ഇടതുസ്വതന്ത്രനാകാൻ സമ്മതമറിയിച്ച് പി. സരിൻ? പാലക്കാട്: രാഹുൽ മാങ്കൂട്ടത്തിലിനെ പാലക്കാട്ട് സ്ഥാനാർഥിയായി പ്രഖ്യാപിച്ചതിനെത്തുടർന്ന് കോൺഗ്രസ് നേതൃത്വവുമായി ഇടഞ്ഞ പി. സരിൻ പാലക്കാട് നിയമസഭാമണ്ഡലത്തിൽ ഇടതുസ്ഥാനാർഥിയായേക്കുമെന്നു സൂചന.
ഇടതുസ്വതന്ത്രനായി മത്സരിക്കാൻ തയാറാണെന്നു സരിൻ എൽഡിഎഫ് നേതൃത്വത്തെ അറിയിച്ചു എന്നാണ് റിപ്പോർട്ട്. ഇന്നു സരിൻ വാർത്താസമ്മേളനം നടത്തി കോൺഗ്രസ് വിടുന്നതായി പ്രഖ്യാപിച്ചേക്കും.
കോൺഗ്രസ് വിട്ട് സരിൻ പുറത്തുവന്നശേഷം സ്ഥാനാർഥിക്കാര്യം പരിഗണിക്കാമെന്നാണ് ഇടതുനേതാക്കൾ അറിയിച്ചിട്ടുള്ളത്. പി.വി. അൻവർ എംഎൽഎയും ഇന്നലെ സരിനെ സന്ദർശിച്ചിരുന്നു.
ചേലക്കരയിൽ സ്ഥാനാർഥിത്വം ലഭിക്കാത്തതിനെത്തുടർന്ന് ഇടഞ്ഞുനിൽക്കുന്ന കോൺഗ്രസ് നേതാവ് എൻ.കെ. സുധീറുമായും അൻവർ ഇന്നലെ കൂടിക്കാഴ്ച നടത്തി. ചേലക്കരയിൽ ഡിഎംകെ സ്വതന്ത്രസ്ഥാനാർഥിയുണ്ടാകുമെന്നും അൻവർ പ്രഖ്യാപിച്ചു.