മുനമ്പം: പരിഹാരം വൈകിക്കരുതെന്ന് കുഞ്ഞാലിക്കുട്ടി
Sunday, November 3, 2024 2:53 AM IST
മലപ്പുറം: മുനമ്പം വഖഫ് ഭൂമി പ്രശ്നത്തില്‍ പരിഹാരം സര്‍ക്കാര്‍ വൈകിക്കുന്നത് മറ്റു ശക്തികള്‍ക്ക് ആയുധമാകുന്നുവെന്ന് മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ. കുഞ്ഞാലിക്കുട്ടി.
വിഷയത്തില്‍ സര്‍ക്കാര്‍ ആത്മാര്‍ഥമായി ഇടപെടണം. അതിനു തയാറായാല്‍ ഒറ്റദിവസംകൊണ്ട് പരിഹരിക്കാവുന്ന വിഷയമാണ്. അവിടെ താമസിക്കുന്ന ആളുകളെ ഇറക്കിവിടണമെന്ന് ആര്‍ക്കും അഭിപ്രായമില്ല. പതിറ്റാണ്ടുകളായി അവിടെ താമസിക്കുന്ന ആളുകളാണ്. അവരുടെ സ്വത്തുക്കള്‍ നഷ്‌ടപ്പെടരുത്. നിയമപരമായി അത് ചെയ്തു കൊടുക്കേണ്ട ഉത്തരവാദിത്വം അധികാരികള്‍ക്കാണ്.
പ്രദേശത്തുകാര്‍ ഇക്കാര്യത്തില്‍ ഉത്തരവാദിയല്ല. ഇത് രാഷ്‌ട്രീയവത്കരിക്കാന്‍ ഉദ്ദേശിക്കുന്നില്ലെന്നും പ്രശ്നത്തിന് പരിഹാരമാണു വേണ്ടതെന്നും ഇക്കാര്യത്തില്‍ സര്‍ക്കാരുമായി സഹകരിക്കാൻ തയാറാണെന്നും അദ്ദേഹം പറഞ്ഞു.
വി.എസ്. അച്യുതാനന്ദന്‍ മുഖ്യമന്ത്രിയായിരുന്ന 2008-2009കാലത്തെടുത്ത കാബിനറ്റ് തീരുമാനത്തെ തുടര്‍ന്നുണ്ടായതാണ് ഇതെല്ലാം.
അതുകൊണ്ടുതന്നെ സര്‍ക്കാര്‍ മുന്‍കൈയടുത്ത് ചര്‍ച്ച നടത്തി പ്രശ്നത്തിനു പരിഹാരം കാണണമെന്നും ദുഷ്പ്രചാരണങ്ങള്‍ ഒഴിവാക്കണമെന്നുമാണ് മുസ്‌ലിം സംഘടനകളുടെ തീരുമാനമെന്നും അദ്ദേഹം പറഞ്ഞു.