നാനോ സാങ്കേതികവിദ്യ: അമല്ജ്യോതിയിൽ ത്രിദിന അന്തര്ദേശീയ സമ്മേളനം
Saturday, October 26, 2024 1:33 AM IST
കാഞ്ഞിരപ്പള്ളി: അമല് ജ്യോതി എൻജിനിയറിംഗ് കോളജില് ‘ഇന്റര്നാഷണല് കോണ്ഫറന്സ് ഓണ് അഡ്വാന്സ്ഡ് നാനോ മെറ്റീരിയല്സ് ഫോര് സസ്റ്റൈനബിലിറ്റി’ സംഘടിപ്പിച്ചു.
കോണ്ഫറന്സില് യുകെ, റഷ്യ, ശ്രീലങ്ക, യുഎസ്, സൗത്ത് ആഫ്രിക്ക, സിംഗപ്പുര്, ഖത്തര്, മലേഷ്യ, തായ്വാന്, ബ്രസീല് തുടങ്ങിയ രാജ്യങ്ങളില് നിന്നടക്കം ഇരുനൂറോളം ഗവേഷകരുടെ സാന്നിധ്യം ഉണ്ടായിരുന്നു.
കോളജ് ഗവേണിംഗ് ബോഡി ചെയര്മാൻ ഫാ. ബോബി അലക്സ് മണ്ണംപ്ലാക്കലിന്റെ അധ്യക്ഷതയിൽ യൂണിവേഴ്സിറ്റി ഓഫ് കൊളറാഡോയിലെ (യുഎസ്എ) പ്രഫ. ഹെന്ഡ്രിക് ഹെയ്ന്സ് കോണ്ഫറന്സ് ഉദ്ഘാടനം ചെയ്തു.
ലോകം ഇന്ന് അഭിമുഖീകരിക്കുന്ന ജൈവവൈവിധ്യനഷ്ടം, മാലിന്യ നിര്മാര്ജനം, വായു മലിനീകരണം, കുടിവെള്ളക്ഷാമം, പ്ലാസ്റ്റിക് മലിനീകരണം, കാലാവസ്ഥാ വ്യതിയാനം തുടങ്ങിയ പ്രശ്നങ്ങള്ക്ക് പരിഹാരമാകുവാന് നാനോ സ്മാര്ട്ട് മെറ്റീരിയലുകളുടെയും നാനോ കണക്റ്റഡ് ഉപകരണങ്ങളുടെയും വികാസത്തിലൂടെ സാരമായ പുരോഗതി കൈവരിക്കുവാന് സാധിച്ചിട്ടുണ്ടെന്ന് അദ്ദേഹം പറഞ്ഞു. ബ്രിട്ടനിലെ ദര്ഹാം യൂണിവേഴ്സിറ്റി പ്രഫ. റിച്ചാര്ഡ് എല്. തോംപ്സണ് മുഖ്യപ്രഭാഷണം നടത്തി.
പ്രിന്സിപ്പല് ഡോ. ലില്ലിക്കുട്ടി ജേക്കബ്, കോളജ് ഡയറക്ടര് ഓഫ് അഡ്മിനിസ്ട്രേഷന് റവ.ഡോ. റോയി പഴേപറമ്പില്, ഡയറക്്ടര് ഓഫ് റിസര്ച്ച് ഡോ. സെഡ്.വി. ളാകപ്പറമ്പില്, കോണ്ഫറന്സിന്റെ കണ്വീനര് ഡോ. സോണി സി. ജോര്ജ്, കോളജ് ബേസിക് സയന്സ് വകുപ്പ് മേധാവി ഡോ. ലിസ മാത്യു, കെമിക്കല് എന്ജിനിയറിംഗ് മേധാവി ഡോ. പി.കെ. ജയശ്രീ എന്നിവര് പ്രസംഗിച്ചു.