നിലമ്പൂര്: വേട്ടയാടിയ കൂരമാനുമായി രണ്ടു പേര് വനപാലകരുടെ പിടിയിലായി. തോട്ടുമുക്കം സ്വദേശികളായ അറപ്പാട്ടുമാക്കല് ദേവസ്യ, സഹോദരന് ജോസഫ് എന്നിവരെയാണ് അകമ്പാടം വനം ഡെപ്യൂട്ടി റേഞ്ച് ഓഫീസര് വി.കെ. മുഹസിനും സംഘവും അറസ്റ്റ് ചെയ്തത്.
കൂരമാന്റെ നാലു കിലോ ഇറച്ചി, ലൈസന്സ് ഇല്ലാത്ത നാടന് തോക്ക്, എയര്ഗണ്, 12 തിരകള്, രണ്ട് ഹെഡ് ലൈറ്റ്, ഇറച്ചി മുറിച്ചെടുക്കാന് ഉപയോഗിക്കുന്ന മൂന്ന് കത്തികള്, രണ്ട് കാലി കേയ്സുകള് ഉള്പ്പടെ പിടിച്ചെടുത്തു.
നിലമ്പൂര് നോര്ത്ത് ഡിഎഫ്ഒ പി. കാര്ത്തിക്കിന് ലഭിച്ച രഹസ്യ വിവരത്തെ തുടര്ന്ന് വ്യാഴാഴ്ച പുലര്ച്ചെ തോട്ടപ്പള്ളി പള്ളിമേട്ടിലെ വീട്ടിലെത്തി വനപാലകര് നടത്തിയ പരിശോധനയില് ഇറച്ചിയും തോക്കും ഉള്പ്പെടെ പിടിച്ചെടുത്തു. വാഴ കൃഷിയുടെ മറവിലാണ് മൃഗവേട്ട നടത്തുന്നത്. പ്രതികളെ മഞ്ചേരി വനം കോടതിയില് ഹാജരാക്കി. തോക്കും എയര്ഗണും പോലീസിന് കൈമാറും. മേഖലയില് ലൈസന്സ് ഇല്ലാത്ത നാടന് തോക്കുകള് ഉപയോഗിച്ചാണ് മൃഗവേട്ട നടക്കുന്നത്. സെക്ഷന് ഫോറസ്റ്റ് ഓഫീസര് പി.എം. ശ്രീജിത്ത്, ബീറ്റ് ഫോറസ്റ്റ് ഓഫീസര്മാരായ കെ.പി. അനില് കുമാര്, വിപിന് രാജ്, ബി. അനില് കുമാര്, കെ.സി. അനീഷ്, സിവില് പോലീസ് ഓഫീസര് രജിത് എന്നിവരും പരിശോധനയില് പങ്കെടുത്തു.