വടക്കഞ്ചേരി: നിലവിലെ മാന്വൽ പ്രകാരമുള്ള അവസാനത്തെ ശാസ്ത്രോത്സവമാകും വിദ്യാഭ്യാസ ഉപജില്ലാ തലങ്ങളിൽ ഇപ്പോൾ നടന്നുവരുന്ന ശാസ്ത്രമേളകൾ. അടുത്തവർഷം മുതൽ പുതിയ മാന്വൽ പ്രകാരമാകും ശാസ്ത്രോത്സവം നടക്കുക.
നിലവിലുള്ള ചില ഇനങ്ങൾ ഉപേക്ഷിച്ചും പുതിയവ കൂട്ടിച്ചേർത്തുമാകും മാന്വൽ പരിഷ്കരണം. ഈ വർഷം മുതൽ തന്നെ ചെറിയ മാറ്റങ്ങളോടെ ശാസ്ത്രമേളകൾ നടത്താൻ തീരുമാനിച്ചെങ്കിലും വലിയ എതിർപ്പുകളെ തുടർന്ന് ഈ വർഷം കൂടി നിലവിലെ മാന്വൽ മാനദണ്ഡമായി മേളകൾ നടത്താൻ തീരുമാനമെടുക്കുകയായിരുന്നു. സ്കൂൾതലമേളകൾ തുടങ്ങിയതിനിടെ പരിഷ്കരണം കൊണ്ടുവന്നത് അധ്യാപകരുടെയും രക്ഷിതാക്കളുടെയും വിദ്യാർഥികളുടെയുമെല്ലാം വലിയ എതിർപ്പിന് ഇടയാക്കി. പല ഇനങ്ങളിലും കുട്ടികൾ നടത്തിയിരുന്ന പരിശീലനങ്ങളും നിർത്തിവയ്ക്കുന്ന സ്ഥിതിയുണ്ടാക്കി. ഇത്തരം ആശങ്കകളിലാണ് ശാസ്ത്രമേളകൾ നടക്കുന്നത്. ഇനി കൂടുതൽ പഠനശേഷമാകും പുതിയ ഇനങ്ങൾ കൂട്ടിച്ചേർക്കുന്നതും നിലവിലുള്ള ഇനങ്ങൾ ഉപേക്ഷിക്കുന്നതും.