അടുത്ത മാസം മുതൽ പാർട്ടി സമ്മേളനങ്ങൾ ആരംഭിക്കുകയാണ്. ഈ സാഹചര്യത്തിൽ ശശിക്കെതിരേ അച്ചടക്കനടപടിയെടുത്തതു ശരിയായില്ലെന്ന നിലപാടിലാണു ജില്ലയിലെ പ്രമുഖരായ ചില നേതാക്കൾ.
അച്ചടക്ക നടപടി താഴെ തട്ടിലേക്കു റിപ്പോർട്ടു ചെയ്യണം. എന്നാൽ ഇക്കാര്യത്തിൽ പാർട്ടിയിൽ ആശയക്കുഴപ്പമുണ്ടായിട്ടുണ്ട്. നിലവിൽ ശശി കെടിഡിസി ചെയർമാനാണ്. ചെയർമാൻ സ്ഥാനം രാജിവയ്ക്കുന്നതിലും സിപിഎം തീരുമാനമെടുത്തിട്ടില്ലെന്നാണു സൂചന.
പാലക്കാട് ജില്ലയിൽ പിണറായി വിജയന്റെ വിശ്വസ്തനായ അനുയായിയായിരുന്നു പി.കെ. ശശി. ഡിവൈഎഫ്ഐ വനിതാ നേതാവിന്റെ പരാതിയിൽ നേരത്തേ ശശിക്കെതിരേ സിപിഎം നടപടിയെടുത്തിരുന്നു. ഏറെ വിവാദങ്ങൾ ഉണ്ടായശേഷമാണു വനിതാ നേതാവിന്റെ പരാതിയിൽ ശശിയെ ജില്ലാ സെക്രട്ടേറിയറ്റിൽനിന്നു ജില്ലാ കമ്മിറ്റിയിലേക്കു പാർട്ടി തരംതാഴ്ത്തിയത്.
സിപിഎം കേന്ദ്ര കമ്മിറ്റി അംഗം കൂടിയായ ജില്ലയിലെതന്നെ ഒരു പ്രമുഖ നേതാവിന്റെ ശക്തമായ പിന്തുണ ശശിക്കുണ്ടായിരുന്നു. എന്നാൽ ഇപ്പോൾ ആ നേതാവും കൈവിട്ടതായാണു സൂചന.
സമ്മേളനങ്ങൾ തീരുമാനിച്ച സാഹചര്യത്തിൽ വേണമെങ്കിൽ ശശി അപ്പീൽ നൽകിയാൽ പാർട്ടി കണ്ട്രോൾ കമ്മീഷനു നടപടിയിൽ ഇടപെടാം. എന്നാൽ ഇതിനു സാധ്യത കുറവാണ്.