സുൽത്താൻ ബത്തേരി: പൊതു മരാമത്ത് വകുപ്പ് അന്പലവയൽ ഡിവിഷന്‍റെ കീഴിലുള്ള മാടക്കര താഴത്തൂർ ചീരാൽ റോഡിൽ ഇടിഞ്ഞു താഴ്ന്ന കോൽക്കുഴി ഭാഗം നന്നാക്കാൻ തുടങ്ങി. അപകടാവസ്ഥ മുന്നിൽ കണ്ട് വകുപ്പ് മന്ത്രിക്കും ഉന്നത ഉദ്യോഗസ്ഥർക്കും നാട്ടുകാർ പരാതി അയക്കുകയും മാധ്യമങ്ങൾ വാർത്ത പ്രസിദ്ധീകരിക്കുകയും ചെയ്തിരുന്നു.
നിറയെ വിദ്യാർഥികളുമായി പോയ ബസ് റോഡിൽനിന്ന് തെന്നിമാറി താഴ്ചയുള്ള ഭാഗത്തേക്ക് ചെരിഞ്ഞു നിന്നതിനാൽ അപകടം ഒഴിവായത്. കുട്ടികളെ ഇറക്കി ജെസിബി ഉപയോഗിച്ച് ബസ് വലിച്ചു കയറ്റുകയായിരുന്നു. വർഷംതോറും നടത്തുന്ന താത്കാലിക പ്രവർത്തി ഒഴിവാക്കി താഴ്ചയുള്ള ഭാഗത്ത് റോഡിന് സംരക്ഷണഭിത്തി നിർമിക്കണമെന്നും യാത്രക്കാരുടെ സുരക്ഷ ഉറപ്പാക്കണമെന്നും പൊതുപ്രവർത്തകനും പഞ്ചായത്ത് മുൻ അംഗവുമായ കെ.സി.കെ. തങ്ങൾ ആവശ്യപ്പെട്ടു.