കാണാതായ വിദ്യാര്ഥികളെ കൊച്ചിയിൽ കണ്ടെത്തി
Saturday, October 26, 2024 1:10 AM IST
കൊച്ചി: കോഴിക്കോട് പന്നിയങ്കര പോലീസ് സ്റ്റേഷന് പരിധിയില്നിന്നു കാണാതായ 14 വയസുകാരനെയും തിരുവന്തപുരം മാറാനല്ലൂര് പോലീസ് സ്റ്റേഷന് പരിധിയില് നിന്നു കാണാതായ 17 വയസുകാരനെയും കൊച്ചി സിറ്റി പോലീസ് കണ്ടെത്തി.
ഓള് കേരള അലര്ട്ട് കണ്ട്രോള് റൂമില്നിന്നു ലഭിച്ച വിവരങ്ങളും ഫോട്ടോയും കൊച്ചി സിറ്റി പോലീസിന്റെ വിവിധ ഗ്രൂപ്പുകളില് ഷെയര് ചെയ്തിരുന്നു. ഈ വിവരങ്ങളുടെ അടിസ്ഥാനത്തില് കണ്ട്രോള് റൂമിലെ വാഹനത്തില് പട്രോളിംഗ് ഡ്യൂട്ടിയിലു ണ്ടായിരുന്ന എഎസ്ഐ ഗോമറിന്, എസ്സിപിഒ ഹരി, സിപിഒ വിപിന് എന്നിവര് ചേര്ന്നു നടത്തിയ അന്വേഷണത്തിലാണ് കോഴിക്കോടുനിന്ന് കാണാതായ കുട്ടിയെ നോര്ത്ത് റെയില്വെ സ്റ്റേഷന് ഭാഗത്തെ എസ്ആര്എം റോഡില്നിന്നു കണ്ടെത്തിയത്.
തിരുവനന്തപുരത്തുനിന്നു കാണാതായ 17 കാരനെ പട്രോളിംഗ് ഡ്യൂട്ടിയിലുണ്ടായിരുന്ന എസ്ഐ ഗോപി, സിപിഒമാരായ ശ്യാം, മിക്സണ് എന്നിവര് ഇന്നലെ പുലര്ച്ചെ 12.15ഓടെ പാലാരിവട്ടം മേൽപ്പാലത്തിന്റെ അടിയില്നിന്നാണു കണ്ടെത്തിയത്. തുടര്ന്ന് ഇരുവരെയും ബന്ധുക്കള്ക്കു കൈമാറി.