ഡബ്ല്യുസിസി രൂപീകരിച്ച ശേഷം അതിലുള്ളവർക്ക് അവസരമില്ലാതെയായി എന്ന് അവർ കമ്മിറ്റി മുന്പാകെ അറിയിച്ചു. എന്നാൽ തുടക്കത്തിൽ ഒപ്പമുണ്ടായിരുന്ന ഒരാൾക്ക് ഇപ്പോഴും അവസരം ലഭിക്കുന്നുണ്ട്. മലയാള സിനിമയിൽ ലൈംഗികചൂഷണം നടക്കുന്നതായി തനിക്ക് അറിവില്ലെന്നാണ് ഈ വ്യക്തി കമ്മിറ്റി മുന്പാകെ മൊഴി നൽകിയതെന്നും റിപ്പോർട്ടിലുണ്ട്.
മലയാള സിനിമ ഒരു മാഫിയ സംഘത്തിന്റെ പിടിയിലാണെന്നു പറഞ്ഞ നടൻ ഇപ്പോൾ സിനിമയ്ക്കു പുറത്താണ്. സീരിയലിലാണ് ഒരു കാലത്തു സിനിമയിൽ സജീവമായിരുന്ന ഈ നടൻ ഇപ്പോൾ പ്രവർത്തിക്കുന്നത്.
സിനിമ മേഖലയിലെ യൂണിയനുകൾ, അസോസിയേഷനുകൾ, ഫെഡറേഷനുകൾ തുടങ്ങിയവയെല്ലാം അവരുടെ ബൈലോയ്ക്കു പോലും വിരുദ്ധമായ രീതിയിലാണ് വിലക്കു പ്രഖ്യാപിക്കുന്നത്.
പുരുഷ ഹെയർ സ്റ്റൈലിസ്റ്റുമാരിൽനിന്നും പീഡനം നേരിടേണ്ടി വരുന്നതായി വനിതാ ഹെയർ സ്റ്റൈലിസ്റ്റുമാർ പരാതിപ്പെട്ടു. സർക്കാർ തലത്തിലുള്ള ഒരു അഥോറിറ്റി രൂപീകരിച്ചു മാത്രമേ അനധികൃതമായ വിലക്ക് ഉൾപ്പെടെയുള്ള അധാർമിക പ്രവർത്തനങ്ങൾ നിയന്ത്രിക്കാനാകുകയുള്ളൂ എന്നു കമ്മിറ്റി റിപ്പോർട്ടിൽ ചൂണ്ടിക്കാട്ടി.