വില്‍ക്കാത്ത പാഠപുസ്തകങ്ങളുടെ വില പലിശ ചേർത്തടയ്ക്കണം; ്രധാനാധ്യാപകര്‍ ആശങ്കയില്‍
Saturday, February 1, 2025 2:25 AM IST
റെജി ജോസഫ്
കോട്ടയം: ഹൈസ്‌കൂളുകളിലെ പ്രധാനാധ്യാപകരെ സര്‍ക്കാര്‍ കഠിനപാഠങ്ങള്‍ പഠിപ്പിക്കുന്നു. 2010-11 മുതല്‍ സ്‌കൂളുകളില്‍ വിറ്റഴിയാതെ വന്ന പാഠപുസ്തകങ്ങളുടെ വില 18 ശതമാനം പലിശ സഹിതം ഉടന്‍ അടയ്ക്കണമെന്നാണു പാഠപുസ്തക ഓഫീസില്‍നിന്നുള്ള ഉത്തരവ്. ഇരുപതു ലക്ഷം രൂപവരെ ഇത്തരത്തില്‍ അടയ്‌ക്കേണ്ടിവന്നിരിക്കുന്ന പ്രധാനാധ്യാപകര്‍ പലതാണ്.
സ്‌കൂള്‍ സൊസൈറ്റിയുടെ പ്രസിഡന്‍റായ പ്രധാനാധ‍്യാപകനും സെക്രട്ടറിയായ അധ്യാപകനുമാണു കുടിശികയുടെ സാമ്പത്തിക ബാധ്യത ഏറ്റെടുക്കേണ്ടത്. കുടിശിക തീര്‍ക്കുന്നില്ലെങ്കില്‍ ഇവരുടെ വിരമിക്കല്‍ ആനുകൂല്യങ്ങള്‍ തടസപ്പെടും.
കേരള സിലബസ് സ്‌കൂളുകളില്‍ എട്ടാം ക്ലാസ് വരെ സൗജന്യമായും ഒന്‍പത്, പത്ത് ക്ലാസുകളില്‍ വിലയ്ക്കുമാണു പുസ്തകങ്ങള്‍ ലഭിക്കുന്നത്. നവംബറില്‍തന്നെ അടുത്ത അധ്യയന വര്‍ഷത്തിലേക്ക് ആവശ്യമായ പുസ്തകങ്ങളുടെ എണ്ണം സര്‍ക്കാര്‍ ഓര്‍ഡര്‍ കൊടുക്കും.
വിദ്യാര്‍ഥികള്‍ പഴയ പുസ്തകങ്ങള്‍ വാങ്ങി പഠിച്ചാല്‍ ഒട്ടേറെ പുതിയ പുസ്തകങ്ങള്‍ ബാക്കി വരും. പുതിയ പുസ്തകമേ വാങ്ങാവൂ എന്ന് നിബന്ധന പുലര്‍ത്താന്‍ അധ്യാപകര്‍ക്ക് സാധിക്കുകയുമില്ല.
അതേസമയം, ടെക്സ്റ്റ്ബുക്ക് ഓഫീസില്‍നിന്ന് ഓര്‍ഡര്‍ ചെയ്തതിലും കൂടുതല്‍ പുസ്തകങ്ങള്‍ സ്ഥിരമായി അയക്കാറുണ്ടെന്നും അധിക വരുന്നവ തിരികെ വാങ്ങാറില്ലെന്നും അധ്യാപകര്‍ പറയുന്നു. 2019-20 അധ്യയന വര്‍ഷം മുഴുവന്‍ പാഠപുസ്തകങ്ങളും മാറിയതിനാല്‍ മുന്‍ വര്‍ഷങ്ങളിലെ പുസ്തകങ്ങള്‍ക്ക് പിന്നീട് ആവശ്യക്കാരുണ്ടായില്ല. ഇത് ഡെഡ് സ്റ്റോക്കായി സര്‍ക്കാര്‍ പ്രഖ്യാപിക്കുന്നുമില്ല.
ഇത്തരത്തില്‍ 14 വര്‍ഷം മുന്‍പ് മുതലുളള കുടിശികയ്ക്ക് പലിശയും ചേര്‍ത്ത് ഇരട്ടിയോളം തുക അടയ്‌ക്കേണ്ട ബാധ്യതയാണ് മിക്ക സ്‌കൂളുകളിലും. ഇക്കാലത്ത് പലസ്‌കൂളുകളിലും നിരവധി പേര്‍ പ്രധാനാധ‍്യാപക ചുമതലയില്‍ വന്നുപോയി. പലരും സര്‍വീസില്‍നിന്നു വിരമിക്കുകയും ചെയ്തു. ഇവര്‍ വരുത്തിയ കുടിശികയും നിലവില്‍ ചുമതലയിലുള്ളവര്‍ അടയ്‌ക്കേണ്ടതായി വരുന്നു.
മുന്‍ അധ്യാപകര്‍ക്കും അതത് കാലത്തെ ബാധ്യത അടയ്ക്കാന്‍ നോട്ടീസ് അയയ്ക്കുമെന്നും പിഴയടക്കം അടച്ചില്ലെങ്കില്‍ ശമ്പളം അല്ലെങ്കില്‍ പെന്‍ഷന്‍ തടയുമെന്നാണ് സര്‍ക്കാര്‍ വിശദീകരണം. മുന്‍ ചുമതലക്കാരില്‍ പലരും നോട്ടീസ് കൈപ്പറ്റാനോ തുക അടയ്ക്കാനോ തയാറാകുന്നില്ല.
വിറ്റ പുസ്തകങ്ങളുടെ തുക കുട്ടികളില്‍നിന്നു വാങ്ങിയശേഷം അടയ്ക്കാതെ വന്നവരും 18 ശതമാനം പിഴയോടെ തുക അടയ്ക്കണം. എന്നാല്‍ വിറ്റ പുസ്തകങ്ങളുടെ രജിസ്റ്റര്‍ പല സ്‌കൂളുകളിലും നഷ്ടപ്പെട്ടുപോയി. തുക അടയ്ക്കാനുള്ള മുന്‍ അധ്യാപകര്‍ വിസമ്മതിക്കുകയോ അവര്‍ക്ക് മരണം സംഭവിക്കുകയോ ചെയ്താല്‍ നിലവിലെ പ്രധാന അധ്യാപകരാണ് ബാധ്യത പേറേണ്ടിവരിക.
കുടിശിക തീർത്തില്ലെങ്കിൽ സ്‌കൂളിനു വിദ്യാഭ്യാസ വകുപ്പില്‍നിന്ന് ബാധ്യതയില്ലാ സര്‍ട്ടിഫിക്കറ്റും ലഭിക്കാത്ത സാഹചര‍്യവും ഉണ്ടാകും. അങ്ങനെയെങ്കില്‍ ബില്ലുകള്‍ പാസാകാതെ നിലവിലുള്ളവരുടെ ശമ്പളം, സ്‌കൂള്‍ ഫണ്ടുകള്‍ എന്നിവ മുടങ്ങിയേക്കാം.
അധികം വന്ന പുസ്തകങ്ങള്‍ തിരിച്ചേല്‍പിച്ചതിന്‍റെ രേഖ ഹാജരാക്കുന്നവര്‍ പണം അടയ്‌ക്കേണ്ടി വരില്ലെന്ന് നിര്‍ദേശമുണ്ട്. ഇത്തരം രേഖകള്‍ പല സ്‌കൂളുകളും സൂക്ഷിച്ചിട്ടില്ല. ഇക്കൊല്ലം വിരമിക്കുന്നവര്‍ക്ക് സ്‌കൂള്‍ യൂണിഫോമിന്‍റേത് ഉള്‍പ്പെടെ എല്ലാ ബാധ്യതകളും തീര്‍ക്കാതെ പെന്‍ഷനും പിഎഫും ഗ്രാറ്റുവിറ്റിയും ഉള്‍പ്പെടെ ആനുകൂല്യങ്ങളൊന്നും ലഭിക്കില്ല. യൂണിഫോമിന് ലഭിക്കേണ്ട ലക്ഷങ്ങളുടെ സര്‍ക്കാര്‍ ഫണ്ട് വൈകുന്നതിനാല്‍ കൈയില്‍നിന്നു പണം മുടക്കിയ അധ്യാപകരും ബാധ്യത നേരിടുകയാണ്.