ബിഎസ്‌സി, എംഎസ്‌സി നഴ്‌സിംഗ് സ്‌പോട്ട് അലോട്ട്‌മെന്‍റ് നാളെ
Sunday, October 27, 2024 6:22 AM IST
കൊച്ചി: കേരളത്തിലെ ക്രൈസ്തവ സ്വാശ്രയ നഴ്‌സിംഗ് കോളജുകളുടെ സംഘടനയായ എഎംസിഎസ്എഫ്എന്‍സികെയുടെ അംഗങ്ങളായ നഴ്‌സിംഗ് കോളജുകളിലെ ബിഎസ്‌സി, എംഎസ്‌സി, പോസ്റ്റ് ബേസിക് ബിഎസ്‌സി നഴ്‌സിംഗ് കോഴ്‌സുകളിലെ 2024-25ലെ പ്രവേശനത്തിന് സ്‌പോട്ട് അലോട്ട്‌മെന്‍റ് നാളെ നടക്കും.
ഇതുവരെ നടന്ന എല്ലാ അലോട്ട്‌മെന്‍റുകള്‍ക്കുശേഷവും ഒഴിവുള്ള സീറ്റുകളിലേക്ക് നാളെ ഉച്ചകഴിഞ്ഞു രണ്ടിന് കൊച്ചി പാലാരിവട്ടം സിവില്‍ ലൈന്‍ റോഡിലുള്ള പാസ്റ്ററല്‍ ഓറിയന്‍റേഷന്‍ സെന്‍ററിലാണ് (പിഒസി) സ്‌പോട്ട് അലോട്ട്‌മെന്‍റ്.
ബിഎസ്‌സി നഴ്‌സിംഗ് മോപ്-അപ് റൗണ്ടിനുവേണ്ടി കോളജ് ഓപ്ഷനുകള്‍ സമര്‍പ്പിച്ചവരില്‍ ഇതുവരെ നടന്ന രണ്ടു മോപ്-അപ്പ് കൗണ്‍സലിംഗുകളില്‍ അലോട്ട്‌മെന്‍റ് ലഭിച്ചിട്ടില്ലാത്ത 250 അപേക്ഷകരെയാണ് ഓപ്പണ്‍ മെറിറ്റ് റാങ്കിന്‍റെ അടിസ്ഥാനത്തില്‍ ബാക്കിയുള്ള ഒഴിവുകളിലേക്ക് പരിഗണിക്കുക.
ബിഎസ്‌സി, എംഎസ്‌സി, പോസ്റ്റ് ബേസിക് ബിഎസ്‌സി നഴ്‌സിംഗ് എന്നീ കോഴ്‌സുകളിലെ പ്രവേശനത്തിന് പ്രോസ്പെക്ടസ് പ്രകാരം അടിസ്ഥാന യോഗ്യതയുള്ളവരില്‍ ആവശ്യമായ ഒറിജിനല്‍ സര്‍ട്ടിഫിക്കറ്റുകള്‍ കൈവശമുള്ളവരുമായ അപേക്ഷാര്‍ഥികളില്‍, നിശ്ചിതസമയത്തു ഹാജരാകുന്നവരുടെ യോഗ്യതാപരീക്ഷയിലെ മാര്‍ക്കിന്‍റെ അടിസ്ഥാനത്തില്‍ കൗണ്‍സലിംഗ് നടത്തി പ്രവേശനം നല്‍കും.
ഒഴിവുള്ള സീറ്റുകളില്‍ പ്രവേശനം പൂര്‍ത്തിയാകുന്ന റാങ്കില്‍ അവസാനഘട്ട കൗണ്‍സലിംഗ് സമാപിക്കും. ഓരോ കോളജുകളിലെയും ഒഴിവുള്ള സീറ്റുകളും സ്‌പോട്ട് അലോട്ട്‌മെന്‍റിനെക്കുറിച്ചുള്ള കൂടുതല്‍ വിവരങ്ങളും അറിയുന്നതിന് www.amcsfnck. com എന്ന വെബ്‌സൈറ്റ് പരിശോധിക്കണം.