തവിഞ്ഞാൽ: തവിഞ്ഞാൽ ഗ്രാമപഞ്ചായത്തിലെ 11-ാം വാർഡ് മുതിരേരിയിലെ മുഴുവൻ തൊഴിലുറപ്പ് തൊഴിലാളികളുടെയും ഒത്തുചേരൽ തവിഞ്ഞാൽ സെന്‍റ് മേരീസ് ഓഡിറ്റോറിയത്തിൽ നടത്തി. ദേശീയ ഗ്രാമീണ തൊഴിലുറപ്പ് പദ്ധതിയിലെ തൊഴിലാളികൾ നേരിടുന്ന വിവിധ പ്രശ്നങ്ങൾ യോഗത്തിൽ ചർച്ച ചെയ്തു. തൊഴിലാളികൾക്ക് സൗജന്യ ആരോഗ്യ ഇൻഷ്വറൻസ് ഏർപ്പെടുത്തുക, തൊഴിലുറപ്പ് തൊഴിലാളികളുടെ മക്കൾക്ക് എസ്എസ്എൽസി, പ്ലസ് ടു, ഉപരിപഠനം, പ്രഫഷണൽ കോഴ്സുകൾ എന്നീ തലത്തിൽ സ്കോളർഷിപ്പ് ഏർപ്പെടുത്തുക. സർക്കാർ ആശുപത്രികളിലെ ചികിത്സയ്ക്കും വിവിധ ടെസ്റ്റുകൾക്കും സൗജന്യ നിരക്ക് ഏർപ്പെടുത്തുക തുടങ്ങിയ ആവശ്യങ്ങൾ നടപ്പാക്കണമെന്ന് തൊഴിലാളികൾ ആവശ്യപ്പെട്ടു.
കലാ കായിക മേഖലകളിൽ മുൻകാലങ്ങളിലെ പ്രതിഭകളായിരുന്ന ധാരാളം തൊഴിലാളികൾ പങ്കെടുത്തു. സംഗമത്തിൽ മുതിർന്ന തൊഴിലാളികളെ ആദരിച്ചു. തൊഴിലുറപ്പ് സംഗമം തവിഞ്ഞാൽ പഞ്ചായത്ത് പ്രസിഡന്‍റ് എൽസി ജോയി ഉദ്ഘാടനം ചെയ്തു. വാർഡ് അംഗം ജോസ് കൈനിക്കുന്നേൽ അധ്യക്ഷത വഹിച്ചു. ജില്ലാ ഓംബുഡ്മാൻ ഒ.പി. ഏബ്രഹാം മുഖ്യ പ്രഭാഷണം നടത്തി. വൈസ് പ്രസിഡന്‍റ് ജോസ് പാറയ്ക്കൽ, ജില്ലാ പഞ്ചായത്ത് അംഗം മീനാക്ഷി രാമൻ, എം.ജി. ബിജു, സ്റ്റാൻഡിംഗ് കമ്മിറ്റി ചെയർമാൻമാരായ ലൈജി തോമസ്, സ്വപ്ന പ്രിൻസ്, കമറുന്നീസ, ബ്ലോക്ക് പഞ്ചായത്ത് അംഗം അസീസ് വാളാട്, അംഗങ്ങളായ റോസമ്മ ബേബി, സുരേഷ് പാലോട്ട്, ശ്രീലത, സെന്‍റ് തോമസ് യുപി സ്കൂൾ ഹെഡ്മിസ്ട്രസ് മേരി, വാർഡ് വികസന സമിതി ഭാരവാഹികളായ ഷാജി പായിക്കാട്ട്, വിനോദ് മൂട്ടേരി, ജിനീഷ് കൈതയ്ക്കൽ, അജോ മാളിയേക്കൽ, ജോണി കാരക്കട, എഡിഎസ് ഭാരവാഹികളായ ബിന്ദു ഷാജി കപ്പലുമാക്കൽ, ബിന്ദു വർക്കി എന്നിവർ പ്രസംഗിച്ചു.