ക​ച്ചേ​രി​ക്ക​ട​വി​ലെ കാ​ട്ടാ​ന​ശ​ല്യം; റേ​ഞ്ച​ർ ഉ​ൾ​പ്പെ​ടെ​യു​ള്ള ഉ​ദ്യോ​ഗ​സ്ഥ​രെ മ​ണി​ക്കൂ​റു​ക​ളോ​ളം ത​ട​ഞ്ഞു​വ​ച്ചു
Thursday, September 26, 2024 7:58 AM IST
ഇ​രി​ട്ടി: അ​യ്യ​ൻ​കു​ന്ന് പ​ഞ്ചാ​യ​ത്തി​ലെ ക​ച്ചേ​രി​ക്ക​ട​വ്, പാ​ല​ത്തി​ൻ​ക​ട​വ് മേ​ഖ​ല​ക​ളി​ൽ മാ​സ​ങ്ങ​ളാ​യി തു​ട​രു​ന്ന കാ​ട്ടാ​ന​ശ​ല്യ​ത്തി​ൽ പൊ​റു​തി​മു​ട്ടി​യ ക​ർ​ഷ​ക​രും ജ​ന​പ്ര​തി​നി​ധി​ക​ളും വ​ന​പാ​ല​ക സം​ഘ​ത്തെ ഏ​ഴു മ​ണി​ക്കൂ​റോ​ളം കൃ​ഷി​യി​ട​ത്തി​ൽ ത​ട​ഞ്ഞു​വ​ച്ചു. ഒ​രാ​ഴ്ച​യ്ക്കി​ടെ മൂ​ന്നാം ത​വ​ണ​യും ജ​ന​വാ​സ മേ​ഖ​ല​യി​ൽ കാ​ട്ടാ​ന വ്യാ​പ​ക കൃ​ഷി​നാ​ശം വ​രു​ത്തി​യ സാ​ഹ​ച​ര്യ​ത്തി​ലാണ് ഉ​ദ്യോ​ഗ​സ്ഥ​രെ ത​ട‌​ഞ്ഞു​വ​ച്ച​ത്.

ക​ഴി​ഞ്ഞ രാ​ത്രി വെ​ട്ടി​ക്കാ​ട്ടി​ൽ ഡൊ​മി​നി​ക്കി​ന്‍റെ കൃ​ഷി​യി​ട​ത്തി​ൽ എ​ത്തി​യ ആ​ന​ക്കൂ​ട്ടം കൂ​റ്റ​ൻ തെ​ങ്ങ് ഉ​ൾ​പ്പെ​ടെ പി​ഴു​തെ​റി​ഞ്ഞു. ര​ണ്ടുവ​ർ​ഷം മു​ന്പ് ഇ​തേ സ്ഥ​ല​ത്ത് വ​ച്ച് കാ​ട്ടാ​ന ആ​ക്ര​മി​ച്ച​തി​നെ തു​ട​ർ​ന്ന് ഡൊ​മി​നി​ക്കി​ന് ഗു​രു​ത​ര​ പ​രി​ക്കേ​റ്റി​രു​ന്നു.

കാ​ട്ടാ​ന കൃ​ഷി ന​ശി​പ്പി​ച്ച​ത​റി​ഞ്ഞ് ഇ​ന്ന​ലെ രാ​വി​ലെ ഒ​ൻ​പ​തോ​ടെ സ്ഥ​ല​ത്തെ​ത്തി​യ സെ​ക്ഷ​ന്‍ ഫോ​റ​സ്റ്റ് ഓ​ഫീ​സ​ർ സി. ​സു​നി​ൽ​കു​മാ​ർ, ബീ​റ്റ് ഫോ​റ​സ്റ്റ് ഓ​ഫീ​സ​ർ​മാ​രാ​യ പി. ​കൃ​ഷ്ണ​ശ്രീ, രാ​ഹു​ൽ, രാ​ജീ​വ് എ​ന്നി​വ​രെ​യാ​ണ് അ​യ്യ​ൻ​കു​ന്ന് പ​ഞ്ചാ​യ​ത്ത് പ്ര​സി​ഡ​ന്‍റ് കു​ര്യാ​ച്ച​ൻ പൈ​ന്പ​ള്ളി​ക്കു​ന്നേ​ലി​ന്‍റെ നേ​തൃ​ത്വ​ത്തി​ൽ ജ​ന​പ്ര​തി​നി​ധി​ക​ളും ക​ർ​ഷ​ക​രും നാ​ട്ടു​കാ​രും ചേ​ർ​ന്ന് ആ​ദ്യം ത​ട​ഞ്ഞു​വ​ച്ച​ത്.

ഡി​എ​ഫ്ഒ സ്ഥ​ല​ത്തെ​ത്തി കാ​ട്ടാ​ന​ശ​ല്യ​ത്തി​ന് ശാ​ശ്വ​ത പ​രി​ഹാ​രം ഉ​റ​പ്പാ​ക്കി​യാ​ലേ ജീ​വ​ന​ക്കാ​രെ വി​ട്ടു​ന​ൽ​കു​ക​യു​ള്ളൂ​വെ​ന്ന് പ്ര​തി​ഷേ​ധ​ക്കാ​ർ അ​റി​യി​ച്ചു. ഇ​തി​നി​ടെ വി​വ​ര​മ​റി​ഞ്ഞ് പോ​ലീ​സെത്തി ച​ർ​ച്ച​ക​ൾ ന​ട​ത്തി​യെ​ങ്കി​ലും ജ​ന​ങ്ങ​ൾ നി​ല​പാ​ടി​ൽ ഉ​റ​ച്ചു​നി​ന്നു.

‌തു​ട​ർ​ന്ന് പ​തി​നൊ​ന്നോ​ടെ കൊ​ട്ടി​യൂ​ർ റേ​ഞ്ച​ർ പി. ​പ്ര​സാ​ദ് സ്ഥ​ല​ത്തെ​ത്തി സോ​ളാ​ർ വേ​ലി നി​ർ​മാ​ണ​വു​മാ​യി ബ​ന്ധ​പ്പെ​ട്ട് നേ​രി​ടു​ന്ന ത​ട‌​സ​ങ്ങ​ൾ ബോ​ധ്യ​പ്പെ​ടു​ത്താ​ൻ ശ്ര​മി​ച്ചെ​ങ്കി​ലും പ്ര​തി​ഷേ​ധ​ക്കാ​ർ വി​ട്ടു​വീ​ഴ്ച​യ്ക്ക് ത​യാ​റാ​യി​ല്ല. ഡി​എ​ഫ്ഒ എ​ത്താ​തെ റേ​ഞ്ച​റെ​യും തി​രി​ച്ചു​പോ​കാ​ൻ അ​നു​വ​ദി​ക്കി​ല്ലെ​ന്ന് ഇ​വ​ർ പ​റ​ഞ്ഞു. സം​ഭ​വ​മ​റി​ഞ്ഞ് ക​രി​ക്കോ​ട്ട​ക്ക​രി സി​ഐ കെ.​ജെ. ബി​നോ​യി​യു​ടെ നേ​തൃ​ത്വ​ത്തി​ൽ ഇ​രി​ട്ടി, ഉ​ളി​ക്ക​ൽ സ്റ്റേ​ഷ​നു​ക​ളി​ൽ നി​ന്ന് കൂ​ടു​ത​ൽ പോ​ലീ​സും സ്ഥ​ല​ത്തെ​ത്തി.

ഇതിനിടെ ജി​ല്ലാ പോ​ലീ​സ് മേ​ധാ​വി ഇ​ട​പെ​ടു​ക​യും സം​ഭ​വ​സ്ഥ​ല​ത്ത് സു​ര​ക്ഷാ​പ്ര​ശ്ന​ങ്ങ​ളു​ടെ അ​ടി​സ്ഥാ​ന​ത്തി​ൽ ഡി​എ​ഫ്ഒ വ​രി​ല്ലെ​ന്നും അ​റി​യി​ച്ചു. ഇ​രി​ട്ടി ഐ​ബി​യി​ലോ മ​റ്റ് സു​ര​ക്ഷി​ത​സ്ഥ​ല​ത്തോ വ​ച്ച് ച​ർ​ച്ച നടത്ത ാൻ ഡി​എ​ഫ്ഒ ത​യാ​റാ​ണെ​ന്നും പോ​ലീ​സ് മേ​ധാ​വി സ​മ​ര​ക്കാ​രെ അ​റി​യി​ച്ചു.

ഇ​രി​ട്ടി​യി​ൽ വ​ച്ച് ച​ർ​ച്ച ന​ട​ത്താ​മെ​ന്ന നി​ർ​ദേ​ശം തള്ളിയ പ​ഞ്ചാ​യ​ത്ത് പ്ര​സി​ഡ​ന്‍റ് ഉ​ൾ​പ്പ​ടെ​യു​ള്ള​വ​ർ ക​ച്ചേ​രി​ക്ക​ട​വ് പ​ള്ളി ഹാ​ളി​ൽ വ​ച്ച് ച​ർ​ച്ചയ്ക്ക് തയാറാണെന്നും അറിയിച്ചു.

തു​ട​ർ​ന്ന് ഉ​ച്ച​ക​ഴി​ഞ്ഞ് മൂ​ന്നോ​ടെ ഡി​എ​ഫ്ഒ എ​സ്. വൈ​ശാ​ഖ് എ​ത്തി പ്ര​ശ്ന​ത്തി​ന് ക്രി​യാ​ത്മ​ക നി​ല​പാ​ട് സ്വീ​ക​രി​ക്കു​മെ​ന്ന് ഉ​റ​പ്പ് ന​ൽ​കി. ഇ​തി​നു പി​ന്നാ​ലെ പാ​രീ​ഷ് ഹാ​ളി​ൽ വച്ച് ജ​ന​പ്ര​തി​നി​ധി​ക​ളു​മാ​യി ഡി​എ​ഫ്ഒ ച​ർ​ച്ച​യും ന​ട​ത്തി. ഇ​തോ​ടെ​യാ​ണ് പ്ര​തി​ഷേ​ധം അ​വ​സാ​നി​പ്പി​ച്ച​തും ത​ട​ഞ്ഞുവച്ച​വ​രെ പോ​കാ​ൻ അ​നു​വ​ദി​ച്ച​തും.

തൂ​ക്കു​വേ​ലി നി​ർ​മാ​ണ ക​രാ​ർ ഇ​ന്ന് ഉ​റ​പ്പി​ക്കു​മെ​ന്ന് ഡി​എ​ഫ്ഒ​യു​ടെ ഉ​റ​പ്പ്

ഇ​രി​ട്ടി: ക​ച്ചേ​രി​ക്ക​ട​വ് മു​ത​ൽ ബാ​രാ​പോ​ൾ വ​രെ ര​ണ്ട് റീ​ച്ചു​ക​ളാ​യി ന​ട​ക്കു​ന്ന ഏ​ഴു കി​ലോ​മീ​റ്റ​റി​ൽ തൂ​ക്കുവേ​ലി നി​ർ​മി​ക്കു​ന്ന​തി​ന് 53.8 ല​ക്ഷം രൂ​പ​യു​ടെ പ്ര​വൃ​ത്തി​ക്ക് ല​ഭി​ച്ച ക്വ​ട്ടേ​ഷ​ൻ ഇ​ന്നു വൈ​കു​ന്നേ​ര​ത്തോ​ടെ തു​റ​ന്ന് ക​രാ​ർ ന​ട​പ​ടി​ക​ൾ സ്വീ​ക​രി​ക്കു​മെ​ന്ന് ച​ർ​ച്ച​യി​ൽ ഡി​എ​ഫ്ഒ എ​സ്. വൈ​ശാ​ഖിന്‍റെ ഉ​റ​പ്പ്. വേ​ലി നി​ർ​മാ​ണ​ത്തി​ന്‍റെ ഗു​ണ​നി​ല​വാ​രം, മേ​ൽ​നോ​ട്ടം തു​ട​ങ്ങി​യ ചു​മ​ത​ല​ക​ൾ കു​റ​ഞ്ഞ നി​ര​ക്ക് രേ​ഖ​പ്പെ​ടു​ത്തി​യ സി​ൽ​ക്ക് ക​മ്പ​നി​ക്ക് ന​ൽ​കും.

അ​യ്യ​ൻ​കു​ന്ന് പ​ഞ്ചാ​യ​ത്തി​ലെ വ​നാ​തി​ർ​ത്തി​ക​ൾ മു​ഴു​വ​ൻ കൃ​ഷിവ​കു​പ്പി​ന്‍റെ സ​ഹാ​യ​ത്തോ​ടെ നി​ർ​മി​ക്കു​ന്ന 2.20 കോ​ടി​യു​ടെ പ്ര​തി​രോ​ധ​വേ​ലി നി​ർ​മാ​ണ​ത്തി​നു​ള്ള ടെ​ൻ​ഡ​ർ ന​ട​പ​ടി​ക​ൾ പൂ​ർ​ത്തി​യാ​യി ധാ​ര​ണാ​പ​ത്രം അ​ടു​ത്ത ദി​വ​സം ത​ന്നെ ഒ​പ്പു​വ​യ്ക്കു​ം. നി​ല​വി​ലു​ള്ള വേ​ലി​ക​ളു​ടെ പ​രി​പാ​ല​ന​വും അ​റ്റ​കു​റ്റ​പ​ണി​ക​ളും വ​നം​വ​കു​പ്പി​ന്‍റെ നേ​തൃ​ത്വ​ത്തി​ൽ പൂ​ർ​ത്തി​യാ​ക്കുമെ​ന്നും അ​ദ്ദേ​ഹം ഉ​റ​പ്പു​ന​ൽ​കി.

ച​ർ​ച്ച​യി​ൽ അ​യ്യ​ൻ​കു​ന്ന് പ​ഞ്ചാ​യ​ത്ത് പ്ര​സി​ഡ​ന്‍റ് കുര്യാച്ചൻ പൈന്പള്ളിക്കുന്നേൽ, വൈ​സ് പ്ര​സി​ഡ​ന്‍റ് ബീ​ന റോ​ജ​സ്, സ്റ്റാ​ൻ​ഡിം​ഗ് ക​മ്മി​റ്റി ചെ​യ​ർ​മാ​ൻ​മാ​രാ​യ ഐ​സ​ക് ജോ​സ​ഫ്, സീ​മ സ​നോ​ജ്, സി​ന്ധു ബെ​ന്നി, പ​ഞ്ചാ​യ​ത്ത് അം​ഗ​ങ്ങ​ളാ​യ ബി​ജോ​യ് പ്ലാ​ത്തോ​ട്ടം, ജോ​സ് എ ​വ​ൺ, മി​നി വി​ശ്വ​നാ​ഥ​ൻ, സ​ജി മ​ച്ചി​താ​ന്നി, ഫി​ലോ​മി​ന മാ​ണി, സി​ബി വാ​ഴ​ക്കാ​ല, ഷൈ​നി വ​ർ​ഗീ​സ്, ജോ​സ​ഫ് വ​ട്ടു​കു​ളം, ലി​സി തോ​മ​സ്, ബ്ലോ​ക്ക് പ​ഞ്ചാ​യ​ത്ത് അം​ഗം ജോ​ളി ജോ​ൺ, സെ​ലീ​ന ബി​നോ​യി, എ​ൽ​സ​മ്മ ജോ​സ​ഫ് , ക​ച്ചേ​രി​ക്ക​ട​വ് സെ​ന്‍റ് ജോ​ർ​ജ് പ​ള്ളി വി​കാ​രി ഫാ. ​മാ​ത്യു പൊ​ട്ടം​പ്ലാ​ക്ക​ൽ, ക​ത്തോ​ലി​ക്ക കോ​ൺ​ഗ്ര​സ് പ്ര​തി​നി​ധി​ക​ൾ എ​ന്നി​വ​ർ പ​ങ്കെ​ടു​ത്തു.