നെന്മാറ: പാലക്കാട് നിയോജകമണ്ഡലത്തിലെ എൽഡിഎഫ് സ്ഥാനാർഥി ഡോ. പി. സരിനെ പിന്തുണച്ച് സാമൂഹിക മാധ്യമ പോസ്റ്റ് ഇട്ട യൂത്ത് കോൺഗ്രസ് നെന്മാറ നിയോജകമണ്ഡലം സെക്രട്ടറി ശ്രീജിത്ത് ബാബു (28) വിന് മർദനമേറ്റു. ഇന്നലെ രാവിലെ 8.30ന് അയിലൂർ ചേവക്കുളത്തുള്ള കളരിക്കൽ വീട്ടിൽ നിന്നും ജോലിക്ക് പുറത്തു പോകുമ്പോഴാണ് ഇരുചക്രവാഹനം തടഞ്ഞുനിർത്തി കോൺഗ്രസ് പ്രവർത്തകരായ നെന്മാറ ചേരുംകാട് സ്വദേശി സുരേഷ് വാസു (30) കരിങ്കുളം സ്വദേശി ബേസിൽ(28) എന്നിവർ ചേർന്ന് തലയ്ക്കും കൈയ്ക്കും തോളത്തും മർദിച്ച് പരിക്കേൽപ്പിച്ചതെന്നാണ് പരാതി. ശ്രീജിത്ത് ബാബു നെന്മാറ സാമൂഹികാരോഗ്യ കേന്ദ്രത്തിൽ ചികിത്സ തേടുകയും നെന്മാറ പോലീസിൽ പരാതി നൽകുകയും ചെയ്തു. പോലീസ് സുരേഷ് വാസു, ബേസിൽ എന്നിവർക്കെതിരെ കേസെടുത്തു.