3,500 കോടി വായ്പ; കാര്‍ഷിക വികസന ബാങ്ക് ബജറ്റ് പാസാക്കി
Sunday, October 27, 2024 6:50 AM IST
തിരുവനന്തപുരം: 3500 കോടി രൂപയുടെ കാര്‍ഷിക വായ്പ വിതരണം ചെയ്യാനുള്ള നടപടികള്‍ ഉള്‍പ്പെടെയുള്ള ബജറ്റ് കേരള സംസ്ഥാന സഹകരണ കാര്‍ഷിക ഗ്രാമവികസന ബാങ്ക് ഐകകണ്ഠ്യേന പാസാക്കി. ഹൈക്കോടതിയുടെ നിര്‍ദേശപ്രകാരം വാര്‍ഷിക പൊതുയോഗം ചേര്‍ന്നാണ് ബജറ്റിന് അംഗീകാരം നല്‍കിയതെന്ന് പ്രസിഡന്‍റ് അഡ്വ. സി.കെ. ഷാജിമോഹന്‍ പത്രസമ്മേളനത്തില്‍ അറിയിച്ചു.
കൂടാതെ വയനാട് ദുരന്തബാധിതരായ 52 പേരുടെ വായ്പകള്‍ എഴുതിത്തള്ളാനുള്ള തീരുമാനത്തിനും യുഡിഎഫിന്‍റെ നേതൃത്വത്തിലുള്ള ബാങ്ക് ഭരണസമിതി അംഗീകാരം നല്‍കി. ,05,66,128 രൂപയുടെ വായ്പയാണ് എഴുതിത്തള്ളാന്‍ തിരുമാനിച്ചിരിക്കുന്നത്.
ഇനി വിതരണം ചെയ്യാന്‍ തീരുമാനിച്ചിട്ടുള്ള വായ്പയുടെ പലിശ 10 ശതമാനത്തില്‍ താഴെ മാത്രമായിരിക്കുമെന്നും പ്രസിഡന്‍റ് വ്യക്തമാക്കി. 2024 മാര്‍ച്ച് 31ലെ കണക്കുപ്രകാരം ബാങ്കിന്‍റെ മൊത്തം വായ്പ 7824.75 കോടി രൂപയാണ്. കഴിഞ്ഞ സാമ്പത്തികവര്‍ഷത്തില്‍ ബാങ്കിന് 35.496 കോടി രൂപയുടെ അറ്റാദായമുണ്ടായെന്നും ഷാജിമോഹന്‍ പറഞ്ഞു.
ബജറ്റ് യോഗം അലങ്കോലപ്പെടുത്താന്‍ ശ്രമം; നിയമ നടപടിയെന്ന് പ്രസിഡന്‍റ് തിരുവനന്തപുരം: കേരള സംസ്ഥാന സഹകരണ കാര്‍ഷിക ഗ്രാമവികസന ബാങ്ക് ഭരണസമിതി ഹൈക്കോടതിയുടെ നിര്‍ദേശപ്രകാരം ബജറ്റ് പാസാക്കാനായി വിളിച്ചുചേര്‍ത്ത വാര്‍ഷിക പൊതുയോഗം പുറത്തുനിന്നുള്ള ഗുണ്ടകളെ ഉപയോഗിച്ച് അലങ്കോലപ്പെടുത്താനുള്ള സിപിഎം പ്രതിനിധികളുടെ നീക്കത്തിനെതിരേ നിയമനടപടി സ്വീകരിക്കുമെന്ന് പ്രസിഡന്‍റ് സി.കെ. ഷാജി മോഹന്‍ പത്രസമ്മേളനത്തില്‍ അറിയിച്ചു.