തേഞ്ഞിപ്പലം: പെണ്കുട്ടികളുടെ സീനിയര് ലോംഗ് ജംപില് ഐഡിയല് കടകശേരിക്ക് കോഴിക്കോട് തിരുവമ്പാടി സ്വദേശി ഏയ്ഞ്ചല് ജെയിംസിലൂടെ സ്വര്ണം. 5.44 മീറ്റർ ദൂരം മറികടന്നാണ് ഏയ്ഞ്ചല് സ്വര്ണം നേടിയത്. ഇന്ന് 100 മീറ്റര് ഹര്ഡില്സിലും നാളെ ട്രിപ്പിളിലും ഏയ്ഞ്ചല് മത്സരിക്കും. പരിശീലകന് ടോമി ചെറിയാനൊപ്പം പരിശീലിച്ചാണ് ഏയ്ഞ്ചലിന്റെ നേട്ടം.
കഴിഞ്ഞവര്ഷം റവന്യു ജില്ലാ മീറ്റില് ലോംഗ്ജംപിലും ട്രിപ്പിളിലും സ്വര്ണമണിഞ്ഞിരുന്നു ഏയ്ഞ്ചല് ജെയിംസ്.
രണ്ട് വര്ഷം മുമ്പാണ് ഏയ്ഞ്ചല് കടകശേരി ഐഡിയലില് എത്തിയത്. കഴിഞ്ഞ സംസ്ഥാന സ്കൂള് മീറ്റില് ലോംഗ്ജംപിലും ഹര്ഡില്സിലും വെള്ളിയും ട്രിപ്പിളില് വെങ്കലവും നേടിയിരുന്നു. കഴിഞ്ഞ വര്ഷം സംസ്ഥാന മീറ്റിനിടെ ഉണ്ടായ ഭക്ഷ്യവിഷ ബാധയെ തുടര്ന്ന് മികച്ച നിലയില് മത്സരിക്കാന് കഴിഞ്ഞിരുന്നില്ല. ഇത്തവണ സംസ്ഥാന മീറ്റില് സ്വര്ണമാണ് ഉന്നം. 2022ല് ദേശീയ ജൂണിയര് മീറ്റില് ഹെക്സാത്തലണില് വെള്ളിയും സൗത്ത് സോണില് സ്വര്ണവും നേടിയിട്ടുണ്ട്. തിരുവമ്പാടി പുളിക്കപടവില് അനില് ജെയിംസിന്റെയും സുനിതയുടെയും മകളായ ഏയ്ഞ്ചല് പ്ലസ്ടു കൊമേഴ്സ് വിദ്യാര്ഥിയാണ്.