കാർ ടാങ്കർ ലോറിയിൽ ഇടിച്ച് വീട്ടമ്മ മരിച്ചു
Saturday, February 1, 2025 1:53 AM IST
കല്ലടിക്കോട്‌: പാലക്കാട്‌ - തൃശൂർ ദേശീയപാതയിൽ കുഴൽമന്ദം വെള്ളപ്പാറയ്ക്കു സമീപം കാർ നിയന്ത്രണംവിട്ട്‌ ടാങ്കർ ലോറിയിൽ ഇടിച്ച് വീട്ടമ്മ മരിച്ചു. വേലിക്കാട്‌ വടക്കന്‍റെകാട്‌ മണ്ടകത്തിൽ എം.കെ.ഫിലിപ്പിന്‍റെ ഭാര്യ സാറാമ്മ ഫിലിപ്പ്(63) ആണ്‌ മരിച്ചത്‌.
ഭർത്താവ്‌ ഫിലിപ്പിനും പരിക്കേറ്റു. ഇന്നലെ കാലത്ത്‌ 11 മണിയോടെയായിരുന്നു അപകടം. റോഡരികിൽ നിർത്തിയിട്ടിരുന്ന ഗ്യാസ്‌ ടാങ്കർ ലോറിയിലേക്കു കാർ ഇടിച്ചുകയറുകയായിരുന്നുവെന്നു ദൃക്സാക്ഷികൾ പറഞ്ഞു.
വ്യാഴാഴ്ച മാങ്ങാനം സെന്‍റ് പീറ്റേഴ്സ്‌ മർത്തോമ്മാ പള്ളിയിൽ മകൻ സാമുവേലിന്‍റെ വിവാഹമായിരുന്നു. അതിൽ പങ്കെടുത്ത്‌ ഇന്നലെ രാവിലെ ഫിലിപ്പും സാറാമ്മയും വേലിക്കാട്ടെ വീട്ടിലേക്കുവരുമ്പോഴാണ്‌ അപകടം. തിങ്കളാഴ്ച ഉച്ചയ്ക്കു മെയിലമ്പുള്ളി ഗാലക്സി ഓഡിറ്റോറിയത്തിൽ വിവാഹ റിസപ്ഷനും ഒരുക്കിയിരുന്നു.
മൃതദേഹം പാലക്കാട്‌ ജില്ലാ ആശുപത്രി മോർച്ചറിയിൽ. പോസ്റ്റ്‌മോർട്ടത്തിനുശേഷം ഇന്ന് ഉച്ചയ്ക്കുശേഷം മൃതദേഹം സംസ്കരിക്കും. മക്കൾ: സാമുവേൽ, ദിവ്യ. മരുമക്കൾ: രേഷ്മ.