കൊച്ചി: മുനമ്പം കടപ്പുറം പ്രദേശത്തെ 610 കുടുംബങ്ങളുടെ ഭൂമിയിലുള്ള അവകാശത്തിന്മേൽ ഉയർന്നിട്ടുള്ള തർക്കങ്ങളുടെ പരിഹാരത്തിനായി എം.എ. നിസാർ കമ്മിറ്റി റിപ്പോർട്ട് പുനഃപരിശോധിക്കാൻ സാധ്യതയൊരുക്കണമെന്ന് വരാപ്പുഴ ആർച്ച്ബിഷപ് ഡോ. ജോസഫ് കളത്തിപ്പറമ്പിൽ. മുനന്പം നിവാസികളെ കുടിയിറക്കുന്ന തരത്തിലുള്ള യാതൊരു നടപടികളും ഒരുകാരണവശാലും അംഗീകരിക്കില്ലെന്നും ആർച്ച്ബിഷപ് വിളിച്ചുചേർത്ത പ്രത്യേക യോഗം വ്യക്തമാക്കി.
മുനമ്പം പ്രദേശത്തെ ജനങ്ങളുടെ പ്രക്ഷോഭത്തിന്‍റെ പശ്ചാത്തലത്തിൽ പ്രശ്നപരിഹാരത്തിനായുള്ള സാധ്യതകൾ തേടിയാണ് ആർച്ച്ബിഷപ് പ്രത്യേക യോഗം വിളിച്ചുചേർത്തത്. കൗൺസിൽ ഫോർ കമ്യൂണിറ്റി കോ- ഓപ്പറേഷൻ എന്ന സംഘടനയുടെകൂടി പിന്തുണയോടെ കഴിഞ്ഞ മാസം ചേർന്ന യോഗത്തിന്‍റെ തുടർച്ചയായാണു യോഗം.
2008ൽ സർക്കാർ നിയോഗിച്ച എം.എ. നിസാർ അധ്യക്ഷനായ സമിതിയുടെ കണ്ടെത്തലിനെത്തുടർന്നാണു തർക്കങ്ങൾ ഉടലെടുക്കുന്നത്. ഈ കമ്മീഷൻ യാഥാർഥ്യം മനസിലാക്കാതെയും രേഖകൾ പരിശോധിക്കാതെയും ബന്ധപ്പെട്ടവരിൽനിന്നു വിവരങ്ങൾ ശേഖരിക്കാതെയും വഖഫ് ബോർഡിന്‍റെ ഏകപക്ഷീയമായ അവകാശവാദം അംഗീകരിച്ച് മുനമ്പം ഭൂമി വഖഫ് ഭൂമിയാണെന്ന നിഗമനത്തിലെത്തുകയായിരുന്നു. ഇതേത്തുടർന്നാണു ഫറൂഖ് കോളജിനു സമ്മാനമായി ലഭിച്ച 404 ഏക്കർ ഭൂമി 2019 ൽ വഖഫ് ഭൂമിയാണെന്ന് വഖഫ് ബോർഡിന്‍റെ ആസ്തി പട്ടികയിൽ എഴുതിച്ചേർക്കുന്നത്.
ഇന്നത്തെ ഗുരുതരമായ സാഹചര്യങ്ങൾ പരിഗണിച്ച് എം.എ. നിസാർ കമ്മിറ്റിയുടെ തീരുമാനം പുനഃപരിശോധിക്കാൻ ഒരു പുതിയ കമ്മിറ്റിയെ നിയോഗിക്കണം. ഫറൂഖ് കോളജ് അധികൃതർ എടുത്ത സ്ഥലം വഖഫ് ഭൂമിയല്ലെന്ന കാര്യം ശരിയാണെന്ന സത്യാവസ്ഥ സമയബന്ധിതമായി പുറത്തുകൊണ്ടുവരാൻ സർക്കാർ തയാറാകണമെന്നും യോഗം ആവശ്യപ്പെട്ടു.
വരാപ്പുഴ അതിരൂപത സഹായമെത്രാൻ ഡോ. ആന്‍റണി വാലുങ്കൽ, കെസിബിസി ഡെപ്യൂട്ടി സെക്രട്ടറി ഫാ. ജേക്കബ് ജി. പാലയ്ക്കാപ്പിള്ളി, അഡ്വ. മുഹമ്മദ് ഷാ, കെആർഎൽസിസി ജനറൽ സെക്രട്ടറി ഫാ. തോമസ് തറയിൽ, വൈസ് പ്രസിഡന്‍റ് ജോസഫ് ജൂഡ്, കെഎൽസിഎ പ്രസിഡന്‍റ് അഡ്വ. ഷെറി ജെ. തോമസ്, കോട്ടപ്പുറം രൂപത വികാരി ജനറാൾ മോൺ. റോക്കി റോബി, മുനമ്പം ഇടവക വികാരി ഫാ. ആന്‍റണി സേവ്യർ, ഭൂസംരക്ഷണ സമിതി നേതാക്കളായ ജോസഫ് ബെന്നി, സെബാസ്റ്റ്യൻ റോക്കി, സെബാസ്റ്റ്യൻ ജോസഫ്, അഹമ്മദ് കബീർ, ചെൽസൺ ചെമ്പരത്തി എന്നിവർ പ്രസംഗിച്ചു.
മുനന്പം നിരാഹാരസമരം 15-ാം ദിനത്തിൽ
മുനന്പം: ഭൂമിയുടെ റവന്യു അവകാശങ്ങൾ പുനഃസ്ഥാപിക്കുന്നതിന് മുനന്പത്തു നടക്കുന്ന നിരാഹാരസമരം 15-ാം ദിനത്തിൽ. ഇന്നലെ ഷിബു കളപ്പുരയ്ക്കൽ, ഡൊമിനിക് പുളിക്കൽ, ഷുഗുലൻ മഠത്തിശേരി, വിജി ഷാജി, ബീന അംബ്രോസ് എന്നിവർ നിരാഹാരമനുഷ്‌ഠിച്ചു.
എസ്എൻഡിപി വൈപ്പിൻ യൂണിയൻ പ്രസിഡന്‍റ് ടി.ജി. വിജയൻ, പറവൂർ ഡോൺബോസ്കോ പള്ളി വികാരി ഫാ. ബിയോൺ കോറോത്ത്, ഫാ. ആന്‍റണി സേവ്യർ തറയിൽ, ജോസഫ് ബെന്നി തുടങ്ങിയവർ പ്രസംഗിച്ചു.