അവസരങ്ങൾ ലഭിക്കാൻ കിടക്ക പങ്കിടാൻ തയാറായി വരുന്നവരുണ്ടെന്നു പലരും മൊഴി നൽകി. എന്നാൽ ഭൂരിപക്ഷവും അങ്ങനെയല്ല. മറ്റൊരു തൊഴിൽ മേഖലയിലും ജോലിസ്ഥലത്തേക്ക് രക്ഷിതാക്കളെയുമായി പോകേണ്ട അവസ്ഥയില്ല. മറ്റൊരിടത്തും ജോലി ലഭിക്കാൻ ലൈംഗികമായി വഴങ്ങിക്കൊടുക്കേണ്ട സ്ഥിതിയില്ലെന്നും കമ്മീഷനു മുന്നിലെത്തിയ പലരും ചൂണ്ടിക്കാട്ടി.
ഔട്ട് ഡോർ ഷൂട്ടിംഗ് നടക്കുന്ന സ്ഥലങ്ങളിൽ സ്ത്രീകൾക്കു ടോയ്ലെറ്റ് സൗകര്യമോ വസ്ത്രം മാറുന്നതിനുള്ള സംവിധാനമോ പോലും ഏർപ്പെടുത്താറില്ല. കാരവൻ സൗകര്യം ചെയ്തു കൊടുക്കുന്നത് നായകനും നായികയ്ക്കും മാത്രമാണ്.
ടോയ്ലെറ്റ് സൗകര്യമില്ലാത്തതിനാൽ ജോലിക്കെത്തുന്ന പല സ്ത്രീകളും വെള്ളം കുടിക്കാറു പോലുമില്ല. ഇതുമൂലം ഇവർക്കു പല ആരോഗ്യപ്രശ്നങ്ങളും ഉണ്ടാകുന്നു. സ്ത്രീകൾക്കു സുരക്ഷിതത്വം നൽകാൻ സർക്കാർ സംവിധാനം വേണം.
ഔട്ട് ഡോർ ജോലിസ്ഥലങ്ങളിൽ ഇ ടോയ്ലെറ്റ് സംവിധാനം വേണം. വസ്ത്രം മാറുന്നതിനായി അഴിച്ചുമാറ്റാവുന്ന തരത്തിലുള്ള കർട്ടണ് സംവിധാനം ഒരുക്കാവുന്നതേയുള്ളൂ. കാരവൻ സുരക്ഷിതമല്ലെന്ന് സ്ത്രീകൾ തന്നെ അഭിപ്രായപ്പെട്ടു. ഒളികാമറ പോലെയുള്ള അപകടങ്ങൾ ഉണ്ടാകാം.
ട്രൈബ്യൂണൽ സ്ഥാപിക്കണമെന്ന് ശിപാർശ തിരുവനന്തപുരം: മലയാളസിനിമയിൽ സ്ത്രീകൾ നേരിടുന്ന പ്രശ്നങ്ങൾ പരിഹരിക്കുന്നതിനായി നിയമനിർമാണം നടത്തണമെന്നും അതിന്റെ അടിസ്ഥാനത്തിൽ ട്രൈബ്യൂണലിനു രൂപം നൽകണമെന്നും ഹേമ കമ്മീഷൻ സർക്കാരിനോടു ശിപാർശ ചെയ്തു. ട്രൈബ്യൂണൽ ആയി റിട്ടയേർഡ് ജില്ലാ ജഡ്ജിയെ നിയമിക്കണം. കഴിവതും വനിതയെ നിയമിക്കണം.
ട്രൈബ്യൂണലിന്റെ വിധി അന്തിമമായിരിക്കണം. ഹൈക്കോടതിയുടെ ഡിവിഷൻ ബെഞ്ചിനു മാത്രമേ വിധി പുനഃപരിശോധിക്കാൻ അധികാരമുണ്ടാകാവൂ. ട്രൈബ്യൂണലിന്റെ എല്ലാ നടപടികളും ഇൻ കാമറ ആയിരിക്കണം. ട്രൈബ്യൂണൽ നടപടികളോ ട്രൈബ്യൂണലിനെ സമീപിച്ചവരുടെ പേരുവിവരങ്ങളോ മാധ്യമങ്ങൾ പ്രസിദ്ധീകരിക്കാൻ പാടില്ല.
സിനിമാ മേഖലയിൽ ആഭ്യന്തര പരാതി സെൽ ഉണ്ടെങ്കിലും അതു ഫലപ്രദമല്ലെന്നു കമ്മീഷൻ നിരീക്ഷിച്ചു. സിനിമാ മേഖലയിൽ ഉള്ളവർ തന്നെയാണു സെല്ലിൽ അംഗങ്ങളാകുക. ചിലപ്പോൾ പരാതിയുടെ വിശദാംശങ്ങൾ പ്രതിസ്ഥാനത്തുള്ളവർക്കു ലഭിക്കുന്നതിനു കാരണമാകും. പരാതി നൽകിയവർക്കെതിരെ വിലക്ക് ഉൾപ്പെടെയുള്ള ശത്രുതാപരമായ നടപടികൾക്ക് ഇതിടയാക്കുമെന്നും റിപ്പോർട്ടിൽ ചൂണ്ടിക്കാട്ടുന്നു.