാർ പറഞ്ഞു.

ആനപ്പന്തി കരുണാമയനായ ഈശോയുടെ പള്ളിയിൽ തിരുനാൾ

ആനപ്പന്തി: ആനപ്പന്തി കരുണാമയനായ ഈശോയുടെ പള്ളിയിൽ തിരുനാളിന് തു‌ടക്കമായി. ഇടവക വികാരി ഫാ. ബിജു തേലേക്കാട്ട് കൊടിയേറ്റി. ഇന്ന് രാവിലെ 7.30ന് വിശുദ്ധ കുർബാന, വചനസന്ദേശം, നൊവേന. 21 മുതൽ 25 വരെ വൈകുന്നേരം 4.30ന് വിശുദ്ധ കുർബാന, വചനസന്ദേശം, നൊവേന. 26ന് വൈകുന്നേരം നാലിന് ആഘോഷമായ റാസ കുർബാന, നൊവേന. 27ന് രാവിലെ 9.30ന് ആഘോഷമായ തിരുനാൾ പാട്ടുകുർബാന, നൊവേന, പ്രദിക്ഷിണം, സമാപനാശീർവാദം. വിവിധ ദിവസങ്ങളിലായുള്ള തിരുനാൾ കർമങ്ങൾക്ക് ഫാ. ഫിഡൽ തച്ചിൽ, ഫാ. എൻ.എം. തോമസ് (ഡോൺ ബോസ്കോ കോളജ് അങ്ങാടിക്കടവ്), ഫാ. കുര്യാക്കോസ് കളരിക്കൽ, ഫാ. തോമസ് വടക്കേമുറി, ഫാ. തോമസ് കിടാരത്തിൽ, ഫാ. ഫ്രാൻസിസ് റാത്തപ്പള്ളിൽ, ഫാ. അഭിലാഷ് ചെല്ലംകോട്ട്, ഫാ. മാത്യു കുന്നേൽ, ഫാ. തോമസ് മേനപ്പാട്ടുപടിക്കൽ, ഫാ. മാത്യു വലിയപറമ്പിൽ എന്നിവർ കാർമികത്വം വഹിക്കും.

പരിഷ്കരണം പുതിയതെരുവിനെ ഗ്രീൻ സോണാക്കി: ട്രാഫിക് റഗുലേറ്ററി കമ്മിറ്റി

കണ്ണൂർ: പാപ്പിനിശേരി-വളപട്ടണം-പുതിയതെരു ഗതാഗത പരിഷ്‌കരണം റെഡ് സോണിലായിരുന്ന പുതിയതെരുവിനെ ഗ്രീൻ സോണാക്കി മാറ്റിയെന്ന് സംസ്ഥാന ട്രാഫിക് റഗുലേറ്ററി കമ്മിറ്റി. ഈ സാഹചര്യത്തിൽ നടപ്പിൽ വരുത്തിയ പരിഷ്കരണം തുടരാനും നിയമലംഘനത്തിനെതിരെ കർശന നടപടി സ്വീകരിക്കാനും കെ.വി. സുമേഷ് എംഎൽഎയുടെയും എഡിഎം പദ്മചന്ദ്രക്കുറുപ്പിന്‍റെയും സാന്നിധ്യത്തിൽ കളക്ടറേറ്റിൽ ചേർന്ന അവലോകന യോഗം തീരുമാനിച്ചു. ഇതു സംബന്ധിച്ച് പോലീസിനും ആർടിഒയ്ക്കും യോഗം നിർദേശം നൽകി. ജില്ലയിൽ തന്നെ ഏറെ ഉപകാരപ്രദമായ ഗതാഗത പരിഷ്‌കരണമാണി ഇവിടെ നടപ്പാക്കിയതെന്ന് യോഗം വിലയിരുത്തി. മാഗ്നറ്റ് ഹോട്ടലിനു മുന്നിലെ കണ്ണൂർ, തളിപ്പറമ്പ് ഭാഗത്തേക്ക് ഇരു ബസ്സ്റ്റോപ്പുകളിലും ബസുകൾ റോഡിന്‍റെ മധ്യത്തിൽ നിർത്തുന്നതും പാപ്പിനിശേരി-പഴയങ്ങാടി ജംഗ്ഷനിൽ ട്രാഫിക് ലംഘിച്ച് സ്വകാര്യ വാഹനങ്ങൾ എതിർ വശത്തേക്ക് കയറുന്നതും ശ്രദ്ധയിൽ പെട്ടിട്ടുണ്ട്. ഇത് കുരുക്കിനിടയാക്കുന്ന സാഹചര്യത്തിലാണ് നിയമലംഘനത്തിനെതിരെ കർശന നടപടി സ്വീകരിക്കാൻ തീരുമാനിച്ചത്. പരിഷ്കരണം നടപ്പാക്കുന്നതിന് മുന്പ് ഒരു മിനിറ്റിൽ 62 വാഹനങ്ങൾ കടന്നുപോയിരുന്ന സ്ഥാനത്ത് 86 വാഹനങ്ങൾ കടന്നു പോകുന്നുണ്ട്. ടാങ്കർ ലോറികളും ചരക്ക് വാഹനങ്ങളും കടന്നുപോകുന്നതിനാൽ വൈകുന്നേരങ്ങളിൽ ചുങ്കം മേഖലയിലും പുതിയതെരു വില്ലേജ് ഓഫീസിനു മുന്നിലും ചില സമയങ്ങളിൽ വാഹന തിരക്ക് അനുഭവപ്പെടുന്നുണ്ട്. ഇത് പരിഹരിക്കുന്നതിനായി പുതിയതെരുവിൽ ഹോട്ടൽ മാഗ്നറ്റിന്‍റെ മുൻവശത്ത് കണ്ണൂർ ഭാഗത്തേക്കും തളിപ്പറമ്പ് ഭാഗത്തേക്കും പോകുന്ന ബസുകൾ റോഡിന് നടുവിൽ നിർത്തുന്നത് ഒഴിവാക്കാനും മറ്റു വാഹനങ്ങൾക്ക് കടന്നുപോകാനുള്ള സൗകര്യം ഒരുക്കുന്നതിനും പ്രത്യേകമായി പോലീസിനെ നിയോഗിക്കാൻ യോഗം തീരുമാനിച്ചു. ഗതാഗത പരിഷ്‌കരണം ലംഘിക്കുന്നവർക്കെതിരെ കർശനമായ നിയമനടപടികൾ സ്വീകരിക്കാൻ ആർടിഒ എൻഫോഴ്സ്‌മെന്‍റിനും പോലീസിനും നിർദേശം നൽകി. വില്ലേജ് ഓഫീസിനു മുൻവശത്ത് ബസ് ബേ നിർമാണം വേഗതയിലാക്കാൻ കെഎസ്ഇബി ക്കും വിശ്വസമുദ്രയുടെ എൻജിനിയറിംഗ് വിഭാഗത്തിനും കത്ത് നൽകും. യോഗത്തിൽ ചിറക്കൽ പഞ്ചായത്ത് പ്രസിഡന്‍റ് പി. ശ്രുതി, വളപട്ടണം സിഐ ടി.പി. സുമേഷ്, ആർടിഒ ഉണ്ണികൃഷ്ണൻ, ദേശീയപാത അഥോറിറ്റി പ്രതിനിധികൾ, വിശ്വസമുദ്ര പ്രതിനിധികൾ തുടങ്ങിയവർ പങ്കെടുത്തു.

ജീവകാരുണ്യ പ്രവർത്തനവുമായി ജനമൈത്രി പോലീസ്

ഇരിട്ടി: കണ്ണൂർ ജില്ലാ റൂറൽ പോലീസിന്‍റെ നേതൃത്വത്തിൽ ആറളം ഫാം പുനരധിവാസ മേഖലയിൽ ജീവകാരുണ്യ പ്രവർത്തനങ്ങളുമായി ജനമൈത്രി പോലീസ്. ആറളം ജനമൈത്രി പോലീസിന്‍റെ നേതൃത്വത്തിൽ മാതൃകാപരമായ പ്രവർത്തങ്ങളാണ് ആറളം ആദിവാസി പുനരധിവാസ മേഖലയിലും പോലീസ് പരിധിയിലെ പട്ടികവർഗ സങ്കേതങ്ങളിലും ദരിദ്ര ജനവിഭാഗങ്ങൾക്കിടയിലും നടപ്പാക്കി വരുന്നത്. അതിനൊപ്പമാണു ജില്ലാ റൂറൽ പോലീസിന്‍റെ നേതൃത്വത്തിൽ ജീവകാരുണ്യ പ്രവർത്തനങ്ങൾ ഏറ്റെടുത്ത് നടപ്പാക്കുന്നത്. ഇത്തവണ പുനരധിവാസ മേഖലയിലെ ദരിദ്രരായ 12 ആളുകൾക്ക് കട്ടിലും അഞ്ച് ആളുകൾക്ക് വീൽ ചെയറും വിതരണം ചെയ്തു. മേഖലയിൽ പിഎസ്‌സി പരീക്ഷയ്ക്ക് തയാറെടുക്കുന്നവർക്ക് പി‌എസ് സി പരീക്ഷാ പഠനോപകരണങ്ങളും വിതരണം ചെയ്താണ് ജനമൈത്രി പോലീസ് മാതൃകയായത്. ആറളം ജനമൈത്രി പോലീസിന്‍റെ നേതൃത്വത്തിൽ നടപ്പാക്കുന്ന മറ്റൊരു മാതൃകാപരമായ പദ്ധതിയിലൂടെ തത്പരരായ 250 അധികം ആളുകൾക്ക് ഡ്രൈവിംഗ് പരിശീലനം നൽകിവരുന്നുണ്ട്. കട്ടിൽ, വീൽ ചെയർ, പഠനോപകരണങ്ങൾ എന്നിവയുടെ വിതരണോദ്ഘാടനം ആറളംഫാം ഹയർ സെക്കൻഡറി സ്കൂൾ പരിസരത്ത് ജില്ലാ റൂറൽ പോലീസ് മേധാവി അനൂജ് പലിവാൾ നിർവഹിച്ചു. ഇരിട്ടി സബ് ഡിവിഷണൽ ഡിവൈഎസ്പി ധനഞ്ജയ ബാബു ചടങ്ങിൽ അധ്യക്ഷ വഹിച്ചു. കരിക്കോട്ടക്കരി പോലീസ് ഇൻസ്പെക്ടർ കെ.ജെ. ബിനോയ്, എസ്ഐമാരായ റെജികുമാർ, റഷീദ്, വിനയകുമാർ എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]