‘കനസ് ജാഗ’യ്ക്ക് തിരിതെളിഞ്ഞു
Sunday, October 27, 2024 6:22 AM IST
കൊച്ചി: തദ്ദേശീയ സമൂഹത്തിന്‍റെ നേർക്കാഴ്ചകള്‍ പകര്‍ത്തിയ ഹ്രസ്വ ചലച്ചിത്രങ്ങളുമായി കുടുംബശ്രീയുടെ ‘കനസ് ജാഗ’ ചലച്ചിത്രോത്സവത്തിന് തിരിതെളിഞ്ഞു. എറണാകുളം സെന്‍റ് തെരേസാസ് കോളജില്‍ ആരംഭിച്ച ഹ്രസ്വ ചലച്ചിത്രമേള മന്ത്രി എം.ബി. രാജേഷ് ഉദ്ഘാടനം ചെയ്തു. ആദ്യദിനം കരുത്തുറ്റ പ്രമേയങ്ങളുടെ ദൃശ്യാവിഷ്‌കാരംകൊണ്ടു ശ്രദ്ധേയമായി.
കുടുംബശ്രീ നടത്തുന്ന അഭിമാനകരമായ ഇടപെടലുകളില്‍ ഏറ്റവും നവീനമായ ഒന്നാണ് ഇപ്പോള്‍ സംഘടിപ്പിക്കുന്ന ഹ്രസ്വചലച്ചിത്രമേളയെന്ന് മന്ത്രി അഭിപ്രായപ്പെട്ടു. പി.വി. ശ്രീനിജന്‍ എംഎല്‍എ അധ്യക്ഷത വഹിച്ചു. കുടുംബശ്രീ പ്രോഗ്രാം ഓഫീസര്‍ ഡോ.ബി. ശ്രീജിത്, തദ്ദേശ സ്വയംഭരണ വകുപ്പ് പ്രിന്‍സിപ്പല്‍ ഡയറക്‌ടര്‍ സീറാം സാംബശിവ റാവു, പി.ആര്‍. റെനീഷ്, ഷീബ ലാല്‍, മനു ജേക്കബ് തുടങ്ങിയവരും പങ്കെടുത്തു.