കെട്ടിട നിർമാണ ചട്ടങ്ങളിൽ മാറ്റമാകാം: മുഖ്യമന്ത്രി
Friday, February 7, 2025 2:12 AM IST
കൊച്ചി: കെട്ടിട നിർമാണ ചട്ടങ്ങളിൽ വിവിധ മേഖലകളിലുള്ളവരുടെ നിർദേശങ്ങൾ ഏകോപിപ്പിച്ച് കാലാനുസൃതമായ മാറ്റം കൊണ്ടുവരാൻ തയാറാണെന്ന് മുഖ്യമന്ത്രി പിണറായി വിജയൻ.വികസനം സുസ്ഥിരമാകണമെന്ന കാഴ്ചപ്പാടാണ് സ‍ർക്കാരിനുള്ളതെന്നും അദ്ദേഹം പറഞ്ഞു.
കൊച്ചിയിൽ ആരംഭിച്ച കോൺഫെഡറേഷൻ ഓഫ് റിയൽ എസ്റ്റേറ്റ് ഡെവലപ്പേഴ്സ് അസോസിയേഷൻ ഓഫ് ഇന്ത്യ(ക്രെഡായ്)യുടെ എട്ടാമത് സംസ്ഥാന സമ്മേളനം ഓൺലൈനായി ഉദ്ഘാടനം ചെയ്യുകയായിരുന്നു അദ്ദേഹം.
നവകേരള നി‍ർമിതിക്ക് നിർമാണ മേഖലയുടെ സംഭാവന പ്രധാനമാണ്. വിപണിയിലുണ്ടാകുന്ന സാമ്പത്തിക മാന്ദ്യം, വിപണിയിലെ മാറ്റം തുടങ്ങിയവ നേരിട്ടു ബാധിക്കുന്നത് നിർമാണരംഗത്തുള്ളവരെയാണ്. സാധനങ്ങളുടെ വില വ‍ർധന, നികുതിയിലുണ്ടാകുന്ന മാറ്റം തുടങ്ങിയ പ്രതിസന്ധികളെ അതിജീവിച്ചാണ് നിർമാണ പ്രവർത്തനങ്ങൾ പൂ‍ർത്തിയാക്കുന്നത്.
കളമശേരി ചാക്കോളാസ് പവലിയനിൽ നടന്ന സമ്മേളനത്തിൽ ക്രെഡായ് കേരള ചെയർമാൻ രവി ജേക്കബ് അധ്യക്ഷത വഹിച്ചു. ദേശീയ സെക്രട്ടറി റാം റെഡ്ഡി വിശിഷ്ടാതിഥിയായിരുന്നു. സിബിആർഇ മാനേജിംഗ് ഡയറക്ടർ റാം ചന്ദ്നാനി, ക്രെഡായ് കോൺഫറൻസ് ചെയർമാൻ എം.വി. ആന്‍റണി, കൊച്ചി ചാപ്റ്റർ പ്രസിഡന്‍റ് രവി ശങ്കർ, ക്രെഡായ് കേരള സെക്രട്ടറി ചെറിയാൻ ജോൺ തുടങ്ങിയവർ പ്രസംഗിച്ചു. സമ്മേളനം ഇന്നു സമാപിക്കും.