പെരിന്തല്മണ്ണ: നഗരസഭയുടെ വനിതാ വിശ്രമകേന്ദ്രം റീ ഓപ്പണ് ചെയ്തു. നഗരസഭയുടെ രജത ജൂബിലിയോടനുബന്ധിച്ചു പ്രവര്ത്തനം ആരംഭിച്ച വനിതാ വിശ്രമകേന്ദ്രം സാങ്കേതിക കാരണങ്ങളാല് അടഞ്ഞുകിടക്കുകയായിരുന്നു.
ഈ കേന്ദ്രമാണ് വീണ്ടും തുറന്നുപ്രവര്ത്തിക്കുന്നത്. വിശ്രമമുറി, മുലയൂട്ടല് മുറി, തൊട്ടില്, ശുചിമുറി, ഇരിപ്പിടങ്ങള് തുടങ്ങിയ സൗകര്യങ്ങളോടെയാണ് വിശ്രമ കേന്ദ്രം പ്രവര്ത്തിക്കുക. കഴിഞ്ഞ നഗരസഭാ കൗണ്സിലിന്റെ കാലത്ത് പെരിന്തല്മണ്ണ പോലീസ് സ്റ്റേഷന്റെ സമീപത്ത് നിര്മിച്ച കെട്ടിടത്തിന്റെ താഴെ നിലയില് ടാക്സി സ്റ്റാന്ഡും പുരുഷന്മാരുടെ ശുചിമുറിയും മുകളിലെ നിലയില് വനിതാ വിശ്രമ കേന്ദ്രവുമാണുള്ളത്. കുടുംബശ്രീ ജില്ലാ മിഷനാണ് കേന്ദ്രത്തിന്റെ പ്രവര്ത്തന ചുമതല. വിശ്രമകേന്ദ്രം വീണ്ടും തുറന്നു പ്രവര്ത്തിക്കുന്നതിലൂടെ നഗരത്തിലെത്തുന്ന വനിതകള്ക്ക് വിശ്രമിക്കുന്നതിനും പ്രാഥമിക കാര്യങ്ങള് നിര്വഹിക്കുന്നതിനുമുള്ള സൗകര്യം ലഭ്യമാകും.