മേപ്പാടി: മേപ്പാടി പഞ്ചായത്തിലെ ഒന്ന്, രണ്ട് വാർഡുകളിൽ നീർത്തട വികസനത്തിന്റെ ഭാഗമായി തയാറാക്കിയ ബയോഗ്യാസ് പ്ലാന്റുകൾ, സ്പ്രിംഗ് ബോക്സുകൾ, നള ബണ്ട്, പുൽക്കൃഷിയിടം, ഫലവൃക്ഷത്തോട്ടം, തടയണ എന്നിവ നബാർഡ് ജില്ലാ വികസന മാനേജർ ആർ. ആനന്ദ് സന്ദർശിച്ചു.
ശ്രേയസിന്റെയും നീർത്തട വികസന കമ്മിറ്റിയുടെയും നേതൃത്വത്തിലാണ് ഇവ തയാറാക്കിയത്. നീർത്തട കമ്മിറ്റി ഓഫീസിൽ ചേർന്ന യോഗത്തിൽ പദ്ധതി പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും സമയബന്ധിതമായി പൂർത്തിയാക്കുന്നതിനും ആവശ്യമായ നിർദേശങ്ങൾ അദ്ദേഹം നൽകി. നബാർഡിന്റെ സാന്പത്തിക പിന്തുണയോടെയാണ് നീർത്തട വികസന പദ്ധതി നടപ്പാക്കുന്നത്. 2023ൽ ആണ് പദ്ധതിക്കു നബാർഡ് അംഗീകാരം നൽകിയത്. നീരുറവ പരിപോഷണം, സമഗ്ര കാർഷിക വികസനം, മണ്ണ്-ജല സംരക്ഷണം, വരുമാന പദ്ധതികൾ, പരിശീലനങ്ങൾ, പഠനയാത്രകൾ, കാലാവസ്ഥാ വ്യതിയാന ലഘൂകരണ പ്രവർത്തനങ്ങൾ തുടങ്ങിയവ പദ്ധതി ഘടകങ്ങളാണ്. ശ്രേയസ് എക്സിക്യുട്ടീവ് ഡയറക്ടർ ഫാ.ഡേവിഡ് ആലിങ്കൽ, വില്ലേജ് വാട്ടർഷെഡ് കമ്മിറ്റി പ്രസിഡന്റ് പി.ആർ. കൃഷ്ണൻകുട്ടി, സെക്രട്ടറി സെലീന സാബു, രമേശ്, ശ്രേയസ് ടീം അംഗങ്ങൾ എന്നിവർ ആനന്ദിനെ അനുഗമിച്ചു.