ADVERTISEMENT

ADVERTISEMENT

കരിയർ ഗൈഡൻസ് ക്ലാസ് നടത്തി

പിറവം: സംസ്ഥാന സർക്കാരിന്‍റെ ന്യൂനപക്ഷ ക്ഷേമ വകുപ്പിന്‍റെ നേതൃത്വത്തിൽ ഏകദിന സൗജന്യ വ്യക്തിത്വ വികസന കരിയർ ഗൈഡൻസ് ക്ലാസ് സംഘടിപ്പിച്ചു.

‘000000000000000000000പാസ് വേർഡ്’ എന്ന പേരിൽ പിറവം എംകഐം ഹയർ സെക്കൻഡറി സ്കൂളിൽ നടത്തിയ പരിപാടിയുടെ ഉദ്ഘാടനം അനൂപ് ജേക്കബ് എംഎൽഎ നിർവഹിച്ചു. നഗരസഭ ചെയർപേഴ്സൺ ഏലിയാമ്മ ഫിലിപ്പ് അധ്യക്ഷത വഹിച്ചു.

ഡോ. വി.എൻ. ഹസീന, സ്കൂൾ മാനേജർ ഫാ. മാത്യു വാതക്കാട്ടേൽ, പ്രിൻസിപ്പൽ എ.എ. ഓനാൻ കുഞ്ഞ്, പി.എസ്. ജോബ്, സി.പി. മിനി, ഷാജി വർഗീസ് എന്നിവർ പ്രസംഗിച്ചു.

ADVERTISEMENT

മുളക്കുളത്തെ കുടിവെള്ളക്ഷാമം: പരിഹാരമാകുന്നു

പിറവം: മുളക്കുളം മേഖലയിലെ കുടിവെള്ളക്ഷാമം പരിഹരിക്കുന്നതിനായി വാട്ടർ അഥോറിറ്റിയുടെ പൈപ്പ് ലൈൻ പുനസ്ഥാപിച്ചു. പെരുവ - പിറവം - പെരുവംമൂഴി റോഡിന്‍റെ പുനരുദ്ധാരണവുമായി ബന്ധപ്പെട്ട് മുളക്കുളം കരിങ്കൽ ചിറയിൽ പുതിയ പാലം നിർമാണം നടക്കുന്നതിന്‍റെ ഭാഗമായി മുളക്കുളം മേഖലയിലേക്കുള്ള പൈപ്പ് ലൈൻ വിച്ഛേദിച്ചതിനാൽ ഏതാനും മാസങ്ങളായി മുളക്കുളം മേഖലയിൽ വ്യാപകമായി കുടിവെള്ള പ്രതിസന്ധി രൂക്ഷമായിരുന്നു. ഉഴത്തുമലകാവ്, കൊച്ചു പറന്പ്, മുളക്കുളം പള്ളിപ്പടി, വടക്കേക്കര പ്രദേശങ്ങൾ അടക്കമുള്ള പ്രദേശങ്ങളിൽ കുടിവെള്ളം ഒന്നിടവിട്ടാണ് കിട്ടിക്കൊണ്ടിരുന്നത്. ഈ മേഖലയിലെ കുടിവെള്ളക്ഷാമം പരിഹരിക്കുന്നതിനായി നഗരസഭ പത്തുലക്ഷം രൂപ അനുവദിക്കുകയായിരുന്നു. നഗരസഭാ ചെയർപേഴ്സണ്‍ അഡ്വ. ജൂലി സാബു നിർമാണോദ്ഘാടനം നിർവഹിച്ചു. സ്ഥിരം സമിതി അധ്യക്ഷൻ അഡ്വ. ബിമൽ ചന്ദ്രൻ അധ്യക്ഷത വഹിച്ചു. കൗണ്‍സിലർമാരായ പ്രശാന്ത് മന്പുറത്ത്, ഡോ. അജേഷ് മനോഹർ, പി. ഗിരീഷ് കുമാർ, ജല അഥോറിറ്റി എഇ ഷഹാന എന്നിവർ പ്രസംഗിച്ചു. 1500 പേർ പങ്കെടുക്കും പിറവം: കോട്ടയത്തു ഇന്ന് നടക്കുന്ന കേരളാ കോണ്‍ഗ്രസ് (ജേക്കബ്) സംസ്ഥാന സമ്മേളനത്തിന് 1500 പ്രവർത്തകർ പങ്കെടുക്കുമെന്ന് ഭാരവാഹികൾ അറിയിച്ചു. ഇതോടനുബന്ധിച്ച് ചേർന്ന പാർട്ടി പിറവം നിയോജകമണ്ഡലം മണ്ഡലം യോഗം അനുപ് ജേക്കബ് എംഎൽഎ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് സുനിൽ ഇടപ്പാലക്കാട്ട് അധ്യക്ഷത വഹിച്ചു.

അവാർഡുകൾ കർഷകരുടെ ആത്മവിശ്വാസം വർധിപ്പിക്കും: മന്ത്രി പി. പ്രസാദ്

മൂവാറ്റുപുഴ : കാർഷിക മേഖലയിൽ വ്യത്യസ്തമായ പ്രവർത്തനങ്ങൾ നടത്തുന്നവർക്ക് നൽകുന്ന അവാർഡുകൾ അവരുടെ തുടർന്നുള്ള പ്രവർത്തനങ്ങൾക്ക് ആത്മവിശ്വാസം വർധിപ്പിക്കുമെന്ന് മന്ത്രി പി. പ്രസാദ്. മൂവാറ്റുപുഴ ഇഇസി മാർക്കറ്റിൽ നടക്കുന്ന കാർഷീകോത്സവത്തോടനുബന്ധിച്ച് നടന്ന കാർഷക അവാർഡുകൾ വിതരണം ചെയ്യുകയായിരുന്നു മന്ത്രി. മനുഷ്യരാശിക്ക് മുഴുവനായും നടക്കുന്ന പ്രക്രിയയാണ് കൃഷി. കൃഷിയുടെ പ്രാധാന്യം ഉൾക്കൊണ്ട് തന്നെ ഭക്ഷിക്കുന്നവർ എല്ലാം കൃഷിയുടെ ആനുകുല്യം പറ്റുന്നവരാണന്നും മന്ത്രി കൂട്ടിച്ചേർത്തു. കാർഷീക മേഖലയിൽ വിവിധ വിഭാഗങ്ങളിൽ മികവ് തെളിയിച്ചവരെയാണ് ആദരിച്ചത്. കാർഷിക മേഖലയിലെ വിവിധ വിഷയങ്ങളിൽ മികച്ച റിപ്പോർട്ടർക്കുള്ള മാധ്യമ അവാർഡ് കെ.എം. ഫൈസലിനും, മികച്ച കർഷകനുള്ള അവാർഡ് പോത്തനാംമുഴിയിൽ ജോർജ് പി. ജോസിനും, രണ്ടാം സ്ഥാനം പായിക്കാട്ട് ജോർജ് ജോസഫിനും, മൂന്നാം സ്ഥാനം റാത്തപ്പിള്ളിൽ ലാൽ ജേക്കബിനും ലഭിച്ചു. മികച്ച കർഷകർക്കുള്ള അവാർഡ് മൂത്തകുന്നേൽ ലിജി ജോസിനും, രണ്ടാം സ്ഥാനം മുണ്ടപ്ലാവുങ്ങൽ അന്നക്കുട്ടി കുര്യാക്കോസിനും, മൂന്നാം സ്ഥാനം നിറംന്പുഴ മറിയമോൾ ജോണിനും, മികച്ച കർഷക വിദ്യാർഥിയായി പറവിടകുന്നേൽ ജെറിൻ മാത്യുവിനും, മികച്ച ക്ഷീര കർഷകനായി ചിറ്റേത്ത് ഫ്രാൻസിസ് ജോർജിനും മികച്ച കർഷക സ്ഥാപനത്തിനുള്ള അവാർഡ് പണ്ടപ്പിള്ളി സ്വാശ്രയ കർഷക വിപണന സമിതിക്കും, മികച്ച സ്കൂളിനുള്ള അവാർഡ് തഴുവംകുന്ന് ഹോളി ഫാമിലി പബ്ലിക് സ്കൂളിനും, മികച്ച അഗ്രി ടെക് സ്റ്റാർട്ടപ്പിനുള്ള അവാർഡ് ജോണ്‍ മാത്യു (വടവുകോട് മുണ്ടൻചിറ ഫുഡ് പ്രൊഡക്ട്)നും ലഭിച്ചു. മികച്ച ഫോട്ടോഗ്രാഫർക്കുള്ള അവാർഡ് ദിനീഷ് കെ. സഹദേവനും, തരിശ് കൃഷി പ്രോത്സാഹനത്തിനുള്ള ജയരാജ് തൃക്കളത്തൂരിനുമാണ് മന്ത്രി പി. പ്രസാദ് അവാർഡ് സമ്മാനിച്ചത്. ചടങ്ങിൽ ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകഷ്ണൻ അധ്യക്ഷത വഹിച്ചു. മുൻ എംഎൽഎ ബാബു പോൾ, മുൻ ജില്ലാ പഞ്ചായത്ത് പ്രസിഡന്‍റ് ഉല്ലാസ് തോമസ്, ബ പ്രഫ. ജോസ് അഗസ്റ്റ്യൻ, ഷിവാഗോ തോമസ്, ബെസ്റ്റിൻ ചേറ്റൂർ, സിബിൾ സാബു എന്നിവർ പ്രസംഗിച്ചു.

ചികിത്സയ്ക്കായി ലക്ഷദ്വീപിൽനിന്നു കുട്ടിയെ കൊച്ചിയിലെത്തിച്ചു

നെടുമ്പാശേരി : ടോക്സിക് ഷോക്ക് സിൻഡ്രം ബാധിച്ച 13 വയസുള്ള കുട്ടിയെ ലക്ഷദ്വീപിൽ നിന്നും കൊച്ചിയിൽ എത്തിച്ചു.അഗത്തി വിമാനത്താവളത്തിൽ നിന്നും ഇന്ത്യൻ കോസ്റ്റ് ഗാർഡ് ആണ് ഡോർണിയർ വിമാനത്തിൽ ഈ കുട്ടിയെ കൊണ്ടുവന്നത്. കൊച്ചിയിൽ കൊണ്ടുവന്ന കുട്ടിയെ എൻക്ലേവിലേക്ക് മാറ്റി പിന്നീട് ചികിത്സയ്ക്കായി എറണാകുളം ലിസി ആശുപത്രിയിലേക്ക് കൊണ്ടുപോയി.

ശുചിമുറി മാലിന്യം റോഡിലൊഴുക്കിയ വാഹനം പിടികൂടി

ഉദയംപേരൂർ: വാഹനത്തിൽ നിന്നും ശുചിമുറി മാലിന്യം റോഡിലൊഴുകിയ സംഭവത്തിൽ ഡ്രൈവറെയും വാഹനവും ഉദയംപേരൂർ പോലീസ് പിടികൂടി. വെള്ളിയാഴ്ച പുലർച്ചെ അഞ്ചോടെയാണ് ശുചിമുറി മാലിന്യം ശേഖരിക്കുന്ന വാഹനത്തിൽ നിന്ന് മാലിന്യം വൈക്കം റോഡിലൊഴുകിയത്. പിന്നാലെയെത്തിയ വാഹന യാത്രക്കാർ സംഭവം കണ്ട് പത്താം മൈലിൽ വച്ച് വാഹനം തടഞ്ഞ് ഉദയംപേരൂർ പോലീസിനെ അറിയിക്കുകയായിരുന്നു. പോലീസ് അറിയിച്ചതനുസരിച്ച് അഗ്നിരക്ഷാസേനയെത്തി മാലിന്യം കഴുകി മാറ്റി. അറസ്റ്റ് ചെയ്ത ഡ്രൈവർ പള്ളുരുത്തി സ്വദേശി മുഹമ്മദ് ഇർഫാസ് (23) നെ പിന്നീട് സ്റ്റേഷൻ ജാമ്യത്തിൽ വിട്ടു. വാഹനം പോലീസ് കസ്റ്റഡിയിലെടുത്തു.

കൊലക്കേസ് പ്രതിയെ വെറുതെ വിട്ടു

പറവൂർ : രായമംഗലം കരിപ്പേലിപ്പടി അശ്വതി ഭവനത്തിൽ ശശി (60)യെ കൊലപ്പെടുത്തിയ കേസിലെ പ്രതി ഒഡീഷ ഉദയഗിരി സഞ്ജയ് മല്ലിക്കി (43)നെ പറവൂർ അഡീഷണൽ സെഷൻസ് കോടതി-രണ്ട് ജഡ്ജ് വി. ജ്യോതി ജീവപര്യന്തം തടവിന് ശിക്ഷിച്ചു. ഒരു ലക്ഷം രൂപ പിഴയും ഒടുക്കണം. ഈ തുക ശശിയുടെ അവകാശികൾക്ക് നൽകണം. പിഴ ഒടുക്കാതിരുന്നാൽ ആറുമാസംകൂടി കഠിന തടവ് അനുഭവിക്കണം എന്നും കോടതി വിധിച്ചു. 2019 ഒക്ടോബർ 20നാണ് കേസിന് ആസ്പദമായ സംഭവം നടന്നത്. കെട്ടിട നിർമാണ തൊഴിലാളിയായ ശശി വീട്ടുകാരുമായി തെറ്റിപ്പിരിഞ്ഞ് കുറുപ്പുംപടി ഞാളൂർ ചിറക്ക് സമീപത്തുള്ള ഞാളൂർപടി ഉണ്ണികൃഷ്ണൻ എന്നയാളുടെ ഷെഡ്ഡിലാണ് താമസിച്ചിരുന്നത്.

പിഴല റോഡ് നാടിനു സമർപ്പിച്ചു

കൊച്ചി: ജിഡയുടെ സഹായത്തോടെ 1.94 കോടി മുടക്കി നിര്‍മിച്ച പിഴല 350 മീറ്റര്‍ റോഡ് നാടിനു സമർപ്പിച്ചു. പിഴല സ്‌കൂള്‍ ഗ്രൗണ്ടില്‍ നടന്ന ചടങ്ങ് മന്ത്രി എം.ബി. രാജേഷ് ഉദ്ഘാടനം ചെയ്തു. കോക്കനട്ട് പൈലിംഗ് സാങ്കേതികവിദ്യ ഉപയോഗിച്ചാണ് പാലത്തിന്‍റെ നിര്‍മാണം പൂര്‍ത്തീകരിച്ചത്. 4500 തെങ്ങ് ഉപയോഗിച്ച് പൈലിംഗ് നടത്തിയാണ് മണ്ണ് ബലപ്പെടുത്തിയത്. തദ്ദേശ സ്വയംഭരണ വകുപ്പിന് കീഴിലുള്ള ജിഡ ആദ്യമായി ഏറ്റെടുത്ത് നടപ്പാക്കിയ പൊതുമരാമത്ത് പ്രവൃത്തി എന്ന പ്രത്യേകതയും ഈ പാലത്തിനുണ്ടെന്നും മന്ത്രി പറഞ്ഞു. പിഴല-മൂലമ്പിള്ളി പാലത്തിലേക്കുള്ള ഏക പ്രവേശന മാര്‍ഗമാണ് പിഴല 350 മീറ്റര്‍ റോഡ്. തെക്ക് കണ്ടെയ്‌നര്‍ ടെര്‍മിനല്‍ പാത(966 എ ഹൈവേ)യുമായും വടക്ക് നാഷണല്‍ ഹൈവേ 17മായും ബന്ധിപ്പിക്കുന്ന പിഴല-ചേന്നൂര്‍-ചരിയംതുരുത്ത് ഒമ്പത് മീറ്റര്‍ പ്രോജക്ടിന്‍റെ പ്രഥമ റീച്ചും ഈ റോഡാണ്. 350 മീറ്റര്‍ റോഡില്‍നിന്ന് തുടങ്ങുന്ന രണ്ടാമത്തെ റീച്ച് പിഴല റോഡാണ്. മൂന്നാം റീച്ചാണ് ചരിയം തുരുത്ത് റോഡ്. ചേന്നൂര്‍-കോതാട് പാലം, വലിയ കടമക്കുടി-ചാത്തനാട് പാലം, പിഴല-കടമക്കുടി പാലം, പിഴല-ചെറിയ കടമക്കുടി പാലം എന്നീ പാലങ്ങളില്‍ നിന്നും അനുബന്ധ റോഡുകളില്‍ നിന്നും കണ്ടെയ്‌നര്‍ ടെര്‍മിനല്‍ പാതയിലേക്കുള്ള ഏക പ്രവേശന മാര്‍ഗവും 350 മീറ്റര്‍ കണക്ടിവിറ്റി അപ്രോച്ച് റോഡാണ്. കെ.എന്‍. ഉണ്ണികൃഷ്ണന്‍ എംഎല്‍എ അധ്യക്ഷത വഹിച്ചു. ജില്ലാ കളക്ടര്‍ എന്‍.എസ്.കെ. ഉമേഷ്, മുന്‍ മന്ത്രി എസ്. ശര്‍മ, ഇടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് സരിത സനല്‍, കടമക്കുടി പഞ്ചായത്ത് പ്രസിഡന്‍റ് മേരി വിന്‍സെന്‍റ് തുടങ്ങിയവര്‍ ചടങ്ങില്‍ പങ്കെടുത്തു.

'നിധി'യെ മാതാപിതാക്കള്‍ക്ക് കൈമാറുന്നത് കൂടുതല്‍ വ്യക്തത വരുത്തിയ ശേഷം മാത്രം

കൊച്ചി: ജാര്‍ഖണ്ഡ് സിഡബ്ല്യുസി റിപ്പോര്‍ട്ട് ലഭിച്ചെങ്കിലും 'നിധി'യെ മാതാപിതാക്കള്‍ക്ക് കൈമാറുന്നത് കൂടുതല്‍ വ്യക്തത വരുത്തിയശേഷം മാത്രമായിരിക്കുമെന്ന് ചൈല്‍ഡ് വെല്‍ഫെയര്‍ കമ്മിറ്റി ചെയര്‍മാന്‍ അഡ്വ. വിന്‍സന്‍റ് ജോസഫ് പറഞ്ഞു. ജാര്‍ഖണ്ഡ് സ്വദേശികളായ മാതാപിതാക്കള്‍ കൊച്ചിയിലെ ആശുപത്രിയില്‍ ഉപേക്ഷിച്ചു പോയ നവജാത ശിശുവാണ് നിധി. കുഞ്ഞിനെ സ്വീകരിക്കാന്‍ മാതാപിതാക്കള്‍ അടുത്തയിടെ സമ്മതം അറിയിച്ചിരുന്നു. ഇതിന്‍റെ അടിസ്ഥാനത്തില്‍ മാതാപിതാക്കള്‍ക്ക് കുഞ്ഞിനെ പോറ്റാനുള്ള കഴിവുണ്ടോ എന്നതടക്കമുള്ള കാര്യങ്ങള്‍ പരിശോധിച്ച് റിപ്പോര്‍ട്ട് സമര്‍പ്പിക്കാനായി സിഡബ്ല്യുസി ജാര്‍ഖണ്ഡ് സിഡബ്ല്യുസിയോട് ആവശ്യപ്പെട്ടിരുന്നു. തുടര്‍ന്ന് ജാര്‍ഖണ്ഡ് ചൈല്‍ഡ് വെല്‍ഫെയര്‍ കമ്മിറ്റി ബുധനാഴ്ച സിഡബ്ല്യുസിക്ക് റിപ്പോര്‍ട്ട് കൈമാറി. നിധിയെ മാതാപിതാക്കള്‍ക്ക് കൈമാറാമെന്ന് റിപ്പോര്‍ട്ടില്‍ പരാമര്‍ശമുണ്ടെങ്കിലും കുഞ്ഞിനെ പോറ്റാന്‍ ഇവര്‍ക്ക് സാമ്പത്തികമായി കഴിവുണ്ടോയെന്നതില്‍ ആശയക്കുഴപ്പം തുടരുകയാണ്. റിപ്പോര്‍ട്ടില്‍ ഇതേപ്പറ്റി പരസ്പരവിരുദ്ധ പരാമര്‍ശങ്ങളുള്ളതിനാല്‍ ഹിന്ദിയിലുള്ള റിപ്പോര്‍ട്ട് പൂര്‍ണരൂപത്തില്‍ ഇംഗ്ലീഷിലേക്ക് പരിഭാഷപ്പെടുത്താന്‍ ജില്ലാ ചൈല്‍ഡ് പ്രൊട്ടക്ഷന്‍ ഓഫീസറെ ചുമതലപ്പെടുത്തിയതായി അഡ്വ. വിന്‍സന്‍റ് ജോസഫ് പറഞ്ഞു. റിപ്പോര്‍ട്ടിന്‍റെ പരിഭാഷ കിട്ടിയശേഷം പരിശോധിച്ച് അന്തിമതീരുമാനമെടുക്കും. കുഞ്ഞിനെ വിട്ടുകൊടുക്കാന്‍ തീരുമാനിച്ചാല്‍ ജാര്‍ഖണ്ഡ് സിഡബ്ല്യുസിയില്‍ ഹാജരാക്കിവേണം ദമ്പതികള്‍ക്ക് കൈമാറേണ്ടത്. പോലീസ് സംരക്ഷണയോടെ വേണം കുഞ്ഞിനെയും ദമ്പതികളെയും എത്തിക്കേണ്ടതെന്ന് ജാര്‍ഖണ്ഡ് സിഡബ്ല്യുസി നിര്‍ദേശിച്ചിട്ടുണ്ട്. ഇതിലെല്ലാം വ്യക്തത വരുത്തിയ ശേഷം മാത്രമായിരിക്കും തീരുമാനമുണ്ടാകുക. കുഞ്ഞിനെ ഏറ്റുവാങ്ങാന്‍ സന്നദ്ധതയറിച്ച് ജാര്‍ഖണ്ഡിലെ ലോഹര്‍ദഗായില്‍നിന്ന് ദമ്പതികള്‍ സിഡബ്ല്യുസിയില്‍ എത്തിയിരുന്നു. കഴിഞ്ഞ 28ന് എറണാകുളത്ത് എത്തിയ ദമ്പതികള്‍ നോര്‍ത്ത് പോലീസ് സ്‌റ്റേഷനില്‍ നടപടിക്രമങ്ങള്‍ പൂര്‍ത്തിയാക്കി നാട്ടിലേക്ക് മടങ്ങി. ജനുവരിയിലാണ് പൂര്‍ണ വളര്‍ച്ചയെത്താത്ത കുഞ്ഞിനെ കൊച്ചിയിലെ സ്വകാര്യആശുപത്രിയില്‍ ഉപേക്ഷിച്ച് മാതാപിതാക്കള്‍ കടന്നത്.

ഇന്‍സ്റ്റഗ്രാമില്‍ യുവതിക്ക് അശ്ലീല വീഡിയോ അയച്ച യുവാവ് കുടുങ്ങി

കൊച്ചി: ഇന്‍സ്റ്റാഗ്രാമിലൂടെ അശ്ലീല വീഡിയോ അയച്ചെന്ന യുവതിയുടെ പരാതിയില്‍ യുവാവ് അറസ്റ്റിലായി. ബംഗളൂരുവില്‍ ബിരുദ വിദ്യാര്‍ഥിയായ കോഴിക്കോട് സ്വദേശി സൗഗന്ധ്(22) ആണ് സൈബര്‍ പോലീസിന്‍റെ പിടിയിലായത്. തൃപ്പൂണിത്തുറ സ്വദേശിനിയായ മോഡലിന്‍റെ പരാതിയിലാണ് നടപടി. സ്ത്രീത്വത്തെ അപമാനിക്കല്‍, ലൈംഗികാധിക്ഷേപം എന്നീ വകുപ്പുകളും ഐടി ആക്ടുമാണ് പ്രതിക്കെതിരെ ചുമത്തിയിട്ടുള്ളത്. മോഡലായ യുവതിയുമായി ഇന്‍സ്റ്റഗ്രാം വഴിയാണ് സൗഗന്ധ് പരിചയപ്പെട്ടത്. ബിസിനസ് സംബന്ധമായ ആവശ്യങ്ങള്‍ക്ക് സഹകരിക്കുന്നതിന് താത്പര്യമുണ്ടെന്ന് ഇയാള്‍ യുവതിയെ അറിയിച്ചു. തുടര്‍ന്ന് അശ്ലീല ഫോട്ടോയും വീഡിയോയും യുവതിക്ക് അയച്ചുകൊടുത്തു. ഇത്തരത്തില്‍ പല തവണ വീഡിയോ അയച്ചു കൊടുത്തതോടെ യുവതി കാക്കനാട് സൈബര്‍ പോലീസില്‍ പരാതി നല്‍കുകയായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

ഫോട്ടോ മോർഫ് ചെയ്ത് പ്രചരിപ്പിച്ച യുവാവ് അറസ്റ്റിൽ

ആലുവ: സ്ത്രീകളുടെ ഫോട്ടോ മോർഫ് ചെയ്ത് പ്രചരിപ്പിച്ച യുവാവിനെ എടത്തല പോലീസ് അറസ്റ്റ് ചെയ്തു. എടത്തല പുഷ്പനഗർ സ്വദേശിയാണ് അറസ്റ്റിലായത്. അടുത്ത ബന്ധുവായ സ്ത്രീയുടെയും സമീപവാസികളുടെയും ചിത്രങ്ങൾ ഫേസ് ബുക്കിൽ നിന്ന് എടുത്ത ശേഷം നഗ്ന ചിത്രങ്ങളുടെ തലയ്ക്ക് പകരം വെട്ടിച്ചേർത്ത് പ്രചരിപ്പിക്കുകയായിരുന്നു. പ്രതിയുടെ മൊബൈൽ ഫോണിൽ നിന്നും അശ്ളീല ചിത്രങ്ങൾ, മോർഫ് ചെയ്ത ചിത്രങ്ങൾ എന്നിവ കണ്ടെത്തിയിട്ടുണ്ട്.

എംഡിഎംഎയുമായി യുവാക്കള്‍ പിടിയില്‍

കൊച്ചി: എംഡിഎംഎയും കഞ്ചാവുമായി രണ്ടു യുവാക്കള്‍ പോലീസിന്‍റെ പിടിയിലായി. തേവര വാട്ടര്‍ടാങ്ക് റോട് കാനാട്ട് മനോജ് കുമാര്‍ (രാജീവ് -36), ചിലവന്നൂര്‍ പണ്ടാരച്ചിറ റോഡ് സെന്‍റ് സെബാസ്റ്റ്യന്‍ റോഡിന് സമീപം മാളിയേക്കല്‍ എം.എസ്. നിഖില്‍ (അപ്പു-29) എന്നിവരെയാണ് എറണാകുളം സൗത്ത് പോലീസ് അറസ്റ്റ് ചെയ്തത്. രഹസ്യവിവരം ലഭിച്ചതിന്‍റെ അടിസ്ഥാത്തില്‍ നടത്തിയ അന്വേഷണത്തില്‍ കടവന്ത്ര കരിംപുറത്ത് റോഡ് ഭാഗത്ത് നിന്നാണ് പ്രതികളെ കസ്റ്റഡിയിലെടുത്തത്. ഇവരുടെ പക്കൽനിന്ന് 4.23 ഗ്രാം എംഡിഎംഎയും 1.70 ഗ്രാം കഞ്ചാവും പിടിച്ചെടുത്തു.

വീട്ടമ്മയെ ഇഷ്ടികയ്ക്ക് ഇടിച്ച പ്രതി അറസ്റ്റിൽ

പള്ളുരുത്തി: ഇടക്കൊച്ചിയിൽ വീട്ടമ്മയെ ഇഷ്ടിക കൊണ്ടിടിച്ച് പരിക്കേൽപ്പിച്ച സംഭവത്തിൽ പ്രതി അറസ്റ്റിൽ. പള്ളുരുത്തി തോടിയിൽ വീട്ടിൽ പ്രദീപ് ആണ്‌ പോലീസ് പിടിയിലായത്. ഇടക്കൊച്ചി സെന്‍റ് ലോറൻസ് പള്ളിക്ക് സമീപം കൈതവളപ്പിൽ ലൈനിൽ മരോട്ടിപ്പറമ്പിൽ ഓമന പ്രഭാകരനാണ് (65) ഇഷ്ടിക കൊണ്ടുള്ള ഇടിയേറ്റ് ചെവിക്ക് പരിക്കേറ്റത്. ഇവർക്ക് കേൾവിക്ക് തകരാർ സംഭവിച്ചിട്ടുണ്ട്. കഴിഞ്ഞ ചൊവ്വാഴ്ച ഉച്ചയ്ക്ക് 12 ഓടെയാണ് സംഭവം. വീട്ടിൽ കിടന്നുറങ്ങുകയായിരുന്ന ഓമനയെ അടുക്കള വഴി എത്തിയ പ്രദീപ് ആക്രമിക്കുകയായിരുന്നു. ആക്രമണത്തിനുശേഷം രണ്ടായി പൊട്ടിയ ഇഷ്ടിക മുറ്റത്ത് ഉപേക്ഷിച്ച് അക്രമി കടന്നുകളഞ്ഞു. പ്രതി ലഹരിക്ക് അടിമയാണെന്ന് പോലീസ് പറഞ്ഞു. പള്ളുരുത്തി എസ്എച്ച്ഒ മുഹമ്മദ് നിസാറിന്‍റെ നേതൃത്വത്തിൽ പ്രൊബേഷൻ എസ്ഐ അശ്വിൻ ബിനു, സിപിഒമാരായ സി.കെ. അനീഷ്, കെ.എസ്. ബിബിൻ, കെ.എ. സുഭാഷ് എന്നിവരടങ്ങുന്ന സംഘമാണ് എറണാകുളം നോർത്ത് ഭാഗത്തുനിന്ന് പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

യുവാവിന്‍റെ ആഭരണം പിടിച്ചുപറിച്ചവർ പിടിയില്‍

കൊച്ചി: യുവാവിന്‍റെ സ്വര്‍ണാഭരണങ്ങള്‍ പിടിച്ചുപറിച്ച കേസില്‍ രണ്ടുപേര്‍ പിടിയില്‍. മട്ടാഞ്ചേരി കപ്പലണ്ടിമുക്ക് കടുക്കാതി ഹൗസില്‍ സലീം ബീരാന്‍(ബണ്ടി ചോര്‍-55), തോപ്പുംപടി വെസ്റ്റ് കരുവേലിപ്പടി അരക്കാപറമ്പില്‍ കുഞ്ഞുമോന്‍(57) എന്നിവരെയാണ് ഫോര്‍ട്ടുകൊച്ചി പോലീസ് അറസ്റ്റു ചെയ്തതത്. കഴിഞ്ഞ 20നായിരുന്നു കേസിനാസ്പദമായ സംഭവം. മാന്ത്ര പാലത്തിനു സമീപം റോഡരികില്‍ ഇരുന്നു മയങ്ങുകയായിരുന്ന യുവാവിന്‍റെ കൈയില്‍ നിന്നും വിവാഹമോതിരവും മറ്റൊരു മോതിരവും ബലമായി പ്രതികള്‍ പിടിച്ചുപറിക്കുകയായിരുന്നു. തടയാന്‍ ശ്രമിച്ച യുവാവിനെ തള്ളിയിട്ട് പരിക്കേല്‍പ്പിച്ച ശേഷം പ്രതികള്‍ സ്‌കൂട്ടറില്‍ കടന്നുകളഞ്ഞു. യുവാവ് നല്‍കിയ പരാതിയുടെ അടിസ്ഥാനത്തില്‍ സിസി ടിവി ദൃശ്യങ്ങളും സംശയിക്കുന്നവരുടെ ഫോണ്‍ നമ്പറുകളും കേന്ദ്രീകരിച്ചു നടത്തിയ അന്വേഷണത്തിലാണ് ഇന്നലെ പുലര്‍ച്ചെ പ്രതികളെ വീടുകളില്‍ നിന്നും അറസ്റ്റ് ചെയ്തത്. ഫോര്‍ട്ടുകൊച്ചി ഇന്‍സ്‌പെക്ടര്‍ എം.എസ്. ഫൈസലിന്റെ നേതൃത്വത്തിലുള്ള പോലീസ് സംഘമാണ് പ്രതികളെ പിടികൂടിയത്.

ചേന്ദമംഗലം കൂട്ടക്കൊല: ജിതിൻ ആശുപത്രി വിട്ടു

പറവൂർ: ചേന്ദമംഗലം പേരേപ്പാടത്ത് ലഹരിക്ക് അടിമയായ കൊടും ക്രിമിനലിന്‍റെ ആക്രമണത്തിൽ ഗുരുതരമായി പരിക്കേറ്റ് ആസ്റ്റർ മെഡിസിറ്റിയിൽ മാസങ്ങളോളം ചികിത്സയിലായിരുന്ന ജിതിൻ ഇന്നലെ ആശുപത്രി വിട്ടു. അക്രമി ജിതിന്‍റെ ഭാര്യ വിനീഷയെയും മാതാപിതാക്കളെയും കൊലപ്പെടുത്തി. ജിതിനും രണ്ടു പെൺമക്കളും മാത്രമാണ് ആ കുടുംബത്തിലുള്ളത്. ജിതിന്‍റെ ചികിത്സയ്ക്ക് നേതൃത്വം നൽകിയ ആസ്റ്റർ മെഡിസിറ്റി ആശുപത്രിക്കും ഡോക്ടർമാരായ സക്കറിയ ടി സക്കറിയ, കെ. മാത്യു , അനൂപ് തോമസ്, രാം കുമാർ, മറ്റ് മെഡിക്കൽ ടീം അടക്കമുള്ളവർക്ക് പ്രതിപക്ഷ നേതാവ് നന്ദി രേഖപ്പെടുത്തി.

അപ്പാർട്ട്മെന്‍റിൽ നിന്ന് യുവാവിനെ തട്ടിക്കൊണ്ടുപോയ ഒരാൾകൂടി അറസ്റ്റിൽ

കളമശേരി: കൊച്ചിൻ യൂണിവേഴ്സിറ്റിക്കു സമീപത്തെ അപ്പാർട്ട്മെന്‍റിൽനിന്ന്, യുവാവിനെ തട്ടിക്കൊണ്ടുപോയ കുൽപ്പണ മാഫിയ സംഘത്തിലെ ഒരാളെകൂടി പോലീസ് പിടികൂടി. കോഴിക്കോട്, പേരാമ്പ്ര നൊച്ചാട് തെരേമ്മൽ വീട്ടിൽ ഹാരിസിനെയാണ് (39) പേരാമ്പ്രയിൽ വച്ച് കോഴിക്കോട് റൂറൽ പോലീസിന്‍റെ സഹായത്തോടെ കളമശേരി പോലീസ് പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. മേപ്പയ്യൂർ ഇടയിലാട്ട് വീട്ടിൽ സൗരവിനെയാണ് ( 22) കഴിഞ്ഞ മാസം 30 ന് തട്ടിക്കൊണ്ടുപോയത്. അഞ്ചു ലക്ഷം രൂപ മോചനദ്രവ്യം ആവശ്യപ്പെട്ട് തടവിൽ പാർപ്പിച്ചിരുന്ന സൗരവിനെ കഴിഞ്ഞ വെള്ളിയാഴ്ച പോലീസ് മോചിപ്പിച്ചിരുന്നു. കുഴൽപ്പണ മാഫിയയുമായി ബന്ധമുള്ളയാളും മോചനദ്രവ്യം കൈപ്പറ്റാനായി എത്തിയ ഈ കേസിലെ പ്രതിയുമായ കോഴിക്കോട് പേരാമ്പ്ര പെരിഞ്ചേരി വീട്ടിൽ ഹാഷിറിനെ (21), സൗരവിനെ മോചിപ്പിച്ച ദിവസം തന്നെ കളമശേരി പോലീസ് മേപ്പയ്യൂരിൽ നിന്ന് പിടികൂടിയിരുന്നു. ഇയാൾ നിലവിൽ റിമാൻഡിലാണ്. കോഴിക്കോട് ജില്ലയുടെ വിവിധ ഭാഗങ്ങളിൽ കളമശേരി പോലീസ് നടത്തിയ വിശദമായ അന്വേഷണത്തിൽ ഓൺലൈൻ തട്ടിപ്പ് സംഘവും കുഴൽപ്പണ മാഫിയയുമാണ് തട്ടിക്കൊണ്ടുപോകലിന് പിന്നിലെന്ന് വിവരംലഭിച്ചിട്ടുണ്ട്. കളമശേരി ഇൻസ്പെക്ടർ എം.ബി. ലത്തീഫിന്‍റെ നേതൃത്വത്തിൽ മറ്റു സംസ്ഥാനങ്ങളിലേക്കും അന്വേഷണം വ്യാപിപ്പിച്ചിട്ടുണ്ട്.

വന്ധ്യംകരണ സംവിധാനങ്ങള്‍ പേരിന് : നായപ്പേടിയില്‍ ജില്ല

കൊച്ചി: തെരുവുനായ ആക്രമണം തുടരുമ്പോഴും ജില്ലയിലെ എബിസി സെന്‍ററുകളുടെ പ്രവര്‍ത്തനം അവതാളത്തില്‍. മുളന്തുരുത്തി, വടവുകോട്, ബ്രഹ്മപുരം, തൃപ്പൂണിത്തുറ എന്നിവിടങ്ങളിലാണ് എബിസി സെന്‍ററുകള്‍. എന്നാല്‍ ഇവയില്‍ ബ്രഹ്മപുരത്തെ എബിസി സെന്‍റര്‍ മാത്രമാണ് നിലവില്‍ പ്രവര്‍ത്തിക്കുന്നത്. അതിനിടെ നായ പിടിത്തക്കാരുടെ കുറവ് വന്ധ്യംകരണം നടത്തുന്ന നടപടികളെയും പ്രതികൂലമായി ബാധിച്ചിട്ടുണ്ട്. കഴിഞ്ഞ ആറു ദിവസത്തിനിടെ കൊച്ചിയില്‍ മാത്രം ആറു പേര്‍ക്കാണ് തെരുവുനായ ആക്രമണം നേരിട്ടത്. ഇതില്‍ ഒരു നായയ്ക്ക് പേവിഷബാധ സ്ഥിരീകരിച്ചിരുന്നു. ഇതിന്‍റെ ആക്രമണത്തില്‍ പരിക്കേറ്റ കുട്ടിക്ക് വാക്‌സിന്‍ നല്‍കിയിരുന്നു. പേ വിഷബാധയുള്ള പട്ടിയുടെ കടിയേറ്റ തെരുവുനായ്ക്കളെ ബ്രഹ്മപുരത്തെ എബിസി സെന്‍ററില്‍ എത്തിച്ച് ചികിത്സ നല്‍കിയിട്ടുണ്ട്. കലൂര്‍ ആസാദ് റോഡില്‍ നടന്ന തെരുവുനായ ആക്രമണത്തില്‍ ഭിന്നശേഷിക്കാരനടക്കം ആറു പേര്‍ക്ക് പരിക്കേറ്റിരുന്നു. നിലവിലെ സൗകര്യങ്ങള്‍ വച്ച് ബ്രഹ്മപുരത്ത് ഒരുദിവസം നാല് നായ്ക്കളെ മാത്രമേ വന്ധ്യംകരിക്കാനാകൂ. സൗകര്യം വര്‍ധിപ്പിക്കണമെന്ന ആവശ്യം അധികൃതര്‍ അംഗീകരിച്ചില്ലെന്ന് മാത്രമല്ല, മറ്റ് മൂന്ന് എബിസി സെന്‍ററുകള്‍ കാര്യക്ഷമമാകുന്നതിനുള്ള നടപടിയും സ്വീകരിച്ചിട്ടില്ല. വന്ധ്യംകരണം നടത്തുന്നതിനായി തെരുവുനായ്ക്കളെ പിടികൂടുന്നവര്‍ക്ക് നിലവില്‍ 200 രൂപയാണ് ദിവസക്കൂലി. ഇത് തൊഴിലാളികളുടെ കുറവിന് കാരണമായിട്ടുണ്ടെന്നാണ് വിലയിരുത്തല്‍. കൊച്ചി നഗരത്തിലെ പൊതുയിടങ്ങളിലടക്കം തെരുവുനായ ശല്യം രൂക്ഷമായതോടെ പകല്‍ സമയങ്ങളിലും രാത്രികാലങ്ങളിലും ഇരുചക്ര വാഹനയാത്രയും കാല്‍നട യാത്രയും ദുഷ്‌കരമായിരിക്കുകയാണ്. കഴിഞ്ഞ വര്‍ഷം ജില്ലയില്‍ 32,086 പേര്‍ക്കാണ് നായ തെരുവുനായ്ക്കളുടെ കടിയേറ്റത്. സംസ്ഥാനത്ത് തന്നെ ഏറ്റവുമധികം കേസുകള്‍ റിപ്പോര്‍ട്ട് ചെയ്ത മൂന്ന് ജില്ലകളില്‍ ഒന്ന് എറണാകുളം ആയിരുന്നു. ഈ കാലയളവില്‍ സംസ്ഥാനത്താകെ 3,16,793 പേരാണ് തെരുവുനായ ആക്രമണത്തെത്തുടര്‍ന്ന് ചികിത്സ തേടിയത്.

ഹയ് ലൈഫ് എക്‌സിബിഷന്‍ ഇന്ന് സമാപിക്കും

കൊച്ചി: ഇന്ത്യയിലെ ഏറ്റവും വലിയ ഫാഷന്‍ എക്‌സിബിഷന്‍ ആയ ഹയ് ലൈഫ് എക്‌സിബിഷന്‍ ഇന്ന് സമാപിക്കും. പനമ്പിള്ളി നഗറിലെ ദി അവന്യൂ സെന്‍റര്‍ ഹോട്ടലില്‍ നടക്കുന്ന എക്‌സിബിഷനില്‍ ഇത്തവണ വസന്തകാല ശേഖരത്തില്‍ നിന്ന് പ്രചോദനം ഉള്‍ക്കൊണ്ട കളക്ഷനുകളാണ് ഉള്‍പ്പെടുത്തിയിരിക്കുന്നത്. സ്വര്‍ണം, പാദരക്ഷ, ബെഡ് ലിനന്‍, നെയില്‍ ആര്‍ട്ട്, ലെഹങ്ക, വജ്രം, ബാഗുകൾ, സ്‌കിന്‍ കെയര്‍, കസ്റ്റം മെയ്ഡ്, സില്‍വര്‍, അരക്കെട്ട്, റഗ്ഗുകളും കാര്‍പെറ്റും, ഫെയ്‌സ് കെയര്‍, പ്രെറ്റ് കോച്ചര്‍, വിലയേറിയ കല്ലുകള്‍, ഹെയര്‍ ആക്‌സസറികള്‍, ഫര്‍ണീച്ചര്‍, ഹെയര്‍ കെയര്‍, ഡിസൈനര്‍ സ്യൂട്ടുകള്‍, സെമി പ്രഷ്യസ്, മണ്‍പാത്രങ്ങള്‍, കൈകൊണ്ട് നിര്‍മിച്ച സോപ്പുകള്‍, കോസ്റ്റ്യൂം, പെയിന്‍റിംഗുകള്‍, അരോമ കളക്ഷനുകള്‍, ചുവര്‍ച്ചിത്രങ്ങള്‍, സ്പാ അവശ്യവസ്തുക്കള്‍, ഡിസൈനര്‍ സാരികള്‍, പാര്‍ട്ടി വെയര്‍, ഗിഫ്റ്റിംഗ്, പുരുഷന്മാരുടെ എത്‌നിക് വെയര്‍, കുട്ടികളുടെ വെയര്‍ എന്നിവ ഒരുക്കിയിട്ടുണ്ട്.

കൂട്ടമായി എത്തിയ കാട്ടുപന്നികൾ സ്കൂട്ടറിൽ ഇടിച്ച് ദമ്പതികൾക്ക് പരിക്ക്

കാലടി: കാലടി പ്ലാന്‍റേഷൻ കല്ലാല എസ്റ്റേറ്റ് 14-ാം ബ്ലോക്കിൽ കാട്ടുപന്നിയുടെ ആക്രമണത്തിൽ ദമ്പതികൾക്ക് ഗുരുതര പരിക്ക്. ചുള്ളി എരപ്പ് ചീനംചിറ സ്വദേശികളായ കേക്കാടത്ത് വീട്ടിൽ കുഞ്ഞുമോൻ, ഭാര്യ സുമ എന്നിവർക്കാണ് പരിക്കേറ്റത്. ഇന്നലെ പുലർച്ചെ 6.15 ഓടെയായിരുന്നു സംഭവം. ഭാര്യ സുമയെ എസ്റ്റേറ്റിൽ ജോലിക്ക് കൊണ്ടുപോകുന്നതിനിടെ ഇവർ സഞ്ചരിച്ചിരുന്ന സ്കൂട്ടറിൽ കൂട്ടമായി എത്തിയ കാട്ടുപന്നികൾ വന്ന് ഇടിക്കുകയായിരുന്നു. ഇടിയുടെ ആഘാതത്തിൽ റോഡിലേക്ക് തെറിച്ചുവീണ് കുഞ്ഞുമോനും സുമയ്ക്കും ഗുരുതരമായി പരിക്കേറ്റു. കുഞ്ഞുമോന് തലയ്ക്കും കൈകാലുകൾക്കും ഗുരുതരമായി പരിക്കുണ്ട്. ഇവരെ അങ്കമാലിയിലെ സ്വകാര്യ ആശുപത്രിയിൽ പ്രവേശിപ്പിച്ചു. തലയ്ക്ക് ഗുരുതരമായി പരിക്കേറ്റ കുഞ്ഞുമോനെ പ്ലാസ്റ്റിക് സർജറിക്ക് വിധേയമാക്കി. ഈ മേഖലയിൽ കാട്ടാനകളുടെയും വന്യമൃഗങ്ങളുടെയും ആക്രമണം പതിവാണ്. ഇതിനെതിരെ ശക്തമായ നടപടികൾ സ്വീകരിക്കണമെന്ന് പ്രദേശവാസികൾ ആവശ്യപ്പെട്ടു.

കണ്ണീരിലെഴുതി, അച്ഛന്‍റെ മോഹം സഫലമാക്കി ദുർഗ

കാലടി: അച്ഛന്‍റെയും തന്‍റെ കൊച്ചു സഹോദരന്‍റെയും വിയോഗത്തിന്‍റെ തീരാവേദന ഉള്ളിലൊതുക്കി എസ്എസ്എൽസി പരീക്ഷ എഴുതിയ ദുർഗയ്ക്ക് ഫുൾ എ പ്ലസിന്‍റെ വിജയമാധുര്യം. മലയാറ്റൂർ മധുരിമ കവലയ്ക്ക് സമീപം താമസിക്കുന്ന നെടുവേലി ഗംഗയുടെ മകൾ ദുർഗ ഗംഗയാണ് അച്ഛനും സഹോദരനും അപകടത്തിൽ മരിച്ചതിന്‍റെ നൊന്പരം പേറി, എസ്എസ്എൽസി എഴുതി ഉന്നത വിജയം കരസ്ഥമാക്കിയത്. ദുർഗയുടെ പരീക്ഷാ ദിവസങ്ങളിലാണ് ഗംഗയും മകനും പെരിയാറിൽ മുങ്ങിമരിച്ചത്. മലയാറ്റൂർ സെന്‍റ് തോമസ് ഹൈസ്കൂളിലെ അധ്യാപകരുടെയും കുടുംബാംഗങ്ങളുടെയും പ്രയത്നത്തിന്‍റെ ഫലമായാണ് അച്ഛന്‍റെ വലിയ പ്രതീക്ഷയായിരുന്ന ദുർഗയെ പരീക്ഷാ ഹാളിൽ എത്തിക്കാനായത്. ദുർഗ, സകല സങ്കടങ്ങളും മനസിലൊതുക്കി, പരീക്ഷയെഴുതുകയും അച്ഛന്‍റെ പ്രതീക്ഷ സഫലമാക്കുകയും ചെയ്തു.

എസ്എസ്എല്‍സി : ജില്ലയില്‍ 99.76% വിജയം

270 സ്‌കൂളുകള്‍ക്ക് നൂറുശതമാനം വിജയം 45,317 വിദ്യാര്‍ഥികള്‍ എല്ലാ വിഷയങ്ങള്‍ക്കും എ പ്ലസ് നേടി കൊച്ചി: എസ്എസ്എല്‍സി പരീക്ഷയില്‍ 99.76 ശതമാനം വിജയവുമായി ജില്ല. കഴിഞ്ഞ വര്‍ഷത്തെ അപേക്ഷിച്ച് വിജയശതമാനത്തില്‍ നേരിയ കുറവ് സംഭവിച്ചെങ്കിലും, കണ്ണൂരിനും കോട്ടയത്തിനും പിന്നിലായി സംസ്ഥാനതലത്തില്‍ തുടര്‍ച്ചയായ രണ്ടാം വര്‍ഷവും ജില്ല വിജയ ശതമാനത്തില്‍ മൂന്നാം സ്ഥാനത്തെത്തി. കഴിഞ്ഞ വര്‍ഷം 99.86 ആയിരുന്നു വിജയ ശതമാനം ജില്ലയില്‍ ഈ വര്‍ഷം 32,868 കുട്ടികള്‍ പരീക്ഷയെഴുതി. 32,789 പേര്‍ ഉന്നത പഠനത്തിന് യോഗ്യത നേടി. കഴിഞ്ഞ തവണ 32,216 പേര്‍ക്കായിരുന്നു ഉന്നത വിദ്യാഭ്യാസ യോഗ്യത. 79 പേരാണ് ഇത്തവണ ഉപരിപഠനത്തിനുള്ള യോഗ്യത നേടാതെ പോയത്. എല്ലാ വിഷയങ്ങള്‍ക്കും എ പ്ലസ് നേടിയവരുടെ എണ്ണത്തിലും ഇത്തവണ കുറവുണ്ടായി. 5,317 പേര്‍ക്കാണ് ഇത്തവണ എല്ലാ വിഷയങ്ങള്‍ക്കും എ പ്ലസ്. എ പ്ലസിലെ കുത്തക ഇത്തവണയും പെണ്‍കുട്ടികള്‍ നിലനിര്‍ത്തി. 3,576 പെണ്‍കുട്ടികള്‍ എല്ലാ വിഷങ്ങള്‍ക്കും എ പ്ലസ് ഗ്രേഡ് നേടി. 1,741 ആണ്‍കുട്ടികള്‍ക്ക് മാത്രമാണ് ഇത്തവണ എല്ലാ വിഷയങ്ങൾക്കും എ പ്ലസ് നേടാനായത്. നൂറുമേനിയില്‍ 270 വിദ്യാലയങ്ങള്‍ ജില്ലയില്‍ 100 ശതമാനം വിജയം നേടി 270 വിദ്യാലയങ്ങള്‍. കഴിഞ്ഞ വര്‍ഷം ഇത് 287 ആയിരുന്നു. ഇത്തവണ നൂറുശതമാനം വിജയം നേടിയതില്‍ 82 എണ്ണം സര്‍ക്കാര്‍ വിദ്യാലയങ്ങളാണ്. ബാക്കിയുള്ള 138 സ്‌കൂളുകള്‍ എയ്ഡഡും, 50 വിദ്യാലയങ്ങള്‍ അണ്‍ എയ്ഡഡ് മേഖലയിലുള്ളതുമാണ്. കടയിരുപ്പ് ഗവ. എച്ച്.എസ്എസാണ് സര്‍ക്കാര്‍ സ്‌കൂളുകളില്‍ കൂടുതല്‍ പേരെ പരീക്ഷയ്ക്കിരുത്തി എല്ലാവരെയും വിജയിപ്പിച്ചത് (256). നൂറു ശതമാനം പട്ടികയില്‍ സര്‍ക്കാര്‍ സ്‌കൂളുകളില്‍ ആകെ എട്ട് സ്‌കൂളുകളൊഴിച്ച് ബാക്കി സ്‌കൂളുകളെല്ലാം 2024ലെ നേട്ടം ആവര്‍ത്തിച്ചു. എ പ്ലസ് ആലുവ ഏറ്റവും കൂടുതല്‍ വിദ്യാര്‍ഥികളെ പരീക്ഷക്കിരുത്തിയ ആലുവ വിദ്യാഭ്യാസ ജില്ല 99.78 ശതമാനം വിജയം നേടി. പരീക്ഷ എഴുതിയ 12,557 പേരില്‍ 12,530 പേരെയും വിജയിപ്പിച്ചു. ഏറ്റവും കൂടുതല്‍ എ പ്ലസുകാരെന്ന നേട്ടം ഇത്തവണയും ആലുവയ്ക്കാണ്(2,199). 734 ആണ്‍കുട്ടികളും 1,465 പെണ്‍കുട്ടികളും മുഴുവന്‍ വിഷയങ്ങള്‍ക്കും എ പ്ലസ് നേടി. മൂവാറ്റുപുഴ വിദ്യാഭ്യാസ ജില്ലയില്‍ ഇത്തവണ 99.81 ശതമാനമാണ് വിജയം, കഴിഞ്ഞ വര്‍ഷത്തേക്കാള്‍ കുറവാണിത്. 3,598 പേരാണ് ഇത്തവണ പരീക്ഷയെഴുതിയത്. ഇതില്‍ 3,591 പേരും ജയിച്ചു. 690 പേര്‍ക്കാണ് എല്ലാ വിഷയങ്ങള്‍ക്കും എ പ്ലസ്. 5,569 വിദ്യാര്‍ഥികള്‍ പരീക്ഷയെഴുതിയ കോതമംഗലം വിദ്യാഭ്യാസ ജില്ലയില്‍ 5,658 പേര്‍ വിജയിച്ചു, 99.81 ശതമാനം വിജയം. മുഴുവന്‍ വിഷയങ്ങള്‍ക്കും എ പ്ലസ് നേടിയത് 885 പേര്‍. 99.69 ശതമാനം വിജയം നേടിയ എറണാകുളം വിദ്യാഭ്യാസ ജില്ലയാണ് വിജയശതമാനത്തില്‍ ഏറ്റവും പിറകില്‍. 11,044 വിദ്യാര്‍ഥികളില്‍ 11,010 പേര്‍ ഉപരിപഠനത്തിന് യോഗ്യത നേടി. 1,543 പേര്‍ എല്ലാ വിഷയങ്ങള്‍ക്കും എ പ്ലസ് നേടി. ലക്ഷദ്വീപില്‍ 95.75 ശതമാനം വിജയം ലക്ഷദ്വീപില്‍ ഇത്തവണ 95.75 ശതമാനം വിജയം. കഴിഞ്ഞ വര്‍ഷം 97.19 ആയിരുന്നു. ഒമ്പത് സ്‌കൂളുകളിലായി 447 വിദ്യാര്‍ഥികളാണ് പരീക്ഷയെഴുതിയത്. ഇതില്‍ 428 വിദ്യാര്‍ഥികള്‍ ഉപരിപഠനത്തിന് അര്‍ഹരായി. നാല് വിദ്യാര്‍ഥികള്‍ എല്ലാ വിഷയങ്ങള്‍ക്കും എ പ്ലസ് നേടി. നാല് സ്‌കൂളുകള്‍ മുഴുവന്‍ പേരെയും വിജയിപ്പിച്ചു. പട്ടികജാതി പട്ടികവര്‍ഗ വിഭാഗത്തിലും മികച്ച വിജയം പട്ടികജാതി, പട്ടികവര്‍ഗ വിഭാഗത്തിലും ജില്ല മികച്ച വിജയം നേടി. മൂവാറ്റുപുഴ വിദ്യാഭ്യാസ ജില്ലയില്‍ എസ്‌സി വിഭാഗത്തില്‍ നിന്ന് പരീക്ഷയെഴുതിയ 341 പേരും എസ്ടി വിഭാഗത്തില്‍ നിന്ന് പരീക്ഷയെഴുതിയ 23 വിജയിച്ചു. എറണാകുളത്ത് എസ്‌സി വിഭാഗത്തില്‍ 926 പേരും, എസ്ടി വിഭാഗത്തില്‍ 56 വിദ്യാര്‍ഥികളും വിജയിച്ചു. കോതമംഗലത്ത് എസ്‌സി വിഭാഗത്തില്‍ നിന്ന് 528 പേരും, എസ്ടി വിഭാഗത്തില്‍ നിന്നുള്ള 78 വിദ്യാര്‍ഥികളും, ആലുവയില്‍ എസ്‌സി വിഭാഗത്തില്‍ നിന്ന് പരീക്ഷയെഴുതിയ 1,430 കുട്ടികളില്‍ 1424 പേരും, എസ്ടി വിഭാഗത്തില്‍ നിന്ന് 51 വിദ്യാര്‍ഥികള്‍ പരീക്ഷയെഴുതിയതില്‍ 50 പേരും ഉന്നത പഠനത്തിന് അര്‍ഹത നേടി. photo : എസ്എസ്എല്‍സി പരീക്ഷയില്‍ നൂറു ശതമാനം വിജയം നേടിയ എറണാകുളം സെന്‍റ് തെരേസാസ് കോണ്‍വന്‍റ് ഗേള്‍സ് ഹൈസ്‌കൂളിലെ വിദ്യാര്‍ഥിനികള്‍ സ്‌കൂള്‍ പ്രധാനാധ്യാപികയ്ക്ക് മധുരം നല്‍കുന്നു.

എഫ്ഐടി ബാക്ക് ടു സ്കൂൾ ഷോറൂം തുറന്നു

ആലുവ: ഫോറസ്റ്റ് ഇൻഡസ്ട്രീസ് ട്രാവൻകൂർ ലിമിറ്റഡ് (എഫ്ഐടി) വൈവിധ്യവത്കരണത്തിന്‍റെ ഭാഗമായി സ്കൂൾ വിദ്യാർഥികൾക്കായി ബാക്ക് ടു സ്കൂൾ ഷോറൂം ആരംഭിച്ചു. ആദ്യവിൽപ്പന ചെയർമാൻ ആർ. അനിൽകുമാർ ചൂർണിക്കര പഞ്ചായത്ത് പ്രസിഡന്‍റ് രാജി സന്തോഷിന് നൽകി ഉദ്ഘാടനം ചെയ്തു. മാനേജിംഗ് ഡയറക്ടർ കെ. അഫ്സൽ അലി അധ്യക്ഷനായി. സീനിയർ മാനേജർ ടി.പി. ബൈജു, പി.എസ്. ഷിബു കുമാർ, രമ്യ എ. നായർ, ജസ്റ്റിൻ തോമസ് എന്നിവർ സംസാരിച്ചു. സ്കൂൾ ഫർണിച്ചറുകൾ, സ്കൂൾ ബാഗ്, നോട്ട് ബുക്ക്, കുട, ചെരിപ്പുകൾ, പഠനോപകരണങ്ങൾ എന്നിവ കമ്പനിപ്പടിയിൽ നിന്ന് മിതമായ വിലയിൽ ലഭിക്കുമെന്ന് എഫ്ഐടി അറിയിച്ചു.

എഫ്സി കാലടി ജേതാക്കൾ

നെടുമ്പാശേരി : രാസലഹരിയല്ല കായിക വിനോദമാണ് ലഹരി എന്ന സന്ദേശവുമായി സൗത്ത് അടുവാശേരി റസിഡന്‍റ്സ് അസോസിയേഷന്‍റെ(സാറ)നേതൃത്വത്തിൽ സൗത്ത് അടുവാശേരി സ്പോർട്സ് അസോസിയേഷനുമായി ചേർന്ന് സംഘടിപ്പിച്ച അഖില കേരള സെവൻസ് ഫുട്ബോൾ ടൂർണമെന്‍റിൽ ഈവനിംഗ് എഫ്സി കാലടി ജേതാക്കളായി. സഹാറ എഫ്സി പറമ്പയം റണ്ണർ അപ്പായി. വെറ്ററൻസ് വിഭാഗത്തിൽ കുറ്റിയാൽ എഫ്സി ജേതാക്കളും എയർപോർട്ട് എഫ്സി അത്താണി റണ്ണർ അപ്പുമായി. വിജയികൾക്ക് മുൻ ബ്ലോക്ക് പഞ്ചായത്തംഗം എം.എ. സുധീർ, സാറ പ്രസിഡന്‍റ് പി.ആർ. രഘുനാഥ് എന്നിവർ സമ്മാനദാനം നിർവഹിച്ചു. അഡ്വ. വി.എൻ. മോഹൻദാസ്, അഡ്വ. എസ്. സുകുമാർ, കെ.കെ. ചിന്നപ്പൻ, എം.എച്ച്. അൻസാർ, വി.എസ്. നജീബ്, അനസ് അലി, ആഷ്ക് അഷ്റഫ്, ഷിബു കുറ്റിപ്പുഴ, ഉസൈർ പാത്തലപ്പടി തുടങ്ങിയവർ സംസാരിച്ചു.

റോഡ് കൈവരി നിർമാണം പൂർത്തിയായി

പെരുമ്പാവൂര്‍: കൂവപ്പടി ബ്ലോക്ക് പഞ്ചായത്ത് വികസന ഫണ്ട് ഉപയോഗിച്ച് ഒക്കല്‍ പഞ്ചായത്ത് 16-ാം വാര്‍ഡില്‍ ശ്മശാനം ശാന്തി നിലയം റോഡ് കൈവരി നിര്‍മാണം പൂര്‍ത്തിയായി. 5,50,000 രൂപ ചെലവഴിച്ചാണ് കൈവരി നിര്‍മിച്ചത്. കൈവരിയുടെ ഉദ്ഘാടനം ബ്ലോക്ക് ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി.ജെ. ബാബു നിര്‍വഹിച്ചു. പഞ്ചായത്ത് പ്രസിഡന്‍റ് ടി.എന്‍. മിഥുന്‍ അധ്യക്ഷത വഹിച്ചു. വൈസ് പ്രസിഡന്‍റ് മിനി സാജന്‍, ബ്ലോക്ക് അംഗം എം.കെ. രാജേഷ്, പഞ്ചായത് അംഗങ്ങളായ കെ.എം. ഷിയാസ്, മനോജ് തോട്ടപ്പിള്ളി, സോളി ബെന്നി, എന്‍.ഒ. ഷൈജന്‍, സാബു മൂലന്‍, പോളി തോമസ് എന്നിവര്‍ പങ്കെടുത്തു.

മൂലമ്പിള്ളി പാക്കേജ്: കെസിവൈഎം സംവാദം നടത്തി

കൊച്ചി: കെസിവൈഎം വരാപ്പുഴ അതിരൂപതയുടെ നേതൃത്വത്തിലുള്ള സോഷ്യൽ - പൊളിറ്റിക്കൽ അക്കാദമി മൂലമ്പിള്ളി പാക്കേജുമായി ബന്ധപ്പെട്ട് സംവാദം നടത്തി. മഹാരാജാസ് കോളജ് മുൻ പ്രിൻസിപ്പൽ പ്രഫ. കെ. അരവിന്ദാക്ഷൻ ഉദ്‌ഘാടനം ചെയ്തു. അതിരൂപത പ്രസിഡന്‍റ് രാജീവ് പാട്രിക് അധ്യക്ഷത വഹിച്ചു. മൂലമ്പിള്ളി സമരത്തിന്‍റെ കോ-ഓർഡിനേഷൻ കമ്മിറ്റി ജനറൽ കൺവീനർ ഫ്രാൻസിസ് കളത്തുങ്കൽ സംവാദം നയിച്ചു. ഫാ. സെബാസ്റ്റ്യൻ കൂട്ടുങ്കൽ, അതിരൂപത ഡയറക്ടർ ഫാ. റാഫേൽ ഷിനോജ് ആറാഞ്ചേരി, ട്രഷറർ പി.ജെ. ജോയ്സൺ, മേഖലാ, യൂണിറ്റ് ഭാരവാഹികൾ എന്നിവർ പ്രസംഗിച്ചു.

എംഡിഎംഎയുമായി യുവാവ് പിടിയിൽ

മൂവാറ്റുപുഴ: എംഡിഎംഎയുമായി യുവാവ് മൂവാറ്റുപുഴ എക്സൈസ് പിടിയിൽ. കോതമംഗലം തങ്കളം സ്വദേശി ആലപ്പാട്ട് അനന്തു അജിയെയാണ് മൂവാറ്റുപുഴ എക്സൈസ് സംഘം പായിപ്രയിൽനിന്നും പിടികൂടിയത്. ലഹരി ഉപയോഗിക്കുന്ന യുവാക്കളെ കേന്ദ്രീകരിച്ച് പായിപ്ര സമഷ്ടിപ്പടിയിൽ വ്യാഴാഴ്ച പുലർച്ചെ നടത്തിയ പരിശോധനയിലാണ് 12.085 ഗ്രാം എംഡിഎംഎയുമായി പ്രതി പിടിയിലായത്.

യുവാവിനെ കാണാനില്ലെന്നു പരാതി

നെടുമ്പാശേരി: അത്താണി ശാന്തിനഗറിൽ വല്ലത്തുകാരൻ വീട്ടിൽ കുര്യാക്കോസിന്‍റെ മകൻ ജിമ്മിയെ (ജിമ്മി കുര്യാക്കോസ്) മാർച്ച് 27 മുതൽ കാണാനില്ലെന്ന് പരാതി. ഇടയ്ക്കിടെ വീട്ടിൽ നിന്ന് പോകാറുണ്ടെങ്കിലും ആഴ്ചകൾക്ക് ശേഷം മടങ്ങി വരാറുണ്ടെന്നാണ് ബന്ധുക്കൾ പറയുന്നത്. മാനസിക പ്രശ്നത്തിന് രണ്ട് വർഷമായി മരുന്നുകഴിക്കുന്നുണ്ട്. അതിനിടെ മാർച്ച് 31ന് ഡൽഹിയിലെ പഹർഗഞ്ച് എടിഎമ്മിൽ നിന്നും, ഏപ്രിൽ ഒന്നിന് സിംലയിലെ എടിഎമ്മിൽ നിന്നും പണം എടുത്തതായി പോലീസിന് വിവരം ലഭിച്ചിട്ടുണ്ട്. കുര്യാക്കോസിന്‍റെ പരാതിയെത്തുടർന്ന് നെടുമ്പാശേരി പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ജിമ്മിയെക്കുറിച്ച് വിവരം ലഭിക്കുന്നവർ 0484-2610611, 9497933048 എന്നീ ഫോൺ നമ്പറുകളിൽ അറിയിക്കണമെന്ന് നെടുമ്പാശേരി പോലീസ് അറിയിച്ചു.

കളിമൺ ശില്പ നിർമാണ ശില്പശാല

മലയാറ്റൂർ: സെന്‍റ് തോമസ് ഹയർ സെക്കൻഡറി സ്കൂളിൽ കളിമൺ ശില്പ നിർമാണ ശില്പശാല സംഘടിപ്പിച്ചു. കുട്ടികൾക്കുള്ള അവധിക്കാല കലാപരിശീലനങ്ങളുടെ ഭാഗമായി നടന്ന ശില്പശാലയിൽ ചിത്രകലാ അധ്യാപകനും കേരള ലളിതകലാ അക്കാദമി അവാർഡ് ജേതാവുമായ അഗസ്റ്റിൻ വർഗീസ് ആയിരുന്നു പരിശീലകൻ. 35ഓളം വിദ്യാർഥികൾ പങ്കെടുത്തു. സ്കൂളിലെ ചിത്രകലാ അധ്യാപകനായ സാബു തോമസ് ക്യാമ്പിന് നേതൃത്വം നൽകി. photo മലയാറ്റൂർ സെന്‍റ് തോമസ് ഹയർ സെക്കൻഡറി സ്കൂളിൽ നടന്ന കളിമൺ ശില്പ നിർമാണ ശില്പശാലയിൽ നിന്ന്.

വെക്കേഷന്‍ ക്യാമ്പും സ്‌കോളര്‍ഷിപ്പ് വിതരണവും നടത്തി

കൊച്ചി: കൊച്ചിന്‍ സോഷ്യല്‍ സര്‍വീസ് സൊസൈറ്റി (സിഎസ്എസ്എസ്)യുടെ വിദ്യാഭ്യാസ സഹായ പദ്ധതിയായ സണ്‍ഷൈന്‍ ഓണ്‍ലൂസ് ചൈല്‍ഡ് സ്‌പോണ്‍സര്‍ഷിപ്പിലെ അംഗങ്ങളായ 150 കുട്ടികള്‍ക്കായി ദ്വിദിന വെക്കേഷന്‍ ക്യാമ്പും സ്‌കോളര്‍ഷിപ്പ് വിതരണവും നടത്തി. ജൂബിലി ഹാളില്‍ നടത്തിയ ക്യാമ്പ് സൊസൈറ്റി ഡയറക്ടര്‍ റവ. ഡോ. അഗസ്റ്റിന്‍ കടേപ്പറമ്പില്‍ ഉദ്ഘാടനം ചെയ്തു. അഞ്ച് ലക്ഷം രൂപയുടെ സ്‌കോളര്‍ഷിപ്പുകള്‍ കൊച്ചി കോര്‍പറേഷന്‍ പ്രതിപക്ഷ നേതാവ് ആന്‍റണി കുരീത്തറ ചടങ്ങില്‍ വിതരണം ചെയ്തു. സിഎസ്എസ്എസ് അസിസ്റ്റന്‍റ് ഡയറക്ടര്‍ ഫാ.ജെയ്ഫിന്‍ ദാസ് കട്ടികാട്ട്, റോസ്മി അഗസ്റ്റിന്‍ എന്നിവര്‍ പ്രസംഗിച്ചു.

വൈപ്പിൻ-പള്ളിപ്പുറം സംസ്ഥാനപാതയിൽ അശാസ്ത്രീയ പരിഷ്കാരങ്ങളെന്ന്

ചെറായി: വൈപ്പിൻ - പള്ളിപ്പുറം സംസ്ഥാന പാതയിൽ നടത്തി വരുന്ന നവീകരണങ്ങൾ പലതും അപകടങ്ങൾ വർധിപ്പിക്കുന്ന അശാസ്ത്രീയ പരിഷ്കാരങ്ങളെന്ന് ആക്ഷേപം.നിലവിൽ ചെറിയ കൾവർട്ടുകൾ ഉണ്ടായിരുന്നിടത്ത് റോഡ് വീതി കൂട്ടിയെങ്കിലും കൾവർട്ടുകളുടെ വീതി കൂട്ടിയിട്ടില്ല. ഇതാകട്ടെ ഇരുചക്ര വാഹന മുൾപ്പെടെയുള്ളവക്ക് വൻ ഭീഷണിയായി മാറിയിരിക്കുകയാണ്. അയ്യമ്പള്ളി ജനത ഭാഗത്ത് ഇത്തരത്തിലുള്ള കൾവർട്ടിനെതിരെ വ്യാപക ആക്ഷേപമുയർന്നതിനെ തുടർന്ന് സ്ലാബ് സ്ഥാപിച്ച് പ്രശ്നം പരിഹരിച്ചിരുന്നു. എന്നാൽ ചെറായി ഗൗരീശ്വരം തെക്ക് ഭാഗത്താകട്ടെ സ്ലാബ് വാർക്കുന്നതിനു പകരം കനാൽ ഭാഗത്ത് റോഡിനു കുറകെ സംരക്ഷണ ഭിത്തി നിർമിക്കുകയാണ് ചെയ്തത്. ചെറിയ വളവും ഇടുങ്ങിയ റോഡും ഉള്ള ഇവിടമാകട്ടെ നേരത്തെ തന്നെ അപകട മേഖലയാണ്. റോഡ് നവീകരണം വന്നതോടെ അപകടങ്ങൾ വർധിക്കുകയും ചെയ്തിരിക്കുന്നു. ഈ സാഹചര്യത്തിൽ ഇവിടെ വീതി കൂട്ടിയിടത്ത് കനാലിനു കുറുകെ സ്ലാബ് സ്ഥാപിക്കുകയും റോഡിനു കുറുകെയുള്ള സരക്ഷണ ഭിത്തി പൊളിച്ചു മാറ്റുകയും വേണമെന്ന് സ്ഥലവാസികൾ ആവശ്യപ്പെട്ടു.

എടവനക്കാട് രണ്ടുപേർ താമസിക്കുന്ന വീട്ടിൽ കുടിവെള്ള ബിൽ 20,862 രൂപ

കൂടുതൽ വെള്ളം ഉപയോഗിക്കുന്നില്ലെന്ന് ഗൃഹനാഥൻ വൈപ്പിൻ : വല്ലപ്പോഴും കുടിവെള്ളമെത്തുന്ന എടവനക്കാട് രണ്ടു പേർ താമസിക്കുന്ന വീട്ടിൽ 20,862 രൂപയുടെ ബിൽ നൽകി വാട്ടർ അഥോറിട്ടിയുടെ പകൽക്കൊള്ള. എടവനക്കാട് സ്രാമ്പിക്കൽ സംജാതിനാണ് വാട്ടർ അഥോറിട്ടി ഇങ്ങിനെ കൊള്ളയടിക്കുന്നബിൽ നൽകിയിട്ടുള്ളത്. മാർച്ച് ഒമ്പതു മുതൽ മെയ് ഏഴു വരെയുള്ള ദ്വൈമാസ ബില്ലാണിത്. സാധാരണ രണ്ടു മാസം കൂടുമ്പോൾ 650 രൂപ മാത്രം അടവു വന്നിരുന്നിടത്താണ് ഈ ഭീമമായ തുക വന്നിട്ടുള്ളത്. ഇതിൽ ദ്വൈമാസ റീഡിംഗ് പ്രകാരം 8,874 രൂപയും ബാക്കി 11,988 രൂപ കൂടുതലായി ഉപയോഗിച്ചതിനുള്ള അഡീഷണൽ ചാർജുമാണ്. എന്നാൽ ഇങ്ങിനെയൊരു ബില്ല് വരാൻ താൻ ഇതുവരെ മിനിമത്തിൽ താഴെ അല്ലാതെ അധികമായി വെള്ളം ഉപയോഗിച്ചിട്ടില്ലെന്നാണ് ഗൃഹനാഥനാഥൻ പറയുന്നത്. വാട്ടർ അഥോറിട്ടി ഓഫീസിൽ പോയി പരാതിപ്പെട്ടപ്പോൾ മീറ്റർ പരിശോധിക്കട്ടെ എന്ന മറുപടി മാത്രമാണ് കിട്ടിയതെന്നും ഗൃഹനാഥൻ അറിയിച്ചു.

മദ്യപാനത്തിനിടെ തർക്കം; സുഹൃത്തിന്‍റെ കാൽ തല്ലിയൊടിച്ചു

ആലങ്ങാട്: സുഹൃത്തുക്കൾ തമ്മിൽ മദ്യപാനത്തിനിടെ ഉണ്ടായ വാക്കുതർക്കത്തെ തുടർന്നു സുഹൃത്തിന്‍റെ കാൽ തല്ലിയൊടിച്ചതായി പരാതി. തിരുവാലൂർ കുണ്ടേലി നാലുപറയിൽ വീട്ടിൽ ബിജു(50)വിന്‍റെ കാലാണു സുഹൃത്തായ തിരുവാലൂർ പാലക്കാപറമ്പിൽ വീട്ടിൽ സുനിൽ (54) തല്ലിയൊടിച്ചതായി പരാതിയുള്ളത്. കഴിഞ്ഞദിവസമാണു സംഭവം നടത്തത്. വീടിനു സമീപത്തെ തോട്ടിൽ ചൂണ്ടയിടാൻ പോയി വന്ന ഇരുവരും മദ്യപിച്ച ശേഷം വീടിന്‍റെ മുന്നിലിരുന്നു സംസാരിക്കുന്നതിനിടെയാണു വാക്കു തർക്കമുണ്ടായത്. തുടർന്നു സുനിൽ കമ്പിവടി കൊണ്ടു ബിജുവിന്‍റെ കാൽ അടിച്ച് ഒടിക്കുകയായിരുന്നു. ബിജുവിന്‍റെ വലതുകാൽ ഓടിയുകയും ഇടതുകാലിന്‍റെ എല്ലിനു പൊട്ടൽ സംഭവിക്കുകയും ചെയ്തു. പരിക്കേറ്റ ബിജുവിനെ ആശുപത്രിയിൽ പ്രവേശിപ്പിച്ചു. സുനിൽ ഓട്ടോ ഡ്രൈവറാണ്. പരാതിയുടെ അടിസ്ഥാനത്തിൽ തുടർന്ന് ആലങ്ങാട് പോലീസ് കേസെടുത്തു.

പോലീസ് കസ്റ്റഡിയിലുള്ള വാഹനം കടത്തിക്കൊണ്ടുപോയവർ അറസ്റ്റിൽ

അരൂർ: അനധികൃത നിലംനികത്തുമായി ബന്ധപ്പെട്ട് പോലീസ് കസ്റ്റഡിയിൽ എടുത്ത മണ്ണുമാന്തിയന്ത്രം, ടിപ്പർ ലോറികൾ എന്നിവ അർധരാത്രിയിൽ പോലീസ് സ്റ്റേഷനിൽ നിന്നും കടത്തിക്കൊണ്ട് പോയവരെ പോലീസ് കസ്റ്റഡിയിൽ എടുത്തു. സുരാജ്, ഗോഡ് വിൻ, ജോബി, ഷാഹിൻ, ജെയ്സൻ എന്നിവരെയാണ് അരൂർ പോലീസ് പിടികൂടിയത്. അരൂർ പഞ്ചായത്ത് പതിനാലാം വാർഡിലാണ്‌ അനധികൃത നിലംനികർത്ത് നടന്നത്. ഇത് ചോദ്യം ചെയ്ത് സിപിഎം വാർഡ് മെമ്പർ അമ്പിളി ഷിബു വില്ലേജ് ഓഫീസിൽ പരാതി നൽകുകയും ഇതേത്തുടർന്ന് സ്റ്റോപ്പ് മെമ്മോ നൽകുകയും ചെയ്തിരുന്നു. എന്നാൽ ഇത് മറികടന്ന് നിലം നികർത്തിയതിനെത്തുടർന്നായിരുന്നു അധികൃതർ നടപടിയെടുത്തത്.

മംഗല്യം -2025 സമൂഹ വിവാഹം നാളെ

കാലടി: തിരുവൈരാണിക്കുളം മഹാദേവ ക്ഷേത്ര ട്രസ്റ്റിന്‍റെ മംഗല്യം പദ്ധതി പ്രകാരം നിർധനരായ 10 യുവതികളുടെ വിവാഹം നാളെ നടക്കും. 2013 ൽ ആരംഭിച്ച മംഗല്യം പദ്ധതി പ്രകാരം ഇതുവരെ 121 പേരുടെ വിവാഹം നടന്നിട്ടുണ്ട്. ഈ വർഷത്തെ 10 പേരുടെ വിവാഹത്തോടെ 131 പേരുടെ മംഗല്യ സ്വപ്നം സാക്ഷാത്കരിക്കും. കേരളത്തിലെ വിവിധ ജില്ലകളിൽ നിന്നും ലഭിച്ച അപേക്ഷകരിൽ നിന്നും തെരഞ്ഞെടുത്ത 10 പേരുടെ വിവാഹമാണ് നടത്തുന്നത്. സ്വർണാഭരണങ്ങൾ , വിവാഹ വസ്ത്രങ്ങൾ മറ്റ് ചിലവുകൾ ഉൾപ്പെടെ ഒരു വധുവിന് 3,75,000 രൂപ ചെലവ് വരും. രാവിലെ 8.30 മുതൽ 9.30 വരെ ശ്രീപാർവതീദേവിയുടെ നടയിൽ താലിചാർത്തൽ ചടങ്ങിന് മേൽശാന്തി നടുവം നാരായണൻ നമ്പൂതിരി കാർമികത്വം വഹിക്കും. 10ന് തിരുവാതിര ഓഡിറ്റോറിയത്തിൽ എറണാകുളം ജില്ലാ പോലീസ് മേധാവി ഹേമലത ഉദ്ഘാടനവും, അനുഗ്രഹ പ്രഭാഷണവും നിർവഹിക്കും. ചടങ്ങിൽ അൻവർ സാദത്ത് എംഎൽഎ മുഖ്യാതിഥിയാകും. ജനപ്രതിനിധികൾ, സാമൂഹിക-സാംസ്കാരിക രാഷ്ട്രീയ പ്രതിനിധികൾ ചടങ്ങിൽ പങ്കെടുക്കും.

കുടിവെള്ള ടാങ്കുകൾ വിതരണം ചെയ്തു

ഉദയംപേരൂർ: കുടിവെള്ള ക്ഷാമം നേരിടുന്ന ഉദയംപേരൂർ പഞ്ചായത്തിൽ ഇരുപതാം വാർഡിലെ 40 കുടുംബങ്ങൾക്ക് പഞ്ചായത്തംഗം ടി.എം.നിമിൽ രാജിന്‍റെ നേതൃത്വത്തിൽ കുടിവെള്ള ടാങ്കുകൾ വിതരണം ചെയ്തു. കെ. ബാബു എംഎൽഎ വിതരണോദ്ഘാടനം നിർവഹിച്ചു. ടി.വി. ഗോപിദാസ് അധ്യക്ഷത വഹിച്ചു. ബ്ലോക്ക് പഞ്ചായത്തംഗം രാജു പി. നായർ, കോൺഗ്രസ് പാർലമെന്‍ററി പാർട്ടി നേതാവ് എം.പി.ഷൈമോൻ, വാർഡ്‌ അംഗം എം.കെ. അനിൽ കുമാർ, കെ.കെ. രമണൻ മാഷ് തുടങ്ങിയവർ പ്രസംഗിച്ചു.

തിരുനാൾ

സെന്‍റ് ഡൊമിനിക് പള്ളിയിൽ ആലുവ: സെന്‍റ് ഡൊമിനിക് പള്ളിയിൽ ഇടവക മദ്ധ്യസ്ഥനായ വിശുദ്ധ ദൊമിനിങ്കോസിന്‍റെ 157 -ാം ദർശന തിരുനാളിന് വികാരി ഫാ. ജോസഫ് കരുമത്തി കൊടിയേറ്റി. സഹവികാരി ഫാ. അതുൽ മാളിയേക്കൽ, പ്രസിഡന്‍റ് ജിജി ആന്‍റണി കരുവേലി തുടങ്ങിയവർ പങ്കെടുത്തു. എല്ലാ ദിവസവും രാവിലെ 6.30 നും വൈകുന്നേരം 5.30 നും കുർബാന. തിരുനാൾ ദിനമായ 11ന് പ്രദക്ഷിണം. 12ന് നവനാൾ പ്രാർഥന.

പള്ളിപ്പുറത്തും എടവനക്കാട്ടും വെള്ളം ശേഖരിക്കുന്നതിൽ റിസോർട്ടുകൾക്കും ഹോംസ്റ്റേകൾക്കും നിയന്ത്രണം

ചെറായി: കടുത്ത കുടിവെള്ള ക്ഷാമത്തെ തുടർന്ന് പള്ളിപ്പുറം, എടവനക്കാട് തീരമേഖലയിൽ വെള്ളം ശേഖരിക്കുന്നതിൽ റിസോർട്ടുകൾക്കും ഹോം സ്റ്റേകൾക്കും നിയന്ത്രണമേർപ്പെടുത്തുന്നു. സ്ഥലവാസികൾ കുടിവെള്ളത്തിനായി നെട്ടോട്ടമോടുന്നത് ഈ ഭാഗത്തെ സ്ഥാപനങ്ങൾ അധികമായി ജലം ഉറ്റുന്നത് കൊണ്ടാണെന്ന നിഗമനത്തിലാണ് നിയന്ത്രണം ഏർപ്പെടുത്തുന്നത്. ഈ മേഖലകളിലെ റിസോർട്ടുകൾ, ഹോട്ടലുകൾ , ഹോം സ്റ്റേകൾ, ബാറുകൾ എന്നിവയ്ക്ക് കുടിവെളളം ശേഖരിക്കുന്നതിൽ ഇന്ന് മുതലാണ് നിയന്ത്രണമെർപ്പെടുത്തുക. വൈകുന്നേരം മൂന്നു മുതൽ ആറുവരെ ഇത്തരം സ്ഥാപനങ്ങൾ സ്വയം കുടിവെള്ള വാൽവ് പൂട്ടണമെന്നാണ് ഇന്നലെ വാട്ടർ അഥോറിട്ടി അധികൃതർ വിളച്ചു ചേർത്ത റിസോർട്ട് സംഘടനാ പ്രതിനിധികളുടേയും എടവനക്കാട് , പള്ളിപ്പുറം പഞ്ചായത്ത് പ്രസിഡന്‍റുമാരുടെയും യോഗത്തിൽ എടുത്ത തീരുമാനം. നിർദേശം പാലിക്കുന്നുണ്ടോയെന്ന് കർശനമായ പരിശോധനയുണ്ടാകും. നിർദേശം ലംഘിക്കുന്നവരുടെ കണക്ഷൻ താത്കാലികമായി വിഛേദിക്കുമെന്നും അധികൃതർ യോഗത്തിൽ അറിയിച്ചു. ഒരാഴ്ചയ്ക്ക് ഇത് പരീക്ഷിക്കും. ഇതിനുശേഷവും കുടിവെള്ളക്ഷാമം തുടരുകയാണെങ്കിൽ വീണ്ടും യോഗം ചേർന്ന് കാര്യങ്ങൾ തീരുമാനിക്കാനാണ് നിർദേശം.

തൃപ്പൂണിത്തുറ മിനി സിവിൽ സ്റ്റേഷനിൽ വ്യാജ ബോംബ് ഭീഷണി

തൃപ്പൂണിത്തുറ: ബോംബ് ഭീഷണിയെ തുടർന്ന് തൃപ്പൂണിത്തുറ മിനി സിവിൽ സ്റ്റേഷനിൽ സുരക്ഷാ വിഭാഗങ്ങൾ പരിശോധന നടത്തി. ഇന്നലെ ഉച്ചകഴിഞ്ഞാണ് തൃപ്പൂണിത്തുറ മിനി സിവിൽ സ്റ്റേഷനിൽ ബോബ് പൊട്ടുമെന്ന് ഇംഗ്ലീഷിൽ എഴുതിയിരിക്കുന്ന അജ്ഞാത കത്ത് ഹിൽപാലസ് സ്റ്റേഷനിൽ ലഭിച്ചത്. സ്റ്റേഷനിൽ നിന്ന് വിവരമറിയിച്ചതിനെ തുടർന്ന് ബോബ് സ്ക്വാഡ്, ഡോഗ് സ്ക്വാഡ്, ഹിൽപാലസ് പോലീസ് എന്നിവർ സംയുക്തമായി സിവിൽ സ്റ്റേഷനിലും പരിസരത്തും പരിശോധന നടത്തിയെങ്കിലും ഒന്നും കണ്ടെത്താൻ കഴിഞ്ഞില്ല. പരിശോധന ഒരു മണിക്കൂറോളം നീണ്ടു. ബോബ് സ്ക്വാഡിന്‍റെയും ഡോഗ് സ്ക്വാഡിന്‍റെയും പരിശോധന ഇന്നും തുടരുമെന്ന് പോലീസ് പറഞ്ഞു. മോക്ഡ്രിൽ നടത്തുകയാണെന്നാണ് ജനങ്ങൾ പരിഭ്രാന്തരാകാതിരിക്കാൻ പരിശോധനയ്ക്ക് കാരണമായി പോലീസ് ആദ്യം പറഞ്ഞത്.

ഇറച്ചിക്കോഴി ഉത്പാദനച്ചെലവ് : കൂടിയെന്നു കർഷകർ

കൊച്ചി: ഇറച്ചിക്കോഴിയുടെ വർധിക്കുന്ന ഉത്പാദനച്ചെലവ് വലിയ പ്രതിസന്ധി സൃഷ്ടിക്കുന്നതായി കർഷകർ. നികുതി പരിഷ്കാരവും സർക്കാർ നിയന്ത്രണങ്ങളും ചെറുകിട സംരംഭകരെയും കർഷകരെയും പ്രതികൂലമായി ബാധിക്കുന്നുന്നുണ്ട്. നിലവിൽ ഒരു കിലോ ഉത്പാദിപ്പിക്കാൻ 98 രൂപയാണ് ചെലവ്. കഴിഞ്ഞ ഒന്പതു മാസത്തോളമായി 60-80 രൂപയാണു കിലോയ്ക്കു ഫാമിൽ ലഭിച്ചതെന്ന് കർഷകർ ചൂണ്ടിക്കാട്ടുന്നു. ഉത്പാദനച്ചെലവും നഷ്ടവും കണക്കിലെടുത്തു ചെറുകിട കർഷകർ വലിയ തോതിൽ ഈ മേഖല ഉപേക്ഷിക്കുന്നതായും കേരള ബ്രോയ്‌ലർ ഫാർമേഴ്‌സ് അസോസിയേഷൻ ഭാരവാഹികൾ ചൂണ്ടിക്കാട്ടി. കരാറടിസ്ഥാനത്തിൽ കോഴിക്കുഞ്ഞുങ്ങളെ വളർത്തി സംരംഭകർക്കു കൈമാറുന്ന ചെറുകിട കർഷകരും ഉത്പാദനച്ചെലവ് വർധിച്ചതിൽ ബുദ്ധിമുട്ടുകയാണ്. കോഴിഫാമുകളിൽ വിരിപ്പായി ഉപയോഗിക്കുന്ന ചകിരിച്ചോറിനു‌ രണ്ടു വർഷം മുന്പു ചാക്കിന് 120 രൂപ ആയിരുന്നെങ്കിൽ ഇപ്പോഴത് 240 രൂപയിലേക്ക് ഉയർന്നു. ചെലവിനനുസരിച്ചു കോഴിയുടെ റീട്ടെയിൽ വില വർധിക്കാത്തതു മൂലം സംരംഭകരും നഷ്ടത്തിലാണ്. ഇതിനിടെ കോഴിഫാമുകൾക്ക് സർക്കാർ ഒറ്റത്തവണ നികുതി ഏർപ്പെടുത്തിയതും പ്രതിസന്ധിയാകുന്നുണ്ട്. ഒറ്റത്തവണ നികുതി, ആഡംബര ലേബർ സെസ് തുടങ്ങിയവ അന്യായമായി അടിച്ചേൽപ്പിക്കുന്നത് ഒഴിവാക്കി കർഷകരെ ഈ രംഗത്തു നിലനിർത്താൻ സഹായകമായ നടപടികൾ സർക്കാർ സ്വീകരിക്കണമെന്നും കേരള ബ്രോയ്‌ലർ ഫാർമേഴ്‌സ് അസോസിയേഷൻ ഭാരവാഹികൾ ആവശ്യപ്പെട്ടു.

ഉദയംപേരൂര്‍ ഐഒസി പ്ലാന്‍റില്‍ പണിമുടക്ക് മുന്നറിയിപ്പുമായി തൊഴിലാളികള്‍

മാസങ്ങളായി കോണ്‍ട്രാക്ടര്‍മാര്‍ കരാര്‍ പുതുക്കാന്‍ തയാറാകാത്തതാണ് കാരണമെന്ന് യൂണിയൻ കൊച്ചി: ഐഒസിയുടെ ഉദയംപേരൂര്‍ എല്‍പിജി ബോട്‌ലിംഗ് പ്ലാന്‍റില്‍ ഹൗസ് കീപ്പിംഗ്, ലോഡിംഗ് ആന്‍ഡ് അണ്‍ലോഡിംഗ് വിഭാഗങ്ങളില്‍ മാസങ്ങളായി കോണ്‍ട്രാക്ടര്‍മാര്‍ കരാര്‍ പുതുക്കാന്‍ തയാറാകാത്തതോടെ പണിമുടക്ക് മുന്നറിയിപ്പുമായി തൊഴിലാളികള്‍. സമയബന്ധിതമായി കരാര്‍ പുതുക്കാത്തതുമൂലം ആനുകൂല്യങ്ങള്‍ നഷ്ടപ്പെടുന്ന അവസ്ഥയാണ്. വിഷയം അധികൃതരുടെ ശ്രദ്ധയില്‍പ്പെടുത്തിയിട്ടും പരിഹാരം കാണാത്ത സാഹചര്യത്തില്‍ 15 മുതല്‍ പണിമുടക്കിലേക്ക് പോകേണ്ട അവസ്ഥയാണെന്നും ഐഎന്‍ടിയുസി ഐഒസി യൂണിറ്റ് വര്‍ക്കിംഗ് പ്രസിഡന്‍റ് ജോണ്‍ ജേക്കബ് പത്രസമ്മേളനത്തില്‍ പറഞ്ഞു. പ്രശ്‌നപരിഹാരത്തിന് ഇടപെടാനാകില്ലെന്ന നിലപാടിലാണ് ഐഒസി. ജില്ലാ കളക്ടര്‍ക്ക് നല്‍കിയ കത്തിന്‍റെ പശ്ചാത്തലത്തില്‍ 12ന് ചര്‍ച്ചയ്ക്ക് വിളിച്ചിട്ടുണ്ട്. അതേസമയം ലേബര്‍ ഓഫീസറില്‍ നിന്ന് മറുപടി ലഭിച്ചിട്ടില്ല. ഹൗസ്‌കീപ്പിംഗ് വിഭാഗത്തില്‍ കഴിഞ്ഞ വര്‍ഷം ജൂലൈ 31ന് കരാര്‍ അവസാനിച്ചു. ലോഡിംഗ് വിഭാഗത്തില്‍ കരാര്‍ നടപടികളുമായി കോണ്‍ട്രാക്ടര്‍ സഹകരിക്കാത്ത സാഹചര്യവുമാണ് നിലവിലുള്ളത്. ടെന്‍ഡര്‍ സമയത്ത് കോണ്‍ട്രാക്ടര്‍മാര്‍ മത്സരബുദ്ധിയോടെ പ്രവര്‍ത്തനങ്ങള്‍ നടത്തുന്നതിനാല്‍ കരാര്‍ ഇല്ലാത്തതുമൂലം തൊഴിലാളികള്‍ക്ക് ഇതുവരെ ലഭിച്ചിരുന്ന ആനുകൂല്യങ്ങളും നഷ്ടമാവുകയാണ്. തൊഴിലാളികളുടെ ഇൻഷ്വറന്‍സ് പരിരക്ഷ, കമ്പനി മെയിന്‍റനന്‍സ് എന്നിവയും കൃത്യമായി പാലിക്കുന്നില്ല. ജോലിക്കിടെ സംഭവിക്കുന്ന അപകടങ്ങളില്‍ കോൺട്രാക്ടറുടെ ഭാഗത്തുനിന്ന് യാതൊരു സഹായങ്ങളും ലഭിക്കാതെയായെന്നും നൂറില്‍ അധികം തൊഴിലാളികള്‍ ജോലി ചെയ്യുന്ന പ്ലാന്‍റില്‍ വൃത്തിയുള്ള ശുചിമുറി സൗകര്യം ഇല്ലെന്നും ഐഎന്‍ടിയുസി നേതാക്കള്‍ പറഞ്ഞു. പി.സി. സുനില്‍കുമാര്‍, എം.പി. പ്രദീപ് എന്നിവരും പത്രസമ്മേളനത്തില്‍ പങ്കെടുത്തു. സംസ്ഥാനത്തെ എട്ട് ജില്ലകളിലേക്കുള്ള എല്‍പിജി വിതരണം ഉദയംപേരൂരില്‍ നിന്നാണ് നടക്കുന്നത്.

ഹെറോയിനുമായി ബംഗാൾ സ്വദേശി പിടിയിൽ

പെരുമ്പാവൂർ: ഹെറോയിനുമായി ഇതര സംസ്ഥാന തൊഴിലാളി പിടിയിൽ. പശ്ചിമ ബംഗാൾ മുർഷിദാബാദ് സ്വദേശി സുജൻ സർക്കാർ(25)നെയാണ് കുന്നത്തുനാട് എക്‌സൈസ് സംഘം പിടികൂടിയത്. ഓപ്പറേഷൻ ക്ലീൻ സ്റ്റേറ്റിന്‍റെ ഭാഗമായി നടന്ന പരിശോധനയിലാണ് കണ്ടന്തറ ഭായ് കോളനിയിൽ നിന്നും ഇയാളെ പിടിയിലായത്. ഇയാളുടെ പക്കൽ നിന്നും 10.991 ഗ്രാം ഹെറോയിൻ എക്‌സൈസ് പിടിച്ചെടുത്തു. കുന്നത്തുനാട് എക്‌സൈസ് സർക്കിൾ ഇൻസ്‌പെക്ടർ എസ്. ബിനുവിന്‍റെ നേതൃത്വത്തിൽ അസി. എക്‌സൈസ് ഇൻസ്‌പെക്ടർമാരായ സലീം യൂസഫ്, സി.എൻ. രാജേഷ്, സിവിൽ എക്‌സൈസ് ഓഫീസർമാരായ സി.എം നവാസ്, എം.ആർ. രാജേഷ്, ജിതിൻ ഗോപി, മുരളീകൃഷ്ണൻ, ബെന്നി പീറ്റർ എന്നിവരടങ്ങുന്ന സംഘമാണ് പരിശോധനയിൽ പങ്കെടുത്തത്.

കരിഞ്ചന്തയിൽ റെയിൽവേ ടിക്കറ്റ് വില്പന; ബംഗാൾ സ്വദേശി പിടിയിൽ

ട്രെയിൻ ഇ-ടിക്കറ്റ്, തിരിച്ചറിയൽ കാർഡ്‌ കോപ്പികൾ, ലാപ്ടോപ്പ് എന്നിവ പിടിച്ചെടുത്തു ആലുവ: റെയിൽവേ ടിക്കറ്റ് കരിഞ്ചന്തയിൽ വിൽപ്പന നടത്തിയ ബംഗാൾ സ്വദേശി പിടിയിലായി. പശ്ചിമ ബംഗാൾ മുർഷിദാബാദ് സാഹേബ്രെയിൻപൂരി കീർത്തനിയാപാര ജമീനുൽ ഇസ്ലാം മണ്ഡൽ (28) ആണ് റെയിൽവേ പ്രൊട്ടക്ഷൻ ഫോഴ്സിന്‍റെ പിടിയിലായത്. കഴിഞ്ഞ രണ്ടര വർഷമായി പെരുമ്പാവൂർ അക്ഷര എന്ന മൊബൈൽ കടയിൽ ടെക്‌നീഷ്യനായാണ് ഇയാൾ ജോലി ചെയ്യുന്നത്. വ്യാജ തിരിച്ചറിയൽ കാർഡ് ഉപയോഗിച്ച് റെയിൽവേ ടിക്കറ്റ് എടുത്ത ശേഷം കൂടിയ വിലയ്ക്ക് വിൽപ്പന നടത്തുന്നതാണ് രീതി. ഇയാളിൽ നിന്ന് 11,000 രൂപ വില വരുന്ന ആറ് ട്രെയിൻ ഇ ടിക്കറ്റ്, 10,000 രൂപ വിലവരുന്ന കാലാവധി കഴിഞ്ഞ നാല് ഇ ടിക്കറ്റുകൾ എന്നിവ പിടിച്ചെടുത്തു. തിരിച്ചറിയൽ കാർഡിന്‍റെ മൂന്ന് പകർപ്പുകളും ലാപ്ടോപ്പും കണ്ടെടുത്തിട്ടുണ്ട്. റെയിൽവേ അഡ്മിനിസ്‌ട്രേഷന്‍റെയും ഐആർസിടിസിയുടെയും അനുമതിയില്ലാതെയാണ് ഇയാൾ ടിക്കറ്റുകൾ റിസർവ് ചെയ്തിരുന്നത്. പ്രതിയെ എറണാകുളം ചീഫ് ജുഡീഷൽ മജിസ്‌ട്രേറ്റിന് മുമ്പാകെ ഹാജരാക്കി. ആർപിഎഫ്എഎസ്‌ഐമാരായ കെ. സുരേഷ്, സിജോ സേവ്യർ, ഫിലിപ്പ് ജോൺ, ഇന്‍റലിജൻസ് ബ്രാഞ്ച് എസ്‌ഐ പ്രൈസ് മാത്യു എന്നിവരടങ്ങുന്ന സംഘമാണ് പ്രതിയെ പിടികൂടിയത്.

മോർച്ചറിയിൽ മൃതദേഹം അഴുകിയ സംഭവം : സാങ്കേതിക തകരാറെന്ന് ജില്ലാ ആശുപത്രി

തിങ്കളാഴ്ച അന്വേഷണ റിപ്പോർട്ട് നൽകും ആലുവ: ഗവ. ജില്ലാ ആശുപത്രി മോർച്ചറിയിൽ സൂക്ഷിച്ച മധ്യവയസ്കന്‍റെ മൃതദേഹം അഴുകിയെന്ന പരാതിയിൽ ആശുപത്രിതല അന്വേഷണം ആരംഭിച്ചു. കളമശേരിയിൽ ജോലി ചെയ്യുന്ന ആലപ്പുഴ എഴുപുന്ന വിനിതാ ഭവനത്തിൽ സാബുവി(45)ന്‍റെ മൃതദേഹം ഫ്രീസർ ഓൺ ചെയ്യാതെ അഴകിയെന്നാണ് ബന്ധുക്കളുടെ പരാതി. മോർച്ചറിയിലെ സിസി ടിവി പരിശോധനയിൽ ഫ്രീസർ സ്വിച്ച് ഓൺ ചെയ്തിരുന്നതായും അതിനു ശേഷം ആരും സമീപത്തേക്ക് വന്നിട്ടില്ലെന്നും കണ്ടെത്തിയിട്ടുണ്ട്. ഫ്രീസറിന് സാങ്കേതിക തകരാർ വന്നിട്ടുണ്ടാകാമെന്നാണ് ആദ്യ വിലയിരുത്തൽ. ചൊവ്വാഴ്ച്ച ഡോക്ടറെ കാണാൻ ജില്ലാ ആശുപത്രിയിൽ എത്തിയപ്പോഴാണ് സാബു കുഴഞ്ഞുവീണ് മരിച്ചത്. തുടർന്നാണ് മോർച്ചറിയിൽ മൃതദേഹം ഒരു ദിവസം സൂക്ഷിച്ചത്. തടിയിട്ടപറമ്പ് പോലീസ് സ്റ്റേഷൻ പരിധിയിൽ താമസിച്ചിരുന്നതിനാൽ ഇൻക്വസ്റ്റ് തയാറാക്കാൻ എസ്ഐ അവധിയെന്ന പേരിൽ എത്തിയില്ലെന്നും, പകരം കാലടിയിൽ നിന്ന് പോലീസ് വൈകിയാണ് എത്തിയതെന്നും ആരോപണമുണ്ട്. ഇന്ന് ബന്ധുക്കൾ എസ്പിയെ നേരിൽ കണ്ട് രണ്ട് വിഷയങ്ങളിലും പരാതി നൽകും. ഫ്രീസർ പ്രവർത്തിച്ചില്ലെന്ന പരാതിയിന്മേൽ ആശുപത്രി സൂപ്രണ്ടിന്‍റെ നേതൃത്വത്തിൽ ആരംഭിച്ച അന്വേഷണ റിപ്പോർട്ട് തിങ്കളാഴ്ച ഡിഎംഒയ്ക്ക് കൈമാറും.

കാടിന്‍റെ മക്കള്‍ക്കൊപ്പം റാന്പില്‍ ചുവടുവച്ച് ഹൈബി ഈഡന്‍ എംപി

കൊച്ചി: കാടിന്‍റെ മക്കളുടെ സ്വപ്‌നം നിറവേറ്റി റാന്പില്‍ വിപ്ലവം സൃഷ്ടിച്ച് കൊച്ചി ലുലുമാളിലെ ഫാഷന്‍ വേദി. ലുലു ഫാഷന്‍ വീക്കിന്‍റെ ഉദ്ഘാടന വേദിയില്‍ തരംഗമായത് ആദിവാസി സമൂഹത്തിലെ കൗമാരക്കാരുടെ ചുവടുവയ്പ്പായിരുന്നു. ‘ലുലു ഫാഷന്‍ വീക്ക് 2025’ന്‍റെ ഉദ്ഘാടന വേദിയിലാണ് അടിമാലിയിലെ ആദിവാസി ഊരില്‍ നിന്നുള്ള കൗമാരക്കാര്‍ ചുവടുവച്ചത്. ഉദ്ഘാടന ചടങ്ങില്‍ ഹൈബി ഈഡന്‍ എംപിയും ഇവര്‍ക്കൊപ്പം ചുവടുവച്ചപ്പോള്‍ ആവേശം ഇരട്ടിയായി. സ്‌റ്റൈലിസ്റ്റും മോഡലുമായ ഡാലു കൃഷ്ണദാസിന്‍റെ നേതൃത്വത്തില്‍ അന്താരാഷ്ട്ര മോഡലുകള്‍ക്കൊപ്പമാണ് ഊരിന്‍റെ മക്കളും ചുവടുവച്ചത്. ഫാഷന്‍ ഷോയും റാന്പ് വാക്ക് അടക്കമുള്ള പരിശീലനവും രണ്ട് ദിവസം കൊണ്ട് പൂര്‍ത്തിയാക്കിയാണ് സംഘത്തിലെ പെണ്‍കുട്ടികളും ആണ്‍കുട്ടികളും റാംപിലെത്തിയത്. ലുലു ഗ്രൂപ്പ് ഇന്ത്യ സിഒഒ രജിത് രാധാകൃഷ്ണന്‍, കൊച്ചി റീജണല്‍ ഡയറക്ടര്‍ സാദിഖ് ഖാസിം എന്നിവര്‍ കുട്ടികള്‍ക്കും ഊര് മൂപ്പനും ഉപഹാരം സമ്മാനിച്ചു. ഷോ ഡയറക്ടര്‍ ഡാലു കൃഷ്ണദാസിനെ ചടങ്ങില്‍ അനുമോദിച്ചു. ദിവസവും വൈകീട്ട് 4.30ന് ഫാഷന്‍ ഷോ തുടങ്ങും. 11ന് സമാപിക്കും.

ആദിവാസി യുവാവിനെ കാട്ടാന ആക്രമിച്ചു

കോതമംഗലം: കുട്ടമ്പുഴ കല്ലേലിമേടിന് സമീപം വനപാതയിലൂടെ നടന്നുപോകുകയായിരുന്ന ആദിവാസി യുവാവിനെ കാട്ടാന ആക്രമിച്ചു. കുഞ്ചിപ്പാറ ഉന്നതിയിലെ ഗോപി ധര്‍മ്മണിക്ക് (45) നേരെയാണ് ആക്രമണമുണ്ടായത്. ഇന്നലെ വൈകുന്നേരം അഞ്ചോടെയാണ് സംഭവം. കല്ലേലിമേട്ടിലെ റേഷന്‍കടയില്‍നിന്ന് വീട്ടിലേക്ക് പോകുകയായിരുന്നു ഗോപി ധര്‍മ്മണി. ചാമിക്കുത്ത് ഭാഗത്ത് പാതയോരത്ത് നിന്നിരുന്ന ആനക്കൂട്ടം ഗോപിക്ക് നേരെ തിരിഞ്ഞു. ഒരു ആന തുമ്പിക്കൈകൊണ്ട് തന്നെ ആക്രമിച്ചെന്ന് ഗോപി പറഞ്ഞു. വനപാലകരാണ് ഗോപിയെ ആംബുലന്‍സില്‍ കോതമംഗലം താലൂക്ക് ആശുപത്രിയിലെത്തിച്ചത്. പ്രാഥമിക ശുശ്രൂഷകള്‍ക്കുശേഷം ഗോപിയെ കളമശേരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

പ്രാദേശിക സമുദ്ര സഹകരണം ശക്തിപ്പെടുത്തും: വൈസ് അഡ്മിറല്‍ വി. ശ്രീനിവാസ്

കൊച്ചി: പ്രാദേശിക സമുദ്ര സഹകരണം ശക്തിപ്പെടുത്തി കടലിലെ വെല്ലുവിളികളും ഭീഷണികളും നിര്‍വീര്യമാക്കാന്‍ ഐഒഎസ് സാഗറിന്‍റെ ദൗത്യം സഹായകമാകുമെന്ന് ദക്ഷിണ നാവികസേന മേധാവി വൈസ് അഡ്മിറല്‍ വി.ശ്രീനിവാസ് പറഞ്ഞു. ഒരു മാസം നീണ്ട വിന്യാസം വിജയകരമായി പൂര്‍ത്തിയാക്കി കൊച്ചിയില്‍ തിരിച്ചെത്തിയ ഐഎന്‍എസ് സുനൈനയിലെ (ഐഒഎസ് സാഗര്‍) അംഗങ്ങളെ സ്വീകരിക്കുന്ന ചടങ്ങില്‍ പങ്കെടുത്തു സംസാരിക്കുകയായിരുന്നു അദ്ദേഹം. വിന്യാസത്തിന്‍റെ വിജയകരമായ പൂര്‍ത്തീകരണം സമുദ്ര സഹകരണത്തിലെ ഒരു പുതിയ അധ്യായം തുറക്കും. അയല്‍രാജ്യങ്ങള്‍ തമ്മിലുള്ള ബന്ധം വര്‍ധിപ്പിക്കാന്‍ ഇത് സഹായകമാകും. കൂട്ടായ സമുദ്ര താല്‍പര്യങ്ങള്‍ സംരക്ഷിക്കുന്നതിനും ശേഷി വര്‍ധിപ്പിക്കുന്നതിനും ഇത് സഹായിക്കുമെന്നും അദ്ദേഹം പറഞ്ഞു. ഒരു മാസം നീണ്ട വിന്യാസം ഒമ്പത് അന്താരാഷ്ട്ര നാവികസേനകളുടെ സംയുക്ത സംഘത്തോടൊപ്പം ഇന്ത്യന്‍ നാവികസേനയുടെ കന്നി സംരംഭമായ ഇന്ത്യന്‍ മഹാസമുദ്ര കപ്പല്‍ സാഗര്‍, സൗത്ത് ഐഒആര്‍ മേഖലയില്‍ ഒരു മാസം നീണ്ടുനിന്ന വിന്യാസം പൂര്‍ത്തിയാക്കി ഇന്നലെയാണ് കൊച്ചിയില്‍ തിരിച്ചെത്തിയത്. രണ്ട് ഫാസ്റ്റ് ഇന്‍റര്‍സെപ്റ്റര്‍ ക്രാഫ്റ്റുകളുടെ അകമ്പടിയോടെ ഐഒഎസ് സാഗറിനെ ഇന്ത്യന്‍ നാവിക ബാന്‍ഡ് ആഘോഷങ്ങളോടെ സ്വീകരിച്ചു. കൊച്ചി നാവിക താവളത്തില്‍ നടന്ന സ്വീകരണ ചടങ്ങില്‍ വൈസ് അഡ്മിറല്‍ വി.ശ്രീനിവാസ് ഇന്ത്യയുടെയും ഒമ്പത് സൗഹൃദ വിദേശ രാജ്യങ്ങളുടെയും ക്രൂവിനെ അഭിനന്ദിച്ചു. വിന്യാസ വേളയില്‍, കപ്പല്‍ ഡാര്‍എസ്‌സലാം, നകാല, പോര്‍ട്ട് ലൂയിസ്, പോര്‍ട്ട് വിക്ടോറിയ, മാലെ എന്നിവിടങ്ങളില്‍ തുറമുഖ സന്ദര്‍ശനങ്ങള്‍ നടത്തി. സംയുക്ത നാവിക അഭ്യാസങ്ങള്‍, പ്രഫഷണല്‍ ,സാംസ്‌കാരിക വിനിമയങ്ങള്‍, പ്രധാന ഐഒആര്‍ രാജ്യങ്ങളായ ടാന്‍സാനിയ, മൊസാംബിക്, മൗറീഷ്യസ്, സീഷെല്‍സ് എന്നിവയുടെ സംയുക്ത ഇ ഇസെഡ് നിരീക്ഷണം എന്നിവ ദൗത്യത്തിന്‍റെ പ്രധാന സവിശേഷതകളില്‍ ഉള്‍പ്പെടുന്നു. ഇന്ത്യയും ആഫ്രിക്കന്‍ രാജ്യങ്ങളും തമ്മിലുള്ള പ്രാദേശിക സമുദ്ര സഹകരണം ശക്തിപ്പെടുത്തുന്നതിനായി, ഏപ്രില്‍ 13 മുതല്‍ 18 വരെ ഇന്ത്യയും ടാന്‍സാനിയയും സംയുക്തമായി ആതിഥേയത്വം വഹിച്ച ഐഎന്‍എസ് ചെന്നൈ, ഐഎന്‍എസ് കേസരി എന്നിവയ്‌ക്കൊപ്പം ഐകെയ്‌മെ 2025ല്‍ കപ്പല്‍ പങ്കെടുത്തു. ലോസ് സാഗറിലെ ജീവനക്കാര്‍ക്ക് നാവികസേനയുമായി സംവദിക്കാനായി. മൊസാംബിക്കില്‍, മൊസാംബിക് നാവികസേനയുമായി സംവദിച്ചു. ഐഒഎസ് സാഗറിലെ ജീവനക്കാര്‍ മൗറീഷ്യസ് പോലീസ് സേനയുമായി സംവദിക്കുകയും മൗറീഷ്യസ് കോസ്റ്റ് ഗാര്‍ഡുമായി ഏകോപിത പട്രോളിംഗ് നടത്തുകയും ചെയ്തു. സീഷെല്‍സിലെ പോര്‍ട്ട് വിക്ടോറിയ സന്ദര്‍ശനം ക്രോസ് ഡെക്ക് സന്ദര്‍ശനങ്ങള്‍, പരിശീലന കൈമാറ്റം, സംയുക്ത യോഗ സെഷനുകള്‍, സീഷെല്‍സ് പ്രതിരോധ സേനയുമായുള്ള സമുദ്ര ഇടപെടല്‍ എന്നിവയും സംഘടിപ്പിച്ചു. കൊച്ചിയില്‍ പ്രവേശിക്കുന്നതിന് മുമ്പ് കപ്പല്‍ മാലിദ്വീപില്‍ സഹകരണ സമുദ്ര സുരക്ഷയും പ്രാദേശിക ഔട്ട്‌റീച്ച് ദൗത്യവും നടത്തി. കൊമോറോസ്, കെനിയ, മഡഗാസ്‌കര്‍, മാലിദ്വീപ്, മൗറീഷ്യസ്, മൊസാംബിക്, സീഷെല്‍സ്, സിലങ്ക, ടാന്‍സാനിയ എന്നീ ഒമ്പത് പങ്കാളി രാജ്യങ്ങളിലെ 44 അന്താരാഷ്ട്ര ക്രൂവിന് ഇത് ഒരു സവിശേഷ അനുഭവമായിരുന്നു. അവര്‍ ഇന്ത്യന്‍ നാവികസേനയോടൊപ്പം സംയുക്തമായി കപ്പലില്‍ സഞ്ചരിച്ചു.

ജിസിഡിഎ ചെലവിൽ ഒമ്പത് നഗരസഭകളില്‍ പാര്‍ക്കുകൾ ഒരുക്കും

ആദ്യഘട്ട തുക ഉടൻ അനുവദിക്കും കൊച്ചി: വിശാല കൊച്ചി വികസന അഥോറിറ്റി(ജിസിഡിഎ) മേഖലയിലെ നഗരസഭകളില്‍ പൊതു ഇടങ്ങളും പാര്‍ക്കുകളും ഒരുങ്ങുന്നു. ജിസിഡിഎ പരിധിയില്‍ വരുന്ന ആലുവ, അങ്കമാലി, തൃക്കാക്കര, കളമശേരി, തൃപ്പൂണിത്തുറ, മരട്, ഏലൂര്‍, നോര്‍ത്ത് പറവൂര്‍, പെരുമ്പാവൂര്‍ എന്നീ നഗരസഭകളിലാണ് പദ്ധതി നടപ്പിലാക്കുക. ഇതിനായി നഗരസഭകള്‍ക്ക് ജിസിഡിഎ ഒരുകോടി രൂപവീതം ബജറ്റില്‍ വകയിരുത്തിയിരുന്നു. ആദ്യഘട്ട തുക വൈകാതെ അനുവദിക്കും. വൈകുന്നേരങ്ങളിലും ഒഴിവു സമയങ്ങളിലും കുട്ടികളുള്‍പ്പടെയുള്ള പൊതുജനങ്ങള്‍ക്ക് വന്നിരിക്കാനും സമയം ചെലവിടുന്നതിനും പൊതുസമ്മേളനങ്ങള്‍ നടത്തുന്നതിനും മികച്ച സൗകര്യങ്ങളുള്ള പൊതുഇടങ്ങളും പാര്‍ക്കുകളും ഒരുക്കുക എന്നതാണ് പദ്ധതിയിലൂടെ ജിസിഡിഎ ലക്ഷ്യമിടുന്നത്. പദ്ധതിയുമായി ബന്ധപ്പെട്ട മുന്നൊരുക്ക യോഗം കുസാറ്റ് സെമിനാര്‍ ഹാളില്‍ ചേര്‍ന്നു. ജിസിഡിഎ ചെയര്‍മാന്‍ കെ. ചന്ദ്രന്‍പിള്ള, പദ്ധതി പ്രദേശ നഗരസഭകളിലെ അധ്യക്ഷര്‍, മറ്റ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. ജിസിഡിഎ നഗരസഭകള്‍ക്ക് ബജറ്റ് വിഹിതം നല്‍കുന്ന തീരുമാനം ചരിത്രത്തില്‍ ആദ്യമാണെന്നും വിശാല കൊച്ചി പരിധിയില്‍ വരുന്ന നഗരസഭകള്‍ക്ക് ജിസിഡിഎ നല്‍കുന്ന സഹായം തുടരണമെന്നും യോഗം അഭിപ്രായപ്പെട്ടു. നഗരസഭകളിലെ നിലവിലെ പദ്ധതി വിവരങ്ങളെക്കുറിച്ചും ഈ തുകകൊണ്ട് നടപ്പിലാക്കാന്‍ ഉദ്ദേശിക്കുന്ന പദ്ധതി ആശയങ്ങൾ നഗരസഭാ പ്രതിനിധികള്‍ യോഗത്തില്‍ പങ്കുവച്ചു.

സൗജന്യ നേത്ര പരിശോധന ക്യാന്പ്

കോലഞ്ചേരി: എംഒഎസ്‌‌‌‌സി മെഡിക്കൽ ഹോസ്പിറ്റൽ നേത്ര ചികിത്സാ വിഭാഗത്തിന്‍റെ ആഭിമുഖ്യത്തിൽ 11ന് രാവിലെ ഒൻപതു മുതൽ 12 വരെ സൗജന്യ നേത്ര പരിശോധന ക്യാന്പ് നടത്തും. കണ്ണിന് കാഴ്ചവൈകല്യം നേരിടുന്നവരും തിമിരം മൂലം കാഴ്ചക്കുറവ് അനുഭവിക്കുന്നവർക്കും പരിശോധനാ സൗകര്യം പ്രയോജനപ്പെടുത്താവുന്നതാണ്. ക്യാന്പിൽനിന്ന് തെരഞ്ഞെടുക്കപ്പെടുന്ന നിർധനരായ രോഗികൾക്ക് സൗജന്യ നിരക്കിൽ തിമിര ശസ്ത്രക്രിയയ്‌ക്കുള്ള അവസരം ലഭ്യമാക്കും. ക്യാന്പിൽ പങ്കെടുക്കാൻ വരുന്നവർ നിർബന്ധമായും റേഷൻ കാർഡിന്‍റെ കോപ്പി കൈവശം കരുതണം. ഫോണ്‍: 0484 -2885254.

ഇലഞ്ഞി ക്ഷത്രിയ കളരിക്ക് ഓവറോൾ ചാന്പ്യൻഷിപ്പ്

ഇലഞ്ഞി: ഹൈദരാബാദിൽ നടന്ന 2024-25 വർഷത്തെ നാഷണൽ കളരിപ്പയറ്റ് മത്സരത്തിൽ ഇലഞ്ഞി ക്ഷത്രിയ കളരിയിലെ കുട്ടികൾ ഓവറോൾ ചാന്പ്യൻഷിപ്പ് കരസ്ഥമാക്കി. 10 കുട്ടികളാണ് ക്ഷത്രിയ കളരിയിൽനിന്നു ചാന്പ്യൻഷിപ്പിൽ പങ്കെടുത്തത്. 26 ഗോൾഡ് മെഡൽ, 16 സിൽവർ മെഡൽ, 14 ബ്രൗണ്‍ മെഡൽ എന്നിവയാണ് ക്ഷത്രിയ കളരിയിലെ കുട്ടികൾ കരസ്ഥമാക്കിയിട്ടുള്ളത്. വാളും പരിചയും, മെയ് പയറ്റ്, ചുവട് കൈപ്പോര്, വടിപ്പയറ്റ്, ഉറുമി വീശ് എന്നീ ഇനങ്ങളിലാണ് കുട്ടികൾ ചാന്പ്യൻഷിപ്പിൽ നേട്ടം കരസ്ഥമാക്കിയത്.

ഓപ്പറേഷൻ തിയറ്ററും ലേബർ റൂമും തുറക്കാൻ കോണ്‍ഗ്രസ് പ്രതിഷേധ മാർച്ച് നടത്തി

കോതമംഗലം: താലൂക്ക് ആശുപത്രിയിൽ മാസങ്ങളായി അടഞ്ഞുകിടക്കുന്ന ഓപ്പറേഷൻ തിയറ്ററും ലേബർ റൂമും തുറന്നുനൽകണമെന്ന് ആവശ്യപ്പെട്ട് കോണ്‍ഗ്രസ് കോതമംഗലം, കവളങ്ങാട് ബ്ലോക്ക് കമ്മിറ്റികളുടെ നേതൃത്വത്തിൽ താലൂക്ക് ആശുപത്രിയിലേക്ക് പ്രതിഷേധ മാർച്ച് നടത്തി. ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം നിർവഹിച്ചു. സാധാരണക്കാരും ഗർഭിണികളും അടങ്ങുന്ന നൂറുകണക്കിനാളുകൾക്ക് ചികിത്സ നിഷേധിക്കുന്ന നിലപാടാണ് ആശുപത്രി അധികാരികൾ സ്വീകരിക്കുന്നത്. ആശുപത്രിയിൽ മൂന്നോളം ആംബുലൻസുകൾ നിരത്തിലിറക്കാൻ പറ്റാതെ കിടക്കുന്നതും എക്സ്റേ യൂണിറ്റ് കൃത്യമായി പ്രവർത്തിക്കാത്തതും ഓർത്തോ ഡോക്ടർ ഒരു വർഷമായി ഇല്ലാത്തതും അശാസ്ത്രീയമായ നിർമാണ പ്രവർത്തനങ്ങൾ നടത്തുന്നതിനും ഉത്തരവാദികൾ എംഎൽഎയും നഗരസഭാധ്യക്ഷനുമാണെന്ന് ഡിസിസി പ്രസിഡന്‍റ് പറഞ്ഞു. എത്രയും വേഗം പ്രശ്നപരിഹാരം ഉണ്ടായില്ലെങ്കിൽ കോണ്‍ഗ്രസ് ശക്തമായ പ്രതിഷേധ സമരങ്ങൾ സംഘടിപ്പിക്കുമെന്ന് യോഗം മുന്നറിയിപ്പ് നൽകി. ബ്ലോക്ക് പ്രസിഡന്‍റ് ഷമീർ പനക്കൽ അധ്യക്ഷത വഹിച്ചു.

കുളന്പുരോഗ പ്രതിരോധ കുത്തിവയ്പ്

മൂവാറ്റുപുഴ: ദേശീയ കുളന്പുരോഗ നിയന്ത്രണ പദ്ധതി (എൻഎഡിസിപി) ആറാം ഘട്ടത്തിന്‍റെ ഭാഗമായി നഗരസഭയിൽ കുളന്പുരോഗ പ്രതിരോധ കുത്തിവയ്പ്പിന് തുടക്കമായി. നഗരസഭാധ്യക്ഷൻ പി.പി. എൽദോസ് ഉദ്ഘാടനം ചെയ്തു. വെറ്ററിനറി പോളി ക്ലിനിക്ക് സീനിയർ വെറ്ററിനറി സർജൻ ലീന പോൾ, വെറ്ററിനറി സർജൻ വൈ. അർച്ചന, ലൈവ് സ്റ്റോക്ക് ഇൻസ്പെക്ടർ അമൽദേവ്, ശ്രീജ, പി.എ. നൗഷാദ്, ജയിനി, സുനി എന്നിവർ പങ്കെടുത്തു. 16നകം നഗരസഭയുടെ പരിധിയിലുള്ള മുഴുവൻ കർഷകരുടെ ഉരുക്കളെയും കുത്തിവയ്പ്പിന് വിധേയമാക്കി പദ്ധതി പൂർത്തീകരിക്കാനാണ് ലക്ഷ്യമിടുന്നത്.

ഇടവക ദിനാഘോഷം സംഘടിപ്പിച്ചു

കുറുപ്പംപടി: സെന്‍റ് പീറ്റേഴ്സ് ആൻഡ് പോൾസ് ഫൊറോന പള്ളിയിൽ ഇടവക ദിനാഘോഷം സംഘടിപ്പിച്ചു. കുർബാനയെ തുടർന്ന് നടന്ന പൊതുസമ്മേളനം കോതമംഗലം രൂപത വികാരി ജനറാൾ മോണ്‍. വിൻസെന്‍റ് നെടുങ്ങാട്ട് ഉദ്ഘാടനം ചെയ്തു. വികാരി ഫാ. ജെയിംസ് കക്കുഴിയിൽ അധ്യക്ഷത വഹിച്ചു. കത്തോലിക്കാ കോണ്‍ഗ്രസ് രൂപത പ്രസിഡന്‍റ് സണ്ണി കടൂത്താഴെ, ഫാ. മാത്യു മുണ്ടയ്ക്കൽ, ജോണ്‍സണ്‍ കളന്പാടൻ, ജിമ്മി നെടുംപുറത്ത്, പീറ്റർ പോൾ പിട്ടാപ്പിള്ളിൽ, ഷൈജു ഇഞ്ചയ്ക്കൽ, അതുല്യ ബിനോയ് എന്നിവർ പ്രസംഗിച്ചു. പോൾ മാങ്കുഴ, ബെന്നി തെക്കേമാലിൽ, പോൾ പുളിയേലിൽ, ബേബി മണ്ഡപത്തിൽ, പോൾ സേവ്യർ ആറ്റുപുറം, ഷാജി റാഫൽ, വിമൽ കിഴക്കുംതല, ബാസ്റ്റിൻ ജോസഫ്, സിജിൻ കോറ്റനാടൻ, സുധി മാലിൽ എന്നിവർ നേതൃത്വം നൽകി.

കീഴില്ലം ബഥനി പ്രൊവിൻസ് ഹൗസിൽ സംഗമം ഇന്ന്

മൂവാറ്റുപുഴ: മിശിഹാനുകരണ സന്ന്യാസിനീ സമൂഹത്തിന്‍റെ ശതാബ്ദി ആഘോഷങ്ങളുടെ ഭാഗമായി ഇന്ന് കീഴില്ലം ബഥനി പ്രൊവിൻസ് ഹൗസിൽ സംഗമം നടക്കും. രാവിലെ എട്ടിന് കുർബാന, 10.30ന് മൂവാറ്റുപുഴ രൂപതാധ്യക്ഷൻ യൂഹാന്നോൻ മാർ തെയഡോഷ്യസ് ഉദ്ഘാടനം നിർവഹിക്കും. അസിസ്റ്റന്‍റ് ജനറാൾ സിസ്റ്റർ ലില്ലി ജോസ് അധ്യക്ഷത വഹിക്കും. റവ. ഡോ. ഗീവർഗീസ് കുറ്റിയിൽ അനുഗ്രഹ പ്രഭാഷണം നടത്തും. പ്രൊവിൻഷ്യൽ സുപ്പീരിയർ മദർ ജോത്സന, അസിസ്റ്റന്‍റ് പ്രൊവിൻഷ്യൾ സിസ്റ്റർ ലിറ്റിൽ ഫ്ളവർ, റവ. ഡോ. ജോർജ് അയ്യനേത്ത്, ഫാ. മാത്യു മഞ്ഞക്കുന്നേൽ, ബെന്നി ബഹന്നാൻ എംപി, എംഎൽഎമാരായ മാത്യു കുഴൽനാടൻ, എൽദോസ് കുന്നപ്പിള്ളി, തോമസ് ഞാറക്കാട്ട് കോറെപ്പിസ്കോപ്പ, ഫാ. റോയി കണ്ണംചിറയിൽ, ചാക്കോ ടി. വർഗീസ്, അന്നമ്മ വർഗീസ് എന്നിവർ പ്രസംഗിക്കും.

യുവദീപ്തി - കെസിവൈഎം കോതമംഗലം രൂപത വാർഷിക കൗണ്‍സിലും തെരഞ്ഞെടുപ്പും നടത്തി

മൂവാറ്റുപുഴ: യുവദീപ്തി - കെസിവൈഎം കോതമംഗലം രൂപതയുടെ വാർഷിക കൗണ്‍സിലും തെരഞ്ഞെടുപ്പും മൂവാറ്റുപുഴ നെസ്റ്റ് പാസ്റ്ററൽ സെന്‍ററിൽ നടന്നു. കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ ഉദ്ഘാടനം നിർവഹിച്ചു. രൂപത പ്രസിഡന്‍റ് ജെറിൻ വർഗീസ് അധ്യക്ഷത വഹിച്ചു. 14 ഫൊറോനകളിൽ നിന്നായി 85 ൽ അധികം യുവജനങ്ങൾ പങ്കെടുത്തു. എട്ട് ഫൊറോനകളും രൂപത സമിതിയും വർഷിക റിപ്പോർട്ട് അവതരിപ്പിക്കുകയും കൗണ്‍സിൽ അംഗീകാരം നേടുകയും ചെയ്തു. കൗണ്‍സിലിൽ 2025-26 പ്രവർത്തനവർഷത്തെ ഭാരവാഹികളെ തെരഞ്ഞെടുത്തു. എഫ്സി പള്ളുരുത്തി ജേതാക്കൾ തിരുമാറാടി: കാക്കൂരിൽ നടന്ന ഇവാൻസ് ഫുട്ബോൾ ടൂർണമെന്‍റിൽ എഫ്സി പള്ളുരുത്തി ജേതാക്കളായി. 11, 13, 15 എന്നീ വയസിന് താഴെയുള്ള വിഭാഗങ്ങളിൽ നിരവധി ടീമുകൾ പങ്കെടുത്തു. 11നും 13നും താഴെ പ്രായമുള്ള വിഭാഗത്തിൽ ഗനഡോർ എഫ്സി കൊച്ചി ജേതാക്കളായി. 15 വയസിന് താഴെയുള്ള വിഭാഗത്തിൽ എഫ്സി പള്ളുരുത്തിയും ജേതാക്കളായി.

ബ്ലാക്ക് ഔട്ട് മോക്ക് ഡ്രിൽ നടത്തി

കോതമംഗലം: ഇന്ത്യ-പാക്കിസ്ഥാൻ യുദ്ധസാഹചര്യം കണക്കിലെടുത്ത് ജില്ലാ ഭരണകൂടത്തിന്‍റെ ജാഗ്രതാ നിർദേശാനുസരണം കോതമംഗലം മിനി സിവിൽ സ്റ്റേഷനിലും മാമലക്കണ്ടം ഗവ. ഹൈസ്കൂളിലും ബ്ലാക്ക് ഔട്ട് മോക്ക് ഡ്രിൽ നടത്തി. മിനി സിവിൽ സ്റ്റേഷൻ മന്ദിരത്തിലെ 21 സർക്കാർ ഓഫീസുകളും മോക്ക് ഡ്രില്ലിൽ പങ്കെടുത്തു. വൈകുന്നേരം നാലു മുതൽ 4.30 വരെ ഓഫീസുകൾ അടച്ച് ജീവനക്കാർ ജാഗ്രത പാലിച്ചു. മിനി സിവിൽ സ്റ്റേഷനിൽ സൈറണ്‍ ഇല്ലാത്തതുകൊണ്ട് ഫയർ ഫോഴ്സ് എത്തിയാണ് സൈറണ്‍ മുഴക്കിയത്. സൈറണ്‍ മൂന്നുവട്ടം മുഴങ്ങിയതോടെ ജീവനക്കാർ എല്ലാവരും ഇരിപ്പിടത്തിൽനിന്ന് എഴുന്നേറ്റ് മുഴുവൻ ലൈറ്റുകളും അണച്ചു. വാതിലുകളും ജനാലകളും അടച്ചു. ജനാലകളിൽ കർട്ടനിട്ടു. 4.28ന് സുരക്ഷ സൈറണ്‍ വീണ്ടും മുഴങ്ങിയതോടെയാണ് മോക്ക് ഡ്രിൽ ബ്ലാക്ക് ഔട്ട് അവസാനിച്ചത്. ഓരോ ഓഫീസിലും വകുപ്പുതല മേധാവികൾ നേതൃത്വം നൽകി. മാമലക്കണ്ടം ഗവ. ഹൈസ്കൂളിൽ ഫയർ ഫോഴ്സും പോലീസും പങ്കെടുത്തു.

അപൂർവ കാഴ്ച്ചയൊരുക്കി നടപ്പാതയിൽ കടന്പ് മരം പൂത്തുലഞ്ഞു

മൂവാറ്റുപുഴ: അപൂർവ കാഴ്ച്ചയൊരുക്കി മൂവാറ്റുപുഴയാറിന്‍റെ പുഴയോര നടപ്പാതയിൽ കടന്പ് മരം പൂത്തുലഞ്ഞു. തൊടുപുഴയാറിനോട് ചേർന്ന് പുഴയോര നടപ്പാതയിൽ കൈയെത്തും ദൂരത്തിലാണ് കൗതുക കാഴ്ചയായി കടന്പ് മരം പൂത്തുലഞ്ഞ് നിൽക്കുന്നത്. റംന്പൂട്ടാൻ പഴത്തിന്‍റെ ആകൃതിയിൽ പുഴയോരത്ത് ഓറഞ്ച് വസന്തത്തിൽ പൂത്ത് നിൽക്കുന്ന കടന്പ് മരം കാഴ്ചക്കാരെ ആകർഷിക്കുന്നതാണ്. ആറ്റുതേക്ക്, വെള്ളക്കടന്പ് എന്നീ പേരുകളിലും അറിയപ്പെടുന്ന കടന്പ് മരത്തിൽ സൂര്യ ബിംബത്തെ രശ്മികൾ അലങ്കരിക്കുന്നതുപോലെയാണ് നിരവധി ചെറിയ കൂട്ടമായി ഓറഞ്ചും വെളുപ്പും നിറം കലർന്ന പൂവുകൾ കാഴ്ചയൊരുക്കുന്നത്. പുഴയോര നടപ്പാതയിലൂടെ പ്രഭാത-സായാഹ്ന സവാരിക്കെത്തുന്നവർക്കും സഞ്ചാരികൾക്കും മനോഹര കാഴ്ചയാണ് കടന്പ് മരം ഒരുക്കുന്നത്. മരത്തിന്‍റെ പട്ട, പൂവ്, കായ, എന്നിവ ഔഷധങ്ങളായും പൂവുകൾ പൂജാദികർമങ്ങൾക്കായും ഉപയോഗിക്കപ്പെടുന്നതായി പറയപ്പെടുന്നുണ്ട്. ലതാ പാലത്തിന് സമീപമായി ത്രിവേണി സംഗമതീരം നടപ്പാതയിലേക്ക് തണൽ വിരിച്ചാണ് കടന്പ് മരം നിൽക്കുന്നത്.

‘ഭൂതത്താൻകെട്ട് ടൂറിസം; സർക്കാർ കരാർ റദ്ദാക്കണം’

കോതമംഗലം: ഭൂതത്താൻകെട്ട് ടൂറിസം സർക്കാർ എഫ്എസ്ഐടി റീഡിഫൈൻ ഡെസ്റ്റിനേഷൻ പ്രൈവറ്റ് ലിമിറ്റഡ് എന്ന കന്പനിക്ക് നൽകിയ അഴിമതി കരാർ റദ്ദ് ചെയ്യണമെന്ന് മുൻ മന്ത്രി ടി.യു. കുരുവിള. ഭൂതത്താൻകെട്ട് ഇറിഗേഷൻ ഓഫീസിലേക്ക് കേരള കോണ്‍ഗ്രസ് നിയോജക മണ്ഡലം കമ്മിറ്റിയുടെ നേതൃത്വത്തിൽ നടത്തിയ പ്രതിഷേധ മാർച്ച് ഉദ്ഘാടനം ചെയ്യുകയായിരുന്നു മുൻ മന്ത്രി. കോഴിക്കോട് ആസ്ഥാനമായി പ്രവർത്തിക്കുന്ന കന്പനിക്ക് പ്രവർത്തി മേഖലയിൽ യാതൊരു മുൻപരിചയവും ഇല്ലാത്തവരാണ്. ഒരു കോടി മാത്രം മൂലധനമുള്ള കന്പനിക്ക് 25.41 കോടിക്കാണ് കരാർ നൽകിയത്. ഇടതുപക്ഷ സർക്കാരും എംഎൽഎയും അഴിമതി മാത്രം ലക്ഷ്യമാക്കി ഭൂതത്താൻകെട്ടിലെ ടൂറിസം കച്ചവടം ചെയ്തിരിക്കുകയാണെന്നും അദ്ദേഹം ആരോപിച്ചു. വരുന്ന രണ്ടുവർഷംകൊണ്ട് ഈ പ്രദേശത്ത് ഏതാനും പ്രവർത്തനങ്ങൾ മാത്രം നടത്തുകയും അടുത്ത 30 വർഷക്കാലത്തേക്ക് ഭൂതത്താൻകെട്ടിലും അനുബന്ധ മേഖലയിലും ഫീസ് പിരിക്കുവാനുള്ള അവകാശവും കന്പനിക്ക് നൽകിയിരിക്കുകയാണ്. ഫീസിന്‍റെ അഞ്ച് ശതമാനം മാത്രമാണ് സർക്കാരിന് ലഭിക്കുന്നത്. കേവലം ഒരു ബിനാമി കടലാസ് കന്പനിക്ക് സർക്കാർ നൽകിയ കരാർ റദ്ദ് ചെയ്ത് പ്രാദേശികമായി ആലോചനകൾ നടത്തി ഡിടിപിസി പോലെയുള്ള സർക്കാർ സംവിധാനങ്ങളിലൂടെ ഭൂതത്താൻകെട്ട് ടൂറിസം നടപ്പാക്കാത്ത പക്ഷം കൂടുതൽ ശക്തമായ ജനകീയ പ്രക്ഷോഭത്തിന് നേതൃത്വം നൽകുമെന്ന് ജില്ലാ പ്രസിഡന്‍റ് ഷിബു തെക്കുപുറം മുഖ്യപ്രഭാഷണത്തിൽ പറഞ്ഞു. നിയോജകമണ്ഡലം പ്രസിഡന്‍റ് എ.ടി. പൗലോസ് അധ്യക്ഷത വഹിച്ചു.

മൂവാറ്റുപുഴ കാർഷികോത്സവ്-2025 മൃഗസംരക്ഷണ വകുപ്പിന്‍റെ സ്റ്റാൾ ശ്രദ്ധേയം

മൂവാറ്റുപുഴ: മൂവാറ്റുപുഴ കാർഷികോത്സവ് - 2025ലെ മൃഗസംരക്ഷണ വകുപ്പിന്‍റെ സ്റ്റാൾ ശ്രദ്ധേയമാകുന്നു. മൃഗസംരക്ഷണ വകുപ്പിന്‍റെ പ്രവർത്തനങ്ങളെക്കുറിച്ചുള്ള ഡിസ്പ്ലേ ബോർഡുകൾ ഏറ്റവും പുതിയ പദ്ധതിയായ മൊബൈൽ വെറ്ററിനറി യൂണിറ്റ് വാഹനത്തിന്‍റെ ഫ്ലാഗ് ഓഫിന്‍റെ ഡിസ്പ്ലേ ബോർഡും അടക്കം ഒരുക്കിയിട്ടുണ്ട്. കൂടാതെ കൂവപ്പടി റീജണൽ പൗൾട്രി ഫാമിൽ നിന്നുള്ള ഭക്ഷ്യയോഗ്യമായ മുട്ടകൾ സർക്കാർ വിലയായ 5.50 രൂപയ്‌ക്ക് ജനങ്ങൾക്ക് സ്റ്റാളിൽ വാങ്ങാനുള്ള സൗകര്യവും ഒരുക്കിയിട്ടുണ്ട്. 1000 മുട്ടകളുടെ വില്പന ആദ്യ ദിവസങ്ങളിൽ നടന്നു. 30 കൊത്തുമുട്ടകൾ വരെ വിരിയിക്കാനായി വീടുകളിൽ നിർമിച്ച് ഉപയോഗിക്കാൻ സാധിക്കുന്ന 1200 രൂപയുടെ മിനി ഇൻക്യുബേറ്ററും സ്റ്റാളിൽ പ്രദർശിപ്പിച്ചിട്ടുണ്ട്. കൂടാതെ എല്ലാ മണിക്കൂറിലും ക്വിസ് മത്സരവും മത്സര വിജയികൾക്ക് കോഴിക്കുഞ്ഞുങ്ങളെ സമ്മാനമായും നൽകുന്നു.

കർഷക അവാർഡ് വിതരണം നാളെ

മൂവാറ്റുപുഴ: കാർഷികോത്സത്തോടനുബന്ധിച്ചുള്ള കർഷക അവാർഡ് വിതരണം നാളെ രാവിലെ 11ന് മന്ത്രി പി. പ്രസാദ് നിർവഹിക്കും. കാർഷിക മേഖലയിൽ വിവിധ വിഭാഗങ്ങളിൽ മികവ് തെളിയിച്ചവരെയാണ് കർഷക അവാർഡിനായി തെരഞ്ഞെടുത്തത്. കാർഷിക മേഖലയിലെ വിവിധ വിഷയങ്ങളിൽ മികച്ച റിപ്പോർട്ടർക്കുള്ള അവാർഡ് മൂവാറ്റുപുഴയിലെ മാധ്യമ പ്രവർത്തകൻ കെ.എം. ഫൈസലിന് ലഭിച്ചു. മികച്ച കർഷകനുള്ള ഒന്നാം സ്ഥാനം കല്ലൂർക്കാട് കൃഷിഭവന് കീഴിലുള്ള പോത്തനാംമുഴിയിൽ ജോർജ് പി. ജോസിനും രണ്ടാം സ്ഥാനം ആവോലി കൃഷിഭവന് കീഴിലുള്ള പായിക്കാട്ട് ജോർജ് ജോസഫിനും മൂന്നാം സ്ഥാനം കല്ലൂർക്കാട് കൃഷിഭവന് കീഴിലുള്ള റാത്തപ്പിള്ളിൽ ലാൽ ജേക്കബിനും ലഭിച്ചു. മികച്ച വനിതാ കർഷകർക്കുള്ള ഒന്നാം സ്ഥാനം ആവോലി കൃഷിഭവന് കീഴിലുള്ള മുത്തകുന്നേൽ ലിജി ജോസിനും രണ്ടാം സ്ഥാനം വാളകം കൃഷിഭവന് കീഴിൽ മുണ്ടപ്ലാവുങ്ങൽ അന്നക്കുട്ടി കുര്യാക്കോസിനും മൂന്നാം സ്ഥാനം മഞ്ഞള്ളൂർ കൃഷിഭവന് കീഴിലുള്ള നീറന്പുഴ മറിയമോൾ ജോണിനും ലഭിച്ചു. മികച്ച കർഷക വിദ്യാർഥിയായി ആവോലി കൃഷിഭവന് കീഴിലുള്ള പറവിടകുന്നേൽ ജെറിൻ മാത്യുവും മികച്ച ക്ഷീര കർഷകനായി ആരക്കുഴ കൃഷിഭവന് കീഴിലുള്ള ചിറ്റേത്ത് ഫ്രാൻസിസ് ജോർജും അർഹരായി. മികച്ച കർഷക സ്ഥാപനത്തിനുള്ള അവാർഡ് ആരക്കുഴ കൃഷിഭവന് കീഴിലുള്ള പണ്ടപ്പിള്ളി സ്വാശ്രയ കർഷക വിപണന സമിതിക്കും മികച്ച സ്കൂളിനുള്ള അവാർഡ് കല്ലൂർക്കാട് കൃഷിഭവന് കീഴിലുള്ള തഴുവംകുന്ന് ഹോളി ഫാമിലി പബ്ലിക് സ്കൂളിനും മികച്ച അഗ്രി ടെക് സ്റ്റാർട്ടപ്പിനുള്ള അവാർഡ് മഞ്ഞള്ളൂർ കൃഷിഭവന് കീഴിലുള്ള വടവുകോട് മുണ്ടൻചിറ ഫുഡ് പ്രൊഡക്ടിനും (ജോണ്‍ മാത്യു) മികച്ച ഫോട്ടോഗ്രാഫർക്കുള്ള അവാർഡ് മഞ്ഞള്ളൂർ കൃഷിഭവന് കീഴിലുള്ള ദിനീഷ് കെ. സഹദേവനും ലഭിച്ചു.

കോതമംഗലം താലൂക്കിലെ കുട്ടന്പുഴയിലും പോത്താനിക്കാട്ടും ഡെങ്കിപ്പനി പടരുന്നു

കോതമംഗലം: കൊതുക് വ്യാപനം ശക്തമായതോടെ താലൂക്കിലെ പല ഭാഗങ്ങളിലും ഡെങ്കിപ്പനി പടരുന്നു. കുട്ടന്പുഴ പഞ്ചായത്തിലെ കുഞ്ചിപ്പാറ ആദിവാസി ഉന്നതിയിൽ ഡെങ്കിപ്പനി സ്ഥിരീകരിച്ചതായി അധികൃതർ അറിയിച്ചു. ഏതാനും പേർ കോതമംഗലം താലൂക്ക് ആശുപത്രിയിൽ ചികിത്സയിലുണ്ട്. പോത്താനിക്കാട് പഞ്ചായത്തിലെ പുളിന്താനത്തും ഡെങ്കിപ്പനി പടർന്നുപിടിച്ചിട്ടുണ്ട്. ഏതാനും പേർ വിവിധ ആശുപത്രികളിൽ ചികിത്സയിലാണ്. ഈ പ്രദേശങ്ങളിൽ ഫോഗിംഗ് ഉൾപ്പടെയുള്ള പ്രതിരോധ പ്രവർത്തനങ്ങൾക്ക് തുടക്കമിട്ടിട്ടുണ്ട്. താലൂക്കിലെ മറ്റ് പ്രദേശങ്ങളും ഡെങ്കിപ്പനി വ്യാപന ഭീക്ഷണി നിലനിൽക്കുകയാണ്. ഡെങ്കിപ്പനി പടർത്തുന്ന ഈഡിസ് കൊതുകുകൾ പെരുകുന്നതാണ് പ്രശ്നമാകുന്നത്. തെളിഞ്ഞ വെള്ളത്തിലാണ് പ്രധാനമായും ഈഡിസ് കൊതുകുകൾ മുട്ടയിട്ട് പെരുകുന്നത്. വെള്ളം കെട്ടികിടക്കാനുള്ള സാഹചര്യങ്ങൾ പൂർണമായും ഒഴിവാക്കണമെന്നാണ് ആരോഗ്യ പ്രവർത്തകരുടെ നിർദേശം.

സമ്മർ ക്യാമ്പ് സംഘടിപ്പിച്ചു

ആലുവ: ചൂണ്ടി മേഖലയിലെ വിദ്യാർഥികൾക്കായി അസോസിയേഷൻ ഫോർ സോഷ്യൽ ഡെവലപ്മെന്‍റ് സുഹൃത്ത് സദൻ സമ്മർ ക്യാമ്പ് സംഘടിപ്പിച്ചു. എടത്തല എസ്ഐ ഷൈജൻ ഉദ്ഘാടനം ചെയ്തു. എഎസ്ഐ ത്വൽഹത്ത് ക്ലാസ് നയിച്ചു. പ്രസിഡന്‍റ് സിസ്റ്റർ അനീഷ് അധ്യക്ഷത വഹിച്ചു. സെക്രട്ടറി സിസ്റ്റർ ആൻസി, ചൂണ്ടി സെന്‍റ് പയസ് പത്ത് പള്ളി വികാരി ഫാ. ജേക്കബ് കോറോത്ത്, വാർഡംഗം ജോയ് കണിയോടിക്കൽ, പി.എ. അഞ്ചിത എന്നിവർ പ്രസംഗിച്ചു.

ഗതാഗതവും കുടിവെള്ളവും മുടങ്ങും

ആലുവ: ജലജീവൻ മിഷൻ പ്രവർത്തിയുടെ ഭാഗമായി എൻഎഡി - എച്ച്എംടി റോഡിൽ കോമ്പാറ ജംഗ്ഷനിൽ പുതിയ പൈപ്പുകൾ സ്ഥാപിക്കുന്ന പ്രവൃത്തി ഈ മാസം 15,16,17 തീയതികളിൽ നടക്കും. ഇതിന്‍റെ ഭാഗമായി റോഡ് ഗതാഗതം പൂർണമായും തടസപ്പെടും. ഈ ദിവസങ്ങളിൽ എടത്തല പഞ്ചായത്തിൽ പൂർണമായും കീഴ്മാട് പഞ്ചായത്തിലെ 15,16,17 വാർഡുകളിലും ചൂർണിക്കര പഞ്ചായത്തിലെ 7,8,9 വാർഡുകളിലും ജലവിതരണം തടസപ്പെടും. ഘട്ടം ഘട്ടമായി പുനസ്ഥാപിച്ച് പൂർണതോതിൽ ആക്കുന്നതിന് അഞ്ച് ദിവസങ്ങൾ കൂടി ആവശ്യമായി വരുമെന്നും ജനങ്ങൾ മുൻകരുതലുകൾ കൈക്കൊള്ളണമെന്നും ആലുവ വാട്ടർ അഥോറിറ്റി അസി. എക്സിക്യൂട്ടീവ് എൻജിനീയർ അറിയിച്ചു.

കരിങ്ങാച്ചിറ പള്ളിയിലെ നേർച്ചസദ്യയിൽ ആയിരങ്ങൾ പങ്കെടുത്തു

തൃപ്പൂണിത്തുറ: കരിങ്ങാച്ചിറ സെന്‍റ് ജോർജ് യാക്കോബായ സുറിയാനി കത്തീഡ്രലിൽ മാർ ഗീവർഗീസ് സഹദായുടെ ഓർമപ്പെരുന്നാളിനോടനുബന്ധിച്ച് നടന്ന നേർച്ചസദ്യയിൽ ആയിരങ്ങൾ പങ്കെടുത്തു. രാവിലെ നടന്ന മൂന്നിന്മേൽ കുർബാനയ്ക്ക് പൗലോസ് മാർ ഐറേനിയോസ് മെത്രാപ്പോലീത്ത മുഖ്യകാർമികത്വം വഹിച്ചു. തുടർന്ന് നടന്ന നേർച്ചസദ്യ മെത്രാപ്പോലീത്ത ആശീർവദിച്ചു. വൈകിട്ട് ചങ്ങംപുത കുരിശു പള്ളിയിലേയ്ക്കുള്ള പ്രദക്ഷിണത്തെ തുടർന്ന് ആശീർവാദത്തോടെ പെരുന്നാൾ സമാപിച്ചു.

ഒക്കലിൽ നാടൻ പച്ചക്കറി വിൽപ്പനകേന്ദ്രം തുറന്നു

പെരുമ്പാവൂര്‍: ഒക്കല്‍ ഗ്രാമപഞ്ചായത്ത് ജനകീയാസൂത്രണ പദ്ധതി പ്രകാരം നിര്‍മാണം പൂര്‍ത്തീകരിച്ച നാടന്‍ പച്ചക്കറി വില്പന കേന്ദ്രം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ടി.എന്‍. മിഥുന്‍ അധ്യക്ഷത വഹിച്ചു. വൈസ് പ്രസിഡന്‍റ് മിനി സാജന്‍, അമൃത സജിന്‍, എം.കെ. രാജേഷ്, സോളി ബെന്നി, എം.എ. സൈജന്‍, സിന്ധു ശശി, വി.ജി. സിബി, കൃഷി ഓഫീസര്‍ ഹുസൈന്‍ എന്നിവര്‍ പങ്കെടുത്തു. ഒക്കല്‍ കൃഷിഭവനോട് ചേര്‍ന്ന് ആഴ്ച ചന്തയായി പ്രവര്‍ത്തിച്ചിരുന്ന വിപണന കേന്ദ്രമാണ് പഞ്ചായത്തിന്‍റെ സാമ്പത്തിക സഹായത്തോടെ ദിവസ വില്പന കേന്ദ്രമാക്കി മാറ്റിയത്. ജൈവകൃഷി ക്ലാസും ഉണ്ടായിരുന്നു.

ഇലഞ്ഞി ക്ഷത്രിയ കളരിക്ക് ഓവറോൾ ചാന്പ്യൻഷിപ്പ്

ഇലഞ്ഞി: ഹൈദരാബാദിൽ നടന്ന 2024-25 വർഷത്തെ നാഷണൽ കളരിപ്പയറ്റ് മത്സരത്തിൽ ഇലഞ്ഞി ക്ഷത്രിയ കളരിയിലെ കുട്ടികൾ ഓവറോൾ ചാന്പ്യൻഷിപ്പ് കരസ്ഥമാക്കി. 10 കുട്ടികളാണ് ക്ഷത്രിയ കളരിയിൽനിന്നു ചാന്പ്യൻഷിപ്പിൽ പങ്കെടുത്തത്. 26 ഗോൾഡ് മെഡൽ, 16 സിൽവർ മെഡൽ, 14 ബ്രൗണ്‍ മെഡൽ എന്നിവയാണ് ക്ഷത്രിയ കളരിയിലെ കുട്ടികൾ കരസ്ഥമാക്കിയിട്ടുള്ളത്. വാളും പരിചയും, മെയ് പയറ്റ്, ചുവട് കൈപ്പോര്, വടിപ്പയറ്റ്, ഉറുമി വീശ് എന്നീ ഇനങ്ങളിലാണ് കുട്ടികൾ ചാന്പ്യൻഷിപ്പിൽ നേട്ടം കരസ്ഥമാക്കിയത്.

ഓപ്പറേഷൻ തിയറ്ററും ലേബർ റൂമും തുറക്കാൻ കോണ്‍ഗ്രസ് പ്രതിഷേധ മാർച്ച് നടത്തി

കോതമംഗലം: താലൂക്ക് ആശുപത്രിയിൽ മാസങ്ങളായി അടഞ്ഞുകിടക്കുന്ന ഓപ്പറേഷൻ തിയറ്ററും ലേബർ റൂമും തുറന്നുനൽകണമെന്ന് ആവശ്യപ്പെട്ട് കോണ്‍ഗ്രസ് കോതമംഗലം, കവളങ്ങാട് ബ്ലോക്ക് കമ്മിറ്റികളുടെ നേതൃത്വത്തിൽ താലൂക്ക് ആശുപത്രിയിലേക്ക് പ്രതിഷേധ മാർച്ച് നടത്തി. ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം നിർവഹിച്ചു. സാധാരണക്കാരും ഗർഭിണികളും അടങ്ങുന്ന നൂറുകണക്കിനാളുകൾക്ക് ചികിത്സ നിഷേധിക്കുന്ന നിലപാടാണ് ആശുപത്രി അധികാരികൾ സ്വീകരിക്കുന്നത്. ആശുപത്രിയിൽ മൂന്നോളം ആംബുലൻസുകൾ നിരത്തിലിറക്കാൻ പറ്റാതെ കിടക്കുന്നതും എക്സ്റേ യൂണിറ്റ് കൃത്യമായി പ്രവർത്തിക്കാത്തതും ഓർത്തോ ഡോക്ടർ ഒരു വർഷമായി ഇല്ലാത്തതും അശാസ്ത്രീയമായ നിർമാണ പ്രവർത്തനങ്ങൾ നടത്തുന്നതിനും ഉത്തരവാദികൾ എംഎൽഎയും നഗരസഭാധ്യക്ഷനുമാണെന്ന് ഡിസിസി പ്രസിഡന്‍റ് പറഞ്ഞു. എത്രയും വേഗം പ്രശ്നപരിഹാരം ഉണ്ടായില്ലെങ്കിൽ കോണ്‍ഗ്രസ് ശക്തമായ പ്രതിഷേധ സമരങ്ങൾ സംഘടിപ്പിക്കുമെന്ന് യോഗം മുന്നറിയിപ്പ് നൽകി. ബ്ലോക്ക് പ്രസിഡന്‍റ് ഷമീർ പനക്കൽ അധ്യക്ഷത വഹിച്ചു.

ആലുവ ഫാംഫെസ്റ്റ് സമാപിച്ചു

സൗജന്യ സന്ദർശനം ശനിയാഴ്ച വരെ ആലുവ: ജില്ലാ പഞ്ചായത്തിന്‍റെ നേതൃത്വത്തിൽ ആലുവ തുരുത്തിലെ സംസ്ഥാന വിത്തുല്പാദന കേന്ദ്രത്തിൽ ആദ്യമായി സംഘടിപ്പിച്ച ത്രിദിന 'ആലുവ ഫാം ഫെസ്റ്റ് 2025' സമാപിച്ചു. സമാപന സമ്മേളനം റോജി എം. ജോൺ എംഎൽഎ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ അധ്യക്ഷനായി. ആലുവ പാലസിൽ നിന്ന് തുരുത്ത് വിത്തുത്പാദന കേന്ദ്രത്തിലേക്കുള്ള സൗജന്യ ബോട്ട് 10 വരെ തുടരും. ഫാം ഫെസ്റ്റിന്‍റെ ഭാഗമായ സ്റ്റാളുകൾ ഉണ്ടാകില്ലെങ്കിലും പൊതുജനങ്ങൾക്ക് ഫാം സൗജന്യമായി സന്ദർശിക്കാം. 12 മുതൽ പൊതുജനങ്ങൾക്ക് 20 രൂപ ടിക്കറ്റ് എടുത്ത് ആലുവ പാലസിൽ നിന്ന് ഫാമിലേക്ക് ബോട്ടിൽ എത്താം. കല്യാണ-സേവ് ദ ഡേറ്റ് ഫോട്ടോകൾ എടുക്കുന്നതിനും സൗകര്യമേർപ്പെടുത്തും. ആയിരം രൂപ നൽകിയാൽ പാലസിൽ നിന്ന് തുരുത്തിലേക്ക് ബോട്ടിലെത്തി ഫോട്ടോയെടുത്ത് മടങ്ങാം. പാലസിൽ നിന്ന് ഫാമിലെത്തിയ ശേഷം പരുന്തുറാഞ്ചി മണപ്പുറം കൂടി ചുറ്റി തിരികെ പാലസ് കടവിലെത്തുന്ന പാക്കേജും തയാറാക്കിയിട്ടുണ്ട്. 12 പേർക്ക് 1,200 രൂപയാണ് നിരക്ക്.

മഹാത്മാഗാന്ധി കുടുംബ സംഗമം

കിഴക്കന്പലം: ഇന്ത്യൻ നാഷണൽ കോൺഗ്രസ്‌ കിഴക്കമ്പലം മണ്ഡലത്തിലെ അമ്പുനാട് വാർഡിൽ മഹാത്മാഗാന്ധി കുടുംബസംഗമം നടത്തി. ബെന്നി ബഹനാൻ എംപി യോഗം ഉദ്ഘാടനം ചെയ്തു. വാർഡ്പ്രസിഡന്‍റ് കെ.എ. അബ്ദുൽ നാസർ അധ്യക്ഷത വഹിച്ചു. മണ്ഡലം ജനറൽ സെക്രട്ടറി മനാഫ് മണ്ണൂപറമ്പിൽ സ്വാഗതം പറഞ്ഞു. കെപിസിസി വൈസ് പ്രസിഡന്‍റ് വി.പി. സജീന്ദ്രൻ മുഖ്യപ്രഭാഷണം നടത്തി. ഡിസിസി പ്രസിഡന്‍റ് മുഹമ്മദ്‌ ഷിയാസ് മുതിർന്ന പൗരന്മാരെയും തൊഴിലുറപ്പ് തൊഴിലാളികളെയും ആദരിച്ചു. ഡിസിസി സെക്രട്ടറി എം.പി. രാജൻ, പട്ടിമറ്റം ബ്ലോക്ക്‌ കോൺഗ്രസ്‌ പ്രസിഡന്‍റ് കെ.വി. എൽദോ, മണ്ഡലം പ്രസിഡന്‍റ് സജി പോൾ, യൂത്ത് കോൺഗ്രസ് മണ്ഡലം പ്രസിഡന്‍റ് അജാസ് മുഹമ്മദ്‌,ഏലിയാസ് കാരിപ്ര, റഷീദ് കാച്ചാംകുഴി, എം.ഡി. എൽദോ, ജോർജ് കുട്ടി മാടപ്പിള്ളി, ലിജി യോഹന്നാൻ, സബിത അലിയാർ തുടങ്ങിയവർ പ്രസംഗിച്ചു.

തിരുനാൾ

തിരുവാങ്കുളം സെന്‍റ് ജോർജ് പള്ളിയിൽ തിരുവാങ്കുളം: തിരുവാങ്കുളം സെന്‍റ് ജോർജ് കത്തോലിക്ക പള്ളിയിൽ വിശുദ്ധ ഗീവർഗീസ് സഹദായുടെ തിരുനാൾ നാളെ തുടങ്ങും. വൈകിട്ട് അഞ്ചിന് പ്രസുദേന്തി വാഴ്ച്ച, തുടർന്ന് കൊടിയേറ്റ്, സമൂഹബലി, കാർമികൻ - ഹൊസൂർ രൂപത ബിഷപ് മാർ സെബാസ്റ്റ്യൻ പൊഴോലിപ്പറമ്പിൽ. 10ന് വൈകിട്ട് 5.15ന് തിരുസ്വരൂപം എഴുന്നെള്ളിക്കൽ, കുർബാന, വചനസന്ദേശം, 7.30ന് കരിമരുന്ന് കലാപ്രകടനം. 11ന് രാവിലെ ഒന്പതിന് ആഘോഷമായ തിരുനാൾ കുർബാന, തിരുനാൾ സന്ദേശം, പ്രദക്ഷിണം. ഉച്ചയ്ക്ക് 12 മുതൽ നേർച്ചസദ്യ, രൂപം എടുത്ത് വയ്ക്കൽ, കൊടിയിറക്കൽ. 12ന് മരിച്ചവരുടെ ഓർമ, രാവിലെ 6.15ന് കുർബാന, ഒപ്പീസ്. തിരുനാൾ ചടങ്ങുകൾക്ക് വികാരി ഫാ.ആന്‍റണി പൂതവേലിൽ നേതൃത്വം നൽകും. വാതക്കാട് ഭാരതറാണി പള്ളിയിൽ അങ്കമാലി: വാതക്കാട് ഭാരതറാണി പള്ളിയിൽ തിരുനാൾ 9,10,11 തീയതികളിൽ നടക്കും. നാളെ രാവിലെ 6.45 ന് ദിവ്യബലി, എട്ടിന് കുടുംബ യൂണിറ്റുകളുടെയും, ഭക്തസംഘടനകളുടെയും നേതൃത്വത്തിൽ പൊതു ആരാധന വൈകിട്ട് 4.30 ന് ആരാധന സമാപനം, ദിവ്യകാരുണ്യ പ്രദക്ഷിണം, പരിശുദ്ധ കുർബാനയുടെ ആശീർവാദം. 5.30 ന് വികാരി റവ.ഡോ.പോൾ മൂഞ്ഞേലി തിരുനാളിന് കൊടിയേറ്റും. തുടർന്ന് ആഘോഷമായ ദിവ്യബലി, ലദീഞ്ഞ്, നൊവേന,തിരുനാൾ സന്ദേശം, രാത്രി 7.30 ന് അമ്പലപ്പുഴ സാരഥി തിയറ്റേഴ്സ് അവതരിപ്പിക്കുന്ന നാടകം രണ്ട് ദിവസം. 10 ശനി രാവിലെ 6.45 ന് ദിവ്യബലി, വൈകീട്ട് അഞ്ചിന് രൂപം എഴുന്നള്ളിക്കൽ, പ്രസുദേന്തി വാഴ്ച, ആഘോഷമായ തിരുനാൾ ദിവ്യബലി, തിരുനാൾ സന്ദേശം, അങ്ങാടി ചുറ്റി പ്രദക്ഷിണം, വർണ വിസ്മയം, വാദ്യമേളങ്ങൾ. 11 ഞായർ രാവിലെ ഏഴിന് ദിവ്യബലി, 10 ന് ആഘോഷമായ തിരുനാൾ ദിവ്യബലി, തിരുനാൾ സന്ദേശം, പ്രദക്ഷിണം, ദിവ്യകാരുണ്യ ആശീർവാദം, വൈകീട്ട് അഞ്ചിന് ദിവ്യബലി, പള്ളിചുറ്റി പ്രദക്ഷിണം, രൂപം എടുത്ത് വയ്ക്കൽ, കൊടിയിറക്കം, ഡിജിറ്റൽ ഫയർ. തിങ്കൾ രാവിലെ 6.30 ന് ദിവ്യബലി, സെമിത്തേരിയിൽ ഒപ്പീസ്.

തീരദേശ സംരക്ഷണ യാത്രയ്ക്ക് സ്വീകരണം നൽകി

വൈപ്പിൻ: കേരളാ യൂത്ത് ഫ്രണ്ട് -എം സംസ്ഥാന പ്രസിഡന്‍റ് സിറിയക്ക് ചാഴികാടൻ നയിക്കുന്ന തീരദേശ സംരക്ഷണ യാത്രക്ക് ചെറായി ദേവസ്വം നടയിൽ സ്വീകരണം നൽകി. ചടങ്ങിൽ ജില്ലയിലെ പര്യടനം കേരള കോൺഗ്രസ്-എം ജില്ലാ പ്രസിഡന്‍റ് ടോമി ജോസഫ് ഉദ്ഘാടനം ചെയ്തു. യൂത്ത് ഫ്രണ്ട് ജില്ലാ പ്രസിഡന്‍റ് ജോജാസ് ജോസ് അധ്യക്ഷനായി. വൈപ്പിൻ നിയോജക മണ്ഡലം പ്രസിഡന്‍റ് ജോസി പി തോമസ്, എം.എം. ബാബു ജോസഫ്, എം.എം. ഫ്രാൻസീസ് , വി.വി. ജോഷി, വർഗീസ് പൈനേടത്ത്, മാർട്ടിൻ മുണ്ടാടൻ, ജസൽ വർഗീസ്, റോണി വലിയപറമ്പിൽ, ടി.ആർ. അനി എന്നിവർ സംസാരിച്ചു.

മഹിളാലയം-തുരുത്ത്, ചൊവ്വര-തുരുത്ത് പാലങ്ങൾ രാത്രി ഇരുട്ടിൽ

ആലുവ: സീപോർട്ട് -എയർപോർട്ട് റോഡിലുള്ള മഹിളാലയം-തുരുത്ത്, ചൊവ്വര-തുരുത്ത് പാലങ്ങളിലെ തെരുവുവിളക്കുകൾ രാത്രി 10 ഓടെ അണയുന്നതായി പരാതി. കൊച്ചി വിമാനത്താവളത്തിലേക്ക് അടക്കം രാവും പകലും നൂറുകണക്കിന് വാഹനങ്ങൾ കടന്നു പോകുന്ന മഹിളാലയം-തുരുത്ത്, ചൊവ്വര-തുരുത്ത് പാലങ്ങളിൽ വഴിവിളക്കുകൾ അണയുന്നത് സാമൂഹ്യ വിരുദ്ധർക്ക് ഗുണവുമായിരിക്കുകയാണ്. പാലത്തിന്‍റെ ഇരുവശത്തുമുള്ള 156 ചെറിയ എൽഇഡി ലൈറ്റുകളിൽ ഒരു ഭാഗത്തുള്ള പകുതി ലൈറ്റുകൾ മാത്രമാണ് ഇപ്പോൾ പ്രകാശിക്കുന്നത്. അതാണ് രാത്രി 10 ആകുമ്പോഴേയ്ക്കും അണയുന്നത്. ഇതോടെ രണ്ട് പാലത്തിലേയും വഴിവിളക്കുകൾ കണ്ണടയ്ക്കുകയാണ്. ലൈറ്റ് സമയം സെറ്റ് ചെയ്തിരിക്കുന്നത് 10 വരെയായതാണ് യാത്രക്കാർക്ക് ബുദ്ധിമുട്ടായിരിക്കുന്നത്. പാലത്തിൽ നിന്നും മാലിന്യങ്ങൾ പുഴയിലേക്ക് വലിച്ചെറിയുന്നതും പതിവാകുന്നുണ്ട്. ഇരുട്ടിന്‍റെ മറവിൽ സാമൂഹ്യവിരുദ്ധരും പാലം താവളമാക്കുന്നതായും പരാതിയുണ്ട്. മഹിളാലയം-തുരുത്ത് പാലത്തിലെയും, തുരുത്ത് - ചൊവ്വര പാലത്തിലെയും വൈദ്യുത വിളക്കുകൾ മുഴുവൻ വൈകിട്ട് ആറു മുതൽ രാവിലെ ആറു വരെ പ്രകാശിപ്പിക്കുന്നതിന് നടപടി കൈക്കൊള്ളണമെന്ന് അവശ്യപ്പെട്ട് തുരുത്ത് സമന്വയ ഗ്രാമവേദി കേരള പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസിന് നിവേദനം നൽകി.

പാറക്കടവിൽ നായശല്യം രൂക്ഷം

നെടുമ്പാശേരി: പാറക്കടവ് ഗ്രാമപഞ്ചായത്തിൽ 8,9 വാർഡുകളിൽ 110 കെവി സബ്‌സ്റ്റേഷൻ പരിസരങ്ങളിൽ നായശല്യം രൂക്ഷം. പരിസരവാസികളെയും കാൽനട യാത്രക്കാരെയും കൂട്ടമായിവന്ന് നായ്ക്കൾ ആക്രമിക്കുന്ന സാഹചര്യവുമുണ്ട്. ഗ്രാമസഭകളിലും അധികൃതരോടും നിരവധിവട്ടം പരാതികൾ പറഞ്ഞിട്ടും ഫലമില്ലാത്ത സാഹചര്യത്തിൽ മനുഷ്യജീവന് ഭീഷണിയുയർത്തുന്ന തെരുവുനായശല്യത്തിന് ഉടനടി പരിഹാരം കാണണമെന്ന ആവശ്യവുമായി കുറുമശേരി ഉദയം റെസിഡന്‍റ്സ് അസോസിയേഷൻ പഞ്ചായത്തു പ്രസിഡന്‍റ്, സെക്രട്ടറി ,വാർഡ് മെമ്പർമാർ എന്നിവർക്ക് നിവേദനം നൽകിയിട്ടുണ്ട്. നടപടികൾ ഉണ്ടാകാതെ വന്നാൽ പ്രക്ഷോഭം സംഘടിപ്പിക്കുമെന്ന് അസോസിയേഷൻ മുന്നറിയിപ്പ് നൽകി.

മഞ്ഞുമ്മല്‍ സുവിശേഷ മഹോത്സവത്തിന് തുടക്കമായി

കൊച്ചി: മഞ്ഞുമ്മല്‍ സുവിശേഷ മഹോത്സവം ബിഷപ് ഡോ.ജോസഫ് കാരിക്കശേരി ഉദ്ഘാടനം ചെയ്തു. തുടര്‍ന്ന് ബിഷപ് ദിവ്യബലിയര്‍പ്പിച്ചു. കര്‍മലീത്ത സഭ പ്രൊവിന്‍ഷ്യല്‍ റവ.ഡോ.അഗസ്റ്റിന്‍ മുള്ളൂര്‍ ബൈബിള്‍ പ്രതിഷ്ഠ നടത്തി. ഫാ.പ്രസാദ് തെരുവത്ത്, ഫാ. സക്കറിയാസ് പാവനത്തറ എന്നിവര്‍ പ്രസംഗിച്ചു. റവ. ഡോ. അലോഷ്യസ് കുളങ്ങര വചനപ്രഭാഷണം നടത്തി. രണ്ടാം ദിനമായ ഇന്ന് വൈകിട്ട് ആറിന് സമൂഹ ദിവ്യബലിയില്‍ മോണ്‍. റോക്കി റോബിന്‍ കളത്തില്‍ മുഖ്യകാര്‍മികനാകും. ഫാ.ബാബു പോള്‍ പ്രഭാഷണം നടത്തും. തുടര്‍ന്ന് വചനപ്രഭാഷണം- റവ. ഡോ.സ്റ്റാന്‍ലി മാതിരപ്പിള്ളി, ദിവ്യകാരുണ്യ ആരാധന.

ഉദയംപേരൂരിൽ വ്യാപാര ഭവൻ തുറന്നു

ഉദയംപേരൂർ: ഉദയംപേരൂർ പഞ്ചായത്ത് മർച്ചന്‍റ്സ് യൂണിയൻ പുതിയതായി പണികഴിപ്പിച്ച വ്യാപാര ഭവൻ കെവിവിഇഎസ് സംസ്ഥാന പ്രസിഡന്‍റ് രാജു അപ്സര ഉദ്ഘാടനം ചെയ്തു. ഓഫീസ് മന്ദിരത്തിന്‍റെ ഉദ്ഘാടനം ജില്ലാ പ്രസിഡന്‍റ് പി.സി. ജേക്കബ് നിർവഹിച്ചു. യൂണിറ്റ് പ്രസിഡന്‍റ് പി.വി. സജീവ് അധ്യക്ഷത വഹിച്ചു. ജില്ലാ സെക്രട്ടറി എ.ജെ. റിയാസ് കോൺഫറൻസ് ഹാൾ ഉദ്ഘാടനം ചെയ്തു. ജില്ലാ വർക്കിംഗ് പ്രസിഡന്‍റ് ജിമ്മി ചക്യത്ത് കാൻസർ രോഗികൾക്ക് കൈത്താങ്ങ് പദ്ധതി ഉദ്ഘാടനം ചെയ്തു. സുവനീർ പ്രകാശനം ജില്ലാ സെക്രട്ടറി കെ.എ. നിഷാദ് നിർവഹിച്ചു. മണ്ഡലം ജനറൽ സെക്രട്ടറി സാം തോമസ്, ജില്ലാ വനിതാവിംഗ് ജനറൽ സെക്രട്ടറി സീനാ സജീവ്, മണ്ഡലം പ്രസിഡന്‍റ് പി.പി. രാഹുൽ, ജില്ലാ യൂത്ത്വിംഗ് ട്രഷറർ അജ്മൽ തുടങ്ങിയവർ പ്രസംഗിച്ചു.

ഓട്ടോറിക്ഷയ്‌‌ക്ക് തീ പിടിച്ചത് പരിഭ്രാന്തിക്കിടയാക്കി

കൂത്താട്ടുകുളം: നിർത്തിയിട്ടിരുന്ന ഓട്ടോറിക്ഷയ്‌ക്ക് തീ പിടിച്ചത് പരിഭ്രാന്തി പരത്തി. ചൊവ്വാഴ്ച രാത്രി 8.30ഓടെയാണ് സംഭവം. കൂത്താട്ടുകുളം അശ്വതി കവലയിലെ ആക്രിക്കടയ്ക്കു സമീപം നിർത്തിയിട്ടിരുന്ന ഓട്ടോറിക്ഷയുടെ എൻജിൻ ഭാഗമാണ് കത്തിയത്. കൂത്താട്ടുകുളം കുറങ്ങഴം പുത്തൻപുരയ്ക്കൽ കന്ദസ്വാമി എന്നയാളുടെ ഉടമസ്ഥതയിലുള്ള സ്വകാര്യ ഓട്ടോറിക്ഷയാണ് ഷോർട്ട് സർക്യൂട്ട് മൂലം കത്തിയത്. കൂത്താട്ടുകുളം അഗ്നിരക്ഷാസേന ഗ്രേഡ് സ്റ്റേഷൻ ഓഫീസർ ജെ. രാജേന്ദ്രൻ നായരുടെ നേതൃത്വത്തിൽ സേനയെത്തി തീയണച്ചു. അഗ്നിരക്ഷാസേന സമയോചിതമായി ഇടപെട്ടതിനാൽ ഓട്ടോറിക്ഷയുടെ കാബിൻ ഭാഗത്തേക്ക് തീപടർന്നില്ല.

കെപിഎംഎസ് ജനറൽ കൗൺസിൽ ചേർന്നു

നെടുമ്പാശേരി: കെപിഎംഎസ് നെടുമ്പാശേരി യൂണിയന്‍റെ ജനറൽ കൗൺസിൽ പറമ്പയം എംആർസി ഹാളിൽ ചേർന്നു. സംസ്ഥാന സെക്രട്ടറിയേറ്റ് അംഗം ടി.എ. വേണു ഉദ്ഘാടനം നിർവഹിച്ചു. യൂണിയൻ പ്രസിഡന്‍റ് എ.കെ. ശിവൻ അധ്യക്ഷനായി. യൂണിയൻ സെക്രട്ടറി എൻ.എ. സുരേഷ് റിപ്പോർട്ട് അവതരിപ്പിച്ചു. സംസ്ഥാന കമ്മിറ്റി അംഗം പി.കെ. ഉണ്ണി, യൂണിയൻ ഖജാൻജി എം.സി. അയ്യപ്പൻ, രേഷ്മ അരുൺ എന്നിവർ സംസാരിച്ചു.

എൽദോസ് കുന്നപ്പള്ളി എംഎൽഎയുടെ ഗ്രാമയാത്ര അമ്പത് ദിവസം പിന്നിട്ടു

പെരുമ്പാവൂർ : ഗ്രാമയാത്ര അമ്പത് ദിവസങ്ങളിലായി 6,000 വീടുകൾ പിന്നിട്ടു കഴിഞ്ഞതായി എൽദോസ് കുന്നപ്പള്ളി എംഎൽഎ അറിയിച്ചു. അൻപതാം ദിന ഭവന സന്ദർശനം വേങ്ങൂർ പഞ്ചായത്തിലെ എട്ടാം വാർഡിൽ ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്തു. യാഥാർഥ്യത്തിൽ നിന്ന് അകന്നു നിൽക്കുന്ന വാർത്തകൾ രാഷ്ട്രീയ എതിരാളികൾ സത്യം എന്ന രീതിയിൽ അവതരിപ്പിക്കുമ്പോൾ യാഥാർഥ്യം നവമാധ്യമങ്ങളിലൂടെ തുറന്നു കാണിക്കാനുള്ള ഉത്തരവാദിത്വം ഓരോ പൗരനും ഉണ്ടാകണമെന്ന് ഉദ്ഘാടന സന്ദേശത്തിൽ ഡിസിസി പ്രസിഡന്‍റ് മുഹമ്മദ് ഷിയാസ് പറഞ്ഞു. വേങ്ങൂർ മണ്ഡലം പ്രസിഡന്‍റ് റിജു കുര്യൻ അധ്യക്ഷത വഹിച്ച യോഗത്തിൽ ഒ. ദേവസി, എസ്. ഷറഫ്, എം.എം. ഷാജഹാൻ, ജോയ് പൂണൂലി , കെ.പി. വർഗീസ്, ബേസിൽ പോൾ , വി.എ. റഹീം , കെ.പി. മാത്തുക്കുട്ടി, ത്രിതല പഞ്ചായത്ത് പ്രതിനിധികൾ തുടങ്ങിയവർ നേതൃത്വം നൽകി.

വൈപ്പിൻ ബ്ലോക്ക് പഞ്ചായത്ത് ചുറ്റുമതിൽ വിവാദം : പരാതി നിലനിൽക്കെ വിവാദ മതിലിനു പുറത്ത് പുതിയ മതിൽ നിർമാണം

വൈപ്പിൻ : വൈപ്പിൻ ബ്ലോക്ക് പഞ്ചായത്തിന്‍റെ ചുറ്റുമതിൽ നിർമിച്ചപ്പോൾ സ്ഥലം നഷ്ടമായത് സംബന്ധിച്ച് വിജിലൻസിൽ പരാതി നിലനിൽക്കെ നിർമിച്ച മതിലിനു പുറത്തു കൂടെ വീണ്ടും മതിൽ നിർമിച്ച് ഭരണപക്ഷം തലയൂരാൻ നോക്കുന്നുവെന്ന് പ്രതിപക്ഷം. ആദ്യംമതിൽ നിർമിച്ചപ്പോൾ സ്വകാര്യ വ്യക്തിക്ക് ബ്ലോക്ക് പഞ്ചായത്തിന്‍റെ ഭൂമി വിട്ടുകൊടുത്തുവെന്നാരോപിച്ച് പ്രതിപക്ഷത്തെ കോൺഗ്രസ് അംഗങ്ങളാണ് വിജിലൻസിൽ പരാതി നൽകിയത്. ഇതേത്തുടർന്ന് ഈ അടുത്ത് വിജിലൻസ് എത്തി സ്ഥല പരിശോധന നടത്തുകയും പരാതിക്കാരിൽ നിന്ന് മൊഴി എടുക്കുകയും ചെയ്തിരുന്നു. ഇതിനു ശേഷമാണ് ഇപ്പോൾ കുറച്ച് ഭാഗത്ത് മതിലിനു പുറത്ത് വീണ്ടും മതിൽ നിർമിക്കുന്നതത്രേ. ഇതാകട്ടെ അഴിമതിക്ക് കൂട്ടുനിന്ന ഉദ്യോഗസ്ഥരെ രക്ഷിക്കാനുള്ള തന്ത്രമാണെന്നും പ്രതിപക്ഷം പറയുന്നു. ഈ സാഹചര്യത്തിൽമുഴുവൻ ഭൂമിയും തിരിച്ചു പിടിക്കുന്നത് വരെ നിയമനടപടികളുമായി മുന്നോട്ടുപോകുമെന്നും കുറ്റക്കാർക്കെതിരെ കർശനമായ നടപടി സ്വീകരിക്കണമെന്നും ബ്ലോക്ക് പഞ്ചായത്ത് മെമ്പർമാരായ അഗസ്റ്റിൻ മണ്ടോത്ത്, പി.എൻ. തങ്കരാജ്, ഷീൽഡ റിബൈറോ, ട്രീസ ക്ലീറ്റസ് എന്നിവർ അറിയിച്ചു.

കൊച്ചിന്‍ ഷിപ്‌യാര്‍ഡില്‍ സിവില്‍ ഡിഫന്‍സ് മോക്ക് ഡ്രില്‍ നടത്തി

കൊച്ചി: അടിയന്തര തയാറെടുപ്പുകള്‍ക്കുള്ള പ്രതിബദ്ധതയുടെ ഭാഗമായി കെട്ടിടങ്ങളിലും കപ്പലുകളിലും നിയുക്ത സുരക്ഷിത മേഖലകളിലേക്ക് ജീവനക്കാരെ നയിച്ചു. ഗ്രൗണ്ട് ഫ്‌ളോറില്‍ ഒത്തുകൂടിയ മെയിന്‍ ഓഫീസ് ആന്‍ഡ് സര്‍വീസസ് ബില്‍ഡിംഗില്‍ പ്രത്യേക ഒഴിപ്പിക്കല്‍ നടപടിക്രമങ്ങള്‍ നടത്തി. ഡ്രില്‍ സമയത്ത് കൊച്ചിന്‍ ഷിപ്‌യാര്‍ഡിലെ എല്ലാ പ്രവേശന, എക്‌സിറ്റ് ഗേറ്റുകളും അടച്ചിരുന്നു. കൂടാതെ അതത് ഫയര്‍ വാച്ച് ആന്‍ഡ് സേഫ്റ്റി സ്റ്റാഫിന്‍റെ അനുമതിക്ക് ശേഷമാണ് ഹോട്ട് വര്‍ക്ക് പ്രവര്‍ത്തനങ്ങള്‍ പുനഃരാരംഭിച്ചത്. വൈകിട്ട് നാലരയ്ക്ക് ഡ്രില്‍ അവസാനിച്ചതിനുശേഷം അടിയന്തര പ്രതികരണത്തിലെ മികച്ച രീതികള്‍ പ്രദര്‍ശിപ്പിച്ച വിശദീകരണ സെഷന്‍ അരങ്ങേറി.

സിവില്‍ ഡിഫന്‍സ് മോക്ക്‌‌ഡ്രില്‍ പൂര്‍ണം

കൊച്ചി: കേന്ദ്ര ആഭ്യന്തര മന്ത്രാലയത്തിന്‍റെ നിര്‍ദേശപ്രകാരം ജില്ലയിലെ വിവിധ ഇടങ്ങളില്‍ നടത്തിയ സിവില്‍ ഡിഫന്‍സ് മോക്ക് ഡ്രില്‍ പൂര്‍ണം. വൈകുന്നേരം നാലു മുതല്‍ 4.30 വരെയായിരുന്നു മോക്ക് ഡ്രില്‍. നാലോടെ കളക്ടറേറ്റില്‍ അപായ സൈറണുകള്‍ മുഴങ്ങിയതോടെ കളക്ടറേറ്റും പരിസരവും ഇരുട്ടിലായി. ജീവനക്കാര്‍ സുരക്ഷയുടെ ഭാഗമായി ഓഫീസിലെ ലൈറ്റുകള്‍, കംപ്യൂട്ടറുകള്‍, മറ്റ് ഇലക്ട്രിക് ഉപകരണങ്ങള്‍ എല്ലാം ഓഫ് ചെയ്തു സുരക്ഷിതരായി ഓഫീസുകളില്‍ തന്നെ ഇരുന്നു. ഒപ്പം കളക്ടറേറ്റിലെ ഒന്നാം നിലയില്‍ തീ പടര്‍ന്നതോടെ അഗ്നി രക്ഷാ വിഭാഗം സംഭവസ്ഥലത്തേക്ക് കുതിച്ചു. ജില്ലാ കളക്ടറും സംഘവും സംഭവം സ്ഥലത്തെത്തി രക്ഷാപ്രവര്‍ത്തനത്തിന് നേതൃത്വം നല്‍കി. അഗ്‌നിരക്ഷാ വിഭാഗം ലാഡറുകള്‍ ഉപയോഗിച്ച് ഒന്നാം നിലയിലേക്ക് പ്രവേശിച്ച് തീ അണയ്ക്കുന്നതിനുള്ള നടപടികള്‍ ആരംഭിച്ചു. തുടര്‍ന്ന് ഒന്നാം നിലയില്‍ കുടുങ്ങിപ്പോയ ഓഫീസ് ജീവനക്കാരെ പുറത്തെത്തിച്ചു. പരിക്കേറ്റവരെ ആശുപത്രിയിലേക്ക് കൊണ്ടുപോകുന്നതിനുള്ള നടപടികളും അതിവേഗം നടത്തി. നാലരയോടെ രക്ഷാപ്രവര്‍ത്തനങ്ങള്‍ പൂര്‍ത്തിയായതിന്‍റെ സൈറണ്‍ കൂടി മുഴുകിയതോടെ കളക്ടറേറ്റും ഓഫീസും പൂര്‍വ സ്ഥിതിയിലായി. ദുരന്തനിവാരണ വിഭാഗം, അഗ്‌നിശമനസേന, ആരോഗ്യവകുപ്പ്, സിവില്‍ ഡിഫന്‍സ് വിഭാഗം എന്നിവരുടെ നേതൃത്വത്തില്‍ വിവിധ വകുപ്പുകളുടെ പങ്കാളിത്തത്തോടെയാണ് മോക്ക് ഡ്രില്‍ സംഘടിപ്പിച്ചത്. ജില്ലാ കളക്ടര്‍ എന്‍.എസ്.കെ. ഉമേഷ്, അഡീഷണല്‍ ജില്ലാ മജിസ്‌ട്രേറ്റ് വിനോദ് രാജ്, ദുരന്തനിവാരണം ഡെപ്യൂട്ടി കളക്ടര്‍ കെ മനോജ്, ജില്ലാ ഇന്‍ഫര്‍മേഷന്‍ ഓഫീസര്‍ എന്‍.ബി. ബിജു, ഹസാര്‍ഡ് അനലിസ്റ്റ് അഞ്ജലി പരമേശ്വരന്‍, അഗ്‌നി രക്ഷാ വിഭാഗം എന്നിവര്‍ മോക്ക് ഡ്രില്ലിന് നേതൃത്വം നല്‍കി. കളക്ടറേറ്റ് കൂടാതെ ലുലു മാള്‍, കൊച്ചി മെട്രോ, ഹൈക്കോടതി, സിയാല്‍, ഗസ്റ്റ് ഹൗസ് എറണാകുളം, മറൈന്‍ഡ്രൈവ്, ഷിപ്പ്‌യാര്‍ഡ്, ബിസിജി റസിഡന്‍ഷ്യല്‍ ടവര്‍ തമ്മനം, ബിപിസിഎല്‍ കൊച്ചിന്‍ റിഫൈനറി, കൊച്ചി കോര്‍പറേഷന്‍, ജില്ലയിലെ പഞ്ചായത്തുകള്‍ എന്നിവിടങ്ങളിലും മോക്ക് ഡ്രില്‍ നടത്തി. കൊച്ചിന്‍ ഷിപ്‌യാര്‍ഡില്‍ സിവില്‍ ഡിഫന്‍സ് മോക്ക് ഡ്രില്‍ നടത്തി. കേരള ഫയര്‍ ഫോഴ്‌സ്, സിവില്‍ ഡിഫന്‍സ് ടീം, കൊച്ചിന്‍ ഷിപ്‌യാര്‍ഡ് ലിമിറ്റഡ് ഫയര്‍ ആന്‍ഡ് റെസ്‌ക്യൂ, സിഐഎസ്എഫ്, ഡിജിആര്‍ ഗാര്‍ഡ്‌സ് എന്നിവരുമായി സഹകരിച്ചാണ് അഭ്യാസം ഏകോപിപ്പിച്ചത്. അടിയന്തര സാഹചര്യങ്ങള്‍ അനുകരിക്കുന്നതിന് കപ്പല്‍ശാലയിലുടനീളമുള്ള വൈദ്യുതി, ഗ്യാസ് വിതരണങ്ങള്‍ നിര്‍ത്തലാക്കി. സുരക്ഷ ഉറപ്പാക്കാന്‍ കര്‍ശനമായ ചലന നിയന്ത്രണങ്ങള്‍ നടപ്പിലാക്കി. ലുലു മാളില്‍ നടന്ന മോക്ഡ്രില്ലില്‍ ഷോപ്പുകളിലെയും പരിസരങ്ങളിലെയും ലൈറ്റുകള്‍ ഓഫ് ചെയ്തു. അകത്ത് കുടുങ്ങിയവരെ സുരക്ഷയുടെ ഭാഗമായി പുറത്തേക്ക് വിടാതെ സംരക്ഷിച്ചു. അരമണിക്കൂറിനു ശേഷം സുരക്ഷാ മണി മുഴങ്ങിയതോടെ എല്ലാം പൂര്‍വ സ്ഥിതിയിലായി. മെട്രോ സ്റ്റേഷനുകളിലും വൈകുന്നേരം നാലിന് മെട്രോയുടെ ഓപ്പറേഷന്‍ ആന്‍ഡ് കണ്‍ട്രോള്‍ റൂമില്‍ നിന്ന് സൈറണ്‍ മുഴക്കുകയും എല്ലാ സ്‌റ്റേഷനിലേക്കും അറിയിപ്പ് നല്‍കുകയും ചെയ്തു. തുടര്‍ന്ന് കണ്‍ട്രോള്‍ റൂമിലെ ലൈറ്റുകളെല്ലാം ഓഫ് ചെയ്ത് ജീവനക്കാരെല്ലാം ഉള്ളിലെ സുരക്ഷിതമായ സ്ഥലത്ത് ഒത്തുചേർന്നു. വിവിധ സ്‌റ്റേഷനുകളിലും ഈ നടപടിക്രമം പാലിച്ചു. മോക്ക്ഡ്രില്‍ സമയത്ത് സ്‌റ്റേഷനുകളില്‍ എത്തിയ ട്രെയിനുകള്‍ അവിടെ കുറച്ചുസമയം ഡ്രില്ലിന്‍റെ ഭാഗമായി നിര്‍ത്തിയിട്ടശേഷം സര്‍വീസ് പുനരാരംഭിച്ചു. മോക്ക്ഡ്രില്‍ സമയത്ത് സ്‌റ്റേഷനുകളില്‍ എത്തിയ വാട്ടര്‍മെട്രോ ബോട്ടുകളും അതത് സ്‌റ്റേഷനുകളില്‍ കുറച്ചുസമയം നിര്‍ത്തിയിട്ടശേഷം സര്‍വീസ് പുനരാരംഭിച്ചു. മെട്രോ കോര്‍പറേറ്റ് ഓഫീസില്‍ വൈകുന്നേരം നാലിന് സൈറണ്‍ മുഴക്കുകയും മോക്ക് ഡ്രില്‍ സമയം ലൈറ്റുകള്‍ ഓഫ് ചെയ്യുകയും ചെയ്തു.

കാത്തിരിപ്പിനൊടുവില്‍ പിഴലയില്‍ അപ്രോച്ച് റോഡ് റെഡി

കൊച്ചി: മൂന്നുവര്‍ഷം മുമ്പ് നിര്‍മാണം ആരംഭിച്ച പിഴല അപ്രോച്ച് റോഡിന്‍റെ പണികള്‍ ഒടുവില്‍ പൂര്‍ത്തിയായി. നാളെ റോഡ് നാടിന് സമര്‍പ്പിക്കും. 1.94 കോടി രൂപയില്‍ വിവിധ ഘട്ടങ്ങളിലായാണ് റോഡിന്‍റെ നിര്‍ണം പൂര്‍ത്തിയായത്. അവസാനവട്ട മിനുക്കു പണികള്‍ നടക്കുന്ന റോഡില്‍ ഇന്‍റര്‍ലോക്ക് കട്ടകള്‍ വിരിക്കുന്ന ജോലികള്‍ അന്തിമഘട്ടത്തിലാണ്. ഇത് പൂര്‍ത്തിയാകുന്നതോടെ അപ്രോച്ച് റോഡ് പൂര്‍ണമായും സഞ്ചാരയോഗ്യമാകും. കടമക്കുടി പഞ്ചായത്തിലെ 10,11,12 വാര്‍ഡുകളിലായി ഉള്‍പ്പെടുന്ന പിഴല ദ്വീപ് നിവാസികളുടെ യാത്രാ ദുരിതത്തിനാണ് ഇതോടെ പരിഹാരമാകുന്നത്. ഗോശ്രീ ദ്വീപ് വികസന അഥോറിട്ടി (ജിഡ) അധികൃതരുടെ അനാസ്ഥയെ തുടര്‍ന്ന് പ്രദേശത്തുകൂടി രോഗികളും, പ്രായമായവരും, സ്‌കൂള്‍ വിദ്യാര്‍ഥികളുമടക്കം ദുരിതം പേറിയാണ് ദിനവും ചെയ്തിരുന്നത്. നേരത്തെ ഡിസംബറില്‍ പണി പൂര്‍ത്തായാകുമെന്ന് അറിയിച്ചിരുന്നെങ്കിലും ഇത് നീണ്ടുപോയി. പിന്നീട് ഏപ്രില്‍ മാസത്തോടെ പൂര്‍ത്തീകരിക്കുമെന്ന് അധികൃതര്‍ ഉറപ്പ് നല്‍കിയ പണികളാണ് ഇപ്പോള്‍ പൂര്‍ത്തീകരിച്ചിരിക്കുന്നത്. അപ്രോച്ച് റോഡ് നിര്‍മാണം വേഗത്തില്‍ പൂര്‍ത്തിയാക്കണമെന്ന് ആവശ്യപ്പെട്ട് റോഡ് സംരക്ഷണ സമിതിയുടെ നേതൃത്വത്തില്‍ പ്രദേശത്തും ജിഡ ഓഫീസിലേക്കും നിരവധി പ്രതിഷേധ സമരങ്ങള്‍ നടത്തിയിരുന്നു. കാത്തിരുന്നത് മൂന്ന് വര്‍ഷം വര്‍ഷങ്ങള്‍ നീണ്ട ആവശ്യത്തിനൊടുവിലാണ് പിഴല പാലം നിര്‍മാണത്തിന് ഗോശ്രീ ദ്വീപ് വികസന അഥോറിട്ടി(ജിഡ) അനുമതി നല്‍കിയത്. ഒടുവില്‍ 2013 ഡിസംബര്‍ 19ന് പാലം നിര്‍മാണം ആരംഭിച്ചു. 18 മാസം കൊണ്ട് പൂര്‍ത്തീകരിക്കുമെന്നായിരുന്നു വാഗ്ദാനം. എന്നാല്‍ നീണ്ടത് വര്‍ഷങ്ങളാണ്. ഇതോടെ പൊറുതിമുട്ടിയ പ്രദേശവാസികള്‍ പ്രതിഷേധവുമായി രംഗത്തിറങ്ങിയതോടെയാണ് ഏഴ് വര്‍ഷത്തിന് ശേഷം 2020ല്‍ നിര്‍മാണം പൂര്‍ത്തിയാക്കി പാലം തുറന്നുനല്‍കിയത്. എന്നാല്‍ പിഴലയിലേക്ക് എത്തിപ്പെടാന്‍ അപ്രോച്ച് റോഡ് നിര്‍മിക്കാത്തതു മൂലം പാലം പൂര്‍ണ തോതില്‍ ഉപയോഗിക്കാന്‍ നാളിതുവരെ പ്രദേശവാസികള്‍ക്കായില്ല. അഞ്ച് കിലോമീറ്റര്‍ ദൈര്‍ഘ്യമുളള ദ്വീപില്‍ രണ്ടര മീറ്ററില്‍ താഴെയാണ് റോഡിന് വീതി. ഇതുമൂലം പാലം വരെ മാത്രമാണ് വാഹനങ്ങള്‍ വരുന്നത്. അപ്രോച്ച് റോഡിനായുള്ള ആവശ്യം ശക്തമായതോടെ 350 മീറ്റര്‍ നീളമുളള അപ്രോച്ച് നിര്‍മാണവും പിന്നീട് ആരംഭിക്കുകയായിരുന്നു.

കൊച്ചിയിലെ മാലിന്യ പ്രശ്നം പരിഹരിക്കാന്‍ 3716.10 കോടിയുടെ പദ്ധതി

കൊച്ചി: കൊച്ചി നഗരത്തിലെ മാലിന്യ പ്രശ്ന പരിഹാരത്തിന് 3716.10 കോടിയുടെ പദ്ധതിയുമായി സംസ്ഥാന സര്‍ക്കാര്‍. നഗരത്തിലെ ആറ് കനാലുകളെ തമ്മില്‍ ബന്ധിപ്പിച്ചാണ് ഇന്‍റഗ്രേറ്റഡ് അര്‍ബന്‍ ഡെവലപ്‌മെന്‍റ് വാട്ടര്‍ റീജനറേഷന്‍ ആൻഡ് സീവേജ് ട്രീറ്റ്‌മെന്‍റ് പദ്ധതി നടപ്പാക്കുന്നത്. കഴിഞ്ഞ ദിവസം ചേര്‍ന്ന മന്ത്രിസഭാ യോഗത്തിലായിരുന്നു പദ്ധതി ആവിഷ്‌കരിച്ചത്. മലിനജലം ശാസ്ത്രീയമായി ഒഴുക്കികളയാന്‍ ലക്ഷ്യമിടുന്ന പദ്ധതിയില്‍ 105 എംഎല്‍ടി ശേഷിയുള്ള രണ്ട് സീവേജ് ട്രീറ്റ്‌മെന്‍റ് പ്ലാന്‍റുകളാണുള്ളതെന്ന് കാക്കനാട് കിന്‍ഫ്ര കണ്‍വന്‍ഷന്‍ സെന്‍ററില്‍ നടന്ന മുഖ്യമന്ത്രിയുടെ ജില്ലാതല അവലോകന യോഗത്തില്‍ സംസാരിക്കുന്നതിനിടെ മന്ത്രി പി. രാജീവ് പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]