മികച്ച ക്രൈസ്തവ സാഹിത്യകാരന് ജെയിംസ് കെ.സി. മണിമല സ്മാരക അവാര്‍ഡ്
Sunday, November 3, 2024 2:02 AM IST
കൊച്ചി: കെസിബിസി മീഡിയ കമ്മീഷന്‍ അന്തരിച്ച പ്രമുഖ സാഹിത്യകാരനായ ജെയിംസ് കെ.സി. മണിമലയുടെ കുടുംബാംഗങ്ങളുടെ സഹകരണത്തോടെ മികച്ച ക്രൈസ്തവ സാഹിത്യകാരന്മാര്‍ക്ക് എല്ലാ വര്‍ഷവും അവാര്‍ഡ് നല്‍കുന്നു.
11,111 രൂപയുടെ കാഷ് അവാര്‍ഡും ഫലകവുമാണ് തെരഞ്ഞെടുക്കുന്നയാള്‍ക്കു നല്‍കുകയെന്ന് മീഡിയ കമ്മീഷന്‍ ചെയര്‍മാന്‍ ആര്‍ച്ച്ബിഷപ് മാര്‍ ജോസഫ് പാംപ്ലാനി, സെക്രട്ടറി ഫാ. ഏബ്രഹാം ഇരിമ്പിനിക്കല്‍, ജെയിംസ് കെ.സി. മണിമലയുടെ മക്കളായ ഡോ. മാത്യു മണിമല, ജെയിംസ് വെള്ളപ്ലാമുറിയില്‍ എന്നിവര്‍ അറിയിച്ചു.
ജെയിംസ് കെ.സി. മണിമലയുടെ 51-ാം ചരമവാര്‍ഷികത്തോടനുബന്ധിച്ചാണ് അവാര്‍ഡ് ഏര്‍പ്പെടുത്തിയിട്ടുള്ളത്. ഈ വര്‍ഷം നോവല്‍ രംഗത്തെ മികച്ച ക്രൈസ്തവ സാഹിത്യകാരനെയാണ് തെരഞ്ഞെടുക്കുന്നത്.
അവാര്‍ഡിനായുള്ള കൃതികള്‍ 20ന് മുമ്പായി ആന്‍റണി ചടയംമുറി, കോ-ഓര്‍ഡിനേറ്റര്‍, ജെയിംസ് കെ.സി. മണിമല സ്മാരക അവാര്‍ഡ് കമ്മിറ്റി, കെസിബിസി മീഡിയ കമ്മീഷന്‍, പിഒസി, പാലാരിവട്ടം, കൊച്ചി 682025 എന്ന വിലാസത്തില്‍ ലഭിച്ചിരിക്കണം. പുസ്തകത്തിന്‍റെ രണ്ടു കോപ്പികളാണ് അവാര്‍ഡിനായുള്ള നാമനിര്‍ദേശത്തോടൊപ്പം അയയ്‌ക്കേണ്ടത്.
നാമനിര്‍ദേശ പത്രിക പൂരിപ്പിച്ച് ഗ്രന്ഥകാരനോ മറ്റുള്ളവരോ അയച്ചാല്‍ മതിയാകും.