1991ൽ എം.പി. താമി കോണ്ഗ്രസ് സ്ഥാനാർഥിയായി ഇവിടെ ജയിച്ചതാണ് യുഡിഎഫിന്‍റെ അവസാനജയം. 1996ൽ കെ. രാധാകൃഷ്ണൻ 2,323 വോട്ടിന്റെ ഭൂരിപക്ഷത്തിൽ പിടിച്ചെടുത്ത മണ്ഡലത്തെ 2016ൽ യു.ആർ. പ്രദീപ് പ്രതിനിധീകരിച്ചതൊഴിച്ചാൽ രാധാകൃഷ്ണന്‍റെ തട്ടകമാണ്.
2021ൽ രാധാകൃഷ്ണൻ ഇവിടെനിന്നു ജയിച്ചത് 39,400 വോട്ടിന്റെ വന്പൻ ഭൂരിപക്ഷത്തിനാണ്. ആ ഭൂരിപക്ഷം ലോക്സഭാ തെരഞ്ഞെടുപ്പിൽ 5,173 വോട്ടിലേക്കു കുറച്ചു കൊണ്ടുവരാൻ സാധിച്ചതിലാണ് യുഡിഎഫിന്‍റെ പ്രതീക്ഷ.
പാലക്കാട്ടെ സ്ഥിതി വ്യത്യസ്തമാണ്. കഴിഞ്ഞ രണ്ടു നിയമസഭാ തെരഞ്ഞെടുപ്പുകളിൽ ഇവിടെ രണ്ടാം സ്ഥാനത്തു ബിജെപിയാണ്. കഴിഞ്ഞ തെരഞ്ഞെടുപ്പിൽ ഷാഫി പറന്പിലും ഇ. ശ്രീധരനും തമ്മിലുള്ള പോര് കേരളത്തിന്‍റെയാകെ ശ്രദ്ധ പിടിച്ചുപറ്റി. ലീഡ് മാറിമറിഞ്ഞ വോട്ടെണ്ണലിനൊടുവിൽ 3,859 വോട്ടുകൾക്കായിരുന്നു ഷാഫിയുടെ വിജയം.
ലോക്സഭാ തെരഞ്ഞെടുപ്പിൽ വി.കെ. ശ്രീകണ്ഠന് ബിജെപിയുടെ സി. കൃഷ്ണകുമാറിനേക്കാൾ 9,400 വോട്ടിന്റെ മുൻതൂക്കം നേടാനായത് യുഡിഎഫിനു പ്രതീക്ഷ പകരുന്നു. ഏതായാലും വാശിയേറിയ പോരാട്ടത്തിനാണ് പാലക്കാടും തയാറെടുക്കുന്നത്.
പാലക്കാടും ചേലക്കരയിലും മത്സരിക്കുന്നത് ഷാഫി പറന്പിലും കെ. രാധാകൃഷ്ണനുമല്ല എന്നതും തെരഞ്ഞെടുപ്പിനെ സ്വാധീനിക്കുന്ന ഘടകമാകും. ഇരുവരുടെയും മികച്ച പ്രതിച്ഛായായിരുന്നു ഇവരുടെ തുടർവിജയം സാധ്യമാക്കിക്കൊണ്ടിരുന്നത്.
രണ്ടാം പിണറായി സർക്കാർ അധികാരത്തിലെത്തിയ ശേഷം നടന്ന രണ്ട് ഉപതെരഞ്ഞെടുപ്പുകളിലും യുഡിഎഫ് തിളക്കമാർന്ന വിജയം നേടി. അതു രണ്ടും പക്ഷേ യുഡിഎഫ് കോട്ടകളിലായിരുന്നു. ഇത്തവണ അങ്ങനെ ഉറപ്പിച്ചു പറയാൻ സാധിക്കുന്നത് വയനാടിന്‍റെ കാര്യം മാത്രമാണ്.