മണ്ണാർക്കാട്: കനത്ത മഴയിൽ പൂഞ്ചോല റോഡിന്‍റെ സംരക്ഷണഭിത്തി തകർന്നു. കഴിഞ്ഞ ദിവസമുണ്ടായ ശക്തമായ മഴയിലാണ് പത്തടിയിലേറെ ഉയരത്തിലുള്ള കരിങ്കൽഭിത്തി പൂഞ്ചോല പള്ളിയുടെ കോമ്പൗണ്ടിലേക്ക് തകർന്നു വീണത്. ഈ സംരക്ഷണഭിത്തിക്ക് 20 അടിയോളം നീളവും ഉണ്ട്. ഈ സമയത്തു റോഡിലും പള്ളിവളപ്പിലും ആളില്ലാതിരുന്നതിനാൽ അത്യാഹിതം ഒഴിവായി. കാഞ്ഞിരത്തു നിന്ന് പൂഞ്ചോലയിലേക്കുള്ള പൊതുമരാമത്ത് വകുപ്പിന്‍റെ നിയന്ത്രണത്തിലുള്ള പ്രധാന റോഡാണിത്. പ്രദേശത്ത് മഴ തുടരുന്നതിനാൽ മണ്ണിളകി സംരക്ഷണഭിത്തിയുടെ മറ്റു ഭാഗങ്ങളും തകർന്നു വീഴുമെന്ന ആശങ്ക ഉണ്ട്. സംരക്ഷണഭിത്തി തകർന്നത് റോഡിലൂടെ ഉള്ള വാഹനഗതാഗതത്തെയും ബാധിക്കാനുള്ള സാധ്യതയുണ്ട്.