ഡ്രൈവറുടെ അശ്രദ്ധ; ടോള്‍ പ്ലാസയില്‍ ടോറസ് ലോറി കാറിനെ ഇടിച്ചുനീക്കി
Saturday, June 29, 2024 1:34 AM IST
പാലിയേക്കര (തൃശൂർ): ടോള്‍പ്ലാസയില്‍ അശ്രദ്ധമായി പിറകോട്ടെടുത്ത ടോറസ് ലോറി കാറിനെ ഇടിച്ചുനീക്കി. ഒഴിവായതു വന്‍ദുരന്തം. കാറിനെ തള്ളിനീക്കി ലോറി മീറ്ററുകളോളം നീങ്ങി. വ്യാഴാഴ്ചയായിരുന്നു സംഭവം.
ഫാസ്ടാഗില്‍ പണമില്ലാത്തതിനാല്‍ ടോറസ് ലോറി ഡ്രൈവര്‍ അശ്രദ്ധമായി വാഹനം ടോള്‍ബൂത്തില്‍നിന്നു പിറകോട്ട് എടുക്കുകയായിരുന്നു. ലോറിയുടെ പിറകിലുണ്ടായിരുന്ന കാര്‍ ലോറിക്കടിയില്‍പ്പെട്ടു.
കാർഡ്രൈവറും മറ്റു ട്രാക്കുകളിലുണ്ടായിരുന്നവരും നിര്‍ത്താതെ ഹോണ്‍ മുഴക്കിയിട്ടും ലോറിഡ്രൈവര്‍ ശ്രദ്ധിച്ചില്ല. കാറിലെ യാത്രക്കാര്‍ പരിക്കേല്‍ക്കാതെ രക്ഷപ്പെട്ടു.
സമാനമായ മറ്റൊരു സംഭവവും അന്നേദിവസം തന്നെ ഉണ്ടായി. ടോള്‍ബൂത്തില്‍ ജീവനക്കാരുടെ നിര്‍ദേശപ്രകാരം മാത്രമേ വാഹനം പിറകോട്ട് എടുക്കാവൂ എന്ന് ടോള്‍പ്ലാസ അധികൃതര്‍ അറിയിച്ചു.