കണമലയിൽ ബസ് മറിഞ്ഞ് അപകടം: തെലുങ്കാന സ്വദേശി മരിച്ചു

കണമല: ശബരിമല പാതയിലെ അതീവ അപകട മേഖലയായ കണമല ഇറക്കത്തിലെ അട്ടിവളവിൽ അയ്യപ്പഭക്തരുമായി വന്ന ബസ് മറിഞ്ഞ് അപകടം. ഗുരുതരമായി പരിക്കേറ്റ ബസ് ഡ്രൈവർ തെലുങ്കാന സ്വദേശി രാജു മരിച്ചു. തീർഥാടകർ കാര്യമായ പരിക്കുകളില്ലാതെ രക്ഷപ്പെട്ടു. ഒരു തീർഥാടകന് കാലിൽ ഒടിവുണ്ട്.

ബസ് ക്രാഷ് ബാരിയറിൽ തട്ടി നിന്നതിനാൽ വൻ അപകടം ഒഴിവായി. പോലീസും ഫയർഫോഴ്സും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്. ഇന്നലെ രാവിലെ അഞ്ചിനായിരുന്നു അപകടം. തെലുങ്കാന സ്വദേശികളും ശബരിമല തീർഥാടകരുമായ 29 പേരാണ് ബസിലുണ്ടായിരുന്നത്. ഡ്രൈവറുടെ മൃതദേഹം പാമ്പാടി ഗവ. ആശുപത്രിയിൽ. ക്രെയിൻ യൂണിറ്റ് ഉപയോഗിച്ച് ബസ് ഉയർത്തി മാറ്റി.

അമിതവേഗം
വിനയായി

കണമല ഇറക്കത്തിൽ ബസ് മറിഞ്ഞ് ഡ്രൈവർ മരിക്കാനിടയായത് അമിതവേഗം മൂലമെന്ന് ബസിലെ തീർഥാടകർ പോലീസിനോട് പറഞ്ഞു. ബസിന്‍റെ പ്രധാന ഡ്രൈവർ ആണ് അപകടത്തിൽ മരിച്ചത്. അപകട സമയത്ത് ബസ് ഡ്രൈവ് ചെയ്തത് രണ്ടാമത്തെ ഡ്രൈവർ ആയിരുന്നു. കണമല ഇറക്കം ആരംഭിക്കുന്ന മാക്കൽ കവലയിലെ ചെക്ക് പോസ്റ്റിൽ ഈ ബസ് തടഞ്ഞുനിർത്തി ഡ്രൈവർ രാജുവിന് ചുക്കുകാപ്പി നൽകിയിരുന്നെന്ന് പോലീസ് പറയുന്നു.

കാപ്പി കുടിച്ച ശേഷം രണ്ടാമത്തെ ഡ്രൈവർ ആണ് ബസ് ഡ്രൈവ് ചെയ്തത്. ഈ സമയം രാജു ഉറങ്ങാനുള്ള ശ്രമത്തിലായിരുന്നു. സമയം വൈകിയത് മൂലം ശബരിമലയിൽ എത്താൻ താമസിക്കുമെന്ന് പറഞ്ഞ് രണ്ടാമത്തെ ഡ്രൈവർ വേഗത കൂട്ടി ഇറക്കത്തിൽ ഡ്രൈവ് ചെയ്‌തെന്നും ഇത് തീർഥാടകർ എതിർത്തിട്ടും ഡ്രൈവർ വഴങ്ങിയില്ലന്നും പറയുന്നു.

അട്ടി വളവിൽ എത്തിയപ്പോൾ ബസിന്‍റെ എയർ ബ്രേക്ക്‌ സംവിധാനം പ്രവർത്തനരഹിതമായി വളവിൽ തിരിയാനാകാതെ നിയന്ത്രണം തെറ്റി ക്രാഷ് ബാരിയറിൽ ഇടിച്ചു മറുവശത്തുള്ള മരങ്ങളിൽ തങ്ങിനിന്നെന്ന് ബസ് പരിശോധിച്ച മോട്ടോർ വാഹന വകുപ്പ് ഉദ്യോഗസ്ഥർ അറിയിച്ചു. രണ്ടാമത്തെ ഡ്രൈവർക്കെതിരേ കേസെടുത്തെന്ന് എരുമേലി പോലീസ് അറിയിച്ചു. അപകടത്തിനു ശേഷം ബസിൽനിന്ന് പുറത്തിറങ്ങിയ അയ്യപ്പ ഭക്തർ ഈ ഡ്രൈവറെ കൈയേറ്റം ചെയ്തിരുന്നു.

നിയന്ത്രണം കർക്കശമാക്കും

കണമല ഇറക്കത്തിൽ രാത്രിയിലും പുലർച്ചെയും വലിയ വാഹനങ്ങൾ കടത്തിവിടില്ലന്ന് പോലീസ് അറിയിച്ചു. കണമല ഇറക്കത്തിന്‍റെ തുടക്കമായ മാക്കൽ കവലയിൽ വെച്ച് വാഹനങ്ങൾ തടഞ്ഞു നിർത്തി കോൺവേ അടിസ്ഥാനത്തിൽ കടത്തിവിടും.

ഇവിടെ ചൂട് കാപ്പി ഡ്രൈവർമാർക്ക് നൽകുന്നതിനൊപ്പം അപകട സാധ്യത മുന്നറിയിപ്പും ജാഗ്രത നിർദേശവും നൽകുമെന്ന് പോലീസ് അറിയിച്ചു. ഇന്നലെ രാത്രി മുതൽ പുലർച്ചെ വരെ അഞ്ഞൂറിൽ പരം പേർക്ക് പോലീസ് വക കാപ്പി വിതരണം നടന്നിരുന്നു. യാത്രയിൽ ഉറക്കം ഒഴിവാക്കി സുരക്ഷിത ഡ്രൈവിംഗ് നടത്താനുള്ള ഉന്മേഷം ലഭിക്കാനാണ് ഡ്രൈവർമാർക്ക് കാപ്പി നൽകുന്നത്. എന്നിട്ടും അപകടം സംഭവിച്ചതിന്‍റെ നടുക്കത്തിലാണ് പോലിസ്.

ക്രാഷ് ബാരിയർ
ദുർബലം

കണമല ഇറക്കത്തിലെ ക്രാഷ് ബാരിയറുകൾ ശേഷി കുറഞ്ഞതാണെന്ന് നാട്ടുകാർ. മിക്കതിനും കോൺക്രീറ്റ് ചെയ്തതിന്‍റെ ഉറപ്പ് ഇല്ല. ഗണനിലവാരം കുറഞ്ഞ നിലയിൽ ആണ് ഇവ സ്ഥാപിച്ചതെന്ന് നാട്ടുകാർ ആരോപിച്ചു. അതേസമയം ആദ്യം സ്ഥാപിച്ചിരുന്ന ബാരിയറുകൾക്ക് രണ്ടും മൂന്നും ലെയറുകൾ ഉണ്ടായിരുന്നു. സുശക്തമായ നിലയിൽ കോൺക്രീറ്റ് ചെയ്ത് ഉറപ്പിച്ചാണ് ആദ്യം സ്ഥാപിച്ചത്. ഒട്ടേറെ അപകടങ്ങൾ മൂലം ഇവയിൽ പലതും കേടുപാടുകൾ ആയതോടെ ആണ് പുതിയത് സ്ഥാപിച്ചത്. ഇതാണ് ദുർബലമാണെന്ന് പരാതി ഉയർന്നിരിക്കുന്നത്.