അപകടത്തിലേക്ക് നയിച്ച സാഹചര്യങ്ങൾ അന്വേഷിച്ച ഉദ്യോഗസ്ഥർക്ക് കൃത്യമായ സമയം സ്ഥിരീകരിക്കാൻ കഴിയാത്ത സാഹചര്യം വരെ സമീപകാലത്ത് ഉണ്ടായി. സ്റ്റേഷൻ മാസ്റ്റർമാരും ലോക്കോ പൈലറ്റുമാരും ഗാർഡുമാരും നൽകിയ വിശദീകരണങ്ങളിൽ സമയത്തിന്റെ കാര്യത്തിൽ കാര്യമായ പൊരുത്തക്കേടുകൾ ബോധ്യപ്പെടുകയുണ്ടായി. ഇതുകൂടി പരിഗണിച്ചാണ് ഏകീകൃത സമയക്രമത്തിലേക്ക് മാറാൻ തയാറെടുപ്പുകൾ തുടങ്ങിയിട്ടുള്ളത്.
സെക്ഷൻ കൺട്രോളർമാരുടെ അറിയിപ്പിന്റെ അടിസ്ഥാനത്തിൽ സ്റ്റേഷൻ മാസ്റ്റർമാർ സമയം നിശ്ചയിക്കുന്ന നിലവിലെ മാന്വൽ രീതി ആദ്യപടിയായി എത്രയും വേഗം ഒഴിവാക്കും. മാസ്റ്റർ ക്ലോക്ക് സംവിധാനത്തിന്റെ രൂപകൽപന പൂർത്തിയായിക്കഴിഞ്ഞു.
റെയിൽവേയുടെതന്നെ റിസർച്ച് വിഭാഗമായ റിസർച്ച് ഡിസൈൻസ് ആൻഡ് സ്റ്റാൻഡാർഡ് ഓർഗനൈസേഷനായിരുന്നു ഇതിന്റെ ഏകോപനച്ചുമതല. മേൽനോട്ടത്തിനായി ഉന്നതതല സമിതിയെയും രൂപീകരിച്ചിരുന്നു.
റെയിൽവേ ബോർഡിന്റെ ടെലികമ്യൂണിക്കേഷൻസ് ഡയറക്ടറുടെ നേതൃത്വത്തിലുള്ള സംഘം പുതിയ സംവിധാനത്തിലേക്ക് മാറുന്നതുമായി ബന്ധപ്പെട്ട പഠനവും സമാന്തരമായി നടത്തുന്നുണ്ട്. തുടർന്നായിരിക്കും സമയ ഏകീകരണം അന്തിമമായി പ്രാബല്യത്തിൽ വരിക.