മോണ്. കൂവക്കാട്ടിനെ ആര്ച്ച്ബിഷപ്പായി പ്രഖ്യാപിച്ചു
Saturday, October 26, 2024 2:42 AM IST
ചങ്ങനാശേരി: ചങ്ങനാശേരി അതിരൂപതാംഗമായ നിയുക്ത കര്ദിനാള് മോണ്. ജോര്ജ് ജേക്കബ് കൂവക്കാട്ടിനെ ആർച്ച്ബിഷപ്പായി ഫ്രാന്സിസ് മാര്പാപ്പ നിയമിച്ചു.
നിസിബിസ് കല്ദായ കത്തോലിക്ക രൂപതയുടെ സ്ഥാനിക ആര്ച്ച്ബിഷപ് കൂടിയായിരിക്കും അദ്ദേഹം. ഇന്നലെ ഉച്ചകഴിഞ്ഞ് 3.30ന് ചങ്ങനാശേരി ആര്ച്ച്ബിഷപ്സ് ഹൗസ് ചാപ്പലില് നടന്ന ചടങ്ങില് ആര്ച്ച്ബിഷപ് മാര് ജോസഫ് പെരുന്തോട്ടം ഇതുസംബന്ധിച്ച പ്രഖ്യാപനം നടത്തി. ഇതേസമയം വത്തിക്കാനിലും പ്രഖ്യാപനം നടന്നു.
മോണ്. ജോര്ജ് കൂവക്കാട്ടിനെ സ്ഥാനികചിഹ്നങ്ങളായ അരപ്പട്ടയും കുരിശുമാലയും മാര് ജോസഫ് പെരുന്തോട്ടം ധരിപ്പിച്ചു. മുന് നുണ്ഷ്യോ ആര്ച്ച്ബിഷപ് മാര് ജോര്ജ് കോച്ചേരി മോതിരം ധരിപ്പിച്ചു. പാലാ ബിഷപ് മാര് ജോസഫ് കല്ലറങ്ങാട്ട് സന്ദേശം നല്കി. അതിരൂപത ചാന്സലര് റവ.ഡോ. ഐസക്ക് ആലഞ്ചേരി മംഗളപത്രം വായിച്ചു. അതിരൂപത വികാരി ജനറാള് മോണ്. ജോസഫ് വാണിയപ്പുരയ്ക്കല് പ്രാര്ഥനാശുശ്രൂഷ നയിച്ചു. വികാരി ജനറാള് മോണ്. ജയിംസ് പാലയ്ക്കല് നന്ദി പറഞ്ഞു.
നവംബര് 24ന് ചങ്ങനാശേരി സെന്റ് മേരീസ് മെത്രാപ്പോലീത്തന്പള്ളിയില് മോണ്. ജോര്ജ് കൂവക്കാട്ടിന്റെ മെത്രാഭിഷേകച്ചടങ്ങും ഡിസംബര് ഏഴിന് വത്തിക്കാനിലെ സെന്റ് പീറ്റേഴ്സ് ചത്വരത്തില് കര്ദിനാളായുള്ള സ്ഥാനാരോഹണവും നടക്കും.