ദിവ്യക്കെതിരേ നടപടി വേണമെന്ന നിലപാടാണ് മുന്നണിയിലെ പ്രധാന ഘടകകക്ഷിയായ സിപിഐ മുന്നോട്ടു വയ്ക്കുന്നത്. നവീന്‍ബാബു സത്യസന്ധനായ ഉദ്യോഗസ്ഥനായിരുന്നുവെന്നും അദ്ദേഹത്തിനെതിരേ ഒരു പരാതിയും ലഭിച്ചിട്ടില്ലെന്നും പൊതുസമൂഹത്തില്‍ ഇടപെടുമ്പോള്‍ ജനപ്രതിനിധികള്‍ പക്വത കാണിക്കണമെന്നുമുള്ള റവന്യൂമന്ത്രി കെ.രാജന്‍റെ പ്രസ്താവന സിപിഐയുടെകൂടി നിലപാടായാണ് വിലയിരുത്തുന്നത്.
അതിനിടെ, ദിവ്യയെ സംരക്ഷിച്ചാല്‍ ചേലക്കര, പാലക്കാട്, വയനാട് ഉപതെരഞ്ഞെടുപ്പുകളില്‍ പ്രതിപക്ഷം ഇത് ആയുധമാക്കുമെന്നും പാർട്ടിയെ പ്രതിരോധത്തിലാക്കുമെന്നുമാണു സിപിഎം വിലയിരുത്തൽ. ഈ സാഹചര്യത്തിൽ ദിവ്യയുടെ സംരക്ഷണ ബാധ്യത പാർട്ടി ഏറ്റെടുക്കില്ലെന്നും രാജി നിർദേശം നൽകുമെന്നുമാണു പാർട്ടി കേന്ദ്രങ്ങളിൽനിന്നുള്ള സൂചന.
നവീൻ ബാബുവിന്‍റെ മാതാപിതാക്കളായ കൃഷ്ണൻനായരും രത്നമ്മയും പാർട്ടിയോട് അടുപ്പമുള്ളവരാണ്. 1979ലെ പഞ്ചായത്ത് തെരഞ്ഞെടുപ്പില്‍ രത്‌നമ്മ സി.പി.എം. സ്ഥാനാര്‍ഥിയായിരുന്നു. ഭാര്യയും കുടുംബാംഗങ്ങളും സിപിഎം അനുഭാവം പുലർത്തുന്നവരുമാണ്.