പാലക്കാട്: ചാക്കോളാസ് ഗോൾഡ് ട്രോഫി കരസ്ഥമാക്കി പാലക്കാട് ടാലന്റ് ഫുട്ബോൾ അക്കാദമി ഉജ്വല വിജയം നേടി. അണ്ടർ 17 ൽ ആകെ നടത്തിയ 112 മത്സരങ്ങളിൽ നിന്നും ഫൈനലിലെത്തിയ എ.സി മിലൻ അക്കാദമി കോഴിക്കോടും, ടാലന്റ് ഫുട്ബോൾ അക്കാദമി പാലക്കാടും തമ്മിൽ വടക്കഞ്ചേരിയിലെ ടിഎംകെ സ്പോർട്സ് അരീനയിൽ നടന്ന കലാശപോരാട്ടത്തിൽ ഒന്നിനെതിരെ രണ്ടു ഗോളുകൾക്കാണ് ടാലന്റ് അക്കാദമിയുടെ വിജയം.
ട്രോഫി കരസ്ഥമാക്കിയ ടീമിന്റെ വിജയശിൽപികൾ ടെക്നിക്കൽ ഡയറക്ടർ പി.കെ. രാജീവ്, ടീം മാനേജർ സി.സി. പയസ്, ചീഫ് കോച്ച് ദേവൻ തുടങ്ങിയവരായിരുന്നു. ആലപ്പുഴ, എറണാകുളം, തൃശൂർ, പാലക്കാട്, മലപ്പുറം, കോഴിക്കോട് കണ്ണൂർ എന്നീ ജില്ലകളിലാണ് പ്രാഥമിക റൗണ്ട് മത്സരം നടന്നത്. അണ്ടർ 13 മുതൽ 17 വരെ 5 വിഭാഗങ്ങളിലായി നടത്തിയ മത്സരങ്ങളിൽ 832 കളികളിലായി 3659 കളിക്കാർ പങ്കെടുത്തു. പ്രമുഖ പ്ലൈവുഡ് വ്യാപാരിയും സാമൂഹ്യ പ്രവർത്തകനുമായ നിഖിൽ കൊടിയത്തൂർ സംഘടനയുടെ ഇപ്പോഴത്തെ പ്രസിഡന്റും സന്തോഷ് ട്രോഫി ടീമിന്റെ മുൻ കോച്ചും പ്രമുഖ പരിശീലകനുമായ പി.കെ. രാജീവ് സെക്രട്ടറിയുമാണ്.