പ്രവര്‍ത്തനപരിചയമില്ലാത്തവർ സഹകരണമേഖലയെ തകർക്കുമെന്ന് സുധാകരന്‍
Monday, November 4, 2024 3:29 AM IST
കാസര്‍ഗോഡ്: സഹകരണമേഖലയിലടക്കം താഴെതട്ടില്‍ പ്രവര്‍ത്തിച്ചുവരുന്നവര്‍ നേതൃസ്ഥാനത്ത് എത്തുന്നില്ലെന്നും പ്രവര്‍ത്തനപരിചയമില്ലാത്തവരുടെ കടന്നുവരവ് മേഖലയുടെ ഭാവിയെ ബാധിക്കുമെന്നും മുന്‍ സഹകരണമന്ത്രി ജി. സുധാകരന്‍.
കേരള സഹകരണ ഫെഡറേഷന്‍ സംസ്ഥാന സമ്മേളനം കാസര്‍ഗോഡ് മുനിസിപ്പൽകോണ്‍ഫറന്‍സ് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. രാഷ്‌ട്രീയ പ്രത്യയശാസ്ത്രത്തോടൊപ്പം സാമൂഹ്യ പ്രതിബദ്ധതയുമാണു സഹകാരികള്‍ക്കും നേതാക്കള്‍ക്കും വേണ്ടത്. ഒരു സഹകരണ പ്രസ്ഥാനം എങ്ങനെ മുന്നോട്ടു കൊണ്ടുപോകുന്നു, അതില്‍നിന്നു പടിയിറങ്ങുമ്പോള്‍ അതിന്‍റെ ഉയര്‍ച്ച എത്രയുണ്ട് എന്നതാണ് ഒരു സഹകാരിയുടെ സാമൂഹ്യപ്രതിബദ്ധതയുടെ അളവുകോലെന്നും അദ്ദേഹം കൂട്ടിച്ചേര്‍ത്തു.