കിട്ടിയ ആഭരണങ്ങള്‍ക്ക് മുന്നൂറുവര്‍ഷക്കാലത്തെ പഴക്കമുളളതായി സംശയിക്കുന്നതായി ചരിത്ര അധ്യാപകർ അറിയിച്ചു. വെളളി നാണയങ്ങള്‍ പരിശോധിച്ചാല്‍ വര്‍ഷം ലഭിക്കുമെന്നും വ്യക്തമാക്കി. ടിപ്പുവിന്‍റെ പടയോട്ടക്കാലത്ത് മിക്കക്ഷേത്രങ്ങളില്‍നിന്നും തറവാടുകളില്‍നിന്നും നിധി കുംഭങ്ങളാക്കി കുഴിച്ചിട്ടിരിക്കാമെന്ന പ്രാദേശിക പ്രചാരണം നേരത്തേയുണ്ടായിരുന്നു.
നിധിയുടെ കാര്യത്തില്‍ പുരാവസ്തുവകുപ്പിന് ഏറെയൊന്നും ചെയ്യാനില്ല. 1968-ലെ നിയമപ്രകാരം കണ്ടെത്തിയ നിധികുംഭത്തെ ഇപ്പോള്‍ റവന്യൂവകുപ്പാണ് സൂക്ഷിക്കുന്നത്. അതിന് മുന്നൂറു വര്‍ഷക്കാലത്തെ പഴക്കമുണ്ടെന്നു കണ്ടെത്തിയാല്‍ മാത്രമേ പുരാവസ്തു സംരക്ഷിക്കുകയുളളൂവെന്നാണ് സൂചന. താജുദീന്‍റെ റബര്‍തോട്ടത്തില്‍ മഴക്കുഴിയെടുക്കുന്നതിനിടെയാണ് തൊഴിലുറപ്പ് തൊഴിലാളി സ്ത്രീകള്‍ക്ക് നിധി ശേഖരം ലഭിച്ചത്. ഇവര്‍ പോലീസിനെ അറിയിക്കുകയും കസ്റ്റഡിയിലെടുത്ത് തളിപ്പറമ്പ് കോടതിയില്‍ ഹാജരാക്കുകയുമായിരുന്നു. ഈ വിഷയം നല്ല രീതിയിൽ കൈകാരര്യം ചെയ്ത തൊഴിലാളികളെ ആദരിക്കുമെന്നു ചെങ്ങളായി പഞ്ചായത്ത് അറിയിച്ചു.