സിഎ വിദ്യാര്‍ഥിയുടെ തിരോധാനം: അന്വേഷണത്തിന് പ്രത്യേക സംഘം
Tuesday, December 3, 2024 1:49 AM IST
കൊച്ചി: പള്ളുരുത്തി സ്വദേശിയായ സിഎ വിദ്യാര്‍ഥി ആദം ജോയുടെ തിരോധാനം സംബന്ധിച്ച് അന്വേഷിക്കാനായി കൊച്ചി സിറ്റി ഡെപ്യൂട്ടി കമ്മീഷണറുടെ നേതൃത്വത്തില്‍ 13 അംഗ പ്രത്യേക സംഘത്തെ നിയോഗിച്ചതായി സര്‍ക്കാര്‍ ഹൈക്കോടതിയെ അറിയിച്ചു.
എസ്പി റാങ്കില്‍ കുറയാത്ത ഓഫീസറുടെ നേതൃത്വത്തില്‍ പ്രത്യേക അന്വേഷണ സംഘത്തിന് രൂപം നല്കാന്‍ ജസ്റ്റീസ് ദേവന്‍ രാമചന്ദ്രന്‍, ജസ്റ്റീസ് എം.ബി. സ്‌നേഹലത എന്നിവരടങ്ങുന്ന ഡിവിഷന്‍ ബെഞ്ച് എറണാകുളം സിറ്റി പോലീസ് കമ്മീഷണര്‍ക്ക് നിര്‍ദേശം നല്‍കിയിരുന്നു.
പോലീസ് അന്വേഷിച്ചിട്ടും കണ്ടെത്താനാകാത്ത സാഹചര്യം ചൂണ്ടിക്കാട്ടി ആദം ജോയുടെ പിതാവ് കെ.ജെ. ആന്‍റണി നല്‍കിയ ഹര്‍ജിയാണ് കോടതി പരിഗണിച്ചത്.
ജൂലൈ 27നാണ് ആദം ജോയെ കാണാതായത്. കൊച്ചിന്‍ ഷിപ്പ‌്‌യാ‍ർഡ് വരെ സൈക്കിള്‍ ചവിട്ടി എത്തിയതിന്‍റെ സിസി ടിവി ദൃശ്യങ്ങള്‍ പോലീസ് അന്വേഷണത്തില്‍ കണ്ടെത്തിയിരുന്നു. ഹര്‍ജി വീണ്ടും 19ന് പരിഗണിക്കും.