ബേക്കൽ: ഇൻസ്റ്റഗ്രാം വഴി ഓർഡറുകൾ സ്വീകരിച്ച് അഞ്ചാംക്ലാസ് മുതൽ എട്ടാംക്ലാസ് വരെ പഠിക്കുന്ന കുട്ടികൾക്ക് ഇ-സിഗരറ്റുകൾ എത്തിച്ചുനല്കിയ യുവാവ് പിടിയിൽ. ബേക്കൽ സ്വദേശി ജാഫറിനെയാണ് നാട്ടുകാർ പിടികൂടി ബേക്കൽ പോലീസിന് കൈമാറിയത്.
1500 രൂപ മുതൽ 2500 രൂപ വരെ വിലയുള്ള ഇ-സിഗരറ്റുകളാണ് ഇയാൾ കുട്ടികൾക്ക് എത്തിച്ചുനല്കിയിരുന്നത്. കുട്ടികൾ ഇയാൾക്ക് ഓൺലൈനായി പണം നല്കുകയായിരുന്നു. പള്ളിക്കര, കല്ലിങ്കാൽ, പൂച്ചക്കാട്, ബേക്കൽ ഭാഗങ്ങളിലുള്ള പല കുട്ടികളും ഇത്തരത്തിൽ ഇയാളിൽ നിന്ന് ഇ-സിഗരറ്റുകൾ വാങ്ങി ഉപയോഗിച്ചിരുന്നു. ഇക്കാര്യം നാട്ടുകാരുടെ ശ്രദ്ധയിൽ പെട്ടതോടെയാണ് ഒരു കുട്ടിയെക്കൊണ്ട് ഇൻസ്റ്റഗ്രാം വഴി ഓർഡർ ചെയ്യിച്ച് ഇയാളെ വിളിച്ചുവരുത്തി കുടുക്കിയത്.