പെരിന്തല്മണ്ണ: പെരിന്തല്മണ്ണ നഗരസഭയില് തെരുവ് നായ്ക്കള്ക്ക് ആന്റി റാബിസ് വാക്സിനേഷന് കാമ്പയിന് തുടങ്ങി. നഗരസഭ ഒരു ലക്ഷം രൂപ ചെലവഴിച്ച് നടത്തുന്ന പേ വിഷബാധ പ്രതിരോധ വാക്സിന് ഡ്രൈവിന്റെ ആദ്യഘട്ടം ഗവണ്മെന്റ് ജില്ലാ ആശുപത്രി പരിസരത്ത് നടന്നു. പരിശീലനം ലഭിച്ച സംഘം പിടികൂടുന്ന നായ്ക്കളെ മൃഗാശുപത്രിയുടെ നേതൃത്വത്തിലാണ് വാക്സിനേഷന് ചെയ്യുന്നത്. വാക്സിന് ഡ്രൈവിന് മുമ്പ് തുടങ്ങിയ വളര്ത്തുനായ, പൂച്ച എന്നിവയുടെ പ്രതിരോധ കുത്തിവയ്പ് കാമ്പയിന് 90 ശതമാനം പൂര്ത്തിയായിട്ടുണ്ട്.
പ്രതിരോധ കുത്തിവയ്പിലൂടെ തെരുവ് നായ്ക്കള്ക്ക് ആറ് മാസം മുതല് ഒരുവര്ഷം വരെയുള്ള പേവിഷ പ്രതിരോധമാണ് ലഭിക്കുന്നത്. കുത്തിവയ്പെടുത്ത നായ്ക്കളെ തിരിച്ചറിയുന്നതിനായി പ്രത്യേകം പെയിന്റ് ഉപയോഗിച്ച് അടയാളപ്പെടുത്തും. നഗരപ്രദേശങ്ങള്ക്ക് ശേഷം വാര്ഡുകള് കേന്ദ്രീകരിച്ചും വാക്സിനേഷന് ക്യാമ്പ് ഉണ്ടാകും. സീനിയര് വെറ്ററിനറി സര്ജന് ഡോ. മുജീബ് റഹ്മാന്, അസിസ്റ്റന്റ് ഫീല്ഡ് ഓഫീസര് കേശവന് എന്നിവര് ക്യാമ്പിനു നേതൃത്വം നല്കി. ഡോഗ് ക്യാച്ചര്മാരായ വിജയന് കോട്ടക്കല്, കാര്ത്തിക് എടരിക്കോട് എന്നിവരുടെ നേതൃത്വത്തിലാണ് കുത്തിവയ്പ് നല്കുന്നത്.