ഓമശേരി: വിദ്യാലയ അങ്കണത്തിൽ ജൈവവൈവിധ്യ പാർക്കും വിദ്യാവനവുമൊരുക്കി മികച്ച മാതൃക സൃഷ്ടിച്ചിരിക്കുകയാണ് വേനപ്പറ ലിറ്റിൽ ഫ്ലവർ യുപി സ്കൂൾ. ഒരേ സമയം മുന്നൂറിലേറെ കുട്ടികൾക്ക് ഒന്നിച്ചിരുന്ന് പരിപാടികളിൽ പങ്കെടുക്കാനും വിശ്രമിക്കാനുമുള്ള ഇരിപ്പിട സൗകര്യം പാർക്കിലൊരുക്കിയിട്ടുണ്ട്.
20 സെന്‍റ് സ്ഥലത്ത് മുളങ്കൂട്ടങ്ങളും വ്യത്യസ്ത ഇനങ്ങളിൽപ്പെട്ട വൃക്ഷത്തൈകളും നട്ടുപിടിപ്പിച്ചിട്ടുള്ള പാർക്ക്, വിദ്യാർഥികളിൽ ജൈവ വൈവിധ്യ സംരക്ഷണ അവബോധവും പരിസ്ഥിതി സ്നേഹവും വളർത്തുന്നതിനും വിദ്യാലയ പരിസരം പച്ചപ്പിൽ നിലനിർത്തുന്നതിനും ഉപകരിക്കും. ജൈവ വൈവിധ്യ പാർക്കിന്‍റെ ഉദ്ഘാടനം നാളെ രാവിലെ 10ന് ലിന്‍റോ ജോസഫ് എംഎൽഎ നിർവഹിക്കും. സ്കൂൾ മാനേജർ ഫാ. സജി മങ്ങരയിൽ അധ്യക്ഷത വഹിക്കുന്ന യോഗത്തിൽ താമരശേരി കോർപറേറ്റ് മാനേജർ ഫാ. ജോസഫ് വർഗീസ് പാലക്കാട്ട് മുഖ്യാതിഥിയായി പങ്കെടുക്കും..