സ്‌കൂള്‍ ഉച്ചഭക്ഷണ വിതരണം വീണ്ടും പ്രതിസന്ധിയില്‍
Tuesday, December 3, 2024 1:49 AM IST
കൊച്ചി: സംസ്ഥാനത്തെ സ്‌കൂളുകള്‍ക്ക് ഉച്ചഭക്ഷണ പദ്ധതിയുടെ ചെലവിനത്തില്‍ ലഭിക്കേണ്ട രണ്ടര മാസത്തെ തുക ഇനിയും ലഭിക്കാത്തതിനെത്തുടര്‍ന്ന് സ്‌കൂള്‍ ഉച്ചഭക്ഷണ വിതരണം വീണ്ടും പ്രതിസന്ധിയില്‍. കേന്ദ്രവിഹിതമായ 60 ശതമാനം തുക ഇതുവരെ നല്‍കിയിട്ടില്ല.
സംസ്ഥാന സര്‍ക്കാര്‍ ഇതുവരെയുള്ള യൂട്ടിലൈസേഷന്‍ സര്‍ട്ടിഫിക്കറ്റ് കൊടുക്കുകയോ കണക്കുകള്‍ സമര്‍പ്പിക്കുകയോ ചെയ്യാത്തതിനാലാണു കേന്ദ്രം തുക അനുവദിക്കാത്തത് എന്നാണ് അറിവ്.
സംസ്ഥാന സര്‍ക്കാര്‍ പദ്ധതിയായ മുട്ട, പാല്‍ വിതരണത്തിനുള്ള ഫണ്ടും ഒക്ടോബര്‍ മുതല്‍ നല്‍കിയിട്ടില്ല. സഹാധ്യാപകരില്‍നിന്നു കടം വാങ്ങിയും സ്വര്‍ണാഭരണങ്ങള്‍ ബാങ്കില്‍ പണയംവച്ചും മറ്റുമാണു പ്രധാനാധ്യാപകര്‍ ചെലവിനുള്ള തുക കണ്ടെത്തുന്നത്.
പ്രധാനാധ്യാപകരെ സ്‌കൂള്‍ ഉച്ചഭക്ഷണ പദ്ധതിയുടെ ചുമതലയില്‍നിന്ന് ഒഴിവാക്കണമെന്നാവശ്യപ്പെട്ട് കേരള പ്രൈവറ്റ് പ്രൈമറി ഹെഡ്മാസ്‌റ്റേഴ്‌സ് അസോസിയേഷന്‍ ഫയല്‍ ചെയ്ത കേസിന്‍റെ അന്തിമ വിചാരണ നാളെ തുടങ്ങും. കഴിഞ്ഞ മാസം 26നു വാദം നടക്കേണ്ടിയിരുന്ന കേസ് സംസ്ഥാന സര്‍ക്കാരിന്‍റെ ആവശ്യപ്രകാരമാണു മാറ്റിയത്.
ഓഗസ്റ്റ് വരെയുള്ള ഉച്ചഭക്ഷണം, മുട്ട, പാല്‍ എന്നിവയ്ക്കുള്ള ഫണ്ട് കോടതിയുടെ കര്‍ശന ഇടപെടല്‍ മൂലം സ്‌കൂളുകള്‍ക്കു വിതരണം ചെയ്തിരുന്നു. എന്നാല്‍ ഉച്ചഭക്ഷണത്തിനുള്ള സെപ്റ്റംബറിലെ സംസ്ഥാന വിഹിതമായ 40 ശതമാനം തുക മാത്രമാണു സ്‌കൂളുകള്‍ക്കു നല്‍കിയത്.
കോടതി ഓരോ തവണയും കേസ് പരിഗണിക്കുന്നതിനു തൊട്ടുമുന്‍പ് മാത്രമാണ് സര്‍ക്കാര്‍ തുക അനുവദിക്കുന്നതെന്നും സ്‌കൂള്‍ ഉച്ചഭക്ഷണപദ്ധതി പ്രധാനാധ്യാപകര്‍ക്കു തികഞ്ഞ ബാധ്യതയായി മാറിക്കൊണ്ടിരിക്കുകയാണെന്നും കെപിപിഎച്ച്എ സംസ്ഥാന ജനറല്‍ സെക്രട്ടറി ജി. സുനില്‍കുമാര്‍, പ്രസിഡന്‍റ് പി. കൃഷ്ണപ്രസാദ് എന്നിവര്‍ പറഞ്ഞു.