വയനാട് സ്വദേശിക്ക് മങ്കി പോക്സ് സ്ഥിരീകരിച്ചു
Tuesday, December 17, 2024 1:58 AM IST
പരിയാരം: വയനാട് സ്വദേശിക്കു മങ്കി പോക്സ് സ്ഥിരീകരിച്ചു. കഴിഞ്ഞ ദിവസം കണ്ണൂര്‍ ഗവ. മെഡിക്കല്‍ കോളജില്‍ പ്രവേശിപ്പിച്ച 24 വയസുകാരനാണ് മങ്കി പോക്സാണെന്ന് പരിശോധനയില്‍ വ്യക്തമായത്. മൂന്നു ദിവസം മുമ്പാണ് ഇയാള്‍ അബുദാബിയില്‍നിന്ന് നാട്ടിലെത്തിയത്.
മങ്കി പോക്സ് ലക്ഷണം കണ്ടതോടെയാണ് അബുദാബിയില്‍നിന്ന് ഇങ്ങോട്ടേക്കു കയറ്റിവിട്ടതെന്നാണ് വിവരം. ഇപ്പോള്‍ 803 ലെ ഐസോലേഷന്‍ വാര്‍ഡില്‍ പ്രവേശിപ്പിച്ച ഇയാളുടെ ആരോഗ്യനില തൃപ്തികരമാണ്.
ശരീരത്തില്‍ കുമിളകള്‍ പൊങ്ങിയിട്ടുണ്ടെങ്കിലും ഗുരുതരമല്ലെന്ന് ആശുപ ത്രി അധികൃതര്‍ പറഞ്ഞു. ഇയാളെ പരിചരിക്കാനായി പിപിആർ കിറ്റും മറ്റു സുരക്ഷാ സംവിധാനങ്ങളുമായി ഡോക്ടര്‍മാരും മറ്റു ജീവനക്കാരുമടങ്ങിയ പ്രത്യേക സംഘത്തെ നിയോഗിച്ചിട്ടുണ്ട്.
വിദേശത്തുനിന്നെത്തിയ തലശേരി സ്വദേശിയായ മറ്റൊരാളെയും എം പോക്സ് ലക്ഷണത്തെത്തുടര്‍ന്ന് പരിയാരത്ത് പ്രവേശിപ്പിച്ചിട്ടുണ്ട്. മങ്കി പോക്സ് പരിശോധനയ്ക്കായി സാന്പിൾ ആലപ്പുഴ വൈറോളജി ലാബിലേക്ക് അയച്ചിട്ടുണ്ടെന്ന് ആശുപത്രി അധികൃതര്‍ പറത്തു.