ADVERTISEMENT

ADVERTISEMENT

പി.ടി. ദേവസ്യ സാറിന്‍റെ ഓർമകളിൽ നാട്

രാമപുരം: രാമപുരത്തിന്‍റെ സാമൂഹിക, സാംസ്കാരിക, വിദ്യാഭ്യാസ മേഖലകളിൽ നിറസാന്നിധ്യമായിരുന്നു കഴിഞ്ഞ ദിവസം അന്തരിച്ച പുതിയിടത്തുചാലിൽ പി.ടി. ദേവസ്യ സാർ. കരിങ്കുന്നം, കുറവിലങ്ങാട്, കാഞ്ഞിരത്താനം, രാമപുരം എന്നിവിടങ്ങളിൽ ഹൈസ്കൂൾ അധ്യാപകനായും കടനാട്, മാനത്തൂർ, നീലൂർ എന്നിവിടങ്ങളിൽ പ്രഥമാധ്യാപകനായും 35 വർഷത്തെ സേവനത്തിന് ശേഷമാണ് അദ്ദേഹം വിരമിച്ചത്.

സൗമ്യനും ശാന്തശീലനുമായിരുന്ന ദേവസ്യ സാർ ഏതു സമയവും ഒരു ചെറുപുഞ്ചിരി സൂക്ഷിച്ചിരുന്നു. ഗണിതശാസ്ത്രവും ഇംഗ്ലീഷും അനായാസം കൈകാര്യം ചെയ്തിരുന്ന സാറിന്‍റെ ക്ലാസിൽ പഠിക്കാൻ കഴിഞ്ഞ വിദ്യാർഥികൾക്ക് അവ ഇഷ്ടവിഷയങ്ങളായി. ചൂരൽ എടുക്കാത്ത കണക്കു മാഷിന്‍റെ ക്ലാസിൽ ഇരിക്കാൻ കഴിഞ്ഞതിന്‍റെ ആത്മസംതൃപ്തി മനസിൽ സൂക്ഷിക്കുന്ന ശിഷ്യഗണങ്ങൾ ഇന്ന് ജീവിതത്തിന്‍റെ നാനാതുറകളിൽ സേവനമനുഷ്ഠിക്കുന്നു.

പിജിടിഎ സംസ്ഥാന ഭാരവാഹി, രാമപുരം ഫൊറോനാപള്ളിയുടെ വിവിധ കമ്മിറ്റിയംഗം, കുഴുമ്പിൽ കുടുംബയോഗം രക്ഷാധികാരി, ഡിവൈൻ വോയ്സ് മീഡിയ കൂട്ടായ്മ സ്ഥാപകാംഗം എന്നീ നിലകളിലും വളരെക്കാലം സേവനം അനുഷ്ഠിച്ചിട്ടുണ്ട്.

എല്ലാ കാര്യത്തിലും അച്ചടക്കം പാലിച്ച മാതൃകാ അധ്യാപകനായിരുന്നു ദേവസ്യ സാർ എന്ന് പാലാ ബിഷപ് മാർ ജോസഫ് കല്ലറങ്ങാട്ടും മൂല്യബോധവും അറിവും ഒരേസമയം കുട്ടികൾക്ക് നൽകിയ ദേവസ്യ സാറിനെപ്പോലെയുള്ള അധ്യാപകർ അപൂർവമാണെന്ന് ബിഷപ് മാർ ജേക്കബ് മുരിക്കനും കഴിഞ്ഞ ദിവസം രാമപുരം സെന്‍റ് അഗസ്റ്റിൻസ് ഫൊറോന പള്ളിയിൽ നടന്ന സംസ്കാര ശുശ്രൂഷാ വേളയിൽ അനുസ്മരിച്ചു.

ADVERTISEMENT

പൊതുജനാരോഗ്യ മേഖലയെ പ്രതിപക്ഷം ഇകഴ്ത്തിക്കാണിക്കുന്നു: ജോസ് കെ. മാണി

പാലാ: രാജ്യത്തിന് മാതൃകയായ കേരളത്തിന്‍റെ ആരോഗ്യ മേഖലയെ പ്രതിപക്ഷം ഇകഴ്ത്തിക്കാണിക്കുകയാണെന്ന് കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി. പൊതുജനാരോഗ്യമേഖലയെ തകര്‍ക്കാന്‍ ബിജെപി-യുഡിഎഫ് ഗൂഢാലോചന നടക്കുന്നുവെന്നാരോപിച്ച് എല്‍ഡിഎഫിന്‍റെ ആഭിമുഖ്യത്തില്‍ ഇന്നലെ പാലായില്‍ നടത്തിയ ബഹുജന മാര്‍ച്ച് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. എല്‍ഡിഎഫ് കണ്‍വീനര്‍ ബാബു കെ. ജോര്‍ജ് അധ്യക്ഷത വഹിച്ചു. ജില്ലാ കണ്‍വീനര്‍ പ്രഫ. ലോപ്പസ് മാത്യു, സജേഷ് ശരി, ലാലിച്ചന്‍ ജോര്‍ജ്, നഗരസഭാ ചെയര്‍മാന്‍ തോമസ് പീറ്റര്‍, ടോബിന്‍ കെ. അലക്‌സ്, പി.കെ. ഷാജകുമാര്‍, ബെന്നി മൈലാടൂര്‍, ജോസ് ടോം, കെ.എസ്. രമേശ് ബാബു, ഷാജി കടമല, എസ്. സുനില്‍ കുമാര്‍, ബിജി മണ്ഡപം, ഫിലിപ്പ് കുഴികുളം തുടങ്ങിയവർ പ്രസംഗിച്ചു.

ഡിസിഎംഎസ് യുവജന സെമിനാര്‍ നടത്തി

കോട്ടയം: ദളിത് കത്തോലിക്ക മഹാജനസഭ (ഡിസിഎംഎസ്) സപ്തതി ആഘോഷങ്ങളുടെ ഭാഗമായി കോട്ടയത്ത് യുവജന സെമിനാര്‍ നടത്തി. ഡിസിഎംഎസ് സംസ്ഥാന പ്രസിഡന്‍റ് ജയിംസ് ഇലവുങ്കലിന്‍റെ അധ്യക്ഷതയില്‍ ചേർന്ന യോഗം പരിവര്‍ത്തിത ക്രൈസ്തവ ശിപാര്‍ശിത വിഭാഗ വികസന കോര്‍പറേഷന്‍ മാനേജിംഗ് ഡയറക്ടര്‍ ബാബുരാജ് ഉദ്ഘാടനം ചെയ്തു. ഡിസിഎംഎസ് സംസ്ഥാന ഡയറക്ടര്‍ ഫാ. ജോസുകുട്ടി ഇടത്തിനകം, സംസ്ഥാന ജനറല്‍ സെക്രട്ടറി ജസ്റ്റിന്‍ പി. സ്റ്റീഫന്‍, വിജയപുരം രൂപത ഇന്‍വോള്‍വിംഗ് ഡയറക്ടര്‍ ഫാ. ജോസഫ് തറയില്‍, ബിനോയി ജോണ്‍, മാത്യു ജോസഫ്, ടോമി പൂവത്തോലി എന്നിവര്‍ പ്രസംഗിച്ചു. ക്രൈസ്തവ ശക്തീകരണത്തില്‍ യുവജന പങ്കാളിത്തം എന്ന വിഷയത്തെ ആസ്പദമാക്കി ഡോ. സിജോ ജേക്കബ്, പിഎസ്‌‌സിയെ അറിയുവാന്‍ എന്ന വിഷയത്തെ ആസ്പദമാക്കി തിരുവനന്തപുരം ജില്ലാ റിട്ടയേർഡ് ഓഫീസര്‍ സാംസണ്‍ സൈമണ്‍ ജോസഫ് എന്നിവര്‍ ക്ലാസുകള്‍ നയിച്ചു.

പാലാ ജനറല്‍ ആശുപത്രി: ചോദ്യങ്ങളില്‍നിന്ന് മുനിസിപ്പല്‍ ഭരണസമിതി ഒളിച്ചോടുന്നതായി പ്രതിപക്ഷം

പാലാ: ജനറല്‍ ആശുപത്രിയിലെ കെട്ടിടങ്ങള്‍ക്ക് നമ്പരും അഗ്നിരക്ഷാസേനയുടെ എന്‍ഒസിയും ഉണ്ടോ എന്ന ചോദ്യത്തിന് തുടര്‍ച്ചയായ രണ്ടാം കൗണ്‍സില്‍ യോഗത്തിലും മറുപടി പറയാതെ ഭരണപക്ഷത്തിന്‍റെ ഒളിച്ചുകളി. കഴിഞ്ഞയാഴ്ച ചേര്‍ന്ന കൗണ്‍സില്‍ യോഗത്തില്‍ പ്രതിപക്ഷം ഇതുമായി ബന്ധപ്പെട്ട് ചോദ്യമുയര്‍ത്തിയപ്പോള്‍ അടുത്ത കൗണ്‍സില്‍ യോഗത്തില്‍ പരിശോധിച്ചു പറയാം എന്ന മറുപടിയാണ് സെക്രട്ടറി നല്‍കിയത്. തുടര്‍ന്ന് ഇന്നലെ നടന്ന കൗണ്‍സില്‍ യോഗത്തില്‍ പ്രതിപക്ഷ നേതാവ് പ്രഫ. സതീശ് ചൊള്ളാനി ഈ വിഷയം ഉന്നയിച്ചപ്പോള്‍ കൗണ്‍സിലില്‍ അജൻഡയ്ക്ക് പുറത്തുള്ള കാര്യങ്ങള്‍ ചര്‍ച്ച ചെയ്യേണ്ടതില്ല എന്ന സാങ്കേതികത്വം പറഞ്ഞ് അധികൃതരും ഭരണസമിതിയും ചെയര്‍മാനും ഒഴിഞ്ഞുമാറുകയായിരുന്നു. ‌വിവിധ സര്‍ക്കാര്‍ വകുപ്പുകള്‍ നടത്തിയ പരിശോധനയില്‍ ജനറല്‍ ആശുപത്രി കെട്ടിടങ്ങളുടെ സുരക്ഷാ വെല്ലുവിളികള്‍ ഉയര്‍ത്തിക്കാട്ടുന്ന റിപ്പോര്‍ട്ട് ചൂണ്ടിക്കാട്ടിയാണ് പ്രതിപക്ഷം ചോദ്യങ്ങള്‍ ഉയര്‍ത്തിയത്. സാങ്കേതികത്വത്തിന്‍റെ മറവില്‍ മൗനം പാലിക്കാതെ യാഥാര്‍ഥ്യം തുറന്നു പറയാനുള്ള ആര്‍ജവം ചെയര്‍മാനുണ്ടാവണമെന്നും അദ്ദേഹം ആവശ്യപ്പെട്ടു. പാലാ ജനറല്‍ ആശുപത്രിയിലെ കെട്ടിടങ്ങള്‍ക്ക് അഗ്നിരക്ഷാസേന എന്‍ഒസി ഇല്ല എന്നതടക്കമുള്ള വിഷയങ്ങള്‍ പുറത്തുവന്നിട്ട് ദിവസങ്ങളായിട്ടും അധികൃതരുടെ ഭാഗത്തുനിന്ന് ഒരു നടപടിയും പ്രതികരണവും ഉണ്ടായിട്ടില്ല. വിഷയത്തില്‍ ശക്തമായ തുടര്‍ സമരങ്ങള്‍ സംഘടിപ്പിക്കാനും പ്രതിപക്ഷം തീരുമാനിച്ചു. സുരക്ഷാ മാനദണ്ഡങ്ങള്‍ ഉറപ്പാക്കണം: കേരള കോണ്‍ഗ്രസ് പാലാ: കഴിഞ്ഞ ഏഴു വര്‍ഷമായി ഫയര്‍ സേഫ്റ്റി ഉറപ്പാക്കാതെ ജനറല്‍ ആശുപത്രി കെട്ടിടങ്ങള്‍ പ്രവര്‍ത്തിക്കാനിടയായ കാര്യം സമഗ്രമായി അന്വേഷിച്ച് അപാകതകള്‍ കണ്ടെത്തി പരിഹരിച്ച് രോഗികളുടെ സുരക്ഷ ഉറപ്പാക്കണമെന്ന് കേരള കോണ്‍ഗ്രസ് വര്‍ക്കിംഗ് ചെയര്‍മാന്‍ പി.സി. തോമസ് ആവശ്യപ്പെട്ടു. പാര്‍ട്ടി നിയോജകമണ്ഡലം കമ്മിറ്റി യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആശുപത്രി നിര്‍മാണത്തിലും ഇലക്‌ട്രിക് വര്‍ക്കിലും കണ്ടെത്തിയിരിക്കുന്ന അപാകതകള്‍ ഉടന്‍ പരിഹരിക്കണമെന്നും ആശുപത്രിവക സ്ഥലം അളന്ന് അതിരുകള്‍ സ്ഥാപിച്ചു കൈയേറ്റം തടയണമെന്നും അദ്ദേഹം ആവശ്യപ്പെട്ടു. നിയോജകമണ്ഡലം പ്രസിഡന്‍റ് ജോര്‍ജ് പുളിങ്കാട് അധ്യക്ഷത വഹിച്ചു. സംസ്ഥാന സെക്രട്ടറി ജനറല്‍ ജോയി ഏബ്രഹാം, ജില്ലാ പ്രസിഡന്‍റ് ജെയ്‌സണ്‍ ജോസഫ്, തോമസ് ഉഴുന്നാലില്‍, ജയിംസ് മാത്യു തെക്കേല്‍, മൈക്കിള്‍ പുല്ലുമാക്കല്‍, തങ്കച്ചന്‍ മണ്ണൂശേരി, ഷിബു പൂവേലില്‍, മത്തച്ചന്‍ പുതിയിടത്തുചാലില്‍, ജോയി കോലത്ത്, ജോബി കുറ്റിക്കാട്ട്, ജോഷി വട്ടക്കുന്നേല്‍ തുടങ്ങിയവര്‍ പ്രസംഗിച്ചു.

മൂന്നര പതിറ്റാണ്ടിനുശേഷം ഒരുവട്ടംകൂടി ഒത്തുചേർന്നു

കുന്നോന്നി: സെന്‍റ് ജോസഫ് യുപി സ്കൂളിലെ 1991-92 ബാച്ചുകാർ ഓർമകൾ ഓടിക്കളിക്കുന്ന മാതൃവിദ്യാലയത്തിന്‍റെ തിരുമുറ്റത്ത് ഒത്തുകൂടി. പതിറ്റാണ്ടുകൾക്കു ശേഷമുള്ള കണ്ടുമുട്ടലിൽ വിശേഷങ്ങൾ പറഞ്ഞും പഴയകാല ഓർമകൾ അയവിറക്കിയും ബാല്യകാല സഹപാഠികൾ മണിക്കൂറുകൾ ചെലവഴിച്ചു. സ്കൂൾ മാനേജർ ഫാ. മാത്യു പീടികയിൽ സംഗമം ഉദ്ഘാടനം ചെയ്തു. അനീഷ് കീച്ചേരി അധ്യക്ഷത വഹിച്ചു. മുൻ സ്കൂൾ മാനേജർ ഫാ. ജോർജ് പുതിയാപറമ്പിൽ മുഖ്യപ്രഭാഷണം നടത്തി. ഹെഡ്മിസ്ട്രസ് ഷീനാമോൾ ജേക്കബ്, മാത്യു ഫിലിപ്പ് അറമത്ത്, ജോബി ഇളംതുരുത്തിയിൽ, മോഹൻദാസ് തുണ്ടത്തിൽ തുടങ്ങിയവർ പ്രസംഗിച്ചു. പൂർവ അധ്യാപകരായ സിസ്റ്റർ മേഴ്സിറ്റ, സിസ്റ്റർ അൽഫോൻസ്, സിസ്റ്റർ ആലീസ്, ഓമന സഖറിയാസ്, എ.എം. ജോസഫ് ആരംപുളിക്കൽ തുടങ്ങിവരെ ആദരിച്ചു.

ബഡ്സ് റീഹാബിലിറ്റേഷന്‍ സെന്‍റര്‍ ഉദ്ഘാടനം നാളെ

കിടങ്ങൂര്‍: പഞ്ചായത്തിന്‍റെ നേതൃത്വത്തില്‍ ജില്ലയിലെ അഞ്ചാമത്തേതും പമ്പാടി ബ്ലോക്ക് പഞ്ചായത്തിലെ ആദ്യത്തേതുമായ ബഡ്സ് റീഹാബിലിറ്റേഷന്‍ സെന്‍റര്‍ ഉദ്ഘാടനം നാളെ 2.30ന് നടക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം നിര്‍വഹിക്കും. പഞ്ചായത്ത് പ്രസിഡന്‍റ് അഡ്വ. ഇ.എം. ബിനു അധ്യക്ഷത വഹിക്കും. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ താക്കോല്‍ദാനവും ഉപകരണങ്ങള്‍ കൈമാറലും നടത്തും. ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മുഖ്യപ്രഭാഷണം നടത്തും. ബ്ലോക്ക് പഞ്ചായത്ത് മെംബര്‍മാരായ ഡോ. മേഴ്സി ജോണ്‍, അശോക് കുമാര്‍ പൂതമന, വൈസ് പ്രസിഡന്‍റ് ടീന മാളിയേക്കല്‍ എന്നിവര്‍ പ്രസംഗിക്കും. ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച 20 ലക്ഷം രൂപയും പാമ്പാടി ബ്ലോക്ക് പഞ്ചായത്തിന്‍റെയും കിടങ്ങൂര്‍ പഞ്ചായത്തിന്‍റെയും അഞ്ചു ലക്ഷം രൂപ വീതവും ഉൾപ്പെടെ 30 ലക്ഷം രൂപ ഉപയോഗിച്ചാണ് റീഹാബിലിറ്റേഷന്‍ സെന്‍ററിന് ആവശ്യമായ കെട്ടിടം നിര്‍മിച്ചത്. കുടുംബശ്രീ ജില്ലാ മിഷന്‍ മുഖേന 12.5 ലക്ഷം രൂപയുടെ ഫര്‍ണിച്ചറുകളും ലഭ്യമായി. കുമ്മണ്ണൂര്‍ സാംസ്‌കാരിക നിലയത്തിനു സമീപമുള്ള പഞ്ചായത്തുവക സ്ഥലത്താണ് കെട്ടിടം നിര്‍മിച്ചിട്ടുള്ളത്. കിടങ്ങൂര്‍ പഞ്ചായത്ത് പ്രദേശത്തെയും സമീപപ്രദേശങ്ങളിലെയും ഭിന്നശേഷിക്കാരായ ആളുകളുടെ അഭയകേന്ദ്രം എന്ന നിലയിലേക്ക് ഈ സെന്‍റര്‍ മാറും. പ്രായവ്യത്യാസമില്ലാതെ ഭിന്നശേഷിക്കാരായ ആളുകള്‍ക്ക് ഈ സെന്‍ററിന്‍റെ ഗുണഭോക്താക്കളായി മാറുവാന്‍ സാധിക്കും. രാവിലെ പത്തുമുതല്‍ നാലുവരെയാണ് സെന്‍ററിന്‍റെ പ്രവര്‍ത്തനം.

മിനിമാസ്റ്റ് ലൈറ്റ് ഉദ്ഘാടനം ചെയ്തു

ചിറക്കടവ്: ആന്‍റോ ആന്‍റണി എംപിയുടെ പ്രദേശിക വികസന ഫണ്ടിൽനിന്ന് 2,19,500 രൂപ അനുവദിച്ച് മണ്ണംപ്ലാവ് പള്ളിപ്പടി ജംഗ്ഷനിൽ നിർമാണം പൂർത്തീകരിച്ച മിനിമാസ്റ്റ് ലൈറ്റിന്‍റെ ഉദ്ഘാടനം താമരക്കുന്ന് സെന്‍റ് ഇഫ്രേംസ് പള്ളി വികാരി ഫാ. റെജി മാത്യു നിർവഹിച്ചു. ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ അധ്യക്ഷത വഹിച്ചു. ജില്ലാ പഞ്ചായത്തംഗം ജെസി ഷാജൻ, എം.ജി. വിനോദ്, സേവ്യർ മൂലകുന്ന്, അഭിലാഷ് ചന്ദ്രൻ, ശ്യാം ബാബു, രാജു പാഴിയാങ്കൽ, റോബിൻ കുഴിമറ്റം, തോമസ് മണ്ണാത്ത്, ബിജു മുണ്ടുവേലിക്കുന്നേൽ, ഇന്ദുകല എസ്. നായർ എന്നിവർ പ്രസംഗിച്ചു.

കോഴിമാലിന്യങ്ങൾ സംസ്കരിക്കാനുള്ള റെൻഡറിംഗ് യൂണിറ്റ് പ്രവർത്തനമാരംഭിച്ചു

പാറത്തോട്: കോഴിമാലിന്യങ്ങൾ സംസ്കരിക്കാനുള്ള ജില്ലയിലെ ആദ്യത്തെ റെൻഡറിംഗ് യൂണിറ്റ് പാറത്തോട് അഞ്ചിലവിൽ പ്രവർത്തനമാരംഭിച്ചു. തദ്ദേശ സ്വയംഭരണ, എക്സൈസ് മന്ത്രി എം.ബി. രാജേഷ് ഉദ്ഘാടനം ചെയ്തു. റെൻഡറിംഗ് യൂണിറ്റുകൾ ആരംഭിച്ചതോടെ കേരളത്തിൽ കോഴിമാലിന്യങ്ങൾ മൂലം വഴി നടക്കാൻ കഴിയാതിരുന്ന സ്ഥിതിക്ക് മാറ്റം വന്നതായി അദ്ദേഹം പറഞ്ഞു. ടൺകണക്കിന് കോഴിമാലിന്യങ്ങൾ വഴിനീളെ നിക്ഷേപിക്കുന്ന സ്ഥിതിയുണ്ടായിരുന്നു. ഇതിന് പരിഹാരം കാണാനാണ് സർക്കാർ റെൻഡറിംഗ് പ്ലാന്‍റുകൾ പബ്ലിക്, പ്രൈവറ്റ് പാർട്ടിസിപ്പേഷൻ അടിസ്ഥാനത്തിൽ ആരംഭിക്കാൻ തീരുമാനിച്ചതെന്നും ഇന്ന് കേരളത്തിലാകെ 42 റെൻഡറിംഗ് പ്ലാന്‍റുകൾ ആരംഭിക്കാൻ കഴിഞ്ഞതായും മന്ത്രി കൂട്ടിച്ചേർത്തു. സമ്മേളനത്തിൽ സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിച്ചു. ചീഫ് വിപ്പ് ഡോ. എൻ. ജയരാജ് കുക്കർ സ്വിച്ച്ഓൺ കർമം നിർവഹിച്ചു. പാറത്തോട് പഞ്ചായത്ത് പ്രസിഡന്‍റ് കെ.കെ. ശശികുമാർ, എരുമേലി പഞ്ചായത്ത് പ്രസിഡന്‍റ് മറിയാമ്മ സണ്ണി, ബ്ലോക്ക് പഞ്ചായത്തംഗം സാജൻ കുന്നത്ത്, സിനിൽ വി. മാത്യു, ബോണി വി. സെബാസ്റ്റ്യൻ, മാർട്ടിൻ ഡേവിഡ് എന്നിവർ പ്രസംഗിച്ചു. സംസ്ഥാന സർക്കാരിന്‍റെ മാലിന്യമുക്ത നവകേരള പദ്ധതിയുടെ ഭാഗമായി സംസ്ഥാന ശുചിത്വമിഷന്‍റെ അംഗീകാരത്തോടെയാണ് യുണൈറ്റഡ് റെൻഡറിംഗ് യൂണിറ്റ് പ്രവർത്തനം ആരംഭിച്ചിരിക്കുന്നത്. കോഴിമാലിന്യങ്ങൾ സംസ്കരിച്ച് വളർത്തുമൃഗങ്ങൾക്കുള്ള ഭക്ഷണവും കൃഷിക്കുള്ള വളവുമാക്കി മാറ്റുകയാണ് ഇവിടെ ചെയ്യുന്നത്.

കോൺഗ്രസ് പ്രതിഷേധ മാർച്ച് നടത്തും

കാഞ്ഞിരപ്പള്ളി: മാസങ്ങളായി പൊളിച്ചിട്ടിരിക്കുന്ന വില്ലണി കോഴികൊത്തി പാലവും മഞ്ഞപ്പള്ളി പുളിമാക്കൽ പാലവും അടിയന്തരമായി പുനർനിർമിക്കണമെന്ന് ആവശ്യപ്പെട്ട് കോൺഗ്രസ് ആനക്കല്ല്, മഞ്ഞപ്പള്ളി വാർഡ് കമ്മിറ്റികളുടെ നേതൃത്വത്തിൽ നാളെ വില്ലണിയിൽനിന്നു മഞ്ഞപ്പള്ളിയിലേക്ക് പ്രതിഷേധ മാർച്ച് നടത്തുമെന്ന് ഭാരവാഹികൾ അറിയിച്ചു. തമ്പലക്കാട്, എറികാട്, തുമ്പമട പ്രദേശങ്ങളിൽനിന്നു നൂറുകണക്കിനാളുകൾ കാഞ്ഞിരപ്പള്ളി-ഈരാറ്റുപേട്ട റോഡിലേക്ക് എത്താൻ ഉപയോഗിച്ചിരുന്ന പാലങ്ങൾ പുനർനിർമിക്കാൻ എന്ന പേരിൽ മാസങ്ങളായി പൊളിച്ചിട്ടിരിക്കുകയാണ്. ഇതുമൂലം പൊതുജനങ്ങൾ വളരെയേറെ ബുദ്ധിമുട്ടുകയാണ്. അടിയന്തര ആവശ്യങ്ങൾക്കുപോലും കിലോമീറ്ററുകൾ ചുറ്റി യാത്ര ചെയ്യേണ്ട സാഹചര്യമാണ്. പാലങ്ങൾ പൊളിച്ചിട്ടതല്ലാതെ പുനർനിർമിക്കാൻ ഒരു നടപടിയും ബന്ധപ്പെട്ട ജനപ്രതിനിധികളുടെ ഭാഗത്തുനിന്ന് ഉണ്ടാകുന്നില്ല. പാലത്തിന് ഫണ്ട് അനുവദിച്ചെന്നു പ്രഖ്യാപിച്ച് ഫ്ലക്സ് ബോർഡുകൾ വച്ചതല്ലാതെ പുനർനിർമിക്കാൻ യാതൊരു നടപടിയും സ്വീകരിക്കാത്തത് പൊതുജനങ്ങളോടുള്ള വെല്ലുവിളിയാണെന്നും കോൺഗ്രസ് വാർഡ് കമ്മിറ്റികൾ ആരോപിച്ചു. നാളെ വൈകുന്നേരം നാലിന് വില്ലണിയിൽ പൊളിച്ചിട്ടിരിക്കുന്ന കോഴികൊത്തി പാലത്തിന് സമീപത്തുനിന്ന് പ്രതിഷേധ മാർച്ച് ആരംഭിക്കും.

വിശ്വാസജീവിത അധ്യാപക പരിശീലനം

കാഞ്ഞിരപ്പള്ളി: വിശ്വാസജീവിത പരിശീലകര്‍ക്കായി കാഞ്ഞിരപ്പള്ളി രൂപത വിശ്വാസജീവിത പരിശീലനകേന്ദ്രം ഒരുക്കിയ അധ്യാപക പരിശീലനം രൂപതാധ്യക്ഷന്‍ മാര്‍ ജോസ് പുളിക്കല്‍ ഉദ്ഘാടനം ചെയ്തു. സെന്‍റ് ഡൊമിനിക്‌സ് കത്തീഡ്രല്‍ വികാരി റവ.ഡോ. കുര്യന്‍ താമരശേരി, രൂപത വിശ്വാസജീവിത പരിശീലന ഡയറക്ടര്‍ ഫാ. തോമസ് വാളന്മനാല്‍ എന്നിവര്‍ പ്രസംഗിച്ചു. സഭാത്മക ജീവിതത്തില്‍ അടിത്തറ പാകി, അറിവിലൂടെ അനുഭവത്തിലേക്ക് കുട്ടികളെ നയിക്കുവാന്‍ നൂതന രീതിയിലുള്ള ബോധനരീതി പരിചയപ്പെടുത്തുകയാണ് പരിശീലന പരിപാടിയിലൂടെ ലക്ഷ്യമിടുന്നത്.

വനിതാ സ്വയംസംരംഭക വായ്പാമേളയും ബോധവത്കരണ പരിപാടിയും

വാഴൂര്‍: സംസ്ഥാന വനിതാ വികസന കോര്‍പറേഷന്‍ ദേശീയ ന്യൂനപക്ഷ കോര്‍പറേഷന്‍റെയും വാഴൂര്‍ പഞ്ചായത്തിന്‍റെയും സഹകരണത്തോടെ വനിതകള്‍ക്കായുള്ള വായ്പാമേളയും ബോധവത്കരണ പരിപാടിയും സംഘടിപ്പിച്ചു. വാഴൂര്‍ പഞ്ചായത്ത് ഹാളില്‍ നടന്ന പരിപാടിയില്‍ വാഴൂര്‍ സിഡിഎസിനുള്ള വായ്പാത്തുകയായ മൂന്നു കോടി രൂപയുടെ വിതരണവും വായ്പാമേളയുടെ ഉദ്ഘാടനവും ചീഫ് വിപ്പ് ഡോ. എന്‍. ജയരാജ് നിര്‍വഹിച്ചു. വാഴൂര്‍ പഞ്ചായത്ത് പ്രസിഡന്‍റ് തോമസ് വെട്ടുവേലില്‍ അധ്യക്ഷത വഹിച്ചു. വനിതാ വികസന കോര്‍പറേഷന്‍ മാനേജിംഗ് ഡയറക്ടര്‍ വി.സി. ബിന്ദു, വനിതാ വികസന കോര്‍പറേഷന്‍ ഡയറക്ടര്‍ പെണ്ണമ്മ തോമസ്, പഞ്ചായത്ത് വൈസ് പ്രസിഡന്‍റ് ഡി. സേതുലക്ഷ്മി, വാഴൂര്‍ ഫാര്‍മേഴ്‌സ് ബാങ്ക് പ്രസിഡന്‍റ് ബൈജു കെ. ചെറിയാന്‍, വാഴൂര്‍ പഞ്ചായത്തംഗങ്ങളായ ജിജി നെടുവത്താനി, പി.ജെ. ശോശാമ്മ , ശ്രീകാന്ത് പി. തങ്കച്ചന്‍, വാഴൂര്‍ സിഡിഎസ് ചെയര്‍പേഴ്‌സണ്‍ സ്മിത ബിജു, വനിതാ വികസന കോര്‍പറേഷന്‍ എറണാകുളം മേഖലാ മാനേജര്‍ എം.ആര്‍. രംഗന്‍ എന്നിവര്‍ പ്രസംഗിച്ചു.

വളര്‍ത്തുമൃഗങ്ങളുടെ വന്ധ്യംകരണം : സഞ്ചരിക്കുന്ന ഓപ്പറേഷന്‍ യൂണിറ്റുകള്‍ പ്രവര്‍ത്തനം തുടങ്ങി

കോട്ടയം: ജില്ലയിലെ വളര്‍ത്തുമൃഗങ്ങളുടെ വന്ധ്യംകരണത്തിന് ജില്ലാ വെറ്ററിനറി കേന്ദ്രത്തിന്‍റെ ആഭിമുഖ്യത്തില്‍ സഞ്ചരിക്കുന്ന ഓപ്പറേഷന്‍ യൂണിറ്റുകള്‍ പ്രവര്‍ത്തനം തുടങ്ങി. റീബില്‍ഡ് കേരള ഇനിഷേറ്റീവിന്‍റെ ഭാഗമായിട്ടാണ് ജില്ലയില്‍ ആറിടത്തു സേവനം ലഭ്യമാക്കുക. നിലവില്‍ കോടിമത ജില്ലാ വെറ്ററിനറി കേന്ദ്രത്തില്‍ വന്ധ്യംകരണത്തിനുള്ള സൗകര്യമുണ്ട്. ഇതിനു പുറമേ പാലാ, കാഞ്ഞിരപ്പള്ളി, ചങ്ങനാശേരി വെറ്ററിനറി കേന്ദ്രങ്ങളിലും വാഴൂര്‍, മരങ്ങാട്ടുപിള്ളി, മാഞ്ഞൂര്‍ എന്നീ മൃഗാശുപത്രികളിലുമാണു മൊബൈല്‍ യൂണിറ്റുകളുടെ സേവനം ലഭ്യമാക്കുന്നത്. വളര്‍ത്തുനായ്ക്കള്‍, പൂച്ച എന്നിവയുടെ വന്ധ്യംകരണമാണു പ്രധാനമായും നടത്തുന്നുത്. വളര്‍ത്തുമൃഗങ്ങളുടെ ഉടമസ്ഥര്‍ അതാതു കേന്ദ്രങ്ങളില്‍ എത്തി പേരു രജിസ്റ്റര്‍ ചെയ്തു കഴിയുമ്പോള്‍ ശസ്ത്രക്രിയയ്ക്കുള്ള തീയതി നിശ്ചയിച്ച് ഉടമസ്ഥരെ അറിയിക്കും. ഈ ദിവസം വളര്‍ത്തുമൃഗങ്ങളുമായി ഉടമസ്ഥര്‍ എത്തണം. മൊബൈല്‍ സര്‍ജറി യൂണിറ്റില്‍ ആംബുലന്‍സ്, രണ്ടു ഡോക്ടര്‍മാര്‍, സര്‍ജന്‍, ഡ്രൈവര്‍ കം അറ്റന്‍ഡര്‍ എന്നിവരാണുള്ളത്. വന്ധ്യംകരണത്തിനു പുറമേ സിസേറിയന്‍, മുഴകള്‍ നീക്കം ചെയ്യല്‍ തുടങ്ങിയ ശസ്ത്രക്രിയകളും നടത്തുമെന്നും സര്‍ക്കാര്‍ നിശ്ചയിച്ച ഫീസാണ് ഈടാക്കുന്നതെന്നും ജില്ലാ മൃഗസംരക്ഷണ ഓഫീസര്‍ ഡോ. പി.കെ. മനോജ് കുമാര്‍ പറഞ്ഞു. വന്ധ്യംകരണ ശസ്ത്രക്രിയയ്ക്ക് നായ്ക്കള്‍ക്ക് 2,500 രൂപയും പൂച്ചകള്‍ക്ക് 1,500 രൂപയുമാണ്.

പാറിപ്പറന്ന് വിത്തുവിതച്ച് ഡ്രോണ്‍

കോട്ടയം: കര്‍ഷകരും ഉദ്യോഗസ്ഥരും കാഴ്ചക്കാരായി നോക്കി നിൽക്കേ ഡ്രോണ്‍ പറന്നുനടന്ന് വിത്ത് വിതച്ചു. തിരുവാര്‍പ്പ് പഞ്ചായത്തിലെ മോര്‍കാട് പാടശേഖരത്തിലാണ് നബാര്‍ഡിന്‍റെ സാമ്പത്തിക സഹായത്തോടെ കൃഷിവിജ്ഞാന്‍ കേന്ദ്രത്തിന്‍റെ നേതൃത്വത്തില്‍ ഡ്രോണ്‍ ഉപയോഗിച്ചു നൂതനരീതിയില്‍ വിത്തു വിതച്ചത്. ഒരേക്കറില്‍ ഏകദേശം 30 കിലോഗ്രാം വിത്ത് മാത്രമാണ് ഉപയോഗിച്ചത്. കര്‍ഷകര്‍ ചെളിയില്‍ ഇറങ്ങി വിത്ത് വിതയ്ക്കുന്ന പരമ്പരാഗത രീതിക്കു പകരമാണ് ഡ്രോണ്‍ ഉപയോഗിച്ച് വിതയ്ക്കുന്നത്. ഇത്തരത്തില്‍ വിതയ്ക്കുമ്പോള്‍ പുളി ഇളകുന്നത് തടയാനും വിത്ത് ചെളിയില്‍ താഴ്ന്നു പോകാതിരിക്കാനും സഹായകരമാണ്. ഇതുവഴി വിത്തിന്‍റെ ഉപയോഗം കുറയ്ക്കാനും സമയം ലഭിക്കാനും തൊഴിലാളി ക്ഷാമം പരിഹരിക്കാനും ചെലവു കുറക്കാനും സാധിക്കും. കഴിഞ്ഞ വര്‍ഷത്തില്‍ പരീക്ഷണാടിസ്ഥാനത്തില്‍ കൃഷിവിജ്ഞാന്‍ കേന്ദ്രം ഡ്രോണ്‍ ഉപയോഗിച്ച് വിത്ത് വിതയ്ക്കല്‍ കോട്ടയം, ആലപ്പുഴ ജില്ലകളിലെ വിവിധ പാടശേഖരങ്ങളില്‍ നടപ്പിലാക്കിയിരുന്നു. സാധാരണ രീതിയില്‍ വിതച്ച പാടങ്ങളുമായി താരതമ്യം ചെയ്തപ്പോള്‍ ഡ്രോണിലൂടെ വിതച്ച പാടശേഖരത്തില്‍ ചിനപ്പുകളുടെ എണ്ണം കൂടുതലായും നെല്‍മണികളുടെ തൂക്കം ഉയര്‍ന്നതായും കണ്ടെത്താന്‍ സാധിച്ചിരുന്നു. ഇതിന്‍റെ ഫലമായി നെല്ലിന്‍റെ മൊത്തം വിളവ് ശരാശരി 20 ശതമാനം മുതല്‍ 30 ശതമാനം വരെ വര്‍ധിച്ചിരുന്നു. ഡ്രോണ്‍ ഉപയോഗിച്ചുള്ള വിതയും വളപ്രയോഗവും കര്‍ഷകരില്‍ കൂടുതല്‍ പ്രചരിപ്പിക്കുക എന്ന ലക്ഷ്യത്തോടെയാണ് നബാര്‍ഡിന്‍റെ സാമ്പത്തിക സഹായത്തോടെ പ്രത്യേക പദ്ധതി നടപ്പിലാക്കുന്നത്. തിരുവാര്‍പ്പ് പഞ്ചായത്തംഗം സി.ടി. രാജേഷിന്‍റെ അധ്യക്ഷതയില്‍ ചേര്‍ന്ന യോഗത്തില്‍ പഞ്ചായത്ത് പ്രസിഡന്‍റ് ഒ.എസ്. അനീഷ് കുമാര്‍ വിത ഉദ്ഘാടനം ചെയ്തു. നബാര്‍ഡ് ജില്ലാ മാനേജര്‍ റെജി വര്‍ഗീസ്, കൃഷിവിജ്ഞാന്‍ കേന്ദ്രം സീനിയര്‍ സയന്‍റിസ്റ്റ് ഡോ. ജി. ജയലക്ഷ്മി, കൃഷി ഓഫീസര്‍ നസിയ സത്താര്‍ എന്നിവര്‍ പ്രസംഗിച്ചു.

ശബരി എയര്‍പോര്‍ട്ട് സര്‍വേ ഒന്നാം ഘട്ടം പൂർത്തിയാകുന്നു

കോട്ടയം: എരുമേലിയില്‍ ശബരി എയര്‍പോര്‍ട്ട് നിര്‍മാണത്തിനു മുന്നോടിയായി മണിമല വില്ലേജിലെ സ്ഥലം സര്‍വേ അവസാനഘട്ടത്തില്‍. എരുമേലി തെക്ക് വില്ലേജ് പരിധിയിലെ സ്ഥലം സര്‍വേ വ്യാഴാഴ്ച ആരംഭിക്കും. സ്ഥലം അളക്കുന്നതിനൊപ്പം അവിടുള്ള കെട്ടിടം, മരങ്ങള്‍ എന്നിവയുടെ കണക്കെടുപ്പും നടത്തുന്നുണ്ട്. സ്ഥലം ഏറ്റെടുക്കുമ്പോള്‍ പൊന്നുംവില റവന്യു വകുപ്പും മരങ്ങളുടേത് വനംവകുപ്പും കെട്ടിടങ്ങളുടേത് പൊതുമാരാമത്തുമാണ് നിര്‍ണയിക്കുക. സ്വകാര്യവ്യക്തികളുടെ സ്ഥലം സര്‍വേയ്ക്ക് ശേഷമായിരിക്കും രണ്ടു വില്ലേജുകളിലുമായുള്ള ബിലീവേഴ്‌സ് ചര്‍ച്ചിനു കീഴില്‍ അയന ചാരിറ്റബിള്‍ ട്രസ്റ്റിനു കൈവശമുള്ള ചെറുവള്ളി എസ്റ്റേറ്റ് സര്‍വേ ആരംഭിക്കുക. എരുമേലി തെക്ക്, മണിമല വില്ലേജുകളില്‍നിന്ന് 1039.876 ഹെക്ടറാണ് വിമാനത്താവളത്തിന് ഏറ്റെടുക്കുന്നത്. എരുമേലി തെക്ക് വില്ലേജ് ബ്ലോക്ക് നമ്പര്‍ 23ല്‍ ഉള്‍പ്പെട്ട 366 പേരുടെയും മണിമല വില്ലേജ് ബ്ലോക്ക് നമ്പര്‍ 19ല്‍ ഉള്‍പ്പെട്ട 73 പേരുടെയും സ്ഥലങ്ങള്‍, ബ്ലോക്ക് നമ്പര്‍ 22ല്‍ ഉള്‍പ്പെട്ട ഗോസ്പല്‍ ഫോര്‍ ഏഷ്യയും സര്‍ക്കാരും തമ്മില്‍ ഉടമസ്ഥാവകാശത്തര്‍ക്കം കോടതിയില്‍ നിലനില്‍ക്കുന്ന 811.42 ഹെക്ടര്‍, 22-ാം നമ്പര്‍ ബ്ലോക്കില്‍ ഉള്‍പ്പെട്ട 42.58 ഹെക്ടര്‍, 22-ാം ബ്ലോക്കില്‍ ഉള്‍പ്പെട്ട മലയാളം പ്ലാന്‍റേഷനു സര്‍ക്കാരും തമ്മില്‍ കോടതിയില്‍ ഉടമസ്ഥാവകാശത്തര്‍ക്കം നിലനില്‍ക്കുന്ന 1.83 ഹെക്ടര്‍, മണിമല വില്ലേജില്‍ 21-ാം ബ്ലോക്കില്‍ ഉള്‍പ്പെട്ടതും ഗോസ്പല്‍ ഫോര്‍ ഏഷ്യയും സര്‍ക്കാരും തമ്മില്‍ ഉടമസ്ഥാവകാശത്തര്‍ക്കം കോടതിയില്‍ നിലനില്‍ക്കുന്നതുമായ 60.4375 ഹെക്ടർ എന്നിവയാണ് ഏറ്റെടുക്കുന്നത്. ആകെ 352 കുടുംബങ്ങള്‍ക്കാണ് സ്ഥലം നഷ്ടപ്പെടുന്നത്. നാലു മാസത്തിനുള്ളില്‍ സര്‍വേ നടപടികള്‍ പൂര്‍ത്തിയാകും.

ട്രെയിനില്‍ യുവതിക്കു നേരേ ലൈംഗികാതിക്രമം: യുവാവ് അറസ്റ്റില്‍

കോട്ടയം: ട്രെയിനില്‍ യുവതിയോടു ലൈംഗികാതിക്രമം കാട്ടിയ കേസില്‍ യുവാവ് അറസ്റ്റില്‍. തൃശൂര്‍ ചെറ്റുപുഴ വട്ടപ്പള്ളിയില്‍ വി.ജി. ഷനോജിനെയാണ് (45) കോട്ടയം റെയില്‍വേ പോലീസ് അറസ്റ്റ് ചെയ്തത്. ഇന്നലെ പുലര്‍ച്ചെ ഒന്നോടെ മംഗലാപുരം-തിരുവനന്തപുരം എക്സ്പ്രസിലായിരുന്നു കേസിനാസ്പദമായ സംഭവം നടന്നത്. യാത്രക്കാരിയായ യുവതിയുടെ പരാതിയെത്തുടര്‍ന്ന് ടിടിഇ നല്‍കിയ പരാതിയുടെ അടിസ്ഥാനത്തിലാണ് പ്രതിയെ പോലീസ് പിടികൂടിയത്. തുടര്‍ന്നു നടത്തിയ അന്വേഷണത്തില്‍ ട്രെയിന്‍ യാത്രക്കാരിയായ മറ്റൊരു പെണ്‍കുട്ടിയോടും പ്രതി ലൈംഗികാതിക്രമം നടത്തിയതായി കണ്ടെത്തി. ഇയാള്‍ക്കെതിരേ അയ്യന്തോള്‍, തൃശൂര്‍ ട്രാഫിക്, തൃശൂര്‍ വെസ്റ്റ്, തൃശൂര്‍ ആര്‍പിഎഫ്, തൃശൂര്‍ മെഡിക്കല്‍ കോളജ്, കണ്ണൂര്‍ ഇരിട്ടി സ്റ്റേഷനുകളിലും കേസുണ്ട്.

റബര്‍വില വീണ്ടും 210 രൂപയിലേക്ക്

കോട്ടയം: ആഭ്യന്തര ഉത്പാദനം നാമമാത്രമായതോടെ റബര്‍ ഷീറ്റ് വില വീണ്ടും മെച്ചപ്പെട്ടു. ആര്‍എസ്എസ് നാല് ഗ്രേഡിന് 207.50, ഗ്രേഡ് അഞ്ചിന് 203.50 രൂപയാണ് ഇന്നലെ റബര്‍ ബോര്‍ഡ് പ്രഖ്യാപിത നിരക്ക്. ഡീലര്‍മാര്‍ 206 രൂപയ്ക്കുവരെ കര്‍ഷകരില്‍നിന്ന് ചരക്ക് വാങ്ങി. ചില കമ്പനികള്‍ 210 രൂപയ്ക്ക് ഡീലര്‍മാരില്‍നിന്ന് ഷീറ്റ് വാങ്ങാന്‍ തയാറായി. കഴിഞ്ഞ വര്‍ഷം ജൂലൈ 14നും ഇതേ തോതിലായിരുന്നു വില. വരുംദിവസങ്ങളിലും ഷീറ്റ് വില ഉയരാനാണ് സാഹചര്യം. വ്യവസായികള്‍ക്ക് ചരക്ക് കിട്ടാനില്ലെന്നതാണ് വില കയറാനുള്ള കാരണം. ലാറ്റക്‌സ് വിലയിലും ഗണ്യമായ കയറ്റമുണ്ട്. ഫാക്ടറികളില്‍ ലാറ്റക്‌സ് സ്റ്റോക്ക് തീരെ കുറവാണ്. മുന്‍നിര കമ്പനികള്‍ തമിഴ്‌നാട്ടില്‍ നിന്നും ലാറ്റക്‌സ് എത്തിക്കാന്‍ തുടങ്ങി. ഒട്ടുപാല്‍ വില 137 രൂപയിലെത്തി. റബര്‍ ആഭ്യന്തര ഡിമാന്‍ഡ് അടുത്ത വര്‍ഷം 17 ലക്ഷം ടണ്ണിലേക്ക് ഉയരുമെന്നാണ് വ്യവസായികളുടെ കണക്കൂകൂട്ടല്‍.

കിഴക്കന്‍ മലയോരത്ത് പുലിയിറങ്ങി

കോട്ടയം: ജില്ലയുടെ കിഴക്കന്‍ മേഖലയില്‍ പമ്പ മലയോര ഗ്രാമങ്ങള്‍ പുലിപ്പേടിയില്‍. കോട്ടയം-പത്തനംതിട്ട ജില്ലാ അതിര്‍ത്തിയില്‍ പമ്പാവാലി, ഏഞ്ചല്‍വാലി, ചാത്തന്‍തറ, നിരവ് പ്രദേശങ്ങളില്‍ ഏറെക്കാലമായി പുലി സാന്നിധ്യമുണ്ട്. ചാത്തന്‍തറയ്ക്ക് സമീപം താന്നിക്കാക്കുഴിയില്‍ ഇന്നലെ രാവിലെ ടാപ്പിംഗിനെത്തിയവർ പുലിയെ കണ്ട് ഭയന്നോടി. വനപാലകരെത്തി നടത്തിയ പരിശോധയില്‍ പുലിയുടെ കാല്‍പാദ അടയാളങ്ങള്‍ കണ്ടെത്തി. ഇന്നലെ കണ്ടത് കടുവയാണെന്നും ആശങ്കയുണ്ട്. പമ്പ വനാതിര്‍ത്തിയില്‍ കടുവയുടെ സാന്നിധ്യം മുന്‍പും കണ്ടിരുന്നു. ജനവാസമേഖലയില്‍ പുലിയിറങ്ങിയതോടെ പുലിയെ കൂട്ടിലാക്കാനുള്ള ശ്രമത്തിലാണ് വനംവകുപ്പ്. കാട്ടാന, കാട്ടുപോത്ത്, കാട്ടുപന്നി, കുരങ്ങ് എന്നിവയുടെ സാന്നിധ്യം പതിവാണ്. കാടുകയറിയ റബര്‍ തോട്ടങ്ങളില്‍ വന്യമൃഗശല്യം രൂക്ഷമാണ്. കോരുത്തോട്, മതമ്പ പ്രദേശങ്ങളിലും വന്യമൃഗശല്യം രൂക്ഷമാണ്.

റാബീസ് ഫ്രീ കോട്ടയം പദ്ധതി ഊര്‍ജിതമാക്കി മൃഗസംരക്ഷണ വകുപ്പ്

കോട്ടയം: തെരുവുനായ ശല്യം വര്‍ധിക്കുന്ന സാഹചര്യത്തില്‍ റാബീസ് ഫ്രീ കോട്ടയം പദ്ധതി ഊര്‍ജിതമാക്കി മൃഗസംരക്ഷണ വകുപ്പ്. കംപാഷിന്‍ ഫോര്‍ ആനിമല്‍ വെല്‍ഫെയര്‍ അസോസിയേഷന്‍ എന്ന സന്നദ്ധ സംഘടനയുമായി ചേര്‍ന്നു കഴിഞ്ഞ രണ്ടു വര്‍ഷമായി തെരുവുനായ്ക്കള്‍ക്ക് പേവിഷബാധ പ്രതിരോധ കുത്തിവയ്പ് എടുക്കാത്ത 23 തദ്ദേശ സ്വയം ഭരണസ്ഥാപനങ്ങളില്‍ പേവിഷബാധ പ്രതിരോധ കുത്തിവയ്പ് സാമ്പൂര്‍ണമായി ചെയ്യുന്നതിനുള്ള നടപടികളാണ് ആരംഭിച്ചിരിക്കുന്നത്. കോട്ടയം നഗരസഭയില്‍ 727 തെരുവുനായ്ക്കളെയും ഏറ്റുമാനൂര്‍ നഗരസഭയില്‍ 271 തെരുവുനായ്ക്കളെയും ഇതിനോടകം പ്രതിരോധ കുത്തിവയ്പിനു വിധേയമാക്കി. കുമരകത്ത് 209 നായ്ക്കളെയും അയ്മനത്ത് 310 തെരുവുനായ്ക്കളെയും കുത്തിവയ്പിനു വിധേയമാക്കി. സിഎഡബ്ല്യുഎയുടെ വാക്‌സിനേഷന്‍ ടീം ഓരോ തദ്ദേശ സ്വയം ഭരണ സ്ഥാപനങ്ങളിലെയും ഹോട്ട് സ്‌പോട്ടുകള്‍ ഐഡന്‍റിഫൈ ചെയ്തു കൃത്യമായ രീതിയില്‍ തെരുവു നായ്ക്കളെ പിടിച്ച് വാക്‌സിനേഷന്‍ ചെയ്തു താത്കാലികമായ ഐഡന്‍റിഫിക്കേഷന്‍ മാര്‍ക്കുമിട്ട് ലൊക്കേഷന്‍ സ്ഥിരീകരിച്ച് ഡേറ്റാബേസ്, ഡബ്ല്യുവിഎസ് എന്നു പറയുന്ന ആപ്പില്‍ ശേഖരിച്ചാണു പ്രതിരോധ കുത്തിവയ്പ് നടത്തുന്നത്. ഇതിനായി ഒരു വാഹനവും ഡോഗ് ക്യാച്ചിംഗ് ഉപകരണങ്ങളും വാക്‌സിനേഷന്‍ ടീമിനു നല്‍കിയിട്ടുണ്ട്. തെരുവു നായ്ക്കളില്‍നിന്നാണ് 90 ശതമാനം പേവിഷബാധ ഏല്‍ക്കുന്നത് എന്നതിനാല്‍ ഈ പദ്ധതിക്ക് വലിയ പ്രസക്തിയാണുള്ളത്. പദ്ധതിയോടൊപ്പം എബിസി പദ്ധതിയും നടന്നു വരുന്നുണ്ട്. ഇതോടെ അനിയന്ത്രിതമായ തെരുവുനായ ശല്യത്തിനു പരിഹാരമാകുമെന്നാണ് മൃഗസംരക്ഷണ വകുപ്പിന്‍റെ പ്രതീക്ഷ. നായ്ക്കള്‍ക്ക് കുത്തിവയ്പ് നല്‍കുന്നതിനു പുറമേ പൊതുജന ബോധവത്കരണത്തിന്‍റെ ഭാഗമായി സ്‌കൂള്‍, കോളജ് വിദ്യാര്‍ഥികള്‍ക്കും പൊതുജനങ്ങള്‍ക്കും പേവിഷബാധയെ ഏതു രീതിയില്‍ പ്രതിരോധിക്കാമെന്നും നായ്ക്കളുടെ കടിയില്‍നിന്നും എങ്ങനെ രക്ഷപ്പെടാമെന്നും കടിയേറ്റു കഴിഞ്ഞാല്‍ അടിയന്തരമായി സ്വീകരിക്കേണ്ട പ്രഥമ ശുശ്രൂഷാ മാര്‍ഗങ്ങളെക്കുറിച്ചും ക്ലാസും നടത്തുണ്ട്. ഇതിന്‍റെ ഭാഗമായി 356 സെഷനുകളിലായി 10,515 കുട്ടികള്‍ക്ക് ബോധവത്കരണം ഇതിനോടകം നടത്തി. 96 കമ്യൂണിറ്റി ബോധവത്കരണ സെഷനുകളിലായി 6,145 പേരും പങ്കെടുത്തു. പദ്ധതിയിലൂടെ തെരുവുനായ്ക്കളെ പൂര്‍ണമായും പേവിഷബാധയില്‍നിന്നും സംരക്ഷിക്കാന്‍ സാധിക്കുമെന്ന് ജില്ലാ മൃഗസംരക്ഷണ ഓഫീസര്‍ ഡോ. പി.കെ. മനോജ്കുമാര്‍ പറഞ്ഞു.

മെഡി.‍ കോളജ് അപകടം: ആരോപണങ്ങളെ പ്രതിരോധിക്കാന്‍ പൊതുജനാരോഗ്യ സംരക്ഷണ സദസുമായി എല്‍ഡിഎഫ്

കോട്ടയം: കോട്ടയം മെഡിക്കല്‍ കോളജില്‍ കെട്ടിടത്തിന്‍റെ ഒരു ഭാഗം ഇടിഞ്ഞു വീണു വീട്ടമ്മ മരിക്കാനിടയായ സംഭവത്തില്‍ പ്രതിപക്ഷം സര്‍ക്കാരിനെതിരേ നടത്തുന്ന സമരങ്ങളെയും ആരോപണങ്ങളെയും പ്രതിരോധിക്കുന്നതിനായി എല്‍ഡിഎഫ് നേതൃത്വത്തില്‍ പൊതുജനാരോഗ്യ സംരക്ഷണ സദസ് സംഘടിപ്പിക്കുന്നു. ജില്ലയിലെ വിവിധ മേഖലകളിലാണ് സദസ്. ആദ്യ സദസ് ഇന്നലെ പാലായില്‍ നടന്നു. കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണിയാണ് സദസ് ഉദ്ഘാടനം ചെയ്തത്. നാളെ വൈകുന്നേരം നാലിന് കോട്ടയം തിരുനക്കരയില്‍ നടക്കുന്ന സംരക്ഷണ സദസ് ഉദ്ഘാടനം ചെയ്യുന്നത് മുന്‍ ആരോഗ്യമന്ത്രിയും സിപിഎം കേന്ദ്ര കമ്മിറ്റിയംഗവുമായ കെ.കെ. ഷൈലജയാണ്. തിരുവനന്തപുരം മെഡിക്കല്‍ കോളജിലെ ഡോക്ടറുടെ വെളിപ്പെടുത്തലും കോട്ടയത്ത് കെട്ടിടം ഇടിഞ്ഞുവീണതുമായി ബന്ധപ്പെട്ട് ആരോഗ്യവകുപ്പിനും ആരോഗ്യമന്ത്രി വീണാ ജോര്‍ജിനുമെതിരേ വലിയ പ്രതിഷേധങ്ങളും ആരോപണങ്ങളുമാണുണ്ടായത്. ഇതിനെ പ്രതിരോധിക്കുന്നതിനും സര്‍ക്കാരും ആരോഗ്യവകുപ്പും കഴിഞ്ഞ ഒമ്പതു വര്‍ഷത്തിനിടയില്‍ ആരോഗ്യമേഖലയില്‍, പ്രത്യേകിച്ച് മെഡിക്കല്‍ കോളജുകള്‍ കേന്ദ്രീകരിച്ച് നടപ്പാക്കുന്ന വികസന പദ്ധതികളും ക്ഷേമ പ്രവര്‍ത്തനങ്ങളും ജനങ്ങളുമായി സംവദിക്കുന്നതിനുമാണ് സംരക്ഷണ സദസ്. കോട്ടയം മെഡിക്കല്‍ കോളജിലുണ്ടായ ദാരുണ സംഭവം ജില്ലയിലെ സിപിഎമ്മിനു വലിയ ക്ഷീണമുണ്ടാക്കിയതായി പാര്‍ട്ടി വിലയിരുത്തിയിരുന്നു. ഇതിന്‍റെ ഭാഗമായി മരണപ്പെട്ട കുടുംബത്തിനു സാമ്പത്തിക സഹായം, മകനു ജോലി തുടങ്ങിയ കാര്യങ്ങള്‍ സര്‍ക്കാര്‍ തലത്തില്‍ നടപ്പാക്കി. കൂടാതെ മെഡിക്കല്‍ കോളജില്‍ പുതിയ ബ്ലോക്കുകളുടെ ഉദ്ഘാടനം വേഗത്തിലാക്കാനും തീരുമാനമായിട്ടുണ്ട്. പ്രതിപക്ഷ ആരോപണങ്ങളെ നേരിടാനായി കഴിഞ്ഞയാഴ്ച മെഡിക്കല്‍ കോളജിൽ എല്‍ഡിഎഫ് നേതൃത്വത്തില്‍ ജനകീയ സദസും സംഘടിപ്പിച്ചിരുന്നു.

ആവേശമായി പാലാ സാന്‍തോം ഫുഡ് ഫാക്‌ടറി ഉദ്ഘാടനം

പാലാ: കാര്‍ഷിക മൂല്യവര്‍ധിത സംരംഭമായ പാലാ സാന്‍തോം ഫുഡ് ഫാക്ടറിയുടെ ഉദ്ഘാടനം കര്‍ഷകര്‍ക്ക് ആവേശമായി. മന്ത്രിമാരും ജനപ്രതിനിധികളും വിവിധ വകുപ്പ് ഉദ്യോഗസ്ഥരും പങ്കെടുത്ത സമ്മേളനത്തിന് സാക്ഷ്യം വഹിക്കാന്‍ രൂപതയുടെ വിവിധ ഭാഗങ്ങളില്‍നിന്നുള്ള കര്‍ഷകരും അല്മായ പ്രതിനിധികളും എത്തിയിരുന്നു. സമ്മേളനത്തില്‍ പങ്കെടുത്ത മന്ത്രിമാരും ജനപ്രതിനിധികളും രൂപതയുടെ കര്‍ഷകരോടുള്ള പ്രതിബദ്ധതയെ ഏറെ ശ്ലാഘിച്ചു. രൂപതയുടെ സോഷ്യല്‍ സര്‍വീസ് വിഭാഗമായ പിഎസ്ഡബ്ല്യുഎസിന്‍റെ നേതൃത്വത്തില്‍ വിവിധ ഇടവകകളില്‍ പ്രവര്‍ത്തിക്കുന്ന കര്‍ഷക കൂട്ടായ്മകള്‍ക്ക് ശക്തി പകരുന്നതാണ് പുതിയ മുന്നേറ്റം. കര്‍ഷക ബാങ്ക് ആരംഭിച്ചതുമുതല്‍ വിവിധ ഇടവകകളില്‍ കര്‍ഷക ക്ലബ്ബുകളും ഉത്പാദക സംഘടനകളും ആരംഭിക്കുകയും ഈ രംഗത്ത് ബോധവത്കരണം നടത്തുകയും ചെയ്ത രൂപത ഇപ്പോള്‍ കര്‍ഷകര്‍ക്ക് കൈത്താങ്ങും ആത്മവിശ്വാസവും പ്രത്യാശയും പകര്‍ന്ന് മൂല്യവര്‍ധിത ഉത്പന്ന നിര്‍മാണവുമായി മുന്നോട്ടുപോകുന്നത് ഏറെ പ്രതീക്ഷയോടെയാണ് ഏവരും ഉറ്റുനോക്കുന്നത്. സമ്മേളനത്തിന് മുന്നോടിയായി നടന്ന പാലാ സാന്‍തോം ഫാര്‍മേഴ്സ് പ്രൊഡ്യൂസര്‍ കമ്പനിയുടെ വാര്‍ഷിക പൊതുയോഗം രാവിലെ ചെയര്‍മാന്‍ സിബി മാത്യുവിന്‍റെ അധ്യക്ഷതയില്‍ നടന്നു. പിഎസ്ഡബ്ല്യുഎസ് ഡയറക്ടര്‍ ഫാ. തോമസ് കിഴക്കേല്‍ ഉദ്ഘാടനം ചെയ്തു. കാര്‍ഷിക മേഖലയിലെ പ്രശ്നങ്ങളും സാധ്യതകളും സംബന്ധിച്ച കര്‍ഷകസംവാദവും സംഘടിപ്പിച്ചിരുന്നു. സ്റ്റീല്‍ ഇന്ത്യ ഡയറക്ടര്‍ ഫാ. ജോസഫ് താഴത്തുവരിക്കയിലിന്‍റെ അധ്യക്ഷതയില്‍ ഇന്‍ഫാം ദേശീയ ചെയര്‍മാന്‍ ഫാ. ജോസഫ് ചെറുകരക്കുന്നേല്‍ സംവാദം ഉദ്ഘാടനം ചെയ്തു. ഇന്‍ഫാം രൂപതാ ഡയറക്ടര്‍ ഫാ. ജോസഫ് തറപ്പേല്‍ മോഡറേറ്ററായിരുന്നു. റവ.ഡോ.ജോര്‍ജ് വര്‍ഗീസ് ഞാറക്കുന്നേല്‍, ഫാ. ഫ്രാന്‍സിസ് ഇടത്തിനാല്‍, എഫ്പിഒ ഡിവിഷന്‍ മാനേജരും പിഎസ്ഡബ്ല്യുഎസ് പിആര്‍ഒയുമായ ഡാന്‍റീസ് കൂനാനിക്കല്‍ എന്നിവര്‍ പ്രസംഗിച്ചു. പരിപാടികള്‍ക്ക് ഫാ. ആല്‍ബിന്‍ ഏറ്റുമാനൂക്കാരന്‍, ഫാ. ക്രിസ്റ്റി പന്തലാനി, ഫാ. മാണി കൊഴുപ്പന്‍കുറ്റി, പാലാ സോഷ്യല്‍ വെല്‍ഫെയര്‍ സൊസൈറ്റി സാരഥികളായ ജോസ് നെല്ലിയാനി, ടോണി സണ്ണി, ടോണി കാനാട്ട്, ഷില്‍ജോ തോമസ്, റോണി മാത്യു, ജോയി വട്ടക്കുന്നേല്‍, മെര്‍ലി ജയിംസ്, അലീനാ ജോസഫ്, ലിജി ജോണ്‍, സൗമ്യ ജയിംസ്, ശാന്തമ്മ ജോസഫ്, സെലിന്‍ ജോര്‍ജ്, ജെയ്‌സി മാത്യു, ജിജി സിന്‍റോ, ഷൈനി ജിജി, ജിജി മാത്യു, ജിഷാ സാബു, ആലീസ് ജോര്‍ജ്, സില്‍വിയ തങ്കച്ചന്‍ തുടങ്ങിയവര്‍ നേതൃത്വം നല്‍കി. മാര്‍ ജോസഫ് കല്ലറങ്ങാട്ട് സമൂഹത്തെ ആരോഗ്യമുള്ളതാക്കുന്നത് കര്‍ഷകരാണ്. അധ്വാനിക്കുന്ന കര്‍ഷകരെ കൈവിട്ടുകൊണ്ട് ഒന്നും നേടില്ല. എട്ടു ലക്ഷത്തോളം കര്‍ഷകര്‍ ഒന്നിച്ചുപാര്‍ക്കുന്ന ഇടമാണ് പാലാ രൂപതാപ്രദേശം. കൃഷിയില്‍നിന്നു മാറിനില്‍ക്കുന്ന ഒരു കര്‍ഷകനും ഇവിടെ ഉണ്ടാവരുത്. ഒറ്റപ്പെട്ട് നില്‍ക്കാതെ കര്‍ഷകരെ കോര്‍ത്തിണക്കി അവര്‍ക്ക് പ്രത്യാശ നല്‍കാന്‍ ഈ സ്ഥാപനം വഴി കഴിയും. കര്‍ഷകരുടെ ഉത്പന്നങ്ങള്‍ക്ക് ന്യായവില നേടിക്കൊടുക്കാനും തൊഴിലവസരങ്ങള്‍ സൃഷ്ടിക്കാനും യുവജനങ്ങളെ കൃഷിയിലേക്കും അനുബന്ധ സ്റ്റാര്‍ട്ടപ്പുകളിലേക്കും ആകര്‍ഷിക്കാനും ലക്ഷ്യമിടുന്ന വലിയൊരു സംരംഭവും പ്രത്യാശയുടെ കേന്ദ്രവുമാണിത്. ഓരോ കര്‍ഷകനും കൃഷിയുടെ ഡിഎന്‍എ കൊണ്ടുനടക്കണം. വിവിധ മേഖലകളിലുള്ളവരും നല്ല കൃഷിക്കാരായി മാറണമെന്നും ബിഷപ് പറഞ്ഞു. മന്ത്രി വി.എന്‍. വാസവന്‍ കാര്‍ഷിക മേഖലയിലെ ഏതു മുന്നേറ്റവും വ്യവസായവിപ്ലവത്തിന് ഇടയാക്കുകയും തൊഴിലവസരങ്ങള്‍ വര്‍ധിപ്പിക്കുകയും ചെയ്യും. കൃഷിയുടെ വികാസം ഉറപ്പാക്കാന്‍ കര്‍ഷക സംഘങ്ങള്‍ക്ക് നബാര്‍ഡ് മുഖേന സഹകരണ വകുപ്പും കൃഷിവകുപ്പും ചേര്‍ന്ന് വായ്പ നല്‍കും. ശീതീകരിച്ച വാഹനങ്ങളുടെ സാധ്യത പ്രയോജനപ്പെടുത്തണം . മൂല്യവര്‍ധിത ഉത്പന്നങ്ങള്‍ സ്വദേശത്തും വിദേശത്തും വിപണനം ചെയ്യാന്‍ കഴിയും. ഇത് ഉന്നത ഗുണനിലവാരത്തിലായതിനാല്‍ വരുമാനം വര്‍ധിക്കും. കോട്ടയം തുറമുഖം യാഥാര്‍ഥ്യമാവുന്നതോടെ ഇവിടത്തെ ഉത്പന്നങ്ങള്‍ ലോകരാജ്യങ്ങളിലെത്തിക്കാന്‍ കൂടുതല്‍ സൗകര്യമൊരുങ്ങും. മന്ത്രി പി. പ്രസാദ് കര്‍ഷകന് തന്‍റെ ഉത്പന്നങ്ങളുടെ വില നിശ്ചയിക്കാന്‍ അവകാശമില്ലാത്ത സാഹചര്യത്തിന് മാറ്റമുണ്ടാകണം. വിപണിയാണ് വില നിശ്ചയിക്കുന്നത്. എന്നാല്‍ മൂല്യവര്‍ധിത ഉത്പന്നങ്ങളാക്കിയാല്‍ വില നിശ്ചയിക്കാനുള്ള അവകാശം കര്‍ഷകന് ലഭിക്കും. ഇതിന് വിത്തിടുന്നു, പരിചരിക്കുന്നു, വില്‍ക്കുന്നു എന്ന പരമ്പരാഗത കൃഷിരീതി മാറണം. മൂല്യവര്‍ധിത ഉത്പന്നങ്ങളാക്കി മാറ്റി വില കര്‍ഷകര്‍ തന്നെ നിശ്ചയിക്കുമ്പോള്‍ വരുമാനം വര്‍ധിക്കും. ഇതിനായി ഫാം പ്ലാന്‍ രൂപീകരിച്ച് കൃഷിക്കാരുടെ കൂട്ടായ്മ രൂപീകരിച്ച് പ്രവര്‍ത്തിച്ചുവരികയാണ്. കര്‍ഷക കൂട്ടായ്മകള്‍ക്ക് വലിയ പ്രാധാന്യമുണ്ട്. കൃഷിയില്‍ ആധുനിക കാര്‍ഷികവിദ്യകള്‍ ഉപയോഗിക്കുന്ന സ്മാര്‍ട്ട് ഫാമിംഗിലേക്ക് കേരളം മാറണം. കേരളാ ഗ്രോ ഉത്പന്നങ്ങളായി 4000 ഉത്പന്നങ്ങള്‍ വിപണിയിലെത്തിക്കുന്നു.

പ്രതിഭാസംഗമവും അവാര്‍ഡ് വിതരണവും .

മരങ്ങാട്ടുപിള്ളി: മരങ്ങാട്ടുപിള്ളി സഹകരണബാങ്കിന്‍റെ ആഭിമുഖ്യത്തില്‍ എസ്എസ്എല്‍സി, പ്ലസ് ടു പരീക്ഷകളില്‍ ഉന്നത വിജയം കരസ്ഥമാക്കിയവര്‍ക്കും വിവിധ യൂണിവേഴ്‌സിറ്റി പരീക്ഷകളില്‍ റാങ്ക് നേടിയവര്‍ക്കും ഉള്ള കാഷ് അവാര്‍ഡും മെമന്‍റോയും വിതരണം നടത്തി. ബാങ്ക് പ്രസിഡന്‍റ് എം.എം. തോമസ് മേല്‍വെട്ടത്തിന്‍റെ അധ്യക്ഷതയില്‍ ചേര്‍ന്ന യോഗത്തില്‍ ജോസ് കെ. മാണി എംപി പ്രതിഭാസംഗമം ഉദ്ഘാടനം ചെയ്ത് അവാര്‍ഡുകള്‍ വിതരണം നടത്തി. സിനിമാതാരം ബാബു നമ്പൂതിരി മുഖ്യപ്രഭാഷണം നടത്തി. മീനച്ചില്‍ താലൂക്കിലെ മികച്ച സാമൂഹ്യ പ്രവര്‍ത്തകനായി തെരഞ്ഞെടുക്കപ്പെട്ട പാലാ രൂപത വികാരി ജനറാള്‍ മോണ്‍. ജോസഫ് മലേപ്പറമ്പിലിനെ ഏബ്രഹാം മാത്യു തറപ്പില്‍ മെമ്മോറിയല്‍ കാഷ് അവാര്‍ഡും പ്രശസ്തിപത്രവും ഫലകവും നല്‍കി ആദരിച്ചു. മീനച്ചില്‍ സര്‍ക്കിള്‍ സഹകരണ യൂണിയന്‍ ചെയര്‍മാന്‍ ജോണ്‍സണ്‍ പുളിക്കീല്‍, പഞ്ചായത്ത് പ്രസിഡന്‍റ് ബെല്‍ജി ഇമ്മാനുവല്‍, മീനച്ചില്‍ സഹകരണസംഘം അസിസ്റ്റന്‍റ് രജിസ്ട്രാര്‍ (ജനറല്‍) പി. രജിദാസ്, ബാങ്ക് വൈസ് പ്രസിഡന്‍റ് കെ.എസ്. അജികുമാര്‍, ഭരണസമിതി അംഗം സില്‍ബി ജയ്‌സണ്‍, ബാങ്ക് സെക്രട്ടറി ജോജിന്‍ മാത്യു തുടങ്ങിയവര്‍ പ്രസംഗിച്ചു.

വയോധികനെ കുളത്തില്‍ മരിച്ച നിലയില്‍ കണ്ടെത്തി

പെരുവ: വയോധികനെ കുളത്തില്‍ മരിച്ച നിലയില്‍ കണ്ടെത്തി. കാരിക്കോട് കൃഷ്ണകൃപയില്‍ നാരായണന്‍ (83) ആണ് മരിച്ചത്. വീടിനു സമീപമുള്ള പുരയിടത്തിലെ കുളത്തിലാണ് മൃതദേഹം കണ്ടെത്തിയത്. ഞായറാഴ്ച രാത്രിയില്‍ ഭക്ഷണം കഴിച്ചു കിടന്നുറങ്ങിയതാണെന്നു ബന്ധുക്കള്‍ പറഞ്ഞു. കടുത്തുരുത്തിയില്‍നിന്നെത്തിയ അഗ്നിരക്ഷാസേന മൃതദേഹം പുറത്തെടുത്തു. വെള്ളൂര്‍ പോലീസ് മേല്‍നടപടികള്‍ സ്വീകരിച്ചു. സംസ്‌കാരം നടത്തി. ഭാര്യ: പരേതയായ നളിനാക്ഷിയമ്മ. മക്കള്‍: കെ.എന്‍. രാജേഷ് (വില്ലേജ് ഓഫീസ്, കടുത്തുരുത്തി), രജനി, രശ്മി (ഇരുവരും നഴ്‌സ്). മരുമക്കള്‍: സൗമ്യ, രാജു (പോലീസ്), സുനില്‍കുമാര്‍ (റവന്യൂ വകുപ്പ്).

ബസ് ജീവനക്കാർക്ക് കാരണംകാണിക്കൽ നോട്ടീസ് നൽകി

കാഞ്ഞിരപ്പള്ളി: ബസിൽനിന്ന് വീണ് വിദ്യാർഥിനിക്കു പരിക്കേറ്റ സംഭവത്തിൽ സ്വകാര്യ ബസ് ജീവനക്കാർക്ക് മോട്ടോർ വാഹനവകുപ്പ് കാരണംകാണിക്കൽ നോട്ടീസ് നൽകി. മോട്ടോർ വാഹനവകുപ്പ് ഓഫീസിൽ വിളിച്ചുവരുത്തി ലൈസൻസ് വാങ്ങിവച്ചശേഷമാണ് ഡ്രൈവർക്കും കണ്ടക്ടർക്കും നോട്ടീസ് നൽകിയത്. ഏഴു ദിവസത്തിനകം അപകടത്തിനിടയാക്കിയ സംഭവത്തെക്കുറിച്ച് മറുപടി നൽകാനാണ് മോട്ടോർ വാഹനവകുപ്പ് ഡ്രൈവറോടും കണ്ടക്ടറോടും ആവശ്യപ്പെട്ടിരിക്കുന്നത്. മറുപടി ലഭിച്ചതിന് ശേഷമായിരിക്കും തുടർ നടപടികൾ സ്വീകരിക്കുകയെന്ന് മോട്ടോർ വാഹനവകുപ്പ് അധികൃതർ അറിയിച്ചു. പ്രാഥമികാന്വേഷണത്തിൽ ബസ് ജീവനക്കാർ കുറ്റക്കാരാണെന്ന് കണ്ടെത്തിയിരുന്നു. തുടർന്നാണ് ഇന്നലെ ഇവരെ ഓഫീസിൽ വിളിച്ചുവരുത്തി കാരണംകാണിക്കൽ നോട്ടീസ് നൽകിയത്. മറുപടി ലഭിച്ച ശേഷം ലൈസൻസ് സസ്പെൻഡ് ചെയ്യുന്നതടക്കമുള്ള നടപടികൾ ഉണ്ടായേക്കുമെന്ന സൂചനയാണ് മോട്ടോർ വാഹനവകുപ്പ് അധികൃതർ നൽകുന്നത്. സംഭവത്തിൽ കുറ്റക്കാരനാണെന്ന് കണ്ടെത്തിയ സാഹചര്യത്തിൽ അപകടത്തിനിടയാക്കിയ വാഴയിൽ ബസിന്‍റെ ഡ്രൈവർ അർജുൻ പി. ചന്ദ്രനെതിരേ കാഞ്ഞിരപ്പള്ളി പോലീസ് കേസെടുത്തിരുന്നു. കഴിഞ്ഞ വെള്ളിയാഴ്ചയാണ് കാഞ്ഞിരപ്പള്ളി ആനിത്തോട്ടത്തുവച്ച് ഓടിക്കൊണ്ടിരുന്ന ബസിൽനിന്ന് തെറിച്ച് താഴെ വീണ് വിദ്യാർഥിനിക്കു പരിക്കേറ്റത്.

ചാത്തൻതറയിൽ പുലി, പമ്പാവാലിയിൽ കാട്ടാന; മലയോരം ഭീതിയിൽ

കണമല: പത്തനംതിട്ട, കോട്ടയം ജില്ലകളുടെ അതിർത്തിയിലെ ചാത്തൻതറ താന്നിക്കാപുഴയിലെ റബർത്തോട്ടത്തിൽ ടാപ്പിംഗ് തൊഴിലാളി കണ്ടത് പുലിയെ ആണെന്ന് വനംവകുപ്പ് സ്ഥിരീകരിച്ചതോടെ കടുത്ത ഭീതിയിലും ആശങ്കയിലും നാട്ടുകാർ. പമ്പാവാലി, മൂക്കൻപെട്ടി, അരുവിക്കൽ മേഖലയിൽ ജനവാസ പ്രദേശത്ത് നാട്ടുകാർ ആനകൾ കാടിറങ്ങി എത്തുന്നതിന്‍റെ ഭീതിയിലാണ്. ചാത്തൻതറ താന്നിക്കാപുഴയിലെ റബർത്തോട്ടത്തിൽ പുലിയെ പിടികൂടാൻ ഇന്ന് കൂട് സ്ഥാപിക്കുമെന്ന് ഇന്നലെ സ്ഥലം സന്ദർശിച്ച റാന്നി ഫോറസ്റ്റ് റേഞ്ച് ഓഫീസർ ബി.ആർ. ജയൻ പറഞ്ഞു. ടാപ്പിംഗ് തൊഴിലാളി കക്കുടുമണ്ണ് സ്വദേശി രാജനാണ് ഇന്നലെ രാവിലെ റബർ മരം ടാപ്പ് ചെയ്യുന്നതിനിടെ തൊട്ടടുത്ത പറമ്പിലായി പുലിയെ കണ്ടത്. കിടക്കുകയായിരുന്ന പുലി എഴുന്നേറ്റുനിന്ന് നോക്കുന്നത് കണ്ട് താൻ ഓടി രക്ഷപ്പെട്ടന്ന് രാജൻ പറഞ്ഞു. റേഞ്ച് ഓഫീസർ ബി.ആർ. ജയന്‍റെ നേതൃത്വത്തിൽ രാജൻ കാണിച്ച സ്ഥലം പരിശോധിച്ചപ്പോൾ കാൽപ്പാടുകൾ കണ്ടെത്തി. ഇത് പുലിയുടെ കാൽപ്പാടുകളാണെന്ന് വനംവകുപ്പ് സ്ഥിരീകരിച്ചതോടെയാണ് കൂട് സ്ഥാപിക്കാൻ ചീഫ് വൈൽഡ് ലൈഫ് വാർഡന്‍റെ അനുമതി പത്തനംതിട്ട ഡിഎഫ്ഒ മുഖേനെ തേടിയത്. ഇന്നലെ വൈകുന്നേരത്തോടെയാണ് അനുമതി ലഭിച്ചത്. ഇതോടെ ഇന്നു രാവിലെ കൂട് സ്ഥാപിക്കുന്ന ജോലികൾ ആരംഭിക്കും. പുലിയെ കണ്ട സ്ഥലത്തിന് അടുത്ത് വനമാണ്. ഇവിടെ നിന്നാണ് പുലി നാട്ടിൽ എത്തിയതെന്ന് കരുതുന്നു. വനത്തിനോടു ചേർന്നുള്ള ഭാഗത്താണ് കൂട് സ്ഥാപിക്കുക. ഈ പ്രദേശത്തേക്ക് ആളുകൾ എത്തരുതെന്ന് ഇന്നലെ വനംവകുപ്പ് മുന്നറിയിപ്പ് നൽകി. പ്രദേശത്ത് ഒട്ടേറെ തോട്ടങ്ങളും പറമ്പുകളും കാട് വളർന്ന നിലയിലാണ്. വന്യജീവികൾക്ക് താവളമാക്കാൻ സാഹചര്യം ഒരുക്കുന്ന നിലയിൽ കാടുകൾ വളർന്നത് എത്രയും വേഗം വെട്ടി നീക്കി തെളിക്കണമെന്ന് വെച്ചൂച്ചിറ പഞ്ചായത്ത്‌ പ്രസിഡന്‍റ് നിർദേശിച്ചിട്ടുണ്ടന്ന് ബ്ലോക്ക്‌ ഡിവിഷൻ അംഗം നിഷ അലക്സ് പറഞ്ഞു. കഴിഞ്ഞ ദിവസങ്ങളിൽ പ്രദേശത്തിന്‍റെ പല ഭാഗങ്ങളിൽ വിദ്യാർഥി ഉൾപ്പെടെ പുലിയെ കണ്ടതായി വിവരം അറിയിക്കുകയും വനപാലകരും നാട്ടുകാരും ചേർന്ന് പരിശോധന നടത്തുകയും ചെയ്തതാണ്. എന്നാൽ, പുലിയാണെന്ന് സ്ഥിരീകരിക്കാനുള്ള വ്യക്തമായ തെളിവുകൾ ലഭിക്കാഞ്ഞതിനാൽ നടപടികൾ സ്വീകരിക്കാൻ തടസമായെന്ന് റേഞ്ച് ഓഫീസർ പറഞ്ഞു. ഫോറസ്റ്റ് ഉദ്യോഗസ്ഥർക്കൊപ്പം പ്രമോദ് നാരായൺ എംഎൽഎയും സ്ഥലം സന്ദർശിച്ചു. ജാഗ്രതാസമിതി ഇന്ന് മുക്കൂട്ടുതറ: വെച്ചൂച്ചിറ പഞ്ചായത്തിലെ താന്നിക്കാപ്പുഴ, വാറ്റുകുന്ന്, നെല്ലിശേരിപാറ എന്നിവിടങ്ങളിൽ പുലിയെ കണ്ടതായി വിവരം ലഭിച്ചതിനെത്തുടർന്ന് കൂട് വച്ച് പുലിയെ പിടിക്കാൻ തീരുമാനിച്ചതിന്‍റെ ഭാഗമായി ഇന്ന് ജാഗ്രതസമിതി ചേരും. ഉച്ചകഴിഞ്ഞ് രണ്ടിന് പഞ്ചായത്ത്‌ ഹാളിലാണ് സമിതി ചേരുക. പ്രമോദ് നാരായൺ എംഎൽഎ, പഞ്ചായത്ത്‌ ജനപ്രതിനിധികൾ, രാഷ്‌ട്രീയ നേതാക്കൾ, സംഘടനാ ഭാരവാഹികൾ, വനംവകുപ്പ് ഉദ്യോഗസ്ഥർ തുടങ്ങിയവർ പങ്കെടുക്കും.

കളഞ്ഞു കിട്ടിയ ആറുലക്ഷം രൂപ ഉടമയിലെത്തിച്ചു: ബിനോയിക്ക് ആദരവുമായി ജലധാരാ റസിഡന്‍റ്സ് അസോസിയേഷന്‍

അതിരമ്പുഴ വെസ്റ്റ് : ജലധാരാ റസിഡന്‍റ്സ് അസോസിയേഷന്‍റെ 12ാമത് വാര്‍ഷിക പൊതുയോഗം ഫ്രാന്‍സിസ് ജോര്‍ജ്ജ് എംപി ഉദ്ഘാടനം ചെയ്തു. പ്രസിഡന്‍റ് കെ.ജെ ഫിലിപ്പോസ് അധ്യക്ഷത വഹിച്ചു. ജയ്ഭാരത് പബ്ലിക്ക് ലൈബ്രറിയില്‍ നടന്ന ചടങ്ങില്‍ നാലുന്നാക്കല്‍ സ്വദേശിയായ ബിനോയി ജോണിനെ പ്രത്യേകം ആദരിച്ചു. റോഡില്‍ നിന്നും കളഞ്ഞുകിട്ടിയ ആറുലക്ഷം രൂപ പാമ്പാടി പോലീസ് സ്‌റ്റേഷനില്‍ ബിനോയി അടുത്തിടെ ഏല്‍പ്പിച്ചിരുന്നു. ഉദ്യോഗസ്ഥരുടെ സഹായത്തോടെ പണത്തിന്‍റെ ഉടമയെ കണ്ടെത്തുകയായിരുന്നു. അസോസിയേഷനു വേണ്ടി പ്രൊഫ. റോസമ്മ ആന്‍റണി ബിനോയിക്ക് പാരിതോഷികം നല്‍കി ആദരിച്ചു. വൈസ് പ്രസിഡന്‍റ് കെ,ജെ. ജോസ് കാരിത്തടം, ട്രഷറര്‍ എം.സി. കുര്യാക്കോസ്, സെക്രട്ടറി മിനി മാത്യു,അഡ്വ. മൈക്കൽ ജെയിംസ്, ജസ്റ്റിന്‍ മാത്യു മുണ്ടക്കല്‍ എന്നിവര്‍ സംസാരിച്ചു.

പഞ്ചപാണ്ഡവ ക്ഷേത്ര തീര്‍ഥാടനവുമായി കെഎസ്ആര്‍ടിസി ബസ് സര്‍വീസ്

ചങ്ങനാശേരി: ആറന്മുള വള്ളസദ്യയോടനുബന്ധിച്ച് തിരുവിതാംകൂര്‍ ദേവസ്വം ബോര്‍ഡും പഞ്ചദിവ്യദേശദര്‍ശനും പള്ളിയോടസേവാ സംഘവും കെഎസ്ആര്‍ടിസിയും ചേര്‍ന്ന് പഞ്ചപാണ്ഡവ ക്ഷേത്ര തീര്‍ഥാടനം ഇന്നലെ ആരംഭിച്ചു. ഇന്നലെ രാവിലെ തൃച്ചിറ്റാറ്റ് ക്ഷേത്രത്തില്‍നിന്നു തീര്‍ഥാടനം ആരംഭിച്ചു. തൃപ്പുലിയുര്‍, തിരുവന്‍വണ്ടൂര്‍ സന്ദര്‍ശിച്ച് തീരുവാറന്മുളയില്‍ വള്ളസദ്യയും കഴിച്ച് വൈകുന്നേരം തൃക്കൊടിത്താനം മഹാക്ഷേത്രത്തിലും എത്തി സംഘം ദര്‍ശനം നടത്തി. കവിയൂര്‍, പാണ്ഡവര്‍കാവ് ക്ഷേത്രങ്ങളിലും ദര്‍ശനം നടത്തിയാണ് തീര്‍ഥാടകര്‍ പോയത്. കണ്ണൂര്‍, തൃശൂര്‍, വൈക്കം, തൊടുപുഴ എന്നിവിടങ്ങളില്‍നിന്നുള്ള തീര്‍ഥാടകരാണ് കെഎസ്ആര്‍ടിസി ബസില്‍ എത്തിയത്. തൃക്കൊടിത്താനം മഹാക്ഷേത്രത്തില്‍ എത്തിയ സംഘത്തിനു പഞ്ചദിവ്യദേശ ദര്‍ശന്‍ ചെയര്‍മാന്‍ ബി. രാധാകൃഷ്ണമേനോന്‍, ഉപദേശക സമിതി സെക്രട്ടറി പി.ആര്‍. രാജേഷ്, വൈസ് പ്രസിഡന്‍റ് പി.കെ. പ്രസാദ്, അജീഷ് മഠത്തില്‍, ജയന്‍ എസ്.വി സദനം, സജികുമാര്‍ തിനപ്പറമ്പില്‍ എന്നിവരുടെ നേതൃത്വത്തില്‍ സ്വീകരണം നല്‍കി.

പായിപ്പാട് ബിഎഡ് കോളജില്‍ മെറിറ്റ് ഡേയും നവാഗതര്‍ക്ക് സ്വീകരണവും ഇന്ന്

പായിപ്പാട്: എംജി യൂണിവേഴ്‌സിറ്റിയില്‍ ഒന്നാം റാങ്കുള്‍പ്പെടെ ആറു റാങ്കുകള്‍ കരസ്ഥമാക്കി ഉന്നതവിജയം നേടിയ വിദ്യാര്‍ഥികള്‍ക്കുള്ള അനുമോദനവും നവാഗതര്‍ക്ക് സ്വീകരണവും ഇന്ന് രാവിലെ 9.30ന് കോളജ് ഓഡിറ്റോറിയത്തില്‍ നടക്കും. ജോബ് മൈക്കിള്‍ എംഎല്‍എ മെറിറ്റ് ഡേ ഉദ്ഘാടനം ചെയ്യും. ഉന്നതവിജയം നേടിയ എല്ലാ വിദ്യാര്‍ഥികള്‍ക്കും സര്‍ട്ടിഫിക്കറ്റുകളും മെമന്‍റോയും നല്‍കും. പായിപ്പാട് ഗവണ്‍മെന്‍റ് ഹൈസ്‌കൂള്‍ വിദ്യാര്‍ഥികള്‍ക്ക് കോളജ് എന്‍എസ്എസ് വിഭാഗം കൊടുക്കുന്ന പഠനോപകരണ കിറ്റുകളുടെ വിതരണവും എംഎല്‍എ നിര്‍വഹിക്കും. സിപാസ് ഡയറക്ടര്‍ പി. ഹരികൃഷ്ണന്‍ ഉദ്ഘാടനം ചെയ്യും. ജില്ലാ പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ മഞ്ജു സുജിത്ത് കോളജിന്‍റെ പുതിയ യുട്യുബ് ചാനലിന്‍റെ ഉദ്ഘാടനം നിര്‍വഹിക്കും. പായിപ്പാട് പഞ്ചായത്ത് പ്രസിഡന്‍റ് കെ.ഡി. മോഹനന്‍ എന്‍എസ്എസ് സര്‍ട്ടിഫിക്കറ്റുകളുടെ വിതരണോദ്ഘാടനം ചെയ്യും. സിപാസ് ബിഎഡ് കോളജുകളുടെ കോഓര്‍ഡിനേറ്റര്‍ ശ്രീകുമാര്‍ എസ്. മുഖ്യപ്രഭാഷണം നടത്തും. പ്രിന്‍സിപ്പല്‍ ഡോ. രാജീവ് പുലിയൂര്‍ അധ്യക്ഷത വഹിക്കും. ബ്ലോക്ക് പഞ്ചായത്തംഗം വിനു ജോബ്, പായിപ്പാട് പഞ്ചായത്തംഗം ആനി രാജു, കോളജ് വികസന സമിതിയംഗം ജോസഫ് തോമസ്, വൈഎംഎ ലൈബ്രറി പ്രസിഡന്‍റ് ഷറഫുദ്ദീന്‍ സാഹിബ്, പായിപ്പാട് ഗവൺമെന്‍റ് ഹൈസ്‌കൂള്‍ ഹെഡ്മിസ്ട്രസ് ടി.എസ്. ഷൈല, ഹയര്‍ സെക്കന്‍ഡറി പ്രിന്‍സിപ്പല്‍ എം.എസ്. സുനില്‍ എന്നിവര്‍ പ്രസംഗിക്കും.

ഇടതുഭരണം പെന്‍ഷന്‍കാരുടെ ജീവിതം ദുരിതത്തിലാക്കി

ചങ്ങനാശേരി: ഒമ്പതുവര്‍ഷത്തെ ഇടതുഭരണം പെന്‍ഷന്‍കാരുടെ ജീവിതത്തെ ദുരിതത്തിലേക്കു തള്ളിവിട്ടെന്ന് കെഎസ്എസ്പിഎ സംസ്ഥാന വൈസ് പ്രസിഡന്‍റ് ടി.എസ്. സലിം. പെന്‍ഷന്‍ പരിഷ്‌കരിക്കാത്തതില്‍ പ്രതിഷേധിച്ച് കേരള സ്റ്റേറ്റ് സര്‍വീസ് പെന്‍ഷനേഴ്‌സ് അസോസിയേഷന്‍ ട്രഷറികള്‍ക്കു മുന്പില്‍ കരിദിനാചരണം നടത്തുന്നതിന്‍റെ ഭാഗമായി ചങ്ങനാശേരി പെന്‍ഷന്‍ ട്രഷറിയിലേക്ക് നടത്തിയ പ്രതിഷേധ മാര്‍ച്ചും യോഗവും ഉദ്ഘാടനം ചെയ്യുകയായിരുന്നു അദ്ദേഹം. നിയോജകമണ്ഡലം പ്രസിഡന്‍റ് എം.എസ്. അലി റാവുത്തര്‍ അധ്യക്ഷനായിരുന്നു. ജില്ലാ സെക്രട്ടറി പി.ജെ. ആന്‍റണി ആമുഖപ്രസംഗം നടത്തി. സംസ്ഥാന കൗണ്‍സിലര്‍ ബേബി ഡാനിയേല്‍, നിയോജകമണ്ഡലം സെക്രട്ടറി പി.ടി. തോമസ്, കെ. ദേവകുമാര്‍, ടി.എസ്. ഉണ്ണികൃഷ്ണന്‍ നായര്‍, സുരേഷ് രാജു, കെ.എം. ജോബ്, വി.ഐ. ജോഷി, അന്‍സാരി ബാപ്പു, ടി.പി. ജേക്കബ് എന്നിവര്‍ പ്രസംഗിച്ചു.

വാഴപ്പള്ളി സെന്‍റ് തെരേസാസിലെ കൊണ്ടാട്ടം-2025 ഹൃദ്യമായി

ചങ്ങനാശേരി: വാഴപ്പള്ളി സെന്‍റ് തെരേസാസ് സ്‌കൂളിലെ ഹയര്‍ സെക്കന്‍ഡറി വിഭാഗത്തിന്‍റെ രജത ജൂബിലി ആഘോഷങ്ങളുടെ ഭാഗമായി സംഘടിപ്പിച്ച പൂര്‍വ വിദ്യാര്‍ഥി സംഗമം "കൊണ്ടാട്ടം-2025' ഹൃദ്യമായ അനുഭവമായി. സ്‌കൂളില്‍ ഹയര്‍ സെക്കന്‍ഡറി ആരംഭിച്ച 2000 മുതല്‍ പഠിച്ചിറങ്ങിയ വിദ്യാര്‍ഥികളും പഠിപ്പിച്ച അധ്യാപകരുമാണ് ഓര്‍മ്മകള്‍ പങ്കുവയ്ക്കാനും ബന്ധങ്ങള്‍ പുതുക്കാനുമായി സ്‌കൂള്‍ അങ്കണത്തില്‍ ഒത്തുചേര്‍ന്നത്. വിദ്യാര്‍ഥി പ്രതിനിധികള്‍ അവരുടെ സ്‌കൂള്‍ അനുഭവങ്ങളും അധ്യാപകരെ കുറിച്ചുള്ള ഓര്‍മകളും പങ്കുവച്ചു. ആദ്യ പ്രിന്‍സിപ്പല്‍ സിസ്റ്റര്‍ മരിയ തെങ്ങുംതോട്ടം കേക്ക് മുറിച്ചു. വിവിധ ബാച്ചിലെ പ്രതിനിധികളും പൂര്‍വ അധ്യാപകരും ചേര്‍ന്ന് ദീപം തെളിച്ചു. മുന്‍ പ്രിന്‍സിപ്പല്‍മാരും മുന്‍ അധ്യാപക അനധ്യാപകരും പങ്കെടുത്തു. മാനേജര്‍ സിസ്റ്റര്‍ ലിന്‍സി വലിയപ്ലാക്കല്‍, പ്രിന്‍സിപ്പല്‍ ഷിജി വര്‍ഗീസ്, പൂര്‍വ വിദ്യാര്‍ഥി പ്രതിനിധികളായ ഫാ. ജിസണ്‍ പോള്‍ വേങ്ങാശേരി, ജെയ്‌സണ്‍ ജസ്റ്റിന്‍, ദീപ ജോസഫ് എന്നിവര്‍ പരിപാടികള്‍ക്ക് നേതൃത്വം നല്‍കി. ജൂബിലിയോടനുബന്ധിച്ച് നടത്തുന്ന ദി ഐക്കണ്‍ (ഇന്‍റര്‍ സ്‌കൂള്‍ പേഴ്‌സണാലിറ്റി കോണ്‍ടസ്റ്റ്) 22ന് നടത്തും.

കമ്യൂണിറ്റി ടൂറിസം കണ്ടുപഠിക്കാന്‍ സിക്കിം പഠനസംഘം കുട്ടനാട്ടില്‍

ചങ്ങനാശേരി: കുടുംബശ്രീ മിഷന്‍ കുട്ടനാടന്‍ മേഖലയില്‍ നടപ്പിലാക്കുന്ന കമ്യൂണിറ്റി ടൂറിസം കണ്ടുപഠിക്കാന്‍ സിക്കിം സ്റ്റേറ്റ് റൂറല്‍ ലൈവ്‌ലിഹുഡ് മിഷന്‍ ടീം കുട്ടനാട്ടിലെത്തി. കുടുംബശ്രീ മിഷന്‍റെ ആലപ്പി റൂട്‌സ് കമ്യൂണിറ്റി ടൂറിസം ടീമിന്‍റെ ആതിഥേയത്വത്തിലെത്തിയ 19 അംഗ സംഘത്തെ ആലപ്പുഴ കുടുംബശ്രീ ജില്ലാമിഷന്‍ കോഓര്‍ഡിനേറ്റര്‍ രഞ്ജിത്ത്, കുടുംബശ്രീ നാഷണല്‍ റിസോഴ്‌സ് ഓര്‍ഗനൈസേഷന്‍ അസിസ്റ്റന്‍റ് പ്രോഗ്രാം മാനേജര്‍ സി.എം. അഷിത, കേരള പ്രോഗ്രാം പ്രോജക്‌ട് മെന്‍റര്‍ ഷെല്‍ബി പി. സ്ലീബാ എന്നിവര്‍ ചേര്‍ന്ന് സ്വീകരിച്ചു. പരഘ ബ്ലോക്ക് പ്രോജക്റ്റ് മാനേജര്‍ ഷെറിംഗ് ചോടാ ലെപ്ച്ച ആണ് സിക്കിം സംഘത്തെ നയിക്കുന്നത്. സ്റ്റാര്‍ട്ട് അപ്പ് വില്ലേജ് എന്‍റര്‍പ്രണര്‍ഷിപ് പ്രോഗ്രാമിന്‍റെ ബ്ലോക്ക് എന്‍റര്‍പ്രൈസ് പ്രൊമോഷന്‍ കമ്മിറ്റിയംഗങ്ങളും കമ്യൂണിറ്റി റിസോഴ്‌സ് അംഗങ്ങളുമാണ് സിക്കിം ടീമില്‍ ഉള്ളത്. സംസ്ഥാനത്ത് കമ്യൂണിറ്റി ടൂറിസം ആദ്യഘട്ടം നടപ്പിലാക്കുന്ന കൈനകരി, കാവാലം, നീലംപേരൂര്‍, ചമ്പക്കുളം പഞ്ചായത്തുകൾ സംഘം സന്ദര്‍ശിച്ചു. ഓരോ പഞ്ചായത്തിലും ഊഷ്മള സ്വീകരണമാണ് സംഘത്തിന് ലഭിച്ചത്. കുടുംബശ്രീ കമ്യൂണിറ്റി ടൂറിസത്തിന്‍റെ ഹോംസ്റ്റേകളില്‍ താമസിച്ചും വിവിധങ്ങളായ സംരംഭങ്ങള്‍ സന്ദര്‍ശിച്ചും സംഘം പഠനം നടത്തി. തഴപ്പാ നെയ്ത്ത്, പട്ടം പറത്തല്‍, വലവീശല്‍, നാടന്‍ കലകൾ, കളരി സംഘം എന്നിവ സംഘത്തിന് ആവേശം പകര്‍ന്നു. കാവാലത്തെത്തിയ സംഘത്തെ പഞ്ചായത്ത് പ്രസിഡന്‍റ് ടി.ടി. സത്യദാസ് സ്വീകരിച്ചു. കാവാലം എന്‍എസ്എസ് ഹൈസ്‌കൂളിലെ കുട്ടികള്‍ കാവാലം നാരായണപണിക്കര്‍ രചിച്ച ഗാനം ആലപിച്ചു. നീലംപേരൂര്‍ പഞ്ചായത്ത് പ്രസിഡന്‍റ് ടി.കെ. തങ്കച്ചന്‍ ഉദ്ഘാടനം ചെയ്തു. പഞ്ചായത്തംഗങ്ങളും ഹരിതകര്‍മസേന അംഗങ്ങളുമായി സംഘം സംവദിച്ചു.

വൈദ്യപരിശോധനാ ക്യാമ്പ്

വൈക്കം: തോട്ടകം ജാഗ്രതാമിഷന്‍റെ ആഭിമുഖ്യത്തിൽ ആയുർവേദ പ്രമേഹ ചികിത്സാ ക്യാമ്പും സൗജന്യ വൈദ്യപരിശോധനയും നടത്തി. തോട്ടകം പള്ളിക്കു സമീപമുള്ള ജാഗ്രതാ മിഷൻ ഹാളിൽ നടന്ന വൈദ്യപരിശോധനാക്യാമ്പ് ഡയറക്ട‌ർ ഫാ.ആന്‍റണി കോലഞ്ചേരി ഉദ്ഘാടനം ചെയ്തു. ഡോ.ഡി.എസ്. ധീരജ്, ഡോ. വി.എ. രാഹുൽ എന്നിവർ ക്യാമ്പിന് നേതൃത്വം നൽകി. രാവിലെ ഒൻപതിന് ആരംഭിച്ച ക്യാമ്പ് ഉച്ചയ്ക്ക് 1.30ന് സമാപിച്ചു. ജാഗ്രതാമിഷൻ സെക്രട്ടറി ഷോളി ബിജു, കോ- ഓർഡിനേറ്റർമാരായ രമ്യസന്തോഷ്‌,ജോസികാട്ടുമന, ബിജു ബെഥേൽ, കുടുംബ യൂണിറ്റ് ഭാരവാഹികൾ, വിവിധ സംഘടന ഭാരവാഹികൾ, സന്നദ്ധ സംഘടനകൾ തുടങ്ങിയവർ നേതൃത്വം നൽകി.

ചാർജിംഗ് സ്റ്റേഷനിൽ കാറിടിച്ചുകയറി കുട്ടി മരിച്ച സംഭവത്തിൽ പോലീസ് കേസടുത്തു

ഈരാറ്റുപേട്ട: വാഗമണ്ണിൽ ചാർജിംഗ്സ്റ്റേഷനിൽ കാറിടിച്ചുകയറി നാലുവയസുകാരൻ മരണപ്പെട്ട സംഭവത്തിൽ ഈരാറ്റുപേട്ട പോലീസ് കേസെടുത്തു. സംഭവത്തിൽ കരുനാഗപ്പള്ളി സ്വദേശിയായ ജയകൃഷ്ണനെതിരെയാണ് പോലീസ് കേസെടുത്തത്. വാഹനവും കസ്റ്റഡിയിൽ എടുത്തിട്ടുണ്ട്. ഇയാൾ എറണാകുളത്ത് അഭിഭാഷകനാണെന്നു പറയപ്പെടുന്നു.കോട്ടയം മെഡിക്കൽ കോളജിൽ പോസ്റ്റ്മോർട്ടത്തിനുശേഷം മൃതദേഹം ബന്ധുക്കൾക്ക് വിട്ട് നൽകി. പാലായിൽ എൽകെജി വിദ്യാർഥിയായിരുന്നു മരണമടഞ്ഞ അയാൻ. അതേസമയം സംഭവത്തിൽ പോലീസ് അനാസ്ഥ കാട്ടിയതായി നാട്ടുകാർ ആരോപിക്കുന്നു. അപകടം നടന്ന ഉടനെ സംഭവം നാട്ടുകാർ പോലീസിൽ അറിയിച്ചിരുന്നു. ഇയാളെ പിടിച്ചുനിർത്താനും പോലീസ് നിർദേശിച്ചു. എന്നാൽ ജയകൃഷ്ണൻ ബഹളം വച്ചതോടെ വണ്ടി നമ്പർ എഴുതിയെടുത്ത് വാഹനം വിട്ടയക്കാൻ പോലീസ് നിർദേശിച്ചതായി നാട്ടുകാർ പറയുന്നു. ഇതോടെ വാഹനം പരിശോധിക്കാനോ ഇയാൾ മദ്യപിച്ചതാണോ എന്ന് മെഡിക്കൽ ചെക്കപ്പ് നടത്താനോ സാധിച്ചില്ല. കുട്ടി മരിച്ചതിനെ തുടർന്ന് പോലീസ് അറിയിച്ചതോടെയാണ് വാഹനം സ്റ്റേഷനിൽ എത്തിച്ചത്.

തകർച്ചാഭീഷണിയിലായ കെട്ടിട സമുച്ചയം പൊളിച്ചു നീക്കണം

തലയോലപ്പറമ്പ്: കാലപ്പഴക്കത്താൽ ജീർണിച്ച തലയോലപ്പറമ്പ് പഞ്ചായത്ത് ഓഫീസ് പ്രവർത്തിച്ചിരുന്ന പഴയകെട്ടിടം പൊളിച്ചുനീക്കണമെന്ന ആവശ്യം ശക്തമായി. തകർച്ചാ ഭീഷണി നേരിടുന്ന കെട്ടിടത്തിൽ എൻജിനിയറിംഗ് വിഭാഗം, കുടുംബശ്രീ ഓഫീസ് തുടങ്ങിയവ പ്രവർത്തിക്കുന്നുണ്ട്. ഈ കെട്ടിടത്തിന്‍റെ താഴത്തെ നിലയിലെ മുറികളിൽ വ്യാപാര സ്ഥാപനങ്ങളുമുണ്ട്. എൽഎസ്ജിഡി എൻജിനിയറിംഗ് വിഭാഗം കെട്ടിടം പ്രവർത്തനയോഗ്യമല്ലെന്ന് കാട്ടി ഒന്നരവർഷം മുമ്പ് പഞ്ചായത്തിന് റിപ്പോർട്ട് നൽകിയെങ്കിലും നടപടിയുണ്ടായില്ല. 50 വർഷത്തിനു മുകളിൽ പഴക്കമുള്ള കെട്ടിടത്തിന്‍റെ പല ഭാഗങ്ങളും വിണ്ടടർന്ന് തുരുമ്പിച്ച കമ്പികൾ പുറത്തുകാണാവുന്ന സ്ഥിതിയിലാണ്. ബലക്ഷയത്തെത്തുടർന്ന് 2018 ൽ കൂടുതൽ തൂണുകൾ സ്ഥാപിച്ചാണ് കെട്ടിടം താങ്ങി നിർത്തിയിരിക്കുന്നത്. വലിയ ദുരന്തമൊഴിവാക്കാൻ തകർച്ചാ ഭീഷണിയിലായ കെട്ടിടസമുച്ചയം പൊളിച്ചുനീക്കണമെന്ന് നാട്ടുകാർ ആവശ്യപ്പെട്ടു.

വെള്ളക്കെട്ടിൽ കഴിഞ്ഞവർക്ക് രക്ഷകരായി പാർട്ടി പ്രവർത്തകർ

വൈക്കം: വർഷങ്ങളായി വെള്ളക്കെട്ടിൽ കഴിയുന്ന മൂന്ന് കുടുംബങ്ങളുടെ ദുരിതത്തിന് അറുതിവരുത്തി സിപിഎംപ്രവർത്തകർ. വൈക്കം നഗരസഭ 18-ാം വാർഡിലെ അടിച്ചിത്തറ രമേശൻ,കൊച്ചുപാലയ്ക്കൽ പ്രിയ, അടിച്ചിത്തറ ശാരദ എന്നിവരുടെ വീടും പരിസരവുമാണ് വർഷങ്ങളായി വെള്ളക്കെട്ടിൽ അമർന്നിരുന്നത്. വീടുകൾക്കു സമീപത്തെ ഓടയും പൈപ്പും അടഞ്ഞ് വെള്ളം ഒഴുകിപ്പോകാത്ത സ്ഥിതിയിലായിട്ട് വർഷങ്ങളായി.വാർഡ് കൗൺസിലർക്കും നഗരസഭാ അധികൃതർക്കും നിരവധിത്തവണ പരാതി നൽകിയിട്ടും പരിഹാരമുണ്ടായില്ല. ഇവരുടെ ജീവിതദുരിതം കണ്ടാണ് സിപിഎം പ്രവർത്തകരും നാട്ടുകാരും ചേർന്ന് വെള്ളക്കെട്ട് ദുരിതം പരിഹരിക്കാൻ രംഗത്തിറങ്ങിയത്. സമീപത്തെ തോട്ടിലേക്ക് വെള്ളമൊഴുകിപ്പോകുന്നതിനുള്ള പൈപ്പും ഓടയും പൂർണമായി അടഞ്ഞ നിലയിലായിരുന്നു. സിപിഎം പ്രവർത്തകരുടെ നേതൃത്വത്തിൽ ഓട ശുചീകരിച്ചശേഷം പുതിയ കോൺക്രീറ്റ് പൈപ്പ് സ്ഥാപിച്ച് മണിക്കൂറുകൾ നീണ്ട പ്രയത്നത്തിനൊടുവിലാണ് വെള്ളക്കെട്ട് ദുരിതത്തിന് പരിഹാരംകണ്ടത്. സിപിഎം ടൗൺ സൗത്ത് ലോക്കൽ സെക്രട്ടറി പി.സി.അനിൽകുമാർ, നഗരസഭ പ്രതിപക്ഷ നേതാവ് എസ്.ഹരിദാസൻ നായർ, ലോക്കൽ കമ്മിറ്റി അംഗങ്ങളായ വി.ജി.ശശി, ബി.രാമചന്ദ്രൻ,എച്ച്.ഐ. റോഹൻ,പാർട്ടി അംഗം കെ.എൻ.പ്രിമിൽ എന്നിവർ നേതൃത്വം നൽകി.

കടുത്തുരുത്തി പോസ്റ്റ് ഓഫീസിലേക്ക് മാര്‍ച്ചും ധര്‍ണയും

കടുത്തുരുത്തി: കേരളത്തിനര്‍ഹമായ റേഷനരിയുടെയും ഗോതമ്പിന്‍റെയും വിഹിതം നിഷേധിക്കുന്ന കേന്ദ്രസര്‍ക്കാര്‍ നടപടിയില്‍ പ്രതിഷേധിച്ച് എഐടിയുസി കടുത്തുരുത്തി മണ്ഡലം കമ്മിറ്റിയുടെ നേതൃത്വത്തില്‍ കടുത്തുരുത്തി പോസ്റ്റ് ഓഫീസിലേക്ക് മാര്‍ച്ചും ധര്‍ണയും നടത്തി. സിപിഐ മണ്ഡലം സെക്രട്ടറി പി.ജി. ത്രിഗുണസെന്‍ ധര്‍ണ ഉദ്ഘാടനം ചെയ്തു. ടി.എം. സദന്‍, എ.എന്‍. ബാലകൃഷ്ണന്‍, കെ.കെ. രാമഭദ്രന്‍, ജയിംസ് തോമസ്, സി.കെ. മോഹനന്‍, വിനോദ് പുളിക്കനിരപ്പേല്‍, എം.പി. രാധാകൃഷ്ണന്‍, പി.കെ. പണിക്കന്‍, സി.എ. ഐസക്ക്, സ്റ്റീഫന്‍ ചെട്ടിക്കന്‍, പി.എന്‍. ശശി, വി.ഒ. തോമസ്, അഖില്‍ വിഷ്ണു, എം.ഗിരീഷ് കുമാര്‍, ഇ.ബി. വിജയന്‍, ടി.വി. ദിലീപുകുമാര്‍ എന്നിവര്‍ പ്രസംഗിച്ചു.

കർഷകമാർച്ചും ധർണയും നാളെ

വൈക്കം: അഖിലേന്ത്യ കിസാൻ സഭയുടെ നേതൃത്വത്തിൽ നാളെ(15) രാവിലെ പത്തിന് വൈക്കം മൈനർ ഇറിഗേഷൻ ഓഫീസിലേക്ക് മാർച്ചും ധർണയും നടത്തും. സിപിഐ മണ്ഡ ലം സെക്രട്ടറി എം.ഡി.ബാബുരാജ് ഉദ്ഘാടനം ചെയ്യും. കെവി കനാലിൽ ചെളിയും മാലിന്യങ്ങളും പോളപ്പായലും അടിഞ്ഞ് നീരൊഴുക്ക് തടസപ്പെട്ട നിലയിലാണ്. വെച്ചൂർ, തലയാഴം, കല്ലറ, ഉദയനാപുരം തലയോലപ്പറമ്പ് പഞ്ചായത്തുകളിൽ ഇറിഗേഷൻ വകുപ്പിനു കീഴിൽ വരുന്ന തോടുകളിലും നീരൊഴുക്ക് തടസപ്പെട്ടതിനാൽ നെൽക്കർഷകർ ആശങ്കയിലാണ്. നിവേദനങ്ങൾ നൽകിയിട്ടും നടപടി എടുക്കാത്ത സാ ഹചര്യത്തിലാണ് സമരം നടത്താൻ തീരുമാനിച്ചതെന്ന് കിസാൻസഭ, വൈക്കം മണ്ഡലം കമ്മിറ്റി പ്രസിഡന്‍റ് കെ.വി. പവിത്രൻ, സെക്രട്ടറി കെ.കെ. ചന്ദ്ര ബാബു എന്നിവർ പറഞ്ഞു.

തങ്ങള്‍മാരുടെ ആണ്ടടിയന്തിരത്തിന് ആയിരങ്ങളെത്തി

ചങ്ങനാശേരി: ചങ്ങനാശേരി പഴയപള്ളിയിലെ തങ്ങള്‍മാരുടെ സ്മരണ പുതുക്കി ആണ്ടടിയന്തിരവും നേര്‍ച്ച വിതരണവും നടത്തി. പഴയ പള്ളിയില്‍ ഖബറടങ്ങിയിട്ടുളള ഔലിയാന്മാരായ കുഞ്ഞുണ്ണിക്കോയാ തങ്ങള്‍ (കറുത്തതങ്ങള്‍), ഹാജി മീരാ വലിയുല്ലാഹ്, അബൂബക്കര്‍ ബം (കൊച്ചുതങ്ങള്‍) എന്നീ ദിവ്യന്മാരുടെ സ്മരണ നിലനിര്‍ത്താനാണ് ആണ്ടുനേര്‍ച്ച നടത്തുന്നത്. രാവിലെ 8.45ന് തങ്ങള്‍മാരുടെ മഖ്ബറയ്ക്കു മുന്പില്‍ പ്രാര്‍ഥനയ്ക്കുശേഷം ജമാഅത്ത് പ്രസിഡന്‍റ് എസ്. മുഹമ്മദ് ഫുവാദ് നേര്‍ച്ചവിതരണം ഉദ്ഘാടനം ചെയ്തു. ചീഫ് ഇമാം ഷമീര്‍ ദാരിമി, അസിസ്റ്റന്‍റ് ഇമാം സുലൈമാന്‍ നജ്മി, ഷബീര്‍ സഖാഫി എന്നിവര്‍ പ്രാര്‍ഥനാ ചടങ്ങുകള്‍ക്ക് നേതൃത്വം നല്‍കി.

വാഴൂര്‍, കവിയൂര്‍ റോഡുകളിലെ റെയില്‍വേ മേല്‍പ്പാലങ്ങളുടെ അപ്രോച്ച്ഭാഗം അപകടാവസ്ഥയില്‍

ചങ്ങനാശേരി: വാഴൂര്‍ റോഡില്‍ ചങ്ങനാശേരി റെയില്‍വേ സ്റ്റേഷനടുത്തും കവിയൂര്‍ റോഡില്‍ ഫാത്തിമാപുരത്തുമുള്ള റെയില്‍വേ മേല്‍പ്പാലങ്ങളും അപ്രോച്ചുമായി ചേരുന്ന ഭാഗത്തെ അപകടാവസ്ഥ പരിഹരിക്കണമെന്ന ആവശ്യം ശക്തമാകുന്നു. ഈ ഭാഗത്ത് റോഡ് തകര്‍ന്നത് ഇരുചക്രവാഹനങ്ങളടക്കം വാഹനസഞ്ചാരികള്‍ക്ക് അപകടഭീഷണിയാണ്. നേരത്തെ ഗട്ടറായിക്കിടന്ന ഈ ഭാഗത്ത് അടുത്തിടെ താത്കാലികമായി ടാറിട്ടെങ്കിലും ഇതു വാഹനങ്ങള്‍ക്ക് ഏറെ ദുരിതത്തിനു കാരണമാണ്. കഴിഞ്ഞദിവസം കൊടിക്കുന്നില്‍ സുരേഷ് എംപിയുടെ നേതൃത്വത്തില്‍ റെയില്‍വേ ഉദ്യോഗസ്ഥസംഘം ചങ്ങനാശേരി റെയില്‍വേസ്റ്റേഷന്‍ സന്ദര്‍ശിച്ചപ്പോള്‍ ഇതുസബന്ധിച്ച് ആളുകള്‍ പരാതി നല്‍കിയിരുന്നു. ഈ വിഷയം പരിഹരിക്കുന്നതിന് സത്വര നടപടി സ്വീകരിക്കുമെന്ന് എംപി ഉറപ്പു നല്‍കിയിട്ടുണ്ട്. നടപടികള്‍ വേഗത്തിലാക്കി റോഡിന്‍റെ ശോച്യാവസ്ഥ പരിഹരിക്കണമെന്നാണ് യാത്രക്കാരുടെ ആവശ്യം.

പികെവി പുരസ്‌കാരം സമ്മാനിച്ചു

കിടങ്ങൂര്‍: കമ്മ്യൂണിസ്റ്റ് പാര്‍ട്ടി മതങ്ങള്‍ക്കും വിശ്വാസങ്ങള്‍ക്കുമെതിരണെന്ന വാദം ശരിയല്ലെന്നും മതഭ്രാന്തിനെയാണ് കമ്മ്യുണിസ്റ്റ് പാര്‍ട്ടി എതിര്‍ക്കുന്നതെന്ന് സിപിഐ സംസ്ഥാന സെക്രട്ടറി ബിനോയി വിശ്വം.കിടങ്ങൂരില്‍ പികെവി സെന്‍റര്‍ ഫോര്‍ ഹ്യുമന്‍ ഡെവലപ്മെന്‍റ് ആന്‍ഡ് കള്‍ച്ചറല്‍ അഫയേഴ്‌സിന്‍റെ പുരസ്‌കാരം വിപ്ലവഗായിക പി.കെ. മേദിനിക്ക് സമ്മാനിച്ചു പ്രസംഗിക്കുകയായിരുന്നു അദ്ദേഹം. പികെവി സെന്‍റര്‍ പ്രസിഡന്‍റ് ജി. വിശ്വനാഥന്‍ നായര്‍ അധ്യക്ഷത വഹിച്ചു. പികെവി യുടെ പ്രവര്‍ത്തനശൈലിയും രാഷ്‌ട്രീയ സംശുദ്ധതയും ഞങ്ങളെ ഏറെ സ്വാധീനിച്ചിട്ടുണ്ടന്ന് കോണ്ഗ്രസ് നേതാവും മുന്‍ മന്ത്രിയുമായ കെസി ജോസഫ് അനുസ്മരിച്ചു. ഡോ.പി കെ. ജനാര്‍ദനക്കുറുപ്പ് രചിച്ച് വേലായുധന്‍ ഇടച്ചേരി സംഗീതം നല്‍കി എം. ഖാലിദ് ആലപിച്ച പികെവിയെക്കുറിച്ചുള്ള ജനങ്ങളുടെ സിഡി സിപിഐ ജില്ലാ സെക്രട്ടറി അഡ്വ വി.ബി. ബിനുവിന് നല്‍കി ബിനോയി വിശ്വം പ്രകാശനം ചെയ്തു. വിദ്യാര്‍ഥികള്‍ക്കുള്ള സ്‌കോളര്‍ഷിപ്പ് മോന്‍സ് ജോസഫ് എംഎല്‍എയും ചികത്സാസഹായം ജോസ്‌മോന്‍ മുണ്ടയ്ക്കലും വിതരണം ചെയ്തു. ആര്‍.രാജേന്ദ്രന്‍, സി.കെ. ശശിധരന്‍, അഡ്വ. വി.ബി. ബിനു, അഡ്വ. ഇ.എം. ബിനു, സി.കെ. ആശ എംഎല്‍എ തുടങ്ങിയവര്‍ പ്രസംഗിച്ചു.

തിരുനക്കരയില്‍നിന്ന് ഒഴിപ്പിച്ച വ്യാപാരികളുടെ പുനരധിവാസം : കോടതി പറഞ്ഞിട്ടും നടപടിയെടുക്കാതെ നഗരസഭ

കോട്ടയം: തിരുനക്കരയില്‍നിന്നും ഒഴിപ്പിച്ച വ്യാപാരികള്‍ക്കു താത്കാലിക പുനരധിവാസം നല്‍കാന്‍ കോടതി ഉത്തരവിട്ടിട്ടും തുടര്‍നടപടിയെടുക്കാതെ നഗരസഭ. 2022 ഓഗസ്റ്റ് മൂന്നിനാണ് മുനിസിപ്പല്‍ ബസ് സ്റ്റാന്‍ഡ് കെട്ടിടത്തില്‍നിന്നു 52 വ്യാപാരികളെ ഒഴിപ്പിച്ചത്. കഴിഞ്ഞമാസം 17നാണ് ഹൈക്കോടതി ഉത്തരവ് വന്നത്. കോടതി ഉത്തരവിന്‍റെ അടിസ്ഥാനത്തില്‍ വ്യാപാരികളും മര്‍ച്ചന്‍റ്സ് അസോസിയേഷനും സെക്രട്ടറിക്ക് കത്തു നല്‍കിയിരുന്നു. സ്റ്റാന്‍ഡില്‍ നിര്‍മിക്കാനുദ്ദേശിക്കുന്ന താത്കാലിക ഷെഡിന്‍റെ പ്ലാനും സെക്രട്ടറിക്കു കൈമാറി. മൂന്നുമീറ്റര്‍ വീതിയിലും മൂന്നുമീറ്റര്‍ നീളത്തിലും ഇരുമ്പു ഷീറ്റിട്ട താത്കാലിക കടമുറികളാണ് സ്ഥാപിക്കുക. വിഷയത്തില്‍ എന്ത് നടപടി സ്വീകരിച്ചുവെന്ന് 17ന് കോടതിയെ അറിയിക്കണം. എന്നാല്‍, ഇതുവരെ കൗണ്‍സിലില്‍ വിഷയം ചര്‍ച്ച ചെയ്യുകയോ തീരുമാനമെടുക്കുകയോ ചെയ്തിട്ടില്ല. കെട്ടിടം പൊളിക്കുന്നതിനുമുമ്പ്, 2022 നവംബര്‍ 10നു ചേര്‍ന്ന കൗണ്‍സില്‍ യോഗത്തില്‍ സ്റ്റാന്‍ഡില്‍ താത്കാലിക കടമുറികള്‍ നിര്‍മിക്കാന്‍ അനുമതി നല്‍കാന്‍ കൗണ്‍സില്‍ തീരുമാനിച്ചിരുന്നു. എന്നാല്‍, കെട്ടിടം പൊളിച്ചുകഴിഞ്ഞപ്പോള്‍ അധികൃതര്‍ ഇക്കാര്യം മറന്നു. കൗണ്‍സില്‍ തീരുമാനം നടപ്പാക്കുന്നില്ലെന്നു ചൂണ്ടിക്കാട്ടി തിരുനക്കര മുനിസിപ്പല്‍ ബസ് സ്റ്റാന്‍ഡ് ഷോപ്പിംഗ് കോംപ്ലക്‌സ് മര്‍ച്ചന്‍റ്സ് അസോസിയേഷനാണ് കോടതിയെ സമീപിച്ചത്. കെട്ടിടം പൊളിച്ചുമാറ്റിയ സ്ഥലത്ത് വ്യാപാരികളുടെ ചെലവില്‍ ഷെഡ് നിര്‍മിക്കാമെന്നും പുതിയ കെട്ടിടം വരുമ്പോള്‍ സ്വന്തം ചെലവില്‍ത്തന്നെ ഷെഡ് നീക്കണമെന്നുമായിരുന്നു കോടതി നിര്‍ദേശം. ഒഴിപ്പിച്ച വ്യാപാരികളില്‍ ഭൂരിഭാഗവും വഴിയാധാരമാണ്. 2022 ഓഗസ്റ്റ് മൂന്നിനാണ് കെട്ടിടത്തിലെ 52 കടകള്‍ ഒഴിപ്പിച്ചത്. ഇതില്‍ അഞ്ചുപേര്‍ക്കും ഒരു ബാങ്കിനും നാഗമ്പടത്ത് കടമുറി അനുവദിച്ചു. ഒരാള്‍ മരിച്ചു. രണ്ടുപേര്‍ കടമുറി വേണ്ടെന്നു പറഞ്ഞു. ബാക്കി 37 പേര്‍ക്കുവേണ്ടിയാണ് കോടതിയില്‍ പോയത്. സെപ്തംബര്‍ 14നാണ് കെട്ടിടം പൊളിക്കല്‍ ആരംഭിച്ചത്.

എട്ടുനോമ്പാചരണം: കുറവിലങ്ങാട്ട് ഒരുക്കങ്ങൾ ആരംഭിച്ചു

കുറവിലങ്ങാട്: ആഗോള മരിയൻ തീർഥാടന കേന്ദ്രമായ കുറവിലങ്ങാട് എട്ടുനോമ്പാചരണത്തിനും പരിശുദ്ധ ദൈവമാതാവിന്‍റെ ജനനതിരുനാളിനുമുള്ള ഒരുക്കങ്ങൾ ആരംഭിച്ചു. സെപ്റ്റംബർ ഒന്നുമുതൽ എട്ടുവരെയാണ് നോമ്പാചരണം. എട്ടിന് ദൈവമാതാവിന്‍റെ ജനനത്തിരുനാൾ ആഘോഷവും നടക്കും. നോമ്പാചരണത്തിന് ഒരുക്കമായി ഓഗസ്റ്റ് 28, 29, 30, 31, സെപ്റ്റംബർ ഒന്നുവരെ തീയതികളിലായി വചനപ്രഘോഷണം നടക്കും. പത്താമത് കുറവിലങ്ങാട് ബൈബിൾ കൺവൻഷന് നേതൃത്വം നൽകുന്നത് ഫാ. സേവ്യർഖാൻ വട്ടായിലാണ്. റവ.ഡോ. ജോസഫ് തടത്തിൽ വികാരിയായിരിക്കെ ആരംഭിച്ച ബൈബിൾ കൺവൻഷൻ ഒരു പതിറ്റാണ്ട് പിന്നിടുന്നുവെന്നതും പ്രത്യേകതയാണ്. റവ.ഡോ. അഗസ്റ്റിൻ കൂട്ടിയാനിയിൽ ആർച്ച്പ്രീസ്റ്റായിരിക്കെ കോവിഡ് കാലയളവിൽപോലും കൺവൻഷൻ മുടക്കമില്ലാതെ തുടർന്നാണ് പത്താം വർഷത്തിലേക്ക് പ്രവേശിക്കുന്നത്. എട്ടുനോമ്പാചരണത്തിന്‍റെയും അഭിഷേകാഗ്നി കൺവൻഷന്‍റെയും ഒരുക്കങ്ങൾക്കായി വിവിധ കമ്മിറ്റികൾ പ്രവർത്തനം ആരംഭിച്ചു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അധ്യക്ഷത വഹിച്ചു.

എം.പി. പോൾ ചെറുകഥാ പുരസ്കാരം സമ്മാനിച്ചു

കോട്ടയം: എം.പി. പോള്‍ ചെറുകഥാ പുരസ്‌കാരം ആഷ് ആഷിതയ്ക്ക് സമ്മാനിച്ചു. ദര്‍ശന സാംസ്‌കാരിക കേന്ദ്രത്തില്‍ നടന്ന സാഹിതീ സഖ്യത്തിന്‍റെ വാര്‍ഷിക യോഗത്തില്‍ മന്ത്രി വി.എന്‍. വാസവനാണ് പുരസ്‌കാരം സമ്മാനിച്ചത്. ഡോ. കുര്യാസ് കുമ്പളക്കുഴി അധ്യക്ഷത വഹിച്ച യോഗത്തില്‍ എഴുത്തുകാരന്‍ എസ്. ഹാരീഷ് മുഖ്യ പ്രഭാഷണവും കെ.ബി.പ്രസന്നകുമാര്‍ എം.പി.പോള്‍ അനുസ്മരണവും നടത്തി. ചെറുകഥാ സ്‌പെഷല്‍ ജൂറി പുരസ്‌കാരം ക്യാപ്റ്റന്‍ ഗോവിന്ദ്, ജോണി ജെ. പ്ലാത്തോട്ടം, രമേശന്‍ മുല്ലശേരി എന്നിവര്‍ക്കും മാധ്യമ പുരസ്‌കാരം സതീഷ് ചേലാട്ട്, പ്രഫ നെടുങ്കുന്നം രഘുദേവ് എന്നിവര്‍ക്കും സമ്മാനിച്ചു. കോട്ടയത്തും പരിസര പ്രദേശങ്ങളിലുമുള്ള സാഹിത്യ സംഘടനാ പ്രവര്‍ത്തകരെയും യോഗത്തില്‍ ആദരിച്ചു. തേക്കിന്‍കാട് ജോസഫ്, പോള്‍ മണലില്‍, ഉണ്ണികൃഷ്ണന്‍ കിടങ്ങൂര്‍, ജോയി നാലുനാക്കല്‍, രാധാകൃഷ്ണ കുറുപ്പ് എന്നിവര്‍ പ്രസംഗിച്ചു.

കേരള കോണ്‍ഗ്രസ്-എമ്മിനെതിരേ എന്‍സിപി ബ്ലോക്ക് കമ്മിറ്റി

പാലാ: വനംമന്ത്രി എ.കെ.ശശീന്ദ്രന് എതിരേയും വനം വകുപ്പിനെതിരേയും കേരളാ കോണ്‍ഗ്രസ്-എം നടത്തുന്ന പ്രസ്താവനകള്‍ മുന്നണി മര്യാദകള്‍ക്ക് എതിരും അപലപനീയവുമാണെന്ന് എന്‍സിപി പാലാ ബ്ലോക്ക് കമ്മിറ്റി. അഭിപ്രായങ്ങള്‍ അറിയിക്കാന്‍ ഇടതുപക്ഷ മുന്നണിയില്‍ അവസരങ്ങള്‍ ഉള്ളപ്പോള്‍ വനം വകുപ്പിനെതിരേ അടിസ്ഥാനരഹിതമായ ആരോപണങ്ങള്‍ ഉന്നയിക്കുന്നത് മുന്നണി മര്യാദകളുടെ ലംഘനവും രാഷ്‌ട്രീയ ലാഭം മുന്നില്‍ കണ്ടുള്ളതുമാണെന്ന് യോഗം വിലയിരുത്തി. ജില്ലാ പ്രസിഡന്‍റ് ബെന്നി മൈലാടൂര്‍ യോഗം ഉദ്ഘാടനം ചെയ്തു. ബ്‌ളോക്ക് പ്രസിഡന്‍റ് ബേബി ഊരകത്ത് അധ്യക്ഷത വഹിച്ചു.

നിർമാണോദ്ഘാടനങ്ങൾ ജനവഞ്ചന: പ്രിൻസ് ലൂക്കോസ്

ഏറ്റുമാനൂർ: ഏറ്റുമാനൂർ നിയോജകമണ്ഡലത്തിലെ വിവിധ പദ്ധതികൾ പൂർത്തീകരിക്കാതെ മിനി സിവിൽ സ്റ്റേഷന്‍റെ നിർമാണോദ്ഘാടനം നടത്തി ഏറ്റുമാനൂരിന്‍റെ ജനപ്രധിനിധി ജനങ്ങളെ വഞ്ചിക്കുകയാണെന്ന് കേരള കോൺഗ്രസ് ഉന്നതാധികാര സമിതിയംഗം അഡ്വ. പ്രിൻസ് ലൂക്കോസ്. കുമരകം കോണത്താറ്റ് പാലത്തിന്‍റെ നിർമാണം നാലു വർഷമായി പൂർത്തീകരിക്കാതെ കിടക്കുന്നതു മൂലം ജനങ്ങൾ അനുഭവിക്കുന്ന യാത്രാക്ലേശത്തിനും ദുരിതങ്ങൾക്കും അറുതിയില്ല. പുന്നത്തുറ കമ്പനിക്കടവ് പാലത്തിന്‍റെ പൂർത്തീകരണവും അനന്തമായി നീളുകയാണ്. നീണ്ടൂർ പ്രാലേൽ പാലത്തിന്‍റെ നിർമാണം സ്വപ്നമായി അവശേഷിക്കുന്നു. ഏറ്റുമാനൂർ നിയോജക മണ്ഡലത്തിന് ഒരു മന്ത്രിയെ ലഭിച്ചിട്ടുപോലും ജനങ്ങളുടെ ദുരിതങ്ങൾക്കറുതി വരുത്തുന്ന തരത്തിൽ പദ്ധതികൾ നടപ്പിലാക്കാനോ പൂർത്തീകരിക്കാനോ സാധിക്കുന്നില്ല. പൊള്ളയായ വാഗ്ദാനങ്ങൾക്കും നിർമാണോദ്ഘാടനങ്ങൾക്കും പകരം ജനാേപകാരപ്രദമായ പദ്ധതികൾ സമയബന്ധിതമായി പൂർത്തിയാക്കാൻ സർക്കാർ തയ്യാറാകണമെന്ന് പ്രിൻസ് ലൂക്കോസ് ആവശ്യപ്പെട്ടു.

കിടങ്ങൂരില്‍ ഗതാഗതക്കുരുക്ക്

കിടങ്ങൂര്‍: പഴയ റോഡിലും സിഗ്‌നല്‍ ജംഗ്ഷനു സമീപവും മിക്കസമയവും ഉണ്ടാവുന്ന വാഹനക്കുരുക്കില്‍ വലയുകയാണ് ജനങ്ങളും ഇവിടുത്തെ വ്യാപാരികളും. റോഡിന്‍റെ ഇരുവശവും തോന്നുംപടി വാഹനങ്ങള്‍ പാര്‍ക്കു ചെയ്തിരിക്കുന്നതു കാണാം. വഴിയാത്രക്കാര്‍ക്കു നടക്കാന്‍ പോലുമാവാത്ത സ്ഥിതിയുമുണ്ട്. ചില വാഹനങ്ങള്‍ ഫുട്പാത്തില്‍ കയറ്റി പാര്‍ക്ക് ചെയ്യുന്നു. ദൂരെ സ്ഥലങ്ങളില്‍ ജോലിക്കു പോകുന്നവര്‍ രാവിലെ കടകള്‍ക്കു മുന്പിലും വശങ്ങളിലും വാഹനം പാര്‍ക്ക് ചെയ്തിട്ട് പോകുന്നു. പിന്നീട് വൈകുന്നേരമാണ് ഈ വാഹനങ്ങള്‍ ഇവിടെനിന്നു മാറ്റുന്നത്. ഇതുമൂലം കടകള്‍ക്ക് മുന്നില്‍ വാഹനം നിര്‍ത്തി സാധനം വാങ്ങിക്കാനാവാത്ത അവസ്ഥയാണ്. കച്ചവടത്തില്‍ വലിയ കുറവുണ്ടെന്ന് വ്യാപാരികളും പറയുന്നു. കിടങ്ങൂര്‍ പഞ്ചായത്തിന്‍റെ കീഴില്‍ പാര്‍ക്കിംഗ് സംവിധാനം ഏര്‍പ്പെടുത്തണമെന്ന ആവശ്യം ഉയര്‍ന്നിട്ടുണ്ട്. റോഡരികിലെ പാര്‍ക്കിംഗ് മൂലം വഴിയാത്രക്കാരും ദുരിതത്തിലാണ്.

പേരിനു പോലും പ്രവർത്തിച്ചില്ല; എരുമേലിയിലെ ഗ്യാസ് ശ്മശാനം നഷ്‌ടമാക്കിയത് 70 ലക്ഷം

എരുമേലി: ഉദ്ഘാടനം ചെയ്തെന്നാണ് രേഖകളിൽ. പക്ഷെ ഒരിക്കൽ പോലും തുറന്നു പ്രവർത്തിച്ചിട്ടില്ല. എരുമേലി പഞ്ചായത്ത്‌ വക ഗ്യാസ് ക്രിമറ്റോറിയം (എൽപിജി ശ്മശാനം) ആണ് ഇങ്ങനെ. 70 ലക്ഷം ചെലവിട്ട് 2019 ൽ നേർച്ചപ്പാറ വാർഡിൽ കമുകിൻകുഴി ഭാഗത്താണ് ആധുനിക പൊതു ശ്മശാനം നിർമിച്ചത്. 2020 ഒക്ടോബർ 15 നായിരുന്നു ഉദ്ഘാടനം. ധനകാര്യ കമ്മീഷൻ ഗ്രാന്‍റ് അമ്പത് ലക്ഷവും തനത് ഫണ്ട് 20 ലക്ഷവും ഉൾപ്പടെ 70 ലക്ഷമായിരുന്നു ഫണ്ട്. അക്ക്രഡിറ്റഡ് ഏജൻസി കോസ്റ്റ് ഫോർഡ് ആണ് നിർമാണം നടത്തിയത്. ചൂള നിർമിച്ചത് ജ്വാല എന്ന ഏജൻസിയായിരുന്നു. ആറ് ഗ്യാസ് സിലിണ്ടർ ഉപയോഗിച്ച് മൃതദേഹം ദഹിപ്പിക്കുന്നതിനുള്ള ഫർണസാണ് ഉള്ളത്. ഇതിന് ഒരു വർഷവും ഉപകരണങ്ങൾക്ക് രണ്ട് വർഷവും വാറന്‍റി കാലാവധി വ്യവസ്ഥയുണ്ടായിരുന്നു. എന്നാൽ, ഇത് സംബന്ധിച്ച് കരാർ ചെയ്തിട്ടില്ലെന്നും ഇത് മൂലം ശ്മശാനം പ്രവർത്തിപ്പിച്ച് ബോധ്യപ്പെടുത്തേണ്ട ഉത്തരവാദിത്തം ഇല്ലെന്നും പറഞ്ഞ് നിർമാണത്തിന്‍റെ ബിൽ തുക വാങ്ങി ഏജൻസിക്കാർ സ്ഥലം വിട്ടു. ഇപ്പോൾ ഈ ശ്മശാനം കാണണമെങ്കിൽ ഒരാൾ പൊക്കത്തിലുള്ള കാടുകൾ വെട്ടി മാറ്റണം. ട്രയൽ റൺ നടത്തിയപ്പോൾ ഗുരുതരമായ സാങ്കേതിക പിഴവ് കണ്ടെത്തിയിരുന്നു. ഇത് ഇനിയും പരിഹരിച്ചിട്ടില്ല. മൃതദേഹങ്ങളുടെ ദഹിപ്പിക്കൽ വേഗത്തിൽ പൂർത്തിയാക്കുന്ന ആധുനിക സജ്ജീകരണങ്ങളാണ് ഗ്യാസ് ക്രിമറ്റോറിയത്തിലുള്ളതെന്ന് നിർമാണം നടത്തിയ ഏജൻസികൾ പറയുന്നു. ദഹിപ്പിക്കൽ പ്രക്രിയയ്ക്ക് ആവശ്യമായ ഇലക്ട്രിക്കൽ ഫർണസുകൾ ഉൾപ്പെടെയുള്ള സാങ്കേതിക സൗകര്യങ്ങളാണ് സ്ഥാപിച്ചിട്ടുള്ളത്. ചാരം ശേഖരണ സൗകര്യമുള്ള ഒരു ക്രിമേഷൻ ചേമ്പർ, ക്രിമേഷൻ ഫർണസ്, ഓട്ടോമാറ്റിക് എൽപിജി ഗ്യാസ് ബർണർ സിസ്റ്റം, ഗ്യാസ് ബർണറുകൾ പ്രവർത്തിപ്പിക്കുന്നതിനുള്ള കൺട്രോൾ പാനൽ ബോർഡ്, മനുഷ്യ മൃതദേഹങ്ങൾ ദഹിപ്പിക്കുന്നതിന് ആവശ്യമായ എൽപിജി ഗ്യാസ് പൈപ്പ് ലൈൻ ക്രമീകരണം എന്നിവയുണ്ട്. 60-90 മിനിറ്റിനുള്ളിൽ മൃതദേഹം ദഹിപ്പിക്കപ്പെടുമെന്നാണ് നിർമാണം നടത്തിയ ഏജൻസി അവകാശപ്പെടുന്നത്. എന്നാൽ നിർമാണത്തിലെ ഗുരുതരമായ സാങ്കേതിക പിഴവ് മൂലം നിലവിൽ മൃതദേഹം സംസ്‌കരിച്ചാൽ ഫർണസും കെട്ടിടവും നിറഞ്ഞ് കടുത്ത പുക വ്യാപിക്കുമെന്നാണ് ഡമ്മി ഉപയോഗിച്ച് നടത്തിയ ട്രയൽ റണ്ണിൽ വ്യക്തമായത്. മൃതദേഹങ്ങൾ സംസ്കരിക്കാൻ സ്വന്തം സ്ഥലവും സൗകര്യവും ഇല്ലാത്തവർക്കും നിർധനർക്കും പ്രയോജനം നൽകാനുള്ള ലക്ഷ്യത്തിലാണ് ശ്മശാനം നിർമിച്ചത്. എന്നാൽ, ഒരു പ്രയോജനവും ഇല്ലാതെ ലക്ഷങ്ങളുടെ ഫണ്ട് പാഴായി മാറിയ കാഴ്ചയാണ് ശ്മശാനത്തിലെത്തിയാൽ കാണുക.

സ്മാർട്ട് കാഞ്ഞിരപ്പള്ളി: വികസന സെമിനാർ നടത്തി

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രലിന്‍റെ ദ്വിശതാബ്ദി സമാപന ആഘോഷങ്ങളുടെ ഭാഗമായി വികസന സെമിനാർ - സ്മാർട്ട് കാഞ്ഞിരപ്പള്ളി സംഘടിപ്പിച്ചു. വികസന സങ്കല്പത്തിന്‍റെ പരമ്പരാഗത കാഴ്ചപ്പാടുകളിൽ നിന്നുകൊണ്ടു പ്രായോഗിക വികസന കാര്യങ്ങൾക്ക് കൂടുതൽ പ്രാധാന്യം നൽകി സമൂഹത്തിന്‍റെ സ്ഥായിയായ വികസനത്തിന് ഉപകരിക്കപ്പെടുന്ന പദ്ധതികളും നിർദേശങ്ങളുമാണ് സെമിനാറിൽ അവതരിപ്പിക്കപ്പെട്ടത്. കത്തീഡ്രൽ വികാരിയും ആർച്ച് പ്രീസ്റ്റുമായ റവ.ഡോ. കുര്യൻ താമരശേരി സെമിനാർ ഉദ്ഘാടനം ചെയ്തു. സീനിയർ മാധ്യമപ്രവർത്തകനും യൂട്യൂബറുമായ ജോ എ. സ്കറിയ മോഡറേറ്ററായി നടന്ന ചർച്ചയിൽ അമൽജ്യോതി കോളജിലെ പ്രഫ. തോമസ് വർക്കി ജീവിത ഗുണനിലവാര വിശകലനത്തെക്കുറിച്ചും കാഞ്ഞിരപ്പള്ളി എസ്ഡി കോളജിലെ റിസർച്ച് ഗൈഡ് ഡോ. ജയമോള്‍ ജെയിംസ് സാമൂഹ്യ ശാക്തീകരണം കാഞ്ഞിരപ്പള്ളിക്ക് ഒരു വികസന മാതൃക എന്നതിനെക്കുറിച്ചും പിടി ഫോറസ്റ്റ് റിസർച്ച് ഇൻസ്റ്റിറ്റ്യൂട്ട് മുൻ സീനിയർ സയന്‍റിസ്റ്റ് ഡോ. ജോസ് കല്ലറക്കൽ ജനജീവിതം സുഖമാകാൻ ചില ക്ഷേമ സംരംഭങ്ങൾ എന്നതിനെക്കുറിച്ചും പ്രബന്ധങ്ങൾ അവതരിപ്പിച്ചു. ചീഫ് വിപ്പ് ഡോ.എൻ. ജയരാജ്, ആന്‍റോ ആന്‍റണി എംപി, ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മുടക്കക്കുഴി, പഞ്ചായത്തംഗങ്ങളായ മഞ്ജു മാത്യു, ബിജു പത്യാല, വി. രാജൻ എന്നിവർ സെമിനാറിൽ പങ്കെടുത്ത് പൊതുജനങ്ങളുടെ ചോദ്യങ്ങൾക്ക് മറുപടി നൽകി. അസിസ്റ്റന്‍റ് വികാരിമാരായ ഫാ. തോമസുകുട്ടി ആലപ്പാട്ടുകുന്നേൽ, ഫാ. ടോണി മുളങ്ങാശേരി. ഡോ.ബെന്നി ജോർജ്, ശ്രീ ടോമി നീറിയാങ്കല്‍, സെബാസ്റ്റ്യൻ എള്ളുകുന്നേൽ, റെജി കൊച്ചുകരിപ്പാപറമ്പിൽ, ഫിലിപ്പ് പള്ളിവാതുക്കൽ എന്നിവർ നേതൃത്വം നൽകി.

പികെവി പുരസ്‌കാരം സമ്മാനിച്ചു

കിടങ്ങൂര്‍: കമ്യൂണിസ്റ്റ് പാര്‍ട്ടി മതങ്ങള്‍ക്കും വിശ്വാസങ്ങള്‍ക്കുമെതിരാണെന്ന വാദം ശരിയല്ലെന്നും മത ഭ്രാന്തിനെയാണ് കമ്യൂണിസ്റ്റ് പാര്‍ട്ടി എതിര്‍ക്കുന്നതെന്നും സിപിഐ സംസ്ഥാന സെക്രട്ടറി ബിനോയി വിശ്വം. കിടങ്ങൂരില്‍ പികെവി സെന്‍റര്‍ ഫോര്‍ ഹ്യൂമന്‍ ഡവലപ്പ്മെന്‍റ് ആന്‍ഡ് കള്‍ച്ചറല്‍ അഫയേഴ്‌സിന്‍റെ പുരസ്‌കാരം വിപ്ലവ ഗായിക പി.കെ മേദിനിക്ക് സമ്മാനിച്ചു പ്രസംഗിക്കുകയായിരുന്നു അദ്ദേഹം. പികെവി സെന്‍റര്‍ പ്രസിഡന്‍റ് ജി. വിശ്വനാഥന്‍ നായര്‍ അധ്യക്ഷത വഹിച്ചു. ഡോ. പി.കെ. ജനാര്‍ദന കുറുപ്പ് രചിച്ച് വേലായുധന്‍ ഇടച്ചേരി സംഗീതം നല്‍കി എം.ഖാലിദ് ആലപിച്ച പികെവി യെ കുറിച്ചുള്ള ജനങ്ങളുടെ സിഡി സിപിഐ ജില്ല സെക്രട്ടറി വി.ബി ബിനുവിന് നല്‍കി ബിനോയി വിശ്വം പ്രകാശനം ചെയ്തു. വിദ്യാര്‍ഥികള്‍ക്കുള്ള സ്‌കോളര്‍ഷിപ്പ് മോന്‍സ് ജോസഫ് എംഎല്‍എയും ചികത്സാ സഹായം ജോസ്‌മോന്‍ മുണ്ടക്കലും വിതരണം ചെയ്തു. മുന്‍ മന്ത്രി കെ.സി. ജോസഫ്, ആര്‍.രാജേന്ദ്രന്‍, സി.കെ. ശശിധരന്‍, ഇ.എം ബിനു, സി.കെ ആശ എംഎല്‍എ, ബാബു കെ. ജോര്‍ജ്, ശാരദ മോഹന്‍, ജോണ്‍ വി. ജോസഫ്, മോഹനന്‍ ചേന്നംകുളം, വി.കെ സന്തോഷ് കുമാര്‍, പി.കെ. ഷാജകുമാര്‍, പി.ജി തൃഗുണസെന്‍, വേലായുധന്‍ ഇടച്ചേരി തുടങ്ങിയവര്‍ പ്രസംഗിച്ചു.

വിദ്യാഭ്യാസ പുരോഗതി സാമൂഹ്യ പുരോഗതിയുടെ അടിത്തറ: മന്ത്രി എം.ബി. രാജേഷ്

കാഞ്ഞിരപ്പള്ളി: വിദ്യാഭ്യാസ പുരോഗതിയാണ് സാമൂഹ്യ പുരോഗതിയുടെ അടിത്തറയെന്ന് തദ്ദേശ സ്വയംഭരണ, എക്സൈസ് മന്ത്രി എം.ബി. രാജേഷ്. സെബാസ്റ്റ്യൻ കുളത്തുങ്കൽ എംഎൽഎ നേതൃത്വം നൽകുന്ന ഫ്യൂച്ചർ സ്റ്റാർസ് എഡ്യൂക്കേഷൻ പ്രൊജക്ടിന്‍റെ ആഭിമുഖ്യത്തിൽ നടത്തിയ പ്രതിഭാ പുരസ്കാരത്തിന്‍റെ എംഎൽഎ എക്സലൻസ് അവാർഡുകളുടെയും വിതരണതോടനുബന്ധിച്ച് നടന്ന സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കാഞ്ഞിരപ്പള്ളി സെന്‍റ് ഡൊമിനിക്സ് കോളജ് ഓഡിറ്റോറിയത്തിൽ നടന്ന ചടങ്ങിൽ സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിച്ചു. പ്രമോദ് നാരായണൻ എംഎൽഎ മുഖ്യപ്രഭാഷണം നടത്തി. ജില്ലാ പോലീസ് മേധാവി ഷാഹുൽ ഹമീദ് ഐപിഎസ് അവാർഡുകൾ വിതരണം ചെയ്തു. സിവിൽ സർവീസ് റാങ്ക് ജേതാക്കളായ സോണറ്റ് ജോസ്, നസ്രിൻ പി. ഫസീം എന്നിവർ ചടങ്ങിൽ പങ്കെടുത്ത വിദ്യാർഥികൾക്ക് മോട്ടിവേഷണൽ ടോക്ക് നടത്തി. ഫ്യൂച്ചർ സ്റ്റാർസ് അഡ്വൈസറി ബോർഡ് മെംബർ ജോർജുകുട്ടി ആഗസ്തി, ഡയറക്ടർ ഡോ.ആൻസി ജോസഫ്, ജില്ലാ ആസൂത്രണ സമിതി അംഗം കെ.രാജേഷ്, കോളജ് ബർസാർ റവ.ഡോ. മനോജ് പാലക്കുടി, ഈരാറ്റുപേട്ട മുനിസിപ്പൽ ചെയർപേഴ്സൺ സുഹറ അബ്ദുൾ ഖാദർ, കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, ഈരാറ്റുപേട്ട ബ്ലോക്ക് പഞ്ചായത്ത് പ്രസിഡന്‍റ് മറിയാമ്മ ഫെർണാണ്ടസ്, കാഞ്ഞിരപ്പള്ളി ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, ബ്ലോക്ക് പഞ്ചായത്ത് മെംബർ സാജൻ കുന്നത്ത്, ഹയർസെക്കൻഡറി റീജണൽ ഡപ്യൂട്ടി ഡയറക്ടർ പി.എൻ. വിജി, കാഞ്ഞിരപ്പള്ളി വിദ്യാഭ്യാസ ജില്ല ഓഫീസർ റോഷ്‌ന അലിക്കുഞ്ഞ്, കാഞ്ഞിരപ്പള്ളി എഇഒ സുൽഫിക്കർ, ഈരാറ്റുപേട്ട എഇഒ ഷംല ബീവി, ഫ്യൂച്ചർ സ്റ്റാർസ് സെക്രട്ടറി എം.ജി. സുജ പഞ്ചായത്ത് പ്രസിഡന്‍റുമാർ തുടങ്ങിയവർ പ്രസംഗിച്ചു. എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങൾക്കും എ പ്ലസ് നേടിയ പൂഞ്ഞാർ നിയോജകമണ്ഡലത്തിലെ കുട്ടികൾക്കും സിവിൽ സർവീസ് റാങ്ക് ജേതാക്കൾ, യൂണിവേഴ്സിറ്റി പരീക്ഷകളിൽ വിവിധ വിഷയങ്ങൾക്ക് റാങ്ക് നേടിയവർ, പിഎച്ച്ഡി ലഭിച്ചവർ തുടങ്ങിയവർക്ക് പ്രതിഭാ പുരസ്കാരവും എസ്എസ്എൽസി, പ്ലസ്ടു പരീക്ഷകളിൽ 100 ശതമാനം വിജയം കൈവരിച്ച സ്കൂളുകൾക്ക് എംഎൽഎ എക്സലൻസ് അവാർഡും വിതരണവും ചെയ്തു.

എട്ടുനോമ്പാചരണം: കുറവിലങ്ങാട്ട് ഒരുക്കങ്ങൾ ആരംഭിച്ചു

കുറവിലങ്ങാട്: ആഗോള മരിയൻ തീർഥാടന കേന്ദ്രമായ കുറവിലങ്ങാട് എട്ടുനോമ്പാചരണത്തിനും പരിശുദ്ധ ദൈവമാതാവിന്‍റെ ജനനതിരുനാളിനുമുള്ള ഒരുക്കങ്ങൾ ആരംഭിച്ചു. സെപ്റ്റംബർ ഒന്നുമുതൽ എട്ടുവരെയാണ് നോമ്പാചരണം. എട്ടിന് ദൈവമാതാവിന്‍റെ ജനനത്തിരുനാൾ ആഘോഷവും നടക്കും. നോമ്പാചരണത്തിന് ഒരുക്കമായി ഓഗസ്റ്റ് 28, 29, 30, 31, സെപ്റ്റംബർ ഒന്നുവരെ തീയതികളിലായി വചനപ്രഘോഷണം നടക്കും. പത്താമത് കുറവിലങ്ങാട് ബൈബിൾ കൺവൻഷന് നേതൃത്വം നൽകുന്നത് ഫാ. സേവ്യർഖാൻ വട്ടായിലാണ്. റവ.ഡോ. ജോസഫ് തടത്തിൽ വികാരിയായിരിക്കെ ആരംഭിച്ച ബൈബിൾ കൺവൻഷൻ ഒരു പതിറ്റാണ്ട് പിന്നിടുന്നുവെന്നതും പ്രത്യേകതയാണ്. റവ.ഡോ. അഗസ്റ്റിൻ കൂട്ടിയാനിയിൽ ആർച്ച്പ്രീസ്റ്റായിരിക്കെ കോവിഡ് കാലയളവിൽപ്പോലും കൺവൻഷൻ മുടക്കമില്ലാതെ തുടർന്നാണ് പത്താം വർഷത്തിലേക്ക് പ്രവേശിക്കുന്നത്. എട്ടുനോമ്പാചരണത്തിന്‍റെയും അഭിഷേകാഗ്നി കൺവൻഷന്‍റെയും ഒരുക്കങ്ങൾക്കായി വിവിധ കമ്മിറ്റികൾ പ്രവർത്തനം ആരംഭിച്ചു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അധ്യക്ഷത വഹിച്ചു.

ആഷ് ആഷിതയ്ക്ക് പുരസ്‌കാരം സമ്മാനിച്ചു

കോട്ടയം: എം.പി. പോള്‍ ചെറുകഥാ പുരസ്‌കാരം ആഷ് ആഷിതയ്ക്ക് സമ്മാനിച്ചു. ദര്‍ശന സാംസ്‌കാരിക കേന്ദ്രത്തില്‍ നടന്ന സാഹിതീ സംഖ്യത്തിന്‍റെ വാര്‍ഷിക യോഗത്തില്‍ മന്ത്രി വി.എന്‍. വാസവനാണ് പുരസ്‌കാരം സമ്മാനിച്ചത്. ഡോ. കുര്യാസ് കുമ്പളക്കുഴി അധ്യക്ഷത വഹിച്ച യോഗത്തില്‍ എഴുത്തുകാരന്‍ എസ്. ഹാരീഷ് മുഖ്യ പ്രഭാഷണവും കെ.ബി.പ്രസന്നകുമാര്‍ എം.പി.പോള്‍ അനുസ്മരണവും നടത്തി. ചെറുകഥാ സ്‌പെഷല്‍ ജൂറി പുരസ്‌കാരം ക്യാപ്റ്റന്‍ ഗോവിന്ദ്, ജോണി ജെ. പ്ലാത്തോട്ടം, രമേശന്‍ മുല്ലശേരി എന്നിവര്‍ക്കും മാധ്യമ പുരസ്‌കാരം സതീഷ് ചേലാട്ട്, പ്രഫ. നെടുംകുന്നം രഘുദേവ് എന്നിവര്‍ക്കും സമ്മാനിച്ചു. കോട്ടയത്തും പരിസര പ്രദേശങ്ങളിലുമുള്ള സാഹിത്യ സംഘടനാ പ്രവര്‍ത്തകരെയും യോഗത്തില്‍ ആദരിച്ചു. തേക്കിന്‍കാട് ജോസഫ്, പോള്‍ മണലില്‍, ഉണ്ണികൃഷ്ണന്‍ കിടങ്ങൂര്‍, ജോയി നാലുനാക്കല്‍, രാധാകൃഷ്ണ കുറുപ്പ് എന്നിവര്‍ പ്രസംഗിച്ചു.

49ാം സ്നേഹവീടിന്‍റെ താക്കോല്‍ സമര്‍പ്പിച്ചു

പാലാ: ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നേതൃത്വം നല്കുന്ന സ്നേഹദീപം പദ്ധതിപ്രകാരമുള്ള നാല്പ്പത്തിഒന്‍പതാം സ്നേഹവീടിന്‍റെ താക്കോല്‍ സമര്‍പ്പണം മുത്തോലി പഞ്ചായത്തിലെ മീനച്ചിലില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ നിര്‍വഹിച്ചു. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നേതൃത്വം നല്കുന്ന സ്നേഹദീപം പദ്ധതിയുടെ പ്രവര്‍ത്തനങ്ങള്‍ സാമൂഹ്യപ്രവര്‍ത്തകര്‍ക്കും ജനപ്രതിനിധികള്‍ക്കും അനുകരണീയമായ മാതൃകയാണെന്ന് ഹേമലത പ്രേംസാഗർ പറഞ്ഞു. സെബാസ്റ്റ്യന്‍ പുരയിടം സൗജന്യമായി നല്കിയ സ്ഥലത്താണ് മുത്തോലി പഞ്ചായത്തിലെ പത്താം സ്നേഹവീട് നിര്‍മിച്ചത്. കാരുണ്യാ ചാരിറ്റബിള്‍ ട്രസ്റ്റ് ചെയര്‍മാന്‍ സെബാസ്റ്റ്യന്‍ പുരയിടം അധ്യക്ഷത വഹിച്ചു. സ്നേഹദീപം സൊസൈറ്റി ഭാരവാഹികളായ സന്തോഷ് കാവുകാട്ട്, കെ.സി. മാത്യു കേളപ്പനാല്‍, സോജന്‍ വാരപ്പറമ്പില്‍, ഹരിദാസ് അടമത്തറ, ജേക്കബ് മഠത്തില്‍, കുര്യാക്കോസ് മണിക്കൊമ്പില്‍, ജോയി കുന്നപ്പള്ളി, ജോസുകുട്ടി മാളിയേക്കല്‍, ടോമി തുണ്ടത്തില്‍, മോന്‍സി നെല്ലാംതടം എന്നിവര്‍ പ്രസംഗിച്ചു.

ജനറല്‍ ആശുപത്രി വിഷയം: എല്‍ഡിഎഫ് യോഗത്തില്‍ ഘടകകക്ഷി നേതാവിനെതിരേ രൂക്ഷ വിമര്‍ശനം

പാലാ: രാഷ്ട്രീയ ജനതാദള്‍ നിയോജക മണ്ഡലം പ്രസിഡന്‍റും സംസ്ഥാന എക്‌സിക്യൂട്ടീവ് അംഗവുമായ പീറ്റര്‍ പന്തലാനിക്കെതിരേ എല്‍ഡിഎഫ് നിയോജക മണ്ഡലം യോഗത്തില്‍ രൂക്ഷ വിമര്‍ശനം. ജനറല്‍ ആശുപത്രിയെ സംരക്ഷിക്കാനായി നടത്തുന്ന ബഹുജന കൂട്ടായ്മയെക്കുറിച്ച് ആലോചിക്കാനായി കഴിഞ്ഞ ദിവസം നടത്തിയ എല്‍ഡിഎഫ് യോഗത്തിലായിരുന്നു പീറ്റര്‍ പന്തലാനിക്കെതിരെ വിമര്‍ശനമുയര്‍ന്നത്. ജനറല്‍ ആശുപത്രിക്കു അഗ്‌നി രക്ഷാ സേനയുടെ എന്‍ഒസി ഇല്ലെന്ന വിവരം മീനച്ചില്‍ താലൂക്ക് വികസന സമിതിയില്‍ ഉന്നയിച്ചത് അംഗീകരിക്കാന്‍ കഴിയില്ലെന്നായിരുന്നു സിപിഎം, കേരള കോണ്‍ഗ്രസ്-എം, സിപിഐ കക്ഷികളുടെ നിലപാട്. ഇത്തരം നടപടികളുമായി എല്‍ഡിഎഫില്‍ തുടരാന്‍ കഴിയില്ലെന്നും ഇവര്‍ പറഞ്ഞു. ആശുപത്രിയേയും ആശുപത്രിയില്‍ എത്തുന്നവരെയും ദോഷമായി ബാധിക്കുന്ന ഇത്തരം വെളിപ്പെടുത്തലുകള്‍ എല്‍ഡിഎഫ് നയത്തിനു വിരുദ്ധമാണ്. ആശുപതി സ്ഥലം കയ്യേറിയിട്ടുണ്ടെന്ന് കാണിച്ച് മീനച്ചില്‍ താലൂക്ക് വികസന സമിതിയില്‍ പരാതി നല്‍കിയതിനെയും എല്‍ഡിഎഫ് നേതാക്കള്‍ ചോദ്യം ചെയ്തു. എല്‍ഡിഎഫ് എടുക്കുന്ന തീരുമാനങ്ങള്‍ മാണി സി. കാപ്പന്‍ എംഎല്‍എ ഉടന്‍ അറിയുന്നതായും ആക്ഷേപമുയര്‍ന്നു. വിവരം അറിയിച്ചതു മാത്രം: പീറ്റര്‍ പന്തലാനി അഗ്‌നി രക്ഷാ സേനയുടെ എന്‍ഒസി ഇല്ലാത്തതും വൈദ്യുതി ജോലികളിലെ ക്രമക്കേടും അപകട സാധ്യതകളും ആശുപത്രി സ്ഥലത്തില്‍ കുറവ് ഉണ്ടായതും മീനച്ചില്‍ താലൂക്ക് വികസന സമിതിയിലും ആശുപത്രി മാനേജിംഗ് കമ്മിറ്റിയിലും അറിയിക്കുക മാത്രമാണ് ചെയ്തത്. അല്ലാതെ എല്‍ഡിഎഫ് മുന്നണിയെ അപകീര്‍ത്തിപ്പെടുത്തുന്ന യാതൊരു പ്രസ്താവനകളും ഇതുവരെ നടത്തിയിട്ടില്ല. എല്‍ഡിഎഫ് യോഗത്തിലെ വിമര്‍ശനത്തിനു മറുപടിയായി ഇതു സംബന്ധിച്ച ഉദ്യോഗസ്ഥ റിപ്പോര്‍ട്ട് നല്‍കിയിട്ടുണ്ട്.

ചാർജിംഗ് സ്റ്റേഷനിൽ കാറിടിച്ചുകയറി കുട്ടി മരിച്ച സംഭവത്തിൽ പോലീസ് കേസടുത്തു

ഈരാറ്റുപേട്ട: വാഗമണ്ണിൽ ചാർജിംഗ്സ്റ്റേഷനിൽ കാറിടിച്ചുകയറി നാലുവയസുകാരൻ മരണപ്പെട്ട സംഭവത്തിൽ ഈരാറ്റുപേട്ട പോലീസ് കേസെടുത്തു. സംഭവത്തിൽ കരുനാഗപ്പള്ളി സ്വദേശിയായ ജയകൃഷ്ണനെതിരെയാണ് പോലീസ് കേസെടുത്തത്. വാഹനവും കസ്റ്റഡിയിൽ എടുത്തിട്ടുണ്ട്. ഇയാൾ എറണാകുളത്ത് അഭിഭാഷകനാണെന്നു പറയപ്പെടുന്നു.കോട്ടയം മെഡിക്കൽ കോളജിൽ പോസ്റ്റ്മോർട്ടത്തിനുശേഷം മൃതദേഹം ബന്ധുക്കൾക്ക് വിട്ട് നൽകി. പാലായിൽ എൽകെജി വിദ്യാർഥിയായിരുന്നു മരണമടഞ്ഞ അയാൻ. അതേസമയം സംഭവത്തിൽ പോലീസ് അനാസ്ഥ കാട്ടിയതായി നാട്ടുകാർ ആരോപിക്കുന്നു. അപകടം നടന്ന ഉടനെ സംഭവം നാട്ടുകാർ പോലീസിൽ അറിയിച്ചിരുന്നു. ഇയാളെ പിടിച്ചുനിർത്താനും പോലീസ് നിർദേശിച്ചു. എന്നാൽ ജയകൃഷ്ണൻ ബഹളം വച്ചതോടെ വണ്ടി നമ്പർ എഴുതിയെടുത്ത് വാഹനം വിട്ടയക്കാൻ പോലീസ് നിർദേശിച്ചതായി നാട്ടുകാർ പറയുന്നു. ഇതോടെ വാഹനം പരിശോധിക്കാനോ ഇയാൾ മദ്യപിച്ചതാണോ എന്ന് മെഡിക്കൽ ചെക്കപ്പ് നടത്താനോ സാധിച്ചില്ല. കുട്ടി മരിച്ചതിനെ തുടർന്ന് പോലീസ് അറിയിച്ചതോടെയാണ് വാഹനം സ്റ്റേഷനിൽ എത്തിച്ചത്.

ജനകീയ വിഷയങ്ങളെ രാഷ്‌ട്രീയവത്കരിക്കരുത്: ജോസ് കെ. മാണി

കോട്ടയം: സംസ്ഥാനത്തെ മലയോര മേഖലകളിലെ വന്യജീവി ആക്രമണവും നാട്ടിലുടനീളമുള്ള തെരുവുനായ ഭീഷണിയും കേരളം നേരിടുന്ന ഗുരുതരമായ സാമൂഹിക യാഥാര്‍ഥ്യമാണെന്നും അവ ഉന്നയിക്കുമ്പോള്‍ അതിനെ രാഷ്ട്രീയവത്ക്കരിക്കരുതെന്നും കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി. കേരള കോണ്‍ഗ്രസ്-എം ജില്ലാ നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. കൃഷി ചെയ്യാനാകാതെയും കൃഷിയിടങ്ങളില്‍ നിന്നും വിളവെടുക്കാനാകാതെയും മലയോര കര്‍ഷകര്‍ യാതൊരു വരുമാനവും ഇല്ലാത്തവരായി മാറിയിരിക്കുന്നു. നിലനില്‍പ്പിനും അതിജീവനത്തിനുമായുള്ള അവരുടെ പോരാട്ടങ്ങളില്‍ കേരള കോണ്‍ഗ്രസ്-എം കര്‍ഷകര്‍ക്കൊപ്പമാണ്. തെരുവിലെ നായക്കൂട്ടങ്ങളുടെ ശല്യം കാരണം ഇരുചക്ര വാഹനങ്ങളിലും കാല്‍നടയായും മനുഷ്യര്‍ക്ക് പുറത്തിറങ്ങാന്‍ കഴിയാത്ത അവസ്ഥയാണ്. ഇപ്പോള്‍ നിലനില്‍ക്കുന്ന രണ്ട് കേന്ദ്ര നിയമങ്ങളില്‍ കാലോചിതമായ ഭേദഗതികള്‍ വരുത്താതെ കേരളത്തിന് ഇനി മുന്നോട്ടു പോകാനാവില്ല. കേരള കോണ്‍ഗ്രസ്-എം നിരന്തരം പറഞ്ഞുകൊണ്ടിരിക്കുന്നതും ഇക്കാര്യമാണെന്നും അതിനെ വക്രീകരിച്ച് ചിത്രീകരിക്കാന്‍ ആരും ശ്രമിക്കേണ്ടെന്നും ജോസ് കെ. മാണി പറഞ്ഞു. ജില്ലാ പ്രസിഡന്‍റ് ലോപ്പസ് മാത്യുവിന്‍റെ അധ്യക്ഷതയില്‍ ചേര്‍ന്ന യോഗത്തില്‍ ജോബ് മൈക്കിള്‍ എംഎല്‍എ, സ്റ്റീഫന്‍ ജോര്‍ജ്, വി.ടി. ജോസഫ്, വിജി എം.തോമസ്, ജോസ് ടോം, ഔസേപ്പച്ചന്‍ വാളിപ്ലാക്കല്‍, സഖറിയാസ് കുതിരവേലി, ജോസ് പുത്തന്‍കാലാ, ജോസഫ് ചാമക്കാല, മാത്തുക്കുട്ടി കുഴിഞ്ഞാലി, ജോജി കുറുത്തിയാടന്‍ തുടങ്ങിയവര്‍ പ്രസംഗിച്ചു.

പശുക്കളെ കിട്ടാനില്ല; ക്ഷീരകര്‍ഷകര്‍ ദുരിതത്തില്‍

കോട്ടയം: ക്ഷീരമേഖലയിലേക്ക് ഇറങ്ങുന്ന കര്‍ഷകര്‍ക്ക് പശുക്കളുടെ ലഭ്യതക്കുറവും അധിക വിലയും വലിയ ബുദ്ധിമുട്ട് സൃഷ്ടിക്കുന്നു. മുന്‍കാലങ്ങളില്‍ 10 ലിറ്റര്‍ പാല്‍ ലഭിക്കുന്ന പശുക്കള്‍ 50,000 രൂപയില്‍ താഴെയുള്ള വിലയ്ക്ക് ലഭിക്കുമായിരുന്നു. എന്നാല്‍ ഇന്ന് 80,000 രൂപയ്ക്ക് മുകളിൽ വില ഉയര്‍ന്നിരിക്കുകയാണ് ചെലവ് വലിയ തോതില്‍ കൂടിയതോടെ ക്ഷീര മേഖലയിലെ പ്രതിസന്ധി മൂലം ചെറുകിട കര്‍ഷകര്‍ വ്യാപകമായി പശുക്കളെ വിറ്റ് ക്ഷീരമേഖലയോട് വിടപറഞ്ഞു. ക്ഷീര കര്‍ഷകര്‍ ഇല്ലാതായതോടെ വിപണിയില്‍ നാടന്‍ പാലിന്‍റെ ഡിമാന്‍ഡ് വര്‍ധിച്ചു. നിലവില്‍ കര്‍ഷകര്‍ നേരിട്ട് ഉപയോക്താക്കള്‍ക്ക് വില്പന നടത്തിയാല്‍ ലിറ്ററിനു 60 രൂപയ്ക്കു മുകളില്‍ ലഭിക്കുന്നുണ്ട്. ക്ഷീരവകുപ്പ് പശുവളര്‍ത്തല്‍ പ്രോത്സാഹിപ്പിക്കാന്‍ വിവിധ സബ്‌സിഡി പദ്ധതികള്‍കൂടി പ്രഖ്യാപിച്ചതോടെ ഈ മേഖലയിലുള്ള സാധാരണ കര്‍ഷകരാണ് ദുരിതത്തിലായിരിക്കുന്നത്. ഇന്നു ക്ഷീരമേഖലയില്‍ നീല്‍ക്കുന്നവരില്‍ 80 ശതമാനവും 10 പശുക്കള്‍ക്കു മുകളില്‍ വളര്‍ത്തുന്നവരാണ്. ഇവര്‍ക്ക് കന്നുകുട്ടികളെ വളര്‍ത്തികൊണ്ടുപോകുന്നത് ലാഭകരമല്ലാത്തതിനാല്‍ വില്പന നടത്തുകയാണ് പതിവ്. കന്നുകുട്ടികളെ പരിപാലിക്കാന്‍ സര്‍ക്കാരും കാര്യമായ സഹായം ചെയ്യുന്നില്ല. ഈ കിടാക്കളെല്ലാം തമിഴ്നാട്ടിലേക്കാണ് കയറി പോകുന്നത്. നിലവില്‍ പശുക്കളെ ലഭിക്കണമെങ്കില്‍ തമിഴ്‌നാടിനെയോ കര്‍ണാടകയെയോ ആശ്രയിക്കേണ്ട അവസ്ഥയിലാണ്. സംസ്ഥാനത്ത് സര്‍ക്കാര്‍ പദ്ധതികള്‍ ആരംഭിച്ചതായി അറിഞ്ഞതോടെ ഇടനിലക്കാര്‍ ഉയര്‍ന്ന വില വാങ്ങി ഗുണനിലവാരമില്ലാത്ത പശുക്കളെ കര്‍ഷകരുടെ തലയില്‍ കെട്ടിവയ്ക്കാന്‍ നീക്കം തുടങ്ങിയിരിക്കുകയാണ്. സാധാരണക്കാരായ കര്‍ഷകരെ പശുക്കച്ചവടക്കാരുടെ ചൂഷണത്തിലേക്ക് തള്ളിവിടാതെ സര്‍ക്കാര്‍ തലത്തില്‍ ചര്‍ച്ചകള്‍ നടത്തി ക്ഷീര വകുപ്പിന്‍റെ നേതൃത്വത്തില്‍ പശുക്കളെ കര്‍ഷകര്‍ക്ക് ലഭ്യമാക്കാന്‍ നടപടി സ്വീകരിക്കണമെന്ന് കര്‍ഷക കോണ്‍ഗ്രസ് ക്ഷീര സെല്‍ ജില്ലാ ചെയര്‍മാന്‍ എബി ഐപ്പ് ആവശ്യപ്പെട്ടു.

തോക്ക് ലൈസൻസിനായി കെട്ടിക്കിടക്കുന്നത് ആയിരക്കണക്കിന് അപേക്ഷകൾ

മുണ്ടക്കയം: സംസ്ഥാനത്ത് മുമ്പെങ്ങുമില്ലാത്തവിധം വന്യമൃഗശല്യം അതി രൂക്ഷമായിരിക്കുകയാണ്. ഒരോ ദിവസവും നിരവധി ആളുകളാണ് വന്യജീവി ആക്രമണത്തിൽ പരിക്കേൽക്കുകയും കൊല്ലപ്പെടുകയും ചെയ്യുന്നത്. നടപടി സ്വീകരിക്കേണ്ടത് കേന്ദ്രമാണെന്ന് സംസ്ഥാന സർക്കാരും ഇക്കാര്യത്തിൽ സംസ്ഥാന സർക്കാരുകൾക്ക് കർശന നടപടി സ്വീകരിക്കാനുള്ള അവകാശം നൽകിയിട്ടുണ്ടെന്ന് കേന്ദ്ര സർക്കാരും പറഞ്ഞൊഴിയുന്പോൾ ഹോമിക്കപ്പെടുന്നത് നിരവധി മനുഷ്യ ജീവനുകളാണ്. വർധിച്ചുവരുന്ന വന്യമൃഗ ശല്യത്തിനെതിരേ കർശന നടപടി സ്വീകരിക്കുന്നുണ്ടെന്ന് സർക്കാർ പ്രഖ്യാപിക്കുമ്പോഴും പുറത്തുവരുന്നത് കൂച്ചുവിലങ്ങിട്ട നിയമങ്ങളുടെ വിവരങ്ങളാണ്. മനുഷ്യജീവന് ഏറ്റവും കൂടുതൽ ഭീഷണിയായി മാറിയിരിക്കുന്നതും കർഷകരുടെ കൃഷികൾ നശിപ്പിക്കുന്നതിൽ മുഖ്യപങ്ക് വഹിക്കുന്നതും കാട്ടാനയും കാട്ടുപന്നിയുമാണ്. ഇതിൽ കാട്ടുപന്നികളെ വെടിവച്ച് കൊല്ലുന്നതിനായുള്ള പ്രത്യേക ഉത്തരവ് സംസ്ഥാന സർക്കാർ ഇറക്കുകയും ചെയ്തു. ഓണററി വൈൽഡ് ലൈഫ് വാർഡന്മാരായി പഞ്ചായത്ത് പ്രസിഡന്‍റുമാരെയും പഞ്ചായത്ത് സെക്രട്ടറിമാരെ അധികാരപ്പെട്ട ഉദ്യോഗസ്ഥനായും നിയമിച്ച് സർക്കാർ ഉത്തരവിറക്കിയിട്ടുണ്ട്. ലൈസൻസുള്ള ഷൂട്ടർമാരെ ഉപയോഗിച്ച് കാട്ടുപന്നികളെ വെടിവച്ച് കൊന്നതിനുശേഷം വനം വകുപ്പ് ഉദ്യോഗസ്ഥരുടെ സാന്നിധ്യത്തിൽ മണ്ണെണ്ണയൊഴിച്ച് നശിപ്പിച്ചു കളയണമെന്നാണ് വ്യവസ്ഥ. തോക്ക് ലൈസൻസുള്ളയാൾക്ക് ഒരു കാട്ടുപന്നിയെ കൊല്ലുന്നതിന് 1500 രൂപയും മറവുചെയ്യുന്നതിന് 2000 രൂപയുമാണ് പഞ്ചായത്തുകൾ നൽകുന്നത്. നിയമം നിലവിൽ വന്ന് മാസങ്ങൾ കഴിഞ്ഞെങ്കിലും അപകടകാരികളായ കാട്ടുപന്നികളിൽ വളരെ കുറച്ച് എണ്ണത്തെ മാത്രമേ പിടികൂടുവാൻ കഴിഞ്ഞുള്ളൂ. ഇതിന് പ്രധാന കാരണം സംസ്ഥാന സർക്കാർ ഇക്കാര്യത്തിൽ കാണിക്കുന്ന അലംഭാവമാണെന്ന് ആക്ഷേപം ശക്തമാണ്. മുന്പ് ഓരോ പഞ്ചായത്തിലും ലൈസൻസുള്ള തോക്കുണ്ടായിരുന്ന നിരവധി കർഷകരുണ്ടായിരുന്നു. എന്നാൽ, ഇപ്പോൾ കഴിഞ്ഞ ഒരു വർഷമായി സംസ്ഥാന സർക്കാർ തോക്കിന് ലൈസൻസ് പുതുക്കി നൽകുന്നില്ലെന്ന വിവരമാണെന്ന് പുറത്തുവരുന്നത്. ഇടുക്കി ജില്ലയിൽ മാത്രം കഴിഞ്ഞ ഒരു വർഷത്തിനിടെ ആയിരത്തിലധികം പേരുടെ തോക്കിനായുള്ള ലൈസൻസിനുള്ള അപേക്ഷകളാണ് കെട്ടിക്കിടക്കുന്നത്. മുൻകാലങ്ങളിൽ പോലീസിന്‍റെയും തഹസിൽദാരുടെയും റിപ്പോർട്ടുകൾ മാത്രം മതിയായിരുന്നു ലൈസൻസ് നൽകുന്നതിന്. എന്നാൽ, ഇത്തവണ ഈ റിപ്പോർട്ടുകൾക്ക് പുറമെ കണ്ണിന്‍റെ കാഴ്ച പരിശോധനാ റിപ്പോർട്ടും ആരോഗ്യ റിപ്പോർട്ടും ഉൾപ്പെടെ ഹാജരാക്കാൻ നിർദേശം നൽകിയിരുന്നു. എന്നാൽ, ഇതൊക്കെ സമർപ്പിച്ചിട്ടും തങ്ങൾക്ക് ലൈസൻസ് ലഭിച്ചിട്ടില്ലെന്നാണ് കർഷകർ പറയുന്നത്. നിലവിൽ ലൈസൻസ് പുതുക്കാത്തവർ തങ്ങളുടെ തോക്കുകൾ ലൈസൻസിയായിട്ടുള്ള തോക്ക് വില്പന കേന്ദ്രങ്ങളിലെ ഡിപ്പോകളിൽ ഏൽപ്പിച്ചിരിക്കുകയാണ്. ഈ തോക്കുകൾ സൂക്ഷിക്കുന്നതിന് ആറുമാസം കൂടുമ്പോൾ 500 രൂപ ഫീസ് അടയ്ക്കേണ്ടതുമുണ്ട്. ഇതും കർഷകർക്ക് ഏറെ ബുദ്ധിമുട്ടാണ് ഉണ്ടാക്കുന്നത്. ഇങ്ങനെ സംസ്ഥാനത്ത് 14 ജില്ലകളിലുമായി ആയിരക്കണക്കിന് ആളുകളുടെ തോക്കിനുള്ള ലൈസൻസുകളാണ് കളക്ടറേറ്റിൽ കെട്ടിക്കിടക്കുന്നതെന്നും കർഷകർ ആരോപിക്കുന്നു. കൂടാതെ ഇത്തരത്തിൽ ലൈസൻസുള്ള വ്യക്തികളെ വനം വകുപ്പ് ഉദ്യോഗസ്ഥർ പ്രത്യേക നിരീക്ഷണം നടത്തുന്നതായും കർഷകർ പറയുന്നു. വന്യമൃഗ ശല്യത്തിന് കർശന നടപടി സ്വീകരിക്കുന്നുണ്ടെന്ന് സർക്കാർ പ്രഖ്യാപിക്കുമ്പോഴും മനുഷ്യജീവന് വിലകൽപ്പിക്കാതെ വന്യമൃഗങ്ങൾക്ക് നാട്ടിലിറങ്ങി വിഹരിക്കുന്നതിനുള്ള അവസരമാണ് അധികാരികൾ ഒരുക്കുന്നതെന്നും ആക്ഷേപമുണ്ട്.

പാലാ സാൻതോം ഫുഡ് ഫാക്ടറി ഉദ്ഘാടനം ഇന്ന്

പാലാ: പാലാ രൂപത ആവിഷ്‌കരിച്ച കര്‍ഷക ശക്തീകരണ പദ്ധതിയായ കര്‍ഷക ബാങ്കിന്‍റെ പത്താം വാര്‍ഷിക വേളയില്‍ കാര്‍ഷിക മൂല്യവര്‍ധിത സംരംഭമായ പാലാ സാൻതോം ഫുഡ്സ് ഫാക്ടറി യാഥാര്‍ഥ്യമാവുന്നു. രൂപതയുടെ ഉടമസ്ഥതയിലുള്ള കരൂര്‍ മുണ്ടുപാലം സ്റ്റീല്‍ ഇന്ത്യ കാമ്പസിലാണ് ഫാക്ടറി സ്ഥാപിച്ചിട്ടുള്ളത്. ഫാക്ടറിയുടെ ഉദ്ഘാടനം ഇന്നു നടക്കും. രൂപതയുടെ പ്ലാറ്റിനം ജൂബിലി ഓര്‍മപ്പെടുത്തിക്കൊണ്ട് 75 വയസായ 75 മാതൃകാ കര്‍ഷകരെ ഉദ്ഘാടനസമ്മേളനത്തില്‍ ആദരിക്കും. രൂപതയുടെ സോഷ്യല്‍ സര്‍വീസ് വിഭാഗമായ പിഎസ്ഡബ്ല്യുഎസിന്‍റെ നേതൃത്വത്തില്‍ വിവിധ ഇടവകകളില്‍ കര്‍ഷക കൂട്ടായ്മകള്‍ നടത്തിവരുന്ന മൂല്യവര്‍ധിത ഉത്പന്ന സംരംഭങ്ങള്‍ക്ക് ശക്തി പകരുന്നതാണ് പുതിയ മുന്നേറ്റം. കര്‍ഷക ബാങ്ക് ആരംഭിച്ചതു മുതല്‍ വിവിധ ഇടവകകളില്‍ കര്‍ഷക ക്ലബുകളും ഉത്പാദക സംഘടനകളും ആരംഭിക്കുന്നതിനും ഈ രംഗത്ത് ബോധവത്കരണം നടത്തുന്നതിനും മുന്‍തൂക്കം നല്‍കിയിരുന്നു. കാര്‍ഷിക മേഖല വിവിധങ്ങളായ കാരണങ്ങളാല്‍ തളരുന്ന കാലഘട്ടത്തിലാണ് കര്‍ഷകര്‍ക്ക് കൈത്താങ്ങും ആത്മവിശ്വാസവും പകര്‍ന്ന് കര്‍ഷകബാങ്കിന്‍റെ പ്രവര്‍ത്തനങ്ങളുമായി രൂപത മുന്നോട്ടുപോകുന്നത്. മുണ്ടുപാലത്ത് ആറ് ഏക്കറോളം സ്ഥലമാണ് കാര്‍ഷിക മുന്നേറ്റ പ്രവര്‍ത്തനങ്ങള്‍ക്കായി രൂപതാകേന്ദ്രത്തില്‍ നിന്നും പാലാ സോഷ്യല്‍ വെല്‍ഫെയര്‍ സൊസൈറ്റിയെ ഏല്‍പ്പിച്ചത്. ആശീര്‍വാദകര്‍മം സാന്‍തോം ഫുഡ് ഫാക്ടറിയുടെ ആശീര്‍വാദകര്‍മം ഇന്ന് ഉച്ചകഴിഞ്ഞ് 2.30ന് ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിക്കും. മുഖ്യ വികാരി ജനറാള്‍ മോണ്‍. ജോസഫ് തടത്തില്‍, വികാരി ജനറാള്‍മാരായ മോണ്‍. ജോസഫ് മലേപ്പറമ്പില്‍, മോണ്‍. ജോസഫ് കണിയോടിക്കല്‍, മോണ്‍. സെബാസ്റ്റ്യന്‍ വേത്താനത്ത് എന്നിവര്‍ സഹകാര്‍മികരാകും. ഉദ്ഘാടനം ഉച്ചകഴിഞ്ഞ് മൂന്നിന് മാര്‍ ജോസഫ് കല്ലറങ്ങാട്ടിന്‍റെ അധ്യക്ഷതയില്‍ ചേരുന്ന സമ്മേളനത്തിന്‍റെ ഉദ്ഘാടനം മന്ത്രി വി.എന്‍. വാസവനും ഫാക്ടറിയുടെ ഉദ്ഘാടനം കൃഷിമന്ത്രി പി. പ്രസാദും നിര്‍വഹിക്കും. വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത് പദ്ധതി വിശദീകരിക്കും. എംപിമാരായ ജോസ് കെ. മാണി, കെ. ഫ്രാന്‍സിസ് ജോര്‍ജ്, എംഎല്‍എമാരായ മാണി സി. കാപ്പന്‍, മോന്‍സ് ജോസഫ്, സെബാസ്റ്റ്യന്‍ കുളത്തുങ്കല്‍, ചാണ്ടി ഉമ്മന്‍ എന്നിവരും പി.സി. ജോര്‍ജ്, മുനിസിപ്പല്‍ ചെയര്‍മാന് തോമസ് പീറ്റര്‍, പിഎസ്ഡബ്ല്യുഎസ് ഡയറക്ടര്‍ ഫാ. തോമസ് കിഴക്കേല്‍, സ്‌മോള്‍ ഫാര്‍മേഴ്സ് അഗ്രി ബിസിനസ് കണ്‍സോര്‍ഷ്യം മാനേജിംഗ് ഡയറക്ടര്‍ എസ്. രാജേഷ്‌കുമാര്‍, സ്റ്റേറ്റ് ഹോര്‍ട്ടിക്കള്‍ച്ചര്‍ മിഷന്‍ മാനേജിംഗ് ഡയറക്ടര്‍ സജി ജോണ്‍, നബാര്‍ഡ് ജില്ലാ മാനേജര്‍ റെജി വര്‍ഗീസ്, പ്രിന്‍സിപ്പല്‍ കൃഷി ഓഫീസര്‍ ജോ ജോസ് സി, വ്യവസായവകുപ്പ് ജില്ലാ ജനറല്‍ മാനേജര്‍ വി.ആര്‍. രാജേഷ്, ആത്മ പ്രോജക്ട് ഡയറക്ടര്‍ മിനി ജോര്‍ജ്, സ്റ്റേറ്റ് ഹോര്‍ട്ടിക്കള്‍ച്ചര്‍ മിഷന്‍ ഡെപ്യൂട്ടി ഡയറക്ടര്‍ ലെന്‍സി തോമസ്, കൃഷിവിജ്ഞാനകേന്ദ്രം പ്രോഗ്രാം കോ ഓര്‍ഡിനേറ്റര്‍ ഡോ. ജി. ജയലക്ഷ്മി, കാഞ്ഞിരമറ്റം അഗ്രോ പ്രൊഡ്യൂസര്‍ കമ്പനി ചീഫ് എക്സിക്യൂട്ടീവ് ഓഫീസര്‍ ടോം ജേക്കബ് ആലയ്ക്കല്‍, സാന്‍തോം ഫാര്‍മര്‍ പ്രൊഡ്യൂസര്‍ കമ്പനി ചെയര്‍മാന്‍ സിബി മാത്യു തുടങ്ങിയവര്‍ പ്രസംഗിക്കും. വാര്‍ഷിക പൊതുയോഗം പാലാ സാന്‍തോം ഫാര്‍മേഴ്സ് പ്രൊഡ്യൂസര്‍ കമ്പനിയുടെ വാര്‍ഷികപൊതുയോഗം രാവിലെ 11ന് ആരംഭിക്കും. ചെയര്‍മാന്‍ സിബി മാത്യു അധ്യക്ഷത വഹിക്കും. പിഎസ്ഡബ്ല്യുഎസ് ഡയറക്ടര്‍ ഫാ. തോമസ് കിഴക്കേല്‍ ഉദ്ഘാടം ചെയ്യും. കര്‍ഷക സംവാദം 1.30ന് കാര്‍ഷിക മേഖലയിലെ പ്രശ്നങ്ങളും സാധ്യതകളും സംബന്ധിച്ച കര്‍ഷകസംവാദം നടക്കും. സ്റ്റീല്‍ ഇന്ത്യ ഡയറക്ടര്‍ ഫാ. ജോസഫ് താഴത്തുവരിക്കയിലിന്‍റെ അധ്യക്ഷതയില്‍ ഇന്‍ഫാം ദേശീയ ചെയര്‍മാന്‍ ഫാ. ജോസഫ് ചെറുകരക്കുന്നേല്‍ സംവാദം ഉദ്ഘാടനം ചെയ്യും. ഇന്‍ഫാം രൂപതാ ഡയറക്ടര്‍ ഫാ. ജോസഫ് തറപ്പേല്‍ മോഡറേറ്ററാകും. ഫാ. ഫ്രാന്‍സിസ് ഇടത്തിനാല്‍, എഫ്പിഒ ഡിവിഷന്‍ മാനേജരും പിഎസ്ഡബ്ല്യുഎസ് പിആര്‍ഒയുമായ ഡാന്‍റീസ് കൂനാനിക്കല്‍ എന്നിവര്‍ പ്രസംഗിക്കും. കര്‍ഷകരില്‍നിന്നു വിളകള്‍ സംഭരിക്കും ചക്കയും കപ്പയും കൈതച്ചക്കയും ഏത്തക്കയും ഇതര പഴവര്‍ഗങ്ങളും പച്ചക്കറികളും കര്‍ഷകരില്‍ നിന്ന് ന്യായവിലയ്ക്ക് സംഭരിക്കും. ആഭ്യന്തര വിപണി മാത്രമല്ല വിദേശ രാജ്യങ്ങളിലേക്കും വിപണി ശൃംഖല വ്യാപിപ്പിച്ചുകൊണ്ട് ആരോഗ്യമുള്ള ഭക്ഷ്യവസ്തുക്കള്‍ ലോകത്തിന്‍റെ വിവിധ ഭാഗങ്ങളിലേക്ക് എത്തിക്കുവാനുള്ള ഉദ്യമത്തിനു കൂടിയാണ് ഇതോടെ തുടക്കമാകുന്നത്. ഇടവകകള്‍ തോറും പ്രവര്‍ത്തിക്കുന്ന കര്‍ഷക ഉത്പാദക സംഘടനകള്‍, കമ്പനികള്‍, കര്‍ഷക ദള ഫെഡറേഷനുകള്‍, ഫാര്‍മേഴ്‌സ് ക്ലബുകള്‍, സ്വാശ്രയസംഘങ്ങള്‍ തുടങ്ങിയവര്‍ ഉത്പാദിപ്പിക്കുന്ന മൂല്യവര്‍ധിത ഉത്പന്നങ്ങൾ തനതു ബ്രാൻഡില്‍ വിപണിയിലെത്തിക്കും. നൂതന സാങ്കേതിക വിദ്യയും യന്ത്രസാമഗ്രികളും നൂതന സാങ്കേതികവിദ്യകളും യന്ത്രസാമഗ്രികളും വിനിയോഗിച്ചുകൊണ്ടുള്ള മൂല്യവര്‍ധിത സംരംഭമാണ് ഇവിടെയുള്ളത്. ആധുനിക സാങ്കേതിക വിദ്യയോടു കൂടിയ 18 യന്ത്രസാമഗ്രികളാണ് ഫാക്ടറിയില്‍ ആരംഭഘട്ടത്തില്‍ ഇന്‍സ്റ്റാള്‍ ചെയ്യപ്പെട്ടിട്ടുള്ളത്. കര്‍ഷകര്‍ക്ക് തങ്ങളുടെ കാര്‍ഷിക വിളകൾ പഴുപ്പിക്കാന്‍ സാധ്യമാകുന്ന ഡ്രൈപ്പണിംഗ് ചേംബര്‍ ഒരു ഭാഗത്തുള്ളപ്പോള്‍ കാര്‍ഷികവിളകളും ഉത്പന്നങ്ങളും കേടുകൂടാതെ സൂക്ഷിക്കാന്‍ സാധിക്കുന്ന ഫ്രീസര്‍ യൂണിറ്റ് ഗോഡൗണ്‍ ഉണ്ടെന്നതും ഏറെ ശ്രദ്ധേയമാണ്. 45,000 കിലോയോളം ഭക്ഷ്യവസ്തുക്കള്‍ കേടുകൂടാതെ സൂക്ഷിക്കാന്‍ സാധിക്കും. എണ്ണയുടെ അമിതമായ ഉപയോഗം ഒഴിവാക്കി വാക്വം ഫ്രയര്‍ യൂണിറ്റിലൂടെ പലഹാരങ്ങള്‍ നിര്‍മിക്കുവാനുള്ള ഉപകരണങ്ങളും ഇവിടെയുണ്ട്. ഡീഹൈഡ്രേഷന്‍ ടെക്‌നോളജിയിലൂടെ കാര്‍ഷിക വിളകളും ഉത്പന്നങ്ങളും ഉണക്കി സംസ്കരിക്കുവാനുള്ള ഉപകരണങ്ങളും യന്ത്രങ്ങളും ഫാക്ടറിയില്‍ ക്രമീകരിച്ചിരിക്കുന്നു. 1.റൈസ് വാഷര്‍- അരിയില്‍ അടങ്ങിയിരിക്കുന്ന പൊടി, അഴുക്കുകള്‍, അധിക സ്റ്റാര്‍ച്ച്, കീടനാശിനി അവശിഷ്ടങ്ങള്‍ എന്നിവ പൂര്‍ണമായും നീക്കം ചെയ്യുന്നു. 2. ബോക്സ് സ്റ്റീമര്‍ - നിയന്ത്രിത നീരാവി ഉപയോഗിച്ച് അരി, പച്ചക്കറികള്‍ എന്നിവ പാകം ചെയ്യുന്നതിനും അണുവിമുക്തമാക്കുന്നതിനും ഉപയോഗിക്കുന്നു. 3. പള്‍വറൈസര്‍ - അരി, മുളക്, പയറുവര്‍ഗങ്ങള്‍, സുഗന്ധദ്രവ്യങ്ങള്‍ എന്നിവ സൂക്ഷ്മമായി പൊടിയാക്കി ഏകീകൃത ടെക്സ്ചര്‍ ഉണ്ടാക്കുന്നു. 4. ഇലക്ട്രിക് റോസ്റ്റര്‍ - അരിപ്പൊടി, മസാലകള്‍, വിത്തുകള്‍, കാപ്പി എന്നിവയുടെ റോസ്റ്റിംഗിലൂടെ സ്വാദും സുഗന്ധവും വര്‍ധിപ്പിക്കുന്നു. 5. റെക്ടാംഗിള്‍ ഷിഫ്റ്റര്‍ -പൊടിയാക്കിയ വസ്തുക്കളെ വിവിധ മെഷ് സൈസുകളിലൂടെ ഗ്രേഡ് ചെയ്ത് ഏകീകൃത കണികാ വലുപ്പം ഉറപ്പാക്കുന്നു. 6. ബ്ലാഞ്ചര്‍ - പച്ചക്കറികളും പഴങ്ങളും നിയന്ത്രിത ചൂടുവെള്ളത്തില്‍ ഹ്രസ്വകാലത്തേക്ക് മുക്കി എന്‍സൈം പ്രവര്‍ത്തനം നിര്‍ത്തുന്നു. നിറവും പോഷകങ്ങളും സംരക്ഷിക്കുന്നു. 7. പള്‍പ്പര്‍ -പഴങ്ങളില്‍നിന്ന് വിത്തുകള്‍, തൊലി, ഫൈബര്‍ എന്നിവ വേര്‍തിരിച്ച് ശുദ്ധവും മിനുസമാര്‍ന്നതമായ പള്‍പ്പ് ഉത്പാദിപ്പിക്കുന്നു. 8. ഫ്രൂട്ട് മില്‍ -പഴങ്ങളെ യൂണിഫോം മെഷിലൂടെ പാസ് ചെയ്ത് ഫൈന്‍ പള്‍പ്പ് ഉത്പാദിപ്പിക്കുന്നു. 9. ഹൊമജനൈസര്‍ - ജ്യൂസ്, മില്‍ക്ക് പ്രൊഡക്ടുകള്‍, ബിവറേജുകള്‍ എന്നിവയില്‍ ഏകീകൃതമായ ടെക്സ്ചറും സ്ഥിരതയും ഉണ്ടാക്കുന്നു. 10. റൈപ്പനിംഗ് ചേംബര്‍-പഴങ്ങളെ നിയന്ത്രിത പരിസ്ഥിതിയില്‍ ഏകീകൃതമായി പഴുപ്പിക്കുന്നതിനുള്ള അത്യാധുനിക സംവിധാനം. 11. വാക്ക്-ഇന്‍ ചില്ലര്‍ - ഫ്രഷ് പ്രൊഡക്ടുകളും സംസ്‌കരിച്ച ഭക്ഷ്യവസ്തുക്കളും വലിയ അളവില്‍ ചെറുചൂടില്‍ സൂക്ഷിക്കുന്നതിനുള്ള പ്രീമിയം സംഭരണ സംവിധാനം. 12. ബ്ലാസ്റ്റ് ഫ്രീസര്‍- ഭക്ഷ്യവസ്തുക്കളെ റാപ്പിഡ് ഫ്രീസിംഗ് ടെക്നോളജി ഉപയോഗിച്ച് അതിവേഗം ശീതീകരിക്കുന്നു. 13. വാക്ക്-ഇന്‍ ഫ്രീസര്‍- ഫ്രോസണ്‍ ഫുഡ് പ്രൊഡക്ടുകളുടെ നീണ്ടകാല സംഭരണത്തിനുള്ള ഇന്‍ഡസ്ട്രിയല്‍ ഗ്രേഡ് ഫ്രീസിംഗ് സൊല്യൂഷന്‍. 14. ഹീറ്റ് പമ്പ് ഡ്രയര്‍- കുറഞ്ഞ താപനിലയില്‍ ഭക്ഷ്യവസ്തുക്കളെ ഡിഹൈഡ്രേറ്റ് ചെയ്യുന്നതിലൂടെ പോഷകങ്ങളും സ്വാഭാവിക നിറവും രുചിയും സംരക്ഷിക്കുന്നു. 15. വാക്വം ഫ്രൈയര്‍ -വാക്വം അന്തരീക്ഷത്തില്‍ കുറഞ്ഞ താപനിലയില്‍ ഫ്രൈയിംഗ് നടത്തുന്നതിലൂടെ ആരോഗ്യകരവും പോഷകസമ്പന്നവുമായ സ്‌നാക്ക് ഫുഡുകള്‍ ഉത്പാദിപ്പിക്കുന്നു. പാലായുടെ കാര്‍ഷിക ഭൂപടത്തിലെ പുതിയ അധ്യായം‍ സാന്‍തോം ഫുഡ് ഫാക്ടറി പാലായുടെ കാര്‍ഷിക ഭൂപടത്തില്‍ പുതിയ അധ്യായം എഴുതിച്ചേര്‍ക്കുന്നു. പാലാ രൂപത പ്ലാറ്റിനം ജൂബിലി ആഘോഷിക്കുന്ന അവസരത്തില്‍ അധ്വാനമഹത്വത്താല്‍ മണ്ണില്‍ പൊന്നുവിളയിച്ച പാലാ രൂപതയിലെ 75 കര്‍ഷകര്‍ക്ക് രൂപതയുടെ സ്‌നേഹാദരം. ഫാക്ടറിയുടെ ഉദ്ഘാടന സമ്മേളനമധ്യേ കാര്‍ഷികരംഗത്തു മാതൃകാപ്രവര്‍ത്തനങ്ങള്‍ കാഴ്ചവച്ച വൈദികരെയും സിസ്റ്റര്‍മാരെയും മാതൃകാ കര്‍ഷകരെയും മെമന്‍റോ നല്‍കി ആദരിക്കും. കാര്‍ഷികരംഗത്ത് ഉത്തമ മാതൃകകളായ കര്‍ഷക കൂട്ടായ്മകള്‍കളെയും തദവസരത്തില്‍ ആദരിക്കും. പങ്കാളികളാവാന്‍ ഏവരേയും ഹൃദയപൂര്‍വം ക്ഷണിക്കുന്നു. ഫാ. തോമസ് കിഴക്കേൽ (ഡയറക്ടര്‍, പിഎസ്ഡബ്ല്യുഎസ്, പാലാ സാന്‍തോം എഫ്പിഒ ആൻഡ് കോ ഓര്‍ഡിനേറ്റര്‍, രൂപതാ ഫാര്‍മേഴ്‌സ് മൂവ്‌മെന്‍റ്)

ഓണത്തിന് വിഷരഹിത പച്ചക്കറി: കർഷക സെമിനാറും തൈ വിതരണവും നടത്തി

പൊൻകുന്നം: ഓണത്തിന് വിഷരഹിത പച്ചക്കറി ഉത്പാദിപ്പിക്കുക എന്ന ലക്ഷ്യത്തോടെ പൊൻകുന്നം മാർക്കറ്റിംഗ് സഹകരണസംഘത്തിന്‍റെ ആഭിമുഖ്യത്തിൽ കർഷക സെമിനാർ സംഘടിപ്പിച്ചു. ചീഫ് വിപ്പ് ഡോ.എൻ. ജയരാജ് ഉദ്ഘാടനം ചെയ്തു. സംഘം പ്രസിഡന്‍റ ഷാജി പാമ്പൂരി അധ്യക്ഷത വഹിച്ചു. പഞ്ചായത്തംഗങ്ങളായ സുമേഷ് ആൻഡ്രൂസ്, ആന്‍റണി മാർട്ടിൻ, കെ.എ. എബ്രാഹം, സംഘം വൈസ് പ്രസിഡന്‍റ് മോളി ജോൺ, ഭരണസമിതി അംഗങ്ങളായ മാത്തുക്കുട്ടി തൊമ്മിത്താഴെ, ജോർജുകുട്ടി പൂതക്കുഴി, രാഹുൽ ബി. പിള്ള, ഷൈല ജോൺ, സംഘം സെക്രട്ടറി ടോജി പി. തോമസ് എന്നിവർ പ്രസംഗിച്ചു. സമഗ്ര പച്ചക്കറി കൃഷി പ്രശ്നങ്ങളും പ്രതിവിധികളും എന്ന വിഷയത്തിൽ വാഴൂർ കൃഷി അസിസ്റ്റന്‍റ് ഡയറക്ടർ സിമി ഇബ്രാഹിമും വള പ്രയോഗത്തിൽ ശ്രദ്ധിക്കേണ്ട കാര്യങ്ങളെ സംബന്ധിച്ച് ഇന്ത്യൻ പൊട്ടാഷ് ലിമിറ്റഡ് സീനിയർ സെയിൽസ് ഓഫീസർ രഞ്ജിത് കെ. രാജീവും ക്ലാസുകൾ നയിച്ചു. സെമിനാറിൽ പങ്കെടുത്തവർക്ക് പച്ചക്കറി തൈകളും വിതരണം ചെയ്തു.

ത്രിതല പഞ്ചായത്ത് തെരഞ്ഞെടുപ്പ്: പ്രാദേശിക കക്ഷികൾ നിർണായക ശക്തിയായി മാറും - ജോസ് കെ. മാണി

വെച്ചൂച്ചിറ: ആസന്നമായ ത്രിതല പഞ്ചായത്ത് തെരഞ്ഞെടുപ്പിൽ ദേശീയ പാർട്ടികളേക്കാൾ ജനപിന്തുണ ആർജ്ജിച്ച് നിർണായക ശക്തികളായി മാറാൻ പ്രാദേശിക പാർട്ടികൾക്ക് കഴിയുമെന്ന് കേരള കോൺഗ്രസ് -എം ചെയർമാൻ ജോസ് കെ. മാണി എംപി. കേരള കോൺഗ്രസ് - എം റാന്നി നിയോജകമണ്ഡലം കമ്മിറ്റി വെച്ചൂച്ചിറയിൽ സംഘടിപ്പിച്ച ദ്വിദിന പഠന ക്യാമ്പ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം മലയോരമേഖലയിലെ ജനങ്ങൾ നേരിടുന്ന വിഷയങ്ങളിലും കാർഷിക പ്രശ്നങ്ങളിലും ഭരണ, പ്രതിപക്ഷ രാഷ്ട്രീയ വ്യത്യാസമില്ലാതെ ശക്തമായ നിലപാട് സ്വീകരിച്ച് കേരള കോൺഗ്രസ് -എം ജനങ്ങൾക്കൊപ്പം അടിയുറച്ചു നിൽക്കുമെന്നും ജോസ് ക. മാണി പറഞ്ഞു. പാർട്ടിയുടെ വിശ്വാസ്യത തകർക്കുവാൻ ലക്ഷ്യമിട്ട് വലതുപക്ഷ മാധ്യമങ്ങൾ നടത്തുന്ന മുന്നണി മാറ്റ ചർച്ചകൾ കേരള സമൂഹത്തിൽ വിലപ്പോവില്ലെന്നും, കേരള കോൺഗ്രസ് - എം എക്കാലവും ഇടതുപക്ഷ ജനാധിപത്യ മുന്നണിക്കൊപ്പം അടിയുറച്ചു നിൽക്കുമെന്നും ജോസ് കെ. മാണി പറഞ്ഞു. വനം-വന്യ ജീവി വിഷയത്തിൽ ശാശ്വത പരിഹാരം കാണുവാൻ പാർട്ടി നിയോഗിച്ച വിദഗ്ധ സമിതിയുടെ റിപ്പോർട്ട് ഉടൻതന്നെ കേന്ദ്ര, സംസ്ഥാന സർക്കാരുകൾക്ക് കൈമാറുമെന്നും അദ്ദേഹം അറിയിച്ചു. റാന്നി നിയോജകമണ്ഡലം പ്രസിഡന്‍റ് ജോർജ് ഏബ്രഹാം അധ്യക്ഷത വഹിച്ചു. പ്രമോദ് നാരായൺ എംഎൽഎ മുഖ്യപ്രഭാഷണം നടത്തി. ജില്ലാ പ്രസിഡന്‍റ് സജി അലക്സ്‌, സംസ്ഥാന സ്റ്റിയറിംഗ് കമ്മിറ്റി അംഗങ്ങളായ മനോജ്‌ മാത്യു, ഡോ. വർഗീസ് പേരയിൽ, ജില്ലാ ജനറൽ സെക്രട്ടറി ഏബ്രഹാം വാഴയിൽ, ബിബിൻ കള്ളംപറമ്പിൽ, ഷെറി തോമസ്, ബോബി കാക്കനാപള്ളിൽ, റിന്‍റോ തോപ്പിൽ, എം.സി. ജയകുമാർ, ടോമി വടക്കേമുറി, മാത്യു നൈനാൻ, ഹാൻലി ജോൺ, ടോം ആയല്ലൂർ, റോസമ്മ സക്കറിയ, ബഹനാൻ ജോസഫ്, ജോൺ വി. തോമസ്, ടോമി പാറകുളങ്ങര, പൊന്നി വെച്ചൂച്ചിറ എന്നിവർ പ്രസംഗിച്ചു.

സ്വരുമ ചാരിറ്റബിൾ സൊസൈറ്റി വാര്‍ഷികം

കാഞ്ഞിരപ്പള്ളി: സാന്ത്വന പരിചരണരംഗത്തും സമൂഹത്തിലെ താഴേക്കിടയിലുള്ളവരുടെ അടിസ്ഥാന സൗകര്യ വികസനത്തിലും ശ്രദ്ധേയമായ പ്രവർത്തനങ്ങളിലൂടെ മുന്നേറുന്ന സ്വരുമ ചാരിറ്റബിള്‍ സൊസൈറ്റിയുടെ 11ാമത് വാര്‍ഷിക പൊതുയോഗം നടത്തി. കാഞ്ഞിരപ്പള്ളി വി കെയര്‍ സെന്‍റർ ഡയറക്ടർ ഫാ. റോയ് മാത്യു വടക്കേൽ ഉദ്ഘാടനം ചെയ്തു. സാന്ത്വന പരിചരണത്തോടൊപ്പം അവർക്കും അവരുടെ കുടുംബത്തിനും മാനസീകവും ഭൗതികപരവുമായ പിന്തുണ സ്വരുമ നൽകി വരുന്നത് മഹത്തരമായ കാര്യമാണെന്ന് ഫാ. റോയ് മാത്യു വടക്കേൽ പറഞ്ഞു. സൊസൈറ്റി പ്രസിഡന്‍റ് മുഹമ്മദ് റിയാസ് കാൾട്ടെക്‌സ് അധ്യക്ഷത വഹിച്ചു. കേരള സ്റ്റേറ്റ് പാലിയേറ്റീവ് കെയര്‍ നോഡല്‍ ഓഫീസര്‍ ഡോ. മാത്യുസ് നമ്പേലി മുഖ്യപ്രഭാഷണം നടത്തി. സൊസൈറ്റി സെക്രട്ടറി ജോയി മുണ്ടാമ്പള്ളി, എക്സിക്യൂട്ടീവ് സെക്രട്ടറി സഖറിയ ഞാവള്ളിൽ, ട്രഷറർ ബോണി ഫ്രാൻസിസ് പള്ളിവാതുക്കൽ, വൈസ് പ്രസിഡന്‍റ് ഷൈൻ മടുക്കക്കുഴി, വനിത വിഭാഗം പ്രതിനിധി ജിജി നിക്ലാവോസ് എന്നിവർ പ്രസംഗിച്ചു. സ്വരുമയുടെ അംഗങ്ങൾ, അഭ്യുദയകാംക്ഷികൾ, വോളണ്ടിയർമാർ, ജനപ്രതിനിധികൾ, രോഗീ പരിചാരകർ എന്നിവർ പങ്കെടുത്തു. പുതിയ ഭാരവാഹികളായി ജോയി മുണ്ടാമ്പള്ളി - പ്രസിഡന്‍റ്, ഷൈൻ മടുക്കക്കുഴി, ജോർജ് കോര- വൈസ് പ്രസിഡന്‍റുമാർ, ഡാനി ജോസ് കുന്നത്ത് - സെക്രട്ടറി, എ.കെ. രാജു, മെഹര്‍ ഫിറോസ് - ജോയിന്‍റ് സെക്രട്ടറിമാർ, ബോണി ഫ്രാൻസിസ് പള്ളിവാതുക്കൽ - ട്രഷറർ, മുഹമ്മദ് റിയാസ് കാൾടെക്സ്, ആന്‍റണി ഐസക്, റിജോ ചീരാംകുഴിയിൽ, റോയി വാലുമണ്ണേൽ, ജിമ്മി അക്കരക്കളം, സജിത ചേരാടിയിൽ - കമ്മിറ്റിയംഗങ്ങൾ എന്നിവരെ തെരഞ്ഞെടുത്തു.

നാല് സ്‌കൂളുകളില്‍ മെച്ചപ്പെട്ട സാനിറ്റേഷന്‍ സൗകര്യങ്ങള്‍ ഒരുങ്ങുന്നു

പാലാ: ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി മെംബര്‍ ജോസ് മുണ്ടക്കല്‍ അനുവദിച്ച ഫണ്ട് ഉപയോഗിച്ച് കിടങ്ങൂര്‍ എന്‍എസ്എസ് ഹൈസ്‌കൂള്‍, മുത്തോലി കലാനിലയം യുപി സ്‌കൂള്‍, കെഴുവംകുളം എന്‍എസ്എസ് ഹൈസ്‌കൂള്‍, മുത്തോലി സെന്‍റ് ആന്‍റണീസ് ഹയര്‍സെക്കന്‍ഡറി സ്‌കൂള്‍ എന്നിവിടങ്ങളില്‍ പുതിയതായി സാനിറ്റേഷന്‍ സൗകര്യങ്ങള്‍ ഒരുങ്ങുന്നു. കിടങ്ങൂര്‍ എന്‍എസ്എസ് ഹയര്‍സെക്കന്‍ഡറി സ്‌കൂളിലും കെഴുവന്‍കുളം എന്‍എസ്എസ് ഹൈസ്‌കൂളിലും 10 ലക്ഷം രൂപയുടെയും മുത്തോലി സെന്‍റ് ആന്‍റണീസ് ഹയര്‍സെക്കന്‍ഡറി സ്‌കൂളില്‍ 15 ലക്ഷം രൂപയുടെയും പുലിയന്നൂര്‍ കലാനിലയം യുപി സ്‌കൂളില്‍ എട്ടു ലക്ഷം രൂപയുടെയും സാനിറ്റേഷന്‍ കോംപ്ലക്‌സുകളാണ് ആധുനിക രീതിയില്‍ നിര്‍മിക്കുന്നത്. ജില്ലാ പഞ്ചായത്ത് കിടങ്ങൂര്‍ ഡിവിഷന്‍റെ പരിധിയിലുള്ള 11 സ്‌കൂളുകളില്‍ കഴിഞ്ഞ വര്‍ഷങ്ങളില്‍ ജില്ലാ പഞ്ചായത്ത് ഫണ്ട് ഉപയോഗിച്ച ആധുനിക രീതിയിലുള്ള സാനിറ്റേഷന്‍ സൗകര്യങ്ങള്‍ ഒരുക്കിയിരുന്നു. കിടങ്ങൂര്‍ ഭാരതിവിദ്യാമന്ദിരം എയ്ഡഡ് യുപി സ്‌കൂള്‍ ഡൈനിംഗ് ഹാള്‍ നിര്‍മാണത്തിന് 15 ലക്ഷം രൂപയുടെയും എലിക്കുളം പഞ്ചായത്തിലെ കുരുവിക്കൂട് എസ്ഡിഎല്‍പി സ്‌കൂളില്‍ 15 ലക്ഷം രൂപ ഉപയോഗിച്ചുള്ള കഞ്ഞിപ്പുരയുടെ നിര്‍മാണവും കിടങ്ങൂര്‍ സെന്‍റ് മേരീസ് ഹയര്‍ സെക്കന്‍ഡറി സ്‌കൂളില്‍ 10 ലക്ഷം രൂപ ഉപയോഗിച്ചുള്ള സാനിറ്റേഷന്‍ വാഷിംഗ് ഏരിയ നിര്‍മാണവും ഇതിനോടകം പൂര്‍ത്തീകരിച്ചിട്ടുണ്ട്. കൂടാതെ കൊഴുവനാല്‍ സെന്‍റ് ജോണ്‍ എന്‍എച്ച്എസ്എസില്‍ 12 ലക്ഷം രൂപയുടെയും കിടങ്ങൂര്‍ സെന്‍റ് മേരീസ് ഹയര്‍ സെക്കന്‍ഡറി സ്‌കൂളില്‍ 15 ലക്ഷം രൂപയുടെയും മുത്തോലി സെന്‍റ് ജോസഫ് ടിടിഐ, മുത്തോലി സെന്‍റ് ജോസഫ് ഹൈസ്‌കൂൾ, പാളയം സെന്‍റ് സേവ്യേഴ്‌സ് യുപി സ്‌കൂൾ എന്നിവിടങ്ങളിൽ എട്ടു ലക്ഷം രൂപയുടെയും എലിക്കുളം പഞ്ചായത്തിലെ മല്ലികശ്ശേരി സെന്‍റ് ഡൊമിനിക് സാവിയോ യുപി സ്‌കൂൾ, പാദുവ സെന്‍റ് ആന്‍റണി എല്‍പി സ്‌കൂൾ എന്നിവിടങ്ങളിൽ അഞ്ചു ലക്ഷം രൂപയുടെയും ടോയ്‌ലറ്റ് കോംപ്ലക്‌സുകളുടെ നിര്‍മാണവും ചേര്‍പ്പുങ്കല്‍ ഹോളിക്രോസ് ഹയര്‍ സെക്കന്‍ഡറി സ്‌കൂളില്‍ 15 ലക്ഷം രൂപയുടെ ടോയ്‌ലറ്റ് ബ്ലോക്കിന്‍റെ നിര്‍മാണവും അവസാന ഘട്ടത്തിലാണ്. കെഴുവന്‍കുളം എന്‍എച്ച് എസ് സാനിറ്റേഷന്‍ ബ്ലോക്കിന്‍റെ നിര്‍മാണ ഉദ്ഘാടനം ഇന്ന് രാവിലെ 9.30 നും കലാനിലയം യുപി സ്‌കൂളില്‍ നിര്‍മിക്കുന്ന ടോയ്‌ലറ്റ് ബ്ലോക്കിന്‍റെ നിര്‍മാണ ഉദ്ഘാടനം നാളെ രാവിലെ 10 നും കിടങ്ങൂര്‍ എന്‍എസ്എസ് സ്‌കൂളിലെ ടോയ്‌ലറ്റ് ബ്ലോക്ക് നിര്‍മാണ ഉദ്ഘാടനം 16ന് രാവിലെ 10.30 നും ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടക്കല്‍ നിര്‍വഹിക്കും.

കിടങ്ങൂരില്‍ ഗതാഗതക്കുരുക്കില്‍ വലഞ്ഞ് ജനങ്ങളും വ്യാപാരികളും

കിടങ്ങൂര്‍: കിടങ്ങൂർ പഴയ റോഡിലും സിഗ്‌നല്‍ ജംഗ്ഷന് സമീപവും മിക്ക സമയവും ഉണ്ടാവുന്ന വാഹനക്കുരുക്കില്‍ വലയുകയാണ് ജനങ്ങളും ഇവിടുത്തെ വ്യാപാരികളും. റോഡിന്‍റെ ഇരുവശവും തോന്നുംപടി വാഹനങ്ങള്‍ പാര്‍ക്കു ചെയ്തിരുക്കുന്നത് ഇവിടുത്തെ പതിവു കാഴ്ചയാണ്. വഴിയാത്രക്കാര്‍ക്ക് നടക്കാന്‍ പോലുമാവാത്ത സ്ഥിതിയുമുണ്ട്. ചില വാഹനങ്ങള്‍ ഫുട്പാത്തില്‍ കയറി വരെ പാര്‍ക്ക് ചെയ്യുന്നു. ദുരെ സ്ഥലങ്ങളില്‍ ജോലിക്ക് പോകുന്നവര്‍ രാവിലെ കടകള്‍ക്ക് മുന്പിലും വശങ്ങളിലും വാഹനം പാര്‍ക്ക് ചെയ്തിട്ട് പോകുന്നു. പിന്നീട് വൈകുന്നേരമാണ് ഈ വാഹനങ്ങള്‍ ഇവിടെ നിന്നു മാറ്റുന്നത്. ഇതുമൂലം കടകള്‍ക്ക് മുന്നില്‍ വാഹനം നിര്‍ത്തി സാധനം വാങ്ങിക്കാനാവാത്ത അവസ്ഥയാണ്. കച്ചവടത്തില്‍ വലിയ കുറവുണ്ടെന്ന് വ്യാപാരികളും പറയുന്നു. ഇരുവശത്തുമുള്ള പാര്‍ക്കിംഗ് മൂലം വഴിയാത്രക്കാരും ദുരിതത്തിലാണ്. മിക്ക സമയങ്ങളിലും റോഡില്‍ വാഹനങ്ങളുടെ നീണ്ടനിര തന്നെ കാണാം. കിടങ്ങൂര്‍ പഞ്ചായത്തിന്‍റെ കീഴില്‍ ഉടന്‍ തന്നെ പാര്‍ക്കിംഗ് സംവിധാനം ഏര്‍പ്പെടുത്തണമെന്ന ആവശ്യം ഉയര്‍ന്നിട്ടുണ്ട്.

മറയൂരിന്‍റെ കാട്ടുപാതയിൽ പൂത്തുവിരിഞ്ഞ് ഗ്ലോറി ഓഫ് ലില്ലി

മറയൂർ: ജില്ലയിലെ മറയൂർ മേഖലയിലെ ചിന്നാറിൽനിന്ന് തായണ്ണൻകുടിയിലേക്കുള്ള കാട്ടുപാതയിൽ, സിംബാബ്‌വേയുടെ ദേശീയ പുഷ്പമായ ഗ്ലോറിയോസ സൂപ്പർബ പൂത്തുലഞ്ഞു. സാധാരണ ഗ്ലോറി ഓഫ് ലില്ലി എന്നും തമിഴിൽ കാനൂൽ പൂ എന്നും ഈ വള്ളിച്ചെടി അറിയപ്പെടുന്നുണ്ട്. ഇതിന്‍റെ പൂക്കൾക്ക് 4.4 സെന്‍റീമീറ്റർ വലിപ്പമുണ്ട്, ചുവപ്പ്, മഞ്ഞ, ഓറഞ്ച് എന്നീ നിറങ്ങളിൽ കാണപ്പെടുന്ന പൂക്കൾ ആകർഷണീയമാണ്. പൂവിന്‍റെ ഇതളുകൾ നീളമേറിയതും വളഞ്ഞതുമാണ്, ഇത് ചെടിക്ക് കൂടുതൽ ഭംഗി നൽകുന്നു. ഈ ചെടി സാധാരണയായി 2900 അടി ഉയരത്തിൽ താഴെയുള്ള വനപ്രദേശങ്ങളിലും പുൽമേടുകളിലുമാണ് വളരുന്നത്. ഉയർന്ന മലനിരകളിൽ ഇവയുടെ വളർച്ച കുറവാണ്. ഔഷധഗുണമുള്ള ഇത് പരന്പരാഗത വൈദ്യത്തിനും വ്യാപകമായി ഉപയോഗിക്കപ്പെടുന്നുണ്ട്. ഇതിന്‍റെ വേര്, ഇല, വിത്ത് എന്നിവയെല്ലാം ഔഷധഗുണമുള്ളതാണ്. വാതം, വേദന, ചർമരോഗങ്ങൾ എന്നിവയ്ക്കുള്ള ചികിത്സയ്ക്കാണ് ഇത് ഉപയോഗിക്കുന്നത്. എന്നാൽ ഈ ചെടിയിൽ കോൾചിസിൻ എന്ന രാസവസ്തു അടങ്ങിയിരിക്കുന്നതിനാൽ ഔഷധനിർമാണത്തിൽ ശ്രദ്ധാപൂർവം മാത്രമേ ഉപയോഗിക്കാവൂ. മറയൂരിന്‍റെ പ്രകൃതിസൗന്ദര്യത്തിന് മാറ്റുകൂട്ടി മേഖലയിലെ പുൽമേടുകളിലും വനപാതകളിലും ഗ്ലോറി ഓഫ് ലില്ലി ഇതുവഴി സഞ്ചരിക്കുന്നവർക്ക് കാഴ്ചയുടെ വിരുന്നൊരുക്കുന്നു. ചിന്നാറിൽനിന്ന് തായണ്ണൻകുടിയിലേക്കുള്ള വഴിയിലാണ് ഇവ കൂടുതലായും പൂവിട്ടുനിൽക്കുന്നത്. ജൂലൈ, ഓഗസ്റ്റ് മാസങ്ങളിലാണ് കൂടുതലായും ഇവ പുഷ്പിക്കുന്നത്.

അക്കരപ്പാടം പാലം ഉദ്ഘാടനം 22ന്

ഉദയനാപുരം: കിഫ്ബിയുടെ സാമ്പത്തിക സഹായത്തോടെ 16.88 കോടി രൂപ ചെലവഴിച്ച് സംസ്ഥാന സർക്കാർ നിർമ്മിച്ച അക്കരപ്പാടം പാലം 22ന് മന്ത്രി പി.എ. മുഹമ്മദ് റിയാസ് നാടിനു സമർപ്പിക്കും.14.91മീറ്റർ നീളത്തിൽ 15 ബീമുകളിലായി അഞ്ച് സ്പാനോടുകൂടിയാണ് പാലം നിർമിച്ചിരിക്കുന്നത്. സമീപ റോഡിന്‍റെ നിർമാണത്തിലേക്കായി 29.77സെന്‍റ് ഭൂമിയാണ് ഏറ്റെടുക്കേണ്ടിവന്നത്. ഈ വസ്തു പൂർണമായും ഏറ്റെടുത്ത് നഷ്ടപരിഹാരത്തുക ഭൂവുടമകൾക്ക് കൈമാറിക്കഴിഞ്ഞു. പാലത്തിന്‍റെ നിർമാണവും പാലത്തിന്‍റെ കിഴക്കുവശത്ത് നാനാടം ഭാഗത്ത് ഒരു കൾവർട്ടിന്‍റെ നിർമാണവും ഇരുവശങ്ങളിലും ബിഎം ആൻഡ് ബിസി നിലവാരത്തിലുള്ള സമീപ റോഡിന്‍റെ നിർമാണവും പൂർത്തീകരിച്ചു. അക്കരപ്പാടം നിവാസികളുടെ പതിറ്റാണ്ടുകൾ നീണ്ട സ്വപ്നമാണ് ഇതോടെ സഫലീകരിക്കപ്പെട്ടത്. അക്കരപ്പാടം ഗവൺമെന്‍റ് യുപിസ്കൂളിൽ പാലത്തിന്‍റെ ഉദ്ഘാടനവുമായി ബന്ധപ്പെട്ട സംഘാടകസമിതി ചേർന്നു. സി.കെ.ആശഎംഎൽ എയുടെ അധ്യക്ഷതയിൽ നടന്ന യോഗത്തിൽ ഉദയനാപുരം പഞ്ചായത്ത് പ്രസിഡന്‍റ് പി.കെ. ആനന്ദവല്ലി, വൈസ് പ്രസിഡന്‍റ് സി.പി. അനൂപ്, വൈക്കം ബ്ലോക്ക് പഞ്ചായത്തംഗം ഒ.എം. ഉദയപ്പൻ, പഞ്ചായത്തംഗങ്ങളായ ടി. പ്രസാദ്, ഗിരിജാ പുഷ്കരൻ, പി.ഡി. ജോർജ്, പാലം നിർമാണ കമ്മിറ്റി ഭാരവാഹികളായ അക്കരപ്പാടം ശശി, എ.പി. നന്ദകുമാർ, പി.ഡി. സാബു തുടങ്ങിയവർ പങ്കെടുത്തു. പാലം ഉദ്ഘാടനം ഒരു ദിവസം നീണ്ട ആഘോഷമാക്കാനുള്ള തയാറെടു പ്പിലാണ് അക്കരപ്പാടം നിവാസികൾ.

കഥാപാത്രങ്ങൾ പകർന്നാടി; ദേവമാതായിൽ വേറിട്ട അനുഭവമായി ബഷീർ അനുസ്മരണം

കുറവിലങ്ങാട്: വൈക്കം മുഹമ്മദ് ബഷീറിനെ അനുസ്മരിച്ച് ദേവമാതാ കോളജ്. വായനയിൽ കണ്ടുമുട്ടിയിട്ടുള്ള ബഷീർ കഥാപാത്രങ്ങളെ അരങ്ങിൽ പുനരവതരിപ്പിച്ചത് നവ്യമായ അനുഭവമായി. പതിറ്റാണ്ടുകൾക്ക് മുമ്പ് ബഷീർ സൃഷ്ടിച്ച കഥാപാത്രങ്ങളെ കാലോചിതമായ നവീകരണത്തിലൂടെ കുട്ടികൾ അരങ്ങിലെത്തിച്ചു. ബഷീർ, പാത്തുമ്മ, ഒറ്റക്കണ്ണൻ പോക്കർ, നാരായണി, കേശവൻ നായർ, സാറാമ്മ തുടങ്ങി അതുല്യ മികവാർന്ന കഥാപാത്രങ്ങൾ അനുയോജ്യമായ വേഷപ്പകർച്ചയോടെ അരങ്ങിലെത്തി. ‌ഡിബി കോളജിലെ മലയാള വിഭാഗം അസി. പ്രഫസർ ഡോ. ജി. രമ്യ, ബഷീർ അനുസ്മരണ പ്രഭാഷണം നടത്തി. ദേവമാതാ കോളജ് മലയാള വിഭാഗത്തിന്‍റെ ആഭിമുഖ്യത്തിലാണ് പരിപാടി സംഘടിപ്പിച്ചത്. പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. ഡിനോയ് മാത്യു കവളമ്മാക്കൽ, ബർസാർ ഫാ. ജോസഫ് മണിയഞ്ചിറ, ഡോ. ജോബിൻ ജോസ്, ഡോ. സിജി ചാക്കോ, സിസ്റ്റർ സിന്ധു ഡോ. സെബാസ്റ്റ്യൻ, ഡോ. ടീനാ സെബാസ്റ്റ്യൻ, ഡോ. അരുണിമ സെബാസ്റ്റ്യൻ തുടങ്ങിയവർ പരിപാടികൾക്ക് നേതൃത്വം നൽകി.

വാഴൂർ പഞ്ചായത്ത് പഴയ ഷോപ്പിംഗ് കോംപ്ലക്സ് അപകടാവസ്ഥയിൽ

വാഴൂർ: അപകടാവസ്ഥയിൽ നിൽക്കുന്ന വാഴൂർ പഞ്ചായത്തിന്‍റെ പഴയ ഷോപ്പിംഗ് കോംപ്ലക്സ് ഉടൻ പൊളിച്ചുമാറ്റണമെന്ന ആവശ്യം ശക്തമാകുന്നു. കോംപ്ലക്സിന്‍റെ മുകളിലെ നിലയിൽ ചോർച്ചയും കോൺക്രീറ്റ് അടർന്നുവീഴുന്ന സ്ഥിതിയിലുമാണ്. കെട്ടിടത്തിന്‍റെ ഭിത്തിക്കു വിള്ളലുണ്ട്. കോൺക്രീറ്റ് താഴേക്ക് അടർന്നുവീണ് അപകടം ഉണ്ടാകാതിരിക്കാൻ ഇരുമ്പുവല സ്ഥാപിച്ചിട്ടുണ്ട്. കെട്ടിടം അപകടാവസ്ഥയിലാണെന്നും ഇതിന്‍റെ മുന്പിൽ വാഹനങ്ങൾ നിർത്തിയിടരുതെന്നും കാൽനട യാത്രക്കാർ റോഡിന്‍റെ എതിർവശം വഴി മാത്രമേ പോകാവൂവെന്നും നിർദേശിച്ചു പഞ്ചായത്ത് കോംപ്ലക്സിന്‍റെ മുന്പിൽ ബോർഡ് സ്ഥാപിച്ചിട്ടുണ്ട്. അഞ്ചു വ്യാപാര സ്ഥാപനങ്ങൾ ഇവിടെ പ്രവർത്തിക്കുന്നുണ്ട്. 30 വർഷം മുന്പ് നിർമിച്ച മൂന്നു നില ഷോപ്പിംഗ് കോംപ്ലക്സിന്‍റെ മുകളിലെ നിലയിൽ ചോർച്ചയുണ്ടായി കോൺക്രീറ്റ് അടർന്നുവീഴാൻ തുടങ്ങിയതോടെ എട്ടു വർഷംമുന്പ് കോംപ്ലക്സ് കെട്ടിടം അറ്റകുറ്റപ്പണി നടത്താൻ തീരുമാനിച്ചിരുന്നു. ഇതിനായി 15 ലക്ഷം രൂപ വകയിരുത്തി കരാർ ചെയ്യുകയും ചെയ്തിരുന്നു. എൻജിനിയറിംഗ് വിഭാഗം അറ്റകുറ്റപ്പണി നടത്തരുതെന്നും കെട്ടിടം പൊളിച്ചുമാറ്റണമെന്നും നിർദേശിച്ചതോടെ പദ്ധതി നടന്നില്ല. കെട്ടിടം പൊളിച്ചുമാറ്റാനുള്ള നീക്കത്തിനെതിരേ കോംപ്ലക്സിലെ വ്യാപാരികൾ കോടതിയെ സമീപിച്ചു. കെട്ടിടത്തിന്‍റെ താഴത്തെ നില ഒഴിച്ചുള്ള ഭാഗം പൊളിച്ചുനീക്കി വ്യാപാര സ്ഥാപനങ്ങളെ സംരക്ഷിക്കാമെന്നു തീർപ്പാക്കിയിരുന്നു. എൻജിനിയറിംഗ് വിഭാഗത്തിന്‍റെ വിദഗ്ധ പരിശോധനയിൽ കെട്ടിടത്തിന്‍റെ താഴത്തെ നിലമാത്രം നിർത്തി പൊളിച്ചു മാറ്റുമ്പോൾ താഴത്തെ നിലയ്ക്കു ബലക്ഷയം ഉണ്ടാകുമെന്നും കെട്ടിടം പൂർണമായി പൊളിച്ചുനീക്കണമെന്നും നിർദേശിച്ചതായി പഞ്ചായത്ത് പ്രസിഡന്‍റ് തോമസ് വെട്ടുവേലി പറഞ്ഞു. 15നു പഞ്ചായത്ത് കമ്മിറ്റി യോഗം ചേർന്ന് ഒഴിഞ്ഞുതരണമെന്ന് ആവശ്യപ്പെട്ടു കെട്ടിടത്തിലെ കടയുടമകൾക്കു നോട്ടീസ് നൽകുമെന്നും പ്രസിഡന്‍റ് പറഞ്ഞു.

കണ്ണീർമഴയത്ത് ഐറിൻ ജിമ്മി യാത്രയായി

അരുവിത്തുറ: നാടിനെയാകെ ദുഃഖത്തിലാഴ്ത്തി ഐറിൻ യാത്രയായി. കഴിഞ്ഞ ദിവസം മീനച്ചിലാറ്റിലെ ഒഴുക്കിൽപ്പെട്ട് മരിച്ച ഈരാറ്റുപേട്ട കൊണ്ടൂർ പാലാത്ത് ഐറിൻ ജിമ്മിയുടെ സംസ്കാരം അരുവിത്തുറ സെന്‍റ് ജോർജ് ഫൊറോന പള്ളിയിൽ നടന്നു. കഴിഞ്ഞ ഒമ്പതിന് ഐറിനും സഹോദരിയും കൂട്ടുകാരും മീനച്ചിലാറ്റിൽ കുളിക്കാൻ ഇറങ്ങിയപ്പോൾ ഐറിൻ ഒഴുക്കിൽപ്പെടുകയായിരുന്നു. കൂടെയുണ്ടായിരുന്ന രണ്ടുപേരെ രക്ഷപ്പെടുത്തിയെങ്കിലും ഐറിന്‍റെ ജീവൻ രക്ഷിക്കാൻ കഴിഞ്ഞില്ല. സന്നദ്ധ പ്രവർത്തകർ ഐറിനെ വെള്ളത്തിൽനിന്ന് മുങ്ങിയെടുക്കുമ്പോൾ ജീവൻ ഉണ്ടായിരുന്നെങ്കിലും ആശുപത്രിയിൽ എത്തിച്ച് മണിക്കൂറുകൾ കഴിഞ്ഞ് ഐറിൻ മരണത്തിന് കീഴടങ്ങുകയായിരുന്നു. ഐറിന് അന്ത്യാഞ്ജലി അർപ്പിക്കാൻ കൂടെ പഠിച്ചവരും അധ്യാപകരും വൈദികരും സന്യസ്തരും നാട്ടുകാരും ഉൾപ്പെടെ ആയിരങ്ങളാണ് എത്തിയത്. പ്ലസ് ടു പഠനത്തിനുശേഷം ഉന്നത വിദ്യാഭ്യാസത്തിനായി ഒരുങ്ങിയിരിക്കുമ്പോഴായിരുന്നു എല്ലാവരെയും സങ്കടത്തിലാഴ്ത്തി ഐറിൻ കടന്നുപോയത്.

ട്രാന്‍സ്‌ഫോര്‍മർ കൈയടക്കി വള്ളിച്ചെടികള്‍

കോട്ടയം: ട്രാന്‍സ്‌ഫോര്‍മർ കൈയടക്കി വള്ളിച്ചെടികള്‍. ചുങ്കം പനയക്കഴിപ്പ് പ്രദേശത്തുള്ള ട്രാന്‍സ്‌ഫോര്‍മറാണ് വള്ളിപടര്‍പ്പുകള്‍ കൈയടക്കിയിരിക്കുന്നത്. മഴക്കാലമായതോടെ കൂടുതല്‍ വേഗത്തിലാണ് പടര്‍പ്പുകളും പുല്ലും ട്രാന്‍സ്‌ഫോര്‍മറില്‍ പടര്‍ന്നു പിടിക്കുന്നത്. പച്ച നിറത്തില്‍ ദൂരെനിന്നു നോക്കുമ്പോള്‍ കാണുന്ന സ്തഭം അടുത്തെത്തുമ്പോഴെ ട്രാന്‍സ്‌ഫോര്‍മറാണെന്ന് മനസിലാകുകയുള്ളു. മുണ്ടാർ പാടത്തിന്‍റെ കരയില്‍ മുനിസിപ്പല്‍ റോഡിനരികിലുള്ള ഈ ട്രാന്‍സ്‌ഫോര്‍മര്‍ സ്ഥിതി ചെയ്യുന്ന പ്രദേശത്തെ വഴി ഒരു മഴ പെയ്താല്‍ പുഴയാകുന്ന അവസ്ഥയാണ്. പ്രദേശവാസികള്‍ക്കു ഭീഷണിയായി മാറിയ ഈ ട്രാന്‍സ്‌ഫോര്‍മറില്‍ നിന്നാണ് ബേക്കര്‍ ഫീഡറിലേക്കുള്ള വൈദ്യുതി പ്രവഹിക്കുന്നത്. അപകട സാധ്യത ഏറെയുള്ള ട്രാന്‍സ്‌ഫോര്‍മറിലെ വള്ളിപടര്‍പ്പുകള്‍ അടിയന്തരമായി നീക്കം ചെയ്യണമെന്ന് നാട്ടുകാര്‍ ആവശ്യപ്പെട്ടു.

മഹാത്മാഗാന്ധി സ്മാരകം അനാച്ഛാദനം ചെയ്തു

പുതുപ്പള്ളി: പഞ്ചായത്തിന്‍റെ നേതൃത്വത്തില്‍ പഞ്ചായത്ത് കമ്യൂണിറ്റി ഹാളിന് മുന്പില്‍ സ്ഥാപിച്ച മഹാത്മാഗാന്ധി സ്മാരകം മന്ത്രി വി.എന്‍. വാസവന്‍ അനാച്ഛാദനം ചെയ്തു. തുടര്‍ന്ന് പുതുപ്പള്ളി ഗ്രാമപഞ്ചായത്ത് പൂര്‍ത്തീകരിച്ച വിവിധ പദ്ധതികളുടേയും കുടുംബശ്രീയുടെ ലഹരിവിരുദ്ധ ബോധവത്കരണ കാമ്പയിനിന്‍റെയും ടാസ്‌ക് ഫോഴ്‌സ് രൂപീകരണത്തിന്‍റെയും ഉദ്ഘാടനം മന്ത്രി നിര്‍വഹിച്ചു. പഞ്ചായത്ത് പ്രസിഡന്‍റ് പൊന്നമ്മ ചന്ദ്രന്‍ അധ്യക്ഷത വഹിച്ച യോഗത്തില്‍ പള്ളം ബ്ലോക്ക് പഞ്ചായത്ത് പ്രസിഡന്‍റ് റ്റോമിച്ചന്‍ ജോസഫ്, ജില്ലാ പഞ്ചായത്ത് അംഗം നിബു ജോണ്‍, സുഭാഷ് പി. വര്‍ഗീസ്, പഞ്ചായത്ത് വൈസ് പ്രസിഡന്‍റ് പ്രമോദ് കുര്യാക്കോസ്, ബ്ലോക്ക് പഞ്ചായത്ത് അംഗങ്ങളായ സാബു പുതുപ്പറമ്പില്‍, റേച്ചല്‍ കുര്യന്‍, ശാന്തമ്മ തോമസ്, ശാന്തമ്മ പീലിപ്പോസ് തുടങ്ങിയവര്‍ പ്രസംഗിച്ചു. പഞ്ചായത്തിലെ വിവിധ പദ്ധതികള്‍ക്കു സ്ഥലംവിട്ടു നല്‍കിയ വ്യക്തികളേയും കുടുംബശ്രീ സംസ്ഥാന കലോത്സവത്തില്‍ ലളിതഗാന മത്സരത്തില്‍ ഒന്നാം സ്ഥാനം കരസ്ഥമാക്കിയ അനീഷ സജീവിനേയും മുഖ്യമന്ത്രിയുടെ അഗ്‌നിരക്ഷാസേവ മെഡല്‍ നേടിയ കെ.ആര്‍. അഭിലാഷിനേയും 2024- 25 സാമ്പത്തിക വര്‍ഷം കെട്ടിടനികുതി നൂറു ശതമാനം പിരിവ് നടത്തിയ ജീവനക്കാരെയും ജനപ്രതിനിധികളെയും ചടങ്ങില്‍ ആദരിച്ചു.

ഏറ്റുമാനൂരിൽ വികസനക്കുതിപ്പ്: മന്ത്രി മുഹമ്മദ് റിയാസ്

ഏറ്റുമാനൂർ മിനി സിവിൽ സ്റ്റേഷന് തറക്കല്ലിട്ടു ഏറ്റുമാനൂർ: സമാനതകളില്ലാത്ത വികസനക്കുതിപ്പാണ് മന്ത്രി വി.എൻ. വാസവന്‍റെ നേതൃത്വത്തിൽ ഏറ്റുമാനൂരിൽ നടന്നുവരുന്നതെന്ന് പൊതുമരാമത്ത് മന്ത്രി മുഹമ്മദ് റിയാസ്. ഏറ്റുമാനൂർ മിനി സിവിൽ സ്റ്റേഷന്‍റെ നിർമാണോദ്ഘാടനം ഓൺലൈനായി നിർവഹിച്ച് പ്രസംഗിക്കുകയായിരുന്നു അദ്ദേഹം. റോഡുകൾ, പാലങ്ങൾ, ബൈപ്പാസുകൾ, ജംഗ്ഷനുകളുടെ നവീകരണം തുടങ്ങി പശ്ചാത്തല വികസനരംഗത്ത് കേരളം വലിയ മുന്നേറ്റമാണുണ്ടാക്കിയത്. ഏറ്റുമാനൂർ മിനി സിവിൽ സ്റ്റേഷന്‍റെ നിർമാണം സമയബന്ധിതമായി പൂർത്തിയാക്കുമെന്നും മന്ത്രി പറഞ്ഞു. ഏറ്റുമാനൂർ പോലീസ് സ്റ്റേഷനു സമീപമുള്ള നിർദിഷ്‌ട മിനി സിവിൽ സ്റ്റേഷൻ അങ്കണത്തിൽ നടന്ന ചടങ്ങിൽ മന്ത്രി വി.എൻ. വാസവൻ അധ്യക്ഷത വഹിച്ചു. ഭാവിയിൽ ഏറ്റുമാനൂരിനെ താലൂക്ക് ആക്കി ഉയർത്തുകയെന്ന ലക്ഷ്യം കൂടി മുന്നിൽക്കണ്ടാണ് മിനി സിവിൽ സ്റ്റേഷൻ നിർമിക്കുന്നതെന്ന് അദ്ദേഹം പറഞ്ഞു. പലവിധ തടസങ്ങൾ മറികടന്നാണ് സിവിൽ സ്റ്റേഷൻ നിർമാണത്തിനു തുടക്കമിടുന്നത്. സ്ഥലം സംബന്ധിച്ച തർക്കമുണ്ടായപ്പോൾ മുഖ്യമന്ത്രി പിണറായി വിജയൻ നേരിട്ടു യോഗം വിളിച്ചാണ് ഭൂമി വിട്ടു നൽകാൻ നടപടിയെടുത്തത്. ഏറ്റുമാനൂരിൽ ബഹുനില കോടതി സമുച്ചയത്തിന്‍റെ നിർമാണോദ്ഘാടനവും ഉടൻ നടത്തുമെന്നും മന്ത്രി വി.എൻ. വാസവൻ പറഞ്ഞു. മിനി സിവിൽ സ്റ്റേഷന്‍റെ തറക്കല്ലിടലും മന്ത്രി വി.എൻ. വാസവൻ നിർവഹിച്ചു. ഏറ്റുമാനൂർ ബ്ലോക്ക് പഞ്ചായത്ത് പ്രസിഡന്‍റ് ആര്യ രാജൻ, നഗരസഭാംഗം രശ്മി ശ്യാം, നീണ്ടൂർ പഞ്ചായത്ത് പ്രസിഡന്‍റ് വി.കെ. പ്രദീപ് കുമാർ, അയ്മനം പഞ്ചായത്ത് പ്രസിഡന്‍റ് വിജി രാജേഷ്, തോമസ് ചാഴികാടൻ, എഡിഎം എസ്. ശ്രീജിത്ത്, സംഘാടക സമിതി ചെയർമാൻ ഇ.എസ്. ബിജു, വനം വികസന കോർപറേഷൻ ചെയർപേഴ്സൺ ലതിക സുഭാഷ്, പൊതുമരാമത്തു വകുപ്പ് കെട്ടിടവിഭാഗം എക്സിക്യൂട്ടീവ് എൻജിനിയർ ആർ. ദീപ, അസിസ്റ്റന്‍റ് എക്സിക്യൂട്ടീവ് എൻജിനിയർ ആർ. രൂപേഷ്, ഏറ്റുമാനൂർ ക്രിസ്തുരാജ പള്ളി വികാരി ഫാ. തോമസ് കുത്തുകല്ലുങ്കൽ, മാന്നാനം കെഇ സ്‌കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി, ചൈതന്യ പാസ്റ്ററൽ സെന്‍റർ ഡയറക്ടർ ഫാ. സുനിൽ പെരുമാനൂർ, സീനിയർ സിറ്റിസൺ ഫോറം പ്രസിഡന്‍റ് എൻ. അരവിന്ദാക്ഷൻ നായർ, രാഷ്‌ട്രീയ പാർട്ടി പ്രതിനിധികളായ ബാബു ജോർജ്, ജോസ് ഇടവഴിക്കൽ, പി.വി. മൈക്കിൾ, കെ.ഐ. കുഞ്ഞച്ചൻ, രാജീവ് നെല്ലിക്കുന്നേൽ, വ്യപാരി വ്യവസായി പ്രതിനിധികളായ എൻ.പി. തോമസ്, സെബാസ്റ്റ്യൻ വാളംപറമ്പിൽ എന്നിവർ പ്രസംഗിച്ചു.

നിയമങ്ങള്‍ നോക്കുകുത്തി; ജില്ലയിൽ മഹാദുരന്തം പേറുന്ന 200 പാറമട ജലാശയങ്ങള്‍

കോട്ടയം: നിറഞ്ഞുതുളുമ്പാറായ ഇടുക്കി ജലാശയത്തിന്‍റെ പ്രതീതിയാണ് ജില്ലയില്‍ ഉപയോഗശൂന്യമായി കിടക്കുന്ന കൂറ്റന്‍പാറമടകൾക്ക്. വിവിധ പഞ്ചായത്തുകളിലായി ഇരുനൂറ് ക്വാറികളാണ് വെള്ളം കെട്ടിക്കിടക്കുന്നത്. പാറ പൊട്ടിച്ചുകഴിഞ്ഞാല്‍ അത് അപകടമുണ്ടാക്കാത്ത വിധം സുരക്ഷിതമാക്കണമെന്നാണ് ചട്ടം. എന്നാല്‍ ഏറെയിടങ്ങളിലും ക്വാറി കരാറുകാരന്‍ ഉപേക്ഷിച്ചുപോകുകയാണു പതിവ്. വന്‍കിട ലോബികള്‍ കോടികള്‍ മുടക്കി ലൈസന്‍സ് നേടിയശേഷം പണികള്‍ ഉപകരാറുകാര്‍ക്കു കൈമാറുന്നതും പതിവാണ്. പാറമടയോടു ചേര്‍ന്ന ദുര്‍ബലമായ കരപ്രദേശം ഇടിയുന്ന സാഹചര്യമുണ്ടായാല്‍ വിവിധയിടങ്ങളില്‍ കൂട്ടിക്കല്‍ ഉരുള്‍പൊട്ടലിനു തുല്യമായ ദുരന്ത സാധ്യതയേറെയാണ്. പാറമടകളിലെ പണികള്‍ ചെയ്തു ജീവിക്കുന്ന തൊഴിലാളികളുടെ കോളനികള്‍ മിക്ക ക്വാറികളോടു ചേര്‍ന്നുമുണ്ട്. പാറമടകള്‍ പല തട്ടുകളായി പൊട്ടിക്കണമെന്നും അവശ്യസാഹചര്യത്തില്‍ രക്ഷാപ്രവര്‍ത്തകരുടെ വാഹനങ്ങള്‍ കയറി വരാവുന്ന ഒന്നിലേറെ റോഡുകളുണ്ടാകണമെന്നും വെള്ളം കെട്ടിക്കിടക്കാത്ത വിധം ചെരിച്ച് അടിവശം പൊട്ടിക്കണമെന്നുമുള്ള ഖനന മാനദണ്ഡം ഒരിടത്തും പാലിക്കപ്പെടുന്നില്ല. കൂടുതല്‍ അളവില്‍ പാറ ലഭിക്കാന്‍ കുത്തനെ പൊട്ടിച്ച് വന്‍ ഗര്‍ത്തമായി മാറ്റുകയാണ് പതിവ്. നെടുങ്കുന്നം, കൂട്ടിക്കല്‍, എരുമേലി, കടപ്ലാമറ്റം, തലനാട് പഞ്ചായത്തുകളില്‍ മാത്രം അന്‍പത് പാറമടകള്‍ ജലസംഭരണികളായി കിടക്കുന്നു. കൂട്ടിക്കല്‍ ഉരുള്‍പൊട്ടലിനു പിന്നില്‍ കൂട്ടിക്കല്‍, കൊക്കയാര്‍ പഞ്ചായത്തുകളിലെ ക്വാറികളുടെ പ്രവര്‍ത്തനമാണെന്ന് ജിയോളജി വിഭാഗം അഭിപ്രായപ്പെട്ടിരുന്നു. പ്രദേശവാസികളുടെ എതിര്‍പ്പിനെ മറികടന്നാണ് പാറമടലോബി പണത്തിന്‍റെയും ഗുണ്ടായിസത്തിന്‍റെയും ബലത്തില്‍ ഖനന ലൈസന്‍സ് വാങ്ങിയെടുക്കുന്നത്. പോലീസിനും ജനപ്രതിനിധികള്‍ക്കും വിവിധ വകുപ്പുതല ഉദ്യോഗസ്ഥര്‍ക്കും മാസപ്പടി നല്‍കുന്ന ക്വാറിയുടമകള്‍ പലരുണ്ട്. ജിയോളജി വകുപ്പ് അനുവദിക്കുന്ന അളവിലോ ആഴത്തിലോ സമയത്തോ അല്ല ഏറെ മടകളും പ്രവര്‍ത്തിക്കുന്നത്. അനുവദനീയമായ അളവിനേക്കാൾ രാസസാമഗ്രികള്‍ ഉപയോഗിച്ചാണ് ഒരേ സമയം ഉഗ്രസ്ഫോടനത്തില്‍ പാറപൊട്ടിക്കുന്നത്. ഇവിടങ്ങളിലെ സ്റ്റോറുകളില്‍ അനുവദനീയമായതിനേ ക്കാള്‍ അളവില്‍ സ്‌ഫോടക വസ്തുക്കള്‍ സൂക്ഷിക്കുന്നതും പതിവാണ്. ഉറക്കം കെടുത്തുന്ന ശബ്ദമുണ്ടാക്കി സമീപവാസികള്‍ക്ക് ദുരിതം സൃഷ്ടിക്കും വിധമാണ് മിക്ക ക്രഷറുകളുടെയും പ്രവര്‍ത്തനം. വലിയൊരു ഗുണ്ടാസംഘത്തെ കൂടെ നിർത്തിയാണ് ഏറെയിടങ്ങളിലും പാറമട ലോബിയുടെ പ്രവര്‍ത്തനം. പ്രദേശവാസികള്‍ എതിര്‍പ്പുപറയുകയോ നിയമനടപടികളിലേക്കു കടക്കുകയോ ചെയ്താല്‍ കൈയേറ്റത്തിനു മുതിരുക പതിവാണ്. ജില്ലയില്‍ ലൈസന്‍സില്ലാത്തതും കാലാവധി കഴിഞ്ഞതും സസ്‌പെന്‍ഡ് ചെയ്യപ്പെട്ടതുമായ ക്വാറികള്‍ നിയമവിരുദ്ധമായി പ്രവര്‍ത്തിക്കുന്നുണ്ട്. പാറ പൊട്ടിക്കാന്‍ അനുമതി നല്‍കിയാല്‍ ഖനനത്തിന്‍റെ ഓരോ ഘട്ടത്തിലും റവന്യു, മലിനീകരണം, ജിയോളജി, മൈനിംഗ് ഉദ്യോഗസ്ഥര്‍ സ്ഥലത്തെത്തി പരിശോധന നടത്തണമെന്നും പ്രദേശവാസികളുടെ പരാതികള്‍ക്ക് പരിഹാരം തേടണമെന്നാണ് നിയമം. നിലവില്‍ ഉദ്യോഗസ്ഥര്‍ സ്ഥലത്തെത്താതെ സുരക്ഷിത കേന്ദ്രങ്ങളില്‍ വിഹിതം വാങ്ങുകയാണു പതിവ്. പാറമട കരാറുകാരന് സ്വര്‍ണഖനി കോട്ടയം: കോടികളുടെ മുടക്കില്‍ ശതകോടികള്‍ കോരുന്ന വ്യവസായമാണ് ഖനനം. ക്വാറി-ക്രഷര്‍ യൂണിറ്റുകള്‍ ദിവസേന നേടുന്ന ലാഭം സാധാരണക്കാരുടെ കണക്കുകൂട്ടലുകളേക്കാള്‍ ഏറെയാണ്. ഒരു ഇടത്തരം ക്വാറിയില്‍നിന്ന് ദിവസം 150 മുതല്‍ 200 ലോഡ് വരെയാണ് പാറ പുറത്തുപോകുക. ഒരു ലോഡ് പാറ ഒമ്പതു ടണ്‍ വരും. അത്തരത്തില്‍ 1,200 ടണ്‍ കരിങ്കല്ലാണ് ദിവസം പുറത്തുപോകുന്നത്. ശരാശരി 200 ലോഡ് മെറ്റലും അത്രതന്നെ എം-സാന്‍ഡും വിറ്റഴിയുന്നു. 20 ടണ്ണാണ് ഒരു ലോഡ് മെറ്റല്‍. അത്തരത്തില്‍ ദിവസം നാലായിരം ടണ്‍ മെറ്റല്‍ ദിവസവും വില്‍ക്കുന്നു. എം-സാന്‍ഡിന്‍റെ കണക്കും ഇങ്ങനെതന്നെ. പാറമട ലോബി ഓരോ വര്‍ഷവും പാറവില കൂട്ടുന്നു. രണ്ടു വര്‍ഷം മുന്‍പ് പാറ തൂക്കി വില്‍ക്കാന്‍ വരെ ക്വാറിലോബി ആലോചന നടത്തിയിരുന്നു. മട തെളിച്ച് ഖനനം തുടങ്ങിയാല്‍ ഒരു മാസത്തിനുള്ളില്‍ മുടക്കുമുതല്‍ തിരിച്ചുകിട്ടും. തൊഴില്‍കൂലിയും സ്‌ഫോടനചെലവും മാസപ്പടിയും കഴിഞ്ഞാല്‍ ബാക്കി കരാറുകാരന് ലാഭമാണ്. നിയമപരമായ സമയപരിധി ലംഘിച്ചാണ് ക്വാറികള്‍ പ്രവര്‍ത്തിക്കുക. ജനവാസ പ്രദേശമല്ലെങ്കില്‍ നിര്‍ദ്ദേശിക്കപ്പെട്ട സമയക്രമങ്ങളൊന്നും ക്വാറി ഉടമകള്‍ നോക്കാറില്ല. പകല്‍ പൊട്ടിക്കുന്ന കൂറ്റന്‍ പാറകള്‍ മെറ്റലാക്കാനും എം-സാന്‍ഡാക്കാനും രാത്രി മുഴുവന്‍ ക്രഷര്‍ യൂണിറ്റുകള്‍ പ്രവര്‍ത്തിപ്പിക്കും. കരിങ്കല്ലും കരിങ്കല്‍ ഉത്പന്നങ്ങളം മാത്രമല്ല ലാഭനേട്ടം. ഖനനത്തിന് മുന്നോടിയായി പല ക്വാറികളിലും മേല്‍മണ്ണ് വില്‍ക്കുക പതിവാണ്. മടകളില്‍ ഇരുപതടി താഴ്ചയില്‍ കൂടുതല്‍ കുഴിക്കാനോ സ്‌ഫോടനം നടത്താനോ നിയമപരമായി സാധിക്കില്ല. 1967-ലെ മൈനര്‍ മിനറല്‍ മൈനിംഗ് ആക്ട് അനുസരിച്ച് പാറയുടെ ആഴപരിധിയും പലയിടങ്ങളിലും വിലങ്ങുതടിയാണ്. അതിനു ക്വാറി ഉടമകള്‍ കണ്ടെത്തുന്ന വഴിയാണ് മേല്‍മണ്ണ് നീക്കല്‍. ഇതോടെ കരിങ്കല്‍ ഉത്പന്നങ്ങള്‍ക്കൊപ്പം മണ്ണ് കച്ചവടവും നടത്താനാകും. ഇതിന് രേഖയോ ലൈസന്‍സോ ആവശ്യമില്ലതാനും. ലൈസന്‍സ് മൂന്നു വര്‍ഷംകൂടുമ്പോള്‍ പുതുക്കി ഒരു മടയില്‍ അഞ്ചു വര്‍ഷം മുതല്‍ 12 വര്‍ഷം വരെ ഖനനം നടത്താം.

ജില്ലാ സമ്മേളനത്തിലേക്ക് സിപിഐ

കോട്ടയം: വൈക്കത്ത് നടക്കുന്ന ജില്ലാ സമ്മേളനത്തില്‍ സിപിഐയ്ക്കും ജില്ലയില്‍ പുതിയ സാരഥി എത്തും. നിലവിലെ സെക്രട്ടറി വി.ബി. ബിനു ഇനി സെക്രട്ടറിയാകാന്‍ താത്പര്യമില്ലെന്നും ഒഴിവാക്കണമെന്നും ആവശ്യപ്പെട്ട് സംസ്ഥാന നേതൃത്വത്തിനു കത്തുനല്‍കി. ഓഗസ്റ്റ് എട്ടു മുതല്‍ 10 വരെ വിപുലമായ രീതിയിലാണു പാര്‍ട്ടിയുടെ ശക്തി കേന്ദ്രമായ വൈക്കത്ത് ജില്ലാ സമ്മേളനം നടക്കുന്നത്. കഴിഞ്ഞ തവണ ഏറ്റുമാനൂരില്‍ നടന്ന സമ്മേളനത്തില്‍ അപ്രതീക്ഷിതമായി നടന്ന മത്സരത്തില്‍ അന്നത്തെ സംസ്ഥാന സെക്രട്ടറിയായിരുന്ന കാനം രാജേന്ദ്രന്‍റെ നോമിനെയെ പരാജയപ്പെടുത്തിയാണ് ബിനു സെക്രട്ടറിയാകുന്നത്. സംസ്ഥാന സെക്രട്ടറിയായിരുന്ന കാനം രാജേന്ദ്രന്‍ പങ്കെടുത്ത സമ്മേളനത്തില്‍ അദ്ദേഹവും സംസ്ഥാന നേതൃത്വവും നിര്‍ദേശിച്ച വി.കെ. സന്തോഷ് കുമാറിനെയാണ് ബിനു പരാജയപ്പെടുത്തിയത്. സെക്രട്ടറി കാലയളവില്‍ സിപിഐയെ ജില്ലയിലെ കരുത്തുറ്റ പാര്‍ട്ടിയായി നയിക്കാന്‍ ബിനുവിനു സാധിച്ചിരുന്നു. ഈ സാഹചര്യത്തില്‍ ബിനുവിന്‍റെ ആവശ്യം സംസ്ഥാന നേതൃത്വം എങ്ങനെ പരിഗണിക്കും എന്നറിയാന്‍ സമ്മേളനംവരെ കാത്തിരിക്കണം. യുവാക്കള്‍ക്കും പുതുമുഖങ്ങള്‍ക്കും പ്രാതിനിധ്യം കൊടുക്കണമെന്നാണ് ബിനു ആവശ്യപ്പെട്ടിരിക്കുന്നത്. അങ്ങനെ വന്നാല്‍ കഴിഞ്ഞ തവണ ബിനുവിനോടു പരാജയപ്പെട്ട എഐടിയുസി ജില്ലാ സെക്രട്ടറി കൂടിയായ വി.കെ. സന്തോഷ്‌കുമാര്‍, നിലവിലെ ജില്ലാ അസി. സെക്രട്ടറിമാരിലൊരാളായ ജോണ്‍ വി. ജോസഫ്, ജില്ലാ ട്രഷറര്‍ ബാബു കെ. ജോര്‍ജ് എന്നിവരിലൊരാള്‍ സെക്രട്ടറിയാകും. വൈക്കം മുന്‍ എംഎല്‍എ കെ. അജിത്തിന്‍റെ പേരും പരിഗണനയിലുണ്ട്. ജില്ലാ സെക്രട്ടറി സ്ഥാനം ഒഴിയുന്ന ബിനു സംസ്ഥാന നേതൃത്വത്തിലേക്ക് എത്തിയേക്കും. സംസ്ഥാന അസി. സെക്രട്ടറിമാരിലൊരാളായോ അല്ലെങ്കില്‍ സംസ്ഥാന എക്‌സിക്യൂട്ടീവ് അംഗമായോ ബിനുവിനെ പരിഗണിക്കും. നിയമസഭാ തെരഞ്ഞെടുപ്പില്‍ സിപിഐയുട ഉറച്ച സീറ്റിലൊന്നോ, രാജ്യസഭാ സീറ്റോ ബിനുവിനു നല്‍കിയേക്കാം. ജില്ലാ സമ്മേളനത്തിനു മുന്നോടിയായി 622 ബ്രാഞ്ച് സമ്മേളനങ്ങളും 98 ലോക്കല്‍ സമ്മേളനങ്ങളും 11 മണ്ഡലം സമ്മേളനങ്ങളും പൂര്‍ത്തിയായി. പുതിയ നേതൃനിരയാണ് എല്ലായിടത്തും. 300 പ്രതിനിധികള്‍ പങ്കെടുക്കുന്ന ജില്ലാ സമ്മേളനത്തിന്‍റെ പൊതുസമ്മേളനവും വൈക്കം ബീച്ചില്‍ നടക്കുന്ന ചുവപ്പുസേനാ മാര്‍ച്ചും സംസ്ഥാന സെക്രട്ടറി ബിനോയി വിശ്വമാണ് ഉദ്ഘാടനം ചെയ്യുന്നത്. സമ്മേളനത്തിനു മുന്നോടിയായി ഒമ്പത് നിയോജക മണ്ഡലങ്ങളിലായി വിദ്യാര്‍ഥി, യുവജന, മഹിളാ സമ്മേളനങ്ങളും കര്‍ഷക, തൊഴിലാളി സംഗമങ്ങളും സംഘടിപ്പിച്ചിട്ടുണ്ട്.

നാല് ഇതരസംസ്ഥാനത്തൊഴിലാളികള്‍ ആറ് കിലോ കഞ്ചാവുമായി പിടിയില്‍

ചിങ്ങവനം: കുറിച്ചിയില്‍ ഇതര സംസ്ഥാനത്തൊഴിലാളികളില്‍നിന്നു വില്‍പനയ്ക്കായി എത്തിച്ച 6.8 കിലോ കഞ്ചാവ് ജില്ലാ പോലീസ് മേധാവിയുടെ ലഹരി വിരുദ്ധ സ്ക്വാഡും ചിങ്ങവനം പോലീസും ചേര്‍ന്ന് പിടികൂടി. സംഭവത്തിൽ നാല് പേരെ ചിങ്ങവനം പോലീസ് അറസ്റ്റ് ചെയ്തു. ഒഡീഷ സ്വദേശികളായ സുരേഷ് ബൈര (22), ആകാശ് ബൈര (19), ആസാം സ്വദേശികളായ ബിക്രം ബുയാന്‍ (19), പരാഗ് ദത്ത (20) എന്നിവരാണ് അറസ്റ്റിലായത്. കോട്ടയം ജില്ലാ പോലീസ് മേധാവി ഷാഹുല്‍ഹമീദിന് ലഭിച്ച രഹസ്യവിവരത്തിന്‍റെ അടിസ്ഥാനത്തില്‍ ഇന്നലെ രാവിലെ 7.45 ന് ഇത്തിത്താനം കളംപാട്ട്ചിറ ഭാഗത്തെത്തിയ പോലീസ് സംഘം സംശയാസ്പദമായി കണ്ട നാലു പേരെ തടഞ്ഞുനിര്‍ത്തി ചോദ്യം ചെയ്തതില്‍ ഇവര്‍ ഇതര സംസ്ഥാനക്കാരാണെന്ന് മനസിലാവുകയും ഇവരുടെ കൈവശം ഉണ്ടായിരുന്ന ഷോള്‍ഡര്‍ ബാഗ് പരിശോധിച്ചതില്‍ പ്ലാസ്റ്റിക് കവറുകളില്‍ ആക്കി പാക്ക് ചെയ്ത നിലയില്‍ 6.8 കിലോഗ്രാം കഞ്ചാവ് കണ്ടെത്തുകയുമായിരുന്നു. പ്രതികളില്‍ രണ്ടുപേര്‍ ആസാം സ്വദേശികളും രണ്ടുപേര്‍ ഒഡീഷ സ്വദേശികളുമാണ്. പ്രതികളില്‍ സുരേഷ്, ആകാശ് എന്നീ ഒഡീഷ സ്വദേശികള്‍. ചിങ്ങവനത്ത് സികെ ഇന്‍ഡസ്ട്രീസ് എന്ന കമ്പനിയില്‍ ജോലിക്കാരായ വിക്രം, പരാഗ് എന്നീ ആസാം സ്വദേശികള്‍ക്ക് കൈമാറാന്‍ ട്രെയിനില്‍ കഞ്ചാവുമായി എത്തുകയായിരുന്നു. ഇതര സംസ്ഥാനത്തൊഴിലാളികള്‍ക്കും മറ്റും വില്‍പ്പനയ്ക്കായി എത്തിച്ച കഞ്ചാവാണ് പിടിക്കപ്പെട്ടത്. ജില്ലാ പോലീസ് മേധാവിയുടെ ലഹരിവിരുദ്ധ സ്‌ക്വാഡിനോടൊപ്പം ചിങ്ങവനം പോലീസ് സ്റ്റേഷന്‍ എസ്എച്ച്ഒ വി.എസ്. അനില്‍കുമാര്‍, എസ്‌ഐമാരായ വി.വി. വിഷ്ണു, ഷാന്‍, എം.പി. സജി, സിജു സൈമണ്‍, എഎസ്‌ഐ സിജോ രവീന്ദ്രന്‍, സിപിഒ മാരായ റിങ്കു, സുമേഷ്, രാജീവ്, സിറാജുദ്ദീന്‍, സാല്‍ബിന്‍, ഭാസുരന്‍ എന്നിവരടങ്ങുന്ന സംഘമാണ് പ്രതികളെ അറസ്റ്റ് ചെയ്തത്.

വാഴൂർ പഞ്ചായത്ത് പഴയ ഷോപ്പിംഗ് കോംപ്ലക്സ് അപകടാവസ്ഥയിൽ

വാഴൂർ: അപകടാവസ്ഥയിൽ നിൽക്കുന്ന വാഴൂർ പഞ്ചായത്തിന്‍റെ പഴയ ഷോപ്പിംഗ് കോംപ്ലക്സ് ഉടൻ പൊളിച്ചുമാറ്റണമെന്ന ആവശ്യം ശക്തമാകുന്നു. കോംപ്ലക്സിന്‍റെ മുകളിലെ നിലയിൽ ചോർച്ചയും കോൺക്രീറ്റ് അടർന്നുവീഴുന്ന സ്ഥിതിയുമാണ്. കെട്ടിടത്തിന്‍റെ ഭിത്തിക്കു വിള്ളലുണ്ട്. കോൺക്രീറ്റ് താഴേക്ക് അടർന്നുവീണ് അപകടം ഉണ്ടാകാതിരിക്കാൻ ഇരുമ്പുവല സ്ഥാപിച്ചിട്ടുണ്ട്. കെട്ടിടം അപകടാവസ്ഥയിലാണെന്നും ഇതിന്‍റെ മുന്പിൽ വാഹനങ്ങൾ നിർത്തിയിടരുതെന്നും കാൽനട യാത്രക്കാർ റോഡിന്‍റെ എതിർവശം വഴി മാത്രമേ പോകാവൂവെന്നും നിർദേശിച്ചു പഞ്ചായത്ത് കോംപ്ലക്സിന്‍റെ മുന്പിൽ ബോർഡ് സ്ഥാപിച്ചിട്ടുണ്ട്. അഞ്ചു വ്യാപാര സ്ഥാപനങ്ങൾ ഇവിടെ പ്രവർത്തിക്കുന്നുണ്ട്. 30 വർഷം മുന്പ് നിർമിച്ച മൂന്നു നില ഷോപ്പിംഗ് കോംപ്ലക്സിന്‍റെ മുകളിലെ നിലയിൽ ചോർച്ചയുണ്ടായി കോൺക്രീറ്റ് അടർന്നുവീഴാൻ തുടങ്ങിയതോടെ എട്ടു വർഷംമുന്പ് കോംപ്ലക്സ് കെട്ടിടം അറ്റകുറ്റപ്പണി നടത്താൻ തീരുമാനിച്ചിരുന്നു. ഇതിനായി 15 ലക്ഷം രൂപ വകയിരുത്തി കരാർ ചെയ്യുകയും ചെയ്തിരുന്നു. എൻജിനിയറിംഗ് വിഭാഗം അറ്റകുറ്റപ്പണി നടത്തരുതെന്നും കെട്ടിടം പൊളിച്ചുമാറ്റണമെന്നും നിർദേശിച്ചതോടെ പദ്ധതി നടന്നില്ല. കെട്ടിടം പൊളിച്ചുമാറ്റാനുള്ള നീക്കത്തിനെതിരേ കോംപ്ലക്സിലെ വ്യാപാരികൾ കോടതിയെ സമീപിച്ചു. കെട്ടിടത്തിന്‍റെ താഴത്തെ നില ഒഴിച്ചുള്ള ഭാഗം പൊളിച്ചുനീക്കി വ്യാപാര സ്ഥാപനങ്ങളെ സംരക്ഷിക്കാമെന്നു തീർപ്പാക്കിയിരുന്നു. എൻജിനിയറിംഗ് വിഭാഗത്തിന്‍റെ വിദഗ്ധ പരിശോധനയിൽ കെട്ടിടത്തിന്‍റെ താഴത്തെ നിലമാത്രം നിർത്തി പൊളിച്ചു മാറ്റുമ്പോൾ താഴത്തെ നിലയ്ക്കു ബലക്ഷയം ഉണ്ടാകുമെന്നും കെട്ടിടം പൂർണമായി പൊളിച്ചുനീക്കണമെന്നും നിർദേശിച്ചതായി പഞ്ചായത്ത് പ്രസിഡന്‍റ് തോമസ് വെട്ടുവേലി പറഞ്ഞു. 15നു പഞ്ചായത്ത് കമ്മിറ്റി യോഗം ചേർന്ന് ഒഴിഞ്ഞുതരണമെന്ന് ആവശ്യപ്പെട്ടു കെട്ടിടത്തിലെ കടയുടമകൾക്കു നോട്ടീസ് നൽകുമെന്നും പ്രസിഡന്‍റ് പറഞ്ഞു.

‌വീടിനു മുകളിൽ വനംവകുപ്പിന്‍റെ തേക്കുമരങ്ങൾ നഷ്‌ടപരിഹാരമില്ല, കണ്ണടച്ച് വനംവകുപ്പ്

എരുമേലി: സ്വന്തമായി ആകെയുള്ള രണ്ടു സെന്‍റ് ഭൂമിയിലെ ചെറിയ വീട്ടിൽ കഴിയുന്ന നിർധന കുടുംബം എരുമേലി ഫോറസ്റ്റ് ഓഫീസിലെ അനാസ്ഥമൂലം വീട് ഉപേക്ഷിച്ചു പോകേണ്ട സ്ഥിതിയിൽ. ശ്രീനിപുരം കോളനിയിൽ കാവുങ്കൽ വത്സമ്മ, മകൻ രഞ്ജിത്ത്, ഭാര്യ, മകൻ എന്നിവർ ഉൾപ്പെടുന്ന കുടുംബമാണ് അപകടഭീഷണിയിൽ കഴിയുന്നത്. വീടിന്‍റെ തൊട്ടടുത്ത് വനംവകുപ്പിന്‍റെ തേക്കിൻകൂപ്പാണ്. പഴക്കമേറിയ തേക്കുമരങ്ങൾ വീടിനു സമീപത്ത് വേരറ്റു മറിഞ്ഞുവീഴുന്ന നിലയിലാണ്. നഷ്ടപരിഹാരമില്ല കഴിഞ്ഞ ദിവസം വീടിന് അടുത്തേക്ക് വനത്തിലെ വലിയ തേക്ക് കടപുഴകി വീണു. 2018ൽ മൂന്നു തേക്കുകൾ വീടിനു മുകളിൽ വീണ് വീട് തകർന്നതാണ്. ഇതിനു നഷ്ടപരിഹാരം തേടി എരുമേലി ഫോറസ്റ്റ് റേഞ്ച് ഓഫീസിൽ നൽകിയ അപേക്ഷയിൽ ഒരു നടപടിയുമുണ്ടായില്ല. കഴിഞ്ഞ ദിവസം തേക്ക് വീണ വിവരം അറിയിച്ചിട്ടും വനംവകുപ്പ് അനങ്ങുന്നില്ല. കഴിഞ്ഞ ദിവസം മരം വീഴുമ്പോൾ രഞ്ജിത്തും കുടുംബവും കൂടാതെ അയൽപക്കത്തെ ആറു കുട്ടികളും വീട്ടിലുണ്ടായിരുന്നു. മരം വീട്ടിലേക്കു വീണിരുന്നെങ്കിൽ വലിയ ദുരന്തമായി മാറുമായിരുന്നു. അങ്ങനെ സംഭവിക്കാതെ ഇവരുടെയെല്ലാം ജീവൻ രക്ഷപ്പെട്ടതിന്‍റെ ആശ്വാസത്തിലാണ് നാട്ടുകാർ. ഓട്ടോ വിറ്റു കടംവീട്ടി 2018ൽ മൂന്നു തേക്കുമരങ്ങൾ വീണപ്പോൾ വീടിന്‍റെ മേൽക്കൂര ഉൾപ്പെടെ തകർന്നിരുന്നു. നിർമാണം നടത്തി വീടിന്‍റെ കേടുപാടുകൾ മാറ്റാനെടുത്ത വായ്പയുടെ തിരിച്ചടവ് മുടങ്ങിയതോടെ രഞ്ജിത്ത് തന്‍റെ ഓട്ടോറിക്ഷ വിറ്റാണ് കടം വീട്ടിയത്. ഇതോടെ കൂലിപ്പണി നടത്തിയാണ് രഞ്ജിത്ത് കുടുംബം പോറ്റുന്നത്. 2011ൽ ഒരു അപകടത്തിലേറ്റ പരിക്കുമൂലം രഞ്ജിത്തിന്‍റെ വലതുകൈ ശസ്ത്രക്രിയയിലൂടെ തുന്നിച്ചേർത്തതാണ്. ഇതുമൂലം ശ്രമകരമായ ജോലികൾ ചെയ്യാൻ കഴിയില്ല. കഴിഞ്ഞ ദിവസം തേക്ക് വീണ വിവരം പറയാൻ എരുമേലി ഫോറസ്റ്റ് റേഞ്ച് ഓഫീസിൽ ചെന്ന രഞ്ജിത്തിനോട്‌ ഭീഷണിയായ ആറ് തേക്ക് മരങ്ങൾ വെട്ടിമാറ്റാൻ അനുമതി ആയിട്ടുണ്ടെന്ന് ഉദ്യോഗസ്ഥർ പറഞ്ഞു. മരങ്ങൾ വെട്ടിമാറ്റുന്നതിന്‍റെ ചെലവ് വനംവകുപ്പ് വഹിക്കില്ലെന്ന് അറിയിച്ച ഉദ്യോഗസ്ഥർ മരങ്ങൾ വെട്ടിയിട്ടാൽ വനംവകുപ്പ് ലേലം ചെയ്യുമെന്നും വ്യക്തമാക്കി. അപേക്ഷ‌‌ ഓഫീസിലില്ല 2018ൽ മരങ്ങൾ വീണ് വീട് തകർന്നതിന്‍റെ നഷ്ടപരിഹാരം തേടി നൽകിയ അപേക്ഷയിൽ തുടർ നടപടികൾ അറിയാൻ ഏഴു വർഷമായി ഓഫീസിൽ കയറി‍യിറങ്ങുകയാണെന്നും അപേക്ഷ ഓഫീസിൽ കാണുന്നില്ല എന്നുമായിരുന്നു ഉദ്യോഗസ്ഥരുടെ മറുപടിയെന്നും രഞ്ജിത്ത് പറഞ്ഞു. അപേക്ഷ നൽകിയതിന്‍റെ പകർപ്പ് തെളിവായി രഞ്ജിത്ത് സൂക്ഷിച്ചുവച്ചിട്ടുണ്ട്. ഇത് ഉൾപ്പെടെ വനംവകുപ്പിലെ അനാസ്ഥയ്ക്കെതിരേ ഫോറസ്റ്റ് ഓഫീസിനു മുമ്പിൽ കുടുംബവുമായി സമരം നടത്താനൊരുങ്ങുകയാണ് രഞ്ജിത്ത്. കോവിഡ് കാലത്ത് സൗജന്യമായി നൂറുകണക്കിനു പേരെ ആശുപത്രികളിൽ എത്തിച്ച ഓട്ടോ ഡ്രൈവറാണ് ജീവൻ രക്ഷിക്കാൻ കുടുംബവുമായി സ്വന്തം വീട് ഉപേക്ഷിച്ചു പോകേണ്ട സ്ഥിതിയിലെത്തിയിരിക്കുന്നത്.

ലക്ഷങ്ങൾ പാഴായി; എരുമേലിയിലെ അറവുശാല നശിക്കുന്നു

എരുമേലി: ലക്ഷങ്ങൾ പാഴാക്കി നിർമിച്ച എരുമേലിയിലെ അറവുശാല ആർക്കും പ്രയോജനമില്ലാതെ നശിക്കുന്നു.കശാപ്പുമുതല്‍ മാലിന്യസംസ്‌കരണം വരെ എല്ലാ പ്രക്രിയകളും നടത്താൻ സജ്ജമാക്കിയ ഒരൊറ്റ ഉപകരണം പോലും ഇപ്പോൾ പ്രവർത്തിപ്പിക്കുന്നില്ല. പ്രതിദിനം പത്തുമുതല്‍ 15 കന്നുകാലികളെ വരെ കശാപ്പ് ചെയ്യാനുള്ള യന്ത്രങ്ങളാണുണ്ടായിരുന്നത്. എന്നാൽ ഇപ്പോൾ ഇതെല്ലാം തുരുമ്പുപിടിച്ച നിലയിലാണ്. അതേസമയം, ആധുനികവും ആരോഗ്യകരവും സുരക്ഷിതവുമായ അറവുശാല സജ്ജമാക്കിയെന്നു പഞ്ചായത്ത്‌ വികസന രേഖയിൽ കാണാം. വൃത്തിയുള്ള അന്തരീക്ഷത്തില്‍ ആധുനിക സാങ്കേതികവിദ്യയും ഉപകരണങ്ങളും ഉപയോഗിച്ച് ഉയര്‍ന്ന നിലവാരമുള്ള മാംസം ഉത്പാദിപ്പിച്ചു വിപണിയില്‍ എത്തിക്കുന്നുവെന്നാണ് വികസന രേഖയിൽ പരാമർശിച്ചിരിക്കുന്നത്. എന്നാൽ ഒരിക്കൽ പോലും പ്രവർത്തിപ്പിക്കാൻ കഴിഞ്ഞിട്ടില്ല എന്നതാണ് യാഥാർഥ്യം. പതിനഞ്ചു വർഷം മുന്പ് നേർച്ചപ്പാറ കമുകിൻകുഴി ഭാഗത്താണ് അറവുശാല നിർമിച്ചത്. ഒന്നരക്കോടിയോളം രൂപ ഇതിനായി ചെലവിട്ടു. നിർമാണം പൂർത്തിയായപ്പോൾ പ്രവർത്തനം ആരംഭിച്ചിരുന്നുവെങ്കിൽ ഇപ്പോൾ യന്ത്രസംവിധാനങ്ങൾ പരിഷ്കരിക്കാൻ കഴിയുമായിരുന്നു. നിർമാണത്തിനു ശിലയിട്ടത് എൽഡിഎഫ് ഭരണസമിതിയും നിർമാണം നടത്തിയതു യുഡിഎഫ് ഭരണസമിതിയുമാണ്. ഇതിനുശേഷം എൽഡിഎഫ് ഭരണസമിതി അധികാരത്തിൽ വന്നു. ഇരു പക്ഷങ്ങളും മാറിമാറി ഭരണം നടത്തിയിട്ടും പ്രവർത്തനം ആരംഭിക്കാൻ കഴിയാത്തത് വികസന പരാജയമായി മാറുകയാണ്. മാംസംമുറിക്കല്‍, എല്ലുകള്‍ നീക്കം ചെയ്യല്‍, അറവുമാലിന്യങ്ങള്‍ വേര്‍തിരിക്കല്‍ എന്നിവയെല്ലാം വേഗത്തില്‍ ചെയ്യാനാകുന്ന മെഷീനുകൾ, ക്രയിൻ എന്നിവയാണ് സ്ഥാപിച്ചിരുന്നത്. കട്ടിംഗ് മെഷീന്‍, ഹാംഗര്‍, കണ്‍വെയര്‍, സംഭരണസ്ഥലം, കന്നുകാലികളെ സൂക്ഷിക്കുന്നതിനുള്ള പ്രത്യേക സ്ഥലം എന്നിവയെല്ലാം ഒരുക്കിയിരുന്നു. ഗുണനിലവാരവും ശുചിത്വവും ഉറപ്പാക്കാന്‍ കന്നുകാലിയുടെ ഭാരം അളന്നു വെറ്ററിനറി ഡോക്ടറുടെ നേതൃത്വത്തില്‍ ആരോഗ്യനില പരിശോധിക്കുന്നതിനുള്ള സൗകര്യവും സജ്ജമാക്കിയിരുന്നു. അണുവിമുക്തമാക്കിയ കന്നുകാലികളെ കശാപ്പ് കഴിഞ്ഞാലുടന്‍ തല, രക്തം, മറ്റ് ഭാഗങ്ങള്‍ എന്നിവ യന്ത്രങ്ങളുപയോഗിച്ച് വേര്‍പെടുത്തി പ്രത്യേക ഇടങ്ങളിലേക്ക് മാറ്റുന്നതിനും പ്രത്യേകം സംവിധാനമുണ്ടായിരുന്നു. വിവിധ ഘട്ടങ്ങളിലൂടെ നീക്കംചെയ്യുന്ന അറവുമാലിന്യം ഡ്രെയിനേജ് സംവിധാനത്തിലേക്കു മാറ്റുന്നതിന് സൗകര്യം ഒരുക്കിയിരുന്നു. എന്നാൽ ഇതൊന്നും നാളിതുവരെ പഞ്ചായത്ത്‌ ഉപയോഗിച്ചിട്ടില്ല.

ഗിഫ്റ്റഡ് ചിൽഡ്രൻ പ്രോഗ്രാം പ്രവർത്തനോദ്ഘാടനം

പൊൻകുന്നം: കാഞ്ഞിരപ്പള്ളി വിദ്യാഭ്യാസ ജില്ലയിലെ 2025-26 വർഷത്തെ ഗിഫ്റ്റഡ് ചിൽഡ്രൻ പ്രോഗാമിന്‍റെ പ്രവർത്തനം ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്തു. കാഞ്ഞിരപ്പള്ളി ഡിഇഒ റോഷ്‌ന അലിക്കുഞ്ഞ് അധ്യക്ഷത വഹിച്ചു. പ്രോഗ്രാം കോ-ഓർഡിനേറ്റർ രാജേഷ് കെ.രാജു പദ്ധതി വിശദീകരണം നടത്തി. കോട്ടയം ഡയറ്റിലെ സ്മിത ശങ്കർ, കാഞ്ഞിരപ്പള്ളി ബിപിസി അജാസ് വാരിക്കാടൻ, പൊൻകുന്നം ഗവ. എച്ച്എസ്എസ് പ്രിൻസിപ്പൽ എം.എച്ച്. നിയാസ്, വൊക്കേഷണൽ എച്ച്എസ്എസ് പ്രിൻസിപ്പൽ ആശാ രാജു, ഹെഡ്മിസ്ട്രസ് എം.സി. രജനി എന്നിവർ പ്രസംഗിച്ചു. എംജി സർവകലാശാല മുൻ വൈസ് ചാൻസലർ ഡോ. സാബു തോമസ് ക്ലാസ് നയിച്ചു.

ബസില്‍നിന്ന് വീണ് വിദ്യാര്‍ഥിനിക്ക് പരിക്കേറ്റ സംഭവം: ഡ്രൈവര്‍ക്കെതിരേ കേസെടുത്തു

കാഞ്ഞിരപ്പള്ളി: ബസില്‍നിന്നിറങ്ങുന്നതിനു മുന്നേ വാഹനം നീങ്ങിയതിനെത്തുടര്‍ന്ന് വിദ്യാര്‍ഥിനിക്ക് വീണു പരിക്കേറ്റ സംഭവത്തില്‍ ഡ്രൈവര്‍ക്കെതിരേ പോലീസ് കേസെടുത്തു. സംഭവത്തില്‍ വാഴയില്‍ എന്ന സ്വകാര്യ ബസിലെ ഡ്രൈവര്‍ പൊന്‍കുന്നം എലിക്കുളം പല്ലാട്ട്‌ അര്‍ജുന്‍ പി. ചന്ദ്രനെ(30)തിരേയാണ് കാഞ്ഞിരപ്പള്ളി പോലീസ് കേസെടുത്തത്. കാഞ്ഞിരപ്പള്ളി-ഈരാറ്റുപേട്ട റോഡില്‍ ആനിത്തോട്ടം സ്റ്റോപ്പില്‍ നിര്‍ത്തിയ ബസിൽനിന്ന് വിദ്യാര്‍ഥിനി ഇറങ്ങുന്നതിനു മുമ്പായി ബസ് അശ്രദ്ധമായി മുന്നോട്ടെടുത്തതിനാല്‍ വിദ്യാര്‍ഥിനി ഫുട്‌ബോർഡില്‍നിന്നു റോഡിലേക്ക് തെറിച്ചുവീഴുകയായിരുന്നു. വീഴ്ചയില്‍ കുട്ടിയുടെ വലതുകാലിനും കൈക്കുഴയ്ക്കും കൈവിരലുകള്‍ക്കും പരിക്കേറ്റിട്ടുണ്ട്. ബസ് ഡ്രൈവര്‍ക്കെതിരേ അശ്രദ്ധമായും അപകടകരമായും വാഹനമോടിച്ചതിനും അപകടശേഷവും വാഹനം നിർത്താതെ ഓടിച്ചുപോയി എന്ന കുറ്റത്തിനുമാണ് കേസെടുത്തിട്ടുള്ളത്.

വിദ്യാലയ പ്രവർത്തനങ്ങളെ താളംതെറ്റിക്കുന്ന സർക്കാർനയം പ്രതിഷേധാർഹമെന്ന്

പൊൻകുന്നം: വിദ്യാഭ്യാസ അവകാശനിയമത്തിന്‍റെ പേരുപറഞ്ഞ് സ്കൂൾ വിദ്യാഭ്യാസത്തെ മൂന്ന് സമയക്രമങ്ങളിലേക്കു മാറ്റി വിദ്യാലയ പ്രവർത്തനങ്ങളെ താളംതെറ്റിക്കുന്ന സർക്കാർനയം പ്രതിഷേധാർഹമാണെന്ന് ഡിസിസി ജനറൽ സെക്രട്ടറി പി.എ. ഷെമീർ പറഞ്ഞു. കേരള പ്രദേശ് സ്കൂൾ ടീച്ചേഴ്സ് അസോസിയേഷൻ ജില്ലാ കമ്മിറ്റി നടത്തിയ ഏകദിന നേതൃത്വ പരിശീലന ക്യാമ്പ് ഉദ്ഘാടനം ചെയ്യുകയായിരുന്നു അദ്ദേഹം. ഒരു രൂപ പോലും കണ്ടിൻജൻസി തുക വർധിപ്പിക്കാതെ വിഭവസമൃദ്ധമായ ഉച്ചഭക്ഷണം പ്രഥമാധ്യാപകരുടെ ചെലവിൽ വിദ്യാലയങ്ങളിൽ നടപ്പിലാക്കുന്നതിനെതിരേ ക്യാമ്പ് പ്രമേയം പാസാക്കി. ജില്ലാ പ്രസിഡന്‍റ് സാബു ജേക്കബിന്‍റെ അധ്യക്ഷതയിൽ റവന്യു ജില്ലാ പ്രസിഡന്‍റ് ആർ. രാജേഷ് മുഖ്യപ്രഭാഷണം നടത്തി. മുൻ സംസ്ഥാന വൈസ് പ്രസിഡന്‍റ് പി.വി. ഷാജിമോൻ, സംസ്ഥാന സമിതിയംഗം ജോസുകുട്ടി ജേക്കബ്, ജില്ലാ ട്രഷറർ ടോമി ജേക്കബ്, യോഗേഷ് ജോസഫ്, ജേക്കബ് മാത്യു എന്നിവർ പ്രസംഗിച്ചു. കാഞ്ഞിരപ്പള്ളി, കറുകച്ചാൽ, ഈരാറ്റുപേട്ട എന്നീ ഉപജില്ലകളിൽനിന്നുള്ള പ്രതിനിധികൾ പങ്കെടുത്തു.

ഫാ. ആന്‍റണി മാന്നല മെമ്മോറിയൽ ബൈബിൾ ക്വിസ്: ചെങ്ങളം ഈസ്റ്റ് സൺഡേസ്കൂൾ ജേതാക്കൾ

അരുവിക്കുഴി: ലൂർദ് മാതാ പള്ളിയിൽ നടന്ന ഫാ. ആന്‍റണി മാന്നല മെമ്മോറിയൽ ബൈബിൾ ക്വിസ് മത്സരത്തിൽ ചെങ്ങളം ഈസ്റ്റ് സെന്‍റ് ആന്‍റണീസ് സൺഡേ സ്കൂളിലെ ആൻമരിയ ജോർജ്-ഏയ്ഞ്ചൽ മരിയ ഇമ്മാനുവൽ ടീം ഒന്നാം സ്ഥാനം കരസ്ഥമാക്കി. രണ്ടാം സ്ഥാനം അരുവിക്കുഴി സെന്‍റ് ജോസഫ് സൺഡേ സ്കൂളിലെ സനീഷ് ഫിലിപ്പ്-സെറിൻ മരിയ ടീമും മൂന്നാം സ്ഥാനം ചങ്ങനാശേരി സെന്‍റ് മേരീസ് മെത്രാപ്പോലീത്തൻ പള്ളി സൺഡേ സ്കൂളിലെ ഗ്ളാഡിസ് ജോസ്-സ്റ്റെഫി സോജി ടീമും നേടി. വിജയികൾക്ക് ക്വിസ് മാസ്റ്റർ ഫാ. ജേക്കബ് കാട്ടടി കാഷ് അവാർഡും ട്രോഫികളും സമ്മാനിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]