അധിക സുരക്ഷയുടെ ഭാഗമായി ഇരുമ്പു ദണ്ഡും പിടിപ്പിക്കാറുണ്ട്. ഇതിനാലാണ് മുൻവാതിൽ മോഷ്ടാക്കൾ ലക്ഷ്യം വയ്ക്കുന്നത്. ദിവസങ്ങൾ നീണ്ട നിരീക്ഷണത്തിനും കാത്തിരിപ്പിനും ശേഷം സുരക്ഷിതമെന്ന് ഉറപ്പാക്കിയാണ് ഈ രീതി പ്രയോഗിക്കുക.
ഉത്തര മലബാറിൽ ഈ രീതി അടുത്തിടെയായി ഏറിവരുകയാണ്. നേരം പുലർന്നിട്ടും ലൈറ്റ് തെളിഞ്ഞുകിടക്കുന്ന വീടുകൾ, പാൽ, പത്രം തുടങ്ങിയവ എടുക്കാതിരിക്കുന്ന വീടുകൾ, മുറ്റത്ത് ചപ്പുചവറുകൾ കൂടിക്കിടക്കുന്ന വീടുകൾ തുടങ്ങിയവ കണ്ടെത്തുകയാണ് മോഷ്ടാക്കളുടെ ആദ്യപണി. തുടർന്നു വ്യത്യസ്ത സമയങ്ങളിൽ ഈ റൂട്ടിലൂടെ സഞ്ചരിച്ച് വീട്ടിൽ ആളില്ലെന്ന് ഉറപ്പുവരുത്തും. പിന്നീട് രാത്രിയിലെത്തി കവർച്ച നടത്തും.
വീട്ടുകാർ കൂട്ടത്തോടെ എവിടെയെങ്കിലും യാത്ര പോകുന്നത് ശ്രദ്ധയിൽപെട്ടാൽ ആ വീട് നിരീക്ഷണത്തിലാക്കും. വെള്ളം തളിക്കുക, കയ്യിൽ പൊടി വിതറുക, ഗ്ലൗസ് ഉപയോഗിക്കുക തുടങ്ങി വിരലടയാളങ്ങൾ പോലീസിനു ലഭിക്കാതിരിക്കാനുള്ള രീതികളും മോഷ്ടാക്കൾ പിന്തുടരുന്നുണ്ട്. ഡോഗ് സ്ക്വാഡിന്‍റെ അന്വേഷണം തടസപ്പെടുത്താൻ മണ്ണെണ്ണ, പെർഫ്യൂം, മുളകുപൊടി, മറ്റ് കെമിക്കലുകൾ തുടങ്ങിയവയാണ് ഉപയോഗിക്കുന്നത്.
സിസിടിവി കാമറയിൽ നിന്നു രക്ഷപ്പെടാൻ മുഖം മറയ്ക്കും. തുടർന്നു സിസിടിവി കാമറ നശിപ്പിക്കുകയോ, തുണിയിട്ട് മൂടുകയോ, തിരിച്ചുവയ്ക്കുകയോ ചെയ്യും. മോഷണ ദിവസം ഇവർ ഫോൺ ഉപയോഗിക്കാറില്ല.
പ്രഫഷണൽ മോഷ്ടാക്കൾ സാധാരണ കവർച്ച നടത്തുന്നത് ഒറ്റയ്ക്കാണ്. ഒന്നിലധികം പേരുണ്ടെങ്കിൽ ഒറ്റുകൊടുക്കാനും പിടിക്കപ്പെടാനുമുള്ള സാധ്യത കൂടുതലാണ്. മോഷണത്തിനുശേഷം കിട്ടിയത് എത്രയും വേഗം ചെലവഴിക്കുകയാണ് പതിവ്. കൂടാതെ, കവർച്ച ചെയ്ത സാധനങ്ങൾ നേരിട്ട് വില്ക്കാതെ മറ്റുള്ളവരെ ഏല്പിക്കുന്നതാണ് മറ്റൊരു രീതി.