സാമ്പത്തിക തിരിമറി: അഗ്രോ ഇൻഡസ്ട്രീസ് ജീവനക്കാരനെ പിരിച്ചുവിട്ടു
Sunday, October 27, 2024 6:22 AM IST
കൊച്ചി: സാമ്പത്തിക തിരിമറിയുടെ പേരിൽ കേരള അഗ്രോ ഇൻഡസ്ട്രീസ് കോർപറേഷൻ ജീവനക്കാരനെ സർവീസിൽനിന്നു പിരിച്ചുവിട്ടു. കൊട്ടാരക്കര ഡിവിഷണൽ എൻജിനിയറുടെ ഓഫീസിലെ അസി. ചാർജ്മാൻ എസ്. ശ്യാമിനെയാണു പിരിച്ചുവിട്ട് മാനേജിംഗ് ഡയറക്ടർ ഉത്തരവിറക്കിയത്.
കഴിഞ്ഞദിവസം ചേർന്ന ഡയറക്ടർ ബോർഡ് യോഗമാണ് പിരിച്ചുവിടാനുള്ള തീരുമാനമെടുത്തത്. തിരുവനന്തപുരം അഗ്രോ സൂപ്പർ ബസാറിൽ നഴ്സറി സെക്‌ഷന്‍റെ ചുമതല വഹിക്കുമ്പോൾ നടത്തിയ സാമ്പത്തിക ക്രമക്കേടുകളുടെ പേരിലാണു നടപടി. 2015 മുതൽ സ്ഥാപനത്തിൽ ഓഡിറ്റിംഗ് നടത്തിയിരുന്നില്ല. വി. കുഞ്ഞാലി ചെയർമാനായ പുതിയ ഭരണസമിതിയുടെ കീഴിൽ നടത്തിയ ഓഡിറ്റിംഗിലാണു ക്രമക്കേടുകൾ കണ്ടെത്തിയത്.