ഫാ. മൈക്കിൾ വെട്ടിക്കാട്ട് സാമൂഹികസേവനത്തിൽ കഴിവു തെളിയിച്ച വൈദികശ്രേഷ്ഠൻ
Thursday, February 6, 2025 5:45 AM IST
കോട്ടയം: രാഷ്‌ട്രദീപിക ലിമിറ്റഡ് കമ്പനിയുടെ മാനേജിംഗ് ഡയറക്ടറായി നിയമിതനായ ഫാ. മൈക്കിൾ വെട്ടിക്കാട്ട് സാമൂഹികസേവനത്തിലും നേതൃപാടവത്തിലും കഴിവു തെളിയിച്ച വൈദികശ്രേഷ്ഠനാണ്.
കോട്ടയം അതിരൂപതയുടെ അജപാലനകേന്ദ്രമായ തെള്ളകം ചൈതന്യയുടെ ഡയറക്ടറായി 15 വര്‍ഷക്കാലം പ്രവര്‍ത്തിച്ച ഫാ. മൈക്കിള്‍, സംസ്ഥാന സര്‍ക്കാരിന്‍റെ പങ്കാളിത്ത അനുമതി നേടി ചൈതന്യ കാര്‍ഷികമേളയെ മധ്യകേരളത്തിലെ ജനകീയ ഉത്സവമാക്കി മാറ്റി. അതിരൂപതയുടെ സാമൂഹ്യ സേവന പ്രസ്ഥാനങ്ങളായ മലബാര്‍ സോഷ്യല്‍ സര്‍വീസ് സൊസൈറ്റിയില്‍ മൂന്നു വര്‍ഷവും കോട്ടയം സോഷ്യല്‍ സര്‍വീസ് സൊസൈറ്റിയില്‍ 15 വര്‍ഷവും നേതൃത്വം നല്‍കിയതിനൊപ്പം ഹൈറേഞ്ചിന്‍റെ സമഗ്രവികസനത്തിനായി ഗ്രീന്‍വാലി ഡെവലപ്മെന്‍റ് സൊസൈറ്റിയുടെ രൂപീകരണത്തിനും നേതൃത്വം നല്കി.
കോട്ടയം സോഷ്യല്‍ സര്‍വീസ് സൊസൈറ്റിയെ കേരളത്തിലെ ഏറ്റവും മികച്ച സന്നദ്ധസംഘടനയായി ഉയര്‍ത്തുന്നതിനു നേതൃത്വം നല്കിയ അദ്ദേഹത്തിന് കേന്ദ്ര-സംസ്ഥാന സര്‍ക്കാരുകളുടെ പ്രത്യേക പുരസ്‌കാരങ്ങളും നിരവധി ദേശീയ, അന്തര്‍ദേശീയ അവാര്‍ഡുകളും ലഭിച്ചിട്ടുണ്ട്. അന്ധ-ബധിര പുനരധിവാസ പ്രവര്‍ത്തനങ്ങള്‍ക്ക് സവിശേഷ പരിഗണന നല്കിയതുള്‍പ്പെടെ ഭിന്നശേഷിക്കാരുടെ സമഗ്ര സുസ്ഥിര പുനരധിവാസ പ്രവര്‍ത്തനങ്ങള്‍ക്ക് ദേശീയ അംഗീകാരവും നേടിയിട്ടുണ്ട്.
സീറോമലബാര്‍ സഭയുടെ സാമൂഹിക സേവന വിഭാഗമായ "സ്പന്ദ'ന്‍റെ സ്ഥാപക കോ-ഓര്‍ഡിനേറ്ററായും കേരള കത്തോലിക്ക മെത്രാന്‍ സമിതിയുടെ ജസ്റ്റീസ്, പീസ് ആന്‍ഡ് ഡെവലപ്മെന്‍റ് കമ്മീഷന്‍റെ ജോയിന്‍റ് സെക്രട്ടറിയായും ആറു വര്‍ഷക്കാലം പ്രവര്‍ത്തിച്ചിട്ടുണ്ട്.
കോട്ടയം അതിരൂപത സോഷ്യല്‍ ആക്‌ഷന്‍ കമ്മീഷന്‍ ചെയര്‍മാന്‍, ക്നാനായ അക്കാദമി ഫോര്‍ റിസര്‍ച്ച് ആന്‍ഡ് ട്രെയിനിംഗ് ഡയറക്ടര്‍, ക്നാനായ സമുദായ സംഘടനകളായ ക്നാനായ കത്തോലിക്ക കോണ്‍ഗ്രസ്, ക്നാനായ കാത്തലിക് വിമന്‍സ് അസോസിയേഷന്‍ എന്നിവയുടെ ചാപ്ലെയിന്‍, കെസിബിസി ജസ്റ്റീസ്, പീസ് ആന്‍ഡ് ഡെവലപ്മെന്‍റ് കമ്മീഷന്‍റെ ഡിസാസ്റ്റര്‍ മിറ്റിഗേഷന്‍ ടീം അംഗം തുടങ്ങിയ ഉത്തരവാദിത്വങ്ങളിലും ഫാ. മൈക്കിള്‍ വെട്ടിക്കാട്ട് നിലവില്‍ ശുശ്രൂഷ ചെയ്തുവരുന്നു.