പൊറത്തുച്ചിറ മാലിന്യപ്രശ്‌നം : ഉദ്യോഗസ്ഥന്റെ മറുപടിയെച്ചൊല്ലി ഭരണപ്രതിപക്ഷ വാഗ്വാദം
1489868
Wednesday, December 25, 2024 12:53 AM IST
ഇരിങ്ങാലക്കുട: മാലിന്യ പ്രശ്‌നത്തക്കുറിച്ചുള്ള ചര്‍ച്ചയ്ക്കിടയില്‍ ഉദ്യോഗസ്ഥന് നല്‍കിയ മറുപടിയെച്ചൊല്ലി പ്രതിപക്ഷം നടത്തിയ പ്രതിഷേധം ഭരണപ്രതിപക്ഷ അംഗ ങ്ങള്‍ തമ്മിലുള്ള വാക്കേറ്റത്തില്‍ കലാശിച്ചു. പൊറത്തൂച്ചിറയിലെ മാലിന്യപ്രശ്‌നക്കുറിച്ച് വിശദീകരണം ആവശ്യപ്പെട്ട എല്‍ഡിഎഫ് കൗണ്‍സിലര്‍ സി.സി. ഷിബിനോട് ഫയല്‍ നോക്കിയിട്ട് പറയാമെന്ന ആരോഗ്യ വിഭാഗം ഉദ്യോഗസ്ഥന് നല്‍കിയ മറുപടിയാണു പ്രതിപക്ഷത്തിന്‍റെ എതിര്‍പ്പിനു കാരണമായത്.
ഉദ്യോഗസ്ഥര് പ്രമാണി ചമയുകയാണെന്നും അനുവദിക്കാന്‍ കഴിയില്ലെന്നും എല്‍ഡിഎഫ് അംഗങ്ങളായ അഡ്വ. കെ.ആര്‍. വിജയ, സി.സി. ഷിബിന്‍ എന്നിവര്‍ വിമര്‍ശിച്ചു.
എന്നാല്‍ മാലിന്യ പ്രശ്‌നം അജൻഡയില്‍ ഇല്ലാത്തതാണെന്നും ആരോഗ്യ വിഭാഗം സൂപ്പർവൈസറുടെ അഭാവത്തില്‍ എത്തിയ ഉദ്യോഗസ്ഥനു വിഷയം അറിയണമെന്നില്ലെന്നും ജീവനക്കാരെ പേടിപ്പിക്കരുതെന്നും യുഡിഎഫ് അംഗങ്ങളായ എം.ആര്‍. ഷാജു, ബിജു പോള്‍ എന്നിവര്‍ പറഞ്ഞു. മാലിന്യ പ്രശ്‌നവുമായി ബന്ധപ്പെട്ട് പരാതി കിട്ടിയിട്ടുണ്ടെന്നും നടപടികള്‍ സ്വീകരിച്ചുവരുന്നുണ്ടെന്നും ചെയര്‍പേഴ്‌സണ്‍ അറിയിച്ചു.
മാസങ്ങള്‍ക്കുമുമ്പ് ഉദ്ഘാടനം നടത്തിയ ഷീ ലോഡ്ജിന്‍റെ ബൈലോയ്ക്ക് കൗണ്‍സില്‍ അംഗീകാരം നല്‍കി. ഷീ ലോഡ്ജ് ഇനിയും തുറന്നുകൊടുക്കാന്‍ കഴിയാത്തതു ഭരണസമിതിയുടെ വീഴ്ചയാണെന്ന് എല്‍ഡിഎഫ് അംഗങ്ങള്‍ വിമര്‍ശിച്ചു.
പണിപൂര്‍ത്തിയാകാതെ ഉദ്ഘാടനം നടത്തരുതെന്ന് നേരത്തെ ആവശ്യപ്പെട്ടിരുന്നതാണെന്ന് ബിജെപി അംഗം സന്തോഷ് ബോബനും പറഞ്ഞു. ഷീ ലോഡ്ജ് കെട്ടിടത്തിന് നമ്പര്‍ ഇട്ടുകഴിഞ്ഞെന്നും വാട്ടര്‍ അഥോറിറ്റി കണക്ഷനും ഫയര്‍ ആന്‍ഡ് സേഫ്റ്റി അനുമതിയും മാത്രമേ ബാക്കിയുള്ളൂവെന്നും ലേലനടപടികള്‍ ഫെബ്രുവരിയില്‍ സ്വീകരിക്കുമെന്നും ചെയര്‍പേഴ്‌സണ്‍ വിശദീകരിച്ചു.
നഗരസഭയുടെ ആറാം വാര്‍ഡിലുള്ള പൈക്കാടം ലിഫ്റ്റ് ഇറിഗേഷന്‍ പദ്ധതിയുടെ ഗുണഭോക്തൃസമിതിക്ക് യോഗം അംഗീകാരം നല്‍കി. ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു.