ഓപ്പറേഷന് ഡി-ഹണ്ട്: 234 പേരെ അറസ്റ്റ് ചെയ്തു
Saturday, March 15, 2025 11:52 PM IST
തിരുവനന്തപുരം: ഓപ്പറേഷന് ഡി -ഹണ്ടിന്റെ ഭാഗമായി ഇന്നലെ സംസ്ഥാനവ്യാപകമായി നടത്തിയ സ്പെഷല് ഡ്രൈവില് മയക്കുമരുന്ന് വില്പ്പനയില് ഏര്പ്പെട്ട 234 പേർ അറസ്റ്റിൽ. വിവിധയിടങ്ങളിലായി 2,362 പേരെ പരിശോധനയ്ക്ക് വിധേയമാക്കി.
വിവിധ തരത്തിലുള്ള നിരോധിത മയക്കുമരുന്ന് കൈവശം വച്ചതിന് 222 കേസുകള് രജിസ്റ്റര് ചെയ്തു. ഈ കേസുകളില് എല്ലാംകൂടി മാരക മയക്കുമരുന്നുകളായ എംഡിഎംഎ (0.0119 കി.ഗ്രാം), കഞ്ചാവ് (6.171 കി.ഗ്രാം), കഞ്ചാവ് ബീഡി (167 എണ്ണം) എന്നിവ പോലീസ് ഇവരില് നിന്ന് പിടിച്ചെടുത്തു.
നിരോധിത മയക്കുമരുന്നുകളുടെ സംഭരണത്തിലും വിപണനത്തിലും ഏര്പ്പെട്ടിരിക്കുന്നവരെ കണ്ടുപിടിച്ച് കര്ശന നിയമനടപടികള് സ്വീകരിക്കുന്നതിനാണ് 14ന് സംസ്ഥാന വ്യാപകമായി ഓപ്പറേഷന് ഡി-ഹണ്ട് നടത്തിയത്.
സംസ്ഥാന ആന്റി നാര്ക്കോട്ടിക്സ് ടാസ്ക് ഫോഴ്സ് തലവനും ക്രമസമാധാന വിഭാഗം എഡിജിപിയുമായ മനോജ് ഏബ്രഹാമിന്റെ നേതൃത്വത്തില് റേഞ്ച് അടിസ്ഥാനത്തിലുള്ള എന്ഡിപിഎസ് കോ-ഓര്ഡിനേഷന് സെല്ലും ജില്ലാ പോലീസ് മേധാവിമാരും ചേര്ന്നാണ് ഓപ്പറേഷന് ഡി-ഹണ്ട് നടപ്പാക്കുന്നത്.